ཡུལ་གར་འདུག་གི་གསོལ་ཁ་སྤྱི་འགྲོ།
ཡུལ་གར་འདུག་གི་གསོལ་ཁ་སྤྱི་འགྲོ་ནི། ཀྱེ། སྟོང་གསུམ་སྲིད་པའི་འཇིག་རྟེན་གྱི། །ས་ཕྱོགས་ཡུལ་རིས་འདི་དག་ན། །གནས་པའི་གཞི་བདག་ལྷ་ཀླུ་གཉན། །ཡུལ་ས་གཞི་གནས་བདག་པོ་རྣམས། །འཁོར་དང་བཅས་པ་མ་ལུས་ཀུན། །རྣལ་འབྱོར་བདག་གིས་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །ཁྱེད་ནི་རྫུ་འཕྲུལ་སྟོབས་དང་ལྡན། །བར་སྣང་ས་གཞི་ཀུན་གྱི་བདག །ལེགས་ཉེས་ཀུན་གྱི་ཤན་འབྱེད་ཅིང་། །འགྲོ་བ་མི་དང་ལྷན་ཅིག་གནས། །ཁྱད་པར་ཡུལ་རིས་ས་ཕྱོགས་འདིའི། །ཡུལ་སའི་རྒྱལ་པོ་འཁོར་དང་བཅས། །གནས་འདིར་མྱུར་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །ཛཿཧཱུྃ་བཾ་ཧོ༔ ཁྱོད་ལ་མཆོད་པ་འབུལ་བ་ནི། །རིན་ཆེན་འབྲས་ཀྱི་གཡག་ལུག་དང་། །སྦ་སྨྱུག་རིན་ཆེན་མདའ་དར་དང་། །དར་སྣ་ལ་སོགས་མཆོད་པ་འབུལ། །ཕྱེ་མར་མཁན་ཤུག་བལ་བུ་དང་། །ཆང་ཕུད་གསེར་སྐྱེམས་འབྲུ་སྣ་དང་། །འབྲས་ཀྱི་བཤོས་བུ་རྒྱན་ལྡན་དང་། །བྱ་ཕོ་མཚལ་བུའི་གསུང་སྙན་དང་། །དཀར་གསུམ་མངར་གསུམ་སྨན་མཆོག་རྣམས། །དག་ཅིང་
གཙང་མར་བཤམ་པ་ཡི། །མཆོད་པའི་བྱེ་བྲག་བསམ་མི་ཁྱབ། །བདག་གི་བསམ་པ་དག་པ་དང་། །བདེ་གཤེགས་རྣམས་ཀྱི་བྱིན་རླབས་དང་། །སྔགས་དང་ཕྱག་རྒྱ་ཏིང་འཛིན་གྱིས། །།ཁྱོད་ཀྱི་དབང་པོའི་སྤྱོད་ཡུལ་དུ། །ཅི་འདོད་ཡིད་བཞིན་ཚིམས་གྱུར་ཅིག །ཁྱོད་ཀྱི་འདོད་པ་ཚིམས་ནས་ཀྱང་། །བདག་དང་རྒྱུ་སྦྱོར་ཡོན་བདག་གི །མི་ལ་ན་ཚ་མ་གཏོང་ཞིག །ཕྱུགས་ལ་གོད་ཁ་མ་གཏོང་ཞིག །ཞིང་ལ་བཙའ་སད་མ་གཏོང་ཞིག །དཀར་པོ་དགེ་བའི་སྡོང་གྲོགས་མཛོད། །མཆོད་དོ་བསྟོད་དོ་གཞི་བདག་མཆོད་། །དགྲ་བོ་གསོད་པའི་ཤན་པ་མཛོད། །མི་ནོར་སྲུང་བའི་རྫིའུ་མཛོད། །བུ་ཚ་གསོ་བའི་ལེ་གུ་མཛོད། །སེར་ཆགས་རྣམས་ཀྱི་ཆོས་སྐྱོང་མཛོད། །སྔགས་འཆང་རྣམས་ཀྱི་བསྟན་སྲུང་མཛོད། །ཞང་བློན་རྣམས་ཀྱི་བློ་རོགས་མཛོད། །གཞོན་ནུ་རྣམས་ཀྱི་དགྲ་བླ་མཛོད། །བུ་སྲིང་རྣམས་ཀྱི་རྒྱབ་རྟེན་མཛོད། །ཡུལ་ས་རྣམས་ཀྱི་མཆོད་ལྷ་ཡིན། །གར་མཆོད་རྣམས་ཀྱི་མགོན་སྐྱབས་མཛོད། །མི་ནོར་རྣམས་ཀྱི་རྫིའུ་མཛོད། །རྒྱུ་སྦྱོར་ཡོན་གྱི་བདག་པོ་ལ། །མི་ལ་ན་ཚའི་སྣ་མ་འདྲེན་། །ཕྱུགས་ལ་གོད་ཁའི་སྣ་
