གཏེར་སྲུང་དགེ་བསྙེན་སྨྱོ་ཁའི་བར་བློན་ཆེན་པོའི་གསོལ་མཆོད་ཕན་བདེའི་ཆུ་གཏེར།
གཏེར་སྲུང་དགེ་བསྙེན་སྨྱོ་ཁའི་བར་བློན་ཆེན་པོའི་གསོལ་མཆོད་ཕན་བདེའི་ཆུ་གཏེར་བཞུགས་སོ། །
ན་མོ་གུ་རུ་ལོ་ཀ་ཀྲོ་དྷ་ཡེ། སྣང་སྲིད་དྲེགས་པ་འདུལ་བའི་གཉེན། །རྡོ་རྗེ་གྲོ་ལོད་ཞབས་ལ་འདུད། །གཏེར་སྲུང་དགེ་བསྙེན་སྨྱོ་ཁའི་འཁོར། །ཀླུ་བདུད་འབོ་རང་ཞེས་ཀྱང་བྱ། །མཁར་ནག་རྡོ་རྗེ་རྒྱལ་པོའི་འཁོར། །བར་བློན་ཆེན་པོ་ཞེས་གྲགས་པའི། །བཀའ་སྲུང་དྲག་རྩལ་ལྡན་པ་དེ། །འཇིག་རྟེན་མཆོད་དང་བསྟོད་པས་བསྒྲུབ། །གསུངས་ཕྱིར་མཆོད་བསྟོད་བྱེད་འདོད་ན། །རིན་ཆེན་སྣོད་དམ་སྣོད་གཙང་དུ། །གཏོར་མ་རིན་ཆེན་འདྲ་བའི་དབྱིབས། །དཀར་གསུམ་བརྒྱན་ཞིང་ཀླུ་སྨན་བཏབ། །སྦྲུལ་གཟུགས་དཀྲིས་སམ་མེད་ཀྱང་རུང་། །རང་ཉིད་ཡི་དམ་གང་རུང་ངམ། །པད་འབྱུང་གསལ་བའི་ང་རྒྱལ་གྱིས། །སྤྱན་འདྲེན་ཚིག་དེ་འབྲུག་ལྟར་སྒྲོག །དེ་གསན་མདུན་དུ་བྱོན་པར་བསམ། །ཀྱཻ།
རྡོ་རྗེ་གདན་གྱི་བྱང་ཕྱོགས་ན། །གདོང་དམར་བོད་ཀྱི་ཡུལ་སྨད་ན། །ཀླུང་ཅང་ལྕི་ཞེས་ནས་ཀྱིས་ཕྱུག །དཔའ་བོ་མཁའ་འགྲོ་འདུ་བ་ཡི། །གནས་མཆོག་དྲུག་གིས་རབ་ཏུ་གཏམས། །གནས་དེ་རྣམས་ཀྱི་ཞིང་སྐྱོང་བ། །ཡུལ་ལྗོངས་དེ་ཡི་ཆུ་བོ་དང་། །ཆུ་མདོ་ཀུན་ལ་གནས་བཅས་ཤིང་། །རིན་ཆེན་གཏེར་ཁ་དུ་མའི་བདག །ཟབ་གཏེར་རྣམས་ཀྱི་གཏེར་སྲུང་སྟེ། །བར་བློན་ཆེན་པོ་གཤེགས་སུ་གསོལ། །བཀའ་དང་དམ་ལ་གནས་པ་ཡི། །འཁོར་བཅས་རྣམས་ཀྱང་སྤྱན་འདྲེན་ནོ། །བརྩེ་ཞིང་གདུང་བས་སྤྱན་འདྲེན་ན། །ཞི་ཞིང་
བྱམས་པའི་ཐུགས་ཀྱིས་ནི། །གློག་ལྟར་མྱུར་བའི་རྫུ་འཕྲུལ་གྱིས། །སྐད་ཅིག་ཉིད་ལ་འདིར་བྱོན་ཅིག །ཡིད་སྤྲུལ་གཙོ་འཁོར་འཚམས་པ་ཡི། །རང་རང་དགྱེས་པའི་གདན་ཁྲི་ལ། །ཇི་སྲིད་མཆོད་པས་བདག་བགྱིད་ན། །དེ་སྲིད་དགྱེས་ཤིང་བརྟན་པར་བཞུགས། །ཨོ་ནཱ་ག་ཨུ་པ་སི་ཀ་མ་ཧཱ་པུ་རུ་ཥ་བཛྲ་ས་མ་ཡ་ཛ༔ ཛཿཧཱུྃ་བཾ་ཧོ༔ ཏིཥྛ་ལྷན། ཧཱུྃ༔ སེམས་དཔའ་ནམ་མཁའི་སྙིང་པོའི་སྤྲུལ་པ་སྟེ། །རྡོ་རྗེ་རྒྱལ་པོ་ས་བརྒྱད་སེམས་དཔའ་ཆེ། །སྨྱོ་ཁ་ལ་སོགས་གནས་བརྒྱད་མཚན་བརྒྱད་ལྡན། །རྒྱ་གར་ཡུལ་གྱི་གྲོང་ཁྱེར་སྒྲ་སྒྲོགས་དང་། །མཁར་ཆུ་ལ་སོགས་བོད་ཀྱི་གནས་ཆེན་བརྒྱད། །གངས་ཅན་ཆུ་བོ་ཀུན་གྱི་བདག་པོ་སྟེ། །དགེ་བསྙེན་སྨྱོ་ཁ་གཏེར་སྲུང་ཀུན་གྱི་གཙོ། །དེ་ཡི་སྤྲུལ་པ་འཁོར་གྱི་ཚུལ་བསྟན་པ། །བར་བློན་ཆེན་པོ་ཞེས་གྲགས་ཁྱོད་ཉིད་ལ། །བདག་གིས་རབ་གུས་སྤྲུལ་པས་ཕྱག་བགྱིའོ། །སྔོན་ཚེ་སློབ་དཔོན་པདྨ་འབྱུང་གནས་ཀྱིས། །མ་དྲོས་མཚོ་དང་རྒྱལ་བའི་ཡངས་རྫོང་དང་། །ཆུ་བོ་ལོ་ཧི་ཏ་ཡའི་ཀླུང་འགྲམ་དུ། །ཇི་ལྟར་བཀའ་བསྒོས་དམ་ཚིག་དྲན་མཛོད་ལ། །གུ་རུའི་རྗེས་འཇུག་རྣལ་འབྱོར་བདག་ཅག་གི །
