དགེ་བསྙེན་རྡོ་རྗེ་བདུད་འདུལ་གསོལ་མཆོད།
དགེ་བསྙེན་རྡོ་རྗེ་བདུད་འདུལ་གསོལ་མཆོད་བཞུགས་སོ། ། ༈ །ན་མོ་གུ་རུ་པྲ་ཝ་ཀཱ་ར་ཡེ། སྣང་སྲིད་ཟིལ་གནོན་སྙིགས་དུས་སྐྱབས། །པདྨ་འབྱུང་གནས་ཞབས་ལ་འདུད། །དེ་ལ་བཀའ་གནང་དམ་ཚིག་ཅན། །དགེ་རྒྱལ་ཙམ་པོ་མཆོད་འདོད་ན། །སྣོད་གཙང་ནང་དུ་དཀར་གཏོར་བཤམས། །རྒྱས་པར་གཡག་ལུག་ར་གསུམ་དང་། །ཕྱེ་མར་ཇ་ཆང་འོ་ཞོ་དང་། །བསང་དང་འབྲེལ་ན་བསང་རྫས་བཤམས། །བསྡུ་ན་དཀར་གཏོར་གཅིག་གིས་ཆོག །མ་འཛོམས་ན་འང་མར་གཙང་བྲན། །གྱེར་སྒོམ་སྦྲགས་ལ་འདི་སྐད་དོ། །སྐྱབས་གནས་དཀོན་མཆོག་ཀུན་འདུས་སྐུ། །ཨོ་རྒྱན་རྗེ་ལ་སྐྱབས་སུ་མཆི། །འགྲོ་བ་བདེ་སྐྱིད་ལྡན་པའི་ཕྱིར། །བདག་གིས་ལྷ་དང་སྲུང་མ་མཆོད། །ཆོས་ཀུན་ཡེ་ནས་རྫོགས་པ་ཆེ། །དེ་ཡི་རང་མདངས་སྐད་ཅིག་གིས། །དྲན་རྫོགས་དམ་ཡེ་དབྱེར་མེད་པའི། །པདྨ་འབྱུང་གནས་སྐུ་མདོག་དཀར། །རྡོ་རྗེ་བྷནྡྷ་ཁ་ཊཾ་འཛིན། །པད་ཞྭ་ཟབ་བེར་ཆོས་གོས་གསོལ། །རྡོ་རྗེའི་སྐྱིལ་ཀྲུང་འོད་ཟེར་འབར། །ཐུགས་ཀའི་ཧཱུྃལས་འོད་འཕྲོས་པས། །དགེ་བསྙེན་འཁོར་བཅས་སྤྱན་དྲངས་གྱུར། །ཧཱུྃ། རྡོ་རྗེ་གདན་གྱི་བྱང་ཕྱོགས་ནས། །རྒྱལ་བས་ལུང་བསྟན་གདོང་དམར་ཡུལ། །ཐུགས་རྗེ་ཆེན་པོས་བྱིན་རླབས་
པའི། །ཁ་བ་ཅན་ལྗོངས་བོད་ཀྱི་ཡུལ། །མདོ་ཁམས་གླིང་ཁྲི་བར་མ་ཡི། །སྨར་ཁམས་ཀེ་རུའི་སྒང་ཁྲི་ནས། །རྨ་གཡང་ཆགས་པ་གླེ་ཡི་ཡུལ། །ཁོལ་དུ་ཆགས་པ་དགེ་ཡི་ལུང་། །རིན་ཆེན་ས་འཛིན་ལྷུན་ཆགས་པ། །རྩེ་མོ་དགུང་སྔོན་སྙེགས་པ་འདྲ། །སྤྲིན་དང་ན་བུན་བླ་རེ་འདྲ། །སྤང་ལྗོངས་གསེར་གཡུའི་མཎྜལ་འདྲ། །རྫ་བྲག་རིན་ཆེན་སྤུངས་པ་འདྲ། །འབྲུག་སྒྲ་གློག་འོད་ཆར་རྒྱུན་འབེབས། །སྟེང་ན་བྱ་རིགས་གཤོག་གདིངས་འཁྲིགས། །ལོགས་ན་གཅན་གཟན་ངར་སྐད་སྒྲོག །རི་དྭགས་རྩེ་རྒྱུག་རང་སྒྲ་འབྱིན། །ཤེལ་གྱི་ཆུ་མིག་ཤ་ར་ར། །གཡུ་ཡི་ནེའུ་སིང་ཀྱི་ལི་ལི། །གཙང་པོའི་ཆུ་འབབ་འགྱ་མ་འགྱུར། །ཆུ་གནས་སྣ་ཚོགས་རྐྱལ་ཞིང་འཕྱོ། །དེ་འདྲའི་གནས་མཆོག་ཡ་མཚན་ན།། །རང་སྣང་རིན་ཆེན་གཞལ་ཡས་ཁང་། །འདོད་ཡོན་ལོངས་སྤྱོད་ཕུན་སུམ་ཚོགས། །རིན་ཆེན་དར་ཟབ་ཁྲི་སྟེང་ན། །དགེ་རྒྱལ་ཙམ་པོ་ཞེས་གྲགས་པའི། །།སྐྱེས་བུ་རྡོ་རྗེ་བདུད་འདུལ་ནི། །མཆོད་པའི་གནས་འདིར་གཤེཔ།ས་སུ་གསོལ། །ནང་བློན་བཞི་པོ་གཤེགས་སུ་གསོལ། །བར་བློན་བཞི་པོ་གཤེགས་སུ་གསོལ། །ཕྱི་བློན་བཞི་པོ་
གཤེགས་སུ་གསོལ། །སྒོ་སྲུང་བཞི་པོ་གཤེགས་སུ་གསོལ། །བཙུན་མོ་སྲས་བཅས་གཤེགས་སུ་གསོལ། །ཕྱག་བརྙན་རྗེ་འུ་ལ་སོགས་པའི། །འཁོར་དང་བཅས་པ་གནས་འདིར་བྱོན།། །ཡིད་ལས་སྤྲུལ་པ་རིན་ཆེན་ཁྲི། །དར་ཟབ་འབོལ་སྟན་བརྡོལ་བའི་སྟེང་། །གཙོ་དང་འཁོར་དང་བཅས་པ་རྣམས། །དགྱེས་ཤིང་བརྟན་པར་བཞུགས་ནས་ཀྱང་། །སློབ་དཔོན་པདྨ་བྱོན་པའི་ཚེ། །བཀའ་དང་དམ་ལ་བཏགས་ནས་ཀྱང་། །རང་རྟགས་སྲོག་གི་སྙིང་པོ་ཕུལ། །ངག་ཏུ་དམ་རྫས་བདུད་རྩི་སྦྱིན། །སྤྱི་ཐོ་བོར་དམ་ཚིག་རྡོ་རྗེ་བཞག །གསང་མཚན་རྡོ་རྗེ་བདུད་འདུལ་ནི། །བསྟན་དང་རྣལ་འབྱོར་སྐྱོང་བར་བྱེད། །སྔོན་གྱི་ཐུགས་དམ་དེ་དགོངས་ལ། །བདག་གིས་གང་བཅོལ་ལས་སྒྲུབས་ཤིག །ཨོཾ་ཨཱཔུ་རུ་ཥ་བཛྲ་རུ་ཊ་མཱ་ར་ཡ་ཧཱུྃ་ཛ༔ ས་པཱ་རི་ཝཱ་ར་བཛྲ་ས་མ་ཡ་ཛ༔ ཛཿཧཱུྃ་བཾ་ཧོ༔ ཏིཥྛ་ལྷན། ས་མ་ཡ་ཧཱུྃ། ཧཱུྃ། དགེ་བསྙེན་ཆེན་པོ་དྲག་རྩལ་ཅན། །དགེ་རྒྱལ་ཙམ་པོ་འཁོར་བཅས་ལ། །དངོས་འབྱོར་ཡིད་ཀྱིས་སྤྲུལ་པ་ཡི། །མཆོད་ཡོན་མེ་ཏོག་བདུག་སྤོས་དང་། །མར་མེ་དྲི་ཆབ་ཞལ་ཟས་དང་། །རོལ་མོ་
