ཀླུ་བདུད་དགེ་བསྙེན་འབོ་རང་གི་གསོལ་ཀ་ཀླུ་ཆོག
ཀླུ་བདུད་དགེ་བསྙེན་འབོ་རང་གི་གསོལ་ཀ་ཀླུ་ཆོག་བཞུགས་སོ།
ན་མོ་པདྨ་ཀཱ་ར་ཡེ༔ ཀླུ་བདུད་མཆོད་ཕྱིར་ཕྱག་ལེན་ལྟར༔ མཆོད་གཏོར་བཤམས་ལ་རང་ཉིད་ཀྱང་༔ ཡི་དམ་བསྒོམས་ལ་བསྙེན་པ་བྱ༔ གདུང་བའི་དབྱངས་ཀྱིས་འདི་སྐད་དོ༔ ཨོཾ་ཨ་མྲྀ་ཏེ་ཧཱུྃ་ཕཊ༔ ཨོཾ་སྭ་བྷ་ཝ་སོགས། མདུན་དུ་པཾ་ལས་བླ་མཚོ་ནག་པོ་ནི༔ ནེའུ་སིང་ལྗོན་ཤིང་བྲག་རིས་རབ་ཏུ་བསྐོར༔ དེ་ནང་ཧཱུྃ་ལས་རིན་ཆེན་གཞལ་ཡས་ཁང་༔ ལྷ་མིའི་འདོད་ཡོན་རྣམ་པ་སྣ་ཚོགས་ལྡན༔ དེ་དབུས་པད་ཟླ་ཕུ་ཡིག་འཕྲོ་འདུ་ལས༔ ཀླུ་བདུད་དགེ་བསྙེན་ཆེན་པོ་རྔམ་ཞིང་བརྗིད༔ དཀར་སྨུག་ཞལ་གཅིག་ཕྱག་གཉིས་ཞི་མ་ཁྲོ༔ དབུ་ལ་གསེར་ཞུ་སྐུ་ལ་མེ་ཏྲི་གསོལ༔ ཕྱག་
གཡས་སྦ་ལྕག་གཡོན་པས་ནོར་བུ་བསྣམས༔ སྦྲུལ་གྱིས་བརྒྱན་པའི་ཅང་ཤེས་སྔོན་པོ་ཆིབས༔ སྡེ་བརྒྱད་དྲེགས་པའི་འཁོར་ཚོགས་བསམ་མི་ཁྱབ༔ ས་བོན་འོད་ཀྱིས་འཁོར་བཅས་སྤྱན་དྲངས་གྱུར༔ སྤྱན་འདྲེན་ནི༔ ཧཱུྃ༔་ཆུ་བོ་ཀུན་དང་ཆུ་ཡི་མདོ་རྣམས་དང་༔ མཚོ་དང་རྫིང་བུ་ཆུ་མིག་ནེའུ་སིང་དང་༔ ཁྱད་པར་དགེ་བསྙེན་ཁྱོད་ཀྱི་བཞུགས་པའི་ས༔ ཀྱང་རང་འབོ་རང་ཤང་རང་རྡོ་བཟེ་དང་༔ དབྱི་དོ་གཡོ་རྫོང་ལ་སོགས་གནས་མཆོག་ནས༔ ཀླུ་བདུད་དགེ་བསྙེན་འཁོར་བཅས་གཤེགས་སུ་གསོལ༔ ཨོཾ་ནཱ་ག་ཀ་ལ་ས་མ་ཡ་ཛ་ཛ༔ ཛ༔ཧཱུྃ་བཾ་ཧོ༔
ཧཱུྃ༔ ནོར་དབྱིག་རིན་ཆེན་སྣ་ཚོགས་བརྩེགས་པའི་ཁྲི༔ དབང་པོའི་གཞུ་འདྲ་དར་ཟབ་དུ་མ་བཀླུབ༔ འདམ་སྐྱེས་ནམ་མཁའི་ཐིག་ལེ་བདལ་བའི་སྟེང༔ ཀླུ་རྒྱལ་དགེ་བསྙེན་ལྟའཁོར་བཅས་བཞུགས་སུ་གསོལ༔ ཨོཾ་ནཱ་ག་ཀཱ་ལ་ཏིཥྛ་ལྷན༔ ཧཱུྃ༔ གསང་བའི་བདག་དང་རྡོ་རྗེ་གྲོ་ལོད་དང་༔ པཀི་དང་ནི་རང་བྱུང་རྒྱལ་བ་ཡི༔ སྤྱན་སྔར་ཁས་བླངས་དམ་བཅས་དྲན་མཛོད་ལ༔ རྒྱལ་བསྟན་སྲུང་ཞིང་རྣལ་འབྱོར་ཕྲིན་ལས་སྒྲུབས༔ ཨོཾ་ནཱ་ག་ཀ་ལ་ས་མཱ་ཡ། ཧཱུྃ༔ ཀླུ་བདུད་ཆེན་པོ་ཀླུ་བཙན་ཡོངས་ཀྱི་རྗེ༔ བསྟན་པའི་བཀའ་སྲུང་དགྲ་བོའི་གཤེད་མ་སྟེ༔ གསང་སྔགས་བཀའ་ཡི་ཕོ་ཉ་མཐུ་བོ་ཆེ༔ དགེ་བསྙེན་འཁོར་དང་བཅས་ལ་ཕྱག་འཚལ་བསྟོད༔ ཨོཾ་ནཱ་ག་ཀཱ་ལ་ན་མོ་ཧཱུྃ༔ ཨོཾ༔ ལས་རིན་ཆེན་སྣོད་དུ་མཆོད་པའི་རྫས༔ རྒྱ་ཆེན་ཟད་མི་ཤེས་པ་ནམ་མཁའི་མཛོད༔ མཁོ་དགུ་ལོངས་སྤྱོད་འདོད་དགུའི་དཔལ་དུ་གྱུར༔ ཨོཾ་བཛྲ་སྤ་ར་ཎ་ཁཾ༔ དེ་ནས་མཆོད་པ་ནི། ཨོཾ༔ འོ་ཞོའི་མཆོད་ཡོན་ཡན་ལག་བརྒྱད་ལྡན་ཆབ༔ རབ་མཛེས་བྱུང་བའི་སྙན་དང་ཡིད་འཕྲོག་དྲི༔ མུན་སེལ་རིན་ཆེན་འོ་ཆང་རྒྱུ་ཇའི་དྲི༔ རོ་བརྒྱ་ལྡན་དང་རྣ་བར་སིལ་བྱེད་སྒྲ༔ སྣ་
ཚོགས་ཆུ་གནས་གཟུགས་བརྙན་ཡིད་འོང་བ༔ ཡིད་རབ་དྭངས་བའི་བསྟོད་དབྱངས་དྲི་ཟའི་གླུ༔ ནཱ་ག་གེ་སར་ཀླུ་རྒྱལ་དགའ་བྱེ་དྲི༔ དཀར་གསུམ་མངར་གསུམ་ཀླུ་དབང་མགུ་བའི་ཟས༔ སྣ་ཚོགས་དར་ཟབ་བལ་ཚོན་ཡིད་མཛེས་པ༔ སྣ་ཚོགས་ཀླུ་ནོར་གཏེར་གྱུར་ཤེལ་ཚིགས་དང་བཀྲ་ཤིས་རྫས་རྟགས་བརྒྱད་དང་རིན་ཆེན་བདུན༔ ཀླུ་བདུད་དགེ་བསྙེན་འཁོར་དང་བཅས་ལ་འབུལ༔ ཨོཾ་ནཱ་ག་ཀཱ་ལ་ས་པཱ་རི་ཝཱ་ར་ཨརྒྱུ་སོགས། པྲ་ཏཱིཙྪ་སྭཱ་ཧཱ༔ ཨོཾ༔ ཨ་རུ་ར་སོགས་ཀླུ་སྨན་སྣ་ཚོགས་དང་༔ ཏིང་འཛིན་སྔགས་ཀྱིས་བྱིན་རླབས་ཕུལ་བའི་མཐུས༔ མཆོག་གསུམ་བདེན་པས་ཁྱོད་ཀྱི་གནས་རྣམས་སུ༔ སྨན་གྱི་ཆར་བབ་ཀླུ་ནད་ཀུན་ཞི་ནས༔ ཀླུ་རྒྱལ་འཁོར་བཅས་གཟི་མདངས་ལྡན་གྱུར་ཅིག༔ ཏདྱ་ཐཱ༔ བྷེ་ཥ་ཚེ་བྷེ་ཥ་ཚེ་མ་ཧཱ་བྷི་ཥ་ཛུ་རཱ་ཛ་ས་མུཏྤ་ཏེ་སྭཱ་ཧཱ༔ ཞེས་ལན་གསུམ། སྐྱབས་མཆོག་རིན་ཆེན་གསུམ་གྱི་བདེན་པའི་མཐུས༔ ཀླུ་ཡི་སྒྲིབ་གསུམ་བག་ཆགས་ཀུན་བྱང་ཞིང་༔ བྱམས་དང་སྙིང་རྗེའི་བསམ་པས་རྒྱུད་བརླན་ནས༔ རིང་པོར་མི་ཐོགས་མངོན་པར་བྱང་ཆུབ་ཤོག༔ ན་མོ༔ རཏྣ་ཏྲ་ཡཱ་ཡ། ཨོཾ་ཀཾ་ཀ་ནི་ཀཾ་
ཀ་ནི། །རོ་ཙ་ནི་སོགས། ལན་གསུམ་བརྗོད། ཆོས་རྣམས་ཐམས་ཅད་རྒྱུ་ལས་བྱུང་༔ སོགས། འདི་ནི་སངས་རྒྱས་བསྟན་པ་ཡིན༔ དེ་ནས་གཏོར་མ་བྲན་ལ་ཧཱུྃ་ལས་རིན་ཆེན་སྣོད་དུ་ཨོ་ཡིག་ལས༔ རོ་བརྒྱ་ལྡན་པའི་ཞལ་ཟས་ཤེལ་གྱི་མདོག༔ ཁ་དོག་དྲི་རོ་རེག་བྱ་ཕུན་སུམ་ཚོགས༔ ཟག་མེད་བདེ་བ་བསྐྱེད་པ་ཉིད་དུ་གྱུར༔ ཨོཾ་ཨཱཿཧཱུྃ༔ ཨོཾ་ནཱ་ག་ཀ་ལ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ཧཱུྃ༔ ཀླུ་བདུད་དགེ་བསྙེན་འཁོར་དང་བཅས་པ་ཡིས༔ གཏོར་མ་འབུལ་བ་འདི་དག་བཞེས་ནས་ཀྱང་༔ བདག་ཅག་རྒྱུ་སྦྱོར་འཁོར་དང་བཅས་པ་ལ༔ ཆོམ་རྐུན་དགྲ་དང་རྒྱལ་པོའི་འཇིགས་པ་དང་༔ ནད་གདོན་དུས་མིན་འཆི་ཀུན་ཞི་བར་མཛོད༔ མངའ་ཐང་ལོངས་སྤྱོད་འབྲུ་དང་ནོར་ཕྱུགས་དང་༔ བསོད་ནམས་འབྱོར་པ་དཔལ་རྣམས་རྒྱས་པར་མཛོད༔ ཕ་རོལ་དགྲ་དང་རྒྱལ་བློན་ཡུལ་ཁམས་དང་༔ འདོད་དགུའི་ལོངས་སྤྱོད་དབང་དུ་འདུ་བར་མཛོད༔ བདག་ལ་གནོད་པའི་སེམས་འཚང་དགྲ་དང་བགེགས༔ གང་ན་འདུག་ཀྱང་མྱུར་དུ་བརླག་པར་མཛོད༔ ཕན་བདེའི་འབྱུང་གནས་རྒྱལ་བསྟན་རྒྱས་པ་དང་༔ བསྟན་འཛིན་སྐྱེས་བུའི་སྐུ་ཚེ་བརྟན་པ་
