སྨུག་པོ་ལྷ་རྩེའི་གཏོར་བསྔོས།
སྨུག་པོ་ལྷ་རྩེའི་གཏོར་བསྔོས་ནི། ཀ་ཡེ་གསོན་དང་དགེ་བསྙེན་མཆེད་གསུམ་པོ། །ཁ་བ་ཅན་དུ་བྲག་ནག་བདུད་ཀྱི་རྫོང་། །ག་ནས་བྱས་ཀྱང་གནས་བདག་ཁྱོད་ཡིན་པས་། །ང་ཡིས་ཁྱོད་ལ་མཆོད་ཅིང་བསྟོད་པའི་ཕྱིར། །ཅ་ཅོའི་དབྱངས་དང་རོལ་མོའི་སྤྱན་འདྲེན་ནོ། །ཆ་ལུགས་ལྷ་བདུད་ཀླུ་ཡི་གཟུགས་ཅན་ལ། །ཇ་ཆང་ཕུད་དང་གཏོར་མའི་མཆོད་པ་འབུལ། །ཉ་རྒྱས་ཟླ་ལྟར་དགེ་ལེགས་རྒྱས་པ་དང་། །རྟ་ནོར་ལུག་སོགས་གོད་ཁ་ཞི་བར་མཛོད། །ཐ་ན་བྲན་གཡོག་སྒོ་ཁྱི་ཡན་ཆད་ལ། །ད་ནི་ཁ་འཛིན་སྡོང་གྲོགས་མ་གཡེལ་བར། །ན་ཚ་ཤི་ཆད་གོད་ཁ་བཟློག་པར་མཛོད། །པ་དེ་པུ་དེའི་ཕྱི་ནང་འཁྲུག་རྩོད་དང་། །ཕ་རོལ་དགྲ་ཇག་ཆོམ་རྐུན་གཅན་གཟན་རྣམས། །བ་མོར་ཉི་ཟེར་ཕོག་ལྟར་མེད་པར་མཛོད། །མ་གྱུར་སེམས་ཅན་ཀུན་ལ་ཕན་པའི་ཕྱིར། །ཙ་ཁ་ལོ་ཏོག་རྟག་ཏུ་ལེགས་པ་དང་། །ཚ་གྲང་འདུས་པའི་ནད་རིགས་མེད་པར་མཛོད། །ཛ་ཡེ་པདྨ་འབྱུང་གནས་བཀའ་བཞིན་ཏུ། །ཝ་ལེར་མངོན་ཤེས་ལྡན་པ་མཆེད་གསུམ་པོ། །ཞྭ་ལྟར་ཆོས་བྱེད་སྤྱི་བོར་ཁུར་བར་མཛོད། །ཟ་བྱེད་ལྷ་བཙན་ཀླུ་ཡི་འཁོར་ཚོགས་
རྣམས། །འ་འུར་འབྲུག་སྒྲ་ཐོག་སེར་དྲག་པོར་བཅས། །ཡ་མ་ར་ཙ་ལྟ་བུའི་གཏུམ་དྲག་ཅན། །ར་ཅན་སྟོང་གི་འཁོར་ཚོགས་དང་བཅས་པ། །ལ་ཆེན་དགེ་བསྙེན་མཆེད་གསུམ་འཁོར་བཅས་ལ། །ཤ་ཆང་གཏོར་མའི་མཆོད་པ་འདི་བཞེས་ལ། །ས་ཆ་གར་འགྲོ་གར་འདུག་ཁ་འཛིན་མཛོད། །ཧ་ཧ་དགྱེས་པའི་གད་རྒྱངས་འཛུམ་ཞལ་ཅན། །ཨ་ལ་ལ་ཧོ་གང་འདོད་དངོས་གྲུབ་སྩོལ། །ཨ་རཱ་གས་སོ།། །།