དྲག་པོ་སྤྱི་འདུས་ཀྱི་བསྐུལ་པ་ཆོས་སྐུ་ཞི་བ་མ།
དྲག་པོ་སྤྱི་འདུས་ཀྱི་བསྐུལ་པ་ཆོས་སྐུ་ཞི་བ་མ་བཞུགས་པའི་དབུ་ཕྱོགས་ལགས་སོ།
ཧཱུྃ། ཆོས་སྐུ་ཞི་བའི་ངང་ལས་མ་གཡོས་ཀྱང་། །གཟུགས་སྐུ་འཇིགས་པའི་ཆ་ལུགས་རྫོགས་མཛད་པ། །རིག་འཛིན་ཡི་དམ་ཌཱ་ཀི་ཆོས་སྐྱོང་ཚོགས། །མི་མངོན་དབྱིངས་ནས་གནས་འདིར་སྐུ་བསྐྱོད་ལ། །ཞལ་གདངས་ལྗགས་འདྲིལ་སྐན་སྒྲ་ཆེམས་སེ་ཆེམ། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །པད་འབྱུང་ཟབ་གཏེར་རྡོ་རྗེ་གྲོ་བོ་ལོད། །སེང་གེ་སྒྲ་སྒྲོག་དམར་ནག་མེ་ཕྲེང་ཅན། །པདྨ་བཛྲ་དགོངས་འདུས་ལྷ་ཡི་ཚོགས། །རྡོ་རྗེ་དྲལ་རྩལ་མེ་དབལ་ལྕགས་སྡིག་སོགས། །རིག་འཛིན་ཁྲོས་པའི་ལྷ་ཚོགས་ཐམས་ཅད་ཀྱིས། །དགྲ་
བགེགས་ཤ་ཁྲག་གཏོར་མ་འདི་བཞེས་ཤིག །དྲ་བ་སྡོམ་པའི་ལྷ་ཚོགས་འཁོར་ལོ་ལྔ། །སྐུ་གསུང་ཐུགས་དང་སྙིང་པོ་ཀྱི་རྡོ་རྗེ། །མཱ་ཡཱ་ཐོད་པ་རིགས་འདུས་གུར་གྱི་ལྷ། །གདན་བཞི་ཡབ་ཡུམ་བདུད་རྩི་རྡོ་རྗེ་སེམས། །ཧེ་རུ་ཀ་ཡི་ལྷ་ཚོགས་ཐམས་ཅད་ཀྱིས། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །ཆེ་མཆོག་དཔལ་དགུ་ཡབ་ཡུམ་སྲས་དང་འཁོར། །ཡང་དག་ཐུགས་མཆོག་འབར་བ་ལྔ་བཅུ་བརྒྱད། །རྡོ་རྗེ་གཞོན་ནུ་ཁྲོ་བཅུ་ཁྲ་ཐབས་བཅས། །ཡེ་ཤེས་འཇིགས་བྱེད་གསང་བདག་ཁྱུང་གི་ཚོགས། །ཡི་དམ་དཔལ་ཆེན་ལྷ་ཚོགས་ཐམས་ཅད་ཀྱིས། །
དགྲ་བགེགས་ཤ་ཁྲག་གཏོར་མ་འདི་བཞེས་ཤིག །དགྲ་ནག་གདོང་དྲུག་འཇིགས་བྱེད་གཤེད་དམར་ནག །ཚེ་བདག་འཆི་བདག་ཁྲོ་ཆུ་དུག་གདོང་ཅན། །ཀིང་ཀང་དམར་ནག་འཆར་ཁ་ཆོས་ཀྱི་རྒྱལ། །གནམ་ལྕགས་ཕ་ལམ་རྡོ་རྗེ་ཞུན་བྱེད་སོགས། །འཇམ་དཔལ་གཤིན་རྗེའི་གཤེད་པོའི་ལྷ་ཚོགས་རྣམས། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །དབང་ཆེན་དམར་ནག་རྟ་ནག་དྲེགས་པའི་ཚོགས། །གསང་བ་ཡེ་ཤེས་ཕག་ཁྲོས་སེང་གདོང་མ། །འཇིགས་བྱེད་ཆེན་མོ་ལས་ཧུར་དྲག་མོའི་ཚོགས། །རི་རབ་སོ་ཊྛིགཉིས་རྡུལ་མཉམ་ཌཱ་ཀི་མ། །གནས་ཡུལ་དཔའ་བོ་མཁའ་འགྲོ་ཐམས་ཅད་