རྩམ་གཉན་རྨི་ཏིའི་བསྟོད་གསོལ།
རྩམ་གཉན་རྨི་ཏིའི་བསྟོད་གསོལ་བཞུགས་སོ། །བཙན་ཐབས་བཤོས་བུ་ཟུར་གསུམ་དཔལ་བཤོས་གྲུ་བཞི་ཕྱེ་མར་ཆང་ཕུད་ཡོས་བཀྲ་མཆོད་རྫས་རྒྱ་ཆེན་མང་བས་འདི་སྐོར། ཀྱཻ། ཡུལ་ནི་སཾ་ཕུའི་ལྷ་ཡུལ་ན། །སྤྲིན་དང་ན་བུན་ནང་ཤེད་ནས། །མཐིང་བྲང་སྔོན་པོ་ཟངས་སེ་ཟང་། །གཡུ་མཚོ་དུང་མཚོ་མེ་རེ་རེ། །གཡུ་ཡི་ན་བུན་ཐུ་ལུ་ལུ། །དུང་གི་ཁུ་ཕང་ཤ་ར་ར། །གཡུ་ཡི་ཆར་པ་སི་ལི་ལི། །འདབ་ཆགས་སྐད་སྙན་ཏི་རི་རི། །རི་དྭགས་ཤ་སྐོ་སངས་སེ་སང་། །གཅན་གཟན་གཡི་སྤྱང་ཞུངས་སེ་ཞུང་། །གནས་ཡུལ་དེ་ན་བཞུགས་པ་ནི། །ཡུལ་ལྷ་རྩམ་གཉན་རྨི་ཏི་ནི། །སྐུ་མདོག་དཀར་པོ་དུང་འོད་འབར། །སྐུ་ལ་ན་བཟའ་དམར་སྨུག་གསོལ། །དབུ་ལ་སག་ཞུ་ཁྲ་བོ་མནབས། །ཕྱག་གཡས་དར་མདུང་ཁྲ་བོ་སྦྱར། །ཆིབས་སུ་མཚལ་རྟ་རྟིང་དཀར་ཆིབས། །འཁོར་ཡང་ཉིད་འདྲ་བརྒྱད་ཀྱིས་བསྐོར། །ཕུད་ཀྱི་མཆོད་པ་འདི་བཞེས་ལ། །སངས་རྒྱས་བསྟན་པ་སྲུང་བར་མཛོད། །རྣལ་འབྱོར་༈ བདག་གི་སྡོང་གྲོགས་མཛོད། །ཀྱཻ། དེ་ཡི་བློན་པོ་བསྲོ་རང་ནི། །སྐུ་མདོག་དམར་པོ་འོད་དུ་འབར། །སྐུ་ལ་ཟབ་འོག་བེར་ཧྲཱིལ་གསོལ། །གཡས་ན་ལྕགས་གྲི་ནག་པོ་
ཡིས། །དགྲ་བོའི་སྤྱི་ཡི་གཏིང་དུ་གཤེད། །གཡོན་པས་ལྕགས་ཀྱུའི་དགྲ་སྙིང་དྲོངས། །ཆིབས་སུ་བདུད་རྟ་ནག་པོ་ཆིབས། །ལྷ་རྟ་གྲོ་ཞུར་རོལ་དུ་ཁྲིད། །ཕུད་ཀྱི་མཆོད་གཏོར་འདི་བཞེས་ལ། །སངས་རྒྱས་ཆོས་ཀྱི་བསྟན་པ་སྲུངས། །རྣལ་འབྱོར་བདག་གི་སྡོང་གྲོགས་མཛོད། །སྡང་བའི་དགྲ་བོ་མ་ཤོར་ཁུག །བཅོལ་བའི་ཕྲིན་ལས་འགྲུབ་པར་མཛོད་།ཀྱཻ། དེ་རིང་ནམ་མཁའ་ཐམས་ཅད་དར་གྱིས་ཁེངས། །ས་གཞི་ཐམས་ཅད་དམག་གིས་ཁེངས། །ཐོག་སེར་ཆར་པ་དགྲ་ལ་ཕོབ། །སྤྲུལ་པ་སྣ་ཚོགས་དགྲ་ལ་ཐོངས་། །བརྒྱ་བྱིན་རི་བྱིན་ཕོ་ཉ་དང་། །བདུད་བཙན་རྣམས་ཀྱི་སྡང་དགྲ་སོད། །མཚོན་ཆ་སྣ་ཚོགས་དགྲ་ལ་རྒྱོབས། །ཁམས་གསུམ་ཟིལ་གྱིས་དབང་དུ་སྡུས། །དགྲ་བོ་ཐམས་ཅད་ཆམ་ལ་ཕོབ། །སྡང་བར་བྱེད་པའི་དགྲ་བགེགས་རྣམས། །ཐལ་བ་རྡུལ་དུ་བརླག་པར་མཛོད། །གཤའ་སེར་ཐོག་གསུམ་སྣ་མ་འདྲེན། །བཅོལ་བའི་ཕྲིན་ལས་འགྲུབ་པར་མཛོད། །བསང་གཏོར་བསྔོས་མཆོད་པ་གང་ཡང་རུང་དེ་སྐད་རཱ་ག་ཨ་སྱས་སྨྲས་སོ། །རྩམ་གཉན་རྨི་ཏིའི་མཆོད་བསྟོད་རྫོགས་སོ།། །།