སྨོན་སྐྱེས་མཆེད་གསུམ་བསྐང་གསོལ།
ན་མོ་པྲ་ཝ་ཀཱ་ར་ཡེ། ཨོ་རྒྱན་རྗེ་ལ་ཕྱག་འཚལ་ནས། །སྨོན་སྐྱེས་མཆེད་གསུམ་བསྐང་གསོལ་བྲི། །བཀའ་གསང་སྩོལ་ལ་བར་ཆད་སོལ། །གཞུང་ལྟར་མཆོད་གཏོར་བཤམས་བྱས་ལ། །ལས་གཞུང་མཚམས་སུ་འདི་སྐད་དོ། །ཨོཾ་ཨ་མྲྀ་ཏེ་ཧཱུྃ་ཕཊ། ཨོཾ་སྭ་བྷ༴ སྟོང་པ་ཉིད་དུ་གྱུར། སྟོང་པའི་ངང་ལས་ཧཱུྃ་ཡིག་ལས་བྱུང་བའི་རིན་པོ་ཆེའི་སྣོད་དུ། ཨོཾ་ལས་བྱུང་བའི་གཏོར་མ་དཀར་གསུམ་མངར་གསུམ་ཤ་སྣ་སྨན་སྣ་ཕྱེ་མར་དྲི་བཟང་གཡག་ལུག་ར་གསུམ་ལ་སོགས་མཆོད་རྫས་བསྐང་རྫས་ཁ་དོག་དྲི་རོ་ནུས་པ་ཕུན་སུམ་ཚོགས་པ་འདོད་པའི་ཡོན་ཏན་ལྔ་དང་ལྡན་པར་གྱུར། ཨོཾ་ཨཱཿཧཱུྃ་ཧ་ཧོ་ཧི༔ ཨོཾ་ཨ་ཀཱ་རོ་མུ་ཨོ་ཐོག་གཉན་ཐོག་ཧེ་ཐོག་ལུ་ཐོག་རྗེ་ཐོག་བཙན་ཐོག་དཀར་ས་པཱ་རི་ཝཱ་ར་ཨི་དཾ་བ་ལིང་ཏ་གྷི་སྙན་ས་མ་ཡ་རཀྵནྟ་མ་མ་སརྦ་སིདྡྷི་མྨེ་པྲ་ཡཉྩ་སརྦ་ཀརྨ་ཨ་མོ་ག་སྭཱ་ཧཱ། ལན་གསུམ། ཧཱུྃ། སློབ་དཔོན་པདྨ་འབྱུང་གནས་ཀྱི། །བཀའ་ཉན་བསྟན་སྲུང་མཐུ་བོ་ཆེ། །སྨོན་སྐྱེས་རྡོ་རྗེ་དབང་གྲགས་ནི། །སྐུ་མདོག་གངས་ལ་ཉི་ཤར་འདྲ། །ལི་ཕྲན་སྨུག་པོའི་ལ་ཐོད་བཅིངས། །ཤེལ་དཀར་མེ་ཏོག་ཚོམ་བུས་བརྒྱན། །དར་དཀར་བེར་ཆེན་སྐུ་ལ་གསོལ། །ཕྱག་གཡས་ཉི་ཟླའི་
སྒྲོན་མེ་ཐོགས། །གཡོན་པས་དངུལ་མདུང་དར་དཀར་གསོལ། །རིག་དཀར་གཡུ་རྔོག་ཆིབས་སུ་བཅིབས། །ཀླད་ན་དུང་གི་བྱ་རྒོད་ལྡིང་། །དུང་སེང་དཀར་པོ་གཡས་ན་འགྱིངས་། །གཡོན་ན་དུང་གི་བྱ་ཁྲ་འཇུམས། །ལྷ་དམག་འབུམ་གྱི་འཁོར་དང་བཅས། །གསོལ་ལོ་མཆོད་དོ་ཐུགས་དམ་བསྐང་། །སྨོན་སྐྱེས་རྡོ་རྗེ་དབང་ཕྱུག་ནི། །སྐུ་མདོག་དཀར་གསལ་མཛེས་པ་ལ། །དར་དཀར་ལ་ཐོད་དབུ་ལ་བཅིངས། །རིན་ཆེན་མུ་མེན་ཚོམ་བུས་བརྒྱན། །སྐུ་ལ་དུང་བེར་དཀར་པོ་གསོལ། །ཕྱག་གཡས་སྦ་ལྕག་དཀར་པོ་དང་། །གཡོན་པས་དངུལ་མདུང་དར་དཀར་ཕྱིར། །རྫུ་འཕྲུལ་གྲོ་སྨུག་གདོང་སེ་ཆིབས། །ཀླད་ན་དུང་གི་ཐང་དཀར་ལྡིང་། །གཡས་ན་གཡུ་འབྲུག་སྔོན་མོ་འགྱིངས་། །གཡོན་ན་དུང་ཁྲ་དཀར་པོ་འཇུམས། །གཉན་དམག་འབུམ་གྱི་འཁོར་བཅས་ལ། །གསོལ་ལོ་མཆོད་དོ་ཐུགས་དམ་བསྐང་། །སྨོན་སྐྱེས་རྡོ་རྗེ་དཔལ་འབར་ནི། སྐུ་མདོག་དཀར་སེར་འོད་ཟེར་འབར། །དར་དམར་ལ་ཐོད་དབུ་ལ་བཅིངས། །མཛེས་པ་གཡུ་ཡི་ཚོམ་བུས་བརྒྱན། །སྐུ་ལ་གསེར་ཁྲབ་སེར་པོ་གསོལ། །ཕྱག་གཡས་ཡ་ཚ་སྐར་
ཕྲན་དང་། །གཡོན་པས་དངུལ་མདུང་རུ་མཚོན་ཕྱིར། །རྐྱང་བུ་ཁ་དཀར་ཆིབས་སུ་བཅིབ། །ཀླད་ན་དུང་གི་ཁྲུང་ཁྲུང་ལྡིང་། །གཡས་ན་དུང་གི་སྟག་མོ་འགྱིངས། །གཡོན་ན་གཡུ་ཁྲ་སྔོན་མོ་འཛུམས། །ཀླུ་དམག་འབུམ་གྱི་འཁོར་བཅས་ལ། །གསོལ་ལོ་མཆོད་དོ་ཐུགས་དམ་བསྐང་། །སྲིང་གཅིག་ལྷ་ལྕམ་གློག་མ་འཕུལ། །སྐུ་མདོག་དཀར་གསལ་གློག་འོད་འཁྱུག །དབུ་ལ་ཤེལ་གཡུ་བྱི་རུས་བརྒྱན། །རིན་ཆེན་མུ་མེན་ཕྲེང་བ་འཕྱང་། །དར་ཚོན་སྣ་ལྔའི་ན་བཟའ་ལ། །རིན་ཆེན་སྣ་ལྔའི་ཚོམ་བུས་སྤྲས། །འཇའ་ཚོན་རི་མོ་ཁྱུགས་སེ་ཁྱུག །གསེར་དངུལ་ཕྱག་གདུབ་སྒ་ར་ར། །དུང་གླིང་དཀར་པོ་སྐྱུ་རུ་རུ། །ཕྱག་གཡས་མདའ་དར་དཀར་པོ་དང་། །གཡོན་ན་ཚེ་ཡི་ལ་བུམ་པ་བསྣམས། །གནམ་རྟ་གྱི་ལིང་ཆིབས་སུ་ཆིབས། །ཀླད་ན་བྱ་རྒྱལ་ཁུ་བྱུག་གྲགས། །དུང་གི་ཅོ་ག་གཡས་ན་འགྱུར། །གཡུ་ཡི་ནེ་ཚོ་གཡོན་ན་གྲགས། །ལྷ་སྨན་འབུམ་གྱིས་བསྐོར་བ་ལ། །གསོལ་ལོ་མཆོད་དོ་ཐུགས་དམ་བསྐང་། །བཙུན་མོ་གཡུ་མཚོ་ཆེ་ཆུང་ནི། །སྐུ་མདོག་དཀར་མོ་འཛུམ་མདངས་ཅན། །དབུ་ལ་གསེར་གཡུ་ཤེལ་
