ཀླུའི་དགེ་བསྙེན་ཆེན་པོ་རྡོ་རྗེ་བདུད་འཇོམས་ཀྱི་མཆོད་ཆོག་ཡིད་བཞིན་ནོར་བུའི་འབྱུང་གནས་ཕན་བདེའི་རླབས་ཕྲེང་རབ་ཏུ་གཡོ་བ།
ཀླུའི་དགེ་བསྙེན་ཆེན་པོ་རྡོ་རྗེ་བདུད་འཇོམས་ཀྱི་མཆོད་ཆོག་ཡིད་བཞིན་ནོར་བུའི་འབྱུང་གནས་ཕན་བདེའི་རླབས་ཕྲེང་རབ་ཏུ་གཡོ་བ་ཞེས་བྱ་བ་བཞུགས་སོ།།
ན་མོ་པདྨ་ཀ་ར་ཡེ། རྒྱལ་བ་པདྨ་འབྱུང་གནས་དང་། །རྒྱལ་སྲས་རང་བྱུང་རྡོ་རྗེ་ལ། །གུས་པའི་ཡིད་ཀྱིས་ཕྱག་འཚལ་ལོ། །དེ་ཡི་བཀའ་ཉན་དམ་ཚིག་ཅན། །དགེ་བསྙེན་ཆེན་པོའི་མཆོད་ཐབས་བྲི། །ཤ་ཁྲག་མ་གི་ཏ་སོགས་ཀྱིས། །དྲི་མ་མེད་པའི་སྣོད་གཙང་དུ། །དཀར་གཏོར་རྩེ་རྒྱལ་སྤྲུལ་གཅུད་པ། །རྩེ་ལ་ནོར་བུ་ཉི་ཟླས་བརྒྱན། །ཐ་མར་ཉ་ལྕོང་སྦལ་སྦྲུལ་བསྐོར། །ཀླུ་སྨན་དཀར་གསུམ་ཕུད་ཀྱིས་བྲན། །རང་ཉིད་པདྨའི་ང་རྒྱལ་གྱིས། །ཨོཾ་ཨ་མྲྀ་ཏེ་ཧཱུྃ་ཕཊ། ཨོཾ་སྭ་བྷཱ་ཝ་ཤུདྡྷསརྦ་དྷརྨཱསྭ་བྷ་ཝ་ཤུདྡྷོཉཧཾ། སྟོང་པ་ཉིད་དུ་གྱུར། སྟོང་པའི་ངང་ལས་མདུན་དུ་བླ་མཚོ་མེར་བ་ཐ་མ་རིན་པོ་ཆེའི་བྲག་རི་དང་ལྗོན་
ཤིང་མཛེས་པའི་ཕྲེང་བས་བསྐོར་བ། སྟེང་ན་སྤྲིན་ནག་འཇིགས་པའི་བླ་བྲེ་ལ་འབྲུག་སྒྲ་སྒྲོག་ཅིང་གློག་དམར་འཁྱུག་པ། ན་བུན་སྔོན་པོ་དང་འཇའ་ཚོན་སྣ་ལྔའི་ཡོལ་བ་བྲེས་ཤིང་ཆར་གྱི་རྒྱུན་འབེབས་པ། དེའི་དབུས་སུ་རིན་པོ་ཆེའི་སྐུ་མཁར་ཡངས་ཤིང་རྒྱ་ཆེ་བ་རིན་པོ་ཆེའི་དྲྭ་བ་དང་གཡེལ་ཁ་དང་། དར་སྣ་ཚོགས་ཀྱིས་བ་དན་དང་རྒྱལ་མཚན་དང་འཕན་ཕྱར་བ། འོག་གི་སྒོ་ཆེན་གནམ་ལྕགས་ཀྱི་ཕོག་བུ་དང་སྒོ་ལུང་གིས་བརྒྱན་པ། སྟེང་གི་སྒོ་སུམ་རལ་ལས་ལྷའི་དར་ཆེན་གྱིས་ཤམ་བུ་བརྐྱང་བ། རིན་པོ་ཆེའི་སྒྲོམ་བུ་དཔག་ཏུ་མེད་པ་དང་ལོངས་སྤྱོད་ཀྱི་
