གནས་བདག་ཡ་རྒྱལ་གྱི་གསོལ་མཆོད།

གནས་བདག་ཡ་རྒྱལ་གྱི་གསོལ་མཆོད་ནི། ཨོཾ་ཀཱ་རོ་སོགས། ཀྱེ། ཀ་ཡེ་གསོན་དང་ཡ་རྒྱལ་ཏ་རེ་ཁྱོད། །ཁ་བ་ཅན་ལྗོངས་གནས་མཆོག་རཏྣ་ཡི། །ག་ནས་བྱས་ཀྱང་གནས་བདག་ཁྱོད་ཡིན་པས། །ང་ཡི་སྲུང་མར་བརྟེན་ཕྱིར་ཁྱོད་འབོད་ན། །ཅ་ཅོའི་སྤྱན་འདྲེན་རོལ་མོ་གསན་ལགས་སམ། །ཆ་ལུགས་ན་ཆུང་བཞིན་མཛེས་རྐྱང་ལ་ཆིབས། །ཇ་ཆང་ཕྱེ་མར་གཏོར་མ་བསང་མཆོད་བཞེས། །ཉ་རྒྱས་ཟླ་ལྟར་གཟི་བརྗིད་འོད་འབར་མ། །ཏ་ཐཱ་ག་ཏའི་བསྟན་པ་བསྲུང་མཛད་མ། །ཐ་མལ་སྐྱེ་བོའི་གནོད་འཚེ་ཐམས་ཅད་ཟློག །ད་ནི་མ་ཡེངས་རཏྣའི་གནས་འདིར་སྲུངས། །ན་ཚ་དགྲ་གྱོད་གནོད་པ་ཞི་བར་མཛོད། །པ་ར་ག་ཏའི་ཏིང་འཛིན་འཕེལ་བ་སོགས། །ཕ་གཅིག་རྒྱལ་བའི་དབང་པོས་བཀའ་བསྒོས་ལྟར། །བ་མོར་ཉི་ཟེར་ཕོག་ལྟར་འགལ་རྐྱེན་སོལ། །མ་རྒན་འགྲོ་རྣམས་བདེ་ཞིང་སྐྱིད་པའི་ཕྱིར། །ཙ་ཁ་ལོ་ཏོག་ལེགས་པའི་ཆར་ཆུ་ཕོབ། །ཚ་རིགས་ཐན་པའི་གནོད་པ་མ་བཏང་ཞིག །ཛ་དར་རིན་ཆེན་དུ་མའི་རྒྱན་ཆ་ཅན། །ཝ་ལེར་ཡིད་ཀྱི་མངོན་ཤེས་ལྡན་པ་མོ། །ཞྭ་ལྟར་གནས་དང་སྐུ་གདུང་གཙུག་ན་བཀུར། །ཟ་བྱེད་ལྷ་

སྲིན་མང་པོའི་འཁོར་དང་བཅས། ། འ་འུར ་འབྲུག་སྒྲ་ཐོག་སེར་དང་བཅས་ཏེ། །ཡ་མ་ར་ཙ་ལྟ་བུས་དགྲ་བགེགས་སྒྲོལ། །ར་ལུག་ནོར་ཕྱུགས་རྐང་འགྲོ་འཕེལ་བ་དང་། །ལ་ཆེན་རྨ་གཡང་སྟོབས་འབྱོར་འཕེལ་པར་མཛོད། །ཤ་ཟ་མ་མོ་མཁའ་འགྲོ་སྨན་མོའི་ཚོགས། །ས་ཆེ་ཡུལ་འཁོར་དབང་དུ་འདུ་བ་དང་། །ཧ་ཧིའི་གད་མོ་དང་བཅས་དགྲ་བགེགས་སྒོལ། །ཨ་ལ་ལ་ཤེས་གནས་འདི་དར་རྒྱས་མཛོད། །ཨོཾ་ཏ་རེ་ཏུ་རེ་སོ་སྭཱ་ཧཱ། ཨི་དམ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་ཨགྷཾ་སོགས། ཡ་རྒྱལ་གྱི་སྔགས་འདི་མི་འགྱུར་རྡོ་རྗེའི་དགོངས་གཏེར་ཡིན་པས། རཏྟའི་གནས་བདག་ནི་ཡ་རྒྱལ་ཡིན་པས། ཀ་བསྟོད་འདི། ཨ་རཱ་གས་སྦྱར་བའོ།། །།