མཁར་ནག་གསོལ་ཀ
དེ་ནས་མཁར་ནག་གསོལ་ཀ་ནི༔ ཧཱུྃ༔ གཉན་ཆེན་མཁར་ནག་རྡོ་རྗེ་རྒྱལ༔ སྐུ་མདོག་ནག་པོ་ཞལ་གཅིག་པ༔ ཕྱག་ན་ནོར་བུ་སྦྲུལ་ཞགས་འཛིན༔ སྟོབས་ཆེན་གླང་པོའི་སྟེང་ན་བཞུགས༔ འཇིགས་བྱེད་སེང་གེའི་ཚྭ་ཚྭ་འཕྲོ༔ སྦྲུལ་མགོ་ཉིས་བརྒྱའི་གདེངས་ཀ་ཅན༔ ཞལ་གདངས་ལྗགས་འདྲིལ་འཇིགས་པའི་གཟུགས༔ སྐུ་སྨད་དུག་སྦྲུལ་ནག་པོར་འཁྱིལ༔ ཁ་ནས་མེ་འབར་གློག་ལྟར་འཁྱུགས༔ གསོད་བྱེད་མེ་ཡི་སྤུ་གྲི་ཁྱོད༔ མཚོ་ཆེན་བརྒྱད་ནས་གཤེགས་སུ་གསོལ༔ ཡུམ་གཅིག་ལྕམ་མོ་ན་ར་སེང་༔ སྲས་ཆེན་སྤྲུལ་པའི་ཀླུ་བདུད་དང་༔ ལྕམ་སྲིང་ནང་བློན་རིགས་ལྡན་བདག༔ བར་བློན་ཀླུ་བདུད་འབོ་རང་དང་ནག་མདོངས་ཀླུ་བདུད་འབུམ་གྱིས་བསྐོར༔ དེ་ལྟར་འཁོར་བཅས་གཤེགས་ཙམ་ན༔ དགྲ་སྲོག་དམར་པོ་ཧད་ཧད་གཏོང་༔ གཉེ་ཐང་སོག་ཆུ་རུ་ངོམ་ཟླ༔ ཆུ་ཆེན་བཅོ་བརྒྱད་གནས་ནས་སྤྱོན༔ དགྱེས་ཚུལ་བཞུགས་ལ་གུས་པས་བསྟོད༔ དུག་རིགས་མ་གཏོགས་མེ་ཏོག་རྣམས༔ ལྕགས་རིགས་མ་གཏོགས་རིན་ཆེན་རྣམས༔ ཚེར་ནག་མ་གཏོགས་ཤིང་རིགས་རྣམས༔ གོ་འབྲས་མ་གཏོགས་ཤིང་ཐོག་
རྣམས༔ དངོས་སམ་ཡིད་ཀྱིས་སྤྲུལ་ནས་མཆོད༔ གཏོར་མ་བདུད་རྩིའི་ལོངས་སྤྱོད་འདིས༔ འཁོར་བཅས་མཉེས་ཤིང་ཚིམ་གྱུར་ཅིག༔ བདག་ཅག་འཁོར་དང་བཅས་པ་ལ༔ རྒྱལ་འགོང་དམ་སྲིའི་གནོད་པ་སྲུངས༔ ཀླུ་ཡི་ནད་རྣམས་ཞི་བ་དང་༔ ཀླུ་གཡང་ཕྱུགས་དར་དངོས་གྲུབ་སྩོལ༔ བདག་ལ་དགོས་པའི་དུས་བྱུང་ཚེ༔ ཆར་པ་ཆེན་པོ་མྱུར་དུ་ཕོབ༔ གྲུ་ལོག་ཆུ་ཡི་གནོད་པ་ཟློག༔ ནང་འཁྲུག་གོད་ཁ་ཞི་བར་མཛོད༔ ལོ་ནད་བཙའ་སད་སེར་བ་ཟློག༔ བདག་ལ་སྡང་བའི་དགྲ་བོ་ལ༔ སྨྱོ་འབོག་མཛེ་དང་རིམས་ནད་ཐོངས༔ བསམ་ངན་དུག་གིས་དགྲ་བོ་དམིགས༔ རེག་པའི་ལག་དུག་དགྲ་ལ་སྙོབས༔ མཐོང་བའི་མིག་དུག་དགྲ་ལ་ལྟོས༔ ཁ་རླངས་དུག་ནས་དགྲ་ལ་ཐོངས༔ མཆེ་བའི་དུག་གིས་དགྲ་བོ་ཐོ༔ བཅོལ་བའི་ཕྲིན་ལས་འགྲུབ་པར་མཛོད༔ ཨོཾ་ནཱ་ག་རཱ་ཛ་བཛྲ་རཱ་ཙ་ཧཱུྃ་ཧཱུྃ་ཕཊ༔ ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ སརྦ་པུཙྪ་ཁཱ་ཧི༔ ཨོཾ་ནཱ་ག་རཱ་ཙ་བཛྲ་རྭ་ཙ་སརྦ་སིདྡྷི་སྭཱ་ཧཱ༔ ཞེས་ཨ་རཱ་གས་བཀོལ་ཏེ་བྲིས་སོ། །མངྒ་ལཾ།། །།