འབྲོང་པ་བན་ཐུང་གསོལ་མགྱོགས་དང་གཏོར་འབུལ།
འབྲོང་པ་བན་ཐུང་གསོལ་མགྱོགས་ནི། །མཆོད་པ་ཅི་འབྱོར་བཤམས། ཨ་ཀཱ་རོས་བྱིན་རླབས། ཧཱུྃ། རྣལ་འབྱོར་དབང་ཕྱུག་འབྲོང་པ་བན་ཐུང་ནི། །ཐུགས་ནི་དག་པ་རྒྱལ་བའི་ཞིང་དུ་གཤེགས། །བླ་ནི་ཕ་མཚུན་དགྲ་བླའི་ཚུལ་བཞུགས་ནས། །རིགས་རྒྱུད་འབྲོང་རིགས་རྣམས་ལ་ཁ་འཛིན་མཛོད། །བན་ཐུང་ཞེས་པ་དགྲ་བླ་གཉན་པོ་ཁྱོད། །བདག་གི་གདུང་བའི་ཡིད་ཀྱིས་སྤྱན་འདྲེན་ན། །མཆོད་ཕྱིར་བསྒྲུབ་ཕྱིར་གནས་འདིར་གཤེགས་སུ་གསོལ། །ཡིད་སྤྲུལ་རིན་ཆེན་དར་ཟབ་གདན་ལ་བཞུགས། །དངོས་སུ་འབྱོར་དང་ཡིད་ཀྱིས་སྤྲུལ་པ་ཡི། །མེ་ཏོག་བདུག་སྤོས་མར་མེ་དྲི་ཆབ་བཤོས། །གཟུགས་སྒྲ་དྲི་རོ་རེག་བྱ་འདོད་ཡོན་སོགས། །ཇ་ཆང་འོ་ཞོ་ཤ་ཐུད་ཟས་ཀྱི་ཕུད། །འབྲུ་སྣ་དར་ཟབ་རིན་ཆེན་སྣ་ལྔ་དང་། །སྟག་རས་གཟིག་རིས་མདའ་དར་མདུང་དར་དང་། །གོ་ཁྲབ་ལྷ་གཡག་ལ་སོགས་མཐུན་པའི་རྫས། །འབུལ་ལོ་ཐུགས་དམ་གཉན་པོ་བསྐང་གྱུར་ཅིག །ཧཱུྃ་ལས་རིན་ཆེན་སྣོད་དུ་གཏོར་མ་ནི། །དཀར་གསུམ་མངར་གསུམ་ཟག་མེད་བདུད་རྩིའི་མཚོ། །ཁ་དོག་དྲི་རོ་རེག་བྱ་ཕུན་སུམ་ཚོགས། །ཨོཾ་ཨཱཿཧཱུྃ་གིས་ཟག་མེད་བདུད་རྩིར་
གྱུར། །འབྲོང་པ་བན་ཐུང་ཞེས་གྲགས་དགྲ་བླ་ཆེ། །ཕ་མཚུན་མགོན་བྱེད་རྣམས་ལ་འབུལ་གྱིས་བཞེས། །ཐམས་ཅད་རབ་ཏུ་དགྱེས་ཤིང་ཚིམ་གྱུར་ཅིག །ཨོ་ཕྱེ་ཕྱེ་ཏ་ཧེ་ཧེ་ཀུ་ལུ་མུ་ཧེ་ཨི་དཾ་བ་ལིཾ་ཏ་ཁ་ཁ་ཁཱ་ཧི། ༀ་བཛྲ་ཨརྒྷཾ་སོགས་ནས་ཤབྡའི་བར་བརྗོད། ཧཱུྃ། རིག་སྔགས་གྲུབ་པའི་ཧེ་རུ་ཀ །མཚན་ནི་འབྲོང་པ་བོན་ཐུང་ཞེས། །ཐུགས་ནི་དག་པའི་ཞིང་དུ་གཤེགས། །བླ་ནི་དྲག་པོའི་དགྲ་བླའི་སྐུ། །རིགས་རྒྱུད་རྣམས་ལ་ཁ་འཛིན་མཛད། །སྐུ་མདོག་དམར་པོ་ཞི་འཛུམ་ཅན། །ངུར་སྨྲིག་ན་བཟའ་སྐུ་ལ་གསོལ། །ཕྱག་གཡས་གནམ་ལྕགས་སྤུ་གྲི་ཕྱར། །གཡོན་པས་འཕྲུལ་གྱི་ཆག་ཤིང་གཡུགས། །དགྲ་སྲོག་གཅོད་ཅིང་དངོས་གྲུབ་སྡུད། །ཕ་མཚུན་དགྲ་བླ་མཐུ་བོ་ཆེ། །བརྒྱན་པའི་གཏོར་མ་འདི་བཞེས་ལ། །ཁྱོད་ཀྱི་གདུང་རིགས་བདག་ཅག་ལ། །ཁ་འཛིན་སྡོང་གྲོགས་མ་གཡེལ་ཅིག །ཅེས་ཨ་རཱ་གས་སྦྱར་བའོ།། །།གཏོར་འབུལ་ནི། ཧཱུྃ། བན་ཐུང་ཞེས་གྲགས་འབྲོང་རིགས་ཀྱི། །ལྷ་རྒོད་དྲག་པོ་རྫུ་འཕྲུལ་ཅན། །ཁྲོས་པའི་ཚུལ་གྱིས་བཞེངས་ཙ་ན། །སྐུ་མདོག་དམར་སྨུག་ཁྲག་གི་
མདོག །སྤྱན་མིག་སྐར་ཆེན་ཤར་བ་འདྲ། །མཆེ་བ་གསུམ་ནི་ཨ་གཙིགས་བསྡམས། །དབུ་ལ་སྔགས་ཞུ་ནག་པོ་གསོལ། །སྐུ་ལ་དམར་སྨུག་བཙུན་ཆོས་མནབས། །ཕྱག་གཡས་སྤུ་གྲི་རིག་གཅོད་ཕྱིར། །དགྲ་བོའི་སྲོག་རྩ་དམར་པོ་གཅོད། །གཡོན་པས་འཕྲུལ་གྱི་ཆག་ཤིང་གཡུགས། །དགྲ་ནོར་སྣ་དགུ་གཡང་དུ་ལེན། །ཆིབས་སུ་རླུང་ནག་འཚུབ་མ་ཆིབས། །འཇིག་རྟེན་སྐད་ཅིག་ཡུད་ལ་བསྐོར། །གློག་དམར་འཁྱུགས་ཤིང་ཚྭ་ཚྭ་འཕྲོ། །འདིར་གཤེགས་བརྒྱན་པའི་གཏོར་མ་བཞེས། །བདག་ཅག་ཁྱེད་ཀྱི་རིགས་རྒྱུད་ལ། །བུ་དང་ཚ་བོ་ཁ་འཛིན་མཛོད། །མཉམ་གཉིས་མི་དང་རྩལ་འགྲན་ན། །ཚེ་རིང་ནད་མེད་ཁྱོད་ལ་རེ། །མི་ལ་ན་ཚ་མ་གཏོང་ཞིག །མཉམ་མི་དང་ཕྱུགས་འགྲན་ན། །བེའུལུག་འཕེལ་ཁ་ཁྱོད་ལ་རེ། །ནོར་ལ་གོད་ཁ་མ་བཏང་ཞིག །མཉམ་གཉིས་མི་དང་དཔའ་འགྲན་ན། །དཔའ་བའི་དཔུང་རོགས་ཁྱོད་ལ་རེ། །བུ་རྟ་འཆོས་ལ་དགྲ་དཔུང་ཟློག །མཉམ་གཉིས་མི་དང་རྟ་རྒྱུགས་ན། །མགྱོགས་པའི་དར་ལྕེ་ཁྱོད་ལ་རེ། །འོག་རྟ་འཚོས་ལ་རླུང་ཁ་འཛིན། །ཕ་སྤུན་ཤག་རོགས་བུ་
སྲིང་གི །ཡུལ་དུ་མ་བྲོས་མ་འཁྱམས་པར། རང་གི་དབོན་སྲས་ཁ་འཛིན་མཛོད། །མི་དང་ལྷ་གཉིས་མ་བྲལ་བར། །ཉིན་གྱི་དུས་སུ་བྱུ་ར་གྱིས། །མཚན་གྱི་དུས་སུ་མེལ་ཚེ་མཛོད་། །ཕྱི་དགྲ་ནང་དུ་མ་བཏང་ཞིག །དགྲ་ཇག་ཆོམ་རྐུན་འཚེ་བ་སྐྱོབས། །རྟ་ནོར་ལུག་གསུམ་འཕེལ་བ་དང་། །མི་འཕེལ་རྟ་ཧྲག་དངོས་གྲུབ་སྩོལ། །མཐུ་རྩལ་ཅི་འདུག་ད་བལྟའོ། །བཅོལ་བའི་ཕྲིན་ལས་འགྲུབ་པར་མཛོད། །ཅེས་གཏོར་མ་གཙང་སར་འབུལ། །ཞེས་ཨ་རཱ་གས་སོ།། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།