དང་༔ འཇིག་རྟེན་བདེ་ཞིང་ལོ་ལེགས་འཁྲུག་པ་ཞི༔ བདེ་སྐྱིད་ཕུན་སུམ་ཚོགས་པའི་ཕྲིན་ལས་མཛོད༔ ཅེས་སོགས་འདོད་གསོལ་གང་དགོས་བྱ༔ ཡང་གལ་ཏེ་གནོད་པ་་ཡོད་ན་འདི་སྦྱར་མེད་ན་འདི་མི་དགོས་སོ༔ ཁྱད་པོར་རྗེ་་ལ༔ གནོད་སེམས་གདུག་སེམས་འཚེ་བའི་བསམ་པ་སྤང་༔ ཀུ་རེ་རྐྱལ་ཁ་རེ་འདོད་མ་བྱེད་ཅིག༔ གལ་ཏེ་སྔོན་ཆེད་གནོད་པ་བྱས་གྱུར་ན༔ བཟུང་བ་ཐོངས་ལ་བཅིངས་པ་མྱུར་དུ་ཁྲོལ༔་བསྡམས་པ་ཀློད་ལ་མནན་པ་མྱུར་དུ་ཁྱོག༔ མནར་མེད་མེ་ཡི་འཇིགས་པ་དྲན་གྱིས་ལ༔ ཕྱིན་ཆད་ནམ་ཡང་གནོད་པ་མ་བྱེད་ཅིག༔ ཅེས་བརྗོད་དོ༔ བསྟོད་པ་ནི༔ ཧཱུྃ༔ རྡོ་རྗེ་འཛིན་གྱི་བཀའ་སྡོད་ཆེ༔ རྒྱ་གྷཾ་ཝའི་བཀའ་ཉན་པ༔ ནཱ་ག་རཀཱའི་བཀའ་འབངས་ཏེ༔ པདྨ་འབྱུང་གནས་ཕོ་ཉ་ཆེ༔ སྐྱེས་མཆོག་པཀཱིའི་བཀའ་སྐྱོང་བ༔ ཀླུ་བདུད་ནག་པོ་ཁྱོད་ལ་བསྟོད༔ རྒྱས་པར་སྤྲོ་ན། ཧཱུྃ༔ ཀླུ་བདུད་དགེ་བསྙེན་མཐུ་བོ་ཆེ༔ སྐུ་མདོག་དཀར་སྨུག་མདངས་དང་ལྡན༔ ཞལ་བཟང་ཟླ་བ་ཉ་བ་འདྲ༔ སྤྱན་མིག་སྐར་ཆེན་ཤར་བ་འདྲ༔ དབུ་ལ་གསེར་ཞུ་ཅེ་རེ་རེ༔ སྐུ་ལ་དུར་སྨྲིག་ལྷུབས་སེ་ལྷུབ༔ ཕྱག་གཡས་སྦ་ལྕག་པུན་ནེ་པུན༔
གཡོན་ན་ནོར་བུ་རྩེ་རེ་རེ༔ ཆིབས་སུ་ཆུ་རྟ་པྲིངས་སེ་སྲིང་༔ སེང་ལྡེང་སྒ་སྟན་ཝངས་སེ་ཝང་༔ ཕྲ་མན་ཡོབ་ཆེན་སི་ལི་ལི༔ གསེར་སྲབ་གཡུ་མཐུར་ཁྱུགས་སེ་ཁྱུག༔ སྤྲུལ་གྱི་གོང་སྨད་ཁྲིགས་སེ་ཁྲིག༔ སྦལ་སྦྲུལ་མང་པོ་ཉི་ལི་ལི༔ རྟ་ནག་གཡག་ནག་རྩེ་རེ་རེ༔ ཆུ་གླང་ཆུ་འབྲི་འདུ་རུ་རུ༔ སྤྲིན་དང་ན་བུན་ཐིབས་སེ་ཐིབ༔ གློག་དང་འབྲུག་སྒྲ་ཆེམས་སེ་ཆེམ༔ ཆར་དང་ཁུ་འཕང་སི་ལི་ལི༔ དགེ་བསྙེན་འཁོར་དང་བཅས་པ་ལ༔ རབ་ཏུ་གུས་པས་བདག་གིས་བསྟོད༔ བསང་ནི་གཞན་དུ་ཤེས་སོ༔ གསོལ་ཁའི་གཏོར་མ་གོང་ལྟར་བྱིན་གྱིས་བརླབས༔ གཏོར་མ་ལག་ཏུ་བཏེག་ལ༔ ཧོ་དམ་རྫས་བདུད་རྩིའི་གཏོར་མ་རྒྱ་ཆེན་པོ་འདི་དགེ་བསྙེན་ཆེན་པོ་ལ་གསོལ་ལོ༔ མཆོད་དོ༔ འདྲེན་ནོ༔ འབུལ་ལོ༔ སྦྱིན་ནོ༔ ཀླུ་བདུད་ཆེན་པོ་ལ་གསོལ་ལོ༔ མཆོད་དོ༔ འདྲེན་ནོ༔ འབུལ་ལོ༔ སྦྱིན་ནོ༔ ཀླུ་བཙན་ཆེན་པོ་ལ་གསོལ་ལོ༔ མཆོད་དོ༔ འདྲེན་ནོ༔ འབུལ་ལོ༔ སྦྱིན་ནོ༔ ཀླུ་གཉན་ཆེན་པོ་ལ་གསོལ་ལོ༔ མཆོད་དོ༔ འདྲེན་ནོ༔ འབུལ་ལོ༔ སྦྱིན་ནོ༔ ཀླུ་སྲིན་ཆེན་པོ་ལ་གསོལ་ལོ༔ མཆོད་དོ༔ འདྲེན་ནོ༔
འབུལ་ལོ༔ སྦྱིན་ནོ༔ གཏེར་བདག་ཆེན་པོ་ལ་གསོལ་ལོ༔ མཆོད་དོ༔ འདྲེན་ནོ༔ འབུལ་ལོ༔ སྦྱིན་ནོ༔ ནོར་ལྷ་ཆེན་པོ་ལ་གསོལ་ལོ༔ མཆོད་དོ༔ འདྲེན་ནོ༔ འབུལ་ལོ༔ སྦྱིན་ནོ༔ དཀོར་སྲུང་ཆེན་པོ་ལ་གསོལ་ལོ༔ མཆོད་དོ་འདྲེན་ནོ༔ འབུལ་ལོ༔་སྦྱིན་ནོ༔ དགྲ་བླ་ཆེན་པོ་ལ་གསོལ་ལོ༔ མཆོད་དོ༔ འདྲེན་ནོ༔ འབུལ་ལོ༔ སྦྱིན་ནོ༔ ཡུལ་ལྷ་ཆེན་པོ་ལ་གསོལ་ལོ༔ མཆོད་དོ༔ འདྲེན་ནོ༔ འབུལ་ལོ༔ སྦྱིན་ནོ༔ ཚོང་དཔོན་ཆེན་པོ་ལ། ལ་གསོལ་ལོ༔ མཆོད་དོ༔ འདྲེན་ནོ༔ འབུལ་ལོ༔ སྦྱིན་ནོ༔ ཆོས་སྐྱོང་ཆེན་པོ་ལ་གསོལ་ལོ༔ མཆོད་དོ༔ འདྲེན་ནོ༔ འབུལ་ལོ༔ སྦྱིན་ནོ༔ བཙུན་མོ་ཀླུ་སྨན་འཁོར་དང་བཅས་པ་ལ་གསོལ་ལོ༔ མཆོད་དོ༔ འདྲེན་ནོ༔ འབུལ་ལོ༔ སྦྱིན་ནོ༔ འཁོར་དང་ཡང་འཁོར་ཐམས་ཅད་ལ་གསོལ་ལོ༔ མཆོད་དོ། འདྲེན་ནོ༔ འབུལ་ལོ༔ སྦྱིན་ནོ༔ དམ་རྫས་བརྒྱན་པའི་གཏོར་མ་འདི་བཞེས་ལ༔ རྣལ་འབྱོར་བདག་ཅག་འཁོར་དང་བཅས་པ་ལ་སྡང་བའི་དགྲ་སོད་གནོད་པའི་བགེགས་
ཐུལ༔ བར་ཆད་ཀྱི་རྐྱེན་བཟློག༔ ཉིན་གྱི་དུས་སུ་བྱ་ར་གྱིས༔ མཚན་གྱི་དུས་སུ་མེལ་ཚེ་གྱིས༔ མདུན་གྱི་འཁར་བ་དང་རྒྱབ་ཀྱི་རྟེན་ས་གྱིས༔ ཚེ་དང་བསོད་ནམས་སྤེལ༔ དཔལ་དང་གྲགས་པ་སྒྲུབས༔ འཁོར་དང་ལོངས་སྤྱོད་སྤེལ༔ བསམ་པའི་དོན་ཐམས་ཅད་ཆོས་ལྡན་ཡིད་བཞིན་དུ་འགྲུབ་པར་མཛོད་ཅིག༔ ཅེས་ད་ནམ་མཁའ་ལ་གཏོར༔ གཏོར་མ་དངོས་གྲུབ་ཏུ་རོལ་བའམ༔ ཡང་ན་ཆུ་ལ་གཤེགས་སོ༔ ཡང་ན་དྲག་པོའི་ཕྱིར་རྦད་ན༔ གཏོར་མ་མན་ངག་ལྟར་བྱིན་བརླབས་བྱས་ལ༔ ཧཱུྃ༔ ཀླུ་བདུད་ནག་པོ་མཐུ་བོ་ཆེ༔ ཤིན་ཏུ་དྲག་ཏུ་ཁྲོས་ཙ་ན༔ སྐུ་མདོག་མཐིང་ནག་མུན་པའི་མདོག༔ ལུས་ནི་གཞུ་འདོམ་བརྒྱ་ཡི་ཚད༔ སྦྲུལ་མགོ་དགུ་ཡི་གདེངས་ཀ་ལ༔ དུག་གི་སྤྲིན་ནག་ཐིབས་སེ་ཐིབ༔ སྡང་མིག་དམར་ཐབས་བསྒྲད་པ་ལ༔ ཁྲག་གི་ཆར་པ་སི་ལི་ལི༔ ཁ་གདངས་མཆེ་བ་གཙིགས་པ་ལ༔ ནད་རླངས་དམར་པོ་ཕྱུ་རུ་རུ༔ སྣ་ནས་སྤྲིན་ནག་འཕྱུར་བ་ལ༔ སེར་བ་དྲག་པོ་ཤ་ར་ར༔ སྙིང་ལ་གདུག་པའི་མུན་ནག་འཐིབས༔ དགྲ་བོ་མ་བརྗེད་ཤོ་ར་རེ༔ བུ་ག་དགུ་ནས་འབྲུག་སྒྲ་སྒྲོག༔ འུར་སྒྲ་ཐུག་ཆོམ་ཆེམས་སེ་ཆེམ༔ རྣ་བའི་ཁུང་ནས་ཐོག་རྒོད་འཕྲོ༔
འཁྱུག་དང་ཚྭ་ཚྭ་ཐུ་ལུ་ལུ༔ བ་སྤུའི་གསེབས་ནས་ཐོག་སེར་འཕྲོ༔ གནམ་ལྕགས་ཚྭ་ཚྭ་ཐུ་ལུ་ལུ༔ རྐང་ཞབས་ནད་ཀྱི་རླུང་ཆེན་ལྡང་༔ རླུང་དམར་འཚུབ་མ་ཀྱི་ལི་ལི༔ འོག་སྒོ་སྦལ་སྦྲུལ་ཕོ་ཉ་འཕྲོ༔ སྦལ་སྦྲུལ་སྡོམ་སྡིག་ཉི་ལི་ལི༔ ཕྱག་གཡས་སྦྲུལ་ནག་ཞགས་པ་བསྣམས༔ བདུད་ཞགས་ནག་པོ་སྒ་ར་ར༔ གཡོན་ན་ནད་ཀྱི་རྐྱལ་པ་བསྣམས༔ ནད་རླངས་སྔོ་དམར་ཚུབས་སེ་ཚུབ༔ ཆིབས་སུ་བྲ་ནག་རྟིང་དཀར་བཅིབ༔ རྔ་རྔོག་སྦལ་སྦྲུལ་ཤིགས་སེ་ཤིག༔ བདུད་རྟ་རྒྱུག་འདུར་ཁྲ་ལ་ལ༔ འཁོར་དུ་སྡེ་བརྒྱད་དུ་མས་བསྐོར་ཆོ་འཕྲུལ་སྣ་ཚོགས་ཟིངས་སེ་ཟིང་༔ བརྒྱན་པའི་གཏོར་མ་འདི་བཞེས་ལ༔ བྷྱོ་བྷྱོ་སྡང་བའི་དགྲ་ལ་བྷྱོ༔ ཆོས་ཆོས་སྡང་བའི་དགྲ་ལ་ཆོས༔ མཐུ་དང་རྫུ་འཕྲུལ་ཅི་འདུག་ལྟ༔ རྟགས་དང་ཆོ་འཕྲུལ་དུ་མ་སྟོན༔ ལྟས་ངན་མི་རུངས་སྣ་ཚོགས་ཐོངས༔ ཐོག་དང་སེར་བ་གནམ་རྡོ་རྒྱོབས༔ གག་ལྷོག་མཛེ་དང་གཉན་ནད་ཐོངས༔ རིམས་དང་འཁྲུག་པ་གྲི་རྒོད་ཀྱིས༔ སྡང་བའི་དགྲ་བོ་ལས་ངན་འདི༔ ཐོག་མདའ་གྲི་དབབ་ཁ་རུ་སོད༔ དགེ་བསྙེན་ཆེན་པོའི་དུས་ལ་བབ༔ བཅོལ་བའི་ཕྲིན་
ལས་འགྲུབ་པར་མཛོད༔ ཅེས་དྲག་ཏུ་བསྐུལ་ནས་གཏོར་མ་གཟའ་རྒྱུ་བ་དང་བསྟུན་ནས་དགྲ་ཕྱོགས་སུ་འཕང་༔ འདི་ཤིན་ཏུ་གཉན་པས་བསྟན་པ་སྤྱིའི་ཕྱིར་མ་གཏོགས་རང་དོན་ལྟར་ཆེར་བསྐུལ་ན་དགེ་བསྙེན་འཁྲུགས་ནས་རང་ལ་གནོད་པས་བཅོལ་ཤེས་པར་བྱའོ༔ ཀླུ་ཐེབས་དང་བསྟུན་ནས་ཀླུའི་གསོལ་ཁ་བྱས་ན། གནོད་འཚེ་ཞི་བ་དང་ལོངས་སྤྱོད་འཕེལ་བ་དང་ཀླུ་ལས་གྱུར་པའི་ནད་ཐམས་ཅད་ཞི་བ་དང་༔ གཞན་ཡང་ཕན་ཡོན་ཀླུ་མཆོད་སྤྱི་ལྟར་ཤེས་པར་བྱའོ༔ ཞེས་པ་འདི་ནི་སྙིགས་དུས་སུ་སྐྱེས་ཤིང་དགེ་སྦྱོར་གྱི་རྟགས་ཙམ་འཆང་ཞིང་བསྐྱེད་རྫོགས་ལ་མོས་པ་ལམ་དུ་བྱེད་པའི་རྣལ་འབྱོར་པ་ཨ་རཱ་གས་ཕན་པའི་གདམས་པ་ཁོ་ནས་སྦྱར་བའོ༔ མངྒ་ལཾ།། །། ༈ ཆུ་བདག་ལ་དཀར་གཏོར་བསྔོ་བ་ནི། ཧཱུྃ་ལས་རིན་ཆེན་སྣོད་ཡངས་པར། །གཏོར་མ་དཀར་གསུམ་བདུད་རྩིའི་མཚོ། །ཨོཾ་ཨཱཿཧཱུྃ་གིས་བྱིན་གྱིས་བརླབས། །ཟག་མེད་བདེ་བ་བསྐྱེད་པ་འདི། །ཀླུ་ཡི་དགེ་བསྙེན་དམ་ཚིག་ཅན། །འབོ་རང་ཡབ་ཡུམ་བློན་འབངས་བཅས། །འཁོར་དང་སྤྲུལ་པ་བཅས་པ་ལ། །འབུལ་ལོ་མཉེས་ཤིང་ཚིམས་ནས་ཀྱང་། །འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པ་འགྲུབ་པར་མཛོད། །ཨོཾ་ནཱ་ག་ཅི་ཅི་འབི་འབི་སྭཱ་ཧཱ། ཨོཾ་ནཱ་ག་ཨུ་པ་སི་ཀ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨ་རཱ་གས་སོ།། །།