ཡུལ་ལྷ་མཆོད་པའི་ཆོ་ག
ཡུལ་ལྷ་མཆོད་པའི་ཆོ་ག་བཞུགས་པའི་དབུ་ཕྱོགས་ལགས་སོ། །ན་མོ་པདྨ་ཀ་ར་ཡེ། རྡོ་རྗེ་དྲག་པོ་རྩལ་ལ་གུས་བཏུད་ནས། །ཡུལ་ལྷ་མཆོད་པའི་ཆོ་ག་བྲི་བར་བྱ། །དེ་ཡང་གུ་རུ་དྲག་པོའི་དྲེགས་པའི་སྲོག་དབང་ལས། ཆོས་སྤྱོད་ཆོས་སྒོར་ཞུགས་ནས་ཀྱང་། །ཡུལ་འདིར་གནས་པའི་གཞི་བདག་དང་། །ལྷ་སྲིན་སྡེ་བརྒྱད་ཐམས་ཅད་ལ། །གསོལ་ཀ་མཆོད་པ་བྱས་ན་ཤིས། །ཞེས་གསུངས་པ་དང་། དཀྱིལ་འཁོར་ལས་རིམ་ཐམས་ཅད་ཀྱི་ཐོག་མར་གནས་བདག་ལ་གཏོར་མ་འབུལ་གསུངས་པས། རྒྱུད་བརྟག་གཉིས་ལས། འབྱུང་པོ་ཐམས་ཅད་ལ་གཏོར་མ་འབུལ་ཚུལ་སྔགས་ཕན་ཡོན་དང་བཅས་པ་རྒྱས་པར་གསུངས་པ་དང་། དཔལ་གསང་བ་འདུས་པའི་རྒྱུད་རྩ་འགྲེལ་རྣམས་ལས། འཇིག་རྟེན་པའི་ལྷ་བྲན་མཐའ་དག་སྒྲུབ་པའི་སྔགས་ལ་མན་ངག་བཤད་པ་དང་། ཁྲོས་མ་ནག་མོ་ལྷ་ལྔའི་ལས་ཚོགས་ལས། འཇིག་རྟེན་པའི་ལྷ་རྒོད་བརྟེན་ཅིང་སྒྲུབ་པའི་ཐབས་གསུངས་པ་དང་། མ་གཅིག་གིས་གཅོད་སྒོ་འབྱེད་བདུན་མར་འཇིག་རྟེན་པའི་གཞི་བདག་གི་དངོས་གྲུབ་སྒྲུབ་པའི་ཐབས་གསུངས་པ་རྣམས་ཀྱི་རྗེས་སུ་འབྲངས་ནས། གཞི་དཀར་པོ་ལ་ནས་ཀྱིས་པདྨ་འདབ་བརྒྱད་བྱ། དེའི་སྟེང་ན་སྣོད་གཙང་མར་དཀར་གཏོར་རྩེ་བརྒྱད་མཐེབ་སྐྱུས་བསྐོར་བ། གཡག་ལུག་ར་བཅས་ཕྱེ་མར་ཕུད་རྒོད། མདའ་རྒོད་སྒྲོ་མ་གཅིག་ལ་དར་དཀར་པོ་བཏགས་པ་རྣམས་བཤམས། བསྡུ་ན་དཀར་གཏོར་གཅིག་ལ་བརྟེན་ནོ། །རང་ཡི་དམ་གང་རུང་ངམ།