གཟུགས་སྒྲ་དྲི་རོ་རེག །བཀྲ་ཤིས་རྫས་རྟགས་རིན་ཆེན་བདུན། །འབྲུ་སྣ་སྨན་སྣ་རིན་ཆེན་ལྔ། །དར་ཟབ་བལ་ཚོན་གཡག་ལུག་དང་། །དཀར་གསུམ་མངར་གསུམ་ཟས་སྣའི་ཕུད། །ཕྱེ་མར་ཇ་ཆང་ཕུད་རྒོད་དང་། །མཆོད་སྤྲིན་ནམ་མཁའ་གང་བར་འབུལ། །ཁྱད་པར་ཧཱུྃ་ལས་རིན་ཆེན་སྣོད། །ཡངས་ཤིང་རྒྱ་ཆེའི་ནང་དུ་ནི། །འབྲུ་གསུམ་ཞུ་བས་གཏོར་མ་ནི། །ཁ་དོག་དྲི་རོ་ནུས་པར་བཅས། །ཟག་མེད་ཡེ་ཤེས་བདུད་རྩིས་མཆོད། །ཧ་ཧོ་ཧཱིཝཡིས་བྱིན་བརླབས་པས། །དགེ་རྒྱལ་ཙམ་པོ་འཁོར་བཅས་ལ། །འབུལ་ལོ་དགྱེས་པར་བཞེས་སུ་གསོལ། །རབ་ཏུ་མཉེས་ཤིང་ཚིམ་གྱུར་ཅིག །ཨོཾ་ཨཱཔུ་རུ་ཥ་བཛྲ་རུ་ཊ་མཱ་ར་ཡ་ཧཱུྃ་ཛ༔ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་བརྗོད། ཨཧཱུྃ། ནས་ཤབྷ་རཱུ་པ་གནྡྷེ་ར་ས་པནེ་སརྦ་པཱུ་ཛ་ཨཱཿཧཱུྃ། ཧཱུྃ། དགེ་རྒྱལ་སྐྱེས་བུ་དམ་ཚིག་ཅན། །དགེ་རྒྱལ་ཙམ་པོ་ཞེས་སུ་གྲགས། །གསང་མཚན་རྡོ་རྗེ་བདུད་འདུལ་རྩལ། །སྟོན་ཀའི་མདོག་ཅན་བརྗིད་པའི་ཞལ། །རིན་ཆེན་སྲོག་ཞུ་འབར་བ་མནབས། །སྐུ་ལ་ཟ་འོག་བེར་ཆེན་དང་། །དར་དཀར་གོ་ཟུ་མཛེས་པ་ལ། །མེ་ཏོག་
དམར་པོ་ཚོམ་བུ་རིས། །ཕྱག་གཡས་གསེར་གྱི་རྡོ་རྗེ་གསོར། །གཡོན་པས་མདུང་དར་དཀར་པོ་ཕྱར། །སྟག་རལ་གཟིག་ཤུབས་ཆོ་ལོ་རིས། །རྫུ་འཕྲུལ་ངང་པ་གཡུ་རྔོག་ཆིབས། །གསེར་གཡུ་སྒ་བཀྲ་དར་ཟབ་སྟན། །གཡུ་མཐུར་མུ་ཏིག་གོང་སྨད་ཅན། །གསེར་སྲབ་ཀྱིས་བརྒྱན་རླུང་བས་མགྱོགས། །ཅང་ཤེས་སྔོན་པོ་ཆུ་རིས་ཅན་། །མཚལ་བུ་རྟིང་དཀར་རོལ་དུ་ཁྲིད། །བླ་བྱ་ཐང་དཀར་ཀླད་ན་ལྡིང་། །ལྷ་གཡག་ཉི་ཁྲི་གཡས་སུ་འགྱིང་། །སྟག་གཟིག་ཉི་ཁྲི་གཡོན་ནས་ངར། །ལྕགས་སྤྱང་ཉི་ཁྲི་དགྲ་ལ་འགྱེད། །རི་དྭགས་ཉི་ཁྲི་རྗེས་སུ་འབྲང་། །ཡུལ་ལྷ་འབུམ་གྱི་འཁོར་གྱིས་བསྐོར། །སྐྱེས་བུ་རྡོ་རྗེ་བདུད་འདུལ་ལ། །གསོལ་ལོ་མཆོད་དོ་ངོ་སོ་བསྟོད། །ཁྱོད་ཀྱི་ཐུགས་དམ་བསྐང་གྱུར་ཅིག །ནང་བློན་ར་ཙ་གཡག་སྙིང་ནི། །ཟབ་བེར་གསོལ་ཞིང་དབུ་ཞུ་སླག །ཆིབས་སུ་མཚལ་བཀྲ་བསེ་སྟན་མཛེས། །འཁོར་གསུམ་བསྐོར་ཞིང་དར་མདུང་ཕྱར། །གསོལ་ལོ་མཆོད་དོ་ངོ་སོ་བསྟོད། །ཁྱོད་ཀྱི་ཐུགས་དམ་བསྐང་གྱུར་ཅིག །དགེ་ཡི་རེ་ཁྲུ་རྫ་ནག་ནི། །མི་ནག་རྟ་ནག་བེར་མདུང་གསོལ། །རལ་གྲི་བ་དན་ཁྲ་
བོ་ཕྱར། །སྟག་རལ་གཟིག་ཤུབས་སྐེད་ལ་བསྐོར། །གསོལ་ལོ་མཆོད་དོ་ངོ་སོ་བསྟོད། །ཁྱོད་ཀྱི་ཐུགས་དམ་བསྐང་གྱུར་ཅིག །གཉེན་པོ་ཞུག་གི་ཤེལ་དཀར་ནི། །མི་དཀར་ངང་པ་གཡུ་རྔོག་ཆིབས། །བྱ་རྒོད་རྒྱལ་མཚན་བ་དན་འཛིན། །གསོལ་ལོ་མཆོད་དོ་ངོ་སོ་བསྟོད། །ཁྱོད་ཀྱི་ཐུགས་དམ་བསྐང་གྱུར་ཅིག །ཞུག་གི་ཤེལ་ནག་བེར་ནག་གྱོན། །བྲ་ནག་ཆིབས་ཤིང་དར་སྔོན་ཕྱིར། །འཁོར་གསུམ་བསྐོར་ཞིང་རྔམ་བརྗིད་ཅན། །གསོལ་ལོ་མཆོད་དོ་ངོ་སོ་བསྟོད། །ཁྱོད་ཀྱི་ཐུགས་དམ་བསྐང་གྱུར་ཅིག །བར་བློན་འཛི་རྒྱལ་བྲ་དྲུག་ནི། །སེང་གདོང་བ་དན་དཀར་པོ་ཕྱར། །དར་དཀར་བེར་ཆེན་འཁོར་གསུམ་ཅན། །ངང་པ་གཡུ་རྔོག་མཆེད་ཟླ་བརྒྱད། །གསོལ་ལོ་མཆོད་དོ་ངོ་སོ་བསྟོད། །ཁྱོད་ཀྱི་ཐུགས་དམ་བསྐང་གྱུར་ཅིག །ཕྲོམ་དཀར་ཅད་ཞུ་འཕྲུ་དཀར་ཅན། །རག་དཀར་ཆིབས་ནས་དར་དཀར་ཕྱར། །གསོལ་ལོ་མཆོད་དོ་ངོ་སོ་བསྟོད། །ཁྱོད་ཀྱི་ཐུགས་དམ་བསྐང་གྱུར་ཅིག །ཕྲོམ་ནག་མི་ནག་བེར་ནག་ཅན། །སྟག་གི་རྒྱལ་མཚན་མདུང་དར་ཕྱར། །འཁོར་གསུམ་བསྐོར་ནས་རྟ་ནག་ཞོན། །གསོལ་ལོ་མཆོད་དོ་ངོ་སོ་
བསྟོད། །ཁྱོད་ཀྱི་ཐུགས་དམ་བསྐང་གྱུར་ཅིག །བྱིལ་ཚུ་འབྲི་རྫི་དུང་གི་མདོག །དར་དཀར་ར་ག་ལ་ཐོད་ཅན། །ཕྱག་ན་མདུང་དར་སྦ་གླིང་བསྣམས། །མཚལ་བུ་ཆིབས་ཤིང་འཁོར་གསུམ་བསྐོར། །གསོལ་ལོ་མཆོད་དོ་ངོ་སོ་བསྟོད། །ཁྱོད་ཀྱི་ཐུགས་དམ་བསྐང་གྱུར་ཅིག །ཕྱི་བློན་ལྕེ་རྒྱལ་རྫ་བཀྲ་ནི། །མི་དམར་ལྕགས་ཁྲབ་འཁོར་གསུམ་ཅན། །དར་ཁྲ་ཕྱུར་ཞིང་ཁམས་པ་ཆིབས། །གསོལ་ལོ་མཆོད་དོ་ངོ་སོ་བསྟོད། །ཁྱོད་ཀྱི་ཐུགས་དམ་བསྐང་གྱུར་ཅིག །ལྟེ་རྒྱལ་མགོ་ནི་སྐུ་མདོག་དམར། །ཞྭ་སྨུག་དར་འཕྲུ་ཁྲ་བོ་ཅན། །བྱ་རྒོད་ཐུལ་གྱོན་དར་ཁྲ་ཕྱིར། །འཁོར་གསུམ་བཏགས་ནས་མཚལ་བུ་ཆིབས། །གསོལ་ལོ་མཆོད་དོ་ངོ་སོ་བསྟོད། །ཁྱོད་ཀྱི་ཐུགས་དམ་བསྐང་གྱུར་ཅིག །འབོ་རྒྱལ་མི་དཀར་རྟ་དཀར་ཅན། །འཁོར་གསུམ་བསྐོར་ནས་དར་དཀར་ཕྱར། །ངང་པ་རྔོག་ནག་ཆིབས་པ་ལ། །གསོལ་ལོ་མཆོད་དོ་ངོ་སོ་བསྟོད། །ཁྱོད་ཀྱི་།ཐུགས་དམ་བསྐང་གྱུར་ཅིག །སྐུ་ལ་སྒྲ་ཆེམས་ལྡེམ་མཚོ་ནི། །མི་དཀར་བེར་དཀར་མདུང་ཁྲ་ཕྱར། །མཚལ་བུ་ཆིབས་ནས་རྟ་སྔོན་ཁྲིད། །གསོལ་ལོ་མཆོད་དོ་ངོ་སོ་
བསྟོད། །ཁྱོད་ཀྱི་ཐུགས་དམ་བསྐང་གྱུར་ཅིག །རིན་ཆེན་གཞལ་ཡས་སྒོ་བཞི་ན། །དཀར་སྔོ་དམར་བའི་མི་ཕོ་ནི། །མདོག་མཚུངས་རྟ་དང་མདུང་དར་ཅན། །སྒོ་བ་མཆེད་། བཞི་ཁྱེད་རྣམས་ལ། །གསོལ་ལོ་མཆོད་དོ་ངོ་སོ་བསྟོད། །ཁྱོད་ཀྱི་ཐུགས་དམ་བསྐང་གྱུར་ཅིག །བཙུན་མོ་མཛེས་སྡུག་སྨན་མོའི་ཚོགས། །སྲས་དང་ཕོ་ཉ་མངག་གཞུག་དང་། །རྟ་གཡག་འབྲི་དང་རི་དྭགས་དང་། །གཅན་གཟན་བྱ་རིགས་རྫི་བོའི་ཚོགས། །འཁོར་དང་སྡེ་རིས་བཅས་པ་ལ། །གསོལ་ལོ་མཆོད་དོ་ངོ་སོ་བསྟོད། །ཁྱོད་ཀྱི་ཐུགས་དམ་བསྐང་གྱུར་ཅིག །སྐྱེས་བུ་དགེ་རྒྱལ་ཙམ་པོ་ནི། །འཁོར་དང་བཅས་པ་མ་ལུས་པ། །སྔར་བྱས་ལས་ཀྱི་གཏང་རག་བཏང་། །ཕྱི་བྱེད་ལས་ཀྱི་ཞུ་སྐྱེམས་འབུལ། །ཕོག་ཐུག་འགྲམ་འཁྲུག་གང་ཤོར་བཅོལ། །བྱིང་འཐིབས་རྨུགས་པ་ཡོད་ན་བསང་། །བཀྲ་མདངས་གཟི་བརྗིད་ངོ་སོ་བསྟོད། །སོ་སོའི་མཐུན་རྫས་མཆོད་པས་བརྔན། །ཞལ་ཟས་ཕུད་རྒོད་གཙང་མ་གསོལ། །།འགལ་འཁྲུལ་ཉམས་ཆག་ཡོད་ན་བསྐང་། །ཐུགས་དང་འགལ་བ་ཡོད་ན་བཤགས། །ཁྱེད་རྣམས་ཡུལ་ཕྱོགས་འདིར་གནས་ལྷ། །ངེད་ཀྱང་
