ངོམ་རྒྱལ་འཕྲིན་བཅོལ།
ཐུགས་དམ་ཞལ་གྱིས་བཞེས་པ་བཞིན་དུ། ད་ལྟ་རྣལ་འབྱོར་པ་བདག་ཅག་འཁོར་དང་བཅས་པ་ཐམས་ཅད་ལ། མཐོ་སར་ཉིན་གྱི་བྱ་ར་གྱིས་ཤིག །དམའ་སར་མཚན་གྱི་མེལ་ཚེ་གྱིས་ཤིག །འཇིགས་སར་ལམ་གྱིས་སྐྱེལ་མ་གྱིས་ཤིག །ཚོང་ལ་འགྲོ་ན་ཚོང་དཔོན་གྱིས་ཤིག །ཇག་ལ་འགྲོ་ན་ཇག་དཔོན་གྱིས་ཤིག །དམག་ལ་འགྲོ་ལ་དམག་དཔོན་གྱིས་ཤིག །རྒྱབ་ཀྱི་རྟེན་ས་གྱིས་ཤིག །མདུན་གྱི་འཁར་བ་གྱིས་ཤིག །ཕོ་ཉ་དང་མངའ་གཞུག་གྱིས་ཤིག །སྡང་བའི་དགྲ་སོད་ཅིག །གནོད་པའི་བགེགས་ཐུལ་ཅིག །ལོག་པར་ལྟ་བ་སྒྲོལ་ཅིག །བར་ཆད་བཟློག་ཅིག །རྣལ་འབྱོར་པ་མི་ནོར་འཁོར་དང་བཅས་པའི་སྲུང་མ་གྱིས་ཤིག །ཡུལ་མཁར་ཁྱིམ་དང་བཅས་པའི་བདག་པོ་གྱིས་ཤིག །ཁྱེད་འབྱོར་ལྡན་ནོར་གྱི་བདག་པོ་ཡིན་པས་ནོར་ཕྱུགས་པར་གྱིས་ཤིག །གནས་པ་ཚེ་ཡི་བདག་པོ་ཡིན་པས་ཚེ་རིང་བར་གྱིས་ཤིག །བཀྲ་ཤིས་རིགས་རྒྱུད་ཀྱི་བདག་པོ་ཡིན་པས་རིགས་རྒྱུད་ཆོས་བརྒྱུད་སྤེལ་ཅིག །དྲག་པོ་མཐུ་ཡི་བདག་པོ་ཡིན་པས་མཐུ་ཆེ་བར་གྱིས་ཤིག །རྟ་ལ་དར་ཐོག་ཅིག །ཁྲོམ་དུ་དུང་བུས་ཤིག །འགྱེལ་
ན་སློངས་ཤིག །བརྗོད་ན་བསྐུལ་ཅིག །དགྲ་བྱུང་ན་བྱ་ཐོངས་ཤིག །དུག་བྱུང་ན་རྩི་སྨན་ཐོངས་ཤིག །མཉམ་གཉིས་ཀྱི་རྒྱན་འགྱེད་ན་རྒྱན་གྱི་རྣོ་མགྱོགས་རེའོ། །རྒྱུན་ཁ་ཁྱོད་ཀྱིས་ཟུངས་ཤིག །མཉམ་གཉིས་ཀྱི་དཔལ་འདྲེན་ན་དཔའ་བའི་རུ་དར་རེའོ། །དཔའ་ཁ་ཁྱོད་ཀྱིས་བསྟོད་ཅིག །ནང་གི་དངོས་གྲུབ་ཕྱི་རུ་མ་བཏང་ཞིག །ཕྱི་ཡི་དགྲ་བགེགས་ནང་དུ་མ་བཏང་ཞིག །གཞན་ཡང་རྣལ་འབྱོར་པ་བདག་ཅག་འཁོར་དང་བཅས་པ་ལ་སྟེང་གི་མི་ལ་ན་ཚ་མ་བཏང་ཞིག །འོག་གི་ཕྱུགས་ལ་གོད་ཟག་མ་བཏང་ཞིག །ཁ་སྨྲས་དང་གླེང་བརྗོད་མ་བཏང་ཞིག །དེ་ལན་དང་དེ་ཉེས་མ་བཏང་ཞིག །མི་མང་སར་སྨ་མ་འབེབས་ཤིག །བྱ་མང་སར་སྤུ་མ་བཏོག་ཅིག །རང་བས་གཞན་པས་བརྙས་སུ་མ་བཅུག་ཅིག །བཀའ་དང་བསྟན་པ་སྲུངས་ཤིག །དགྱེས་པའི་ཞལ་སྟོན་ཅིག །སྒྲུབ་པའི་རྟགས་ཕྱུང་ཅིག །འདོད་པའི་དོན་སྒྲུབས་ཤིག །བཅོལ་བའི་ཕྲིན་ལས་མཛོད་ཅིག །འཁོར་དང་ལོངས་སྤྱོད་སྤེལ་ཅིག །སྙན་པ་དང་གྲགས་པ་སྒྲོགས་ཤིག །ལེགས་པ་ཆོས་ཤིག །ཉེས་པ་སྲུབ་ཅིག །བསམ་པ་སྒྲུབས་ཤིག །རེ་བ་སྐོངས་ཤིག །
བདག་ལ་གཡང་ཅན་གྱི་ནོར་སྐྱོལ་ཅིག །བརྗིད་ཅན་གྱི་གོས་བཀོན་ཅིག །བཅུད་ཅན་གྱི་ཟས་སྡུས་ཤིག །གཞུ་གང་ལས་དཔངས་མ་མཐོ་ཞིག །འབེན་གང་ལས་རྒྱང་མ་རིངས་ཤིག །བདག་གི་ལུས་དང་གྲིབ་མ་བཞིན་དུ་འགྲོགས་ཤིག །དེ་ལྟར་མཛད་ན་ཁྱེད་ལ་བརྔན་པ་དང་། གཏང་རག་གཉན་པོ་བཏང་ངོ་། །བདག་ཀྱང་ཅི་ནུས་ཀྱིས་ཁྱོད་མཆོད་དོ། །ཅི་རེ་ཁྱེད་ལ་རེའོ། །རྒྱལ་མཚན་བཞིན་ཁྱེད་ཕྱར་རོ། །རེ་བའི་དོན་སྒྲུབ་ལ་སུན་མ་ཕྱུངས་ཤིག །ཇི་ལྟར་མཆོད་ཅིང་ཐུགས་དམ་ཡང་བདག་གི་རེ་བའི་དོན་མ་བསྒྲུབས་ན་ངོམ་རྒྱལ་བསྟན་པ་ལ་དོན་མ་མཆིས་པས། སྙིང་ནས་སྙིང་གི་གྲོགས་སུ་སོམ་ལ་བཅོལ་བའི་ཕྲིན་ལས་ཡིད་བཞིན་དུ་སྒྲུབས་ཤིག །རྣལ་འབྱོར་པའི་སྐུ་ཚེ་སྲིངས་ཤིག །ཕྱི་ནང་གི་བར་ཆད་བཟློག་ཅིག །མཐུན་རྐྱེན་གྱི་ཕྲིན་ལས་ཡིད་བཞིན་དུ་འགྲུབ་པར་མཛོད་ཅིག །