ཡིད་ལ་འདོད་པའི་དོན་ཀུན་འགྲུབ་པར་མཛོད། །ཨོཾ་ནཱ་ག་ཨུ་པ་སི་ཀ་ས་མཱ་ཡ་ཧ་ན་ཧ་ན་ཧཱུྃ་ཕཊ། ཧཱུྃ། དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །ཀླུ་སྨན་འོ་མར་སྦྱར་བའི་མཆོད་ཡོན་དང་། །ཡན་ལག་བརྒྱད་དང་ལྡན་པའི་ཁྲུས་ཀྱི་ཆབ། །མེ་ཏོག་སྣ་ཚོགས་བཀྲག་གསལ་ཟིལ་པར་བཅས། །ཙནྡན་དཀར་དམར་ནཱ་གི་སྤྲོས་དཀར་དུད། །ཤེལ་རིགས་ནོར་བུ་སྣ་ཚོགས་འོད་འབར་བ། །མ་ཧཱ་ཙི་ནའི་འདབ་ཀྱི་རྐང་ཐུང་ཆབ། །དཀར་གསུམ་མངར་གསུམ་གཙང་མ་ཟས་ཀྱི་ཕུད། །རྔ་དུང་ཆ་ལང་དྲིལ་བུ་སྙན་པའི་དབྱངས། །གཅན་གཟན་རི་དྭགས་ཆུ་གནས་མཛེས་པའི་གཟུགས། །པི་ཝང་གླིང་བུ་འཁར་རྔ་སྙན་པའི་སྒྲ། །ཞིམ་མར་བཟང་ཤིང་སྣ་ཚོགས་བསྲེག་པའི་དྲི། །འབྲུ་སྣ་ཀླུ་སྨན་བཅུད་ལྡན་ཟས་ཀྱི་ཚོགས། །དར་དང་ཟ་འོག་རེག་བྱ་འཇམ་པའི་གོས། །སྣ་ཚོགས་མཆོད་པའི་སྤྲིན་ཕུང་རྒྱ་མཚོས་མཆོད། །ཨོཾ་ལས་རིན་ཆེན་སྣོད་མཆོག་རྒྱ་ཆེ་བར་། །ཁཾ་ལས་གཏོར་མ་དཀར་གསུམ་བདུད་རྩིའི་མཚོ། །ཁ་དོག་དྲི་རོ་ནུས་པ་ཕུན་སུམ་ཚོགས། །ཨོཾ་ཨཱཿཧཱུྃ་གིས་ཡེ་ཤེས་བདུད་རྩིར་བསྒྱུར། །ཟག་མེད་བདེ་བ་སྐྱེད་པར་
བྱེད་པ་འདི། །ནཱ་ག་བར་བློན་ཆེན་པོ་ཁྱོད་ལ་འབུལ། །བཙུན་མོ་བློན་པོ་འཁོར་གཡོག་བྲན་དང་བཅས། །ཐམས་ཅད་མ་ལུས་མཉེས་ཤིང་ཚིམ་གྱུར་ཅིག །ནཱ་ག་ཅི་ཅི་འབེ་འབེ་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། གསུམ་འབུལ། ཨོཾ་ནཱ་ག་ཨུ་པ་སི་ཀ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨརྒྷཾ་སོགས། སརྦ་པཱུ་ཛ་ཧོ༔ ཧཱུྃ། བར་བློན་ཆེན་པོ་མཐུ་བོ་ཆེ། །འདོད་དགུ་བསྒྱུར་བའི་རྫུ་འཕྲུལ་གྱིས། །ཆ་ལུགས་གཅིག་ཏུ་མ་ངེས་ཀྱང་། །ཞི་བའི་ཚུལ་དུ་སྐུར་བསྟན་པ། །སྐུ་མདོག་དཀར་ལ་སྨུག་པའི་མདངས་། །ཞལ་རས་ཞི་ཞིང་འཛུམ་པ་ལ། །འཇིགས་ཤིང་རྔམས་པའི་གཟི་བྱིན་ཅན། །དབྱི་དཀར་ལྤགས་པའི་དབུ་ཞྭ་ལ། །དར་ཚོན་སྣ་ལྔའི་ཅོད་པན་འཕུར། །དངུལ་མདོག་དར་གྱི་ན་བཟའ་ལ། །མེ་ཏོག་པདྨའི་རི་མོ་བཀྲ། །དཔའ་བོ་སྟག་གི་གོང་ལག་ལ། །འཇའ་ཚོན་སྣ་ལྔའི་ཆ་ག་ཅན། །དབྱི་སྲམ་པགས་པའི་མཐའ་སྐོར་ལ། །གསེར་སྐྱེད་རིན་ཆེན་སྐྱེད་ལ་བཅིང་། །སྟག་རལ་གཡས་ལ་གཟིག་ཤུབས་གཡོན། །ཆིབས་སུ་འཕྲུལ་གྱི་ཅང་ཤེས་ནི། །དུང་མདོག་བར་སྣང་རླུང་བས་མགྱོགས། །གཡུ་རྔོག་ཞྭ་བཞི་
སྔོན་པོ་ལ། །གསེར་སྲབ་གཡུ་མཐུར་སྟག་སྒྲ་ཅན། །ཕྱག་གཡས་སྦ་ལྕག་དཀར་པོ་ལ། །རིན་ཆེན་སྣ་ལྔའི་ལྕག་འབྲས་དང་། །དར་ཚོན་སྣ་ལྔའི་ཕོད་ཀྱིས་བརྒྱན། །གཡོན་པས་འཕྲུལ་གྱི་སྲབ་སྐྱོགས་བསྒྱུར། །སྐུ་ཆེ་གཟི་བརྗིད་འོད་དུ་འབར། །འཁོར་དུ་རང་འདྲ་བཅུ་གཉིས་ནི། །གཙོ་བོ་ལས་ནི་ཆུང་ཙམ་སྟེ། །རྒྱན་དང་ཆ་ལུགས་གཙོ་དང་མཚུངས། །སྤྲུལ་པ་དུང་ཉ་འཁྱིལ་པ་ནི། །བླ་མཚོ་ཁེངས་ཤིང་གཡས་སུ་འཁོར། །འབྲུག་སྒྲ་ཆེམ་ཆེམ་གློག་འོད་འཁྱུགས། །དམ་ཚིག་ཅན་གྱི་སྡོང་གྲོགས་བྱེད་། །ལེགས་ཉེན་ཀུན་གྱི་ཤན་འབྱེད་ཅིང་། །ཟབ་གཏེར་བཀའ་ཡི་སྲུང་མ་བྱེད། །གཏེར་སྲུང་དགེ་བསྙེན་དམ་ཚིག་ཅན། །འཁོར་དང་བཅས་ལ་མཆོད་ཅིང་བསྟོད། །བརྒྱན་པའི་གཏོར་མ་འདི་བཞེས་ལ། །བདག་ཅག་དཔོན་སློབ་འཁོར་བཅས་ལ། །ནད་གདོན་བར་ཆད་ཞི་བ་དང་། །དཔལ་འབྱོར་ལོངས་སྤྱོད་རྒྱས་པ་དང་། །སྐྱེ་འགྲོ་དབང་དུ་འདུ་བ་དང་། །དགྲ་བགེགས་དཔུང་ཚོགས་གཞོམ་པ་སོགས། །ཡིད་ལ་རེ་བའི་འབྲས་བུ་དེ། །ད་ལྟ་ཉིད་དུ་འགྲུབ་པར་མཛོད། །མཐུ་དང་ནུས་པ་ཅི་འདུག་ལྟ། །རྟགས་