ཁྱད་པར་གུ་རུ་ཞི་དྲག་མཆོག་ཏུ་ཤིས་པས། དེའི་ཏིང་འཛིན་ལྡན་པས། ཨོཾ་སྭ་བྷ་ཝས་སྦྱངས། མདུན་དུ་ཤེལ་བྲག་རིན་ཆེན་ཁང་བཟང་དབུས། །ལྷ་ཡི་དགེ་བསྙེན་ནོར་གྱི་བདག་པོ་ནི། །ཀུནྡའི་མདོག་ཅན་ཅང་ཤེས་དཀར་པོ་ཆིབས། །ཞལ་ནི་བརྗིད་མཛེས་དབུ་ལ་དུང་རྨོག་གསོལ། །ལྷ་ཡི་ན་བཟའ་སྟག་རལ་གཟིག་ཤུབས་བཀྲ། །གཡས་པས་བ་དན་གཡོན་པས་སྲབ་སྐྱོགས་བསྒྱུར། །སྨན་དང་བཙན་བདུད་ཡུལ་ལྷ་དུ་མས་བསྐོར། །ཐུགས་ཀའི་འོད་ཀྱིས་འཁོར་བཅས་སྤྱན་དྲངས་གྱུར། །ཧཱུྃ། རྒྱལ་བས་ལུང་བསྟན་གདོང་དམར་བོད་ཀྱི་ཡུལ་།ཐུགས་རྗེ་ཆེན་པོས་བྱིན་རླབས་གངས་ཅན་ལྗོངས། །གྲུབ་ཐོབ་ཀཱིརྟི་ཤྲཱིའི་གདན་གྱི་དྲུང་། །ཤེལ་གྱི་ལྷུན་པོ་དགུང་དུ་རྩེ་མཐོ་བ། །ཆུ་འཛིན་སྔོན་པོའི་བླ་བྲེ་སྟེང་དུ་འཁྲིགས། །དབྱར་སྐྱེས་མགྲིན་རྔ་སྒྲོག་ཅིང་གློག་འོད་འཁྱུགས། །དུས་མིན་གནམ་ལྕགས་ཀིང་ཀང་དྲག་པོ་འབེབས། །སྐད་སྙན་འདབ་ཆགས་སྣ་ཚོགས་ལྡིང་ཞིང་འཇུམ། །དཔལ་བརྗིད་གཅན་གཟན་སྣ་ཚོགས་འགྱིང་ཞིང་རྔམས། །མཛེས་སྡུག་རི་དྭགས་སྣ་ཚོགས་རྩེ་ཞིང་རྒྱུགས། །བླ་མཚོ་རྔམས་བརྗིད་གཡུ་ཡི་ན་བུན་འཐུལ། །དེ་ལྟར་ཡིད་འོང་
མཛེས་པའི་གནས་མཆོག་དབུས། །བཀོད་ལེགས་ཡིད་ལས་གྲུབ་པའི་ཕོ་བྲང་ནས། །གཉན་པོ་ནོར་གྱི་བདག་པོ་ཞེས་གྲགས་པའི། །ཡུལ་ལྷ་ཆེན་པོ་གནས་འདིར་གཤེགས་སུ་གསོལ། །ཁྱོད་ཀྱི་བཀའ་ཉན་བཙན་བདུད་སྨན་གྱི་ཚོགས། །ཡིད་ཀྱི་གཟུགས་འཆང་མ་ལུས་ཐམས་ཅད་ཀྱང་། །བདག་གིས་མཆོད་པ་འབུལ་ཞིང་བཞེས་སུ་གསོལ། །བྱམས་པའི་སེམས་ཀྱིས་མ་ཐོགས་མྱུར་དུ་བྱོན། །ཨོ་བཱ་སུ་པཱ་ཏི་ས་པཱ་རི་ཝཱ་ར་བཛྲ་ས་མ་ཡ་ཛ༔ ཛཿཧཱུྃ་བཾ་ཧོ༔ ཧཱུྃ། ཏིང་འཛིན་དང་ལྡན་ཡིད་ལས་སྤྲུལ་པ་ཡི། །རིན་ཆེན་སྣ་ལྔ་ལས་གྲུབ་མུ་མེན་ཁྲི། །དབང་པོའི་གཞུ་ལྟར་རབ་བཀྲ་དར་ཟབ་གདན། །གཉན་པོ་ནོར་བདག་འཁོར་དང་བཅས་པ་རྣམས། །གཙོ་དང་འཁོར་དུ་འཚམས་པའི་གདན་ཁྲི་ལ། །ཇི་