བར་བློན་ཆེན་པོའི་མདུན་བསྐྱེད་གསལ་བ།
བར་བློན་ཆེན་པོའི་མདུན་བསྐྱེད་གསལ་བར་བཞུགས་སོ།། ན་མོ༔ དཀོན་མཆོག་གསུམ་དང་རྩ་བ་གསུམ༔ སྐྱབས་གནས་རྣམས་ལ་སྐྱབས་སུ་མཆི༔ འགྲོ་ཀུན་སངས་རྒྱས་ལ་འགོད་ཕྱིར༔ བྱང་ཆུབ་མཆོག་ཏུ་སེམས་བསྐྱེད་དོ༔ ཀ་དག་ཀློང་ནས་སྤྲུལ་པ་ཡི༔ གནམ་ས་གང་བའི་མཆོད་པའི་སྤྲིན༔ སྨན་གཏོར་རཀྟ་ལྷ་མོར་བཅས༔ ཟད་མེད་གྱུར་ཅིག་པཱུ་ཛ་ཧོ༔ རང་ཉིད་པདྨ་འབྱུང་གནས་དཀར། །རྡོ་རྗེ་གཡས་ལ་བྷན་གཡོན། །ཁ་ཊཾ་གྲུ་མོར་བརྟེན་པར་བསྐྱེད། །སྤྲུལ་སྐུའི་ཆ་ལུགས་ཡོངས་སུ་རྫོགས། །དམ་ཡེ་དབྱེར་མེད་ཐུགས་སྲོག་ཧཱུྃ༔ དེ་མཐར་སྔགས་ཕྲེང་གཡས་སུ་འཁོར། །འོད་ཟེར་འཕྲོས་པས་རྔ་ཡབ་ནས། །རང་འདྲ་དཔག་མེད་སྤྱན་དྲངས་ཐིམ། །བྱིན་རླབས་གཟི་བརྗིད་འོད་དུ་འབར། །དེ་ཡི་ངང་ལས་སྔགས་འདི་བཟླ། །ཨོྃ་ཨཱ༔ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཞེས་བརྒྱ་རྩ་བཟླ། ཨོཾ་བཛྲ་ཨརྒྱུ་སོགས། ཤབྡ་ཨ་མྲྀ་ཏ་བ་ལི་རཀྟ་ལ་ཁཱ་ཧི། ཧཱུྃ། སྐྱེ་རྒ་ན་འཆི་སྐྱོན་གྱིས་མ་གོས་པའི། །ཕ་མེད་མ་མེད་པདྨའི་སྦུབ་ལས་འཁྲུངས། །རིགས་མེད་རུས་མེད་རྫོགས་སངས་རྒྱས་པའི་སྐུ། །པད་འབྱུང་བྷནྡྲ་འཛིན་ལ་ཕྱག་འཚལ་བསྟོད། །
ཨོཾ་ཨ་མྲྀ་ཏེ་ཧཱུྃ་ཕཊ། ཨོཾ་སྭ་བྷ་ཝས་སྦྱངས། རང་ཉིད་ཡི་དམ་དུ་གསལ་བའི་མདུན་དུ་རྒྱ་མཚོ་ཆེན་པོ་འཁྱིལ་བའི་དབུས་སུ་ནོར་བུ་རིན་པོ་ཆེའི་གྲམ་ལྟར་བརྡལ་བའི་ཁྲོད་དུ་ཡི་གེ་ཕུཡོངས་སུ་གྱུར་པ་ལས། བར་བློན་ཆེན་པོ་རྡོ་རྗེ་དབང་དྲག་སྐུ་མདོག་དཀར་ལ་དམར་བའི་མདངས་ཆགས་པ་ཞི་འཛུམ་བཞད་པའི་ཉམས་དང་ལྡན་པའི་ཞལ་གཅིག་ཕྱག་གཉིས། གཡས་སྦ་ལྕག་དཀར་པོའི་རྩེ་མོར་ནོར་བུ་རིན་ཆེན་འབར་བ་དར་གྱི་ཅོད་པན་འཕུལ་བ་ནམ་མཁར་ཕྱར་བ། གཡོན་པས་གཟི་མཆོང་གསེར་ལས་གྲུབ་པའི་བུམ་པའི་ནང་དུ་ཚེ་བཅུད་འབྱུང་བའི་དྭངས་མ་དགོས་འདོད་ལོངས་སྤྱོད་ཀྱི་ཟས་སྐོམ་ཕུན་སུམ་ཚོགས་པ་དང་། ཅང་ཤེས་དཀར་པོའི་སྲབ་སྐྱོགས་ཁ་ལོ་བསྒྱུར་བ་རྣམ་པ་འདོད་པའི་ལོངས་སྤྱོད་ཆར་ལྟར་འབེབས་པ། སྐུ་ལ་དར་དཀར་གྱི་ན་བཟའ་གསོལ་བ་ལ་མེ་ཏོག་པདྨའི་ཕྲེང་བ་བཀོད་པ་གོང་བ་ལ་སྟག་ལག་བཀྲ་བ། སྐ་རགས་ལ་རིན་པོ་ཆེ་བཻཌཱུརྱ་སྔོན་པོའི་སྟེང་དུ་གསེར་གྱི་གའུ་ལ་མུ་ཏིག་གི་ཟར་བུས་བརྒྱན་པ། ཞབས་ལ་སྲག་ལྷམ་སྔོན་པོ་གསོལ་བ་ལ། གསེར་གྱི་སྐུད་པས་མཛེས་ཤིང་ནོར་བུ་རིན་པོ་ཆེས་སྤྲས་པ། དབུ་ལ་དཔའ་བོ་རྟགས་ཅན་གྱི་
དབུ་ཞྭ་ལ་དར་ཐོད་དམར་པོས་སྤྲས་ཤིང་གཡི་དཀར་པགས་པས་ཁ་འདྲིལ་བྱས་པ་གསོལ་ཞིང་སྣང་སྲིད་ཁ་ལོར་བསྒྱུར་བ། ཆིབས་སུ་འཕྲུལ་ལྡན་གྱི་ཅང་ཤེས་དཀར་པོ་རྔོག་དང་རྔ་མ་གཡུ་ལས་གྲུབ་པ། སྒ་སྲབ་རིན་པོ་ཆེ་གསེར་ལས་གྲུབ་པ་མཛེས་ཤིང་ལྟ་ན་སྡུག་པའི་ཆ་བྱ་ཅན་རྒྱན་སྣ་ཚོགས་ཀྱིས་སྤྲས་པ་བར་སྣང་སུ་འགྲོས་མགྱོགས་སྲིད་པའི་རླུང་བཞིན་དུ་ཡུད་ཡུད་བརྒྱུགས་ནས་སྒྲུབ་པ་པོ་ལ་གང་བཅོལ་དངོས་གྲུབ་ཀྱི་ལས་ཐམས་ཅད་སྐད་ཅིག་ཏུ་སྒྲུབ་པར་བྱེད་པ། སྟག་རལ་གཡས་ལ་གཟིག་ཤུབས་གཡོན་དུ་ཐོགས་ནས་ཉེས་བྱེད་ཀྱི་དགྲ་བོ་རྡུལ་དུ་རླག་པར་བྱེད་པ། མཆན་ཁུང་ཕྲག་པ་ལ་དར་དཀར་གྱི་རུ་མཚོན་དང་རྒྱལ་མཚན་ཕྱར་བས་སངས་རྒྱས་ཀྱི་བསྟན་པ་དང་སྔགས་འཆང་སྒྲུབ་པ་པོ་ལ་སྲིད་ཞིའི་བདེ་ལེགས་ཡོན་ཏན་ཐམས་ཅད་འཕེལ་བར་བྱེད་པ་ཞིག་ཏུ་གྱུར། དེའི་གཡས་སུ་གཡག་ཁམས་པ་རྭ་ཅོ་གཡུ་ལས་འཚེར་བ་བརྒྱ། གཡོན་དུ་སྦལ་པ་སྦྲུལ་དང་རྟ་སྔོན། རི་བོང་ནག་པོ་བརྒྱ། རྒྱབ་ཏུ་བརྗེ་སེར་པོ་བུད་མེད་ཉ་དང་ལྕོང་མོ་སྔོན་མོ་བརྒྱ། མདུན་དུ་མོ་བཙུན་སྔོན་མོ་རིན་པོ་ཆེའི་རྒྱན་དང་། རྒྱ་མཚོ་ཆེན་པོ་གཡས་སུ་འཁྱིལ་བ་ལ་རིན་པོ་
ཆེའི་ཕྲ་བཏབ་པས་བསྐོར་བ་བརྒྱ། དེ་ཐམས་ཅད་ལྷ་མིའི་ཁྲོམ་འཚོགས་པ་ལྟར་གསལ་བའི་གནས་གསུམ་ཡི་གེ་གསུམ་ཡིག་རེ་རེ་ལས་འོད་ཟེར་འཕྲོས་པས་གནས་ཆེན་དེ་ཝི་ཀོ་། ཊ། རོལ་པའི་མཚོ་བདུན་དང་། མཁར་ཆུ་དཔལ་གྱི་ཕུག་རིང་། མ་དྲོའི་རྒྱ་མཚོ་ཆེན་པོ། ཆུ་བོ་ཆེན་པོ་ལོ་ཧི་ཏའི་འགྲམ། སོག་ཆུ་སྔོན་མོ། ལྕི་ཆུ་རྒྱལ་བའི་ཡངས་རྫོང་གང་ན་བཞུགས་ཀྱང་སྐད་ཅིག་གིས་གནས་འདིར་སྤྱན་དྲངས། བཛྲ་ས་མཱ་ཛ་ཛ༔ ཞེས་བརྗོད་ལ། ཧཱུྃ། རྡོ་རྗེ་གདན་གྱི་བྱང་ཕྱོགས་ནས། །གཞུང་ལྟར་མཆོད་བསྟོད་བྱའོ། །ས་བརྒྱད་ལ་གནས་སེམས་དཔའ་དཀར་པོ་ལ། །གསོལ་མཆོད་བྱས་པས་ཕན་གྲོགས་སྡོང་གྲོགས་བྱས། །ནད་དང་གནོད་པ་དུས་མིན་འཆི་བ་ཀུན། །ཉམ་ངའི་འཚེ་བ་མ་ལུས་ཀུན་བྱང་ཞིང་། །ལོངས་སྤྱོད་དཔལ་ལྡན་ཟས་བཅུད་ཕུན་སུམ་ཚོགས། །ཁ་ཞེ་མེད་པར་རིག་འཛིན་ཐ་ཚིག་ཕུལ། །ཁོ་བོས་སྒྲུབ་པར་འགྱུར་བ་ཐེ་ཚོམ་མེད། །སྐུ་མདོག་ཕྱག་མཚན་གསལ་བའི་ཚད་ཐོ་འདིའི། །ཉམས་དང་རྨི་ལམ་ཞལ་གཟིགས་ལུང་བསྟན་བྱུང་། །ཡུལ་ཕྱོགས་ལྕི་རྒྱུད་འགྲོ་ལ་ཕན་པར་བསམ། །གཏེར་བློན་རཱ་ག་ཨ་སྱ་བདག་གིས་སྦྱར། །དགེ་བས་འགྲོ་རྣམས་བདེ་སྐྱིད་དཔལ་ལ་སྤྱོད། །ཉེས་འགལ་གང་མཆིས་སྲུང་མ་རྣམས་ལ་བཤགས། །དགེའོ། སརྦ་མངྒ་ལཾ།།