ཡུལ་གར་འདུག་གི་གསོལ་ཁའི་སྤྲེང་ཟུར་འདེབས།
ཡུལ་གར་འདུག་གི་གསོལ་ཁའི་སྤྲེང་ཟུར་འདེབས་བཞུགས་སོ།
ན་མོ་པདྨ་ཀཱ་ར་ཡེ། འདི་ལ་དཀར་ཟླུམ་གཅིག་ལ་གཡག་ལུག་ར་གསུམ་བྱ་དང་འབྲང་རྒྱས་རྣམས་དར་ཚོན་རྣམ་ལྔ་དང་བལ་ཚོན་གྱིས་རྒྱན། འབྲུ་སྣ་ཤེལ་ཚིགས་སོགས་གཞུང་བཞིན་འབྱོར་ན་རབས། མ་འབྱོར་ན་དཀར་གཏོར་ལ་གཡག་ལུག་ར་གསུམ་སོགས་གང་འབྱོར་སྤྱི་ལྟར་བྱིན་བརླབས། དེ་ནས་གཞུང་གི། ཀྱཻ། སྟོང་གསུམ་སྲིད་པའི་འཇིག་རྟེན་གྱི། །སོགས་ནས། མཆོད་པའི་གནས་འདིར་གཤེགས་སུ་གསོལ། ཛཿཧཱུྃ་བཾ་ཧོཿའི་བར་བརྗོད། ཀྱེ། སྔོན་གྱི་དེ་ནི་གང་གསོལ་ཡང་། །ཡུལ་གྱི་ཡུལ་ལྷ་སྔོན་དུ་གསོལ། །ཕུ་རུ་དེ་ནི་ལྷ་གསོལ་ཡང་། །ཡུལ་གྱི་ཡུལ་ལྷ་སྔོན་དུ་གསོལ། །མདའ་རུ་དེ་ནི་འདྲེ་
བཀར་ཡང་། །ཡུལ་གྱི་ཡུལ་ལྷ་སྔོན་དུ་གསོལ། །མཐོ་བ་དེ་ནི་མཁར་བརྩེག་ཀྱང་། །ཡུལ་གྱི་ཡུལ་ལྷ་སྔོན་དུ་གསོལ། །དམའ་བ་དེ་ནི་ཁྱིམ་ཕུབ་ཀྱང་། །ཡུལ་གྱི་ཡུལ་ལྷ་སྔོན་དུ་གསོལ། །སྡང་བ་དེ་ནི་དགྲ་འདུལ་ཡང་། །ཡུལ་གྱི་ཡུལ་ལྷ་སྔོན་དུ་གསོལ། །བྱམས་པ་དེ་ནི་གཉེན་སྐྱོང་ཡང་། །ཡུལ་གྱི་ཡུལ་ལྷ་སྔོན་དུ་གསོལ། །དམག་དཔོན་དམག་ལ་འགྲོ་གྱུར་ཀྱང་། །ཡུལ་གྱི་ཡུལ་ལྷ་སྔོན་དུ་གསོལ། །ཇག་དཔོན་ཇག་ལ་འགྲོ་གྱུར་ཀྱང་། །ཡུལ་གྱི་ཡུལ་ལྷ་སྔོན་དུ་གསོལ། །གྲོས་དཔོན་གྲོས་ལ་འགྲོ་གྱུར་ཀྱང་། །ཡུལ་གྱི་ཡུལ་ལྷ་
སྔོན་དུ་གསོལ། །ལེགས་པའི་བྱ་བ་ཅི་བྱེད་ཀྱང་། །ཡུལ་གྱི་ཡུལ་ལྷ་སྔོན་དུ་གསོལ། །གསོལ་ལོ་གསོལ་ལོ་ལྷ་ཡར་གསོལ། །མཆོད་དོ་མཆོད་དོ་ལྷ་ཡར་མཆོད། །བསྟོད་དོ་བསྟོད་དོ་ལྷ་ཡར་བསྟོད། །ཡུལ་ལྷ་གཞི་བདག་ཡར་གསོལ་ལོ། །ཀྱཻ། སྔོན་གྱི་བསྐལ་པའི་དང་པོ་ལ། །ལྷ་གཡག་དཀར་པོ་ཞིག་གིས་གསོལ། །དེ་བརྗེས་བར་གྱི་བསྐལ་པ་ལ། །ལྷ་ལུག་དཀར་པོ་ཡིས་ནི་གསོལ། །ལྷ་ར་དཀར་པོ་རྒྱན་གདན་གསོལ། །དེང་སང་བསྐལ་པའི་སྙིགས་མ་ལ། །འབྲས་གཡག་གྲྭ་པ་འདི་ཡིས་གསོལ། །འབྲས་ལུག་དཀར་པོ་འདི་ཡིས་གསོལ། །འབྲས་ར་མདངས་ཅན་འདི་ཡིས་གསོལ། །ཕྱི་ནང་གསང་བའི་མཆོད་པས་གསོལ། །དངོས་སམ་ཡིད་ཀྱིས་སྤྲུལ་ནས་མཆོད། མཆོད་གསོལ་འདོད་དོན་ཞུ་བ་ནི། །བར་ཆད་ཐམས་ཅད་ཞི་ནས་ཀྱང་། །བསམ་པའི་དོན་ཀུན་འགྲུབ་པར་མཛོད། །དེ་ནས། ཀྱཻ། ཁྱོད་ལ་མཆོད་པ་འབུལ་བ་ནི། སོགས་ནས། ཅི་འདོད་ཡིད་བཞིན་ཚིམས་གྱུར་ཅིག །བར་བརྗོད། ཀྱེ། འབྲས་ཀྱི་ལྷ་གཡག་ཤམ་པོ་འདི། །རྩི་ཐོག་སྙིང་པོ་མར་གྱིས་བརྒྱན། །རྨིག་བཞིས་བདུད་བཞི་ནོན་
པ་ཡིན། །སྤུ་རྩིད་འཐུག་ལ་རྒྱས་པ་དེ། །མི་ནོར་འཐུག་ལ་རྒྱས་པ་ཡིན། །རུ་གཡུགས་དགྲ་ལ་བྱས་པ་ཡིན། །འཁྱམས་རྔམས་བགེགས་ལ་བྱས་པ་ཡིན། །འབྲས་ཀྱི་ལྷ་གཡག་དཀར་པོ་འདི། །ཡུལ་ལྷ་འཁོར་དང་བཅས་ལ་འབུལ། །ཐམས་ཅད་མཉེས་ཤིང་ཚིམས་གྱུར་ཅིག །ཀྱཻ། འབྲས་ཀྱི་ལྷ་ལུག་དཀར་པོ་འདི། །རྩི་ཐོག་སྙིང་པོ་མར་གྱིས་བརྒྱན། །རྨིག་བཞིས་བདུད་བཞི་ནོན་པ་ཡིན། །བལ་སྤུ་འཐུག་ལ་རྒྱས་པ་དེ། །མི་ནོར་འཐུག་ལ་རྒྱས་པ་ཡིན། །དཀར་གསུམ་འོ་ཞོ་རྒྱས་པ་འདི། །ལྷ་མི་མང་པོ་འདུ་རྟེན་ཡིན། །འབྲས་ཀྱི་ལྷ་ལུག་བལ་ཆེན་འདི། །ཡུལ་ལྷ་འཁོར་དང་བཅས་ལ་འབུལོ། །ཐམས་ཅད་མཉེས་ཤིང་ཚིམས་གྱུར་ཅིག །ཀྱཻ། འབྲས་ཀྱི་གཡང་ར་ཚེ་རེ་འདི། །རྩི་ཐོག་སྙིང་པོ་མར་གྱིས་བརྒྱན། །རྨིག་བཞིས་བདུད་བཞི་ནོན་པ་ཡིན། །སྤུ་རྩིད་འཐུག་ལ་རྒྱས་པ་དེ། །མི་ནོར་འཐུག་ལ་རྒྱས་པ་ཡིན། །འདི་གཡང་མོ་ནོར་གྱི་རུ་མ་ཡིན། །འབྲས་ཀྱི་ཚེ་རེ་གཡང་དཀར་འདི། །ཡུལ་ལྷ་འཁོར་དང་བཅས་ལ་འབུལ། །ཐམས་ཅད་མཉེས་ཤིང་ཚིམས་གྱུར་ཅིག །ཀྱཻ། འབྲས་ཀྱི་གཉན་བྱ་དམར་པོ་