སྲིད་བདག་གིས་མཆོད་པ་བགྱིས་ཀྱི་བར། །དེ་སྲིད་དགྱེས་ཤིང་བརྟན་པར་བཞུགས་ནས་ཀྱང་། །བདག་གིས་བཅོལ་བའི་ལས་རྣམས་འགྲུབ་པར་མཛོད། །ཨོཾ་བཱ་སུ་པཱ་ཏི་ས་པཱ་རི་ཝཱ་ར་ཏིཥྛ་ལྷན། ཧཱུྃ། སྔོན་ཚེ་འདས་དུས་བསྟན་པའི་ཐོག་མ་ལ། །སློབ་དཔོན་ཆེན་པོ་པདྨ་འབྱུང་གནས་ཀྱིས། །བོད་ཁམས་ས་གཞི་བྱིན་གྱིས་བརླབས་
པའི་ཚེ། །སྐུ་ཡི་སྤྲུལ་པ་བྱེ་བ་ཕྲག་བརྒྱ་ཡིས། །བོད་ཁམས་ས་གཞི་ཏིལ་ཙམ་མ་ལུས་པ། །ཞབས་ཀྱིས་བཅགས་ཤིང་ལྷ་སྲིན་དམ་ལ་བཏགས། །འབྱུང་པོ་རྣམས་ལ་དམ་ཆོས་འཁོར་ལོ་བསྐོར། །དེ་ཚེ་གཉན་པོ་ནོར་བདག་ཁྱེད་ཉིད་ཀྱིས། །ཇི་ལྟར་ཁས་བླངས་དམ་ལས་མ་འདའ་བར། །རྣལ་འབྱོར་བདག་གི་ཕྲིན་ལས་མྱུར་དུ་སྒྲུབས། །ཨོཾ་བཱ་སུ་པཱ་ཏི་ས་པཱ་རི་ཝཱ་ར་ས་མ་ཡ་ཧ་ན་ཧ་ན་ཧཱུྃ་ཕཊ། །སློབ་དཔོན་པདྨའི་བཀའ་ཉན་དྲག་ཤུལ་ཅན། །མཐུ་སྟོབས་རྫུ་འཕྲུལ་སྣ་ཚོགས་ཐོགས་པ་མེད། །འདོད་རྒུར་སྒྱུར་བས་ལུས་ཅན་ཅིར་ཡང་སྟོན། །ལྷ་ཡི་དགེ་བསྙེན་ཁྱོད་ལ་ཕྱག་འཚལ་བསྟོད། །མཆོད་ན་མགོན་བྱེད་རྦད་ན་དགྲ་བགེགས་སྒྲོལ། །སྣ་ཚོགས་ཡིད་ཀྱི་ལུས་ཅན་རྫུ་འཕྲུལ་ཅན། །ལྷ་ཀླུ་བདུད་རྩི་སྨན་སོགས་འཁོར་གྱི་ཚོགས། །ཡུལ་ལྷ་མགོན་བྱེད་རྣམས་ལ་ཕྱག་འཚལ་བསྟོད། །ཧཱུྃ་ལས་རིན་ཆེན་ལས་གྲུབ་སྣོད་མཆོག་ཏུ། །ཨོ་ཡིག་ལས་བྱུང་མཆོད་རྫ་ས་སྣ་ཚོགས་པ། །སྐྱ་མ་མཁན་གྱིས་སྒྱུ་མའི་ཆོ་འཕྲུལ་བཞིན། །དངོས་པོ་དམན་ཡང་ཡིད་ཀྱིས་དཔག་མེད་སྤྲུལ། །དྭངས་ཤིང་ཐོགས་མེད་ནམ་མཁའི་མཐའ་ཁྱབ་པ། །རྒྱུན་མི་