ཀྱིས། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །རྒྱུད་བདག་དྲག་པོ་རོ་ཟ་གདམས་ངག་རྒྱལ། །བགེགས་དགྲ་སྨེ་བ་བརྩེགས་དང་སྟོབས་པོ་ཆེ། །ཧཱུྃ་མཛད་ཁམས་གསུམ་རྣམ་རྒྱལ་མི་གཡོ་མགོན། །འབྱུང་འདུལ་རྣམ་པར་འཇོམས་དང་འདོད་པའི་རྒྱལ། །ཡེ་ཤེས་ཁྲོ་བོའི་ལྷ་ཚོགས་ཐམས་ཅད་ཀྱིས། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །བྱ་རོག་མཚན་དགུ་སྐུ་ལྔ་ཡབ་དང་ཡུམ། །བྱ་རོག་གདོང་དགུ་རྩ་འཇིབ་ཙཎྜི་
ཀ །ནག་པོ་སྟོང་སྡེ་ཤ་ཟ་འབུམ་གྱི་ཚོགས། །མ་མོ་བྱེ་བ་གནོད་སྦྱིན་ཁྲི་ཡི་འཁོར། །དམག་དཔོན་བརྒྱུད་དང་ཁྲབ་ཆེན་བྱེ་བ་འབུམ། །།དགྲ་བགེགས་ཤ་ཁྲག་གཏོར་མ་འདི་བཞེས་ཤིག །ལེགས་ལྡན་བེང་དང་ཚོགས་བདག་ཨ་གྷོ་ར། །སྲས་མཆོག་ནག་པོ་ཕྱོགས་བཅུའི་མགོན་པོའི་ཚོགས། །དྲེགས་བྱེད་བེར་ནག་ཡབ་ཡུམ་བཅོ་བརྒྱད་དང་། །དྲེགས་པའི་གཙོ་བོ་སུམ་ཅུ་རྩ་གཉིས་རྣམས། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །མགོན་པོ་ཡིད་བཞིན་ནོར་བུ་ཤིང་ཕུང་ཅན། །ཀེ་ཊ་པཱ་ལ་གནོད་སྦྱིན་མཆེད་སྡེ་བཞི། །ཀེ་ཊ་པཱ་ལ་སྤྲེལ་ཁྲིད་བྱ་གདོང་མ། །དཔལ་མགོན་བདུན་ཅུ་དྲེགས་པ་སྟོང་ཕྲག་ལྔ། །ཐུགས་རྗེ་ཆེན་པོ་དྲག་པོའི་ལྷ་ཚོགས་རྣམས། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །མ་ནིང་སྡེ་ལྔ་སྲོག་བདག་དཔལ་འབར་མ། །ཐུབ་བདག་གློག་ཕྲེང་སྤུ་གྲི་གཅིག་ཤུལ་དང་། །མ་མགོན་སྡེ་བརྒྱད་བདུད་དམག་སྟོང་ས། །ཞང་བློན་ནག་པོ་ཡཀྟ་དྷ་ཛ་སོགས། །བདུད་དམག་བྱེ་བ་འབུམ་འགྱུར་ཚོགས་བཅས་ཀྱིས།། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །རྒྱུད་གུར་ནག་
པོ་འབར་བ་ཧཱུྃ་མཛད་ནག །གྲི་གུག་ཁྲོས་པའི་སྲིན་མགོན་གདོང་བཞི་པ། །དུར་ཁྲོད་བདག་པོ་ཡབ་ཡུམ་དབང་ཕྱུག་ཚོགས། །སེང་གདོང་ཡབ་ཡུམ་བམ་རོ་སྡེ་བརྒྱད་བཅས། །བྲག་མགོན་མདུང་འཛིན་ལ་སོགས་མགོན་པོ་རྣམས། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །རང་བྱུང་རྒྱལ་མོ་དུད་པའི་སོལ་བ་མ། །དམག་ཟོར་རྒྱལ་མོ་རེ་ཏི་མཆེད་སྡེ་བཞི། །ཨེ་ཀ་ཙ་ཏི་སྲོག་སྒྲུབ་ཁ་མོ་ཆེ། །སྤྱང་ཞོན་མཆེད་གསུམ་ཌཱ་ཀི་ཟ་བྱེད་གདོང་། །ལྷ་མོའི་རིགས་གྱུར་སྟོང་དང་རྩ་བརྒྱད་ཀྱིས། །དགྲ་བགེགས་ཤ་ཁྲག་གཏོར་ཟླུམ་འདི་བཞེས་ཤིག །བ་ལམ་དྲིལ་སྣ་ཁྲི་སྨན་སི་ལི་མ། །སྟག་སྨན་སོར་ལྡེམ་དཔལ་ལྷ་རབ་བརྟན་མ། །ཨ་ཕྱི་མཆེད་ལྔ་ཚེ་རིང་མཆེད་སྡེ་ལྔ། །ཁོ་ལེ་ཐང་ནག་དཔལ་མོ་དྲག་མོ་མཚོ། །འཇིག་རྟེན་ལས་ཀྱི་མ་མོ་མཁའ་འགྲོའི་ཚོགས། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །དྲེགས་བྱེད་བསེ་ཡི་སྐྱེས་བུ་མདུང་དམར་ཅན། །ཤན་པ་དམར་ནག་ཡབ་ཡུམ་ལས་མཁན་བརྒྱད། །བེག་རྩེ་ཡམ་ཤུད་གྲི་ཐོགས་ཤན་པའི་འཁོར། །གཙུག་ན་མེ་འབར་རོལ་པ་སྐྱ་བདུན་སོགས། །བསྟན་སྲུང་གནོད་སྦྱིན་དྲག་པོ་ཐམས་
ཅད་ཀྱིས། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །མགར་བ་དམར་ནག་མཆེད་འཁོར་དཔུང་དང་བཅས། །དྲེགས་པ་སུམ་སྦྲེལ་དྲེགས་པ་ལྔ་འདུས་དང་། །འབར་བ་སྤུན་བདུན་ཇག་མེ་སྤྲུག་གི་བཙན། །ལུང་བཙན་གདང་ལྷ་དྲག་པོ་སྙིང་དྲུང་བཙན། །ཞང་བློན་བཙན་རྒོད་འཁོར་དང་བཅས་པ་ཡིས། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །ཁྱབ་འཇུག་ནག་པོ་གཟའ་བརྒྱད་གདོང་མོ་བཞི། །ཧབ་ཤ་ཧ་ར་ནག་པོ་ངེ་ནེ་མ། །གཞོན་ནུ་གཏུམ་པོ་སྨྱོ་ཁ་རྡོ་རྗེ་རྒྱལ། །ཐང་ལྷ་ཧ་ས་གཏྟཱ་ཏི་པ་ཙ། །བཀའ་སྲུང་གཟའ་ཀླུ་ས་བདག་ཚོགས་རྣམས་ཀྱིས། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །སྤུ་གྲི་མཆེད་གསུམ་མཁའ་རི་ལྕམ་དྲལ་གཉིས། །བདུད་པོ་རྡོར་འབར་དགུ་ཐུབ་ཨ་ཙ་ར། །ཚོགས་བདག་དྲག་པོ་རྩ་དུ་མཆེད་སྡེ་དགུ། །ཚེ་རིང་རོ་ལངས་ཁ་ལ་མེ་འབར་དང་། །རྡོ་རྗེ་མོན་པ་ལ་སོགས་སྲུང་མ་རྣམས། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །ལྕེ་སྤྱང་མ་བརྒྱད་དབང་ཕྱུག་ཉི་ཤུ་བརྒྱད། །གྲི་ཐོགས་ཁྲམ་ཐོགས་ཤྭ་ཐོགས་ཤན་པའི་ཚོགས། །ཁྱི་བརྒྱད་སྤྱང་བརྒྱད་འབྲུག་
