ལྷ་ཐོག་གི་དགྲ་བླ་ཡེ་བརྫུའི་གསོལ་མཆོད།
ལྷ་ཐོག་གི་དགྲ་བླ་ཡེ་བརྫུའི་གསོལ་མཆོད་བཞུགས་སོ། ༈ །ན་མོ་བཛྲ་གྲོ་བོ་ལོད། །དགྲ་བླ་ཡེ་བརྫུའི་གསོལ་ཀ་ནི། །གཏོར་མ་མཁར་ཐབས་གཅིག་གི་སྟེང་། །ཟུར་གསུམ་གསུམ་བཞག་དབུས་མ་ལ། །ར་མགོ་གཡས་དམར་ཝ་གདོང་དང་། །གཡོན་དམར་སྟག་གི་མགོ་རེ་སྦྱར། །རྩེ་གསུམ་ཉི་ཟླ་དཀར་གསུམ་བརྒྱན། །དཀར་དམར་ཕུད་དང་ཟས་སྣ་བཤམས། །རང་ཉིད་ཨོ་རྒྱན་བསྒོམས་པ་ཡིས། །ཐུགས་ཀའི་འོད་ཟེར་ལྕགས་ཀྱུ་ཡིས། །སྤྱན་དྲངས་མདུན་དུ་བཞུགས་ནས་ཀྱང་། །བཀའ་ཉན་གསུང་སྡོད་བྱེད་པར་བསྒོམ། །མཆོད་གཏོར་གསོལ་ཞིང་གསོལ་བ་ཡིས། །ཕྲིན་ལས་ཐོགས་མེད་འགྲུབ་པར་བསྒོམ། །ཧཱུྃ། དགུང་སྔོན་དབྱིངས་དང་རང་བཞིན་གར་བཞུགས་ནས། །རྫ་སྟོད་མོ་ཁད་ལྷ་རྩེ་ཐོག་གི་རྫོང་། །རྨར་ཁམས་སྟོད་སྨད་བར་གསུམ་ལ་སོགས་ནས། །དགྲ་བླ་ཡེ་བརྫུ་མཆེད་གསུམ་འཁོར་དང་བཅས། །མཆོད་ཕྱིར་བསྒྲུབ་ཕྱིར་གནས་འདིར་གཤེགས་སུ་གསོལ། །ཡིད་སྤྲུལ་གཙོ་འཁོར་འཚམས་པའི་གདན་ལ་བཞུགས། །སྔོན་ཚེ་པདྨ་འབྱུང་གནས་སྤྱན་སྔ་རུ། །ཇི་ལྟར་ཁས་བླངས་དམ་ཚིག་དྲན་མཛོད་ལ། །བདག་གིས་གང་བཅོལ་ཕྲིན་ལས་འགྲུབ་པར་མཛོད། །ཧཱུྃ། ཁྲོ་རྒྱལ་དཔལ་ཆེན་རྟ་མཆོག་ཧེ་རུ་ཀ །ཐུགས་ནི་
སྐྱེ་མེད་འཁོར་འདས་ཡོངས་ལ་ཁྱབ། །ཕྲིན་ལས་སྤྲུལ་པ་སངས་རྒྱས་བསྟན་སྲུང་ཕྱིར། །དགྲ་བླའི་སྡེ་དཔོན་བཛྲ་སཱ་དྷུར་སྤྲུལ། །དེ་ཡི་སྤྲུལ་པ་མཆེད་ཟླའི་ཚུལ་འཛིན་པ། །བརྒྱ་ནི་རྒྱ་གར་བརྒྱ་ནི་རྒྱ་ནག་ཡུལ། །བརྒྱ་ནི་འབྲོག་ཡུལ་དྲུག་ཅུ་བོད་དུ་བཞུགས། །རྒྱ་གར་ཆོས་ཀྱི་ཡུལ་དུ་མཚན་གསོལ་བ། །དམ་ཅན་སུམ་བརྒྱ་དྲུག་ཅུ་ཞེས་སུ་གྲགས། །བཛྲ་སཱ་དྷུ་སུམ་བརྒྱ་དྲུག་ཅུ་ལ། །གསོལ་ལོ་མཆོད་དོ་མཉེས་ཤིང་ཚིམ་གྱུར་ཅིག །གཡུང་དྲུང་བོན་གྱི་ཡུལ་དུ་མཚན་གསོལ་བ། །སྐྱེས་བུ་མི་ཐར་ག་པ་ཞེས་སུ་གྲགས། །ཝེར་མ་སུམ་བརྒྱ་དྲུག་ཅུ་གསོལ་ཞིང་མཆོད། །མདོ་ཁམས་སྨར་ཁམས་ཕྱོགས་སུ་མཚན་གསོལ་བ། །དགྲ་བླ་ཡེ་བརྫུ་གཉན་པོ་ཞེས་སུ་གྲགས། །ཡེ་བརྫུ་སུམ་བརྒྱ་དྲུག་ཅུ་གསོལ་ཞིང་མཆོད་། །མཆེད་འཁོར་སུམ་བརྒྱ་དྲུག་ཅུའི་ནང་ཚན་པ། །ཡེ་བརྫུ་མཆེད་གསུམ་གཙོ་བོ་སྐུ་མདོག་དམར། །དར་ནག་བེར་གསོལ་མདུང་དང་ཐོད་པ་འཛིན། །ཆིབས་སུ་རྫུ་འཕྲུལ་ར་སྐྱེས་ཁམ་པ་ཆིབས། །དེ་ཡི་ཕུ་བོ་སྐུ་མདོག་ནག་པོ་ལ། །དར་ནག་བེར་གསོལ་ཐོ་བ་ཆུ་གྲི་འཛིན། །ཆིབས་སུ་ཟངས་ཀྱི་ཝ་མོ་འཕུར་ཤེས་ཆིབས། །ཡེ་བརྫུའི་ནུ་བོ་
སྐུ་མདོག་སེར་པོ་ལ། །དར་ལྗང་བེར་གསོལ་འབིག་གྲི་འཕེན་གྲི་འཛིན། །ཆིབས་སུ་དཔའ་གཏུམ་སྟག་མོ་རི་བཀྲ་ཆིབས། །ཡེ་བརྫུ་གཙོ་བོ་མཆེད་གསུམ་འཁོར་དང་བཅས། །གསོལ་ལོ་མཆོད་དོ་མཉེས་ཤིང་ཚིམ་གྱུར་ཅིག །ཕྱེ་མར་ཟས་ཕུད་འབྲུ་སྣ་རིན་ཆེན་དང་། །དར་ཚོན་བལ་ཚོན་ཇ་ཆང་འོ་ཞོའི་ཕུད། །བཟང་ཤིང་སྤོས་སྤྲིན་མདའ་དར་རྒོད་སྒྲོ་ལ། །དངུལ་དཀར་མེ་ལོང་དར་སྣས་བརྒྱན་པ་དང་། །ར་གཡག་ཙིཏྟ་སྦ་གླིང་གཡག་ལུག་ར། །དམ་རྫས་བརྒྱན་པའི་གཏོར་མ་བདུད་རྩིའི་མཚོ། །འབྱོར་དང་ཡིད་ཀྱིས་རྣམ་སྤྲུལ་ཏེ། །དགྲ་བླ་ཡེ་བརྫུ་འཁོར་དང་བཅས་པ་ལ། །གསོལ་ལོ་མཆོད་དོ་མཉེས་ཤིང་ཚིམ་གྱུར་ཅིག །སློབ་དཔོན་ཆེན་པོ་པདྨ་འབྱུང་གནས་ཀྱིས། །བཀའ་བསྒོས་དམ་བཞག་སྲུང་མར་བཀོས་པ་དང་། །རང་གི་དམ་བཅས་སྐྱེ་བོའི་དགྲ་བླ་དང་། །བན་བོན་སྲུང་མ་དམག་གི་དམག་དཔོན་དང་། །ཇག་གི་ཇག་དཔོན་ཚོང་གི་ཚོང་དཔོན་ནི། །ལས་དང་སྨོན་ལམ་དབང་གིས་བྱས་པ་སྟེ། །བདག་གིས་ཁྱེད་མཆོད་དམ་བཅའ་མ་བརྗེད་ཅིག །ཁྱད་པར་སྲིད་པ་ཆགས་ནས་ད་ལྟའི་བར། །ལྷ་ཐོག་