མ་འདྲེན་། །ཞིང་ལ་བཙའ་སད་སེར་གསུམ་སྣ་མ་འདྲེན། །བསྐྱབ་པའི་བུ་ཚ་སྐྱོབ་པར་མཛོད། །བཅོལ་བའི་ལེ་གུ་མ་སྟོར་ཅིག །བསྟན་པའི་སྒོ་ང་མ་བཅག་ཅིག །བདག་དང་ཡོན་བདག་འཁོར་བཅས་ལ། །བཙན་གྱི་ཕོ་ཉ་མ་འགྱེད་ཅིག །བདུད་ཀྱི་ཞགས་པ་མ་འདེབས་ཤིག །སྔ་ཞགས་མདའ་ལྟར་མ་འཕེན་ཅིག །ཕྱི་ཞགས་གྲུ་ལྟར་མ་བདོག་ཅིག །ཤ་བཟུང་གློག་ལྟར་མ་འཁྱུག་ཅིག །དཀར་པོ་དགེ་བའི་དཔུང་གྲོགས་མཛོད། །བསོད་ནམས་ནོར་གྱི་དངོས་གྲུབ་སྩོལ། །དགྲ་དང་བགེགས་ལ་ཕྲིན་ལས་མཛོད། །དལ་སྣ་ཇག་སྣ་བསྒྱུར་དུ་གསོལ། །།ནད་སྣ་ཡམས་སྣ་བསྒྱུར་དུ་གསོལ། །དགྲ་སྣ་གྱོད་སྣ་བསྒྱུར་དུ་གསོལ། །བདག་དང་ཡོན་བདག་འཁོར་བཅས་རྣམས། །དམག་ལ་འགྲོ་ན་དམག་དཔོན་མཛོད། །དམག་སྣ་སྡང་བའི་དགྲ་ལ་དྲོངས། །ཇག་ལ་འགྲོ་ན་ཇག་དཔོན་མཛོད། །དགྲ་ནོར་མང་པོ་གནང་དུ་ཆོད། །ཚོང་ལ་འགྲོ་ན་ཚོང་དཔོན་མཛོད། །རང་སེམས་འདོད་དགུ་ནོར་དང་སྤྱོད། །བྱེས་སུ་འགྲོ་ན་ལམ་ལྷ་མཛོད། །གཞི་ལ་འདུག་ན་ཡུལ་དཔོན་མཛོད། །མཐུ་དཔུང་གདོང་གྲོགས་རྒྱབ་
རྟེན་མཛོད། །རྣལ་འབྱོར་བདག་གི་བསམ་པ་སྒྲུབས། །ཡོན་བདག་དྲིན་ལན་ཆུད་མ་གསན། །བདག་དང་ཡོན་བདག་འཁོར་བཅས་ལ། །སྔོན་ནས་སུས་ལ་རྒྱབ་ནས་སྐྱོལ། །ལེགས་ཁ་བྱུང་ལ་རྒྱལ་ཁ་བསྟོད། །ཚེ་དང་བསོད་ནམས་སྤེལ་བར་མཛོད། །དཔལ་དང་གྲགས་པ་བསྒྲུབ་ཏུ་གསོལ། །ལོ་ཟླ་ཞགས་དུས་ཟ་མའི་སྐག །ཡེ་འདྲོགས་གློ་བུར་བཟློག་ཏུ་གསོལ། །བསྟན་པ་སྲུང་ཞིང་བསམ་པ་སྒྲུབས། །མཐུན་པའི་སྡོང་གྲོགས་མཛད་དུ་གསོལ། །བཀྲ་ཤིས་བདེ་ལེགས་འཕེལ་བར་མཛོད། །ཅེས་ཡུལ་གར་འདུག་གི་གསོལ་མཆོད་ཨ་རཱ་གས་མཛད་པའོ།། །། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།