ཁྱད་པར་དུ་ཉེ་བར་ཕྱུག་པ། དེའི་དབུས་སུ་རིན་པོ་ཆེའི་ཁྲི་དར་ཟབ་སྣ་ཚོགས་ཀྱིས་བཀླུབས་པའི་སྟེང་དུ། པདྨ་དཀར་པོ་དང་ཟླ་བའི་གདན་ལ་ཕུཡིག་དཀར་སེར་ཡོངས་སུ་གྱུར་པ་ལས། ཀླུའི་དགེ་བསྙེན་ཆེན་པོ་སྐུ་མདོག་དཀར་ལ་ཅུང་ཟད་དམར་བའི་མདངས་ཆགས་པ། ཞལ་གཅིག་ཕྱག་གཉིས་རབ་ཏུ་དགྱེས་ཤིང་འཛུམ་པ། ཕྱག་གཡས་སྦ་ལྕག་དང་གཡོན་ནོར་བུ་བསྣམས་པ། དབུ་ལ་རིན་པོ་ཆེའི་པྲོག་ཞུ་དར་ཐོད་ཀྱིས་བརྒྱན་པ་དང་སྐུ་ལ་མེ་ཏྲི་དམར་པོའི་ན་བཟའ་ཟ་འོག་གི་གོང་ལག་ཅན་གསོལ་བ། རྫུ་འཕྲུལ་གྱི་ཤུགས་དང་ལྡན་པའི་ཆུ་རྟ་སྔོན་པོ་རི་ལོག་ཙམ་ལ་ཆིབས་པ། དེའི་འཁོར་དུ་བློན་པོ་དང་ནང་མི་དམག་སྡེའི་ཚོགས་དང་། མཚོ་སྨན་ཀླུ་མོ་མཛེས་སྡུག་གི་ཚོགས་དང་ཕོ་ཉ་ལས་མཁན་སྤྲུལ་པའི་ཆུ་གནས་སྣ་ཚོགས་ཀྱིས་ཡོངས་སུ་བསྐོར་བ། གཙོ་བོའི་གནས་གསུམ་ཡིག་འབྲུ་གསུམ་དང་ཐུགས་ཀའི་ས་བོན་ལས་འོད་ཟེར་འཕྲོས་པས། བསྒོམ་པ་དང་འདྲ་བའི་དགེ་བསྙེན་འཁོར་དང་བཅས་པ་སྤྱན་དྲངས། ཧཱུྃ། མཐིང་མདོག་རྔམ་པའི་ཆུ་གཏེར་ལས། །མཛེས་པའི་རླབས་འཕྲེང་ཀྱི་ལི་ལི། །རྡོ་རྗེ་བྲག་རིའི་ཕོ་བྲང་གདལ། །སྣ་ཚོགས་ལྗོན་
ཤིང་ཐིབས་སེ་ཐིབ། །རིན་ཆེན་ས་འཛིན་ལྷུན་ཆགས་པ། །དགེ་བསྙེན་ཞལ་གྱི་དཀྱིལ་འཁོར་བཀྲ། །རིན་ཆེན་མཆོང་བྲག་དམར་པོ་ལ། །ཆུ་སྲིན་རྒྱལ་པོའི་གཟུགས་སུ་སྣང་། །སྐྱེ་འགྲོ་མི་ཡི་འགྲིམ་ལམ་ལ། །ལྟོ་འགྲོ་སྦྲུལ་གྱི་གཟུགས་སུ་སྣང་། །སྟེང་ན་ཆུ་འཛིན་མཐིང་ནག་ལ། །གློག་དམར་འཁྱུག་ཅིང་འབྲུག་སྒྲ་སྒྲོག །ན་བུན་སྔོན་པོའི་ཡོལ་བ་ལ། །འཇའ་ཚོན་སྣ་ལྔའི་ཤམ་བུ་ཅན། །དེ་དབུས་ཡིད་ལས་སྤྲུལ་པ་ཡི། །རིན་ཆེན་ལས་གྲུབ་སྐུ་མཁར་ནས། །ལོངས་སྤྱོད་རྣམ་པ་སྣ་ཚོགས་ལྡན། །འཇའ་ཚོན་གདུགས་ཕུབ་ཀྱི་ལི་ལི། །ཤེལ་གྱི་ཁུ་འཕང་ཤ་ར་ར། །གཡུ་ཡི་ན་བུན་ཐུ་ལུ་ལུ། །ཉ་སྲམ་མང་པོ་ཕྱ་ལ་ལ། །ཆུ་གླང་རྭ་རྩེ་ཁྲ་ལ་ལ། །སྦལ་སྦྲུལ་མང་པོ་ཉི་ལི་ལི། །དེ་འདྲའི་གནས་ཀྱི་ཕོ་བྲང་ནས། །དགེ་བསྙེན་ཆེན་པོ་དབྱི་དོ་ཁྱོད། །ཐུགས་ལ་ཞེ་སྡང་མ་འཆང་ལ། །ལུས་ལ་མཚོན་ཆ་མ་བཏགས་ལ། །ཞི་ཞིང་བྱམས་པའི་སེམས་ཀྱིས་ནི། །མཆོད་པའི་གནས་འདིར་གཤེགས་སུ་གསོལ། །ཁྱོད་ཀྱི་རྫུ་འཕྲུལ་སྟོབས་ཀྱིས་ནི། །བཞུགས་གནས་གཅིག་ཏུ་མ་ངེས་ཏེ། །ཆུ་བོ་ཀུན་དང་ཆུ་
