དགོངས་གཏེར་ཐུགས་ཀྱི་ཀློང་གསལ་ལས་ལྷ་ཆེན་ཡེ་བརྫུ་གཉན་པོའི་སྒྲུབ་ཐབས།
དགོངས་གཏེར་ཐུགས་ཀྱི་ཀློང་གསལ་ལས་ལྷ་ཆེན་ཡེ་བརྫུ་གཉན་པོའི་སྒྲུབ་ཐབས་བཞུགས་སོ༔
ན་མོ་གུ་རུ་དྷེ་ཝ་ཌཱ་ཀི་ནི་ཧཱུྃ༔ རྩ་བ་གསུམ་ལ་གུས་པས་ཕྱག་འཚལ་ནས༔ ཡེ་བརྫུ་མཆོད་ཅིང་བསྟེན་པའི་གདམས་པ་བྲི༔ དར་རམ་རས་སམ་ཤོག་བུ་གཙང་མ་ལ༔ ཡེ་བརྫུ་མཆེད་གསུམ་བྲིས་པ་སྐུ་ཡི་རྟེན༔ དེ་ཡི་རྒྱབ་ཏུ་སོ་སོའི་སྲོག་སྔགས་ལ༔ ཏིཥྛ་ལྷན་བཏགས་བྲིས་པ་གསུང་གི་རྟེན༔ མདའ་ལ་དར་ཚོན་བཏགས་པ་ཡོན་ཏན་རྟེན༔ ཁྲབ་བྱང་རྔ་ཁྲབ་བཏགས་པ་ཕྲིན་ལས་རྟེན༔ དེ་ལ་རྒྱུན་དུ་བསྟིམ་ཞིང་གཤེགས་མི་བྱ༔ གཞན་ཡང་རྒྱུན་དུ་འཚག་ངེས་གོ་ཁྲབ་དང་༔ མདའ་གཞུ་རལ་གྲི་ཁོ་ཡི་རྟེན་དུ་དམིགས༔ གཏོར་མ་མཁར་ཐབས་སྟེང་དུ་ཟུར་གསུམ་གསུམ༔ ར་སྟག་ཝ་ཡི་མགོ་ཡིས་མཚན་པར་བྱ༔ ཤ་དམར་ལ་སོགས་བརྒྱན་གྱིས་བྱུག་པ་དང་༔ མར་རྒྱན་ཉི་ཟླ་སྐར་མ་གསུམ་དུ་
བྱ༔ ཕྱེ་མར་ཟས་ཕུད་བཟང་ཤིང་དུད་པ་བྱ༔ གསེར་སྐྱེམས་ཕུད་རྒོད་ལ་སོགས་འཇོམས་ན་རབ༔ མེད་ན་གཏོར་མ་ཟུར་གསུམ་རྩེ་གསུམ་མམ༔ གང་རུང་ཟས་ཕུད་བྲན་ནས་འདོན་ཡང་རུང་༔ རང་ཉིད་པད་འབྱུང་ངམ་ནི་ཡི་དམ་ལྷར༔ གསལ་བའི་ཐུགས་ལས་འོད་ཟེར་ལྕགས་ཀྱུ་ལྟར༔ འཕྲོས་པས་རང་བཞིན་གནས་ནས་སྤྱན་དྲངས་ནས༔ རང་མདུན་བཀའོ་ཉན་གསུང་སྡོད་བྱེད་པར་བསྒོམ༔ འཇིག་རྟེན་པ་དང་རྒྱུད་པའི་དྲེགས་པ་ལ༔ དམ་ཚིག་བསྐྱེད་པའི་མངོན་རྟོགས་མི་དགོས་སོ༔ སྐད་ཅིག་སྤྱན་དྲངས་མདུན་དུ་བཞུགས་པར་དམིགས༔ གྱེར་སྒོམ་སྦྲགས་པས་རོལ་མོ་དབྱངས་དང་བཅས༔ ཧཱུྃ༔ དཔལ་ཆེན་ཆེ་མཆོག་པདྨ་ཐོད་ཕྲེང་གིས༔ བཀའ་དང་དམ་ལ་བཏགས་པའི་དམ་ཚིག་ཅན༔ སྲིད་
