བན་ཐུང་གསོལ་མཆོད།
ན་མོ། པད་འབྱུང་རྩ་བ་གསུམ་ལ་སྐྱབས་སུ་མཆི། །འགྲོ་ལ་ཕན་ཕྱིར་བྱང་ཆུབ་སེམས་བསྐྱེད་དོ། །ཆོས་རྣམས་ཡེ་ནས་ཀ་དག་རྫོགས་པ་ཆེ། །དེ་ཡི་རང་ས་སྐད་ཅིག་དྲན་རྫོགས་སུ། །རང་ཉིད་རྡོ་རྗེ་གྲོ་ལོད་སྐུ་མདོག་སྨུག །སྤྱན་གསུམ་སྡང་མིག་མཆེ་བས་མ་མཆུ་མནན། །ཟབ་བེར་ཆོས་གོས་མི་མགོའི་ཕྲེང་བས་བརྒྱན། །རྡོ་རྗེ་ཕྱར་ཞིང་ཕུར་བུ་བགེགས་ལ་གཟིར། །དབུ་སྐྲ་ཐོར་ཅོག་དར་དམར་ཅོད་པན་ཕུར། །ཞབས་གཉིས་འདོར་སྟབས་ཕུང་སྟག་མི་གཟན་མནན། །རང་འོད་མེ་དཔུང་འཁྲུགས་པའི་ཀློང་ན་འགྱིངས། །ཡེ་ནས་དམ་ཡེ་དབྱེར་མེད་ཐུགས་སྲོག་ཧཱུྃ། །དེ་ལས་འོད་འཕྲོས་མགྲོན་རྣམས་སྤྱན་དྲངས་ཤིང་། །བདག་གི་བཀའ་ཉན་སྲུང་སྡོད་བྱེད་པར་གྱུར། །ཧཱུྃ༔ བྱང་ཕྱོགས་རྩུབ་གྱུར་ཚལ་གྱི་དུར་ཁྲོད་ནས། །སྟག་ཞོན་མ་ཧཱ་ཀཱ་ལ་གཤེགས་སུ་གསོལ། །མཁའ་སྤྱོད་གནས་དང་འོག་མིན་གར་བཞུགས་ནས། །རིག་འཛིན་འབྲོང་པ་བན་ཐུང་གཤེགས་སུ་གསོལ། །མདོ་ཁམས་ཤར་ཕྱོགས་གངས་རི་རྩེ་རྒྱལ་ནས། །ལྷ་ཆེན་རྨ་གཉན་སྤོམ་ར་གཤེགས་སུ་གསོལ། །མི་མགོན་དཀར་པོ་རྡོ་ཏི་གངས་མཆེད་
བརྒྱད། །གེ་མཛོ་ཡེ་བརྫུ་ལ་སོགས་ཡུལ་གྱི་ལྷ། །མཆོད་པ་འབུལ་ཕྱིར་སྐད་ཅིག་ཉིད་ལ་བྱོན། །རང་རང་ཡིད་སྤྲུལ་འཚམས་པའི་གདན་ལ་བཞུགས། །སྔོན་ཚེ་སློབ་དཔོན་པདྨ་འབྱུང་གནས་ཀྱི། །བཀའ་དང་དམ་ཚིག་རྗེས་སུ་དྲན་མཛོད་ལ། །བདག་གིས་བཅོལ་བའི་ཕྲིན་ལས་སྒྲུབ་པར་མཛོད། །དངོས་སུ་འབྱོར་དང་ཡིད་ཀྱིས་སྤྲུལ་པ་ཡི། །ཉེར་སྤྱོད་བདུན་དང་འདོད་པའི་ཡོན་ཏན་ལྔ། །བཀྲ་ཤིས་རྫས་རྟགས་བདུན་དང་རྒྱལ་སྲིད་བདུན། །འབྲུ་སྣ་སྨན་སྣ་ཟས་སྣ་རིན་ཆེན་ལྔ། །བཟང་ཤིང་དུད་སྤྲིན་ལ་སོགས་མཆོད་པ་འབུལ། །ལྷ་སྲུང་ཁྱེད་རྣམས་མཉེས་ཤིང་ཚིམ་གྱུར་ཅིག །ཨརྒྷཾ་པཱཏྱཾ་པུཥྛ་དྷུ་པེ་ཨཱ་ལོ་ཀེ་གྷནྡྷེ་ནེ་ཝི་ཏྱཱ་ཤབྟ་པྲ་ཏིཙྪ་སྭཱ་ཧཱ། ཧཱུྃ། དཔལ་ལྡན་སྐུ་ཡི་མགོན་པོ་ནི། །སྐུ་མདོག་མཐིང་ནག་འབར་བ་ལ། །སྤྱན་གསུམ་ཞལ་གདངས་མཆེ་བ་གཙིགས། །དབུ་སྐྲ་དམར་སེར་གྱེན་དུ་འབར། །ཐོད་སྐམ་དུག་སྦྲུལ་ཆུན་པོས་བརྒྱན། །སྐུ་ལ་དར་ནག་བེར་ཆེན་གསོལ། །གསེར་སྐྱེད་རིན་ཆེན་སྐྱེད་ལ་བཅིངས། །ཕྱག་གཡས་ཙནྡན་བེང་ཆེན་ཕྱིར། །ལྷ་དམག་ཉི་ཁྲི་ཆིག་སྟོང་འགྱེད། །གཡོན་པས་ལྕགས་ཀྱི་པར་བུ་འཛིན། །
དམ་ཉམས་དགྲ་བགེགས་སྙིང་ཁྲག་འཐུང་། །བདུད་ཀྱི་ཞགས་པ་གྲུ་ལ་བཀོན། །དམ་ཉམས་དགྲ་བགེགས་སྐེ་ནས་བཅིངས། །ཞབས་ལ་སྲག་རེའི་ལྷམ་ཆེན་གསོལ། །ཆིབས་སུ་དཔའ་བོ་སྟག་ལ་བཅིབས། །དབུ་ཡི་གཙུག་ན་བྱ་ཁྱུང་ལྡིང་། །ས་བདག་ཀླུ་གཉན་ཟིལ་གྱིས་གནོན། །ཕྲག་གོང་ལྕགས་ཀྱི་བྱ་ཁྲ་ལྡིང་། །སེང་གེ་དོམ་དྲེད་ཕྱི་ལ་ཁྲིད། །ལྷ་སྲིན་སྡེ་བརྒྱད་ཕོ་ཉར་འགྱེད། །ཡང་འཁོར་ནག་པོ་སྟོང་གིས་བསྐོར། །མ་ཧཱ་ཀཱ་ལ་མཐུ་བོ་ཆེ། །འདིར་གཤེགས་མཆོད་གཏོར་འདི་བཞེས་ལ། །རྡོ་རྗེ་འཆང་གི་སྤྱན་སྔ་རུ། །ཁྱོད་ཉིད་སུས་མཆོད་སུས་བརྟེན་ན། །མེ་དང་རྒྱལ་པོ་ཆུ་དང་དུག །མ་རུངས་གཅན་སྤྱང་ལ་སོགས་པའི། །འཇིགས་པ་ཀུན་ལས་ཐར་བ་དང་། །ཚེ་དང་དབང་ཐང་འཕེལ་བ་དང་། །འཁོར་དང་ལོངས་སྤྱོད་རྒྱས་པ་དང་། །ཁམས་གསུམ་དབང་དུ་འདུས་པ་དང་། སྲིད་གསུམ་ཟིལ་གྱིས་གནོན་པ་དང་། །གྲགས་པ་ཆེན་པོ་ཕྱི་ཐོབ་པ་དང་། །ཚོགས་རྫོགས་སྒྲིབ་པ་བྱང་ནས་ཀྱང་། །བླ་མེད་འབྲས་བུ་ཐོབ་བྱའི་ཕྱིར། །ཁྱེད་ཀྱི་དམ་ཚིག་དེ་མིན་ནམ། །དམ་བཅའ་བཞིན་དུ་ཕྲིན་ལས་མཛོད། །ཁྱོད་
ནི་ཕ་མྱེས་རྒྱུད་ཀྱི་ལྷ། །བདག་ཅག་མི་ནོར་འཁོར་བཅས་ལ། །སྲུང་སྐྱོབ་མེལ་ཚེ་མ་གཡེལ་བར། །དཔལ་ལྡན་མགོན་པོས་མགོནུ་མཛོད་ཅིག །ཨོཾ་ཤྲཱི་མ་ཧཱ་ཀཱ་ལ་ཏྲི་ཡཾ་ཛ ཨི་དམ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། སརྦ་པཱུ་ཛ་ཧོ། ཧཱུྃ། སྟག་ཞོན་མ་ཧཱ་ཀཱ་ལ་དེ། །སྒྲུབ་པའི་རིག་འཛིན་བན་ཐུང་མ། །དངོས་ནི་མཁའ་སྤྱོད་གནས་ན་བཞུགས། །བླ་དང་སྤྲུལ་པ་དགྲ་བླར་སྤྲུལ། །རང་གི་རིགས་རྒྱུད་ཁ་འཛིན་མཛོད། །བན་དེ་ཆེན་པོ་འཇིགས་པའི་གཟུགས། །ཕྱག་གཡས་སྤུ་གྲི་འབར་བར་གྱུར། །སྡང་བའི་དགྲ་བོ་སྲོག་རྩ་གཅོད་། །གཡོན་གྱི་ཕྱག་ནི་རྒྱ་མ་འཛིན། །ཟས་དང་ནོར་གྱི་གཡང་རྣམས་སྡུད། །ལྷམ་ཡ་མེད་པའི་རྐང་རྗེན་ནི། །ཆུ་དང་རབས་ལ་ཐོགས་པ་མེད། །རྐང་པ་ཡ་གཅིག་ལྷམ་གསོལ་བ། །རི་བྲག་ཀུན་ལ་ཐོགས་མེད་རྒྱུགས། །ཕ་མཚུན་དགྲ་བླ་བན་ཐུང་མ། །འདིར་བྱོན་བརྟན་པར་བཞུགས་སུ་གསོལ། །མཆོད་པ་འབུལ་བ་འདི་བཞེས་ལ། །བུ་དང་ཚ་བོའི་ཁ་འཛིན་མཛོད། །ཕ་སྤུན་ཤག་རོགས་བུ་སྲིང་གི །ཡུལ་དུ་མ་བྲོས་མི་འཁྱམས་པར། །དགྲ་བླ་མི་དང་མ་བྲལ་ཅིག །བཙན་ཕྱུག་འཕེན་དར་དངོས་གྲུབ་
སྩོལ། །དམག་དང་ཇག་གི་དཔུང་རོགས་མཛོད། །ཚོང་དང་མགྲོན་གྱི་ཁ་འཛིན་མཛོད། །སུ་ལ་མི་རེ་ཁྱོད་ལ་རེ། །བཀྲ་ཤིས་དར་རྒྱས་ཆེ་བར་མཛོད། །ཕྱོགས་ཕྱོགས་ཏ་ཧེ་ཀུ་ལུ་ལུ། ཨི་དམ་བ་ལིང་ཏ་ཁཱ་ཧི། སརྦ་པཱུ་ཛ་ཧོ། ཧཱུྃ། སྔོན་གྱི་བསྐལ་པའི་དང་པོ་ལ། །རྨ་ཆེན་སྤོམ་རིའི་བརྫུ་བུ་ལ། །འབྲོང་བདག་ཟིལ་དཀར་བྱ་བ་སྲིད། །དེ་ཡི་རིགས་རྒྱུད་འབྲོང་པ་འཕེལ། །ཕྱི་ལྟར་ལྷ་བཙན་སྤོམ་ར་སྟེ། །མགུར་ལྷ་བཅུ་གསུམ་གཙོ་བོ་ལ། །ནང་ལྟར་རྒྱལ་པོ་ཡུལ་འཁོར་སྲུང་། །ཡུལ་ཁམས་སྐྱོང་བའི་ལྷ་ཆེན་ཡིན། །གསང་བ་རྒྱལ་ཆེན་རྣམ་ཐོས་སྲས། །ལོངས་སྤྱོད་ནོར་གྱི་བདག་པོ་ཡིན། །རྨ་གཡང་ནོར་དང་ཟས་ཀྱི་བདག །འབྲོང་རིགས་ཀུན་གྱི་ཕ་མྱེས་ཡིན། །ཤར་གྱི་རྨ་གཉན་སྤོམ་ར་ལ། །གསོལ་ལོ་མཆོད་དོ་མཉེས་གྱུར་ཅིག །བདག་ཅག་ཁྱོད་ཀྱི་ཚ་བོ་ཡིན། །དུས་ངན་བསྐལ་པའི་སྙིགས་མ་ལ། །ཚ་བོ་ཨ་མྱེས་མ་སྐྱོབས་ན། །སྣང་སྲིད་ལྷ་འདྲེའི་སྤྱན་ལམ་དུ། །ཁྱོད་ལ་སྨྲ་བབ་མི་ཆེའམ། །ཚ་བོས་མྱེས་པོ་སྤོམ་ར་མཆོད། །མི་འཕེན་རྟ་ཧྲག་དངོས་གྲུབ་སྩོལ། །ཁྱོད་ལ་ཡོད་པ་བདག་ལ་
བྱིན། །ཟས་དང་ནོར་གྱི་རྨ་གཡང་དེ། །ནམ་མཁའི་ཆར་བཞིན་འབེབས་པར་མཛོད། །ཨོཾ་བཛྲ་ཀུ་ལི་མི་མན་སྭཱ་ཧཱ། །ཨི་དམ་བ་ལིཾ་ཏ་ཁཱ་ཧི། སརྦ་པཱུ་ཛ་ཧོ། ཧཱུྃ། རྡོ་རྗེ་གྲོ་ལོད་སྐུ་ལ་ཕྱག་འཚལ་བསྟོད། །རྣལ་འབྱོར་དབང་ཕྱུག་འབྲོང་པ་བན་ཐུང་ནི། །ཐུགས་ནི་དག་པ་རྒྱལ་བའི་ཞིང་དུ་གཤེགས། །བླ་ནི་ཕ་མཚུན་དགྲ་བླའི་ཚུལ་བཟུང་རིགས་རྒྱུད་འབྲོང་རིགས་རྣམས་ཀྱི་ཁ་འཛིན་མཛོད། །བན་ཐུང་ཞེས་གྲགས་དགྲ་བླ་གཉེན་པོ་ཆེ། །བདག་གིས་གདུང་བའི་ཡིད་ཀྱིས་སྤྱན་འདྲེན་ན། །མཆོད་པ་འབུལ་ཕྱིར་བསྒྲུབ་ཕྱིར་གཤེགས་སུ་གསོལ། །ཡིད་སྤྲུལ་དར་ཟབ་རིན་ཆེན་གདན་ལ་བཞུགས། །དངོས་སུ་འབྱོར་དང་ཡིད་ཀྱིས་སྤྲུལ་པ་དང་། །མེ་ཏོག་བདུག་སྤོས་མར་མེ་དྲི་ཆབ་དང་། །གཟུགས་སྒྲ་དྲི་རོ་རེག་བྱ་འདོད་ཡོན་ལྔ། །ཇ་ཆང་འོ་ཞོ་ཤ་ཐུད་ཟས་ཀྱི་ཕུད། །འབྲུ་སྣ་དར་ཟབ་རིན་ཆེན་སྣ་ལྔ་དང་། །སྟག་རས་གཟིག་རས་མདའ་དར་མདུང་དར་དང་། །གོ་ཁྲབ་ལྷ་གཡག་ལ་སོགས་མཐུན་པའི་རྫ་ས། །འབུལ་ལོ་ཐུགས་དམ་གཉན་པོ་བསྐང་གྱུར་ཅིག །ཧཱུྃ་ལས་རིན་ཆེན་སྣོད་དུ་གཏོར་མ་ནི། །དཀར་གསུམ་མངར་
གསུམ་ཟག་མེད་བདུད་རྩིའི་མཚོ། །ཨོཾ་ཨཱཿཧཱུྃ་གིས་ཟད་མེད་བདུད་རྩིར་གྱུར། །འབྲོང་པ་བན་ཐུང་ཞེས་གྲགས་དགྲ་བླ་དང་། །ཕ་མཚུན་མགོན་བྱེད་རྣམས་ལ་འབུལ་ཞིང་བཞེས། །ཐམས་ཅད་རབ་ཏུ་མཉེས་ཤིང་ཚིམས་གྱུར་ཅིག །ཨོ་ཕྱོགས་ཕྱོགས་ཏ་ཧེ་ཀུ་ལུ་ལུ་ཨི་དཾ་ན་བ་ལིཾ་ཏ་ཁ་ཁ་ཁཱ་ཧི། ཨཧཱུྃ་པཱརྱ་པུཎྜེ་དྷབྦེ་ཨཱ་ལོ་ཀེ་གྷནྡྷེ་ནེ་ཝི་དྱ་ཤརྡ་པྲ་ཏཱིཙྪ་སྭཱ་ཧཱ། ཧཱུྃ། རིག་སྔགས་སྒྲུབ་པའི་ཧེ་རུ་ཀ །མཚན་ནི་འབྲོང་པ་བན་ཐུང་ཞེས། །སྐུ་ནི་དག་པ་རྒྱལ་བའི་ཞིང་དུ་གཤེགས། །བླ་ནི་ཕ་མཚུན་དགྲ་བླའི་སྐུ། །རིགས་རྒྱུད་རྣམས་ཀྱི་ཁ་འཛིན་མཛོད། །སྐུ་མདོག་དམར་སྨུག་ཞི་འཛུམ་ཅན། །ངུར་སྨྲིག་ན་བཟའ་སྐུ་ལ་གསོལ། །ཕྱག་གཡས་སྤུ་གྲི་རེག་གཅོད་ཕྱར། །གཡོན་པས་འཕྲུལ་གྱི་ཆག་ཤིང་བསྣམས། །དགྲ་སྲོག་གཅོད་ཅིང་དངོས་གྲུབ་སྡུད། །ཕ་ཚུན་དགྲ་བླ་མཐུ་བོ་ཆེ། །བརྒྱན་གྱི་གཏོར་མ་འདི་བཞེས་ལ། །ཁྱེད་ཀྱི་གདུང་རིགས་བདག་ཅག་ལ། །ཁ་འཛིན་སྡོང་གྲོགས་མ་གཡེལ་ཅིག །ཧཱུྃ། བན་ཐུང་ཞེས་གྲགས་དགྲ་བླ་འབྲོང་རིགས་ལྷ། །ལྷ་རྒོད་དྲག་པོ་རྫུ་འཕྲུལ་ཅན། །ཁྲོས་པའི་
ཚུལ་གྱིས་བཞེངས་ཙམ་ན། །སྐུ་མདོག་དམར་ནག་ཁྲག་གི་མདོག །དྲག་གཏུམ་དཔའ་བརྗིད་མེ་ལྟར་འབར། །སྤྱན་མིག་སྐར་ཆེན་ཤར་བ་འདྲ། །མཆེ་བ་ཟུར་གསུམ་ཨོཾ་གཅིག་བསྡམས། །དབུ་ལ་སྔགས་ཞུ་ནག་པོ་གསོལ། །སྐུ་ལ་དམར་སྨུག་བཙུན་ཆས་མཛེས། །ཕྱག་གཡས་སྤུ་གྲི་རེག་གཅོད་ཕྱིར། །དགྲ་བོའི་སྲོག་རྩ་དམར་པོ་གཅོད། །གཡོན་པས་འཕྲུལ་གྱི་ཆག་ཤིང་བསྣམས། །དགྲ་ནོར་སྣ་དགུ་གཡང་དུ་