ཡི་མདོ། །མཚོ་དང་རྫིང་བུ་ནེའུ་སེང་དང་། །ལྗོན་ཤིང་བྲག་རི་སྐྱེད་མོས་ཚལ། །ཆུ་མིག་ཁྲོན་པ་ལུ་མ་སོགས། །བཞུགས་ནས་གང་དུ་བཞུགས་གྱུར་ཀྱང་། །མཆོད་པ་འབུལ་ཞིང་བཞེས་སླད་དུ། །དགྱེས་ཤིང་ཕན་པའི་སེམས་ཀྱིས་ནི། །མཆོད་པའི་གནས་འདིར་གཤེགས་སུ་གསོལ། །ཀླུ་ཡི་དགེ་བསྙེན་ཆེན་པོ་ཡི། །འཁོར་ན་གནས་པའི་རྫུ་འཕྲུལ་ཅན། །བཙུན་མོ་བློན་པོ་དཔུང་དང་བཅས། །ཀླུ་དང་ས་བདག་སྨན་གྱི་ཚོགས། །དཀོན་མཆོག་གསུམ་གྱི་བཀའ་ཉན་ཞིང་། །དཀར་པོའི་ཕྱོགས་ལ་དགའ་བ་རྣམས། །མཆོད་པ་འབུལ་ཞིང་བཞེས་སླད་དུ། །དགའ་ཞིང་གུས་པའི་སེམས་ཀྱིས་ནི། །མཆོད་པའི་གནས་འདིར་གཤེགས་སུ་གསོལ། །ཨོཾ་ནཱ་ག་རུ་ཊ་མ་ཧཱ་ཨུ་པ་སི་ཀ་ས་པཱ་རི་ཝཱ་ར་བཛྲ་ས་མ་ཡ་ཛ༔ ཧཱུྃ། ཆེན་པོ་དག་ལ་མངོན་པར་འོས་པ་ཡི། །རིན་ཆེན་ཁྲི་མཆོག་རབ་མཛེས་དར་གྱིས་བཀླུབས། །འདམ་སྐྱེས་ནམ་མཁའི་ཐིག་ལེ་གདལ་བའི་སྟེང་། །ཕན་བདེའི་འབྱུང་གནས་སྐྱོང་བའི་ཡི་དམ་ཅན། །དགེ་བསྙེན་ཆེན་པོ་དགྱེས་ཤིང་བཞུགས་སུ་གསོལ། །རང་རང་འོས་ཤིང་འཚམས་པའི་གདན་སྟེང་དུ། །བཙུན་མོ་བློན་པོ་
འཁོར་གཡོག་བཅས་པ་རྣམས། །རབ་ཏུ་དགའ་ཞིང་གུས་པའི་སེམས་ཀྱིས་ནི། །ཕན་པའི་སེམས་ཀྱིས་བརྟན་པར་བཞུགས་སུ་གསོལ། །ཨོཾ་ནཱ་ག་རུ་ཊ་མ་ཧཱ་ཨུ་པ་སི་ཀ་ས་པཱ་རི་ཝཱ་ར་ཛཿཧཱུྃ་བཾ་ཧོ༔ ས་མ་ཡ་ཏིཥྛ་ལྷན། ཧཱུྃ། སྔོན་ཚེ་སློབ་དཔོན་པདྨ་འབྱུང་གནས་ཀྱིས། །བསིལ་བ་ཚལ་དུ་ཀླུ་སྲིན་ཐམས་ཅད་བཏུལ། །མལ་དྲོའི་ནང་དུ་ཀླུ་རིགས་ཐམས་ཅད་བཏུལ། །དེ་རྗེས་གྲངས་མེད་སྤྲུལ་པའི་རྫུ་འཕྲུལ་གྱིས། །བོད་ཡུལ་ཀླུ་དང་ས་བདག་ཐམས་ཅད་བཏུལ། །དེ་རྗེས་ལོ་ཧི་ཏ་ཡི་ཀླུང་འགྲམ་དུ། །བོད་ཡུལ་ས་བདག་ཀླུ་གཉན་ཐམས་ཅད་ཀྱིས། །བསྟན་པ་སྲུང་བར་ཁས་བླངས་སྲོག་སྙིང་ཕུལ། །དེ་རྗེས་སེམས་དཔའ་རང་བྱུང་རྡོ་རྗེ་ཡིས། །བསྟན་སྲུང་དགེ་བསྙེན་ཆེན་པོ་རྩིས་ལ་ཕབ། །སྔོན་གྱི་དམ་ཚིག་རྗེས་སུ་དྲན་མཛོད་ལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ལས་ལས་གྲུབ་པའི་དགེ་བསྙེན་ཆེན་པོའི་འཁོར། །རིག་འཛིན་རྒྱལ་བའི་ཞལ་ཡང་མ་མཐོང་ཞིང་། །རྫུ་འཕྲུལ་སྟོབས་ཀྱིས་ཆོ་འཕྲུལ་ཅིར་ཡང་སྟོན། །ཆུ་བོ་ཆུ་མདོ་ཀུན་ཏུ་རྒྱུ་བ་རྣམས། །དཀོན་མཆོག་གསུམ་གྱི་བདེན་པའི་བཀའ་ལ་
ཉོན། །རང་གི་ལུས་ལ་གནོད་པའི་དཔེ་ལོངས་ལ། །སེམས་ཅན་གཞན་ལ་གནོད་པར་མ་བྱེད་ཅིག །ཨོཾ་ནཱ་ག་རུ་ཊ་མ་ཧཱ་ཨུ་པ་སི་ཀ་ས་པཱ་རི་ཝཱ་ར་ས་མ་ཡ་མ་ནུ་སྨ་ར་ཡ་ས་མ་ཡ་མ་ཏི་ཀྲ་མ་ཏི། ས་མ་ཡ་རཀྵནྟུ། གང་དག་དཀོན་མཆོག་གསུམ་ལ་མི་མངོན་ཞིང་། །ཕན་གནོད་རྒྱུ་འབྲས་མི་ཤེས་ནག་པོའི་རིགས། །མཆོད་པ་དག་ལ་དགའ་བའི་སེམས་མེད་པ། །ཇི་ལྟར་བྱས་ཀྱང་གནོད་འཚེའི་རང་བཞིན་ཅན། །ཀླུ་ཐིལ་ཀླུ་སྲིན་འབྱུང་པོའི་རིགས་རྣམས་ཀྱང་། །འདི་རུ་མ་གནོད་གཞན་དུ་མྱུར་དུ་དེངས། །ཨོཾ་ནཱ་ག་ར་ཛཱ་ཏྲི་ཕྲལ་ཤག །ནོར་སན་ཚ་ཚ་ཐ། བཅོམ་ལྡན་མི་བསྐྱོད་རྒྱལ་པོའི་ཐུགས་རྗེའི་ཆུས། །ཀླུ་ཡི་སྒྲིབ་གཉིས་བག་ཆགས་ཀུན་བྱང་ནས། །གཏི་མུག་ཕྲག་དོག་ལ་སོགས་དུག་རྣམས་ཞི། །མྱུར་དུ་བྱང་ཆུབ་མངོན་དུ་བྱེད་གྱུར་ཅིག །ན་མོ་རཏྣ་ཏྲ་ཡཱ་ཡ། ཨོཾ་ཀཾ་ཀ་ནི་སོགས་བཟླ། ཆོས་རྣམས་ཐམས་ཅད་རྒྱུ་ལས་བྱུང་། །ཞེས་པ་ནས། འདི་ནི་སངས་རྒྱས་བསྟན་པ་ཡིན། །ཛཱ་ཏི་ལ་སོགས་ཀླུ་སྨན་སྣ་ཚོགས་པ། །ཏིང་འཛིན་སྔགས་ཀྱིས་བྱིན་རླབས་ཕུལ་བ་ཡིས། །ཀླུ་ཡི་ནད་རྣམས་མ་ལུས་ཞི་གྱུར་ཅིག །ཉམས་ཞིང་རྒུད་པ་ཐམས་ཅད་
