ཡུལ་ལྷ་དབྱི་བྲོ་མཆོད་པར་བྱེད་པའི་ཐབས།
ཡུལ་ལྷ་དབྱི་བྲོ་མཆོད་པར་བྱེད་པའི་ཐབས་བཞུགས་སོ།། ༈ ན་མོ་པྲ་ཝ་ཀཱ་ར་ཡེ། གུ་རུ་རིན་པོ་ཆེ་ལ་ཕྱག་འཚལ་ལོ། །ཡུལ་ལྷ་དབྱི་བྲོ་མཆོད་པར་བྱ་བའི་ཐབས། །གཏོར་མ་ཟུར་གསུམ་ཁྲག་སྤང་ཤ་མར་བརྒྱན། །འབྲུ་སྣ་དཀར་གསུམ་ཇ་ཆང་ཕུད་རྒོད་བཤམས། །བསྡུ་ན་ལྕོག་རྡོག་གཅིག་ལ་བསྔོ་ཡང་ཆོག །རང་ཉིད་པདྨ་འབྱུང་གནས་གསལ་བ་ཡིས། ཐུགས་ཀའི་འོད་འཕྲོས་སྤྱན་དྲངས་མདུན་བཞུགས་བསམ། །རྡོ་རྗེ་གདན་གྱི་བྱང་ཕྱོགས་ནས། །རྒྱལ་བས་ལུང་བསྟན་གདོང་དམར་ཡུལ། །ཐུགས་རྗེ་ཆེན་པོས་བྱིན་རླབས་པའི། །གངས་ཅན་ཤར་ཕྱོགས་མདོ་ཁམས་ལྗོངས། །རྨ་གཡང་ཆགས་པ་ངོམ་ཡུལ་སྟོད། །བྱ་རྒོད་ཕུང་པོ་འདྲ་བའི་རི། །རྩེ་ནི་ཟུར་གསུམ་དགུང་ན་ཉུག །ཞལ་ནི་ནོར་ལྷའི་ཕྱོགས་སུ་གཟིགས། །རིན་ཆེན་བྲག་གི་ཟུར་ཕུད་ཅན། །སྤྲིན་དཀར་ལྡིང་བའི་ཅོད་པན་ཅན། །ལྗོན་ཤིང་ནེའུ་སིང་སྐྱིད་མོས་ཚལ། །གྲོང་ཁྱེར་ཕྲེང་བས་ཀུན་ནས་བསྐོར། །དེ་དབུས་ཡིད་ལས་གྲུབ་པ་ཡི། །རིན་ཆེན་ལས་གྲུབ་སྐུ་མཁར་ནི། །གཉན་ཆེན་དབྱི་བྲོ་འཁོར་དང་བཅས། །མཆོད་པས་གནས་འདིར་སྤྱན་འདྲེན་ན། །སྐད་ཅིག་ཙམ་གྱིས་གཤེགས་སུ་གསོལ། །གཙོ་འཁོར་འཚམས་པའི་གདན་
ལ་བཞུགས། །སྔོན་ཚེ་པདྨ་འབྱུང་གནས་དང་། །གྲུབ་ཆེན་གོང་འོག་སྤྱན་སྔ་རུ། །ཇི་ལྟར་ཁས་བླངས་དྲན་མཛོད་ལ། །ཡུལ་ཕྱོགས་བདེ་སྐྱིད་ལྡན་པ་དང་། །བདག་གི་ཅི་བསམ་འགྲུབ་པར་མཛོད། །བྷུ་མི་པ་ཏི་ས་པཱ་རི་ཝཱ་ར་བཛྲ་ས་མ་ཡ་ཛ༔ ཛཿཧཱུྃ་བཾ་ཧོ༔ ཏིཥྛ་ལྷན། ས་མ་ཡ་ཧོ༔ ཧཱུྃ། གཉན་ཆེན་དབྱི་བྲོ་འཁོར་བཅས་ལ། །དངོས་འབྱོར་ཡིད་ཀྱིས་སྤྲུལ་པ་ཡི། ཉེར་སྤྱོད་བདུན་དང་འདོད་ཡོན་ལྔ། །བཀྲ་ཤིས་རྫས་རྟགས་རིན་ཆེན་བདུན། །གཡག་ལུག་ར་གསུམ་བྱ་རྟ་གླང་། །དར་ཟབ་འབྲུ་སྣ་རིན་ཆེན་ལྔ། །དཀར་གསུམ་མངར་གསུམ་ཇ་ཆང་ཕུད། །ཀླུ་སྨན་ཤེལ་ཚིགས་ཕྱེ་མར་གསུར། །ཟད་མེད་མཆོད་པའི་སྤྲིན་ཕུང་འབུལ། །འཁོར་བཅས་མཉེས་ཤིང་ཚིམ་གྱུར་ཅིག །འཁོན་འགྲས་འགྲམ་འཁྲུག་ཞི་བར་མཛོད། །ཉམས་རྒུད་རྨུགས་པ་སངས་གྱུར་ཅིག །གཟི་བརྗིད་མཐུ་སྟོབས་རྒྱས་གྱུར་ཅིག །བདག་དང་ཡོན་བདག་འཁོར་བཅས་ཀྱི། །ཁ་འཛིན་སྡོང་གྲོགས་རྒྱབ་རྟེན་མཛོད། །བྷུ་མི་པ་ཏི་ས་པཱ་རི་ཝཱ་ར་སརྦ་པཱུ་ཙ་པྲ་ཏིཙྪ་སྭཱ་ཧཱ། ཨ་ཀཱ་རོ་སོགས། ཧཱུྃ་ལས་རིན་ཆེན་སྣོད་ནང་དུ། །ཁཾ་ལས་གཏོར་མ་བདུད་རྩིའི་མཚོ། །ཁ་
དོག་རོ་བཅུད་ཕུན་སུམ་ཚོགས། །ཟག་མེད་བདེ་བ་བསྐྱེད་པའི་རྫས། །ཧ་ཧོ་ཧྲཱིཡིས་བྱིན་གྱིས་བརླབས། །ཟད་མེད་ལོངས་སྤྱོད་རྒྱ་ཆེན་འདི། །ཡུལ་ལྷ་གཉན་ཆེན་དབྱི་བྲོ་ནི། །མཆེད་ཟླ་སྲས་དང་བཙུན་མོ་དང་། །བློན་པོ་འཁོར་དང་ཡང་འཁོར་བཅས། །ཐམས་ཅད་ཀུན་ལ་འབུལ་ལགས་ཀྱིས། །དགྱེས་པ་ཆེན་པོས་བཞེས་སུ་གསོལ། །དྭ་གདན་དམར་སྭཱ་ཧཱ། ངེས་པ་ས་རི་ཝི་རེ། ས་པཱ་རི་ཝ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་མམ་བདུན་གྱིས་ཕུལ། ཧཱུྃ། ཡུལ་ལྷ་གཉན་ཆེན་དབྱི་བྲོ་ནི། །སྐུ་མདོག་མཐིང་ནག་འབར་བ་ལ། །ཁྲོ་འཛུམ་བཞད་པའི་ཉམས་དང་ལྡན། །དབུ་ལ་སྟག་ཞུ་ཁྲ་བོ་གསོལ། །སྟག་ལྤགས་ཁྲ་བོས་ཤམ་ཐབས་ཅན། །འཇའ་ཚོན་སྣ་ལྔའི་ཆ་ག་ཅན།། །སྟག་རལ་གཟིག་ཤུབས་སྐེད་ལ་བསྐོར། །ཕྱག་གཡས་རྡོ་རྗེ་མདའ་དར་ཕྱར། །གཡོན་པས་དྲིལ་བུ་ཐུགས་ཀར་འཁྲོལ། །ཆིབས་སུ་དུང་རྟ་གཡུ་རྔོག་ཆིབས། །མཆེད་དང་སྲས་དང་བློན་པོའི་ཚོགས། །ཆ་ལུགས་རང་འདྲ་བཅུ་གཉིས་བསྐོར། །བཙུན་མོ་ལྕམ་སོགས་སྨན་གྱི་འཁོར། །དར་ཟབ་གསེར་གཡུ་མུ་ཏིག་བརྒྱན། །གླུ་ལེན་བྲོ་
བརྡུང་གར་སྟབས་འཁྱུགས། །འཁོར་དང་ཡང་འཁོར་སྟོང་ཕྲག་རྣམས། །སྐྱ་མི་དང་ནི་རྐང་ཐང་ཚོགས། །ཀུ་བསྲོ་ཆོ་སྒྲ་དི་རི་རི། །ཡུལ་ལྷ་དབྱི་བྲོ་འཁོར་བཅས་ལ། །གསོལ་ལོ་མཆོད་དོ་ངོ་སོ་བསྟོད། །ཁྱེད་ནི་ཡུལ་འདིར་གནས་པའི་ལྷ། །བདག་ཅག་ཡུལ་འདིར་འདུག་པའི་མི། །མིས་ཀྱང་ལྷ་ལ་དུས་སུ་མཆོད། །ལྷས་ཀྱང་མི་ལ་ཁ་འཛིན་མཛོད་།གནས་མགྲོན་གཉིས་ཀྱི་དམ་ཚིག་སྲུངས། །ཉིན་གྱི་དུས་སུ་བྱ་ར་གྱིས། །མཚན་གྱི་དུས་སུ་མེལ་ཚེ་གྱིས། །ཕྱི་ནང་འཁྲུག་རྩོད་ཞི་བར་མཛོད། །མི་ནད་ཕྱུགས་ནད་ཞི་བར་མཛོད། །དབྱར་དང་དཔྱིད་ལ་ཆར་ཆེན་ཕོབ། །སྟོན་དུས་སད་དང་སེར་བ་ཁོག །དགྲ་རྐུན་ཇག་པ་བྱུང་བའི་ཚེ། །ར་མདའ་རྗེས་གཅོད་མ་གཡེལ་ཅིག །གོད་ཁ་གཅན་གཟན་གནོད་པ་ཟློག །ཡུལ་མི་དར་ཞིང་རྒྱས་པ་དང་། །བཀྲ་ཤིས་བདེ་ལེགས་འཕེལ་བར་མཛོད། །འབག་བཙོག་མཆོད་པ་དམན་པ་དང་། །ཕོག་ཐུག་ཉེས་པ་གང་བྱུང་བཤགས། །ཡུལ་ལྷ་མ་འབྲོས་མ་འཁྱམས་ལ། །བླ་རི་གསེར་མཁར་ཉིད་ལ་བཞུགས། །ཕ་དང་ཁུ་བོ་སྤུན་ཟླ་ལྟར། །རྟག་ཏུ་ཁ་འཛིན་སྡོང་གྲོགས་མཛོད། །མི་འཕེན་
རྟ་ཧྲག་བཙན་ཕྱུག་ལྡན། །ཡུལ་ལྷ་གཉན་པོའི་དངོས་གྲུབ་དེ། །ཁུ་ཡེ་ཕྱྭ་དང་གཡང་དུ་ལེན། །དུ་གདན་དམར་སྭཱ་ཧཱ། སརྦ་སིདྡྷི་ཧཱུྃ། རྟོགས་ལྡན་སྟོབས་བཅུ་བཏང་ནས་གསེར་མཁར་བརྫོགས་བཙུག་ནས་ཆར་པ་ཕབ་རྗེས་སུ་གསས་མཁར་བསྟོད་དུས། རཱ་ག་ཨ་སྱས་སྨྲས་སོ།། །། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།