ལེན། །ཆིབས་སུ་རླུང་ནག་འཚུབ་མ་ཆིབས། །འཇིག་རྟེན་སྐད་ཅིག་ཡུད་ལ་བསྐོར། །གློག་དམར་འཚུབ་ཅིང་ཚྭ་ཚྭ་འཕྲོ། །འདིར་གཤེགས་བརྒྱན་པའི་གཏོར་མ་བཞེས། །བུ་དང་ཚ་བོའི་ཁ་འཛིན་མཛོད། །མཉམ་གཉིས་མི་དང་རྩལ་འགྲན་ན། །དཔའ་ཡ་དཔུང་རོགས་ཁྱོད་ལ་རེ། །བུ་རྟ་འཚོས་ལ་དགྲ་དཔུང་ཆོམས། །མཉམ་གཉིས་མི་དང་ཕྱུགས་འགྲན་ན། །བེའུ་ལུག་འཕེལ་ཀ་ཁྱོད་ལ་རེ། །ཕྱུགས་ལ་གོད་ཁ་མ་བཏང་ཞིག །མཉམ་གཉིས་མི་དང་རྟ་རྒྱུག་ན། །མགྱོགས་པའི་དོ་ཅིབས་ཁྱོད་ལ་རེ། །འོག་རྟ་འཚོས་ལ་རླུང་ཁ་འབྱིན། །ཕྱི་དགྲ་ནང་དུ་མ་བཏང་ཞིག །ནང་འཁྲུག་ཕྱི་རུ་མ་བཏང་ཞིག །དགྲ་རྐུན་
ཇག་གསུམ་གནོད་པ་ཟློག །རྟ་ནོར་ལུག་གསུམ་འཕེལ་བར་མཛོད། །མི་ཧྲག་རྟ་འཕེལ་དངོས་གྲུབ་སྩོལ། །གཞི་ལ་འདུག་ན་གཞི་དཔོན་མཛོད། །བྱེས་ལ་འགྲོ་ན་བྱེས་དཔོན་མཛོད། །དམག་ལ་འགྲོ་ན་དམག་དཔོན་མཛོད། །ཚོང་ལ་འགྲོ་ན་ཚོང་དཔོན་མཛོད། །ཅི་འདོད་དངོས་གྲུབ་བསྩལ་དུ་གསོལ། །ཉིན་གྱི་དུས་སུ་བྱ་ར་མཛོད། །མཚན་གྱི་དུས་སུ་མེལ་ཚེ་མཛོད། །ན་ཁ་ཆོད་ལ་ཡམས་ཁ་ཟློག །བཅོལ་བའི་ཕྲིན་ལས་འགྲུབ་པར་མཛོད། ༈ །སྟག་ཞོན་སྤོམ་ར་བན་ཐུང་དང་། །དགྲ་བླ་མི་དང་མ་འབྲལ་ཅིག །གོ་མཚོན་རྣམས་ལ་བརྟན་པར་བཞུགས། །རྟག་ཏུ་སྲུང་སྐྱོབ་ཁ་འཛིན་མཛོད། །འཁོར་གྱི་ལྷ་སྲིན་འབྱུང་པོ་ཀུན། །མགུ་བར་གྱིས་ལ་རང་གནས་གཤེགས། །རང་ཉིད་གྲོ་ལོད་ཧཱུྃ་ལ་ཐིམ། །ཧཱུྃ་ཡང་དྲན་རྫོགས་སྟོང་པ་ཉིད། །དགེ་བས་པད་འབྱུང་འགྲུབ་གྱུར་ནས། །རྟག་ཏུ་བཀྲ་ཤིས་བདེ་ལེགས་ཤིང་། །འབྲོང་པ་རྣམས་ལ་ཕན་བདེ་ཤོག །རཱ་ག་ཨ་སྱས་སོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། །།