འཆད་པ་འཛད་མེད་ནམ་མཁའི་མཛོད། །ཅི་འདོད་འབྱུང་བ་ཡིད་བཞིན་རིན་ཆེན་གཏེར། །དགེ་བསྙེན་འཁོར་བཅས་མཁོ་དགུའི་དཔལ་དུ་གྱུར། །ཨོཾ་བཛྲ་སྤུ་ར་ཎ་ཁཾ། ཧཱུྃ། སྲུང་མ་དགེ་བསྙེན་ནོར་བདག་འཁོར་བཅས་ལ། །ཉེར་སྤྱོད་ལྔ་དང་འདོད་པའི་ཡོན་ཏན་ལྔ། །བཀྲ་ཤིས་རྫ་ས་རྟགས་བརྒྱད་དང་རིན་ཆེན་བདུན། །དར་ཟབ་འབྲུ་སྨན་རིན་ཆེན་སྣ་ཚོགས་དང་། །སྟག་རས་གཟིག་རས་གོ་མཚོན་དར་མདུང་འཕེན། །དཀར་གསུམ་མངར་གསུམ་ཀླུ་སྨན་ཇ་ཆང་ཕུད། །ཞིབ་མར་ཤ་ཐུད་ཁུ་བ་སྤྱོད་ཀྱི་ཚོགས་། །དངོས་འབྱོར་ཡིད་སྤྲུལ་མཆོད་པ་རྒྱ་མཚོ་འབུལ། །འཁོར་དང་བཅས་པ་མཉེས་ཤིང་ཚིམས་གྱུར་ནས། །བཀྲག་མདངས་གཟི་བརྗིད་ཕུན་སུམ་ཚོགས་གྱུར་ཅིག ། ཨོཾ་བཱ་སུ་པཱ་ཏི་ས་པཱ་རི་ཝཱ་ར་ཨརྒྷཾ་པཱདྷཾ་སོགས། ཨོཾ་སྭ་བྷ་ཝས་སྦྱངས། ཧཱུྃ་ལས་རིན་པོ་ཆེའི་སྣོད་དུ་ཨོཾ་ཡིག་ལས་བྱུང་བའི་གཏོར་མ་དཀར་གསུམ་མངར་གསུམ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། ཨོཾ་ཨ་ཀཱ་རོ་སོགས། ཨོཾ་བཱ་སུ་པཱ་ཏི་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། མཆོད་སྦྱིན་གྱི་གཏོར་མ་རྒྱ་ཆེན་པོ་འདི་གཉན་པོ་ནོར་བདག་འཁོར་
དང་བཅས་པ་རྣམས་ལ་འབུལ་ལོ། །ཡོངས་སུ་བཞེས་ལ་རྣལ་འབྱོར་པ་བདག་ཅག་འཁོར་དང་བཅས་པའི་འགལ་རྐྱེན་བར་ཆད་ཐམས་ཅད་ཉེ་བར་ཞི་བ་དང་། ཚེ་དང་བསོད་ནམས་དཔའ་འབྱོར་ཐམས་ཅད་ཟླ་བ་ཡར་གྱི་ངོ་ལྟར་རྒྱས་པའི་ཕྲིན་ལས་མཛོད་ཅིག །ཧཱུྃ། བཅོམ་ལྡན་འདས་དཔལ་ཆེན་དྲག་པོ་ཐོད་ཕྲེང་གིས། །སྲོག་སྙིང་དབང་དུ་བསྡུས་ནས་དམ་ལ་བཏགས། །རྒྱལ་བའི་བསྟན་པ་སྲུང་བར་དམ་བཅས་པས། །དམ་ཅན་ནོར་གྱི་བདག་པོ་ཁྱོད་ལ་བསྟོད། །རང་གི་ལས་ཀྱི་རྫུ་འཕྲུལ་ཤུགས་ཀྱིས་ནི། །ཡུད་ཙམ་གཅིག་གིས་འཛམ་གླིང་ཀུན་ཉུལ་ཞིང་། །ལེགས་ཉེས་སྟངས་འཛིན་དམ་ཚིག་རྗེས་གཅོད་པའི། །ནོར་བདག་འཇིག་རྟེན་སྐྱོང་བ་ཁྱོད་ལ་བསྟོད། །རྒྱུན་གྱི་བཞུགས་གནས་ཤེལ་བྲག་ལྷུན་ཆགས་པ། །བཀོད་ལེགས་གཞལ་ཡས་ཁང་ལ་རྟེན་བཅས་ནས། །ཡུལ་ཕྱོགས་སྐྱོང་ཞིང་སྲུང་བར་མཛད་པ་ཡི། །ཡུལ་ལྷ་ནོར་བདག་ཁྱོད་ལ་བདག་བསྟོད་དོ། །བདག་གིས་ཡིད་ལ་མནག་པའི་དགྲ་བོ་ལ། །མི་བཟད་འཇིགས་པའི་ཆོ་འཕྲུལ་སྣ་ཚོགས་ཀྱིས། །ཕ་རོལ་གཞོམ་ཞིང་རང་ཕྱོགས་སྲུང་མཛད་པ། །དགྲ་བླ་ནོར་བདག་ཁྱོད་ལ་
བདག་བསྟོད་དོ། །ཁྱོད་ནི་ཡིད་བཞིན་དགོས་འདོད་ཀུན་འབྱུང་ལྟར། །རྨ་གཡང་ནོར་གྱི་དངོས་གྲུབ་བདག་པོ་སྟེ། །དེ་ཕྱིར་ནོར་གྱི་བདག་པོ་ཞེས་སུ་གྲགས། །ནོར་ལྷ་ཆེན་པོ་ཁྱོད་ལ་བདག་བསྟོད་དོ། །།འཁོར་གྱི་སྨན་མོ་མཛེས་སྡུག་ཡིད་འཕྲོག་ཚོགས། །མ་རུངས་བདུད་བཙན་སྲོག་ལ་རྔམ་པའི་ཚོགས། །ཀླུ་གཉན་ས་བདག་ལ་སོགས་མི་གཟུགས་ཅན། །མ་ལུས་འཁོར་དང་བཅས་ལ་བདག་བསྟོད་དོ། །ཁྱེད་ཅག་འཁོར་བཅས་མཆོད་པ་འདི་བཞེས་ལ། །ནད་གདོན་དུས་མིན་འཆི་དང་མཚན་མ་ངན། །བཙའ་སད་མུ་གེ་ཡམས་ནད་ཐམས་ཅད་དང་། །དགྲ་རྐུན་སེར་བའི་གནོད་པ་ཞི་བར་མཛོད། །ཚེ་དང་བསོད་ནམས་དཔལ་འབྱོར་ལོངས་སྤྱོད་དང་། །ལོ་ཐོག་རྐང་འགྲོའི་ཕྱུགས་རྣམས་འཕེལ་བར་མཛོད། །ནད་མེད་འཁྲུག་པ་ཞི་ཞིང་དམ་ཆོས་འཕེལ། །མཁོ་དགུའི་ལོངས་སྤྱོད་དབང་དུ་འདུ་བར་མཛོད། །ཧོར་སོགས་དགྲ་ཇག་ཆོམ་རྐུན་འཚེ་བ་སོགས། །མི་མཐུན་གནོད་པའི་ཕྱོགས་རྣམས་ཟློག་པར་མཛོད། །བདག་ལ་གནོད་པའི་སེམས་འཆང་དགྲ་དང་བགེགས། །གང་ཡིན་ཁྱོད་ཤེས་མྱུར་དུ་ཐལ་བར་རློགས། །
