བསྟན་སྲུང་ལྷ་ཡི་དགེ་བསྙེན་ཆེན་པོ་རྡོ་རྗེའི་མཚན་ཅན་གྱི་མཆོད་ཆོག་ཡིད་བཞིན་བསམ་འཕེལ།
བསྟན་སྲུང་ལྷ་ཡི་དགེ་བསྙེན་ཆེན་པོ་རྡོ་རྗེའི་མཚན་ཅན་གྱི་མཆོད་ཆོག་ཡིད་བཞིན་བསམ་འཕེལ་ཞེས་བྱ་བ་བཞུགས་སོ། །
མདུན་དུ་རིན་ཆེན་ལས་གྲུབ་ཁང་བཟང་དབུས། །བསྟན་པའི་སྲུང་མ་ངོམ་རྒྱལ་མཚོ་བཀྲ་ནི། །དཀར་གསལ་ཞལ་གཅིག་ཕྱག་གཉིས་བརྗིད་ཅིང་རྔམས། །ལྷ་ཡི་ན་བཟའ་དུང་རྨོག་ཤེལ་ཁྲབ་བཀླུབས། །གཡས་གཡོན་དར་དཀར་བ་དན་ནོར་བུ་བསྣམས། །སྟག་རལ་གཟིག་ཤུབས་ཐོག་ནས་དུང་རྟ་ཆིབས། །བཙུན་མོ་འབངས་འཁོར་དང་བཅས་གསལ་བ་ཡི། །ཐུགས་ཀའི་འོད་ཀྱིས་འཁོར་བཅས་སྤྱན་དྲངས་གྱུར། །ཧཱུྃ། བསྐལ་བཟང་རྒྱལ་བ་བཞི་པ་ཤཱཀ་ཐུབ་ཀྱི། །བསྟན་པ་རིན་ཆེན་བསྲུང་བར་དམ་བཅས་པའི། །ཆོས་སྐྱོང་ཆེན་པོ་རྡོ་རྗེའི་
མཚན་ཅན་ཁྱོད། །འཁོར་དང་བཅས་པ་གནས་འདིར་གཤེགས་སུ་གསོལ། །ཁྱེད་ཀྱི་བཞུགས་གནས་གཅིག་ཏུ་མ་ངེས་ཏེ། །འདོད་དགུ་འབྱུང་བ་བལ་བོད་གཉིས་ཀྱི་མཚམས། །གཙུག་ལག་ཆོས་ཀྱི་འབྱུང་གནས་དབུ་རུའི་མཐིལ། །རང་བཞིན་གར་བཞུགས་གནས་ནས་གཤེགས་སུ་གསོལ། །རྒྱུན་གྱི་བཞུགས་གནས་མདོ་ཁམས་ཡུལ་གྱི་དབུས། །ཤེལ་གྱིས་ལྷུན་པོ་སྤང་ལྗོངས་ལྗོན་པས་མཛེས། །ཆུ་འཛིན་རབ་འཁྲུགས་འབྲུག་སྒྲ་གློག་འོད་འཁྱུགས། །གཞལ་ཡས་ཁང་མཆོག་དབུས་ནས་གཤེགས་སུ་གསོལ། །ཡུམ་དང་དགྱེས་སྡེ་སྒོ་སྲུང་ཕྱི་ཡི་བདག །
གཡས་གཡོན་རུ་འདྲེན་ཕྱི་དང་ནང་གི་བློན། །བང་མཛོད་གཉེར་ཁ་བ་དང་སྒོ་སྐྱོང་ཆེ། །ལས་བྱེད་ཡོང་འཁོར་བཅས་པ་གཤེགིས་སུ་གསོལ། །ཧཱུྃ། རྟ་བདུན་ཟིལ་གྱིས་གནོན་པའི་གཟི་འོད་ཅན། །སྣ་ཚོགས་རིན་ཆེན་བརྩེགས་པའི་མི་དམན་ཁྲི། །དབང་པོའི་གཞུ་འདྲ་ཟ་འོག་གདལ་བའི་སྟེང་། །བཀའ་ཡི་སྲུང་མ་འཁོར་བཅས་གཤེགས་སུ་གསོལ། །ཛཿཧཱུྃ་བཾ་ཧོ༔གཉིས་སུ་མེད་པར་གྱུར། །ཧཱུྃ། ལྷ་དབང་ཀླུ་དབང་བཤོས་པ་འཕྲུལ་གྱི་སྲས། །འཇིག་རྟེན་སྐྱོང་བ་ཆེན་པོ་ཡུལ་གྱི་དཔལ། །མཐུ་ཆེན་རྩལ་གྲགས་དབང་ཕྱུག་ཆེར་ལྡན་པ། །མགོན་གྱུར་ལྷ་མཆོག་ཁྱོད་ལ་ཕྱག་འཚལ་བསྟོད། །ཧཱུྃ། །སྔོན་ཚེ་ཆེ་མཆོག་པདྨ་ཐོད་ཕྲེང་རྩལ། །བལ་བོད་མཚམས་སུ་སྲོག་གི་སྙིང་པོ་ཕུལ། །དེ་རྗེས་རང་བྱུང་རཏྭཱའི་སྤྱན་སྔ་རུ། །རང་གི་ཁས་བླངས་དམ་ཚིག་དྲན་མཛོད་ལ། །སངས་རྒྱས་བསྟན་པ་དར་ཞིང་རྒྱས་པ་དང་། །བདག་གིས་བཅོལ་བའི་ལས་རྣམས་འགྲུབ་པར་མཛོད། །ཧཱུྃ། སྲུང་མ་ལྷ་ཡི་དགེ་བསྙེན་འཁོར་བཅས་ལ། །རྩི་མར་འོ་མར་སྦྱར་བའི་མཆོད་ཡོན་དང་། །ཡན་ལག་བརྒྱད་དང་ལྡན་པའི་ཁྲུས་ཆབ་དང་། །རབ་
མཛེས་མེ་ཏོག་ཕུལ་བྱུང་དྲི་ལྡན་པ། །མུན་སེལ་སྒྲོན་མེ་ཙནྡན་སྦྱར་བའི་ཆབ། །བཅུད་ལྡན་ཞལ་ཟས་སྙན་པའི་རོལ་མོ་འབུལ། །ཁྱུ་མཆོག་ར་སྐྱེས་ལུག་གཡག་མཛེས་པའི་གཟུགས། །རྔ་དུང་ཆ་ལང་དྲིལ་བུ་སྙན་པའི་དབྱངས། །དྲི་བསུང་ངད་ལྡན་བཟང་ཤིང་སྣ་ཚོགས་སྤོས། །དཀར་མངར་ཤ་ཐུད་ཇ་ཆང་རོ་ལྡན་ཟས། །རྣམ་བཀྲའི་དར་ཟབ་བཀྲ་ཤིས་རྫས་རྟགས་བརྒྱད། །རྒྱལ་སྲིད་རིན་པོ་ཆེ་ཡང་ཁྱེད་ལ་འབུལ། །འཁོར་དང་བཅས་པ་མཉེས་ཤིང་ཚིམ་གྱུར་ཅིག །ཧཱུྃ་ལས་དངུལ་གྱི་སྣོད་མཆོག་རྒྱ་ཆེ་བར། །ཨོཾ་ཨཱཿཧཱུྃ་གིས་འབྲུ་གསུམ་ཞུ་བ་ལས། །གཏོར་མ་ལྷ་ཡི་བདུད་རྩི་ཤེལ་གྱི་མདོག །སྦྲང་རྩིའི་རོ་ལྡན་ཟག་མེད་བདེ་སྐྱིད་འདི། །ངོམ་རྒྱལ་མཚོ་བཀྲ་ཁྱེད་ལ་འབུལ་གྱིས་བཞེས་། །ཡུམ་ཆེན་གཉིས་དང་དེ་བཞིན་མཆེད་ཡུམ་ཟུང་། །ཁ་ལོས་སྒྱུར་བ་གཉིས་དང་རུ་འདྲེན་གཉིས། །མཛོད་སྲུང་སྒོ་སྐྱོང་ལས་མཁན་ལ་སོགས་པ། །འཁོར་དང་བཅས་ལ་འབུལ་གྱིས་བཞེས་ནས་ཀྱང་། །སྐུ་གསུང་ཐུགས་རྣམས་མཉེས་ཤིང་ཚིམ་གྱུར་ཅིག །ཨ་ཀཱ་རོ༔ ཨོཾ་དེ་ཝ་ཙིཏྟ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཧཱུྃ། རྒྱལ་