འདི། །རིན་ཆེན་མཚལ་ལས་གྲུབ་པ་ཡིན། །ཨོག་ཞུམ་པདྨ་ཟླུམ་པ་འདྲ། །ཟེ་བ་ཟངས་ཀྱི་སོག་ལེ་འདྲ། །སྐུ་ལུས་ཟླུམ་ལ་བུམ་པ་འདྲ། །མཇུག་མ་རྒྱ་ཟོར་བཀུག་པ་འདྲ་། །འདི་དགུང་སྔོན་དབུས་ནས་ནམ་འཕང་གཅོད། །མི་མགོ་དགུང་བས་མཐོ་བ་ཡིན། །འབྲས་ཀྱི་གཉན་བྱ་དམར་པོ་འདི། །ཡུལ་ལྷ་འཁོར་དང་བཅས་ལ་འབུལ། །ཐམས་ཅད་མཉེས་ཤིང་ཚིམས་གྱུར་ཅིག །ཀྱཻ། འབྲས་ཀྱི་འབྲང་རྒྱས་ཞལ་དཀར་འདི། །འབྲང་རྒྱས་མ་ཡིན་གཡང་རྒྱས་ཡིན། །ཞབས་བརྟན་ས་ལ་བརྟེན་པ་ཡིན། །རྩེ་མོ་རིན་ཆེན་དགུང་དང་མཉམ། །མི་ནོར་དགུང་དང་མཉམ་པ་ཡིན། །ཁ་ཚར་ཟླུམ་པོར་བསྐོར་བ་འདི། །མི་ནོར་རང་ལ་འཁོར་བ་ཡིན། །ཞལ་ཁ་མར་གྱིས་བསྐུས་པ་འདི། །ལྷ་ཞལ་དུང་བས་དཀར་བ་ཡིན། །འདི་ལྷ་དཀོན་མཆོག་མཆོད་པའི་གཡང་ཞལ་ཡིན། །གཉན་ཡུལ་ལྷ་མཉེས་པའི་དམ་རྫས་ཡིན། །ལྷ་མི་འདུ་བའི་གཡང་རྫས་ཡིན། །འབྲས་ཀྱི་གཡང་རྫས་ཞལ་དཀར་འདི། །ཡུལ་ལྷ་འཁོར་དང་བཅས་ལ་འབུལ། །ཐམས་ཅད་མཉེས་ཤིང་ཚིམས་གྱུར་ཅིག །ཀྱི། འབྲས་དྲུག་ཆང་གི་གཡང་མཚོ་འདི། །
མིག་གིས་མཐོང་བས་དབང་པོ་གསལ། །ལག་ཏུ་བླངས་བས་གདུང་བ་སེལ། །ཞལ་དུ་གསོལ་བས་དྲན་རེག་གསལ། །ལྗགས་ལ་བཏུང་བས་དབང་པོ་ཚིམས་། །འདི་སྔོན་མོ་ནས་ཀྱི་ཁུ་བ་ཡིན། །བདུད་རྩི་ངར་གྱི་བཅུད་དང་ལྡན། །ཡུལ་ལྷ་འཁོར་དང་བཅས་ལ་འབུལ། །ཐམས་ཅད་མཉེས་ཤིང་ཚིམས་གྱུར་ཅིག །ཀྱཻ། ཡུ་མར་ཇ་ཡི་གཡང་མཚོ་འདི། །ཁུངས་བཙུན་ནག་པོ་རྒྱ་ནས་བྱུང་། །ཁྱུང་དཀར་མཛོ་དང་དྲེལ་ལ་བཀལ། །མེ་ཆུ་དག་པའི་རྫས་དང་སྦྱར། །ཡེ་ཤེས་བདུད་རྩིའི་བཅུད་དང་ལྡན་། །ཡུལ་ལྷ་འཁོར་དང་བཅས་ལ་འབུལ། །ཐམས་ཅད་མཉེས་ཤིང་ཚིམས་གྱུར་ཅིག །ཀྱཻ། ཞོ་དང་འོ་མའི་གཡང་མཚོ་འདི། །ཡེ་ཤེས་ལྔ་ཡི་བདུད་རྩི་ཡིན། །མིའུ་རིན་ཆེན་འདུ་རྟེན་ཡིན། །འོ་ཞོ་རྒྱ་མཚོ་འཁྱིལ་འདྲ་བ། །ཐུད་དཀར་གངས་རི་སྤུངས་འདྲ་འདི། །ཡུལ་ལྷ་འཁོར་དང་བཅས་ལ་འབུལ། །ཐམས་ཅད་མཉེས་ཤིང་ཚིམས་གྱུར་ཅིག །ཀྱཻ། འབྲུ་སྣ་རིན་ཆེན་སྣ་ལྔ་འདི། །སྤྲེའུ་བྱང་ཆུབ་སེམས་དཔའ་ཡིས། །འཇིག་རྟེན་དབང་ཕྱུག་སྤྱན་སྔར་ཞུས། །པོ་ཊ་ལ་ཡི་གནས་མཆོག་ནས། །འཕགས་པ་
སྤྱན་རས་གཟིགས་དབང་གིས། །ཁ་བ་ཅན་གྱི་ཡུལ་དུ་གཏོར། །སེམས་ཅན་ཀུན་གྱི་གསོས་སུ་གྱུར། །སྣ་ཚོགས་འབྲུ་སྣ་རིན་ཆེན་འདི། །ཡུལ་ལྷ་འཁོར་དང་བཅས་ལ་འབུལ། །ཐམས་ཅད་མཉེས་ཤིང་ཚིམས་གྱུར་ཅིག །ཀྱཻ། ལྷ་ཡི་དར་ཟབ་པཉྩ་ལི། །དཀར་སེར་དམར་ལྗང་སྔོ་དང་སྨུག །ཡིད་འོང་སྲབ་ལ་འཇམ་པའི་གོས། །ཁུངས་བཙུན་རྒྱ་དང་ཧོར་ནས་བྱུང་། །འགྲོ་བ་མི་དང་ལྷ་ཡི་རྒྱན། །སྤྲིན་ཕུང་བཞིན་དུ་གཏིབས་པ་འདི། །ཡུལ་ལྷ་འཁོར་དང་བཅས་ལ་འབུལ། །ཐམས་ཅད་མཉེས་ཤིང་ཚིམས་གྱུར་ཅིག །ཀྱཻ། ཡེ་ཤེས་བལ་ཚོན་སྣ་ལྔ་འདི། །རྒྱུ་ནི་བཀྲ་ཤིས་ལུག་ལས་བྱུང་། །ཁ་དོག་སྣ་ཚོགས་མཚོན་གྱིས་བསྒྱུར། །བཟང་ཤིང་སྣ་ཚོགས་རྩེ་ལ་བཏགས། །འབྱུང་བ་རླུང་གིས་བསྐྱོད་པའི་ཚེ། །རིན་པོ་ཆེ་ཡི་སྤྲིན་ཕུང་ལྟར། །འདོད་ཡོན་ཆར་ལྟར་འབེབས་པ་འདི། །ཡུལ་ལྷ་འཁོར་དང་བཅས་ལ་འབུལ། །ཐམས་ཅད་མཉེས་ཤིང་ཚིམས་གྱུར་ཅིག །ཀྱི། འདོད་པའི་ཡོན་ཏན་ལྔ་ལྡན་པའི། །དཀར་གཏོར་བདུད་རྩིའི་རྒྱ་མཚོ་དང་། །ཕྱེ་མར་གངས་རི་སྤུངས་འདྲ་དང་། །བཟང་ཤིང་སྣ་ཚོགས་ཟས་ཕུད་