འདི་ན་གནས་པ་ཡི། །མིས་ཀྱང་ལྷ་ལ་མཆོད་པ་འབུལ། །ལྷས་ཀྱང་མི་ལ་ཁ་འཛིན་མཛོད། །གནས་མགྲོན་གཉིས་ཀྱི་དམ་ཚིག་སྲུངས། །མི་ནད་ཕྱུགས་ནད་དལ་ཁ་ཆིངས། །ཕྱི་ནང་འཁྲུག་རྩོད་ཞི་ཞིང་སྒྱུར། །ཚེ་སྲིངས་ནད་གདོན་བར་ཆད་སོལ། །མངའ་ཐང་རྒྱུད་སྲིངས་ལོང་སྤྱོད་སྤེལ། །རྩྭ་ཁ་ལོ་ཏོག་ལེགས་པར་མཛོད། །སད་སེར་བཙའ་དང་མུ་གེ་ཟློག །རྟ་ལུག་ནོར་ཕྱུགས་སྒབ་རྣམས་སྤེལ། །དམག་རིག་གཡུལ་ལས་རྒྱལ་ཁ་བྱིན། །ས་ཕྱོགས་གར་འགྲོ་སྐྱེལ་བསུ་མཛོད། །གང་དུ་འདུག་ཀྱང་རྒྱབ་རྟེན་མཛོད། །གོད་ཁ་གཅན་གཟན་དགྲ་རྐུན་ཆིངས། །མངོན་ཤེས་སྤྱན་གྱིས་རྒྱུན་དུ་གཟིགས། །ཟས་ཀྱི་ངོ་གཅིག་ཁྱོད་ཀྱིས་གྱིས། །ཁྱོད་ཀྱིས་གཞུང་འདི་མི་ཉམས་སྲུངས་་།སློབ་དཔོན་པདྨའི་སྤྱན་སྔ་རུ། །ཁས་བླངས་དམ་ལས་མ་འདའ་བར། །སངས་རྒྱས་བསྟན་པ་སྲུང་བ་དང་། །དམ་ལྡན་སྔགས་འཆང་བུ་བཞིན་སྐྱོང་། །མཐུ་རྩལ་ནུས་པ་ཇི་སྲིད་ལྟར། །རྟགས་དང་མཚན་མ་མྱུར་དུ་སྟོན། །ཁྱོད་རྣམས་འཇིག་རྟེན་མྱུར་མགྱོགས་ལྷ། །བཅོལ་བའི་ཕྲིན་ལས་མ་གཡེལ་བར། །རང་རང་གནས་སུ་གཤེགས་
སུ་གསོལ། །བྱམས་པའི་སེམས་དང་ལྡན་པར་མཛོད། །སརྦ་བྷུ་མི་པ་ཏི་གཙཱ། ཞེས་པ་སིབ་ཀྱི་ལུང་པ་རུ། །ཕེབས་མ་ཐག་ཏུ་ཡུད་ཙམ་ཞིག །ཐུམ་པ་འདྲ་བའི་ཉམས་སྣང་ལ། །མི་དཀར་རྟ་དཀར་འཁོར་གསུམ་ཅན། །ཆོས་བཟང་དེ་ཡི་མདོག་འདྲ་བའི། །ཕུ་ནས་བདག་གི་དྲུང་དུ་རྒྱུགས། །ཡུད་ཙམ་ཞིག་ནས་འབྲོང་པའི་དཔོན། །བཀྲ་ཤིས་དབང་གྲགས་སླེབས་བྱུང་བས། །ཡུལ་ལྷའི་བསང་ཞིག་བྱེད་དགོས་གསུང་། །མི་ལྷ་གཉིས་ཀས་བསྐུལ་བར་གོ །དེ་ཕྱིར་རཱ་ག་ཨ་སྱས་བྲིས་པའོ། །དགེ་ལེགས་འཕེལ།། །། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།