བའི་བསྟན་སྐྱོང་ཡུལ་གྱི་མགོན་བྱེད་པ། །སྟོན་ཟླའི་མདོག་ཅན་ཁྲོ་འཛུམ་བརྗིད་པའི་ཞལ། །དབུ་ལ་ཕོད་དཀར་ལྡེམ་པའི་དུང་རྨོག་དང་། །སྐུ་ལ་སྣ་ཚོགས་དར་གྱི་ན་བཟའ་སྟེ། །གངས་རི་བྱེ་བའི་གཟི་ཅན་ཤེལ་གྱི་ཁྲབ། །སྟག་རལ་གཟིག་ཤུབས་མཆོག་དཀར་གཞུ་མོ་བཀྲ། །ཕྱག་གཡས་དར་དཀར་རུ་མཚོན་ནམ་མཁར་བསྒྲེངས། །གཡོན་པས་རིན་ཆེན་དགོས་འདོད་ཆར་དུ་འབེབས། །རླུང་ལྟར་མགྱོགས་པའི་དུང་རྟ་གཡུ་རྔོག་ཆིབས། །བསྟན་སྲུང་དམ་ཚིག་ཅན་ལ་བདག་བསྟོད་དོ། །ཁྱེད་ཀྱི་དགྱེས་སྐྱེད་མཚར་སྡུག་ཡུམ་ཆེན་གཉིས། །དར་ཟབ་རིན་ཆེན་དུ་མའི་རྣམ་པར་བརྒྱན། །བདུད་རྩི་འདོད་ཡོན་མདའ་དར་མེ་ལོང་དང་། །སྨན་ཤ་རྐྱང་བུ་ཆིབས་མཛད་གཉིས་ལ་བསྟོད། །དགོན་གནས་སྲུང་མཛད་ཁྲོ་འཛུམ་སྟག་ལྤགས་གསོལ། །སྣང་སྲིད་གསལ་མཛད་ལི་ཕྱིན་རྒོད་ཞུས་བརྒྱན། །ཁ་ལོས་སྒྱུར་བ་གསེར་གཡུའི་གོ་ཁྲབ་ཅན། །མཆོད་གནས་བློན་པོར་བཅས་ལ་བདག་བསྟོད་དོ། །གཡས་ནས་གནམ་ལྕགས་འབེབས་བྱེད་བྲ་ནག་ཆིབས། །གཡོན་ནས་རུ་འདྲེན་དགུ་ནི་མཚལ་བུ་ཞོན། །ཀུན་ཀྱང་བསེ་ཁྲབ་རྨོག་ཞུ་དམག་ཆས་
རྫོགས། །གདུག་པ་འདུལ་མཛད་རྣམས་ལ་བདག་བསྟོད་དོ། །དཀོར་མཛོད་སྐྱོངས་བ་དུང་མདོག་ཅང་ཤེས་ཆིབས། །སྒོ་སྲུང་ཀླུ་ཆེན་སྔོན་པོ་གཡུ་རྔོག་ཞོན། །གདུག་པའི་ལས་མཁན་ནག་པོ་རྟ་ནག་ཅན། །ཡང་འཁོར་སྤྲུལ་པར་བཅས་ལ་བདག་བསྟོད་དོ། །ཁྱེད་ཅག་འཁོར་བཅས་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་དང་བཅས་པ་ཡི། །ནད་གདོན་དགྲ་དང་དུས་མིན་འཆི་བའི་རྐྱེན། །ཐམས་ཅད་ཞི་ཞིང་མེད་པར་མཛད་དུ་གསོལ། །ཚེ་དང་བསོད་ནམས་ལོངས་སྤྱོད་སྙན་དང་གྲགས། །ཡར་ངོའི་ཟླ་བཞིན་འཕེལ་བའི་ཕྲིན་ལས་མཛོད། །རྒྱལ་བློན་ཡུལ་ཁམས་མངའ་རིས་འདོད་དགུའི་ཚོགས། །མ་ཐོགས་མྱུར་དུ་དབང་དུ་འདུ་བར་མཛོད། །བདག་ལ་གནོད་ཅིང་འཚེ་བའི་དགྲ་དང་བགེགས། །ད་ལྟ་ཉིད་དུ་ཐལ་བ་རྡུལ་དུ་རློགས། །སྔོན་གྱི་དམ་ཚིག་གཉེན་ལས་མ་འདའ་བར། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཨ་ཀཱ་རོ༔ ཧཱུྃ། དམ་རྫས་རྨད་དུ་བྱུང་བའི་གཏོར་མ་དང་། །བདུད་རྩི་སྨན་དང་སྣ་ཚོགས་ཟས་ཀྱི་ཕུད། །རིན་ཆེན་འབྲུ་སྨན་དར་ཟབ་སྣ་ཚོགས་ཀྱིས། །སྲུང་མ་ངོམ་རྒྱལ་