དང་མཚན་མ་དངོས་སུ་སྟོན། །བཅོལ་བའི་ཕྲིན་ལས་འགྲུབ་པར་མཛོད། །ཅེས་པ་གཏེར་སྲུང་དགེ་བསྙེན་ལས་བྱང་འདི། །རང་ལོ་སུམ་ཅུའམ་བཞི་བཅུའི་དུས་སྐབས་འགར། །བླ་མཚོའི་ཁ་དེར་ཀླུ་མཆོད་བྱེད་སྐབས་སོགས། །དེ་ཡི་རྟགས་དང་ཆོ་འཕྲུལ་མང་དུ་བྱུང་། །རྨི་ལམ་ཡུལ་དུ་རང་གཟུགས་གསལ་བར་མཐོང་། །དགའ་དང་གུས་པའི་རྣམ་འགྱུར་འགའ་རེ་བྱས། །ཀུན་གྱིས་འདྲེར་བཟུང་རྣམ་རྟོག་བྱེད་མོད་ཀྱང་། །ཨོ་རྒྱན་ཆེན་པོའི་དམ་ཚིག་ལ་གནས་པའི། །དཀར་ཕྱོགས་སྐྱོང་བའི་དགེ་བསྙེན་དམ་ཚིག་ཅན། །ཨོ་རྒྱན་རྗེས་འཇུག་སྔགས་འཆང་ཐམས་ཅད་ལ། །ཁ་འཛིན་སྡོང་གྲོགས་བྱེད་པ་ཁོ་བོས་མཐོང་། །དེ་སླད་བླ་མ་མཐར་ཕྱིན་བསྐུལ་བའི་ངོར། །ལུག་ལོ་ལུག་གི་ཟླ་བའི་ཚེས་གསུམ་ཉིན། སྔ་དྲོའི་ཆ་ལ་རཱ་ག་ཨ་སྱས་སྨྲས། །ཡི་གེ་པ་ཡང་ཞུ་བ་པོ་ཉིད་དོ། །ཉེས་འགལ་མཆིས་ན་སྲུང་མ་ཉིད་ལ་བཤགས། །ཡུལ་ཕྱོགས་དེར་གནས་འགྲོ་ལ་ཕན་ཐོགས་ཤོག ༈ །དགེ་བསྙེན་བར་བློན་ཆེན་པོའི་གསོལ་ཀ་བྱ་བ་ནི། གཏོར་མ་ཟུར་གསུམ་ཉི་ཟླ་ནོར་བུས་བརྒྱན། །གཏོར་ཆུང་ཟུར་གསུམ་བཅུ་གཉིས་དག་གིས་བསྐོར། །དེ་མཐར་སྦྲུལ་ཆེན་འཁྱིལ་བས་བསྐོར་བྱས་ལ། །ཉ་དང་ལྕོང་མོ་སྦལ་པའི་གཟུགས་བརྙན་བཞག །གཙང་མའི་ཤ་ཕུད་ཟས་ཕུད་སྣ་ཚོགས་བརྒྱན། །འབྲུ་སྣ་ཕྱེ་མར་ཟས་ཕུད་སྣ་ཚོགས་དང་། །ཀླུ་སྨན་བཏབ་དང་བཟང་ཤིང་དུད་པ་དང་། །བསྡུ་ན་རྒྱུན་གཏོར་གསོ་བྲན་བྱས་ལ་འཐུས། །བསྐང་གསོལ་གཉིས་ཀ་དེ་ལ་འདོན་
པས་རུང་། །ལས་བྱང་བཏོན་རྗེས་བསྙེན་པ་ཅུང་ཟད་བྱ། །ཨ་ཀཱ་རོ་ཡིས་མཆོད་པ་བྱིན་བརླབས་ནས། །ཚིག་མཚམས་འཇུག་ཏུ་རོལ་མོ་འུར་བརྡུང་བྱ། །གཏོར་མའི་རྩེ་མོར་མར་རྒྱན་སོར་གང་ཙམ། །ཡེ་ཤེས་ཀླུ་བདུད་ལ་ནི་མཆོད་པ་འབུལ། །དེ་འོག་གཏོར་མའི་རྩེ་མོ་སོར་གང་ནི། །རྗེ་དཔོན་ལས་ཀྱི་ཀླུ་བདུད་སྨྱོ་ཁ་ལ། །དཔོན་ཟས་ཚུལ་དུ་འབུལ་བའི་དམིགས་པ་བྱ། །གཏོར་མ་དངོས་ནི་བཀའ་བློན་འབོ་རང་ལ། །ཤག་རོག་ཤག་ཟས་ཚུལ་དུ་བསྔོ་བར་བྱ། །གཏོར་མའི་སྨད་ཆ་གཏོར་ཆུང་བཅས་པ་རྣམས། །ཡང་འཁོར་ཀླུ་གཉན་ས་བདག་ཐམས་ཅད་ལ། །གཡོག་ཟས་ཚུལ་དུ་སྦྱིན་པར་བྱ་བ་ཡིན། །ཆུ་གནས་གཟུགས་བརྙན་རིན་ཆེན་འབྲུ་སྣ་ཚོགས། །བསྐང་བའི་རྫ་ས་སུ་དམིགས་ཏེ་ཐུགས་དམ་བསྐང་། །ཨོཾ་ནཱ་ག་ཅི་ཅི་འབེ་འབེ་སྭཱ་ཧཱ། ཨི་དཾ་བ་ལིཾ་ཏ་གྷི་ཧྥནྟ་ས་མ་ཡ་རཀྵནྟུ། མ་མ་སརྦ་སིདྡྷི་མྨེ་པྲ་ཡཙྪ། མ་མ་སརྦ་ཀརྨ་ཨ་མོ་གྷ་ཁཾ་སྭཱ་ཧཱ། ཨོཾ་ནཱ་ག་ཨུ་པ་སི་ཀ་ས་པཱ་རི་ཝ་ར་ཨི་དཾ་བ་ལིཾ་ཏ་གྷི་ཧྥན་ས་མ་ཡ་རཀྵནྟུ། མ་མ་སརྦ་སིདྡྷི་མྨེ་པྲ་ཡཙྪ། མ་མ་སརྦ་ཀརྨ་ཨམོ་གྷ་ཁཾ་སྭཱ་ཧཱ། དམ་རྫས་བརྒྱན་པའི་གཏོར་མ་རྒྱ་ཆེན་པོ་འདི། ཡེ་ཤེས་ཀྱི་ཀླུ་བདུད་ནག་པོ་མགོ་དགུ་པ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །འཇམ་དཔལ་ཡེ་ཤེས་སེམས་དཔའ་ལ་གསོལ་ལོ། །མཆོད་
དོ། །འདྲེན་ནོ། །འབུལ་ལོ། །སྦྱིན་ནོ། །ཞི་བ་མི་མགོན་དཀར་པོ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །ཁྲོ་བོ་ནཱ་ག་རཀཱ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ།། སྦྱིན་ནོ། །འཇམ་དཔལ་འཆི་བདག་ནག་པོ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། ལས་ཀྱི་ཀླུ་བདུད་མགོ་དགུ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །རྗེ་དཔོན་དགེ་བསྙེན་སྨྱོ་ཁ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །སྨྱོ་ཁ་གནས་བརྒྱད་མཚན་བརྒྱད་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །མཁར་ནག་རྡོ་རྗེ་རྒྱལ་པོ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །གྲོང་ཁྱེར་སྒྲ་སྒྲོགས་ཀླུ་དབང་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །སངས་རྒྱས་ཚེམས་ཀྱི་བདག་པོ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །ཀླུ་རྒྱལ་དུང་སྐྱོང་སྲས་པོ་ལ་གསོལ་ལོ། །མཆོད་དོ། །འདྲེན་ནོ། །
འབུལ་ལོ། །སྦྱིན་ནོ། །དབུས་གཙང་ཁམས་གསུམ་འཁོར་དང་སྤྲུལ་པས་ཁྱབ་པ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །དེའི་སྤྲུལ་པ་བློན་པོའི་ཚུལ་འཛིན་པ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །སྨྱོ་ཁའི་བཀའ་འཁོར་ཀླུ་བདུད་འབོ་རང་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །རྡོ་རྗེ་རྒྱལ་པོའི་བར་བློན་ཆེན་པོ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །འདོད་དགུ་བསྒྱུར་བའི་ལུས་ཅན་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །ཅི་ཡང་སྤྲུལ་པའི་རྫུ་འཕྲུལ་ཅན་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །གར་ཡང་ཕྱིན་པའི་མྱུར་མགྱོགས་ཅན་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །སྤྲུལ་པ་མི་ནག་རྟ་ནག་རུ་མཚོན་ཅན་ལ་གྱི་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །བནྡེ་ཆེན་པོ་མདུང་དར་རུ་མཚོན་ཅན་ལ་གསོལ་ལོ། མཆོད་དོ། །འདྲེན་ནོ། །འབུལ་ལོ། །སྦྱིན་
ནོ། །པཎྜི་ཏ་རྟ་ནག་པོ་ཆིབས་པ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །མི་དཀར་ཉའི་མགོ་ཅན་རྒྱལ་མཚན་ཐོགས་པ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །ཡུམ་ཀླུ་མོ་སེར་མོ་ནོར་བུའི་བེ་ཅོན་ཐོགས་པ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །མཚོ་སྨན་མཛེས་སྡུག་མང་པོ་འཁོར་གྱིས་བསྐོར་བ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། ། ནོ། །བློན་པོ་ཟླ་བའི་ཐོད་ཅན་སྦལ་སྦྲུལ་འཛིན་པ་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །བཀའ་འཁོར་རྒྱལ་རིགས་དཀར་པོའི་སྡེ་ཚོགས་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །རྗེ་རིགས་སེར་པོའི་སྡེ་ཚོགས་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །དམངས་རིགས་སྔོན་པོའི་སྡེ་ཚོགས་ལ་གསོལ་ལོ་།མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །བྲམ་ཟེ་དམར་པོའི་སྡེ་ཚོགས་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །གདོལ་
