སྨོན་སྐྱེས་མཆེད་གསུམ་ཀ་བསྟོད།
སྨོན་སྐྱེས་མཆེད་གསུམ་ཀ་བསྟོད། ཀ་ཡེ་གསོན་དང་སྨོན་སྐྱེས་མཆེད་གསུམ་པོ། །ཁ་བ་ཅན་ལྗོངས་མདོ་ཁམས་ཤར་ཕྱོགས་སུ། །ག་ནས་བསམས་ཀྱང་ཁྱེད་ནི་མཐུ་རྩལ་ལྡན། །ང་ཡིས་སྲུང་མར་རྟག་ཏུ་ཁྱེད་བརྟེན་གྱིས། །ཅ་ལེ་ཅོ་ལེའི་གདུག་རྩུབ་མ་སྟོན་པར། །ཆ་ལུགས་གཏེར་བདག་ནོར་ལྷའི་ཚུལ་གྱིས་ནི། །ཇ་དར་རྨ་གཡང་ལོངས་སྤྱོད་དངོས་གྲུབ་སྩོལ། །ཉ་རྒྱས་ཟླ་བ་ལྟ་བུའི་གཟི་བརྗིད་ཅན། །ཏ་ཐཱ་ག་ཏའི་བསྟན་སྲུང་ཁྱེད་གསུམ་གྱིས། །ཐ་ན་གཅན་གཟན་གནོད་པ་ཐམས་ཅད་ཟློག །ད་ནི་མ་གཡེལ་སྐུ་ཤུགས་ཕྱུང་མཛོད་ལ། །ན་ཚ་དགྲ་འདྲེའི་གནོད་པ་ཐམས་ཅད་ཟློག །པ་གཏུམ་དྲག་རྩལ་ལྡན་པ་ཁྱེད་རྣམས་ཀྱིས། །ཕ་རོལ་དགྲ་དང་བགེགས་ཀྱི་དམག་དཔུང་ཟློག །བ་གླང་རྟ་ཕྱུགས་རྐང་འགྲོས་འཕེལ་བ་དང་། །མ་གཅིག་བུ་གཅིག་ལྟ་བུར་བྱམས་པས་སྐྱོངས། །ཙ་ཁ་ལོ་ཏོག་འཕེལ་ཞིང་རྒྱས་པའི་ཕྱིར། །ཚ་གདུང་མ་བཏང་ཆར་ཆུ་དུས་སུ་འབེབས། །ཛ་ཡེ་པད་འབྱུང་བཀའ་བསྒོས་བཞིན་དུ་མཛོད། །ཝ་ལེར་ཡིད་ཀྱི་མངོན་ཤེས་ལྡན་ཁྱེད་རྣམས། །ཞྭ་ལྟར་བདག་གིས་གཙུག་ཏུ་བཀུར་བ་དང་། །ཟ་འཐུང་ཕུད་
ཀྱིས་མཆོད་པ་འབུལ་ལགས་ན། །འ་རེ་འུར་རེའི་སྙན་དང་གྲགས་པ་དང་། །ཡ་མཚན་ཆེ་བའི་དངོས་གྲུབ་སྣ་ཚོགས་བྱིན། །ར་ཙ་བློན་འབངས་ཡུལ་འཁོར་ལ་སོགས་པ། །ལ་ཆེན་སྣང་སྲིད་དགོས་འདོད་དབང་དུ་སྡུས། །ཤ་ཁྲག་གཏོར་མས་མཆོད་ཅིང་རྦད་པའི་ཚེ། །ས་ཆེན་རི་བཅས་གཡོ་བའི་དམག་གི་དཔུང་། །ཧ་ཧའི་གད་མོ་དང་བཅས་དགྲ་བགེགས་ཆོམས། །ཨ་ལ་ལ་ཞེས་ངོ་མཚར་རྒྱལ་ཁ་བྱིན། །ཞེས་བརྗོད། དེ་ནི་རྒྱུན་ཁྱེར་དུ་བྱའོ། །ཞེས་ཨ་རཱ་གས་གཟེ་རྒྱལ་མདུན་ལུང་དུ་བྲིས་པའོ། །མངྒ་ལཾ།། །།