པའི་དགྲ་བླ་ཡེ་བརྫུ་འཁོར་དང་བཅས༔ མཆོད་པའི་གནས་འདིར་སྤྱན་འདྲེན་གཤེགས་སུ་གསོལ༔ ཡིད་སྤྲུལ་གཙོ་འཁོར་འཚམས་པའི་གདན་ལ་བཞུགས༔ སྔོན་གྱི་དམ་ཚིག་གཉན་པོ་དགོངས་མཛོད་ལ༔ བདག་གིས་གང་བཅོལ་ཕྲིན་ལས་འགྲུབ་པར་མཛོད༔ བཛྲ་ས་མ་ཡ་ཛ༔ ཛཿཧཱུྃ་བཾ་ཧོ༔ ཏིཥྛ་ལྷན༔ ས་མ་ཡ་ཧོ༔ ཧཱུྃ༔ དགྲ་བླ་ཡེ་བརྫུ་གཉན་པོ་འཁོར་བཅས་ལ༔ དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི༔ ཉེར་སྤྱོད་བདུན་དང་འདོད་པའི་ཡོན་ཏན་ལྔ༔ བཀྲ་ཤིས་རྫས་རྟགས་བརྒྱད་དང་རིན་ཆེན་བདུན་དར་ཟབ་གོ་མཚོན་མདའ་དར་མདུང་དར་དང་༔ ཇ་ཆང་སྐྱེམས་ཕུད་བདུད་རྩི་ཨ་མྲྀ་ཏ༔ དཀར་གསུམ་མངར་གསུམ་ཤིང་ཐོག་རིན་ཆེན་འབྲུ༔ ཁྱད་པར་གཏོར་མ་ཡེ་ཤེས་བདུད་རྩིའི་མཚོ༔ ཁ་དོག་དྲི་རོ་ནུས་པ་ཕུན་ཚོགས་པ༔ ཧ་ཧོཧྲཱིདང་ཨོཾ་ཨཱཿཧཱུྃ་རྣམས་ཀྱིས༔ ཟད་མེད་ནམ་མཁའི་མཛོད་དུ་བྱིན་བརླབས་ནས༔ འབུལ་ལོ་མཆོད་དོ་མཉེས་ཤིང་ཚིམས་གྱུར་ཅིག༔ ཨོཾ་ཨོཾ་ཧེ་ལ་ཧེ་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ ཡ་ཡ་ཁུ་ཡེ་ཁུ་ཡེ་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ འོ་འོ་འབང་པོ་སྤང་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ ཨནྡྷཾ་སོགས།
ཧཱུྃ༔ སྲིད་པའི་དགྲ་བླ་ཡེ་བརྫུ་ནི༔ སྐུ་མདོག་དམར་ལ་འོད་ཟེར་འབར༔ ཞལ་ནི་ཁྲོ་འཛུམ་བརྗིད་པའི་ཞལ༔ སྐུ་ལ་དར་ནག་བེར་ཆེན་གསོལ༔ གསེར་སྐད་རིན་ཆེན་སྐེད་ལ་བཅིངས༔ སྟག་རལ་གཡས་ལ་གཟིག་ཤུབས་གཡོན༔ ཕྱག་གཡས་ར་ཡི་མདུང་དར་ཕྱརོ༔ དགྲ་བླའི་དམག་ཚོགས་ཁ་ལོ་སྒྱུར༔ ཕྱག་གཡོན་དགྲ་མགོ་ཁྲག་འཛག་བསྣམས༔ ཞབས་ལ་སག་ཏིའི་རྒྱན་ལྷམ་གསོལ༔ ཆིབས་སུ་ར་སྐྱེས་ཁམས་པ་ཆིབས༔ སྲིད་པའི་རླུང་བཞིན་ཀུན་ཏུ་རྒྱུག༔ སྤྲུལ་པ་ར་སྐྱེས་ཁམས་པ་འགྱེད༔ ཧཱུྃ༔ ཤར་གྱི་ཕྱོགས་ཀྱི་བློན་པོ་བདུན༔ མི་ལྗང་རྟ་ལྗང་འཁོར་གསུམ་ཅན༔ གཡས་པས་མི་ནུབ་རྒྱལ་མཚན་ཕྱར༔ གཡོན་པས་རལ་གྲི་བསམ་ཆོད་འཛིན༔ ལྷོ་ཡི་ཕྱོགས་ཀྱི་བཀའ་བློན་བརྒྱད༔ མི་དཀར་རྟ་དཀར་སྟག་ཆས་ཅན་ཕྱག་གཡས་དཔག་བསམ་ལྗོན་ཤིང་དང་༔ གཡོན་པས་གཅོད་པའི་སཱུ་མོ་འཛིན༔ ནུབ་ཀྱི་ཕྱོགས་ཀྱི་བཀའ་བློན་མི་དཀར་རྟ་དཀར་དམག་ཆས་ཅན༔ གཡས་པས་རལ་གྲི་གཡོན་རྡོ་རྗེ༔ བྱང་གི་ཕྱོགས་ཀྱི་བློན་པོ་དགུ༔ མཐིང་མདོག་སྟག་རལ་གཟིག་ཤུབས་ཅན༔ བུམ་སྐྱོགས་
འཛིན་ཅིང་རྟ་སྔོན་ཆིབས༔ ཡེ་བརྫུ་འཁོར་དང་བཅས་ལ་བསྟོད༔ ཧཱུྃ༔ ཡེ་བརྫུ་གཉན་པོའི་ཕུ་བོ་ནི༔ སྐུ་མདོག་མཐིང་ནག་བརྗིད་པའི་ཞལ༔ སྐུ་ལ་དར་ནག་འཇོལ་བེར་གསོལ༔ ཕྱག་གཡས་ཁྲོ་ཆུའི་ཐོ་བ་ཕྱར༔ གཡོན་པས་རྣོ་དབལ་ཆུ་གྲི་བརྡར༔ ཆབས་སུ་ཟངས་ཀྱི་ཝ་མོ་ཆིབས༔ གློག་དམར་བང་གིས་འཇིག་རྟེན་ཉུལ༔ སྤྲུལ་པ་བུ་ཆུང་མཛེས་པ་འགྱེད༔ གཡས་ཀྱི་ཕྱོགས་ནས་རུ་འདྲེན་པ༔ འཇིགས་པའི་མི་ནག་ཆེན་པོ་བཅུ༔ རྫུ་འཕྲུལ་གཤོག་པ་བྱ་ལྟར་འཇུམ༔ ལག་ན་གླང་རྭའི་རྭ་ཟོར་འཕེན༔ གཡོན་གྱི་ཕྱོགས་ནས་རུ་འདྲེན་པ༔ སྐྱེས་ཕྲན་མི་དཀར་མཛེས་པ་དགུ༔ གཡས་གཡོན་གཉིས་ན་ཏ་ལ་ཡི༔ ལོ་མའི་སྒྲོ་བ་འབྲས་བུས་བཀང་༔ ཡིད་བཞིན་ནོར་གྱི་དངོས་གྲུབ་སྩོལ༔ ཨ་ཇོ་འཁོར་དང་བཅས་ལ་བསྟོད༔ ཧཱུྃ༔ དགྲ་བླ་ཡེ་བརྫུའི་ནུ་བོ་ནི་མི་སེར་ཁྲོ་འཛུམ་གནོད་སྦྱིན་ཚུལ༔ སྐུ་ལ་དར་ལྗང་བེར་ཆེན་གསོལ༔ ཕྱག་གཡས་འབིག་གྲི་གཡོན་པ་ན༔ འཕེན་གྲི་འཛིན་ཅིང་རྒྱ་སྟག་ཆིབས༔ བཀའ་འཁོར་མི་དམར་སྟག་ཆས་ཅན༔ ལག་ན་མེ་ཡི་དཔལ་འབར་ཐོགས༔ སྤྲུལ་པ་གླང་བུ་དམར་པོ་འགྱེད༔ དགྲ་
ལྷའི་ཐ་ཆུང་འཁོར་བཅས་བསྟོད༔ ཡེ་བརྫུ་མཆེད་གསུམ་འཁོར་བཅས་ལ༔ གསོལ་ལོ་མཆོད་དོ་ངོ་སོ་བསྟོད༔ དགྲ་ལྷ་མི་དང་མ་འབྲལ་བར༔ ཁ་འཛིན་སྡོང་གྲོགས་མ་གཡེལ་ཅིག༔ བཅོལ་བའི་ཕྲིན་ལས་འགྲུབ་པར་མཛོད༔ ཅེས་དང་། ་བསྡུན། ཧཱུྃ༔ དབང་ཆེན་རྟ་མགྲིན་ཡང་སྤྲུལ་ཏེ༔ རྡོ་རྗེ་ལེགས་པའི་མཆེད་ཟླ༔ སྲིད་པའི་དགྲ་ལྷ་མཐུ་བོ་ཆེ༔ ཡེ་བརྫུ་འཁོར་དང་བཅས་ལ་བསྟོད༔ བསམ་པ་ཡིད་བཞིན་འགྲུབ་པར་མཛོད༔ ཅེས་བརྗོད་མཆེད་གསུམ་ཐུགས་ཀ་རུ༔ ཟླ་སྟེང་ཏྲི་ཡིག་རང་མདོག་ལ༔ སོ་སོའི་སྔགས་ཀྱིས་གཡས་སུ་བསྐོར་རང་གི་ཐུགས་ཀའི་འོད་ཟེར་ཕོག༔ སྔོན་གྱི་དམ་ཚིག་རྗེས་སུ་དྲན༔ སྔགས་ཕྲེང་གཡས་སུ་འཁོར་བ་ཡིསཿ་རང་དབང་མེད་པར་ལས་བྱེད་དམིགས༔ མཆེད་གསུམ་གང་ལ་བསྙེན་འདོད་པའི༔ སྲོག་སྔགས་ཤམ་བུ་འདི་ལྟར་རོ༔ ཨོཾ་ཏཱ་ལ་ཏྲི་ཏ་ཡ་ན་བྷ་སང་༔ ནི་ནཾ༔ ཨོཾ་ཀྱི་ཡ་ཀྱི་ཡ༔ མ་མ་ཏེ་ཏེ༔ ཧ་ཧ་ཏེ་ཏཿ ཀྱ་ཙུ་ཀྱུ་ཙུ༔ མུ་མུ་ཀེ་ཏེ་སང་ལྟོང་ངོ་༔ ས་མ་ཡ་ཛ་ཛ༔ ཤམ་བུར་འདི་ལྟར་རོ༔ ས་མཱ་ཡ་ཛ་ཛ༔ དེ་ནི་འབོད་ཅིང་བསྙེན་པའི་སྔགས༔ སརྦ་སིདྡྷི་ཕ་ལ་ཧཱུྃ༔ དེ་ནི་སྒྲུབ་པ་དངོས་གྲུབ་
སྔགས༔ བཱ་སུ་སིདྡྷི་སྭཱ་ཧྭ༔ ནོར་ཕྱུགས་ལ་སོགས་འཕེལ་བའོ༔ པུཎེ་པུཊྚི་ཀུ་རུ་སྭཱ་ཧཱ༔ བསོད་ནམས་མངའ་ཐང་རྒྱས་པའོ༔ ལོ་ཀ་པ་ཤཾ་ཀུ་རུ་སྭཱ་ཧཱུ་མངའ་ཐང་འཁོར་ཚོགས་འདུ་བའོ༔ གནོད་བྱེད་དགྲ་བོ་མཱ་ར་ཡ་རྦད༔ དགྲ་བགེགས་ལ་སོགས་ཚར་གཅོད་དོ༔ དགྲ་ལ་བྷྱོ་བྷྱོ་ཟློག་ཟློག་མཱ་ར་ཡ་རྦད༔ དགྲ་ཇག་བཟློག་ཅིང་ཕ་རོལ་འཇོམས༔ ཞི་བའི་འོད་ཟེར་དཀར་པོ་ཡིས༔ བར་ཆད་བ་མོར་ཉི་ཟེར་ལྟར༔ རྒྱས་པའི་འོད་ཟེར་སེར་པོ་ལས༔ རིན་ཆེན་སྣ་ཚོགས་ཆར་འབབ་བསམ༔ ཁྱད་པར་ར་སྐྱེས་སྤུ་གསེབས་ནས༔ རིན་ཆེན་ཆར་པ་འབེབས་པར་དམིགས༔ དབང་ལ་འོད་ཟེར་གློག་ལྟ་བུ༔ ལྕགས་ཀྱུའི་དབྱིབས་ཀྱིས་འགུགས་པར་བསམ༔ དྲག་པོ་འཁོར་བཅས་དམག་ཆས་ཏེ༔ ཐོག་སེར་མཚོན་ཆའི་ཆར་ཕབ་ནས༔ གྲོག་ཚང་སེར་བས་ཕབ་ལྟར་དམིགས༔ གང་འདོད་བཀའ་བསྒོ་དྲག་ཏུ་བྱ༔ གང་ལ་བསམ་པ་ཡིད་བཞིན་འགྲུབ༔ འཇིག་རྟེན་མཆོད་དང་བསྟོད་པས་བསྒྲུབ༔ མཆོད་བསྟོད་གསོལ་ཁ་མང་ན་འགྲུབ༔ དེ་ཕྱིར་གསོལ་ཀ་བསྟོད་པ་བྱ༔ གཏོར་མ་གསོ་བྲན་ཨ་ཀཱ་རོས༔ བྱིན་གྱིས་བརླབས་ལ་འདི་སྐད་བརྗོད༔ ཧཱུྃ༔ རྟ་མཆོག་རྒྱལ་པོ་པདྨ་ཧེ་རུ་ཀ༔ ཆོས་སྐུ་སྐྱེ་མེད་ངང་ལས་མ་གཡོས་ཀྱང་༔ རིག་པའི་ཆོ་འཕྲུལ་འགྲོ་བའི་དོན་གྱི་ཕྱིར༔ སེམས་དཔའ་ཆེན་པོ་རྡོ་རྗེའི་རིགས་སུ་སྤྲུལ༔ འོག་མིན་འཐུག་པོ་བཀོད་པའི་ཞིང་ཁམས་
རྣམ་པར་སྣང་མཛད་ཆེན་པོའི་ཞབས་འབྲིང་མཛད༔ དེ་ཚེ་རྡོ་རྗེ་རིགས་ཀྱི་སེམས་དཔའ་དེས༔ ཡོན་ཏན་རྣམས་ལ་སངས་རྒྱས་ཐམས་ཅད་དགྱེས་ལེགས་སོ་གསུངས་པས་རྡོ་རྗེ་ལེགས་པར་གྲགས༔ ཡེ་ཤེས་རྡོ་རྗེ་ལེགས་པ་གསོལ་ཞིང་མཆོད༔ སེམས་དཔའ་དེ་ཡི་སྤྲུལ་པ་འཇིག་རྟེན་འདིར༔ སྲིན་ཡུལ་མ་ལ་ཡ་ཞེས་བྱ་བའི་རི༔ རྩེ་ལ་རང་སྣང་ཐོད་པའི་གཞལ་ཡས་ཁང་༔ ཆོས་སྐྱོང་མ་མགོན་ཀུན་གྱི་ཕོ་བྲང་རྩེར༔ དུས་བཟང་རྣམས་སུ་གསང་བའི་བདག་པོ་ཡིས༔ མ་མོ་མཁའ་འགྲོ་རྣམས་ལ་དམ་ཆོས་སྟོན༔ གནས་དེའི་གནས་བདག་སྲུང་མ་ཞིང་སྐྱོང་ཚུལ༔ ལྷོ་ནུབ་སྲིན་མོ་མ་གྷའི་བྲག་ཕུག་ནང་༔ ལྕགས་སྤྱང་བསྣོལ་སྟེང་རླུང་ནག་འཚུབ་མའི་ནང་༔ གསང་བའི་མཚན་ནི་རྗེ་གཅིག་ཉག་གཅིག་སྟེ༔ མཱ་ལ་ཡ་ཡི་བྲག་སྲིན་ཞེས་ཀྱང་བྱ༔ ཧེ་རུ་ཀ་ཡི་མོན་པ་གཏུམ་བག་བཏང་༔ དམ་ཚིག་རྡོ་རྗེ་ལེགས་པ་གསོལ་ཞིང་མཆོད༔ དེ་ཡི་སྤྲུལ་པ་འཛམ་གླིང་ནུབ་ཀྱི་ཕྱོགས༔ རྒྱ་གར་ནུབ་ཕྱོགས་ཕ་ཝང་ལོང་བུ་ན༔ དམུ་བདུད་ཡབ་ཡུམ་འཚོགས་པའི་སྲས་སུ་འཁྲུངས༔ དང་པོ་མུ་སྟེགས་རྒྱང་ནས་འཕེན་པས་མཆོད༔ མཚན་ནི་
