ཇོ་བོ་གཟེ་རྒྱལ་གྱི་གསོལ་ཁ་སྒྲུབ་ཐབས་དང་བཅས་པ་ཁ་བ་ཅན་གྱི་མངའ་གསོལ་ཆེན་མོ།
ཇོ་བོ་གཟེ་རྒྱལ་གྱི་གསོལ་ཁ། སྒྲུབ་ཐབས་དང་བཅས་པ་ཁ་བ་ཅན་གྱི་མངའ་གསོལ་ཆེན་མོ་བཞུགས་སོ། །
ན་མོ་པདྨ་ཀཱ་ར་ཡེ། པད་འབྱུང་ཟིལ་གནོན་ལྷ་ལ་ཕྱག་འཚལ་ལོ། །དེ་ཡི་བཀའ་སྲུང་གཟེ་རྒྱལ་མཆེད་གསུམ་པོ། །སྲུང་མར་བརྟེན་ཅིང་མཆོད་པའི་མན་ངག་ནི། །ཕྱིང་དཀར་སྟེང་དུ་ནས་ཀྱིས་འདབ་བཞི་བྲི། །སྣོད་གཙང་ནང་དུ་བཤོས་བུ་རི་ཡི་དབྱིབས། །གཡག་ལུག་ར་གསུམ་ཕྱེ་མར་ཟས་ཕུད་བཤམས། །ངེས་པར་རྒྱུན་དུ་སྲུང་མར་བརྟེན་པ་ནི། །ལེབ་མོ་བྱ་རྒོད་སྒྲོ་ཅན་མདའ་ལ་ནི། །དར་ཚོན་སྟག་རས་གཟིག་གི་རི་མོ་དང་། །མེ་ལོང་གཡུ་སོགས་རིན་པོ་ཆེ་ཡིས་བརྒྱན། །ལུག་སྙིང་ནང་དུ་སྲོག་སྔགས་རྣམས། །གསེར་དངུལ་མཚལ་གྱིས་བྲིས་ལ་བཅུག །རས་དཀར་བཏུམ་ལ་མདའ་མགུལ་བཏགས། །དར་དཀར་དག་ལ་སྲོག་སྔགས་དང་། །རྟ་མགོ་ལུག་མགོའི་གཟུགས་བྲིས་བཏགས། དེ་ནི་གཞི་
ལ་རྟག་ཏུ་འཆང་། །བྱེས་ལ་སག་དག་ནང་སོགས་བཞག །ལུས་དང་གྲིབ་བཞིན་སྡོང་གྲོགས་བྱེད། །དེ་ནི་བཅའ་ཚོགས་རྒྱས་པ་སྟེ། །བསྡུ་ན་དཀར་གཏོར་རྩེ་གསུམ་གཅིག །མཐའ་ལ་རྟ་མགོ་ལུག་མགོའི་གཟུགས། །མཐེབ་སྐྱུ་དང་བཅས་མཐའ་བསྐོར་ལ། །བསངས་དང་འབྲེལ་ན་བསང་རྫས་བཤམས། །དེ་ནས་གྱེར་སྒོམ་སྦྲགས་བྱས་ཏེ། །རོལ་མོ་དབྱངས་དང་བཅས་པས་འདི་སྐད་དོ། །ས་རྣམ་དག་སྐྱེ་མེད་ཀུན་བཟང་ཀློང་༔ སྐྱེ་བའི་ཆོ་འཕྲུལ་སྐད་ཅིག་དྲན་རྫོགས་སུ༔ བདག་ཉིད་སྣང་སྲིད་ཟིལ་གནོན་པདྨ་འབྱུང་༔ ཐུགས་སྲོག་ཧཱུྃལས་འོད་ཟེར་ལྕགས་ཀྱུའི་དབྱིབས༔ འཕྲོས་པས་བཀའ་སྡོད་འཁོར་བཅས་སྤྱན་དྲངས་