རྒྱལ་བའི་བསྟན་པ་དར་ཞིང་རྒྱས་པ་དང་། །།ཡུལ་ཕྱོགས་ཀུན་ནས་དགེ་ཞིང་སྐྱིད་པ་དང་། །བཅོལ་བའི་ཕྲིན་ལས་མྱུར་དུ་འགྲུབ་པར་མཛོད། །ཅེས་བསྟོད་དོ། །ཐུགས་ཀར་ཟླ་བའི་གདན་ལ་བི་ཡིག་མཐར། །ཨོཾ་ཨཱཿབཱ་སུ་པཱ་ཏི་ལོ་ཀ་སིདྡྷི་ཧཱུྃ་སྭཱ་ཧཱ། ཞེས་བསྟོད་པར་བསམ་ལ་ཅི་འགྲུབ་བཟླ། དེ་ནས་བསང་དང་སྦྲེལ་ན། ཀྱཻ། བསང་གི་རྒྱུད་བྱུང་གང་ནས་བྱུང་། །བསང་བྱུང་ཀུན་བཟང་ཀློང་ནས་བྱུང་། །ཀུན་བཟང་ཡུམ་ལྔའི་མཁའ་ཀློང་ནས། །འབྱུང་བ་ཆེན་པོ་ལྔ་རུ་བྱུང་། །དེ་ལ་སྟོང་གསུམ་འཇིག་རྟེན་བྱུང་། །འོག་མིན་ཆོས་དབྱིངས་ཕོ་བྲང་ནས། །རྣམ་པར་སྣང་མཛད་ཐུགས་ཀ་ནས། །འོད་ཟེར་བྱེ་བ་ཕྲག་བརྒྱ་འཕྲོས། །སྟོང་གསུམ་འཇིག་རྟེན་རྣམས་སུ་ཐིམ། །དེ་ལ་བྱང་ཆུབ་ཤིང་རྣམས་བྱུང་། །འཆི་མེད་བདུད་རྩི་ཐིག་པ་ལས། །རྩི་བཅུད་སྨན་དང་ཤིང་རྣམས་བྱུང་། །ཤིང་རྩི་དགུ་ཡི་དུད་པ་དང་། །ཕྱེ་མར་ཇ་ཆང་ཕུད་རྒོད་ཀྱིས། །བླ་མེད་འཕགས་པ་དཀོན་མཆོག་གསུམ། །སེམས་ཅན་ཀུན་གྱི་མགོན་བྱེད་བསང་། །ཁྱད་པར་འཕགས་མཆོག་སྤྱན་རས་གཟིགས། །ཁ་བ་ཅན་གྱི་མགོན་བྱེད་བསང་། །པད་འབྱུང་རྡོ་རྗེ་གྲོ་ལོད་རྩལ། །ལྷ་འདྲེ་ཡོངས་
ཀྱི་སྐྱབས་གནས་བསང་། །ཡུལ་གྱི་ཡུལ་ལྷ་གཉན་པོ་སོགས། །སྲིད་པ་ཆགས་པའི་ལྷ་རྒན་བསང་། །གཉན་པོ་ནོར་བདག་ཆེན་པོ་བསང་། །འཁོར་དུ་གཏོགས་པའི་སྨན་མོ་བསང་། །དཀར་པོ་ལྷ་ཡི་འཁོར་ཚོགས་བསང་། །དམར་པོ་བཙན་གྱི་འཁོར་ཚོགས་བསང་། །ནག་པོ་བདུད་ཀྱི་འཁོར་ཚོགས་བསང་། །སྔོན་པོ་ཀླུ་ཡི་འཁོར་ཚོགས་བསང་། །ཁྲ་བོ་གཉན་གྱི་འཁོར་ཚོགས་བསང་། །གཞན་ཡང་འཁོར་དང་ཡང་འཁོར་སོགས། །ཡིད་ཀྱི་གཟུགས་ཅན་ཐམས་ཅད་བསང་། །འདི་ལྟར་བསང་བའི་ཡོན་ཏན་གྱིས། །འཁོན་པ་བསྡུམ་ལ་འགྲས་པ་སྦྱངས། །མི་ལ་ན་ཚ་མ་བཏང་ཞིག །ཕྱུགས་ལ་གོད་ཁ་མ་བཏང་ཞིག །ཞིང་ལ་བཙའ་སད་མ་བཏང་ཞིག །བསམ་པ་ཡིད་བཞིན་འགྲུབ་པར་མཛོད། །དེ་ནས་གསོལ་ཁ་སྤྲོ་ན། ཧཱུྃ། ལྷ་ཡི་དགེ་བསྙེན་ཆེན་པོ་དྲག་རྩལ་ཅན། །གཉན་པོ་ནོར་བདག་འཁོར་དང་བཅས་པ་ཡི། །གཟི་བརྗིད་བསྐྱེད་ཕྱིར་གསོལ་ཁའི་མཆོད་པ་འབུལ། །དགྱེས་པར་བཞེས་ལ་དངོས་གྲུབ་བསྩལ་དུ་གསོལ། །ལྷོ་སྤྲིན་གཏིབས་འདྲ་སྤུ་ཡི་གོས་གྱོན་ཞིང་། །འདམ་བུའི་ཚལ་བཞིན་སྤུ་ཞོལ་ས་ལ་
བཤལ། །གནམ་ལྕགས་རྡོ་རྗེའི་རྭ་དང་གློག་གི་ལྕེ། །འབྲུག་གི་སྒྲ་འབྱིན་ཉི་ཟླའི་སྡང་མིག་ཅན། །གཡག་དཀར་དར་གྱི་ཅོད་པན་གཡོ་བ་ཡི། །གཉན་པོ་ནོར་བདག་འཁོར་དང་བཅས་ལ་འབུལ། །གངས་རིའི་དུམ་བུ་མཚར་འདྲ་མངར་བའི་ལུས། །འཁྱིལ་བའི་རྭ་ལ་རྒྱ་མཚོ་ཆུ་རིས་བཀྲ། །དར་གྱི་ཅོད་པན་ལྟ་བུའི་སྙན་གཡོ་ཞིང་། །འཛམ་བུ་ཆུ་གསེར་མིག་ལྡན་འབའ་སྒྲ་ཅན། །ལུག་བཟང་མཚལ་ཐིག་དར་གྱིས་བརྒྱན་པ་འདི། །གཉན་པོ་ནོར་བདག་འཁོར་དང་བཅས་ལ་འབུལ། །གནམ་ལྕགས་ལྡན་པའི་རྭ་གཉིས་གཙུག་ན་མཛེས། །ཆུ་རྒྱུན་ལྟ་བུར་རིང་བའི་ཨོག་ཞོལ་འཕྱོ། །སེར་སྤྲིན་རྒོད་དུ་འཁྲུགས་འདྲའི་སྤུ་ཞོལ་བརྗིད། །ལྷང་ལྷང་སྙན་པའི་སྒྲ་འབྱིན་འགྱིང་བ་འཁྲབ། །ར་སྐྱེས་དར་དང་རྔ་མས་བརྒྱན་པ་འདི། །གཉན་པོ་ནོར་བདག་འཁོར་དང་བཅས་ལ་འབུལ། །དངོས་སུ་འབྱོར་དང་ཏིང་འཛིན་ཡིད་ལས་སྤྲུལ། །རྟེན་འབྲེལ་ཙམ་དུ་གཟུགས་བརྙན་འབུལ་ལ་བསྟོད། །མངོན་སུམ་ལས་ཀྱང་ཡོན་ཏན་ཆེ་བར་དམིགས། །བརྒྱ་སྟོང་ཁྲི་འབུམ་འཇིག་རྟེན་ཁྱབ་པར་སྤྲུལ། །ཏིང་འཛིན་སྔགས་དང་ཕྱག་རྒྱས་བྱིན་བརླབས་ནས། །
