ཡུལ་ལྷ་མཆོད་པའི་ཆོ་ག་ཡིད་བཞིན་ནོར་བུ་དགོས་འདོད་ཀུན་འབྱུང་།
ཡུལ་ལྷ་མཆོད་པའི་ཆོ་ག་ཡིད་བཞིན་ནོར་བུ་དགོས་འདོད་ཀུན་འབྱུང་ཞེས་བྱ་བ་བཞུགས་སོ། །ན་མོ་པདྨ་ཀ་ར་ཡེ། རྡོ་རྗེ་དྲག་པོ་རྩལ་ལ་གུས་བཏུད་ནས། །ཡུལ་ལྷ་མཆོད་པའི་ཆོ་ག་བྲི་བར་བྱ། །དེ་ཡང་གུ་རུ་དྲག་པོའི་དྲེགས་པའི་སྲོག་བདག་གི་ཆོས་སྤྱོད་ཀྱི་ཆོས་སྒོར་ཞུགས་པས་ཀྱང་། ཡུལ་འདིར་གནས་པའི་གཞི་བདག་ལྷ་འདྲེ་སྡེ་བརྒྱད་ཐམས་ཅད་ལ། གསོལ་ཀ་མཆོད་པ་བྱས་ན་ལེགས་ཞེས་གསུངས་པ་དང་། དཀྱིལ་འཁོར་ལས་རིམ་ཐམས་ཅད་ཀྱི་ཐོག་མར་གནས་བདག་ལ་གཏོར་མ་འབུལ་ཞེས་གསུངས་པས། རྒྱུད་བརྟག་གཉིས་ལས། འབྱུང་པོ་ཐམས་ཅད་ལ་གཏོར་མ་འབུལ། ཞེས་གསུངས་པ་དང་། ཚུལ་སྔགས་ཀྱི་ཕན་ཡོན་དང་བཅས་པ་རྒྱས་པར་གསུངས་པ་དང་། དཔལ་གསང་བ་འདུས་པའི་རྒྱུད་རྩ་འགྲེལ་རྣམས་ལས། འཇིག་རྟེན་པའི་ལྷ་བྲན་ཐམས་ཅད་བརྟེན་ཅིང་སྒྲུབ་པའི་ཐབས་གསུངས་པ་དང་། ཁྲོས་མ་ལྷ་ལྔའི་ལས་ཚོགས་ལས། འཇིག་རྟེན་པའི་ལྷ་རྒོད་བརྟེན་ཅིང་སྒྲུབ་པའི་ཐབས་གསུངས་པ་དང་། མ་གཅིག་གཅོད་སྒོ་འབྱེད་བདུན་མར་འཇིག་རྟེན་པའི་གཞི་བདག་གི་དངོས་གྲུབ་སྒྲུབ་པའི་ཐབས་གསུངས་པ་དེ་རྣམས་ཀྱི་རྗེས་སུ་འབྲངས་ནས། གཞི་དཀར་པོའི་སྟེང་དུ་ནས་ཀྱི་པདྨ་འདབ་བརྒྱད་བྱ། དེའི་སྟེང་དུ་སྣོད་གཙང་མར་དཀར་གཏོར་རྩེ་རྒྱལ་ཅན་བཤོས་བུ་ལྔ་དང་མཐེབ་སྒྱུ་དུ་མས་བསྐོར་བ། གཡག་ལུག་ར་བཅས་ཕྱེ་མར་ཕུད་རྒོད། མདའ་རྒོད་སྒྲོ་མ་གཅིག་ལ་དར་དཀར་པོ་བཏགས་པ་རྣམས་བཤམས། བསྡུ་ན་
དཀར་གཏོར་གཅིག་ལ་བརྟེན་ནོ། །རང་ཡི་དམ་གང་རུང་ངམ། ཁྱད་པར་གུ་རུ་ཞི་དྲག་ནི་མཆོག་ཏུ་ཤིས་ལ། དེའི་ཏིང་འཛིན་ལྡན་པས་འདི་སྐད་དོ། །ཨོཾ་སྭ་བྷ་ཝས་སྦྱངས། མདུན་དུ་ཤེལ་བྲག་རིན་ཆེན་ཁང་བཟང་དབུས། །ལྷ་ཡི་དམག་དཔོན་མངར་རྒྱལ་རིག་ཕྲོམ་ནི། །སྐུ་མདོག་དཀར་པོ་ཀུནྡའི་མདངས་དང་ལྡན། །ཞལ་རས་མཛེས་འཛུམ་དབུ་ལ་དུང་རྨོག་གསོལ། །སྐུ་ལ་དུང་ཁྲབ་སྟག་རིལ་གཟིག་ཤུབས་བཀྲ། །ཕྱག་གཡས་སྦ་ལྕག་དཀར་པོ་མཁའ་ལ་འཕྱར། །གཡོན་པས་མདུང་དར་ཕྲག་ལ་བཀལ། །ཆིབས་སུ་ཤེལ་གྱི་རྐྱང་ཤེས་གཡུ་རྔོག་ཆིབས། །གཞན་ཡང་ཕྱོགས་ཀྱི་རི་བོ་ཐམས་ཅད་ལ། །གནས་པའི་མཆེད་ལྕམ་ལས་མཁན་བློན་པོ་སོགས། །ཡུལ་ལྷ་གཞི་བདག་དུ་མའི་འཁོར་གྱིས་བསྐོར། །ཐུགས་ཀའི་འོད་ཀྱིས་འཁོར་བཅས་སྤྱན་དྲངས་གྱུར། །ཧཱུྃ། རྒྱལ་བས་ལུང་བསྟན་གདོང་དམར་བོད་ཀྱི་ཡུལ། །ཐུགས་རྗེ་ཆེན་པོས་བྱིན་རླབས་གངས་ཅན་ལྗོངས། །སྒང་བཞིའི་མཆོག་གྱུར་མདོ་ཁམས་ཟལ་མོ་སྒང་། །ལྕི་ཆུ་སྔོན་མོ་དལ་དུ་འདབ་པའི་གཡས། །ཤེལ་གྱི་ལྷུན་པོ་རྩེ་གསུམ་འཕང་རེ་མཐོ། །ཆུ་འཛིན་སྔོན་པོའི་བླ་བྲེ་སྟེང་ན་འཁྲིགས། །དབྱར་སྐྱེས་
འབྲུག་སྒྲ་སྒྲོག་ཅིང་གློག་འོད་འཁྱུགས། །སྐད་སྙན་འདབ་ཆགས་སྣ་ཚོགས་ལྡིང་ཞིང་འཛུམ། །དཔལ་བརྗིད་གཅན་གཟན་སྣ་ཚོགས་རྔམས་ཤིང་འགྱིང་། །མཛེས་སྡུག་རི་དྭགས་སྣ་ཚོགས་རྩེ་ཞིང་རྒྱུགས། །རྩེ་ལྐོག་བླ་མཚོ་གཡུ་ཡི་ན་བུན་འཐུལ། །སྐེད་པར་ཆུ་མིག་མང་པོ་ཡོན་ཆབ་འདྲ། །རྩ་བར་རྩི་ཤིང་མཆོད་པའི་ལྷ་མོ་ལྟར། །ལོགས་ལ་ཤིང་སྤང་གསེར་གྱི་མཎྜལ་འདྲ། །དེ་ལྟར་ཡིད་འོང་མཛེས་པའི་གནས་མཆོག་དབུས། །བཀོད་ལེགས་ཡིད་ལས་གྲུབ་པའི་ཕོ་བྲང་ནས། །ལྷ་ཆེན་མངར་རྒྱལ་རག་ཕྲོམ་ཞེས་གྲགས་པའི། །ཡུལ་ལྷ་ཆེན་པོ་གནས་འདིར་གཤེགས་སུ་གསོལ། །བཀའ་ཉན་མཆེད་ལྕམ་ལས་མཁན་བློན་པོ་སོགས། །ཡིད་ཀྱི་གཟུགས་ཅན་མ་ལུས་ཐམས་ཅད་ཀྱང་། །བདག་གིས་མཆོད་པ་འབུལ་ཞིང་བཞེས་སླད་དུ། །བྱམས་པའི་སེམས་ཀྱིས་མ་གཡེལ་མྱུར་དུ་བྱོན། །ཧཱུྃ། ཏིང་འཛིན་དང་ལྡན་ཡིད་ལས་སྤྲུལ་པ་ཡི། །རིན་ཆེན་སྣ་ལྔ་ལས་གྲུབ་མུ་མེན་ཁྲི། །དབང་པོའི་གཞུ་ལྟར་རབོ་བཀྲ་དར་ཟབ་གདན། །མངར་རྒྱལ་རིག་ཕྲོམ་འཁོར་དང་བཅས་པ་རྣམས། །གཙོ་དང་འཁོར་དུ་འཚམས་པའི་གདན་ཁྲི་