གྱུར༔ ཧཱུྃ༔ རྡོ་རྗེ་གདན་གྱི་བྱང་ཕྱོགས་གདོང་དམར་ཡུལ༔ ཁ་བ་ཅན་ལྗོངས་ཐུགས་རྗེ་ཆེན་པོའི་ཞིང་༔ མངོན་དགའ་ཞིང་མཚུངས་མདོ་སྟོད་ལྕི་ཡི་ལ༔ རིན་ཆེན་ཤེལ་གྱི་རི་བོ་ལྷུན་མཐུག་པ༔ འབྲུག་སྒྲོག་གློག་འབྱིན་ཆུ་འཛིན་སྨུག་པོ་འཐིབས༔ སྤང་ལྗོངས་ནེའུ་སེང་མེ་ཏོག་ཚལ་ཆེན་རྒྱས༔ རི་དྭགས་གཅན་གཟན་མང་པོ་བག་ཡངས་རྒྱུ༔ རྨ་གཡང་དངོས་གྲུབ་ཆགས་པའི་གནས་མཆོག་ནས༔ སྨོན་སྐྱེས་གངས་ཞུར་མཆེད་གསུམ་འཁོར་དང་བཅས༔ བདག་གིས་གདུང་བའི་དབྱངས་ཀྱིས་སྤྱན་འདྲེན་ནོ༔ གློག་དམར་མྱུར་བའི་ཤུགས་ཀྱིས་འདིར་གཤེགས་ལ༔ ཡིད་སྤྲུལ་གཙོ་འཁོར་འཚམས་པའི་གདན་ལ་བཞུགས༔ སྔོན་ཚེ་དཔལ་ཆེན་པདྨ་ཐོད་ཕྲེང་གིས་ཇི་ལྟར་བཀའ་བསྒོས་དམ་ཚིག་དྲན་མཛོད་ལ༔ བསྟན་དང་བསྟན་འཛིན་དབུ་འཕང་མཐོ་བ་དང་༔ བདག་གིས་ཅི་བཅོལ་ལས་རྣམས་འགྲུབ་པར་མཛོད༔ ཐོག་གཉན་ཐོག་ཧེ་ཐོག་ཀླུ་ཐོག་རྗེ་ཐོག་བཙན་ཐོག་དཀར་ས་པཱ་རི་ཝཱ་ར་བཛྲ་ས་མ་ཡ་ཛ་ཛ༔ ཛཿཧཱུྃ་བཾ་ཧོ༔ ཏིཥྛ་ལྷན༔ ས་མ་ཡ་སྭོ༔ ས་མ་ཡ་ཧོ༔ བྷཾ་ལས་རིན་ཆེན་སྣོད་མཆོག་རྒྱ་ཆེའི་ནང་༔ ཨོཾ་ལས་མཆོད་རྫས་འདོད་ཡོན་
ལོངས་སྤྱོད་གཏེར༔ ཟད་མེད་ནམ་མཁའ་མཛོད་དུ་གྱུར་པ་ཡིས༔ འོ་ཞོའི་མཆོད་ཡོན་ཡན་ལག་བརྒྱད་ལྡན་དང་༔ རྣམ་བཀྲའི་མེ་ཏོག་བཟང་ཤིང་སྣ་ཚོགས་སྤོས༔ རིན་ཆེན་འོད་འབར་རྒྱ་ཇའི་དྲི་ཆབ་དང་༔ ཕྱེ་མར་ཤ་ཐུད་སྣ་ཚོགས་ཞལ་ཟས་སྤོས༔ ཏིང་ཏིང་ཤག་དང་རྔ་དྲིལ་རོལ་མོའི་སྒྲ༔ གཡག་ལུག་ར་ཡི་གཟུགས་དང་བསྟོད་དབྱངས་སྒྲ༔ སྤོས་དཀར་ཕྱེ་མར་གསུར་དང་གསེར་སྐྱེམས་བཅུད༔ རེག་འཇམ་དར་ཚོན་སྟག་གཟིག་སྤུ་ཤུན་སོགས༔ སྨྱུག་མ་ཚིགས་བདུན་ལྷ་མདའ་ལེབ་མ་ལ༔ རྒོད་སྒྲོ་སྲོག་སྙིང་མཐུན་པའི་རྫས་ཀྱིས་བརྒྱན༔ དངོས་སུ་འབྱོར་དང་ཡིད་ཀྱིས་རྣམ་སྤྲུལ་ཏེ༔ ཇོ་བོ་སྨོན་སྐྱེས་མཆེད་གསུམ་འཁོར་བཅས་ལ༔ འབུལ་ལོ་རབ་ཏུ་མཉེས་ཤིང་ཚིམས་གྱུར་ཅིག༔ ཁྱད་པར་གཏོར་མ་ཟག་མེད་བདུད་རྩིའི་མཚོ༔ ཁ་དོག་དྲི་རོ་ཕུན་སུམ་ཚོགས་པ་འདི༔ ཧ་ཧོ་ཧྲཱིདང་ཨོཾ་ཨཱཿཧཱུྃ་རྣམས་ཀྱིས༔ ཟག་མེད་ལོངས་སྤྱོད་གཏེར་དུ་བྱིན་རླབས་ཏེ༔ ཇོ་བོ་སྨོན་སྐྱེས་གང་ཞུར་མཆེད་གསུམ་གྱི༔ འཁོར་དང་ཡང་འཁོར་བཅས་ལ་འབུལ་ལགས་ན༔ རབ་ཏུ་མཉེས་ཤིང་དགྱེས་པར་རོལ་ནས་ཀྱང་༔ འཁོར་བཅས་རབ་ཏུ་
མགུ་ཞིང་ཚིམས་གྱུར་ཅིག༔ ཨོཾ་ཨ་ཀཱ་རོ་སོགས། ཐོག་གཉེན་ཐོག་ཧེ་ཐོག་ཀླུ་ཐོག་རྗེ་ཐོག་བཙན་ཐོག་དཀར་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨནྡྷཾ་སོགས། ཤཔྟ་པྲ་ཏིཙྪ་ཡེ་སྭཱ་ཧཱ། ཀ་ཡེ་གསོན་དང་སྨོན་སྐྱེས་མཆེད་གསུམ་པོ༔ ཁ་བ་ཅན་ལྗོངས་ལྷ་སྐལ་རྫུ་འཕྲུལ་ཅན༔ ག་ནས་བསམས་ཀྱང་ཁྱེད་ཅག་མཐུ་རྩལ་ཅན༔ ང་ཡིས་སྲུང་མར་རྟག་ཏུ་ཁྱོད་བརྟེན་པས༔ ཅ་ལེ་ཅོ་ལེའི་གདུག་རྩུབ་མ་སྟོན་པར༔ ཆ་ལུགས་གཏེར་བདག་ནོར་ལྷའི་ཚུལ་གྱིས་ནི༔ ཇ་དར་རྨ་གཡང་དངོས་གྲུབ་སྣ་ཚོགས་སྩོལ༔ ཉ་རྒྱས་ཟླ་བ་ལྟ་བུའི་གཟི་བརྗིད་ཅན༔ ཏ་ཐཱ་ག་ཏའི་བསྟན་སྲུང་ཁྱེད་རྣམས་ཀྱིས༔ ཐ་ན་གཅན་གཟན་ཆོམ་རྐུན་ཡན་ཆོད་སྲུངས༔ ད་ནི་མ་གཡེལ་སྐུ་ཤུགས་ཕྱུང་མཛོད་ལ༔ ན་ཚ་དགྲ་འདྲེའི་གནོད་པ་ཞི་བར་མཛོད༔ པ་གཏུམ་དྲག་རྩ་ལ་ལྡན་པ་ཁྱེད་རྣམས་ཀྱིས༔ ཕ་རོལ་དགྲ་དང་བགེགས་ཀྱི་དམག་ཚོགས་ཟློག༔ བ་གླང་རྟ་ཕྱུགས་རྐང་འགྲོ་འཕེལ་བར་མཛོད༔ མ་གཅིག་བུ་གཅིག་ལྟ་བུར་བྱམས་པས་སྐྱོངས༔ ཙ་ཁ་ལོ་ཐོག་ལེགས་ཤིང་རྒྱས་པ་དང་༔ ཚ་རྡུང་མ་བཏང་ཆར་ཆུ་དུས་འབེབས་སོགས༔ ཛ་ཡེ་པདྨ་འབྱུང་གནས་བཀའ་བསྒོས་
