དབའ་ནག་དགེ་བསྙེན་ཀ་བསྟོད།
ཀ་ཡེ་གསོན་དང་དབའ་ནག་དགེ་བསྙེན་ཁྱོད། །ཁ་བ་ཅན་གྱི་གནས་མཆོག་སྐྱི་འབྱམས་འདིར། །ག་ནས་བསམས་ཀྱང་གཏེར་སྲུང་ཁྱོད་ཡིན་པས། །ང་ཡི་ཁྱོད་ལ་མཆོད་ཅིང་བསྟོད་པའི་ཕྱིར། །ཅ་ཅོའི་སྤྱན་འདྲེན་རོལ་མོ་གསན་ལགས་སམ། །ཆ་ལུགས་མི་སྔོན་ཉ་ཡི་མགོ་བོ་ཅན། །ཇ་ཆང་ཕུད་དང་དཀར་གསུམ་གཏོར་མས་མཆོད། །ཉ་རྒྱས་ཟླ་ལྟར་དགེ་ལེགས་འཕེལ་བར་མཛོད། །ཏ་ཐཱ་ག་ཏའི་བསྟན་སྲུང་ཆེན་པོ་ཁྱོད། །ཐ་མལ་ལྷ་འདྲེ་གཞན་གྱི་དོ་ཟླ་མིན། །ད་ནི་བདག་གིས་སྲུང་མར་ཁྱོད་འཚོ་བརྟེན་གྱིས། །ན་ཚ་དགྲ་རྐུན་གོད་ཁ་མེད་པར་མཛོད། །པ་དེ་པུ་དེའི་ཆོ་འཕྲུལ་མི་སྟོན་ཡང་། །ཕ་རོལ་དགྲ་དགེགས་འཇོམས་ལ་མཐུ་རྩལ་ཆེ། །བ་མོར་ཉི་ཟེར་ཕོག་ལྟར་མེད་པར་མཛོད། །མ་ལྟར་བྱམས་པའི་ཐུགས་ཀྱིས་དད་ལྡན་སྐྱོངས། །ཙ་ཁ་ལོ་ཕྱུགས་རྟག་ཏུ་ལེགས་པ་དང་། །ཚ་གྲང་འདུ་བའི་ནད་ཀུན་ཞི་བར་མཛོད། །ཛ་ཡེ་པདྨ་འབྱུང་གནས་བཀའ་བཞིན་དུ། །ཝ་ལེར་སྲིད་གསུམ་གཟིགས་པའི་སྲུང་མ་ཁྱོད། །ཞྭ་ལྟར་རྒྱལ་བའི་བསྟན་པ་སྤྱི་བོར་ཁུར། །ཟ་བྱེད་ལྷ་བཙན་དྲེགས་པའི་འཁོར་དང་བཅས། །འ་
རེ་འུ་རེའི་འབྲུག་སྒྲ་ཐོག་སེར་འབེབས། །ཡ་མཚན་མཛེས་པའི་བཙུན་མོ་ཀླུ་མོ་སོགས། །ར་ཆེན་འབུམ་གྱི་འཁོར་གྱིས་ཡོངས་བསྐོར་བའི། །ལ་ཆེན་སྲུང་མར་བརྟེན་ཅིང་མཆོད་། པ་འབུལ། །ཤ་ཚ་སྙིང་རྗེའི་ཕ་ཁུ་སྤུན་ཟླ་ལྟར། །ས་ཆ་གང་དུ་འདུག་ཀྱང་ཁ་འཛིན་མཛོད། །ཧ་ཧ་དགྱེས་པའི་གད་མོ་དང་བཅས་ཏེ། །ཨ་ལ་ལ་ཞེས་ངོ་མཚར་དངོས་གྲུབ་སྩོལ། །ཞེས་པ་དཀར་གཏོར་ཅིག་ཨོཾ་ཨཱ༔ཧཱུྃ་གིས་བྱིན་གྱིས་བརླབས་ལ་བསང་གི་གཤམ་དུ་འབུལ། ༧ རཱ་ག་ཨ་སྱས་དགེ་བསྙེན་ཞལ་གཟིགས་དུས་གནས་བདག་ལ་བསྟོད་པའོ། །མངྒ་ལཾ།། །།