དགེ་བསྙེན་རྨོ་བིལ་གྱི་གསོལ་མཆོད།
དགེ་བསྙེན་རྨོ་བིལ་གྱི་གསོལ་མཆོད་བཞུགས་པའི་དབུ་ཕྱོགས་ལགས་སོ།།
ན་མོ་གུ་རུ་པདྨ་ཀྲོ་དྷ་ཡེ། རྡོ་རྗེ་གྲོ་ལོད་ཞབས་ལ་ཕྱག་འཚལ་ལོ། །དགེ་བསྙེན་རྨོ་བིལ་མཆོད་པར་བྱེད་པའི་ཐབས། །བཙན་བཤོས་ཟུར་གསུམ་ཁྲག་སྤངས་ཤ་གཙང་བརྒྱན། །ཕྱེ་མར་ཇ་ཆང་ཕུད་སོགས་འཛོམས་ན་བཤམས། །མེད་ན་གཏོར་ཆུང་ཟུར་གསུམ་དུམ་པའི་འཐུས། །རང་ཉིད་པད་འབྱུང་ཞི་དྲག་གང་རུང་བསྐྱེད། །འཇིག་རྟེན་པ་ལ་དམ་ཚིག་བསྐྱེད་མི་དགོས། །ཐུགས་ཀའི་ཧཱུྃ་ལས་འོད་ཟེར་འཕྲོས་པ་ཡིས། །འཁོར་བཅས་སྤྱན་དྲངས་མདུན་ཏུ་བཞུགས་པར་དམིགས། །འདི་ཉིད་འདོན་བསྒོམས་བྱས་པས་ཆོག་པ་ཡིན། །ཧཱུྃ། གདོང་དམར་ཡུལ་གྱི་ཤར་ཕྱོགས་མདོ་ཁམས་ལྗོངས། །ས་ལ་གཡང་ཆགས་ངོམ་དུ་རུང་བའི་སྟོད། །རྡོ་རྗེའི་བྲག་སྟེང་ལུང་
པའི་ཕུ་སྟོད་ན། །སོག་པོ་ཚོང་ལས་ཆས་པ་འདྲ་བའི་རི། །བྲག་དམར་རྔམས་བརྗིད་གནམ་དུ་ཟངས་སེ་ཟང་། །ལྗོན་ཤིང་སྣ་ཚོགས་ནགས་ཚལ་ཐིབས་སེ་ཐིབ། །སྤང་ལྗོངས་ནེའུ་སིང་མེ་ཏོག་ཡ་ལ་ལ། །གཅན་གཟན་སྣ་ཚོགས་ངར་སྐད་འུ་རུ་རུ། །རི་དྭགས་སྣ་ཚོགས་རྩེ་ཀྱུ་སྤྲེངས་སེ་སྤྲེང་། །བྱ་རིགས་སྣ་ཚོགས་གཤོག་གདང་ཁྲིགས་སེ་ཁྲིག །བཙན་བྱ་འུག་པས་ཧཱུྃ་སྒྲ་དི་རི་རི། །ཕྱི་ནི་བྲག་དམར་ནང་ནི་ཟངས་ཀྱི་མཁར། །ལོངས་སྤྱོད་བཀོད་པ་ཕུན་སུམ་ཚོགས་པ་ནས། །དགེ་བསྙེན་རྨོ་བིལ་འཁོར་བཅས་སྤྱན་འདྲེན་ན། །སྐད་ཅིག་ཉིད་ལ་
གནས་འདིར་གཤེགས་སུ་གསོལ། །ཡིད་སྤྲུལ་གཙོ་འཁོར་འཚམས་པའི་གདན་ལ་བཞུགས། །སྔོན་ཚེ་པདྨ་འབྱུང་གནས་སྤྱན་སྔ་རུ། །ཇི་ལྟར་ཁས་བླངས་དམ་ཚིག་དྲན་མཛོད་ལ། །རྣལ་འབྱོར་བདག་གི་བསམ་པ་འགྲུབ་པར་མཛོད། །བྷུ་མི་པ་ཏི་ས་པཱ་རི་ཝཱ་ར་བཛྲ་ས་མ་ཡ་ཛ༔ ཛ༔ཧཱུྃ་བཾ་ཧོ༔ ཏིཥྛ་ལྷན། ས་མ་ཡ་ཧོ༔ ཧཱུྃ། དགེ་བསྙེན་རྨོ་བིལ་འཁོར་བཅས་མཆོད་པའི་རྫས། །མེ་ཏོག་བདུག་སྤོས་སྣང་གསལ་དྲི་ཆབ་བཤོས། །གཟུགས་སྒྲ་དྲི་རོག་རེག་བྱ་ཕུན་སུམ་ཚོགས། །བདུད་རྩི་གསེར་སྐྱེམས་ཇ་ཕུད་ཕྱེ་མར་གསུར། །འབྲུ་སྣ་སྨན་སྣ་རིན་ཆེན་སྣ་ཚོགས་དང་། །དར་ཚོན་བལ་ཚོན་ཤེལ་ཚིགས་ཟས་སྣའི་ཕུད། །གཡག་ལུག་བྱ་རིགས་རི་དྭགས་གཡུང་དྭགས་གཟུགས། །མདའ་དར་ཤིང་རིས་ལ་སོགས་མཆོད་པ་འབུལ། །འཁོར་བཅས་རབ་ཏུ་མཉེས་ཤིང་ཚིམ་གྱུར་ཅིག །ཁྱད་པར་ཧཱུྃ་ལས་རིན་ཆེན་སྣོད་མཆོག་ཏུ། །གཏོར་མ་སོ་སོའི་ཡིད་མཐུན་ལོངས་སྤྱོད་ཚོགས་། །ཧ་ཧོ་ཧིཡིས་བྱིན་གྱིས་བརླབས་བྱས་ཏེ། །དགེ་བསྙེན་རྨོ་བིལ་བཙུན་མོ་སྲས་དང་བཅས། །འཁོར་དང་ཡང་འཁོར་བཅས་པ་ཀུན་ལ་འབུལ། །ཐམས་ཅད་དགའ་