ཡི་དྭགས་བཙན་གྱི་རྒྱལ་པོར་གྲགས༔ དེ་ནས་གཡུང་དྲུང་བོན་གྱི་ལྷ་རུ་བརྟེན༔ མཚན་ནི་སྐྱེས་བུ་མི་ཐང་གྲྭ་པ་ཟེར༔ དེ་ནས་ཐུབ་པའི་དབང་པོ་ཞལ་མཐོང་ཞིང་༔ ཕྱག་ན་རྡོ་རྗེས་དབང་བསྐུར་དམ་ལ་བཞག༔ མཚན་ནི་བཛྲ་སཱ་དྷུ་ཞེས་སུ་བཏགས༔ དེས་ནི་འཛམ་གླིང་ཐམས་ཅད་སྐྱོང་བའི་ཕྱིར༔ སྐྱེས་བུའི་མཆེད་ཟླ་སུམ་བརྒྱ་དྲུག་ཅུར་སྤྲུལ༔ ལས་ཀྱི་རྡོ་རྗེ་ལེགས་པ་གསོལ་ཞིང་མཆོད་སྐྱེས་བུ་སྤྲུལ་པ་སུམ་བརྒྱ་དྲུག་ཅུ་ལ༔ རྒྱ་གར་འཕགས་པའི་ཡུལ་དུ་མཚན་གསོལ་བ༔ རྡོ་རྗེ་འབར་བ་སུམ་བརྒྱ་དྲུག་ཅུར་གྲགས༔ རྒྱ་གར་ཡུལ་དུ་ཆོས་ཀྱི་རྒྱལ་པོ་མཛད༔ རྒྱ་གར་ཆོས་ཀྱི་སྲུང་མ་གསོལ་ཞིང་མཆོད༔ ཞང་ཞུང་བོན་གྱི་ཡུལ་དུ་མཚན་བཏགས་པ༔ ཝེར་མ་སུམ་བརྒྱ་དྲུག་ཅུ་ཞེས་སུ་གྲགས༔ ཝེར་མ་སུམ་བརྒྱ་དྲུག་ཅུ་གསོལ་ཞིང་མཆོད༔ རྒྱ་ནག་ཁྲིམས་ཀྱི་ཡུལ་དུ་མཚན་གསོལ་བ༔ ཨ་ཇོ་སུམ་བརྒྱ་དྲུག་ཅུ་ཞེས་སུ་གྲགས༔ གསེར་ཁང་སེར་པོའི་སྲུང་མ་གསོལ་ཞིང་མཆོད༔ དེ་ནས་ཡུལ་ནི་ཨ་སུ་ར་ཡི་ཕུག༔ སློབ་དཔོན་པདྨས་དབང་བསྐུར་དམ་ལ་བཞག༔ དགེ་བསྙེན་སུམ་བརྒྱ་དྲུག་ཅུ་ཞེས་སུ་གྲགས༔ ཤེལ་མཁར་ཉི་སྒྲོན་བདག་པོ་གསོལ་
ཞིང་མཆོད༔ དེ་ནས་བོད་ཡུལ་གཙང་གི་འོ་ཡུག་ཏུ༔ རྟེན་བཅས་གཏེར་ཁ་བརྒྱ་རྩའི་གཏེར་སྲུང་མཛད༔ དམ་ཅན་སུམ་བརྒྱ་དྲུག་ཅུ་གསོལ་ཞིང་མཆོད༔ གཞན་གྱིས་མ་བཅོས་རང་དམ་རང་གིས་བཅས༔ ཚོང་གི་ཚོང་དཔོན་དམག་གི་དམག་དཔོན་དང་༔ སྐྱེ་བོའི་དགྲ་ལྷ་ཇག་པའི་དཔུང་རོགས་མཛོད༔ དགྲ་ལྷ་སུམ་བརྒྱ་དྲུག་ཅུ་་ཞེས་སུ་གྲགས༔ དགྲ་ལྷ་སུམ་བརྒྱ་དྲུག་ཅུ་གསོལ་ཞིང་མཆོད༔ བརྒྱ་ནི་རྒྱ་གར་བརྒྱ་ནི་རྒྱ་ནག་ཡུལ་བརྒྱ་ནི་ཞང་ཞུང་འབྲོག་གི་ཡུལ་དུ་བཞུགས༔ དྲུག་ཅུ་བོད་ཀྱི་ཡུལ་དུ་བཞུགས་པ་ལ༔ རེ་རེ་ལ་ཡང་བླ་རི་བླ་མཚོ་རེ༔ སོ་སོར་མཚན་ཡང་སོ་སོར་ཡུལ་ལྷ་མཛད༔ ཡུལ་ལྷ་སུམ་བརྒྱ་དྲུག་ཅུ་གསོལ་ཞིང་མཆོད་བརྒྱ་དང་དྲུག་ཅུ་མཆེད་འཁོར་མདོ་ཁམས་སུ༔ གནས་བཅས་ཡེ་བརྫུ་ཁ་ཆར་འདབ་མ་ཅན༔ སྐུ་མཆེད་ཐམས་ཅད་དཔོན་བློན་རེས་མོས་སུ༔ གཅིག་གྲོགས་གཅིག་གིས་མཛད་པ་དམ་ཚིག་ཡིན༔ དེ་ཕྱིར་ཡེ་བརྫུ་སུམ་བརྒྱ་དྲུག་ཅུར་གྲགས༔ དགྲ་ལྷ་ཡེ་བརྫུ་འཁོར་བཅས་གསོལ་ཞིང་མཆོད་མགུར་ལྷ་སུམ་ཅུ་དགེ་བསྙེན་ཉེར་གཅིག་སོགས༔ ཐམས་ཅད་དྲུག་ཅུའི་ཁོངས་སུ་
གཏོགས་པ་ལས༔ བརྟན་མ་བཅུ་གཉིས་ཡ་མ་བཅུ་གཉིས་དང་༔ སྐྱོང་མ་བཅུ་གཉིས་ལྕམ་དང་དགྱེས་སྡེ་མོ༔ དེ་ཕྱིར་སྲིང་ལྕམ་སུམ་བརྒྱ་དྲུག་ཅུ་སྟེ༔ བོད་ཁམས་ཡུལ་ལྷ་ཐམས་ཅད་གསོལ་ཞིང་མཆོད༔ སྐྱེས་བུའི་སྤྲུལ་པ་ཡེ་བརྫུ་མཐུ་བོ་ཆེ༔ རི་རབ་གླིང་བཞི་འཛམ་གླིང་དྲེགས་པའི་ཚོགས༔ ལ་ལ་ཁྱོད་ཀྱི་ཕ་མ་མྱེས་པོ་སྟེ༔ ལ་ལ་སྤུན་ཟླ་ལ་ལ་རིས་དང་སྡེ༔ ཐམས་ཅད་ཀུན་གྱིས་ཁ་ལོ་བསྒྱུར་བའི་ཚེ༔ ལྷ་འདྲེ་ཀུན་གྱི་དམག་དཔོན་སྣ་འདྲེན་པོ༔ མཐུ་ཆེན་ཡེ་བརྫུ་འཁོར་བཅས་གསོལ་ཞིང་མཆོད༔ དམ་རྫས་གཏོར་མ་མཐུན་རྫས་སྣ་ཚོགས་འབུལ༔ དལ་བའི་དུས་སུ་དགྲ་ལྷ་ཁྱེད་མཆོད་ན༔ བྲེལ་བའི་དུས་སུ་དགྲ་ལྷ་ཐུགས་མ་གཡེལ༔ མཉམ་གཉིས་མི་དང་འཕན་གྱི་བུ་འགྲན་ན༔ མི་འཕན་རྟ་ཕྲག་ཡེ་བརྫུ་ཁྱེད་ལ་རེ༔ མི་གཡང་གཞན་ལ་མ་ཤོར་ཡེ་བརྫུ་རེམ༔ མཉམ་གཉིས་མི་དང་ཕྱུགས་ཀྱི་ནོར་འགྲན་ར༔ བེའུ་ལུག་འཕེལ་ཁ་ཡེ་བརྫུ་ཁྱེད་ལ་རེ༔ ནོར་གཡང་གཞན་ལ་མ་ཤོར་ཡེ་བརྫུ་རེམ༔ ཕ་རོལ་དགྲ་དང་དམག་དང་གཡུལ་འགྱེད་ན༔ དགྲ་ཕམ་ཟིན་རྒྱལ་ཡེ་བརྫུ་ཁྱེད་ལ་རེ༔ རླུང་ཁ་གཞན་ལ་མ་ཤོར་ཡེ་བརྫུ་རེམ༔