གྱིས་བརྒྱན། །སྐུ་ལ་དར་དཀར་ན་བཟའ་ལ། །འཇའ་ཚོན་སྣ་ལྔའི་རི་མོ་འཁྱུག །དངུལ་དཀར་མེ་ལོང་མཛེས་པས་བརྒྱན། །གསེར་དངུལ་ཕྱག་གདུབ་སྒ་ར་ར། །སྙན་པའི་ཀླུ་ལེན་ཀྱུ་རུ་རུ། །ཕྱག་གཡས་མདའ་དར་མེ་ལོང་དང་། །གཡོན་གྱི་ཕྱག་ན་བུམ་པ་བསྣམས། །ངང་པ་ངུར་པས་སྐད་སྙན་སྒྲོག །ཆུ་རྟ་སྔོན་པོ་ཆིབས་སུ་ཆིབས། །མཚོ་སྨན་འབུམ་གྱིས་བསྐོར་བ་ལ། །གསོལ་ལོ་མཆོད་དོ་ཐུགས་དམ་བསྐང་། །གཡས་ཀྱི་བཀའ་ཉན་མདའ་ར་བ། །ཀླུ་རྒྱལ་དྲག་པོ་བདུད་འདུལ་ནི། །སྐུ་མདོག་ནག་པོ་འཇིགས་པའི་གཟུགས། །ཁྲོ་གཏུམ་རྔམས་བརྗིད་སྟོབས་དང་ལྡན། །དབུ་ལ་སྟག་ཐོད་ཁྲ་བོ་བཅིངས། །གནམ་ལྕགས་གོ་ཁྲབ་སྐུ་ལ་གསོལ། །སྟག་རལ་གཟིག་ཤུབས་སྐྱེད་ལ་བསྐོར། །ཕྱག་གཡས་རལ་གྲི་གློག་འོད་འཁྱུགས། །གཡོན་པས་ཐོག་མདའ་དམར་པོ་བསྣམས། །བ་དན་ལྕེ་བརྒྱད་མཆན་དུ་བསྒྲེངས། །ཁྲ་བོ་སྟག་ཆས་ཆིབས་སུ་ཆིབས། །ཁྲོ་གཏུམ་དྲག་པོའི་དམག་གིས་བསྐོར། །གསོལ་ལོ་མཆོད་དོ་ཐུགས་དམ་བསྐང་། །གཡོན་གྱི་བཀའ་ཉན་མདུང་ར་བ། །སྐྱེན་གྱི་བཙན་རྒོད་དམར་པོ་ནི། །སྐུ་
མདོག་དམར་པོ་ཁྲོས་པའི་གཟུགས། །དབུ་ལ་མཚལ་ཐོད་དམར་པོ་བཅིངས། །བསེ་ཁྲབ་སྨུག་པོ་སྐུ་ལ་གསོལ། །སྟག་རལ་གཟིག་ཤུབས་སྐྱེད་ལ་བསྐོར། །གཡས་པས་གནམ་ལྕགས་རལ་གྲི་དང་། །གཡོན་པས་ཤེལ་མདུང་ལྕེ་བརྒྱད་བསྣམས། །རག་པ་སྟག་ལ་ཆིབས་སུ་ཆིབས། །སྤྲུལ་པ་ལྕགས་ཀྱི་མཆིལ་པ་ལ། །ལྕགས་ཀྱི་མི་རྟ་དམག་གིས་བསྐོར། །གསོལ་ལོ་མཆོད་དོ་ཐུགས་དམ་བསྐང་། །ཕྱོགས་བཞིའི་བཀའ་བློན་བཞི་པོ་ནི། །ཤར་གྱི་དབྱི་རྒྱལ་རིན་ཆེན་དང་། །ལྷོ་ཡི་སྤེ་ནེ་རི་བཀྲ་དང་། །ནུབ་ཀྱི་སྐ་རྒྱལ་མོ་