པ་ནག་པོའི་སྡེ་ཚོགས་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །གཉན་དང་ས་བདག་གི་སྡེ་ཚོགས་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །ཀླུ་དང་བཙན་གྱི་འཁོར་ཚོགས་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །ལྟ་བ་མཚོ་སྨན་གྱི་འཁོར་ཚོགས་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །སྨན་དང་ཡུལ་ལྷའི་འཁོར་ཚོགས་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། སྦྱིན་ནོ། །འཁོར་དང་ཡང་འཁོར་ཐམས་ཅད་ལ་གསོལ་ལོ། །མཆོད་དོ། །འདྲེན་ནོ། །འབུལ་ལོ། །སྦྱིན་ནོ། །མཉེས་རབ་ཀྱི་ཕུད། དགྱེས་རབ་ཀྱི་མཆོད་པ་དམ་པ་མཛོད། མཉེས་ཤིང་ཚིམས་དགའ་ཞིང་མགུ་ནས་བདག་ཅག་དཔོན་སློབ་བསྲུང་བྱར་གྱུར་པ་རྣམས་ལ། ཉིན་གྱི་བྱ་ར་དང་མཚན་གྱི་མེལ་ཚེ་གྱིས་ཤིག །རྒྱབ་ཀྱི་རྟེན་ས་དང་། མདུན་གྱི་འཁར་བ་གྱིས་ཤིག །བྲོས་པའི་ར་བ་དང་གབ་པའི་སྐུང་ས་གྱིས་ཤིག །འགྲོ་ན་སྐྱེལ་བསུ་དང་འདུག་ན་རྒྱབ་རྟེན་གྱིས་ཤིག །ནད་གདོན་བར་དུ་གཅོད་པ་
ཐམས་ཅད་ཞི་བར་མཛོད་ཅིག །ཕྱི་ནང་གི་འཁྲུག་རྩོད་ཐམས་ཅད་ཞི་བར་མཛོད་ཅིག །མི་ནད་ཕྱུགས་ནད་ཐམས་ཅད་ཞི་བར་མཛོད་ཅིག །མིའི་ན་ཚ་དང་ཕྱུགས་ཀྱི་གོད་ཁ་ཐམས་ཅད་རྒྱུན་ཆོད་ཅིག །དཔལ་དང་འབྱོར་པ་མངའ་ཐང་རྒྱས་པར་མཛོད་ཅིག །རྐང་བཞི་ཕྱུགས་ཀྱི་དངོས་གྲུབ་སྩོལ་ཅིག །རྨིག་ཟླུམ་རྔོག་ཆགས་ཀྱི་དངོས་གྲུབ་སྩོལ་ཅིག ། མི་འཕེན་རྟ་བྲག་གི་དངོས་གྲུབ་སྩོལ་ཅིག །ཀླུ་གཡང་མི་ལ་ཕོབ་ཅིག །བཙན་ཕྱུག་དར་གསུམ་གྱི་དངོས་གྲུབ་སྩོལ་ཅིག །བང་མཛོད་འབྲུའི་དངོས་གྲུབ་སྩོལ་ཅིག །དར་རས་ཟབ་ཀྱི་དངོས་གྲུབ་སྩོལ་ཅིག །རིན་ཆེན་གསེར་དངུལ་གྱི་དངོས་གྲུབ་སྩོལ་ཅིག །སྲ་བརྟན་གོ་ཆའི་དངོས་གྲུབ་སྩོལ་ཅིག །ལྷབ་ལྷུབ་གྲོས་ཀྱི་དངོས་གྲུབ་སྩོལ་ཅིག །རྨ་གཡང་ཟས་ཀྱི་དངོས་གྲུབ་སྩོལ་ཅིག །རྒྱལ་བློན་ཡུལ་འཁོར་དབང་དུ་སྡུས་ཤིག །ཕྱིའི་དགྲ་བགེགས་ནང་དུ་མ་བཏང་། ནང་གི་དངོས་གྲུབ་ཕྱི་རུ་མ་ཤོར་ཅིག །དམག་སྣ་དང་ཇག་སྣ་ཟློག་ཅིག །དགྲ་དང་རྐུན་སྣ་ཟློག་ཅིག །བསམ་ངན་སྦྱོར་རྩུབ་ཟློག་ཅིག །གོད་ཁ་གཅན་སྣ་ཟློག་ཅིག །མི་ཁ་གླེང་གཞི་ཟློག་ཅིག །གྱོད་སྣ་བྱུར་སྣ་ཟློག་ཅིག །རྒྱལ་
པོའི་བཀའ་ཆད་ཟློག་ཅིག །རྒྱལ་འགོང་གི་གནོད་པ་ཟློག་ཅིག །མ་ཉེས་ཁ་ཡོག་ཟློག་ཅིག །དེ་ལེན་དེ་ཉེས་ཟློག་ཅིག །སྡང་བའི་དགྲ་སོད་ཅིག །གནོད་པའི་བགེགས་ཐུལ་ཅིག །བདག་ཅག་དཔོན་སློབ་ཡོན་མཆོད་འཁོར་དང་བཅས་པའི་ཡིད་ལ་རེ་བའི་འབྲས་བུ་མཆིས་པར་མཛོད་ཅིག །བཀྲ་ཤིས་བདེ་ལེགས་ཕུན་སུམ་ཚོགས་པར་མཛོད་ཅིག །ཅི་རེ་ཁྱོད་ལ་རེའོ། །ལྷ་རུ་ཁྱོད་བསྟེན་ནོ། །རྒྱལ་མཚན་བཞིན་དུ་ཁྱོད་ཕྱིར་རོ། །མཐུ་དང་ནུས་པ་ཅི་འདུག་བལྟའོ། །དེ་ལྟར་མཆོད་དང་བསྟོད་ཀྱང་རེ་བའི་དོན་མ་བསྒྲུབས་ན། དགེ་བསྙེན་ཁྱོད་ལ་མཐུ་དང་ནུས་རྩལ་མི་འདུག་ཅེས་འཇིག་རྟེན་ཀུན་གྱིས་སྨོད། སྔོན་སློབ་དཔོན་པདྨའི་བཀའ་བསྒོས་པའི་དམ་ཚིག་ལ་འགལ་ལོ། །དེ་བས་ན་ལེ་ལོ་བཏང་སྙོམས་མ་མཛད་པར། བདག་གི་བཅོལ་བའི་ཕྲིན་ལས་འདི་དག་མྱུར་དུ་སྒྲུབས་ཤིག །ཨོཾ་ནཱ་ག་ཅི་ཅི་འབེ་འབེ་སྭཱ་ཧཱ། སརྦ་སིདྡྷི་ཧཱུྃ། དེ་ནས་གསོལ་ཀ་གཏོར་མ་གསོ་བྲན་བྱས་ཏེ་ཐུགས་དམ་བསྐང་བའི་རིམ་པ་འདི་ལྟར་རོ།། ཧཱུྃ། འཇིག་རྟེན་འདས་དང་མ་འདས་མཚམས། །རྒྱ་མཚོ་ཆེན་པོ་དྭངས་བའི་ནང་། །འཇམ་དཔལ་ཐུགས་ལས་སྤྲུལ་པའི་