སོར་ཆུད་དེ། །དཔལ་དང་གཟི་བརྗིད་མཐུ་སྟོབས་རབ་རྒྱས་ནས། །བདེ་སྐྱིད་དགེ་ལེགས་དཔལ་ལ་ལོངས་སྤྱོད་ཤོག །ཨོཾ་ནཱ་ག་ར་ཙ་བུདྡྷ་བྷ་ག་ཝན། ན་མོ་རཏྣ་ཏྲ་ཡཱ་ཡ། ཧ་ཧ་ཧུ་ཧུ། ཨ་མྲྀ་ཏ་བི་ཤུདྡྷེ་སྭཱ་ཧཱ། ཧཱུྃ་ལས་རིན་ཆེན་སྣོད་དུ་ཨོ་ཡིག་ལས། །སྣ་ཚོགས་མཆོད་སྤྲིན་ཀླུ་དབང་མགུ་བྱེད་པ། །རྒྱ་ཆེན་ཟད་མི་ཤེས་པ་ནམ་མཁའི་མཛོད། །ཟག་མེད་བདེ་བ་བསྐྱེད་པ་ཉིད་དུ་གྱུར། །ཨོཾ་བཛྲ་སྤ་ར་ཎ་ཁཾ། ཨོ། དཀར་གསུམ་མཆོད་ཡོན་ཀླུ་ཤིང་མེ་ཏོག་རྒྱས། །བཟང་ཤིང་དུད་སྤྲིན་རིན་ཆེན་སྣ་ཚོགས་པ། །རྒྱ་ཇའི་དྲི་བསུང་མངར་གསུམ་རོ་བརྒྱ་པ། །ཡིད་འོང་སྒྲ་དང་འདོད་ཡོན་རྣམ་པ་ལྔ། །བཀྲ་ཤིས་རྫས་རྟགས་བརྒྱད་དང་རིན་ཆེན་བདུན། །སྣ་ཚོགས་ཆུ་གནས་གཟུགས་དང་ཤེལ་ཚིགས་སོགས། །དངོས་འབྱོར་ཡིད་སྤྲུལ་མཆོད་སྤྲིན་རྒྱ་མཚོ་འབུལ། །ཨོཾ་ནཱ་ག་རུ་ཊ་མ་ཧཱ་ཨུ་པ་སི་ཀ་ས་པཱ་རི་ཝ་ར་ཨབྷཾ་སོགས། ཨོ། ལས་རིན་ཆེན་སྣོད་དུ་ཁཾ་ཡིག་ལས། །རོ་བརྒྱ་ལྡན་པའི་ཞལ་ཟས་ཤེལ་གྱི་མདོག །ཀླུ་རྣམས་མགུ་ཞིང་རྒྱས་པ་སྐྱེད་བྱེད་གྱུར། །བདེ་གཤེགས་རིན་ཆེན་མང་དང་གཟུགས་མཛེས་དང་། །
འབྱམས་ཀླས་འཇིགས་ཀུན་བྲལ་ཕྱག་འཚལ་ལོ། །ཨོཾ་ཨ་ཀཱ་རོ་སོགས་ལན་གསུམ། ཨོཾ་ནཱ་ག་རུ་ཊ་མ་ཧཱ་ཨུ་པ་སི་ཀ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཀླུ་བདུད་དགེ་བསྙེན་དབྱི་དོ་འཁོར་བཅས་ཀྱིས། །མཆོད་སྦྱིན་གཏོར་མ་འབུལ་བ་འདི་བཞེས་ལ། །ཡུལ་ཕྱོགས་འདི་རུ་ལོ་ལེགས་འཁྲུག་པ་ཞི། །བདེ་སྐྱིད་ཡུལ་ལྷ་ལྟར་བུ་འབྱོར་བར་མཛོད། །ཁྱད་པར་བདག་ཅག་དཔོན་སློབ་འཁོར་བཅས་ལ། །ཀླུ་ནད་གཉན་ནད་ཆུ་ཡི་གནོད་པ་དང་། །དགྲ་གྱོད་རྒྱལ་པོའི་འཇིགས་པ་ཞི་བར་མཛོད། །ཚེ་དང་བསོད་ནམས་དཔལ་འབྱོར་མངའ་ཐང་རྒྱས། །ཆོས་སྲིད་སྙན་གྲགས་དར་ཞིང་རྒྱས་པར་མཛོད། །རྒྱལ་བློན་འབངས་འཁོར་ཡུལ་ཁམས་ཐམས་ཅད་དང་། །འབྲུ་ནོར་ཇ་དར་དབང་དུ་འདུ་བར་མཛོད། །བདག་ལ་གནོད་ཅིང་འཚེ་བའི་དགྲ་དང་བགེགས། །གང་ན་འདུག་ཀྱང་རྡུལ་དུ་བརླག་པར་མཛོད། །ཧཱུྃ། དགེ་བསྙེན་ཆེན་པོ་མཐུ་བོ་ཆེ། །ཞལ་བཟང་ཟླ་བ་རྒྱས་པ་འདྲ། །སྤྱན་མིག་སྐར་ཆེན་ཤར་བ་འདྲ། །དབུ་ལ་རིན་ཆེན་སྲོག་ཞུ་གསོལ། །སྐུ་ལ་ན་བཟའ་མི་ཏྲི་ལ། །ཟ་འོག་དམར་པོས་གོང་ལག་བྱས། །ཕྱག་གཡས་སྦ་ལྕག་
