སྒོ་སྲུང་ར་དཀར་གྱི་གསོལ་མཆོད།
སྒོ་སྲུང་ར་དཀར་གྱི་གསོལ་མཆོད་བཞུགས་ལགས་སོ། །གུ་རུ་རིན་པོ་ཆེ་ལ་ཕྱག་འཚལ་ལོ། །གནས་བདག་སྒོ་སྲུང་ར་དཀར་མཆོད་པའི་ཐབས། །དཀར་གཏོར་ཀླུ་སྨན་བཏབ་པ་གཅིག་བཤམས་ཏེ། །རང་ཉིད་པད་འབྱུང་ལ་སོགས་ཡི་དམ་བསྒོམ། །ཨ་ཀཱ་རོ་ཡིས་བྱིན་གྱིས་བརླབས་བྱས་ནས། །ཀྱཻ། མདོ་ཁམས་ཤར་ཕྱོགས་ངོམ་དུ་རུང་བའི་སྟོད། །ནོར་བུ་འབར་བ་འདྲ་བའི་རིན་ཆེན་བྲག །ལྗོན་ཤིང་ནེའུ་སིང་ཆུ་མིག་སྤང་ལྗོངས་བཀྲ། །དེ་དབུས་རིན་ཆེན་ལས་གྲུབ་སྐུ་མཁར་ནས། །ཀླུ་བདུད་དགེ་བསྙེན་ཆེན་པོ་དམ་ཚིག་ཅན། །།སྒོ་སྲུང་ར་དཀར་གཉན་པོ་སྤྱན་འདྲེན་ན། །ཞི་ལྟ་ཞིང་བྱམས་པའི་ཐུགས་ཀྱིས་གཤེགས་སུ་གསོལ། །ཡིད་སྤྲུལ་དགྱེས་པའི་གདན་ལ་བཞུགས་ནས་ཀྱང་། །སྔོན་ཚེ་སློབ་དཔོན་པདྨའི་སྤྱན་སྔ་རུ། །ཇི་ལྟར་ཁས་བླངས་དམ་ཚིག་དྲན་མཛོད་ལ། །བདག་གི་བསམ་པའི་དོན་རྣམས་འགྲུབ་པར་མཛོད། །ཨོཾ་ནཱ་ག་ར་ཙ་ས་པཱ་རི་ཝཱ་ར་བཛྲ་ས་མ་ཡ་ཛ༔ ཛཿཧཱུྃ་བཾ་ཧོ༔ ས་མ་ཡ་ཧོ༔ ཧཱུྃ། དངོས་སུ་འབྱོར་དང་ཡིད་ཀྱིས་སྤྱི་རྣམ་སྤྲུལ་པའི། །ཉེར་སྤྱོད་བདུན་དང་འདོད་པའི་ཡོན་ཏན་ལྔ། །བཀྲ་ཤིས་རྫས་རྟགས་བརྒྱད་དང་རིན་ཆེན་བདུན། །དཀར་གསུམ་མངར་གསུམ་དར་ཟབ་ཀླུ་སྨན་དང་། །དམ་
རྫས་བརྒྱན་པའི་གཏོར་མ་རྒྱ་ཆེན་འདི། །ར་དཀར་གཉན་པོ་འཁོར་དང་བཅས་ལ་འབུལ། །རྒྱབ་རྟེན་ངོམ་རྒྱལ་མཚོ་བཀྲ་རི་ཕྱུག་མ། །མགར་ནག་འཇམ་རྒྱལ་ག་ཡ་བཙོས་རུ་མ། །གཉན་གྱི་ཕ་བོང་ར་དཀར་ལ་སོགས་འདིར། །གནས་པའི་ཡུལ་ལྷ་གཞི་བདག་ཀུན་ལ་འབུལ། །ཐམས་ཅད་མ་ལུས་མཉེས་ཤིང་ཚིམ་གྱུར་ཅིག །ཨོཾ་ནཱ་ག་ར་ཙ་ས་པཱ་རི་ཝཱ་ར་ཨི་དཾ་བ་ལི་ཏ་ཁ་ཁ་ཁཱ་ཧི་ཁཱ་ཧི། ལན་གསུམ། བསྟོད་པ་ནི། ཧཱུྃ། ཀླུ་བདུད་དགེ་བསྙེན་ར་དཀར་ནི། །སྐུ་མདོག་སྔོན་པོ་འཛུམ་པའི་ཉམས། །སྐུ་ལ་དར་སྔོན་བེར་ཆེན་གསོལ། །ཕྱག་ན་ཐོ་བ་འབིག་གྲི་འཛིན། །སྦྲུལ་སྔོན་ལྤགས་པས་སྟོད་ཁེབས་ཅན། །དབུ་ལ་མཐིང་གཞུ་གདུགས་ཐེབས་གསོལ། །ཆིབས་སུ་སྔོན་པོ་རྔོག་ནག་ཆིབས། །འཁོར་ནི་བྱིསྦ་མང་པོ་ཡི། །ལྷུང་བཟེད་སྟག་གྲི་ལག་ན་ཐོགས། །སྤྲུལ་པ་སྦྲུལ་དཀར་སྤྱང་ཉི་འགྱེད། །གསོལ་ལོ་མཆོད་དོ་ངོ་སོ་བསྟོད། །གནས་མགྲོན་གཉིས་ཀྱི་དམ་ཚིག་སྲུངས། །ཡུལ་ལྷ་མ་འབྲོས་མ་འཁྱམས་པར། །རང་གནས་རི་ལ་བརྟན་པར་བཞུགས། །ས་ཐོ་ལྷུད་ལྷུད་ཕཊ་བྱ་བ་འཇིག་འཇིག་སརྦ་སིདྡྷི་སྭཱ་ཧཱ། ཞེས་རྟོགས་ལྡན་ཕྲིན་ལས་ཀྱིས་བསྐུལ་ཕྱིར་རཱ་ག་ཨ་སྱས་སྦྱར་བ་མངྒ་ལཾ། །