སྲས། །དགེ་བསྙེན་ཆེན་པོའི་ཡང་རྗེ་སྟེ། །ནཱ་ག་རཀཱའི་ཐུགས་དམ་བསྐང་། །དེ་ཉིད་ཞི་བ་ནོར་ལྷའི་ཚུལ། །མི་མགོན་དཀར་པོའི་ཐུགས་དམ་བསྐང་། །དེ་ཡི་བཀའ་འཁོར་ཀླུ་ཆེན་བརྒྱད། །བཙུན་མོ་སྲས་བཅས་ཐུགས་དམ་བསྐང་། །གནས་ཆེན་དེ་ཝི་ཀོ་ཊི་ན། །གནས་བཅས་གཏེར་གྱི་སྲུང་མ་མཆོག །དགེ་བསྙེན་སྨྱོ་ཁའི་ཐུགས་དམ་བསྐང་། །གནས་བརྒྱད་མཚན་བརྒྱད་ལྡན་པ་ཡི། །བསྟན་སྲུང་ཆེན་པོའི་ཐུགས་དམ་བསྐང་། །དེ་ཡི་བཀའ་འཁོར་ཀླུ་བདུད་ནི། །འབོ་རང་ནག་པོའི་ཐུགས་དམ་བསྐང་། །རྒྱ་གར་གྲོང་ཁྱེར་སྒྲ་སྒྲོགས་དང་། །སོག་གི་ཆུ་ལ་གནས་བཅས་པའི། །རྡོ་རྗེ་རྒྱལ་པོའི་ཐུགས་དམ་བསྐང་། །ཀླུ་མོ་ན་ར་སེང་ཧ་དང་། །ཀླུ་ཆེན་མིང་སྲིང་ཐུགས་དམ་བསྐང་། །བར་བློན་ཆེན་པོ་དྲག་རྩལ་ཅན། །དགེ་བསྙེན་ཆེན་པའི་ཐུགས་དམ་བསྐང་། །སྐུ་མདོག་ནག་པོ་འཇིགས་པའི་གཟུགས། །གཡས་པས་སྦྲུལ་ཞགས་གཡོན་ནད་རྐྱལ། །ཆིབས་སུ་སྦལ་པ་གྲོ་མོ་ཆིབས། །བསྐང་ངོ་ཁྱོད་ཀྱི་ཐུགས་དམ་བསྐང་། །སྤྲུལ་པ་མི་ནག་རྟ་རུ་ནུག །གཡས་པས་མདུང་དར་ནག་པོ་ཕྱར། །ནག་ཕྱོགས་ལྷ་འདྲེ་
དབང་དུ་སྡུད། །གཡོན་པས་རུ་མཚོན་དཀར་པོ་ཕྱར། །དཀར་ཕྱོགས་ལྷ་སྲིན་བྲན་དུ་ཁོལ། །བསྐང་ངོ་མཆོད་དོ་ཐུགས་དམ་བསྐང་། །ཡང་གཅིག་སྤྲུལ་པ་འགྱེད་ཙམ་ན། །བནྡེ་ཆེན་པོ་གསེར་ཞྭ་ཅན། །གཡས་པས་མདུང་དར་ནག་པོ་ཕྱར། །གཡོན་པས་རུ་མཚོན་ནག་པོ་ཕྱར། །རི་བོང་ནག་པོ་དིལ་མགོ་ཙམ། །ཆིབས་ནས་དགྲ་ལ་ཡེ་འདྲོགས་གཏོང་། །བསྐང་ངོ་མཆོད་དོ་ཐུགས་དམ་བསྐང་། །དགེ་བསྙེན་སྤྲུལ་པ་འགྱེད་ཙམ་ན། །སྐུ་ལ་ཆོས་གོས་ངུར་སྨྲིག་གསོལ། །དབུ་ལ་པད་ཞྭ་སེར་པོ་གྱོན། །ཕྱག་གཡས་མདུང་དར་དཀར་པོ་ཕྱར། །གཡོན་པས་སྦྲུལ་ཞགས་ནག་པོ་འཛིན། །ཆིབས་སུ་རྟ་ནག་རྟིང་དཀར་ཆིབས། །བསྐང་ངོ་མཆོད་དོ་ཐུགས་དམ་བསྐང་། །གཉན་གྱི་སྤྲུལ་པ་འགྱེད་ཙམ་ན། །མི་དཀར་ཉ་ཡི་མགོ་བོ་ཅན། །ཆིབས་སུ་ཉ་ཆེན་དཀར་པོ་ཆིབས། །ཆུ་བོ་ཆུ་མདོ་ཀུན་ལ་རྒྱུགས། །ཕྱག་གཡས་ཉ་ཡི་ཕྱག་མཚན་ཕྱར། །གཡོན་པས་ཉ་མགོའི་དབྱུག་ཏོ་འཛིན། །བསྐང་ངོ་མཆོད་དོ་ཐུགས་དམ་བསྐང་། །གནོད་སྦྱིན་སྤྲུལ་པ་འགྱེད་ཙམ་ན། །ཚོང་དཔོན་སྐྱེས་བུ་ཆ་བྱད་ཅན། །སྤྲུལ་པ་ཕྲུག་སྔོན་ན་
བཟའ་གསོལ། །དབུ་ལ་རས་དཀར་ཐོད་ཅན་བཅིངས། །གསེར་གཡུ་བྱི་རུའི་རྒྱན་ཆ་མཛེས། །ཕྱག་ན་ནོར་བུ་ནེའུ་ལེ་བསྣམས། །ཆིབས་སུ་སྔོན་པོ་ཆུ་རིས་ཆིབས། །བསྐང་ངོ་མཆོད་དོ་ཐུགས་དམ་བསྐང་། །ཀླུ་བཙན་སྤྲུལ་པ་འགྱེད་ཙམ་ན། །མི་དམར་རྟ་དམར་དམག་ཆས་ཅན། །སྦྲུལ་མགོ་དྲུག་གི་གདེངས་ཀ་ལ། །སྦྲུལ་གྱི་མཇུག་མ་རྐེད་ལ་དཀྲིས། །འབྲུག་སྒྲ་ལྡིར་ཞིང་གློག་འོད་འཕྲོ། །གནམ་ལྕགས་ཐོག་སེར་དྲག་ཏུ་འབེབས། །བསྐང་ངོ་མཆོད་དོ་ཐུགས་དམ་བསྐང་། །ཡུམ་གཅིག་ཀླུ་མོ་གསེར་གྱི་མདོག ། ཕྱག་གཡས་ནོར་བུ་བེ་ཅོན་བསྣམས། །གཡོན་པས་གསེར་གྱི་པདྨ་འཛིན། །སྐུ་སྨད་མཚོ་ཡི་ནང་དུ་ནུབ། །མཚོ་སྨན་མཛེས་སྡུག་འཁོར་གྱི་ཚོགས། །སྙན་པའི་གླུ་ལེན་བྲོ་ཡང་འཁྲབ། །བསྐང་ངོ་མཆོད་དོ་ཐུགས་དམ་བསྐང་། །བློན་པོ་མི་བོ་ཆེ་ཡི་གཟུགས། །ཐོད་པ་དཀར་པོའི་འོད་ཟེར་འཕྲོ། །དཔྲ་བར་ཟླ་བའི་གཟུགས་ཀྱིས་མཛེས། །ཕྱག་གཉིས་ཐུགས་ཀར་རྒྱལ་མཚན་འཛིན། །སྦལ་པ་སྦྲུལ་གྱི་མཇུག་ཅན་འཛིན། །བསྐང་ངོ་མཆོད་དོ་ཐུགས་དམ་བསྐང་། །འཁོར་ནི་རྒྱལ་རིགས་རྗེའུ་རིགས། །དམངས་རིགས་