དཀར་པོ་ལ། །དར་ཚོན་སྣ་ལྔའི་འཕན་ཕྲན་དང་། །རིན་ཆེན་སྣ་ལྔའི་ལྕག་འབྲས་བཏགས། །ཕྱག་གཡོན་ཡིད་བཞིན་ནོར་བུ་བསྣམས། །དགོས་འདོད་སྣ་ཚོགས་ཆར་ལྟར་འབེབས། །ཤིན་ཏུ་རྔམ་པའི་གཟི་བརྗིད་འབར། །འོད་ཟེར་ཉི་མ་ཤར་བ་འདྲ། །ལས་ལས་གྲུབ་པའི་ཆུ་རྟ་ནི། །སྔོན་པོ་རི་ལོག་ཙམ་ལ་ཆིབས། །རྔ་རྔོག་གསེབས་ནས་སྦལ་སྦྲུལ་འཕྲོ། །གོང་སྨད་གློ་ནན་སྦྲུལ་ལས་བྱས། །གསེར་སྲབ་གཡུ་མཐུར་སྟག་ས་ཅན། །སྐད་ཅིག་ཉིད་ལ་སྟོང་གསུམ་བསྐོར། །ཀླུ་ཡི་དགེ་བསྙེན་དམ་ཚིག་ཅན། །རྡོ་རྗེ་བདུད་འཇོམས་ཞེས་སུ་གྲགས། །དགེ་བསྙེན་དབྱི་དོ་ཁྱོད་ལ་བསྟོད། །ཧཱུྃ། ཡང་གཅིག་སྤྲུལ་པ་མཛད་ཙམ་ན། །ཚོང་དཔོན་སྐྱེས་བུ་རྫུ་འཕྲུལ་ཅན། །ཞལ་རས་བརྗིད་ཅིང་འཛུམ་པའི་ཞལ། །དབུ་ལ་རས་དཀར་ཐོད་ཆེན་བཅིངས། །སྐུ་ལ་ཕྲུག་སྔོན་ན་བཟའ་གསོལ། །གསེར་གཡུ་བྱི་རུའི་སྙན་ཆ་མཛེས། །ཕྱག་ན་ཡིད་། བཞིན་ནོར་བུ་དང་། །ཐམ་ཁ་ལྡེ་མིག་མང་པོ་བསྣམས། །དངོས་གྲུབ་སྣ་ཚོགས་གཏེར་སྒོ་འབྱེད། །འཁོར་དང་ལོངས་སྤྱོད་ཐམས་ཅད་ནི། །གནོད་གནས་དབང་པོ་ཉིད་དང་
མཚུངས། །གནས་པོ་ཆེན་པོ་ཁྱོད་ལ་བསྟོད། །བཙན་ཕྱུག་དར་གསུམ་དངོས་གྲུབ་སྩོལ། །ཧཱུྃ། ཁྱོད་ཀྱི་འཁོར་དང་ཕོ་ཉ་ནི། །མཚོ་སྨན་ཀླུ་མོ་མང་པོ་ནི། །ཀླུ་ལེན་བྲོ་རྡུང་ཁྲིགས་སེ་ཁྲིག །ཀླུ་བདུད་ཀླུ་བཙན་མང་པོའི་ཚོགས། །ཆོ་འཕྲུལ་སྣ་ཚོགས་ཟངས་སེ་ཟང་། །སྤྲུལ་པའི་ཉ་ཆེན་སྦྲུལ་ཆེན་རྣམས། །ཁ་རླངས་ན་བུན་ཐིབས་སེ་ཐིབ། །སྤྲུལ་པའི་ཆུ་གླང་གཡག་རྒོད་རྣམས། །རུ་རྩད་ངར་སྒྲ་དི་རི་རི། །འཁོར་ཚོགས་སྤྲུལ་པ་ཐམས་ཅད་ལ། །བདག་གིས་རབ་