མགུ་ཡི་རང་ལྡན་གྱུར་ཅིག །ཨ་ལི་ཤེས་སེ་ཤེས་སེ་རེ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨབྷཾ་སོགས། ཧཱུྃ། དགེ་བསྙེན་ཆེན་པོ་རྨོ་བིལ་ནི། །སྐུ་མདོག་དམར་སྨུག་འཇིགས་པ་ལ། །སྤྱན་མིག་སྐར་ཆེན་ཤར་བ་འདྲ། །རྣོ་དབལ་མཆེ་བཞི་རབ་ཏུ་གཙིགས། །དབུ་སྐྲ་རལ་པ་སྤྲིན་ལྟར་གཏིབས། །སྐུ་ལ་ཕྲུག་དམར་ན་བཟའ་གསོལ། །སྟག་གཟིག་ལྤགས་པའི་གོང་ཤམ་ཅན། །དབྱི་སྲམ་ལྤགས་པའི་མུ་རན་ཅན། །དར་ཚོན་སྣ་ལྔའི་འཇའ་རིས་བཀྲ། །སྟག་རིས་གཟིག་ཤུབས་སྐྱེད་ལ་བསྐོར། །བཙན་རྟ་དམར་པོ་འཕུར་ཤེས་ཆིབས། །ཕྱག་གཡས་མདུང་དར་དམར་པོ་ཕྱར། །གཡོན་པས་གཞོང་པ་ཟས་སྣས་བཀང་། །སྤྲུལ་པ་བན་དེ་ཆས་བཟང་དང་། །བུ་ཆུང་རལ་པ་ཅན་དུ་སྤྲུལ། །བཙུན་མོ་ལྕམ་དང་སྨན་གྱིས་འཁོར། །དར་ཟབ་གསེར་གཡུས་ལུས་ལ་བརྒྱན། །སྦ་གླིང་སྨྱུག་གླིང་རྩེ་བྲོ་འཁྲབ། །འཁོར་དུ་ཡུལ་ལྷ་བརྒྱ་ཕྲག་༈་རྣམས། །སྐྱ་མའི་ཚོགས་དང་རྐང་ཐང་ཚོགས། །གོ་ཆ་སྲ་ལ་མཚོན་ཆ་རྣོ། །ཀི་བསྲོ་ཆ་སྒྲ་དི་རི་རི། །བཙན་རྒོད་རྨོ་བིལ་འཁོར་བཅས་ལ། །གསོལ་ལོ་མཆོད་དོ་ངོ་སོ་
བསྟོད། །འཁོར་བཅས་མཉེས་ཤིང་ཚིམ་གྱུར་ཅིག །རྨུགས་དང་རྒུད་པ་སང་གྱུར་ཅིག །བཀྲག་མདངས་གཟི་བརྗིད་རྒྱས་གྱུར་ཅིག །ཕོག་ཐུག་འཁོན་འགྲས་ཞི་གྱུར་ཅིག ། ཡུལ་ལྷ་ཁྱོད་ལ་མཆོད་པའི་མཐུས། །ཡུལ་ཕྱོགས་བདེ་ཞིང་སྐྱིད་པ་དང་། །རྣལ་འབྱོར་བདག་ཅག་འཁོར་བཅས་ཀྱི། །བསམ་པ་ཡིད་བཞིན་འགྲུབ་པ་དང་། །བཀྲ་ཤིས་བདེ་ལེགས་རྒྱས་པར་མཛོད། །ཅེས་ཆར་འབོད་དུས་རྟོགས་ལྡན་སྟོབས་བཅུ་གསས་མཁར་བརྫོགས་སུ་བཏང་བས། འབྲུག་གློག་ཐོག་འཚུབ་པ་དང་བཅས་ཆར་དྲག་བབ་ཅིང་ཆར་བསླང་འཁྲིགས། གསས་མཁར་བསྟོད་དུས་འདོན་རྒྱུ་རཱ་ག་ཨ་སྱས་སྨྲས་པ་ལྟར། ཉེ་གནས་ཀུན་དགས་ཡི་གེར་བྲིས་པ་ལ། ཉེས་འགལ་མཆིས་ནི་བཤགས་ཤིང་དགེ་བས་ཡུལ་ཕྱོགས་བཀྲ་ཤིས་བདེ་ལེགས་སུ་གྱུར་ཅིག །འདི་བསང་གི་ཞོར་ལ་འདོན་ན་ཁུ་ཡེའི་གོང་དུ་འདོན། རང་ཁྱིམ་དུ་འདོན་ན། སརྦ་བྷུ་ཏ་གཙྪ། ཞེས་སེལ་གོལ་བརྡབས་པས། རང་གནས་སུ་གཤེགས་པར་བསམ་ལ་གཏོར་མ་རིའི་ཕྱོགས་སུ་ཕུལ་ལོ། །གཏོར་མ་མེད་ཀྱང་ཇ་ཕུད་ཆང་ཕུད་ལ་བསྔོ་ནས་མཆོད་ཆོག །འདི་སྟོ་སྟོད་སྨད་ན་འདུག་པའི་མིས་མཆོད་ན་བཀྲ་ཤིས་སོ། །སརྦ་མངྒ་ལཾ།། །།