ལ། །ཇི་སྲིད་བདག་གིས་མཆོད་པ་བགྱིས་ཀྱི་བར། །།དེ་སྲིད་དགྱེས་ཤིང་བརྟན་པར་བཞུགས་ནས་ཀྱང་། །བདག་གིས་བཅོལ་བའི་ལས་རྣམས་འགྲུབ་པར་མཛོད། །ཧཱུྃ། སྔོན་ཚེ་འདས་དུས་བསྐལ་པའི་དང་པོ་ལ། །སློབ་དཔོན་ཆེན་པོ་པདྨ་འབྱུང་གནས་ཀྱིས། །བོད་ཁམས་ས་གཞི་བྱིན་གྱིས་བརླབས་པའི་ཚེ། །སྐུ་ཡི་སྤྲུལ་པ་བྱེ་བ་ཕྲག་བརྒྱ་ཡིས། །ས་ཁུལ་ཏིལ་འབྲུ་ཙམ་ཡང་མ་ལུས་པ། །ཞབས་ཀྱིས་བཅགས་ཤིང་ལྷ་འདྲེ་དམ་ལ་བཏགས། །འབྱུང་པོ་རྣམས་ལ་དམ་ཆོས་འཁོར་ལོ་བསྐོར། །དེ་ཚེ་ལྷ་རྒྱལ་འཁོར་བཅས་ཁྱེད་རྣམས་ཀྱིས། །ཇི་ལྟར་ཁས་བླངས་དམ་ལས་མ་འདའ་བར། །རྣལ་འབྱོར་བཅོལ་བའི་ཕྲིན་ལས་མྱུར་དུ་སྒྲུབས།། །ཧཱུྃ། སློབ་དཔོན་ཆེན་པོ་པདྨའི་བཀའ་ཉན་ཁྱོད། །མཆེད་ལྕམ་ལས་མཁན་བློན་པོ་འཁོར་བཅས་རྣམས། །མཐུ་སྟོབས་རྫུ་འཕྲུལ་དྲག་ཤུལ་ཐོགས་པ་མེད། །འདོད་རྒུར་སྒྱུར་བས་ལུས་ཅན་ཅིར་ཡང་སྟོན། །མཆོད་ན་མགོན་བྱེད་རྦད་ན་དགྲ་བགེགས་སྒྲོལ། །སྣ་ཚོགས་ཡིད་ཀྱི་ལུས་ཅན་རྫུ་འཕྲུལ་ཅན། །ཡུལ་ལྷ་མགོན་བྱེད་རྣམས་ལ་ཕྱག་འཚལ་བསྟོད། །ཧཱུྃ་ལས་རིན་ཆེན་ལས་གྲུབ་སྣོད་མཆོག་ཏུ། །ཨོཾ་ཡིག་
ལས་བྱུང་མཆོད་རྫས་སྣ་ཚོགས་པ། །སྒྱུ་མ་མཁན་གྱིས་སྒྱུ་མའི་ཆོ་འཕྲུལ་བཞིན། །དངོས་པོ་དམན་ཡང་ཡིད་ཀྱིས་དཔག་མེད་སྤྲུལ། །དྭངས་ཤིང་ཐོགས་མེད་ནམ་མཁའི་མཐར་ཁྱབ་པ། །རྒྱུན་མི་འཆད་པ་འཛད་མེད་ནམ་མཁའི་མཛོད། །ལྷ་རྒྱལ་འཁོར་བཅས་མཁོ་དགུའི་དཔལ་དུ་གྱུར། །ཨོཾ་བཛྲ་སྤ་ར་ཎ་ཁཾ། སྲུང་མ་ལྷ་ཆེན་མངར་རྒྱལ་འཁོར་བཅས་ལ། །ཉེར་སྤྱོད་ལྔ་དང་འདོད་པའི་ཡོན་ཏན་ལྔ། །བཀྲ་ཤིས་རྫས་རྟགས་བརྒྱད་དང་རིན་ཆེན་བདུན། །དར་ཟབ་འབྲུ་སྨན་རིན་ཆེན་སྣ་ཚོགས་དང་། །སྟག་རས་གཟིག་རས་གོ་མཚོན་དར་མདུང་འཕེན། །དཀར་གསུམ་མངར་གསུམ་ཀླུ་སྨན་ཇ་ཆང་ཕུད། །ཕྱེ་མར་ཤ་ཐུད་ཁུར་བ་སྤྱོད་ཀྱི་ཚོགས། །དངོས་འབྱོར་ཡིད་སྤྲུལ་མཆོད་པ་རྒྱ་མཚོ་འབུལ། །འཁོར་བཅས་ཐམས་ཅད་མཉེས་ཤིང་ཚིམས་གྱུར་ནས། །བཀྲག་མདངས་གཟི་བརྗིད་ཕུན་སུམ་ཚོགས་གྱུར་ཅིག །ཨནྡྷཾ་སོགས་ཀྱིས་མཆོད། ཨོཾ་སྭ་བྷ་ཝས་སྦྱངས། །སྟོང་པ་ཉིད་དུ་གྱུར། སྟོང་པའི་ངང་ལས་ཧཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨ་ཡིག་ལས་བྱུང་བའི་གཏོར་མ་དཀར་གསུམ་མངར་གསུམ་ཁ་དོག་དྲི་རོ་རེག་བྱ་
ཕུན་སུམ་ཚོགས་པར་གྱུར། ཨོཾ་ཨ་ཀཱ་རོ་སོགས། ཨོཾ་ཨཱཿཧཱུྃ། ལྷ་ཆེན་མངར་རྒྱལ་རབ་ཕྲོམ་འཁོར་དང་བཅས་པ་རྣམས་ཀྱི་ཞལ་དུ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། མཆོད་སྦྱིན་གྱི་གཏོར་མ་རྒྱ་ཆེན་པོ་འདི་ལྷ་ཡི་དམག་དཔོན་ཆེན་པོ་མངར་རྒྱལ་རག་ཕྲོམ། མཆེད་ཡ་གུག་ཇོ་རྫ་བཀྲ། སྲིང་མོ་རག་ལྕམ་འཕར་མ། ལས་མཁན་དགེ་བསྙེན་མགར་ནག །བློན་པོ་སྟག་ཤྭ་རྔམས་པ་ལ་སོགས་བཀའ་དང་འཁོར་དུ་གཏོགས་པའི་ཡུལ་ལྷ་གཞི་བདག་འཁོར་དང་བཅས་པ་རྣམས་ལ་འབུལ་ལོ། །ཡོངས་སུ་བཞེས་ལ་རྣལ་འབྱོར་པ་བདག་ཅག་འཁོར་དང་བཅས་པ་རྣམས་ཀྱི་ཚེ་དང་བསོད་ནམས་དཔའ་འབྱོར་ཐམས་ཅད་ཟླ་བ་ཡར་གྱི་ངོ་ལྟར་རྒྱས་པའི་ཕྲིན་ལས་དམ་པ་མཛོད་ཅིག །ཧཱུྃ། བཅོམ་ལྡན་འདས་དཔལ་ཆེན་དྲག་པོ་ཐོད་ཕྲེང་གིས། །སྲོག་སྙིང་དབང་དུ་བསྡུས་ནས་དམ་ལ་བཏགས། །རྒྱལ་བའི་བསྟན་པ་སྲུང་བར་དམ་བཅས་པས། །དམ་ཅན་མངར་རྒྱལ་ཁྱོད་ལ་ཕྱག་འཚལ་བསྟོད། །རང་གི་ལས་ཀྱི་རྫུ་འཕྲུལ་ཤུགས་ཀྱིས་ནི། །ཡུད་ཙམ་གྱིས་ནི་འཛམ་གླིང་ཀུན་ཉུལ་ཞིང་། །ལེགས་ཉེས་སྟངས་འཛིན་དམ་ཚིག་རྗེས་གཅོད་པའི། །ལྷ་རྒྱལ་འཇིག་རྟེན་སྐྱོང་བ་ཁྱོད་ལ་
བསྟོད། །རྒྱུན་གྱི་བཞུགས་གནས་ཤེལ་བྲག་ལྷུན་ཆགས་པ། །བཀོད་ལེགས་གཞལ་ཡས་ཁང་ལ་རྟེན་བཅས་ནས། །ཡུལ་ཕྱོགས་སྐྱོང་ཞིང་སྲུང་བར་མཛད་པ་ཡི། །ཡུལ་ལྷ་མངར་རྒྱལ་ཁྱོད་ལ་ཕྱག་འཚལ་བསྟོད། །ལྷ་རྒྱལ་འཁོར་བཅས་མཐུ་སྟོབས་རྫུ་འཕྲུལ་ཅན། །བདག་གིས་ཡིད་ལ་མནག་པའི་དགྲ་བོ་ལ། །མི་བཟད་འཇིགས་པའི་ཆོ་འཕྲུལ་སྣ་ཚོགས་ཀྱིས། །ཕ་རོལ་གཞོམ་ཞིང་རང་ཕྱོགས་སྲུང་བྱེད་པ། །དགྲ་བླ་འཁོར་བཅས་ཁྱོད་ལ་ཕྱག་འཚལ་བསྟོད། །འཁོར་གྱི་མཆེད་ལྕམ་ལས་མཁན་བློན་པོ་རྣམས་། །མ་རུངས་བདུད་བཙན་ཁྲོ་ལ་རྔམས་པའི་ཚོགས། །ཀླུ་གཉན་ས་བདག་ལ་སོགས་ཡིད་གཟུགས་ཅན། །མ་ལུས་འཁོར་དང་བཅས་ལ་ཕྱག་འཚལ་བསྟོད། །ལྷ་རྒྱལ་འཁོར་བཅས་མཆོད་པ་འདི་བཞེས་ལ། །ནད་གདོན་དུས་མིན་འཆི་དང་མཚན་མ་ངན། །བཙའ་སད་མུ་གེ་ཡམས་ནད་ཐམས་ཅད་དང་། །དགྲ་རྐུན་སེར་བའི་གནོད་པ་ཞི་བར་མཛོད། །ཚེ་དང་བསོད་ནམས་དཔལ་འབྱོར་ལོངས་སྤྱོད་དང་། །ལོ་ཐོག་རྐང་འགྲོའི་ཕྱུགས་རྣམས་འཕེལ་བར་མཛོད། །ནད་མེད་འཁྲུག་པ་ཞི་ཞིང་དམ་ཆོས་འཕེལ། །མཁོ་
དགུའི་ལོངས་སྤྱོད་དབང་དུ་འདུ་བར་མཛོད། །ཧོར་སོགས་དགྲ་ཇག་ཆོམ་རྐུན་འཚེ་བ་སོགས། །མི་མཐུན་གནོད་པའི་ཕྱོགས་རྣམས་ཟློག་པར་མཛོད། །བདག་ལ་གནོད་པའི་ཝཱསེམས་འཚང་དགྲ་དང་བགེགས། །གང་ཡིན་ཁྱོད་ཤེས་མྱུར་དུ་ཐལ་བར་རློགས། །རྒྱལ་བའི་བསྟན་པ་དར་ཞིང་རྒྱས་པ་དང་། །ཡུལ་ཕྱོགས་འདི་རྣམས་སྲུང་ཞིང་སྐྱོང་བ་དང་། །བཅོལ་བའི་ཕྲིན་ལས་མྱུར་དུ་འགྲུབ་པར་མཛོད། །ཀྱཻ། བསང་གི་རྒྱུད་བྱུང་གང་ནས་བྱུང་། །བསང་བྱུང་ཀུན་བཟང་ཀློང་ནས་བྱུང་། །ཀུན་བཟང་ཡུམ་ལྔའི་མཁའ་ཀློང་ནས། །འབྱུང་བ་ཆེན་པོ་ལྔ་རུ་བྱུང་། །དེ་ལ་སྟོང་གསུམ་འཇིག་རྟེན་ཆགས། །འོག་མིན་ཆོས་དབྱིངས་ཕོ་བྲང་ནས། །རྣམ་པར་སྣང་མཛད་ཐུགས་ཀ་ནས། །འོད་ཟེར་བྱེ་བ་ཕྲག་བརྒྱ་འཕྲོས། །སྟོང་གསུམ་འཇིག་རྟེན་རྣམས་སུ་ཐིམ། །དེ་ལ་བྱང་ཆུབ་ཤིང་རྣམས་བྱུང་། །འཆི་མེད་བདུད་རྩི་ཐིག་པ་ལས། །རྩི་བཅུད་སྨན་དང་ཤིང་རྣམས་བྱུང་། །ཤིང་རྩི་དགུ་ཡི་དུད་པ་དང་། །ཕྱེ་མར་ཇ་ཆང་ཕུད་རྒོད་ཀྱིས། །བླ་མེད་འཕགས་པ་དཀོན་མཆོག་གསུམ། །སེམས་ཅན་ཀུན་གྱི་མགོན་བྱེད་བསང་། །ཁྱད་པར་མགོན་པོ་སྤྱན་