གཉན་པོ་ནོར་བདག་འཁོར་དང་བཅས་ལ་འབུལ། །སྔར་བྱས་གཏང་རག་ཕྱི་བྱེད་ཞུ་སྐྱེམས་འབུལ། །ད་ལྟ་ལས་ཀྱི་གཉེར་ཟས་འདི་འབུལ་ལ། །རྣལ་འབྱོར་བདག་ཅག་འཁོར་དང་བཅས་པ་རྣམས། །གཞི་བྱེས་ལམ་གསུམ་གར་འགྲོ་གར་སྡོད་ཀྱང་། །ཁ་འཛིན་སྡོང་གྲོགས་མེལ་ཚེ་མ་གཡེལ་ཅིག །ཅེས་བཅོལ་གཏམ་གང་དགོས་བྱའོ། །དེ་ནས་ལས་ལ་སྦྱར་ན་གཏོར་མ་ཟུར་གསུམ་ཤ་ཁྲག་ལིངྒས་བརྒྱན་པའམ། དེ་ཙམ་དྲག་པོ་མི་དགོས་ན། དཀར་གཏོར་གཅིག་ལ་བཀུག་གཞུག་བྱས། ཡེ་ཤེས་ཀྱི་བདུད་རྩིར་བྱིན་གྱིས་བརླབས་ནས། ཧཱུྃ། ལྷ་བཙན་དྲག་པོ་གཉན་པོ་ནོར་གྱི་བདག །མ་རུངས་མི་སྲུན་སྡེ་བརྒྱད་འཁོར་དང་བཅས། །ཐོག་མེད་གློག་ལྟར་མྱུར་བའི་རྫུ་འཕྲུལ་གྱིས། །རིང་པར་འདིར་བྱོན་བཀའ་ཡི་གཏོར་མ་ལོངས། །སྔོན་ཚེ་ཆུ་བོ་ལོ་ཧི་ཏ་ཡི་འགྲམ། །སློབ་དཔོན་ཆེན་པོ་པདྨ་བཞུགས་པའི་དྲུང་། །བོད་ཡུལ་ལྷ་འདྲེ་གཅིག་ཀྱང་མ་ལུས་པ་། །ཐམས་ཅད་མ་ལུས་དེ་རུ་འདུས་ནས་ཀྱང་། །མ་འོངས་སློབ་དཔོན་ཁྱེད་ཀྱི་རྗེས་འཇུག་ལ། །གནོད་ཅིང་འཚེ་བའི་དགྲ་བོ་སུ་འདུག་པ། །ཐམས་ཅད་ངེད་ཅག་རྣམས་ཀྱིས་སྒྲོལ་ལོ་ཞེས། །ལྷ་འདྲེ་ཀུན་གྱིས་དམ་བཅའ་ཕུལ་བའི་
ཚེ། །ནོར་བདག་ཁྱེད་ཀྱིས་དམ་བཅའ་དྲན་མཛོད་ལ། །བདག་ལ་སྡང་བའི་དགྲ་བོ་མྱུར་དུ་སྒྲོལ། །བདག་ནི་སློབ་དཔོན་དེ་ཡི་བཀའ་བརྒྱུད་ཡིན། །ཁྱེད་རྣམས་དམ་ལ་བཏགས་པའི་ལྷ་འདྲེ་ཡིན། །འདི་ནི་དམ་རྫས་བརྒྱན་པའི་གཏོར་མ་ཡིན། །དེ་བས་དམ་ལ་མ་འདའ་ཕྲིན་ལས་མཛོད། །ཀརྨ་ཨ་རཱ་གས་སྔོན་ཟླ་བའི་ཚེས་གསུམ་ལ་རྫོགས་པར་སྦྱར་བའི་བླ་མ་གྲགས་པ་དབང་ལྡན་དང་། སྔགས་བཙུན་ཀརྨ་ཡང་དག་སོགས་ཀྱིས་ཡང་ཡང་བསྐུལ་བ་དོན་ཡོད་པར་བྱ་བའི་ཕྱིར་རོ། །དགེ་བས་ཡུལ་ཕྱོགས་དགེ་ཞིང་ལོ་ལེགས་ཤོག ། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།