དགེ་བསྙེན་རྟ་འདྲའི་གསོལ་མཆོད་ཚན་གསུམ།
ན་མོ་གུ་རུ་པདྨ་ཀ་ར་ཡེ༔ དགེ་བསྙེན་རྟ་འདྲའི་གསོལ་མཆོད་ནི༔ རང་ཉིད་པདྨ་འབྱུང་གནས་བསྒོམ༔ ཐུགས་ཀའི་འོད་ཟེར་འཕྲོས་པ་ཡིས༔ ཡུལ་ལྷ་སྤྱན་དྲངས་མདུན་བཞུགས་པས༔ ཅི་བཅོལ་ལས་རྣམས་བསྒྲུབ་པར་དམིགས༔ ཨ་ཀཱ་རོ་ཡིས་བྱིན་གྱིས་བརླབས༔ ཧཱུྃ༔ ཐུགས་རྗེ་ཆེན་པོའི་ཞིང་ཁམས་མཆོག༔ གདོང་དམར་ཡུལ་གྱི་དཀྱིལ་སྨད་ན༔ ངོམ་དུ་རུང་བའི་ཡུལ་གྱི་རྩེ༔ གསེར་ལྡན་ཆུ་བོ་འབབ་པའི་དྲུང་༔ རིན་ཆེན་ཤེལ་གྱི་རི་བོ་ནི༔ རྟ་མཆོག་རིན་ཆེན་འདྲ་བ་ལ༔ ལྗོན་ཤིང་སྤང་ལྗོངས་མེ་ཏོག་བརྒྱན༔ དེ་འདྲ་གནས་ཀྱི་མངའ་བདག་ནི༔ དགེ་བསྙེན་རྟ་འདྲ་ཞེས་བྱ་བ༔ མི་ནི་དཀར་པོ་མཛེས་པའི་ཞལ༔ ཞྭ་དཀར་ཕྲུག་དཀར་རས་གུ་གསོལ༔་སྟག་རལ་གཟིག་ཤུབས་སྐྱེད་ལ་བསྐོར༔ ཅང་ཤེས་རྟ་མཆོག་དམར་པོ་ཆིབས༔ རྒོད་མ་དམར་མོ་རོལ་དུ་ཁྲིད༔ རྟེའུ་ཆུང་ལྗང་གུ་ཕྱི་ན་འབྲངས༔ ཁྲབ་ཆེན་རྐྱ་རྐང་འདྲེས་མའི་ཚོགས༔ ཉི་ཤུ་ཙམ་གྱི་འཁོར་གྱིས་བསྐོར༔ འདིར་གཤེགས་བསངས་དང་མཆོད་པ་བཞེས༔ བདག་ཅག་དཔོན་སློབ་འཁོར་བཅས་ལ༔ ན་ཚ་གོད་ཁ་མ་བཏང་ཞིག༔ ལོ་ཕྱུགས་རྐང་འགྲོས་འཕེལ་བར་མཛོད༔ གཞི་
བྱེས་ལམ་གསུམ་གར་འགྲོ་ཡང་༔ སྐྱེལ་བསུ་སྡོང་གྲོགས་མེལ་ཚེ་མཛོད༔ བསམ་པ་ཡིད་བཞིན་འགྲུབ་པ་སོགས་ཇི་ལྟར་འདོད་པའི་དོན་རྣམས་ཀུན༔ མ་ཐོགས་མྱུར་དུ་འགྲུབ་པར་མཛོད༔ མཐུ་རྩལ་ཅི་གདའ་ད་ལྟའོ༔ བཅོལ་བའི་ཕྲིན་ལས་འགྲུབ་པར་མཛོད༔ ཨོཾ་ཤ་ཤ་ན་ཤ་སྭཱ་ཧཱ༔ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ཞེས་བརྗོད་གཏོར་མ་བསྔོ་བར་བྱ༔ ཞེས་པ་འདི་སྤྲུལ་སྐུ་མི་འགྱུར་རྡོ་རྗེས་དགུང་ལོ་བཅུ་གཉིས་ལ་ཐུགས་རྗེ་ཆེན་པོ་དཔལ་རྣོ་བཀྲའི་དཀྱིལ་འཁོར་ཞལ་ཕྱེས་དུས་ལྷ་སྲིན་དང་གཞི་བདག་མང་པོའི་རང་གཟུགས་དངོས་སུ་བསྟན་ནས་སྲོག་སྙིང་ཕུལ་ནས༔ སངས་རྒྱས་ཀྱི་བསྟན་པ་སྲུང་བར་ཁས་བླངས་སོ། །དེ་ལྟར་སྲོག་སྙིང་ཕུལ་བ་དེ་ནི། ཨོཾ་ཤ་ཤ་ན་ཤ་སྭ་ཧྭ༔ འདི་ཡིན་ལ། སྤྲུལ་སྐུའི་གཟིགས་པ་དང་བསྟུན་ནས་འདོན་བྱ་བསྡུས་པ་འདི། བདག་ཨ་རཱ་གས་སྦྱར་བ་མངྒ་ལཾ། སྔགས་འཆང་ཨོ་རྒྱན་སོགས་ལ་ཕན་ཕྱིར་རོ།། །།
ཀྱཻ། རྫ་རི་དཀར་པོ་དུང་རྟ་འདྲ། །དེ་ལ་མཆོང་གི་རྟ་གཟུགས་བཀྲ། །དེ་ལ་གནས་པའི་ཟོ་དོར་ནི། །རྟ་འདྲ་གཉན་པོ་ཞེས་སུ་གྲགས། །དུང་གི་མི་ཕོ་དཀར་པོ་ལ། །དབུ་ལ་ཞྭ་དཀར་མཛེས་པར་གསོལ། །སྐུ་ལ་ཕྲུག་དཀར་ན་བཟའ་ཅན། །སྟག་རལ་གཡས་ལ་གཟིག་ཤུབས་གཡོན། །ཆིབས་སུ་བཙན་རྟ་དམར་པོ་ཆིབས། །རྒོད་མ་དམར་མོ་རོལ་དུ་ཁྲིད། །རྟེའུ་ཆུང་ལྗང་གུ་ཕྱི་ན་འབྲངས། །འཁོར་ནི་སྐྱ་མི་རྐང་ཐང་སོགས། །ཁྲབ་ཆེན་ཉི་ཤུ་ཙམ་གྱིས་བསྐོར། །འཁོར་དང་བཅས་པ་མ་ལུས་ལ། ། འབྲུ་སྣ་ཕྱེ་མར་ཕུད་ཀྱིས་མཆོད། །བཟང་ཤིང་སྣ་ཚོགས་དུད་པས་བསང་། །ཁ་འཛིན་སྡོང་གྲོགས་མེལ་ཚེ་མཛོད། །ཨ་རཱ་གས་འཕྲལ་དུ་བྲིས་སོ།། །།རྟ་འདྲ་ནི། ཧཱུྃ། ས་འཛིན་དུང་མདོག་ཅང་ཤེས་དབྱིབས་ཅན་ནས། །རྟ་འདྲ་ཞེས་གྲགས་དགེ་བསྙེན་མཐུ་རྩལ་ཅན། །མི་དཀར་ཆས་བཟང་འཁོར་གསུམ་ཞྭ་དཀར་།ཆིབས་སུ་ཅང་ཤེས་རྟ་མཆོག་དམར་པོ་ཆིབས། །རྒོད་མ་དམར་མོ་རྟེའུ་ལྗང་འབྲང་བ་ཁྲིད། །ཁྲབ་ཅན་སྐྱ་རྐང་འདྲེས་པ་ཉི་ཤུའི་བསྐོར། །འཁོར་བཅས་འདིར་
གཤེགས་ཡིད་སྤྲུལ་གདན་ལ་བཞུགས། །དཀར་གསུམ་དམ་རྫས་བརྒྱན་པའི་གཏོར་མ་བཞེས། །པདྨ་ཐོད་ཕྲེང་རིག་འཛིན་སྤྱན་སྔར་རུ། །ཞལ་བཞེས་བཞིན་དུ་རྣལ་འབྱོར་བདག་ཅག་གི །ཇི་ལྟར་འདོད་པའི་དོན་རྣམས་མ་ལུས་པ། །མྱུར་དུ་འགྲུབ་པའི་ཕྲིན་ལས་མ་གཡེལ་ཅིག །ཨོཾ་ཤ་ཤ་ན་ཤ་སྭཱ་ཧཱ། ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཀརྨ་ཨ་རཱ་གས་སོ།། །།