རྒྱུད་ཀྱི་དགྲ་བླ་ཁྱེད་ལགས་པས། །མི་ལྷ་མ་འབྲལ་ཁ་འཛིན་མ་གཡེལ་ཅིག །མིས་ཀྱང་ལྷ་ལ་དུས་གསུམ་རྒྱུན་དུ་མཆོད། །ལྷས་ཀྱང་མི་ལ་སྲུང་སྐྱོབ་སྡོང་གྲོགས་མཛོད། །དལ་བའི་དུས་སུ་ལྷ་སྲུང་ཁྱེད་མཆོད་ན། །བྲེལ་བའི་དུས་སུ་ཡེ་བརྫུ་ཐུགས་མ་གཡེལ། །ཕ་རོལ་དགྲ་དང་བགེགས་ཀྱི་དཔུང་ཚོགས་ཟློག །རང་གི་བུ་རྟའི་འཚོ་རྫི་མགོ་ཐོན་མཛོད་། །མཉམ་གཉིས་མི་དང་དཔའ་བའི་དཔུང་འགྲན་ན། །དཔའ་དང་རྟིང་མ་ཡེ་བརྫུ་ཁྱེད་ལ་རེ། །དགྲ་ཕམ་ཟིན་རྒྱལ་རླུང་ཁམས་བདག་ལ་བྱིན། །མཉམ་གཉིས་མི་དང་ཕྱུགས་ཀྱི་ནོར་འགྲན་ན། །བེའུ་ལུགས་འཕེལ་ཁ་ཡེ་བརྫུ་ཁྱེད་ལ་རེ། །རྐང་བཞི་ཕྱུགས་ཀྱི་དངོས་གྲུབ་བསྩལ་དུ་གསོལ། །མཉམ་གཉིས་མི་དང་འཕེན་པའི་བུ་འགྲན་ན། །བཀྲ་ཤིས་དར་རྒྱས་ཡེ་བརྫུ་ཁྱེད་ལ་རེ། །མི་འཕེན་རྟ་ཧྲག་དངོས་གྲུབ་བསྩལ་དུ་གསོལ། །དེང་སང་སྙིགས་མ་ལྔ་ཡི་དུས་བབས་པས། །ཡེ་ཤེས་ལྷ་ནི་འགྲུབ་རྟོགས་རིང་བའི་དུས། །ཡེ་བརྫུ་ཁྱེད་ནི་འཇིག་རྟེན་མྱུར་མགྱོགས་ལྷ། །ཁ་རྗེ་དབང་ཐང་ཡེ་བརྫུ་ཁྱེད་ལ་རེ། །ཆོས་སྲིད་དབང་ཐང་དངོས་གྲུབ་བསྩལ་དུ་གསོལ། །ངེད་ཀྱི་མི་རབས་རྒྱུད་ཀྱི་
ལྷ་ཁྱེད་ཡིན། །ངེད་ལ་བཀྲ་ཤིས་བདེ་ལེགས་མ་བྱུང་ན། །འཇིག་རྟེན་ལྷ་འདྲེ་ཁྱེད་གསུམ་སྤྱན་ལམ་དུ། །ཡེ་བརྫུ་ཁྱེད་ལ་བརྙས་པར་མི་འགྱུར་རམ། །སློབ་དཔོན་པདྨའི་བཀའ་དང་མི་འགལ་ལམ། །རང་གི་དམ་བཅའ་དམ་དང་མི་འགལ་ལམ། །དེ་བས་ཁ་འཛིན་སྡོང་གྲོགས་མ་གཡེལ་ཅིག །རྨ་གཡང་དངོས་གྲུབ་ཁུ་ཡེ་གཡང་དུ་ལེན། །ཨོ་ཨོ་ཧེ་ལ་ཧེ་སརྦ་སིདྡྷི་ཧཱུྃ། ཡ་ཡཱ་ཁུ་ཡེ་སརྦ་སིདྡྷི་ཧཱུྃ། འོ་འོ་འབངས་སེ་འབང་སརྦ་སིདྡྷི་ཧཱུྃ། སརྦ་པཱུ་ཛ་ཧོ། དམེ་བཙོག་ཉམས་གྲིབ་ཐམས་ཅད་མཐོལ་ལོ་བཤགས་། །གོ་མཚོན་རྣམས་ལ་རྟག་ཏུ་བརྟན་པར་བཞུགས། །ཕ་ཁུ་སྤུན་ཟླ་བཞིན་དུ་སྲུང་སྐྱོབ་མཛོད། །བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག །ཅེས་ལྷ་ཐོག་དགྲ་བླའི་མཆོད་གསོལ་མདོར་བསྡུས་ ༧ རཱ་ག་ཨ་སྱས་འཕྲལ་དུ་བྲིས་པ་དགེ་བར་གྱུར་ཅིག །སརྦ་མངྒ་ལཾ།། །། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།