མཚོ་བཀྲ་གསོལ་ཞིང་མཆོད། །སྐབས་གསུམ་དབང་པོའི་གཞུ་མོ་ཟིལ་གནོན་པའི། །མཛེས་པའི་སྐུ་ལ་སྣ་ཚོགས་རྒྱན་གྱིས་སྤྱས། །དྲི་ཟའི་དབྱངས་ལྡན་སྙན་པའི་གླུ་སྒྲ་ཅན་། །དགྱེས་བསྐྱེད་ཡུམ་ཆེན་གཉིས་ལ་གསོལ་ཞིང་མཆོད། །ལྷ་མིན་བདག་པོའི་དཔུང་ཡང་ཕམ་བྱེད་པའི། །སྲ་བའི་གོ་དང་རྣོ་བའི་མཚོན་ཆ་འཆང་། །རླུང་བས་མགྱོགས་པ་འཕྲུལ་གྱི་བཞོན་པ་ཅན། །གཡས་གཡོན་རུ་འདྲེན་གཉིས་ལ་གསོལ་ཞིང་མཆོད། །རིན་ཆེན་གསེར་གཡུའི་གོ་ཆེས་རབ་སྨྲས་ཤིང་། །རྫུ་འཕྲུལ་རྟ་ཡི་སྟེང་ན་བརྗིད་པའི་སྐུ། །འདོད་པའི་དོན་ཀུན་ཡིད་བཞིན་སྒྲུབ་བྱེད་པ། །ཕྱི་ནང་བློན་པོ་གཉིས་ལ་གསོལ་ཞིང་མཆོད། །གཙུག་ལག་དཀོར་ནོར་སྲུང་ཞིང་རྒྱས་པ་དང་། །བསྟན་དགྲའི་ལྷ་དང་སྲུང་མ་ཕམ་བྱེད་ཅིང་། །སྣང་སྲིད་མ་ལུས་གསལ་བར་སྟོན་མཛད་པའི། །མཆོད་གནས་ཚུལ་བཟུང་གཉིས་ལ་གསོལ་ཞིང་མཆོད། །རྣམ་ཐོས་བུ་ཡི་དཔལ་འབྱོར་ཇི་བཞིན་དུ་། །དར་ཟབ་གསེར་དངུལ་རིན་ཆེན་སྣ་ཚོགས་དབྱིག །མི་བཟད་ནམ་མཁའི་མཛོད་ལྟར་སྤེལ་མཛད་པ། །རིན་ཆེན་མཆོག་འཆང་ཁྱོད་ལ་གསོལ་ཞིང་མཆོད། །བང་མཛོད་
འབྲུ་ཡི་དངོས་གྲུབ་སྤེལ་མཛད་ཅིང་། །གནོད་པའི་དགྲ་བགེགས་མ་ལུས་འཆིང་མཛད་པ། །དྲག་ཤུལ་རྫུ་འཕྲུལ་ཐོག་མེད་མཐུ་སྟོབས་ཅན། །སྒོ་བ་ལས་་མཁན་གཉིས་ལ་གསོལ་ཞིང་མཆོད། །སྔར་བྱས་གཏང་རག་ཕྱི་བྱེད་ཞུ་སྐྱེམས་འབུལ། །ད་ལྟ་ལས་ཀྱི་གཉེར་ཟས་ཆེན་པོ་འདི། །འཁོར་དང་བཅས་པ་དགྱེས་པར་བཞུགས་སུ་གསོལ། །དེ་ལྟར་ཁྱོད་ལ་གསོལ་མཆོད་བྱས་པའི་མཐུས། །ནད་གདོན་དགྲ་སོགས་འཇིགས་པ་ཞི་བ་དང་། །ཚེ་དང་བསོད་ནམས་ཡར་ངོའི་ཟླ་བཞིན་རྒྱས། །རྒྱལ་བློན་ཡུལ་༡། ཁམས་སྣང་བ་དབང་སྡུད་ཅིང་