རིས་གཟིགས། །ཁ་བ་ཅན་གྱི་མགོན་བྱེད་བསང་། །པད་འབྱུང་རྡོ་རྗེ་གྲོ་ལོད་རྩལ། །ལྷ་འདྲེ་ཡོངས་ཀྱི་སྐྱབས་གནས་བསང་། །ཡུལ་གྱི་ཡུལ་ལྷ་གཉན་པོ་སོགས། །སྲིད་པ་ཆགས་པའི་ལྷ་རྒན་བསང་། །ལྷ་ཆེན་མངར་རྒྱལ་རབ་ཕྲོམ་བསང་། །མཆེད་ཡ་གུག་ཇོ་རྫ་བཀྲ་བསང་། །སྲིང་མོ་རག་ལྕམ་འཕར་མ་བསང་། །ལས་མཁན་དགེ་བསྙེན་མགར་ནག་བསང་། །བློན་པོ་སྟག་ཤྭ་རྔམས་པ་བསང་། །གཞན་ཡང་འཁོར་དང་ཡང་འཁོར་དང་། །ཡིད་ཀྱི་གཟུགས་ཅན་ཐམས་ཅད་བསང་། །འདི་ལྟར་བསང་བའི་ཡོན་ཏན་གྱིས། །འཁོན་པ་བསྡུམས་ལ་འགྲས་པ་སྦྱངས། །མི་ལ་ན་ཚ་མ་བཏང་ཞིག །ཕྱུགས་ལ་གོད་ཁ་མ་བཏང་ཞིག །ཞིང་ལ་བཙའ་སད་མ་བཏང་ཞིག་བསམ་པ་སྒྲུབ་ལ་རེ་བ་སྐོངས། །བར་དུ་གཅོད་པའི་དགྲ་བགེགས་ཐུལ། །བཅོལ་བའི་ཕྲིན་ལས་འགྲུབ་པར་མཛོད། །དེ་ནས་གསོལ་ཁ་སྤྲོ་ན། ཧཱུྃ། ལྷ་རྒྱལ་ཆེན་པོ་འཁོར་བཅས་མཐུ་རྩལ་ཅན། །མངར་རྒྱལ་རག་ཕྲོམ་འཁོར་བཅས་ཐམས་ཅད་ལ། །གཟི་བརྗིད་བསྐྱེད་ཕྱིར་གསོལ་ཁའི་མཆོད་པ་འབུལ། །དགྱེས་པར་བཞེས་ལ་དངོས་གྲུབ་བསྩལ་
དུ་གསོལ། །ལྷོ་སྤྲིན་གཏིབས་འདྲ་སྤུ་ཡི་གོས་གྱོན་ཞིང་། །འདམ་བུའི་ཚལ་བཞིན་སྤྱི་ཞོལ་ས་ལ་བཤལ། །གནམ་ལྕགས་རྡོ་རྗེའི་རྭ་དང་གློག་གི་ལྕེ། །འབྲུག་གི་སྒྲ་འབྱིན་ཉི་ཟླའི་སྡང་མིག་ཅན། །གཡག་དཀར་དར་གྱི་ཅོད་པན་གཡོ་བ་འདི། །ལྷ་ཆེན་མངར་རྒྱལ་འཁོར་དང་བཅས་ལ་འབུལ། །གངས་རིའི་དུམ་བུ་མཚར་འདྲ་མངར་བའི་ལུས། །འཁྱིལ་བའི་རྭ་ལ་རྒྱ་མཚོ་ཆུ་རིས་བཀྲ། །དར་གྱི་ཅོད་པན་ལྟ་བུའི་སྙན་གཡོ་ཞིང་། །འཛམ་བུ་ཆུ་གསེར་མིག་ལྡན་འབའ་སྒྲ་ཅན། །ལུག་བཟང་མཚལ་ཐིག་དར་གྱིས་བརྒྱན་པ་འདི༔་།ལྷ་ཆེན་མངར་རྒྱལ་འཁོར་དང་བཅས་ལ་འབུལ། །གནམ་ལྕགས་ལྡན་པའི་རྭ་གཉིས་གཙུག་ན་མཛེས། །ཆུ་རྒྱུན་ལྟ་བུར་རིང་བའི་ཨོག་ཞོལ་འཕྱོ། །སེར་སྤྲིན་སྒང་འཁྲུགས་འདྲ་བའི་སྤུ་ཞོལ་བརྗིད། །ལྷང་ལྷང་སྙན་པའི་སྒྲ་འབྱིན་འགྱིང་ཞིང་ཁྲབ། །ར་སྐྱེས་དར་དང་རྔ་མས་བརྒྱན་པ་འདི། །ལྷ་ཆེན་མངར་རྒྱལ་འཁོར་དང་བཅས་ལ་འབུལ། །དངོས་སུ་འབྱོར་དང་ཏིང་འཛིན་ཡིད་ལས་སྤྲུལ། །མངོན་སུམ་ལས་ཀྱང་ཡོན་ཏན་ཆེ་བར་དམིགས། །བརྒྱ་སྟོང་ཁྲི་འབུམ་འཇིག་རྟེན་ཁྱབ་པར་འབུལ། །འགྱིང་
ཡག་མང་པོ་ངུར་སྒྲ་སྟོངས་སེ་སྟོང་། །གཡང་མོ་ལུག་གི་འབའ་སྒྲ་དི་རི་རི། །ར་སྐྱེས་མང་པོའི་སྲིད་སྒྲ་ཤ་ར་ར། །ཏིང་འཛིན་སྔགས་དང་ཕྱག་རྒྱས་བྱིན་བརླབས་ནས། །སྔར་བྱས་གཏང་རག་ཕྱི་བྱེད་ཞུ་སྐྱེམས་འབུལ། །ད་ལྟ་ལས་ཀྱི་གཉེར་ཟས་འདི་བཞེས་ལ། །རྣལ་འབྱོར་བདག་ཅག་འཁོར་དང་བཅས་རྣམས་ལ། །གཞི་བྱེས་ལམ་གསུམ་གར་འགྲོ་གར་སྡོད་ཀྱང་། །ཁ་འཛིན་སྡོང་གྲོགས་མེལ་ཚེ་མ་གཡེལ་ཅིག །ལྷ་རྒྱལ་འཁོར་བཅས་མཆོད་པ་འདི་བཞེས་ལ། །ནད་གདོན་དུས་མིན་འཆི་དང་མཚན་མ་ངན། །།ཞེས་སོགས་གོང་ལྟར་ཤེས་སོ། །དེ་ནས་ལས་ལ་བསྐུལ་ན་གཏོར་མ་ཟུར་གསུམ་ཤ་ཁྲག་ལིངྒས་བརྒྱུན་པའམ། དེ་ཙམ་དྲག་པོ་མི་དགོས་ན། དཀར་གཏོར་གཅིག་ལ་བཀུག་གཞུག་བྱ། ཡེ་ཤེས་ཀྱི་བདུད་རྩིར་བྱིན་གྱིས་བརླབས་ནས་འདི་སྐད་དོ།། ཀྱཻ། ལྷ་ཡི་དམག་དཔོན་མངར་རྒྱལ་རག་ཕྲོམ་ཁྱོད། །མཆེད་ལྕམ་ལས་མཁན་བློན་པོ་འཁོར་དང་བཅས། །ཐོག་མེད་གློག་ལྟར་མྱུར་བའི་རྫུ་འཕྲུལ་ཅན། །རིང་པར་འདིར་བྱོན་བཀའ་ཡི་གཏོར་མ་ལོངས། །སྔོན་ཚེ་ཆུ་བོ་ལོ་ཧི་ཏ་ཡི་འགྲམ། །སློབ་དཔོན་པདྨ་འབྱུང་གནས་བཞུགས་པའི་དྲུང་། །བོད་ཡུལ་ལྷ་འདྲེ་གཅིག་ཀྱང་མ་ལུས་