རྣམས། །བསྲེགས་པའི་དུད་པ་སྤྲིན་ལྟར་གཏིབས། །སྔགས་དང་ཕྱག་རྒྱས་བྱིན་བརླབས་ནས། །ཡུལ་ལྷ་འཁོར་དང་བཅས་ལ་འབུལ། །ཐམས་ཅད་མཉེས་ཤིང་ཚིམས་གྱུར་ཅིག །ཅེས་དང་། གཞུང་གི །ཁྱོད་ཀྱི་འདོད་པ་ཚིམས་ནས་ཀྱང་། །སོགས་ནས། བཀྲ་ཤིས་བདེ་ལེགས་འཕེལ་བར་མཛོད། །ཅེས་སྦྱར། དེ་ནས་གཏོར་མ་བཏེག་ལ། །ཀྱཻ། གངས་རི་དཀར་ལ་འཚེར་བ་འདི། །སྟག་ཆེན་ངར་མི་མཆེ་བ་འདྲ། །འདི་ཡང་ཡུལ་ལྷ་བཞུགས་པའི་གནས། །མ་ཡོ་གནས་དང་བརྟན་པར་བཞུགས། །བྲག་རི་དཀར་ལ་གཟེང་པ་འདི། །འབྲོང་བུ་དར་མའི་རྭ་རྩེ་འདྲ། །འདི་ཡང་ཡུལ་ལྷ་བཞུགས་པའི་གནས། །མ་ཡོ་གནས་དང་བརྟན་པར་བཞུགས། །བྲག་རི་དཀར་ལ་རྔམས་པ། །སྐྱེས་པ་དེར་མིའི་གདོང་པ་འདྲ། །འདི་ཡང་ཡུལ་ལྷ་བཞུགས་པའི་གནས། །མ་ཡོ་གནས་དང་བརྟན་པར་བཞུགས། །སྤང་དང་ནགས་གཉིས་འདྲེས་པ་འདི། །ཅང་ཤེས་རྟ་ཡི་ཟེ་བ་འདྲ། །འདི་ཡང་ཡུལ་ལྷ་བཞུགས་པའི་གནས། །མ་ཡོ་གནས་དང་བརྟན་པར་བཞུགས། །གཡའ་དང་སྤང་གཉིས་འདྲེས་པ་འདི། །ར་ལུག་འབྲི་ཡི་གདོང་པ་
འདྲ། །འདི་ཡང་ཡུལ་ལྷ་བཞུགས་པའི་གནས། །མ་ཡོ་གནས་དང་བརྟན་པར་བཞུགས། །དེ་ལྟར་རྟེན་བཅས་བཞུགས་ནས་ཀྱང་། །ཡུལ་ལྷ་གཉན་པོ་ཁྱེད་རྣམས་ཀྱིས། །རྣལ་འབྱོར་བདག་ཅག་འཁོར་བཅས་ཀྱི། །རྐྱེན་ངན་བར་ཆད་ཞི་བ་དང་། །མཐུན་རྐྱེན་ཆོས་མཐུན་བསམ་པ་འགྲུབ། །བཅོལ་བའི་ཕྲིན་ལས་འགྲུབ་པར་མཛོད། །ཅེས་དང་། རང་རང་ཇི་ལྟར་ནུས་པ་ཡིས། །ལས་ཀྱི་དངོས་གྲུབ་བདག་ལ་སྩོལ། །ཁོ་འཛིན་རྒྱབ་རྟེན་སྡོང་གྲོགས་མཛོད། །སྙན་པ་སྒྲོག་ལ་གྲགས་པ་སྤེལ། །སྐྱེལ་བསུ་མཐུ་རྐྱེན་རོགས་ལྡན་མཛོད། །ལེགས་དང་སྤྱོད་ལ་ཉེས་དང་བསྣོལ། །བསམ་པ་སྒྲུབས་ལ་རེ་བ་སྐོངས། །བཅོལ་བའི་ཕྲིན་ལས་འགྲུབ་པར་མཛོད། །ཅེས་གཏོར་མ་གསས་མཁར་རམ་རི་རྩེར་འབུལ། ཡུལ་ལྷ་སྤྱི་ཡི་གསོལ་མཆོད་ཨ་རཱ་གས་མཛད་པའོ།། །། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།