། །གནོད་པའི་དགྲ་བགེགས་རྡུལ་དུ་བརླག་པ་སོགས། །བདག་གིས་བསམ་པའི་འདོད་དོན་མ་ལུས་པ། །འབད་མེད་ལྷུན་གྱིས་འགྲུབ་པའི་ཕྲིན་ལས་མཛོད། །བསྐང་བ་ནི། ཧཱུྃ། པདྨ་ཐོད་ཕྲེང་བཀའ་ཡི་ཕོ་ཉ་བ། །སངས་རྒྱས་བསྟན་པ་སྲུང་བྱེད་དམ་ཚིག་ཅན། །ངོམ་རྒྱལ་མཚོ་བཀྲ་འཁོར་དང་བཅས་པ་ཡི། །ཐུགས་དམ་གཉེན་པོ་རྣལ་འབྱོར་བདག་གིས་བསྐང་། །རབ་མཛེས་སྤུ་གཞོལ་མཛེས་པའི་གཡག་ལུག་དང་། །མདའ་མོ་རྒོད་སྒོ་དར་སྣའི་ཅོད་པན་འཆང་། །སྣ་ཚོགས་གོ་མཚོན་
དར་མདུང་སྐུ་གཟུགས་སོགས། །མི་འབྲལ་རྟེན་པའི་རྫས་ཀྱིས་ཐུགས་དམ་བསྐང་། །རིན་ཆེན་སྣ་ཚོགས་སྟག་རས་གཟིག་རིས་དང། །དཀར་གསུམ་མངར་གསུམ་འབྲུ་སྣ་ཞུན་མར་དང་། །བདུད་རྩི་བྷ་ལིང་ཛ་གད་སྐྱེམས་ཕུད་སོགས། །མཆོད་ཅིང་བསྒྲུབ་པའི་རྫས་ཀྱིས་ཐུགས་དམ་བསྐང་། །ཉེར་སྤྱོད་བདུན་དང་འདོད་པའི་ཡོན་ཏན་ལྔ། །བཀྲ་ཤིས་རྫས་རྟོགས་བརྒྱད་དང་རིན་ཆེན་བདུན། །འདབ་ཆགས་རི་དྭགས་གཡུང་དྭགས་ཆུ་གནས་ཚོགས། །མཐུན་རྫས་རྣམ་པ་དུ་མས་ཐུགས་དམ་བསྐང་། །བདག་ཅག་འཁོར་བཅས་བག་མེད་དབང་གྱུར་ཅིང་། །མངོན་ཤེས་མི་ལྡན་སྐྱོན་ཡོན་མ་ཕྱེད་པས། །ཁྱེད་ཅག་འཁོར་བཅས་ཐུགས་དང་ཅི་འགལ་བ། །བཟོད་པར་གསོལ་ལོ་དངོས་གྲུབ་བསྩལ་དུ་གསོལ། །དེ་ལྟར་ཁྱེད་ཅག་ཐུགས་དམ་བསྐངས་གྱུར་ནས། །བདག་ཅག་འཁོར་དང་བཅས་ལ་གནོད་པ་ཡི། །ཡམས་ནད་རིམས་ནད་དུས་མིན་འཆི་བ་དང་། །བར་ཆད་བགེགས་ཀྱི་གནོད་པ་བཟློག་ཏུ་གསོལ། །དགྲ་ཇག་ཆོམ་རྐུན་རྒྱལ་པོའི་འཇིགས་པ་དང་། །སད་སེར་མུ་གེ་ལོ་ནད་གོད་ཁ་དང་། །མི་ཁ་སྟབས་བསྣོལ་ཁ་སྨྲས་གླེང་གཞི་སོགས། །ལྟས་
ངན་ཕུང་ཐལ་སྣ་ཚོགས་བཟློག་ཏུ་གསོལ། །མདོར་ན་བླ་མེད་བྱང་ཆུབ་སྒྲུབ་པ་ལ། །ལམ་ལ་བར་དུ་གཅོད་པའི་མི་མཐུན་ཕྱོགས། །གཟུགས་ཅན་དགྲ་དང་གཟུགས་མེད་བགེགས་རྣམས་ཀྱི། །བསམ་སྦྱོར་ངན་པ་ཟློག་པའི་ཕྲིན་ལས་མཛོད། །ཅེས་པ་འདི་ནི་བསྐང་བའོ། །