པ། །ཐམས་ཅད་གནས་མཆོག་དེ་རུ་འདུས་ནས་ཀྱང་། །མ་འོངས་སློབ་དཔོན་ཁྱེད་ཀྱི་རྗེས་འཇུག་ལ། །གནོད་ཅིང་འཚེ་བའི་དགྲ་བོ་གང་འདུག་པ། །ཐམས་ཅད་ངེད་ཅག་རྣམས་ཀྱིས་སྒྲོལ་ལོ་ཞེས། །ལྷ་འདྲེ་ཀུན་གྱིས་དམ་བཅའ་ཕུལ་བའི་ཚེ། །ལྷ་རྒྱལ་འཁོར་བཅས་དམ་བཅའ་དྲན་མཛོད་ལ། །བདག་ལ་སྡང་བའི་དགྲ་བོ་མྱུར་དུ་སྒྲོལ། །བདག་ཅག་སློབ་དཔོན་དེ་ཡི་བཀའ་བརྒྱུད་ཡིན། །ཁྱེད་རྣམས་དམ་ལ་བཏགས་པའི་ལྷ་འདྲེ་ཡིན། །དེ་བས་དམ་ལ་མ་འདའ་ཕྲིན་ལས་མཛོད། །ཅེས་བསྐུལ་ལ་གཏོར་མ་དམིགས་བྱའི་ཕྱོགས་སུ་བསྐྱལ་ལོ། །དེ་ནས་བཟོད་གསོལ་བྱེད་པ་ནི་འདི་སྐད་དོ། །ཀྱཻ། ད་ནི་བཟོད་པར་གསོལ་བ་ནི། །རྣལ་འབྱོར་བདག་ཅག་འཁོར་བཅས་དང་། །བུ་ཚ་ཕྱིར་རབས་ཡན་ཆད་ཀྱིས། །ལྷ་ཀླུ་གཞི་བདག་ཁྱེད་རྣམས་ལ། །ཐུགས་དང་འགལ་བར་གྱུར་པ་ལས། །ས་གཉན་བརྐོས་དང་ཆུ་གཉན་རྙོག །རྡོ་གཉན་རློག་དང་ཤིང་གཉན་བཅད། །གང་ཡང་བྱས་པ་མ་མཆིས་སོ། །གལ་ཏེ་མཆིས་ན་བཟོད་པར་གསོལ། །དེ་དག་གནོད་པ་མེད་པར་མཛོད། །ཁང་ལས་བྱས་དང་ཞིང་གཉན་རྨོས། །རོ་གཉན་ཁུར་དང་མནའ་གཉན་
བསྐྱལ། །གང་ཡང་བྱས་པ་མ་མཆིས་སོ། །གལ་ཏེ་མཆིས་ན་བཟོད་པར་གསོལ། །དེ་དག་གནོད་པ་མེད་པར་མཛོད། །རྨེ་དང་ནལ་དང་རྨུགས་དང་ནི། ཐབ་གཞོབ་མཁོན་དང་ཟས་ངན་ཟོས།། །གཟའ་སྐར་ངན་དང་ཕྱོགས་ངན་སོགས། །གང་ཡང་བྱས་པ་མ་མཆིས་སོ། །གལ་ཏེ་མཆིས་ན་བཟོད་པར་གསོལ། །དེ་དག་གནོད་པ་མེད་པར་མཛོད། །གཏོ་གཉན་ཕུལ་དང་ས་གཉན་ཕབ། །ལྷ་གཉན་བསྒོམས་ཤིང་ཟོར་གཉན་འཕང་། །སྔགས་གཉན་བཟླས་ཤིང་ཐུན་གཉན་འཐོར། །གང་ཡང་བྱས་པ་མ་མཆིས་སོ། །གལ་ཏེ་མཆིས་ན་བཟོད་པར་གསོལ། །དེ་དག་གནོད་པ་མེད་པར་མཛོད། །ཐུགས་ཞི་བྱང་ཆུབ་སེམས་དང་ལྡན་པར་མཛོད། །བཀྲ་ཤིས་བདེ་ལེགས་འཕེལ་བའི་ཕྲིན་ལས་མཛོད། །ཅེས་ཡིག་བརྒྱ་བཟླས་རྗེས་ཆོག་བྱ། བཀྲ་ཤིས་བརྗོད། ཀརྨ་ཨ་རཱ་གས་མཛད་པ་འདི། ཡི་གེ་འདི་ནི་ཏ་ཡི་མིང་ཅན་ནོ། ། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།