བཞིན༔ ཝ་ལེར་ཡིད་ཀྱི་མངོན་ཤེས་ལྡན་ཁྱོད་རྣམས༔ ཞ་ལྟར་བདག་གི་གཙུག་ཏུ་བཀུར་བའི་ཚེ༔ ཟ་འཐུང་ཕུད་ཀྱིས་མཆོད་པ་འབུལ་ལགས་ན༔ འ་རེ་འུ་རེའི་སྙན་དང་གྲགས་པ་སྤེལ༔ ཡ་མཚན་ཆེ་བའི་དངོས་གྲུབ་བདག་ལ་བྱིན༔ ར་ཙ་བློན་འབངས་ཡུལ་འཁོར་ལ་སོགས་པ༔ ལ་ཆེན་སྣང་སྲིད་དགོས་འདོད་དབང་དུ་བསྡུས༔ ཤ་ཁྲག་གཏོར་མས་མཆོད་ཅིང་ཆད་པའི་ཚེ༔ ས་ཆེན་རི་ཆེན་གཡོ་བའི་དམག་དཔུང་གིས༔ ཧ་ཧའི་གད་མོ་དང་བཅས་དགྲ་བགེགས་ཆོམ༔ ཨ་ལ་ལ་ཧོ་ངོ་མཚར་རྒྱལ་ཁ་བྱིན༔ ཞེས་། རྒྱུན་ཁྱེར་བྱའོ༔ དེ་ལ་བསྙེན་པ་བྱ་བའི་རིམ་པ་ནི༔ ཆེ་བ་རྡོ་རྗེ་དཔལ་འབར་དབུས་སུ་ནི༔ ཐུགས་ཀར་ཟླ་སྟེང་པ་ཎི་ཡི་གེ་དཀར་པོ་ལས༔ ཨོཾ་ཐོག་ཀླུ་ཐོག་རྗེ་ས་མ་ཡ་ཛ་ཛ༔ གཡས་བསྐོར་བསྒོམ་ཞིང་གཡས་སུ་ནི༔ འབྲིང་བ་རྡོ་རྗེ་དབང་ཕྱུག་ཐུགས་ཀ་རུ༔ ན་ཡིག་དཀར་པོའི་སྔགས་འདི་གཡས་སུ་བསྐོར༔ ཨོཾ་ཐོག་གཉན་ཐོག་ཧེ་ས་མ་ཡ་ཛ༔ གཡོན་དུ་རྡོ་རྗེ་དཔལ་བརྩེགས་ཐུགས་ཀ་རུ༔ ཡི་གེ་དམར་སེར་ཐ་མར་སྔགས་ཀྱིས་བསྐོར༔ ཨོཾ་ཐོག་བཙན་ཐོག་ཧེ་ས་མ་ཡ་ཛ༔ རང་ཉིད་པདྨ་འབྱུང་ཐུགས་ཀ་ནས་འོད་ཟེར་འཕྲོས་པས༔ མཆེད་གསུམ་བཀའ་ཉན་གསུང་སྡོད་ཅིང་༔ ཅི་བཅོལ་ཐམས་ཅད་ཐོགས་མེད་དུ་བསྒྲུབ་པར་བསམ་ཞིང་༔ ཨོཾ་ཐོག་གཉན་
ཐོག་ཧེ༔ ཐོག་ཀླུ་ཐོག་རྗེ་ཐོག་བཙན་ཐོག་དཀར་ས་མ་ཡ་ཛ་ཛ༔ ཞེས་པའི་བསྙེན་པ་ཅི་ནུས་བཟླ༔ དེ་ནས་ལས་ཚོགས་ཕྲིན་ལས་བསྒྲུབ་འདོད་ན༔ རྩ་སྔགས་གསུམ་འབྲེལ་བའི་མཐར་ཤམ་བུ་འདི་ལྟར་བཟླ༔ ཚེ་རིང་བར་འདོད་ན༔་ཨ་ཡུསིདྡྷི་ཧཱུྃ༔ མཆེད་གསུམ་ཐུགས་ཀར་འོད་ཟེར་ཕྱོགས་བཅུར་འཕྲོས༔ འཇིག་རྟེན་ཁམས་ཀྱི་ཚེ་ཡི་དངོས་གྲུབ་དང་༔ རྩི་བཅུད་འབྱུང་བའི་ནུས་པ་ཡོན་ཏན་རྣམས༔ བསྡུས་ནས་བསྲུང་བྱར་ཐིམ་པར་བསམ༔ བཀྲ་ཤིས་བདེ་སྐྱིད་འདོད་ན༔ རྩ་སྔགས་ཤམ་དུ༔ མངྒ་ལཾ་སརྦ་སིདྡྷི་ཧཱུྃ༔ མཆེད་གསུམ་འོད་ཀྱིས་འཇིག་རྟེན་ཁམས་ཀྱི་བདེ་སྐྱིད་བཀྲ་ཤིས་རྣམས་བསྡུས་ནས་བདག་ལ་ཐིམ་པར་བསམ༔ སྙན་གྲགས་འདོད་ན་རྩ་སྔགས་ཤམ་དུ༔ ཀཱིརྟི་སརྦ་སིདྡྷི་ཧཱུྃ༔ ཇོ་བོ་འཁོར་དང་བཅས་པས་ཕྱོགས་བཅུ་ཡི༔ སྙན་གྲགས་ཐམས་ཅད་འབྲུག་ལྟར་སྒྲོག་པར་བསམ༔ བཙན་ཞིང་སྟོབས་ཆེ་བར་འདོད་ན༔ མ་ཧཱ་བྷ་ལ་སརྦ་སིདྡྷི་ཧཱུྃ༔ ཟོའཁོར་ལྷ་དམག་འབུམ་དང་བཅས་པའི་རྒྱབ་རྟེན་དཔུང་རོགས་མཛད་པར་བསམ༔ རྟ་ནོར་ལུག་སོགས་འཕེལ་ཞིང་རྒྱས་པར་འདོད་ན༔ བཱ་སུ་པུཊྚི་ཀུ་རུ་ཡེ་སྭཱ་ཧཱ༔ དེ་ནས་གཏོར་འབུལ་བྱེད་འདོད་ན༔ ཞི་བར་དཀར་གཏོར་བདུད་རྩིར་བྱིན་གྱིས་བརླབས༔ དྲག་པོ་བྱེད་ན་ཟུར་གསུམ་ཤ་གཙང་རྒྱན༔ དེ་ནས་བསྟོད་བསྐུལ་བྱའོ༔ ཧཱུྃ་ཧཱུྃ༔ སྔོན་ཚེ་སློབ་དཔོན་པདྨ་འབྱུང་གནས་ཀྱིས༔ ཁམས་ཀྱི་སེང་གེ་བྲག་གི་སྒྲུབ་གནས་
སུ༔ གུ་རུ་དྲག་པོ་རིགས་ལྔའི་སྐུ་སྤྲུལ་ནས༔ སྨོན་སྐྱེས་མཆེད་གསུམ་ལ་སོགས་ཁམས་ཕྱོགས་ཀྱི༔ ལྷ་འདྲེ་ཐམས་ཅད་དམ་ལ་བཏགས་པའི་ཚེ༔ དེ་ཚེ་ཁྱེད་ཅག་སྨོན་སྐྱེས་མཆེད་གསུམ་པོར༔ རྡོ་རྗེ་དབང་གྲགས་རྡོ་རྗེ་དབང་ཕྱུག་དང་༔ རྡོ་རྗེ་དཔལ་བརྩེགས་ཞེས་བྱར་གསང་མཚན་བཏགས༔་ངག་ཏུ་དམ་རྫས་བདུད་རྩི་ཐིགས་པ་བླུད༔ དམ་ཚིག་བསྲུང་བའི་དངོས་གྲུབ་ཐོབ་པར་བྱ༔ དམ་ལས་འདས་ན་ངག་ཏུ་བྱིན་གྱིས་བརླབས༔ སྤྱི་བོར་དབང་རྟགས་དམ་ཚིག་རྡོ་རྗེ་བཞག༔ དམ་ཚིག་བསྲུངས་ན་ཐར་པ་ཐོབ་ལུང་བསྟན༔ དམ་འདས་ལུས་སྲོག་འཚིག་པའི་དམོད་པ་བོར༔ དེ་ཚེ་བསྟན་པ་སྲུང་བའི་ཐ་ཚིག་ཕུལ༔ དམ་ལྡན་རྣལ་འབྱོར་སྐྱོང་བར་ཁས་ཀྱང་བླངས༔ སྔོན་གྱི་ཁས་བླངས་དམ་བཅའ་མ་བརྗེད་པར༔ དམ་རྫ་ས་བརྒྱན་པའི་གཏོར་མ་འདི་བཞེས་ལ༔ དམ་ལྡན་རྣལ་འབྱོར་བདག་ཅག་འཁོར་བཅས་ཀྱི༔ ནད་དང་གདོན་དང་དགྲ་ཡི་འཚེ་བ་ཟློག་ཚེ་དང་བསོད་ནམས་ཆོས་སྲིད་བསྟན་པ་སྤེལ༔ སྡང་ཞིང་གདུག་པའི་སེམས་འཆང་དགྲ་དང་བགེགས༔ གང་ན་འདུག་ཀྱང་ཐལ་བ་རྡུལ་དུ་རློགས༔ རྣལ་འབྱོར་བཅོལ་
བའི་ཕྲིན་ལས་འགྲུབ་པར་མཛོད༔ ཅེས་པ་ཙམ་མོ༔ རྒྱས་པར་སྤྲོ་ན༔ ཧཱུྃ༔ བསྟན་སྲུང་ཆེན་པོ་རྡོ་རྗེ་དབང་དྲག་ནི༔ སྟོན་ཟླའི་མདོག་ཅན་ཁྲོ་འཛུམ་འགྱིང་བག་ཅན༔ དབུ་ལ་དུང་རྨོག་དར་འཕྲུ་ཉི་ཟླས་བརྒྱན༔ སྐུ་ལ་བེར་དཀར་དུང་ཁྲབ་དགྲ་སྣ་བསྣམས༔ མུ་ཏིག་སྐད་བཅིངས་སྟག་རལ་གཟིག་ཤུབས་བཀྲ༔ ཕྱག་གཉིས་སྦ་ལྕག་མདུང་དར་དཀར་པོ་ཕྱར༔ རྫུ་འཕྲུལ་དུང་རྟ་རག་དཀར་གཡུ་རྔོག་ཆིབས༔ དཀར་པོའི་ཕྱོགས་སྐྱོང་བྱང་ཆུབ་སེམས་དང་ལྡན༔ གཡུ་འབྲུག་སྔོན་མོའི་སྟེང་ན་འཁྱུག་ཅིང་ངར༔ གཡས་ན་སེང་འགྱིང་གཡོན་ན་རྒྱ་སྟག་རྒྱུགས༔ གཡོན་ན་ཁྲ་ལྡིང་རྒྱབ་ན་ལྷ་གཡག་འདུར༔ ཕུ་ལ་ཀུ་འདེབས་སྐྱ་མི་འབུམ་དང་བཅས༔ མདའ་ན་གཡབ་མདོར་ཇག་ཆེན་སྟོང་དང་བཅས༔ ཕོ་ཉ་ལྷ་དམག་བྱེ་བ་འབུམ་དང་བཅས༔ འདིར་གཤེགས་དམ་རྫས་བརྒྱན་པའི་གཏོར་མ་བཞེས༔ བར་ཆད་ཀུན་སེལ་དངོས་གྲུབ་ཐམས་ཅད་སྩོལ༔ གདན་གྱི་རྐུང་ཕུད་དགྲ་ཡི་དམག་དཔུང་ཆོམ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ༔ བཀའ་སྲུང་མཐུ་ཆེན་རྡོ་རྗེ་དབང་ཕྱུག་ནི༔ སྐུ་མདོག་དཀར་དམར་གསེར་རྨོག་རྒོད་འཕྲུ་