དེ་ནས་བསྐུལ་པ་ནི། ཧཱུྃ། ངོམ་རྒྱལ་མཚོ་བཀྲ་མཐུ་བོ་ཆེ། །སྐུ་མདོག་གངས་རི་སྤུངས་པ་འདྲ། །སྐུ་ལ་ཤེལ་ཁྲབ་འོད་འབར་གསོལ། །ཕྱག་ན་བ་དན་དཀར་པོ་བསྣམས། །ལྷ་དམག་འབུམ་གྱི་འཁོར་དང་བཅས། །འདིར་གཤེགས་བརྒྱན་པའི་གཏོར་མ་བཞེས། །བཅོལ་བའི་ཕྲིན་ལས་འགྲུབ་པར་མཛོད། །ཁྲོས་པའི་ཚུལ་དུ་བཞེངས་པའི་ཚེ། །གཤིན་རྗེའི་རྒྱལ་པོ་འཇིགས་པའི་གཟུགས། །སྟག་ལྤགས་ཁྲ་བོ་སྐུ་ལ་གསོལ། །གློག་དམར་འཁྱུགས་ཤིང་འབྲུག་སྒྲ་འདིར། །གནམ་ལྕགས་ཐོག་གི་ཚྭ་ཚྭ་འཕྲོ། །གཉན་རིགས་འབུམ་གྱི་འཁོར་དང་བཅས། །འདིར་གཤེགས་བརྒྱན་པའི་གཏོར་མ་བཞེས། །བཅོལ་བའི་ཕྲིན་ལས་འགྲུབ་པར་མཛོད། །ཁྱེད་ཀྱི་འཁོར་ཚོགས་མི་བསྲུན་པ། །མ་མོ་བདུད་བཙན་ལྷ་དང་ཀླུ། །གནོད་སྦྱིན་གཉན་དང་དྲི་ཟའི་
ཚོགས། །ཡང་འཁོར་བྱེ་བ་འབུམ་དང་བཅས། །རྫུ་འཕྲུལ་འདོད་དགུར་བསྒྱུར་བའི་གཟུགས། །གློག་ལྟར་འཁྱུག་ཅིང་རླུང་ལྟར་འཚུབ། །འདིར་གཤེགས་བརྒྱན་པའི་གཏོར་མ་བཞེས། །བཅོལ་བའི་ཕྲིན་ལས་འགྲུབ་པར་མཛོད། །དེ་ཡང་རྣམ་སྲས་རྟ་སྔོན་ཅན་གྱི་དཀྱིལ་འཁོར་གྱི་ལྷོ་ནུབ་ཀྱི་གྲར་བཞུགས་པའི་གནོད་སྦྱིན་རྣ་བོ་ཆེ། ནོར་རྩེའི་འཁོར་ལྷོ་ཕྱོགས་ཀྱི་ཤན་པ་གྲི་ཐོགས། གནོད་སྦྱིན་ཤན་པ་དམར་ནག་གི་འཁོར་ལྷ་ཚོགས། གཤིན་རྗེ་གཟིག་མགོ་ཅན། དམ་ཅན་གྱི་འཁོར་དཀར་པོ་ལྷའི་དགེ་བསྙེན་བརྒྱ་དང་ཉི་ཤུའི་ནང་ནས་གཅིག །བལ་བོད་མཚམས་ཀྱི་དགེ་བསྙེན་རྡོ་རྗེའི་མཚན་ཅན། བོད་དབུ་རུ་ལྷ་སའི་ཕྱོགས་སུ་རྡོ་རྗེའི་དཔལ་བརྟེན། མདོ་ཁམས་ཕྱོགས་སུ་ངོམ་རྒྱལ་མཚོ་བཀྲ་ཞེས་སུ་བྱ་སྟེ། ཨོ་རྒྱན་རིན་པོ་ཆེའི་བཀའི་བསྟན་སྲུང་ལྷ་ཡི་དགེ་བསྙེན་ཆེན་པོའི་མཆོད་ཆོག་སློབ་དཔོན་པདྨས་མཛད་པའི་བསང་ཡིག་དང་རྨིས་ལྟས་ཀྱི་མཚན་མ་མང་དུ་བྱུང་བ་ལ་བརྟེན་ནས། ཀརྨ་ཨ་རཱ་གས་སྦྱར་བའོ།། །། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།