ཇག་དང་ཚོང་དང་མགྲོན་ལ་འགྲོ་བའི་ཚེ༔ ལམ་ལྷ་ཁ་འཛིན་ཡེ་བརྫུ་ཁྱེད་ལ་རེ༔ བུ་རྟའི་སྲུང་སྐྱོབ་དགྲ་ནོར་གནངས་སུ་ལོངས༔ ཁྱེད་ནི་ཕ་མཚུན་དགྲ་བླ་གཉན་པོ་སྟེ༔ ཕ་སྤུན་བུ་སྲིང་ཤག་རོག་ཡུལ་རྣམས་སུ༔ མ་བྲོས་མ་འཁྱམས་བརྩེ་གདུང་ཇེ་ཆེར་མཛོད༔ ཁྱོད་ནི་ཡབ་མྱེས་རྒྱུད་ཀྱི་ཕོ་ལྷ་སྟེ༔ རིགས་ཀྱི་བུ་ལ་རྒྱུད་ཀྱི་ལྷ་འཁོར་འཇིག་རྟེན་སྲིད་པའི་གཞུང་འདི་ཁྱེད་ཀྱིས་འཚོས༔ མིས་ཀྱང་ལྷ་ལ་གསོལ་མཆོད་དུས་སུ་བྱེད༔ ལྷས་ཀྱང་མི་ལ་ཁ་འཛིན་དུས་སུ་མཛོད༔ འཆི་མེད་ཚེ་ཡི་དངོས་གྲུབ་བསྩལ་དུ་གསོལ༔ ནད་མེད་བདེ་བའི་དངོས་གྲུབ་བསྩལ་དུ་གསོལ༔ འཛད་མེད་ནོར་གྱི་དངོས་གྲུབ་བསྩལ་དུ་གསོལ༔ ཆེ་བཙན་གྲགས་པའི་དངོས་གྲུབ་བསྩལ་དུ་གསོལ༔ རིགས་རྒྱུད་བཙན་དར་དངོས་གྲུབ་བསྩལ་དུ་གསོལ༔ དཔུང་ཆེན་སྟོབས་ཀྱི་དངོས་གྲུབ་བསྩལ་དུ་གསོལ༔ ཁྱེད་ཀྱི་ཐུགས་དང་འགལ་བ་མཐོལ་ཞིང་བཤགས༔ གོ་མཚོན་སྣ་དགུ་རྣམས་ལ་རྟེན་ཆོས་ལ༔ དགྲ་ལྷ་མི་དང་མ་འབྲལ་བརྟན་པར་བཞུགས༔ ཚེ་རིང་ནད་མེད་བཙན་ཕྱུག་འཕན་དར་རྒྱས༔ བཀྲ་ཤིས་བདེ་ལེགས་ཐམས་ཅད་འབྱུང་གྱུར་ཅིག༔
མི་འགྱུར་རྡོ་རྗེའི་དགོངས་གཏེར་ལས་བྱུང་བའི་སྲོག་སྔགས་ཡེ་བརྫུའི་སྒྲུབ་ཐབས་གསོལ་མཆོད་དགོངས་གཏེར་ཉམས་ལེན་ཚུལ་གྱི་ཟིན་བྲིས་རབ་ཏུ་གསལ་བ་ལྷ་ཐོག་སྤྱི་དཔོན་ཀརྨ་ཚེ་བརྟན་གྱི་ཤོག་བུ་ཕུལ་བྱུང་བས་རཱ་ག་ཨ་སྱས་ཞུན་མར་ངོག་ནས་བྲིས༔ མངྒ་ལཾ།། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།