ཅན༔ དར་བེར་སྟེང་དུ་གསེར་ཁྲབ་སུམ་བརྩེགས་གསོལ༔ གཡུ་ཡི་ཁྲབ་ཤམ་བྱི་རུའི་ཁྲབ་སྒྲོག་བཅིངས༔ ཕྱག་གཉིས་རལ་གྲི་དངུལ་མདུང་དར་དཀར་ཕྱར༔ སྟག་རལ་གཟིག་ཤུབས་བཏགས་ནས་རྫུ་འཕྲུལ་གྱིས༔ གྲོ་སྨུག་ངོ་སེར་ཆིབས་ནས་རླུང་ལྟར་མགྱོགས༔ སྟོང་གསུམ་དགྲ་ཡི་འཁོར་ཚོགས་བཅས་པ་དང་༔ གཉན་དམག་འབུམ་དང་ཕོ་ཉ་བྱེ་བ་བཅས༔ འདིར་གཤེགས་དམ་རྫས་བརྒྱན་པའི་གཏོར་མ་བཞེས༔ འཇིག་རྟེན་མི་རྣམས་ཀུན་ལ་མགོན་སྐྱབས་མཛོད༔ བར་ཆད་དགྲ་བགེགས་ཐམས་ཅད་རྡུལ་དུ་རློགས༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ༔ བཀའ་ཡི་སྲུང་མ་རྡོ་རྗེ་དཔལ་འབར་ནི༔ གསེར་མདོག་དབུ་ལ་ལྕགས་རྨོག་རྒོད་འཕྲོས་བརྒྱན༔ དར་སྔོན་བེར་སྟེང་མུ་ལེའི་ཆེམས་ཁྲབ་ལ༔ སྤུ་གྲིའི་ཤམ་བཏགས་དངུལ་གྱི་སྐེ་རགས་བཅིངས༔ ཕྱག་ན་རལ་གྲི་མདུང་དར་དཀར་པོ་ཕྱར༔ འཁོར་གསུམ་བསྐོར་ནས་རྐྱང་བུ་ཁ་དཀར་ཆིབས༔ བྱ་རྒོད་ལྡིང་ཞིང་གཡོན་ན་བྱ་ཁྲ་འཛུམས༔ གཡས་ན་སེང་གེ་འགྱིང་ཞིང་དགྲ་བླས་བསྐོར༔ ཀླུ་དམག་འབུམ་གྱི་འཁོར་དང་བཅས་པ་རྣམས༔ འདིར་
གཤེགས་དམ་རྫས་བརྒྱན་པའི་གཏོར་མ་བཞེས༔ མཐུན་རྐྱེན་ཀུན་སྒྲུབས་འགལ་རྐྱེན་བར་ཆད་སོལ༔ སྡང་དགྲ་གནོད་བྱེད་འདུལ་ལ་རྩལ་མ་ཞན༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ལྕམ་གཅིག་ལྷ་ལྕམ་གློག་མ་འཕྲུལ་ཞེས་མ༔ འདོད་དགུ་བསྒྱུར་བའི་གཟུགས་འཆང་འཕྲུལ་མོ་ཆེ༔ བཙུན་མོ་གཡུ་མཚོ་ཆེ་ཆུང་བདག་མོ་ནི༔ གཡུ་དང་བྱི་རུའི་བུད་མེད་རྒྱན་ཆ་ལ༔ ཆིབས་སུ་ཆུ་རྟ་དང་ནི་ཁྲུང་ཁྲུང་ཆིབས༔ ཕྱག་ན་མདའ་དར་དངུལ་དཀར་མེ་ལོང་འཛིན༔ མཚོ་སྨན་སུམ་བརྒྱ་དྲུག་ཅུ་བཅས་པ་རྣམས༔ འདིར་གཤེགས་དམ་རྫས་བརྒྱན་པའི་གཏོར་མ་བཞེས༔ རྨ་གཡང་དངོས་གྲུབ་ཆུ་བོའི་རྒྱུན་བཞིན་སྩོལ༔ ཀླུ་གཡང་མི་ལ་འབེབས་པའི་ཕྲིན་ལས་མཛོད༔ ཀྱཻ༔ ཇོ་བོའི་བཀའ་སྡོད་ཕྱོགས་བཞིའི་བཀའ་བློན་བཞི༔ དབྱི་རྒྱལ་རིན་ཆེན་སྤེ་ནེ་རི་བཀྲ་དང་༔ ཀ་རྒྱལ་མོ་ནོམ་ཇོ་བོ་རྐེད་རྒྱལ་བཞི༔ རེ་རེའི་འཁོར་ཡང་ཁྲི་ཕྲག་འབུམ་རེ་བཅས༔ འདིར་གཤེགས་དམ་རྫས་བརྒྱན་པའི་གཏོར་མ་བཞེས༔ ཁ་འཛིན་སྡོང་གྲོགས་དཔའ་ཡ་དཔུང་རོགས་མཛོད༔ ཕྱོགས་བཞིའི་དགྲ་བགེགས་འདུལ་བའི་ཕྲིན་ལས་མཛོད༔ གཞན་ཡང་ཇོ་བོའི་
བཀའ་ཉན་ཕོ་ཉའི་ཚོགས༔ ཀླུ་ཡི་རྒྱལ་པོ་དྲག་པོ་བདུད་འདུལ་ནི༔ གོ་རྟ་སྤོ་ལོ་ཅན་གྱི་བཙན་དམག་དང་༔་འཁྱིལ་པ་སྤུན་བདུན་ཧས་པ་རྟ་མགོ་དང་༔ ཆུ་ཁྲི་ཕག་སྟག་རི་རྒོད་བྲག་ནག་དང་༔ ནག་པོ་སོར་འཕྱང་ངང་འཛངས་འཕྱོར་མགོ་དང་༔ ར་ར་དུག་མཚོ་ལ་སོགས་འཁོར་གྱི་ཚོགས༔ ཀུན་ཀྱང་ལུས་ཀྱི་སྤྲུལ་པ་བསམ་མི་ཁྱབ༔ འདིར་གཤེགས་དམ་རྫས་བརྒྱན་པའི་གཏོར་མ་བཞེས༔ སྔོན་ཚེ་པདྨ་འབྱུང་གནས་བཀའ་བསྒོས་བཞིན༔ ཀུན་ཀྱང་རྣལ་འབྱོར་བདག་གི་སྡོང་གྲོགས་མཛོད༔ ཀུན་ཀྱང་རང་རང་དངོས་གྲུབ་གང་ཡིན་སྩོལ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཨོཾ་ཐོག་གཉན་ཐོག་ཧོ༔ ཐོག་ཀླུ་ཐོག་རྗེ་ཐོག་བཙན་ཐོག་དཀར་ས་པཱ་རི་ཝཱ་ར་གནོད་བྱེད་དགྲ་བགེགས་ཀྱི་སྙིང་ལ་མཱ་ར་ཡ་ཛ་ཛ༔ བ་ལིཾ་ཏ་ཁ་ཁ་ཁཱ་ཧི༔ ཞེས་བརྗོད་ལ་གཏོར་མ་གནས་ཕྱོགས་ལ་འབུལ༔ ཐག་རིང་འགྲོ་ན་ཕྱོགས་སུ་འབུལ་བཅོལ་དམ་གང་དགོས་དྲག་ཏུ་བྱ། བཀའ་སྲུང་སྒྲུབ་མཆོད་ལས་བྱང་འདི། ༧ རཱ་ག་ཨ་སྱས་མདུན་ལུང་ནང་དུ་སྦྱར། །འགལ་འཁྲུལ་མཆིས་ན་བཀའ་སྲུང་ཉིད་ལ་བཤགས། །དགེ་བས་ཡུལ་ཕྱོགས་རྒྱལ་ཁམས་ལ། །བཀྲ་ཤིས་བདེ་ལེགས་འཕེལ་རྒྱས་མཛོད།།