ཏུ་བསྟོད་པར་བགྱི། །ཧཱུྃ། དགེ་བསྙེན་ཀླུ་བདུད་འཁོར་བཅས་རྣམས། །རྣལ་འབྱོར་བདག་ལ་ཚུར་གསོན་དང་། །རྣལ་འབྱོར་བདག་ཅག་འཁོར་བཅས་ཀྱི། །ཕ་མྱེས་སྔ་རབས་མན་ཆད་ནས། །ད་ལྟའི་དུས་འདི་ཡན་ཆད་དུ། །ཐུགས་དང་འགལ་བར་གྱུར་པ་ཡི། །ས་གཉན་བརྐོས་དང་རྡོ་གཉན་རློག །ཤིང་གཉན་བཅད་དང་ཐབ་གཞོབ་བྱས། །མནའ་གཉན་བརྐྱལ་ལམ་གཏད་ཁྲམ་བྱས། །གཟིར་ནན་དྲག་ལས་ཐུབ་ཐུབ་བྱས། །ཞིང་མུ་བཅད་དམ་ཁང་ལས་བྱས། །མཆོད་པའི་ཕུད་ཉམས་འབག་བཙོག་བྱས། །དེ་སོགས་ཐུགས་དང་འགལ་བ་རྣམས། །
རབ་ཏུ་འགྱོད་པས་མཐོལ་ཞིང་བཤགས། །ཞི་ཞིང་བྱམས་པའི་ཐུགས་ཀྱིས་ནི། །བཟོད་པ་དམ་པ་མཛད་དུ་གསོལ། །ཨོཾ་ས་མ་ཡ། ཨཱས་མ་ཡ། ཧཱུྃ་ས་མ་ཡ། ཨོཾ་ནཱ་ག་རུ་ཊ་མ་ཧཱ་ཨུ་པ་སི་ཀ་ས་པཱ་རི་ཝཱ་ར་ཨོཾ་བཛྲ་སཏྭ་ས་མ་ཡ། ཞེས་སོགས་ཡིག་བརྒྱ་བརྗོད། དེ་ནས་ལས་ལ་བསྐུལ་ན། ཐུན་གཏོར་ལ་དགྲ་བོ་བཀུག་གཞུག་བྱས་ནས་དེའི་ཤ་ཁྲག་ཏུ་དམིགས་ལ་འབུལ་བ་ནི། ཧཱུྃ། སྔོན་ཚེ་སློབ་དཔོན་པདྨ་འབྱུང་གནས་ཉིད། །ལྷོ་ནུབ་སྲིན་པོའི་ཡུལ་དུ་གཤེགས་དགོངས་ཚེ། །ཀླུ་ཡི་རྒྱལ་པོ་འཛིན་ཤེས་གཏོང་མི་ཤེས། །རྒྱལ་རིགས་རྗེ་རིགས་དམངས་རིགས་བྲམ་ཟེའི་རིགས། །གདོལ་པ་ནག་པོ་སློབ་དཔོན་དྲུང་དུ་བྱུང་། །གཞན་ཡང་བོད་ཀྱི་ས་བདག་ཀླུ་གཉན་དང་། །ལྷ་འདྲེ་གཅིག་ཀྱང་མ་ལུས་དེར་འཚོགས་ནས། །མ་འོངས་སློབ་དཔོན་པདྨའི་རྗེས་འཇུག་ལ། །གནོད་པའི་དགྲ་བོ་བསྒྲལ་བར་མ་ཆད་དམ། །ང་ནི་སློབ་དཔོན་པདྨའི་བཀའ་བརྒྱུད་ཡིན། །ཁྱེད་རྣམས་ལྷ་འདྲེ་དེ་ཡི་རིགས་ཡིན་པས། །དམ་རྫས་བརྒྱན་པའི་གཏོར་མ་འདི་བཞེས་ལ། །ཡིད་ལ་མནག་པའི་དགྲ་བོ་ད་སྒྲོལ་ཅིག །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཅེས་