ནོམ་དང་། །བྱང་གི་ཇོ་བོ་སྐེད་རྒྱལ་བཞི། །བཙུན་མོ་སྲས་དང་བློན་པོ་འབངས། །གོ་ཁྲབ་བཙན་ཞིང་ན་བཟའ་མཛེས། །མཚོན་ཆ་སྣ་ཚོགས་ཕྱག་ན་བསྣམས་། །བ་དན་རུ་མཚོན་ལྷབས་སེ་ལྷབ། །ཆིབས་སུ་རྒྱན་ལྡན་སྣ་ཚོགས་ཆིབས། །སྟག་གཟིག་དོམ་དྲེད་ཕྱི་ནས་འགྲོ། །རྒོད་གླག་བྱ་ཁྲ་ཀླད་ན་འཇུམས། །རང་རང་དམག་ཚོགས་འབུམ་གྱིས་བསྐོར། །གསོལ་ལོ་མཆོད་དོ་ཐུགས་དམ་བསྐང་། །གཞན་ཡང་བཀའ་ཉན་ཕོ་ཉའི་ཚོགས། །བཙན་རྒོད་ཧར་པོ་སྟག་མགོ་དང་། །སྣ་ཁྲིད་མཆིལ་
པ་སྤུན་བདུན་དང་། །ཕོ་ཉ་དགུ་ཁྲི་ཕག་སྟག་དང་། །རི་རྒོད་བྲག་ནག་སོ་ཕྱར་དང་། །ཇོ་བོ་དང་འཛངས་མཚོ་མགོ་དང་། །ཕྱག་ཚང་མུན་པ་ནག་པོ་དང་། །ལས་མཁན་གཤིན་རྗེ་དམར་ཟེ་སོགས། །སྒོ་སྲུང་ཕོ་ཉ་བྲན་གཡོག་བཅས། །ལུས་ཀྱིས་སྤྲུལ་བསྒྱུར་བསམ་མི་ཁྱབ། །ཡང་སྤྲུལ་ཕོ་ཉ་བྱེ་བ་འབུམ། །རྫུ་འཕྲུལ་དཔའ་རྩལ་སྟོབས་དང་ལྡན། །ཀུ་བསྭོ་ཆ་སྒྲ་དི་རི་རི། །གོ་ཆ་སྲ་ལ་མཚོན་ཆ་རྣོ། །བ་དན་རུ་མཚོན་ལྷབས་སེ་ལྷབ། །དཀར་དམར་དར་དཔྱངས་པུ་རུ་རུ། །བཞོན་པ་སྣ་ཚོགས་ཆིབས་སུ་ཆིབས། །དཀར་ཕྱོགས་ལྷ་འདྲེ་འབུམ་གྱིས་བསྐོར། །གསོལ་ལོ་མཆོད་དོ་ཐུགས་དམ་བསྐང་། །ཐུགས་དམ་བསྐང་བའི་དམ་རྫས་ནི། །འབྲས་བཤོས་རྩེ་གསུམ་ཤ་མར་བརྒྱན། །དཀར་གསུམ་མངར་གསུམ་ཕྱེ་མར་དང་། །འབྲུ་སྨན་དྲི་བཟང་དུད་པ་དང་། །གཡག་ལུག་ར་གསུམ་གཟུགས་འགྲོས་དང་། །ལྷ་མདའ་ལེབ་མ་ཚིགས་བདུན་ལ། །རྒོད་སྒྲོ་སྲོག་སྔགས་མཐུན་རྫས་དང་། །རིན་ཆེན་དར་ཚོན་སྟག་གཟིག་རས། །བཀྲ་ཤིས་འགྲུབ་པའི་རྫས་རྟགས་བརྒྱད། །རྒྱལ་སྲིད་རིན་ཆེན་སྣ་བདུན་སོགས། །མཐུན་རྫས་མ་