གདོལ་པ་བྲམ་ཟེ་སོགས། །ཀུན་གྱི་ཐུགས་དམ་བསྐང་གྱུར་ཅིག །བདག་ཅག་དཔོན་སློབ་ཡོན་མཆོད་རྣམས། །ཚེ་རབས་ལྔ་བརྒྱ་ཚུན་ཆད་ནས། །ཀླུ་གཉན་ཐུགས་དང་ཅི་འགལ་བ། །དེ་དག་ཐམས་ཅད་མཐོལ་ལོ་བཤགས། །ཕ་མྱེས་སྔ་རབས་མན་ཆད་ནས། །བུ་ཚ་ཕྱི་རབས་ཡན་ཆོད་ཀྱི། །ཁྱེད་ཅག་ཐུགས་དང་འགལ་བའི་ལས། །གང་མཆིས་དེ་དག་མཐོལ་ལོ་བཤགས། །བདག་ཅག་ཡོན་མཆོད་འཁོར་བཅས་ལ། །ཀླུ་དང་ས་བདག་ལས་གྱུར་པའི། །ནད་ཀུན་སྐད་ཅིག་ཉིད་ལ་སོལ། །པ་བཅོལ་བའི་ཕྲིན་ལས་འགྲུབ་པར་མཛོད། །ཨོཾ་ས་མཱ་ཡ༔ ཨཱས་མ་ཡ༔ ཧཱུྃ་ས་མ་ཡ༔ ཨོཾ་སརྦ་ནཱ་ག་ནཱ་གི །ཨོཾ་བཛྲ་སཏཱ་ས་མ་ཡ་སོགས། ཞེས་དགེ་བསྙེན་བསྐང་གསོལ་གཉིས་ཀ་རཱ་ག་ཨ་སྱས་སྦྱར་བའོ། །བླ་མ་མཐར་ཕྱིན་ཞེས་བྱས་ཡི་གེ་བྲིས། །མངྒ་ལཾ།། ༈ ཞེས་དེ་ནས་བར་བློན་ཆེན་པོའི་གཏོར་འབུལ་ནི། ཞི་བ་བྱེད་ན་དཀར་གཏོར་བཤམས། ཨོཾ་ཨ་ཀ་རོ་ཡིས་བྱིན་གྱིས་རླབས། །དྲག་པོ་བྱེད་ན་དམར་གཏོར་བཤམས། །དེ་ལ་དགྲ་བགེགས་བཀུག་བྱས་ནས། །ངོ་བོ་དགྲ་བགེགས་ཤ་ཁྲག་ལ། །རྣམ་པ་བདུད་རྩིར་བསམས་ལ་འབུལ། །ཧཱུྃ། སྔོན་ཚེ་སློབ་དཔོན་པདྨ་འབྱུང་གནས་ཀྱིས། །མ་
དྲོས་གཟི་ཆེན་དམ་ལ་བཏགས་པའི་ཚེ། །དགེ་བསྙེན་བར་བློན་ཆེན་པོ་ཁྱོད་ཉིད་ཀྱིས། །སངས་རྒྱས་བསྟན་པ་བསྲུང་བར་མ་ཆད་དམ། །གུ་རུས་རྗེས་འཇུག་སྐྱོང་བར་མ་ཆད་དམ། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་ཕྲིན་ལས་བསྒྲུབ་པར་མ་ཆད་དམ། །སྔོན་ཚེ་ཞལ་བཞེས་དམ་ལས་མ་འདའ་བར། །དམ་རྫ་ས་བཀའ་ཡི་གཏོར་མ་འདི་བཞེས་ལ། །བདག་གིས་བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། །དེ་འོག་བར་གྱི་བསྐལ་པའི་དབུས་མ་ལ། །སློབ་དཔོན་ཆེན་པོ་པདྨ་འབྱུང་གནས་ཀྱིས་། །སྐུ་ཡི་སྤྲུལ་པ་བྱེ་བ་ཕྲག་བརྒྱ་ཡིས། །བོད་ཁམས་ས་གཞི་ཞབས་ཀྱིས་བཅགས་པའི་ཚེ། །ལྕི་ཆུ་རྒྱལ་བའི་ཡངས་རྫོང་དབེན་གནས་སུ། །།དགེ་བསྙེན་ཁྱོད་ལ་དབང་བསྐུར་དམ་ཚིག་ཕོག །སྤྱི་བོར་དབང་རྟགས་རྡོ་རྗེ་བཞག་ནས་ཀྱང་། །དམ་ཚིག་བདུད་རྩི་ལྕེ་ལ་བཞག་ནས་ནི། །གནས་དང་གཏེར་གྱི་སྲུང་མར་བཀའ་བསྒོས་ཚེ། །སངས་རྒྱས་བསྟན་པ་བསྲུང་བར་མ་ཆད་དམ། །གུ་རུའི་རྗེས་འཇུག་སྐྱོང་བར་མ་ཆད་དམ། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་ཕྲིན་ལས་བསྒྲུབ་པར་མ་ཆད་
དམ། །སྔོན་ཚེ་ཞལ་བཞེས་དམ་ལས་མ་འདའ་བར། །དམ་རྫས་བཀའ་ཡི་གཏོར་མ་འདི་བཞེས་ལ། །བདག་གིས་བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། དེ་འོག་བསྐལ་པ་ཕྱི་མའི་དུས་ཀྱི་ཚེ། །སློབ་དཔོན་ཆེན་པོ་པདྨ་འབྱུང་གནས་ཉིད། །ལྷོ་ནུབ་སྲིན་པོ་འདུལ་དུ་བྱོན་དགོངས་དུས། །ཆུ་བོ་ལོ་ཧི་ཏ་ཡི་ཀླུང་འགྲམ་དུ། །ཁྱེད་ཅག་ཀླུ་རིགས་ཐམས་ཅད་དེར་འཚོགས་ནས། །མ་འོངས་སློབ་དཔོན་པདྨའི་བརྒྱུད་འཛིན་ལ། །གནོད་པའི་དགྲ་བོ་བསྒྲལ་བའི་དམ་བཅའ་ཕུལ། །གུ་རུའི་གཏེར་རིགས་བརྒྱ་དང་རྩ་བརྒྱད་མཛད། །སངས་རྒྱས་བསྟན་པ་བསྲུང་བར་མ་ཆད་དམ། །གུ་རུའི་རྗེས་འཇུག་སྐྱོང་བར་མ་ཆད་དམ། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་ཕྲིན་ལས་བསྒྲུབ་པར་མ་ཆད་དམ། །སྔོན་ཚེ་ཞལ་བཞེས་དམ་ལས་མ་འདའ་བར། །དམ་རྫས་བཀའ་ཡི་གཏོར་མ་འདི་བཞེས་ལ། །བདག་གིས་བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། དེ་འོག་བསྐལ་པ་ཕྱི་མའི་དུས་ཀྱི་ཚེ། །སེམས་དཔའ་ཆེན་པོ་རང་བྱུང་རྡོ་རྗེ་ཡིས། །སོག་གི་ཆུ་ལ་དགེ་ཟམ་བཙུགས་དགོངས་
དུས། །ཁྱེད་ཅིག་བར་བློན་རྣམས་ཀྱིས་མ་བཟོད་ནས། །ས་གཡོས་རི་འགུལ་འབྲུག་སྒྲ་ཐོག་སེར་ཕབ། །དེ་ཚེ་སེམས་དཔའ་ཐུགས་རྗེ་དྲག་པོར་ཁྲོས། །སྲ་མཁྲེགས་བྲག་ལ་་ཕྱག་གིས་ལྕགས་ཐག་བཏབ། །ལྟ་བས་ཟིལ་གྱིས་མནན་ནས་དམ་ལ་བཏགས། །དེ་ཚེ་བསྟན་པ་བསྲུང་བར་ཁས་བླངས་ཤིང་། །ཀླུ་ཟོག་དུང་དཀར་རྭ་ཅོ་ཅན་སོགས་ཕུལ། །སངས་རྒྱས་བསྟན་པ་བསྲུང་བར་མི་ཆད་དམ། །གུ་རུའི་རྗེས་འཇུག་སྐྱོང་བར་མ་ཆད་དམ། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་ཕྲིན་ལས་བསྒྲུབ་པར་མ་ཆད་དམ། །སྔོན་ཚེ་ཞལ་བཞེས་དམ་ལས་མ་འདའ་བར། །དམ་རྫས་བཀའ་ཡི་གཏོར་མ་འདི་བཞེས་ལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། །དེ་འོག་ལྔ་བརྒྱ་དུས་ཀྱི་ཐ་མ་ལ། །མི་འགྱུར་རྡོ་རྗེ་རོལ་པ་རྩལ་ཉིད་ཀྱིས། །གནམ་ཆོས་ཐུགས་ཀྱི་དཀྱིལ་འཁོར་ཞལ་ཕྱེས་ཚེ། །ཁྱེད་ཅག་འཇིག་རྟེན་ལྷ་འདྲེ་ཐམས་ཅད་ཀྱིས། །རང་རང་གཟུགས་བསྟན་སྲོག་གི་སྙིང་པོ་ཕུལ། །གནམ་ཆོས་བསྟན་པ་བསྲུང་བའི་ཆད་ཐོ་བྱས། །གནམ་ཆོས་གཏེར་བློན་ཆོས་ཀྱི་བདག་པོ་ལ། །ཉམས་དང་རྨི་ལམ་
གཟུགས་དང་སྤྲུལ་པ་བསྟན། །གྲྭ་སློབ་བརྒྱུད་པར་བཅས་པ་ཐམས་ཅད་ལ། །གནོད་འཚེ་སྤང་ཞིང་སྡོང་གྲོགས་བྱའོ་ཞེས། །ཁ་ཙམ་མིན་པར་སྙིང་ནས་ཐ་ཚིག་ཕུལ། །ཁྱེད་ཅག་འཇིག་རྟེན་གཙང་མ་རིས་ཀྱི་ལྷ། །ལྷ་ངག་ནམ་ཡང་རྫུན་པ་མི་མངའ་བས། །དམ་རྫས་བཀའ་ཡི་གཏོར་མ་འདི་ལོངས་ལ། །གནོད་འཚེ་འཁུ་ལྡོག་ནམ་ཡང་མ་བྱེད་པར། །བདག་གིས་བཅོལ་བའི་ཕྲིན་ལས་འགྲུབ་པར་མཛོད། །ཅེས་ཞི་བ་ཡིན་ན་གནས་པའི་ཕྱོགས་སུ་ཕུལ། །དྲག་པོ་ཡིན་ན་གནོད་པའི་ཕྱོགས་སུ་ཕུལ། །འདི་རཱ་ག་ཨ་སྱས་འཕྲལ་དུ་སྨྲས། །པདྨ་མཐར་ཕྱིན་ཞེས་བྱས་ཡི་གེ་བྲིས། །མངྒ་ལཾ།། །།
དགེ་བསྙེན་བར་བློན་གསོལ་བསྡུས་ནི། །བྷཾ་ལས་རིན་ཆེན་སྣོད་ཡངས་པར། །གཏོར་མ་དཀར་གསུམ་བདུད་རྩིའི་མཚོ། །ཨོཾ་ཨཱཿཧཱུྃ་གིས་བྱིན་གྱིས་རློབས། །ཟག་མེད་བདེ་བ་བསྐྱེད་པ་འདི། །ཀླུ་ཡི་དགེ་བསྙེན་དམ་ཚིག་ཅན། །འབོ་རང་ཡབ་ཡུམ་བློན་འཁོར་བཅས། །འཁོར་དང་བཅས་པ་ཐམས་ཅད་ལ། །འབུལ་ལོ་བཞེས་ནས་ཚིམ་གྱུར་ཅིག །འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པ་འགྲུབ་པར་མཛོད། །ཨོཾ་ནཱ་ག་ཅི་ཅི་འབེ་འབེ་སྭཱ་ཧཱ། ཨོཾ་ནཱ་ག་ཨུ་པ་སི་ཀཱ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་མམ་བདུན་གྱིས་གཏོར་མ་ཕུལ། རཱག་ཨ་སྱས་མཛད་པའོ།། །། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུ།།