སོ། །ཧཱུྃ། དགེ་བསྙེན་ཀླུ་བདུད་ནག་པོ་ནི། །ཤིན་ཏུ་དྲག་ཏུ་ཁྲོས་པའི་ཚེ། །སྐུ་མདོག་མཐིང་ནག་མུན་པའི་མདོག །ལུས་ནི་གཞུ་འདོམ་བརྒྱ་ཡི་ཚད། །སྦྲུལ་མགོ་དགུ་ཡི་གདེངས་ཀ་ཅན། །ཞལ་གདངས་མཆེ་གཙིགས་ལྡང་མིག་བསྒྲད། །མིག་ནས་ཁྲག་གི་ཆར་པ་འབེབས། །ཁ་ནས་ནད་རླངས་སྔོན་དམར་འཚུབ། །སྙིང་ལ་གདུག་པའི་ན་བུན་གཏིབས། །སྣ་ནས་སེར་སྤྲིན་ཁོལ་ཞིང་འཕྱུར། །བུ་ག་དགུ་ནས་འབྲུག་སྒྲ་སྒྲོག །རྣ་བའི་ཁུང་ནས་ཐོག་རྒོད་འཕྲོ། །བ་སྤུ་ཐོག་ཟེར་ཚྭ་ཚྭ་འཕྲོ། །རྐང་ཞབས་ནད་ཀྱི་རླུང་དམར་ལྡང་། །འོག་སྒོ་སྦལ་སྦྲུལ་ཕོ་ཉ་འཕྲོ། །ཕྱག་གཡས་ནད་ཀྱི་གཡབ་མོ་རྡེབ། །གཡོན་པས་གློག་གི་ཞགས་པ་འཛིན། །སྐུ་སྨད་སྦྲུལ་མཇུག་ན་བུན་ཁོལ། །ཆིབས་སུ་བྲག་ནག་རྟིང་དཀར་ཆིབས། །འབྲུག་སྒྲ་ལྡིར་ཞིང་གློག་དམར་འཁྱུག །གནམ་ལྕགས་ཐོག་སེར་དྲག་ཏུ་འབེབས། །།འཁོར་དུ་ཀླུ་དམག་འབུམ་གྱིས་བསྐོར། །སྦྲུལ་ནག་འཁྱུག་དང་ཤིགས་སེ་ཤིག །གཡག་ནག་ངར་སྒྲ་འུ་རུ་རུ། །བྷྱོ་བྷྱོ་སྡང་བའི་དགྲ་ལ་བྷྱོ། །ཆོས་ཆོས་སྡང་བའི་དགྲ་ལ་ཆོས། །དམིགས་པའི་དགྲ་བོ་རྡུལ་དུ་རློགས། །
གག་ལྷོག་མཛེ་དང་གྲི་འཐབ་ཀྱིས། །དགྲ་བོའི་བདུན་རྒྱུད་རྩོད་ནས་ཆོད། །བཅོལ་བའི་ཕྲིན་ལས་འགྲུབ་པར་མཛོད། །ཅེས་གཏོར་མ་དམིགས་པའི་ཕྱོགས་སུ་བསྐྱལ་ལོ། །མཆོད་པའི་དུས་གཏོར་མ་ཆུར་བསྐུར་རོ། །།ཧཱུྃ། དགེ་བསྙེན་ཀླུ་བདུད་འཁོར་བཅས་རྣམས། །མཆོད་སྦྱིན་གཏོར་མས་ཚིམས་མཛོད་ལ། །རང་རང་གནས་སུ་བདེ་བར་གཤེགས། །རྒྱུན་དུ་སྤྱན་དང་གྲོགས་ལྟ་བུར། །བརྩེ་བའི་སེམས་ཀྱིས་ཁ་འཛིན་མཛོད། །།ཨོ་ནཱ་ག་རུ་ཊ་མ་ཧཱ་ཨུ་པ་སི་ཀ་ས་པཱ་རི་ཝ་ར་འབྱུང་པོ་གང་དག་འདིར་ནི་ལྷགས་གྱུར་ཏེ། །ཞེས་སོགས་བྱའོ། །ཞེས་པ་འདི་ནི་ཀླུ་ཐེབས་བཟང་པོའི་དུས་ཉིན་པར། དགེ་སློང་ཨ་རཱ་གས་བྲིས་པའོ། །འདི་ལ་ཉེས་པ་གང་མཆིས་དགེ་བསྙེན་ཉིད་ལ་བཤགས། དགེ་བས་དགེ་ལེགས་དཔལ་ལ་སྤྱོད་པར་ཤོག །ནཱ་ག་མངྒ་ལཾ།། །། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།