ཚང་མེད་པ་དང་། །རང་རང་མཐུན་པའི་དམ་རྫས་རྣམས། །དངོས་འབྱོར་ཡིད་ཀྱིས་རྣམ་སྤྲུལ་པའི། །ས་དང་བར་སྣང་ཁྱོན་བཀང་བ། །སྨོན་སྐྱེས་གང་ཞུར་མཆེད་དང་ལྕམ། །ཡུམ་དང་བློན་པོ་འཁོར་དང་བཅས། །ཀུན་གྱི་ཐུགས་དམ་བསྐང་གྱུར་ཅིག །སེང་གེ་བྲག་གི་སྒྲུབ་གནས་སུ། །དྲག་པོ་པདྨའི་སྤྱན་སྔ་རུ། །རང་རྟག་སྲོག་སྙིང་ཕུལ་ནས་ནི། །ཇི་ལྟར་ཁས་བླངས་དམ་བཅས་པའི། །དམ་ཚིག་གཉན་ལ་མ་འདའ་བར། །བདག་ཅག་དཔོན་སློབ་འཁོར་བཅས་ཀྱི། །ནད་གདོན་བར་ཆད་ཞི་བ་དང་། །ཚེ་བསོད་དཔལ་འབྱོར་རྒྱས་པ་དང་། །སྐྱེ་འགྲོ་དབང་དུ་འདུ་བ་དང་། །དགྲ་བགེགས་གཞོམ་པའི་ཕྲིན་ལས་མཛོད། །རྨ་གཡང་ནོར་གྱི་དངོས་གྲུབ་སྩོལ། །བང་མཛོད་འབྲུ་ཡི་དངོས་གྲུབ་སྩོལ། །བཙན་ཕྱུག་འཕེན་དར་དངོས་གྲུབ་སྩོལ། །མི་འཕེན་རྟ་ཧྲག་དངོས་གྲུབ་སྩོལ། །དགྲ་སྣ་ཇོག་སྣ་རྐུན་སྣ་ཟློག །བཙན་སྣ་གོད་སྣ་སྙིང་སྟོང་ཟློག །མི་ཁ་གླེང་བཞི་ངན་པ་ཟློག །ཆག་ཆེན་ཉམ་ང་ཐམས་ཅད་ཟློག །བཀྲ་ཤིས་བདེ་ལེགས་ཕུན་ཚོགས་སོགས། །ཡིད་ལ་རེ་བའི་འབྲས་བུ་དེ། །ད་ལྟ་ཉིད་དུ་འགྲུབ་
པར་མཛོད། །མཐུ་དང་ནུས་པ་ཅི་འདུག་ལྟ། །རྟགས་དང་མཚན་མ་དངོས་སུ་སྟོན། །བཅོལ་བའི་ཕྲིན་ལས་འགྲུབ་པར་མཛོད། །ཅེས་པ་བཀའ་སྲུང་བསྐང་གསོལ་འདི། །སློབ་བུ་པདྨ་མཐར་ཕྱིན་གྱིས། །ཡང་ཡང་ནན་གྱིས་བསྐུལ་བའི་ཕྱིར། །འགྲུབ་སྦྱོར་ལྡན་པའི་སྔ་དྲོ་ལ། །སྔགས་འཆང་རཱ་ག་ཨ་སྱ་ཡིས། །བྲིས་ལ་འགལ་འཁྲུལ་མཆིས་པ་ན། །སྲུང་མ་ཉིད་ལ་མཐོལ་བཤགས་ཤིང་། །དགེ་ལེགས་བྱང་ཆུབ་སྒྲུབ་པ་ཡི། །ས་ལམ་བར་ཆད་མེད་པ་དང་། །ཕྱི་རབས་རྗེས་འཇུག་བུ་སློབ་ལ། །ཕན་ཞིང་བཀྲ་ཤིས་དགེ་ལེགས་ཤོག །སརྦ་མངྒ་ལཾ།། །། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།