བཙན་གསོལ་ཡུལ་བཙན་གྱི་གསོལ་མཆོད་སྤྱི་འགྲོ།
བཙན་གསོལ་ཡུལ་བཙན་གྱི་གསོལ་མཆོད་སྤྱི་འགྲོ་བཞུགས་སོ།། ༈ བཙན་གསོལ་བྱེད་པར་འདོད་ན། དམར་གཏོར་རྩེ་དགུ་གཡས་དཀྱུས། དཀར་གཏོར་མཐེབ་སྐྱུ་འབྲུ་སྣ་ཕྱེ་མར་གསེར་སྐྱེམས་རྣམས་བཤམས་ལ། བྱིན་རླབས་སྤྱི་དང་མཐུན་པར་བྱས་ལ། རང་ཉིད་ཡི་དམ་གསལ་ལ་འདི་སྐད་དོ། །ཀྱཻ། ཕྱོགས་ཕྱོགས་དག་ཀྱང་ཕ་ཀི་ན། །ཉི་མ་ནུབ་ཕྱོགས་ཕ་ཀི་ན། །བཙན་ཡུལ་རི་བྲག་དམར་པོ་ནས། །ཡུལ་བཙན་རྒྱལ་པོ་མཐུ་བོ་ཆེ། །ཕལ་ཆེར་སྐུ་མདོག་དམར་པོ་ལ། །སྐུ་ལ་ཟངས་ཁྲབ་དམར་པོ་གསོལ། །དབུ་ལ་ཟངས་ཀྱི་རྨོག་མོ་གསོལ། །ཕྱག་ན་བ་དན་ཞགས་པ་བསྣམས། །སྟག་རལ་གཡས་ལ་གཟིག་ཤུབས་གཡོན། །ཆིབས་སུ་བཙན་རྟ་དམར་པོ་ཆིབས། །བཙན་དམག་འབུམ་གྱི་འཁོར་གྱིས་བསྐོར། །ཀྱི། ཁྱེད་ཀྱི་འཁོར་གྱི་ཕོ་ཉ་བ། །ལ་བཙན་དང་ནི་ལུང་བཙན་དང་། །བྲག་བཙན་དང་ནི་ཆུ་བཙན་དང་། །གངས་བཙན་དང་ནི་གཡའ་བཙན་དང་། །རླུང་བཙན་དང་ནི་ཤིང་བཙན་དང་། །འཁོར་དང་བཅས་པ་མ་ལུས་ལ། །ཚུར་བྱོན་ཚུར་བྱོན་གནས་འདིར་བྱོན། །ཤུ་ལ་ཏྲི་ས་མ་ཡ་ཛ་ཛ༔ ཀྱཻ། ཁྱེད་ལ་མཆོད་པ་འབུལ་བ་ནི། །བཙན་བཤོས་ཤ་ཁྲག་དམར་གྱིས་མཆོད། །
དཀར་གསུམ་མངར་གསུམ་འབྲུ་སྣ་གསེར་སྐྱེམས་སོགས། །དངོས་སུ་བཤམས་དང་ཡིད་ཀྱིས་སྤྲུལ་ནས་འབུལ། །གསོལ་ལོ་མཆོད་དོ་བཙན་རྒོད་འཁོར་བཅས་མཆོད། །བརྔན་ནོ་བསང་ངོ་བཙན་རྒོད་འཁོར་བཅས་བསང་། །ཀྱཻ། སློབ་དཔོན་པདྨའི་སྤྱན་སྔར་ཁས་བླངས་ལྟར། །ཁྱོད་ལ་ཕྲིན་ལས་བཅོལ་བ་ནི། །སངས་རྒྱས་བསྟན་པ་ཁྱེད་ཀྱིས་སྲུངས། །དཀོན་མཆོག་དབུ་འཕང་ཁྱོད་ཀྱིས་བསྟོད། །རྣལ་འབྱོར་འགལ་རྐྱེན་ཁྱེད་ཀྱིས་ཟློག །མི་མཐུན་རྐྱེན་དང་བར་ཆད་སོལ། །བཙན་གྱི་གློ་བུར་གཟེར་ནད་ཟློག །མི་ནད་ཕྱུགས་ནད་ཞི་བར་མཛོད། །བདག་ཅག་དཔོན་སློབ་འཁོར་བཅས་ལ། །བཟུང་བ་ཐོངས་ལ་བཅིངས་བ་ཁྲོལ། །མནན་པ་ཁྱོག་ལ་བསྡམ་པ་ཀློད། །འབྱུང་བཞིའི་ནད་རྣམས་ཞི་བར་མཛོད། །བཙན་གྱི་ཞགས་པ་མ་འདེབས་ཤིག །སོ་སོ་རང་རང་གནས་སུ་གཤེགས། །འཁོར་འདི་གནོད་པ་མ་བྱེད་ཅིག །ཕོག་ཐུག་འགྲམ་འཁྲུགས་ཞི་བར་མཛོད། །བཅོལ་བའི་ཕྲིན་ལས་འགྲུབ་པར་མཛོད། །ཅེས་བཙན་གསོལ་འདི་དེང་སང་མི་ཕྱུགས་ཕལ་ཆེར་ལ། བཙན་གྱི་གནོད་འཚེ་ཆེ་བས་དེ་ལ་ཕན་ཕྱིར་ཡུལ་ཕྱོགས་སྤྱི་འགྲོས་ཀྱི་བཙན་གསོལ་དུ། ༧ རཱ་ག་ཨ་སྱས་སྦྱར་བའོ། །མངྒ་ལཾ།། །།