གསུམ་དམུས་ལོང་བརྒྱད། །ཕུར་སྲུང་བཅུ་དྲུག་གིང་ལང་མ་མོ་སོགས། །བཀའ་བརྒྱད་ཕོ་ཉ་བཀའ་སྲུང་ཡོངས་རྫོགས་རྣམས། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག་་ཕྱི་ནང་གསང་བ་ཡང་གསང་སྡེ་བརྒྱད་ཚོགས། །དྲེགས་ཆེན་བཅོ་བརྒྱད་དྲེགས་པ་ཉི་ཤུ་གཅིག །སྡེ་དཔོན་སུམ་ཅུ་སྡེ་འཁོར་དཔུང་དང་བཅས། །རྡོ་རྗེ་དེ་མོ་བརྟན་སྐྱོང་ཡ་མའི་ཚོགས། །དགེ་བསྙེན་ཉེར་གཅིག་དམ་ཅན་རྒྱ་མཚོའི་ཚོགས། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །ཧཱུྃ། ད་ལྟ་དུས་ངན་སྙིགས་མའི་སེམས་ཅན་རྣམས། །ཐར་པ་སྒྲུབ་ཀྱང་བར་ཆད་དབང་བཙན་ན། །ཐུགས་རྗེ་མྱུར་མགྱོགས་བྱིན་རླབས་དུས་ལ་བབ། །འཕྲལ་རྐྱེན་ངན་པའི་བར་ཆད་ཐམས་ཅད་ཟློག །དུས་མིན་འཆི་བའི་དབང་དུ་མ་གཏོང་བར། །ཚེ་སྲོག་དབང་ཐང་ཉམས་པ་གསོ་རུ་གསོལ། །སྒྲུབ་མཆོག་བདག་ལ་དངོས་གྲུབ་རྣམ་གཉིས་སྩོལ། །ཁྱད་པར་དྲག་པོ་མཐུ་ཡི་དངོས་གྲུབ་ཞུ། །ཧཱུྃ༔ སྔོན་ཚེ་སློབ་དཔོན་པདྨ་ཡིས། །ལྷ་སྲིན་དམ་ལ་བཏགས་པ་རྣམས། །སྔོན་གྱི་དམ་བཅའ་མ་གཡེལ་བར། །བརྒྱན་པའི་གཏོར་མ་འདི་བཞེས་ལ། །རྣལ་འབྱོར་བཅོལ་
བའི་ཕྲིན་ལས་མཛོད། །ཧཱུྃ། སློབ་དཔོན་པདྨ་འབྱུང་གནས་ཀྱིས། །བརྟན་མ་བཅུ་གཉིས་དམ་ལ་བཏགས། །བཀའ་དང་དམ་ལ་མ་འདའ་བར། །བརྒྱན་པའི་གཏོར་མ་འདི་བཞེས་ལ། །བཅོལ་བའི་ཕྲིན་ལས་མྱུར་དུ་མཛོད། །མཱ་མ་ཧྲཱིང་ཧྲཱིང་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། བྷྱོ༔ འཇིག་རྟེན་འདས་དང་མ་འདས་པའི། སྲུང་མ་དམ་ཅན་རྒྱ་མཚོའི་ཚོགས། །ཁྱེད་ཀྱི་ཐུགས་དམ་དུས་ལ་བབ། །བདག་ཅག་དཔོན་སློབ་འཁོར་བཅས་ལ། །རླུང་མཁྲིས་བད་ཀན་འདུས་པ་ལས། །གྱུར་པའི་ནད་རིགས་བཞི་བརྒྱ་དང་། །རྩ་བཞི་ཞི་བར་མཛད་དུ་གསོལ། །རྒྱལ་པོ་ཀླུ་གདོན་ལ་སོགས་པ། །གདོན་གྱི་རིགས་རྣམས་ཞི་བར་མཛོད། །རྨི་ལམ་ངན་སོགས་ཞི་བར་མཛོད་། །བདག་ཉིད་རྣལ་འབྱོར་བསྲུང་དུ་གསོལ། །ཉིན་དང་མཚན་དུ་བྱ་ར་མཛོད། །ཚེ་དང་བསོད་ནམས་སྤེལ་དུ་གསོལ། །དཔལ་དང་གྲགས་པ་བསྒྲུབ་ཏུ་གསོལ། །འཁོར་དང་བསྟན་པ་བསྲུང་དུ་གསོལ། །ལུས་དང་གྲིབ་མ་བཞིན་དུ་འགྲོགས། །ལེགས་དང་སྤྱོད་ལ་ཉེས་དང་བསྣོལ། །བསམ་པ་སྒྲུབས་ལ་རེ་བ་སྐོངས། །བྷྱོ༔ མདོས་
ཟོར་ཤར་ཁྲག་གཏོར་མ་འདིས། །ད་ལྟར་རྣལ་འབྱོར་བདག་ཅག་ལ། །སྡེ་བརྒྱུད་ཆད་པ་བྱུང་བ་ཟློག །བྱད་ཟོར་ཕུར་ཁ་ཐམས་ཅད་ཟློག །བནྡེའི་སྔགས་ཟོར་འདུས་པ་ཟློག ། མུ་སྟེགས་བོན་པོའི་ཛོ་དམར་ཟློག །ལྷ་འདྲེའི་ཟ་ཁ་ཟུག་པ་ཟློག །རྒྱལ་པོ་ལོ་ཡི་བདུན་ཟུར་ཟློག །བློན་པོ་ཟླ་བའི་དབང་བཙན་ཟློག །དམག་མི་ཞག་གི་དཔུང་དགྲ་ཟློག །མཚོན་ཆ་དུས་ཀྱི་རྣོ་ངར་ཟློག །སྤར་ཁའི་སྐྱ་མདའ་ཟུག་པ་ཟློག །སྨེ་བ་དུར་དུ་ཚུད་པ་ཟློག །ས་བདག་ཀོ་ལོང་གདུག་རྩུབ་ཟློག །འབྱུང་བའི་དགྲ་གཤེད་འཐབ་པ་ཟློག །གཟའ་སྐར་དུས་ཚེས་ངན་པ་ཟློག །ལོ་ཟླ་ཞག་དུས་བབ་པ་ཟློག །ཁྲམ་དང་བྱེད་དུ་བཅུག་པ་ཟློག །ཧོམ་དང་པར་བུ་བསྐོར་བ་ཟློག །དགྲ་ཆེན་བདུད་དུ་ལངས་བ་ཟློག །ལྟས་ངན་གློ་བུར་ཡེ་འདྲོག་ཟློག །དུས་མིན་འཆི་བ་རྣམ་བརྒྱད་ཟློག །མི་ཁ་བྲམ་མཆུ་ཐམས་ཅད་ཟློག །ཆག་ཆེན་ཉམ་ང་ཐམས་ཅད་ཟློག །སྔོན་གུག་ཕྱིས་ནས་དེད་པ་ཟློག །དགྲ་སྣ་ཕུང་སྣ་གྱོད་སྣ་ཟློག །ནད་སྣ་རིམས་སྣ་ཡམས་སྣ་ཟློག །དགྲ་སྲི་རྨིས་ངན་ཐམས་ཅད་ཟློག །ཆེ་སྲི་ཆུང་སྲི་རྒན་སྲི་ཟློག །གཞོན་སྲི་དར་སྲི་གོད་སྲི་ཟློག །དགྲ་སྲི་
མཚོན་སྲི་ནད་སྲི་ཟློག །མདོར་ན་སྲིད་པའི་ཆགས་སྒོ་ཟློག །བདག་ལ་སྡང་བའི་དགྲ་འདྲེ་རྣམས། །སྡང་བྱེད་དགྲ་ཡི་སྟེང་དུ་ཟློག །གནོད་བྱེད་བགེགས་ཀྱི་སྟེང་དུ་བྷྱོ། །བར་ཆད་བདུད་ཀྱི་སྟེང་དུ་བྷྱོ། །ཟ་འདྲེ་ཕུང་སྲིའི་སྟེང་དུ་བྷྱོ། །དམ་ཉམས་བྱད་མའི་སྟེང་དུ་བྷྱོ། །ཡ་ཉི་མ་ལྷོ་ཕྱོགས་ཕ་ཀི་ན། །རིམ་པ་བདུན་གྱི་ས་འོག་ནས། །ལས་ཀྱི་གཤིན་རྗེ་མཐུ་རྩལ་ཅན། །འཁོར་དུ་གཤིན་རྗེ་འབུམ་གྱིས་བསྐོར། །སྟོང་གསུམ་འཇིག་རྟེན་ཁྱབ་པར་ཉུལ། །ཁྱོད་ཀྱི་ཐུགས་དམ་དུས་ལ་བབ། །འཆི་བདག་ནག་པོའི་དུས་ལ་བབ། །ཚེ་བདག་ནག་པོའི་དུས་ལ་བབ། སྲོག་བདག་ནག་པོའི་དུས་ལ་བབ། །བྷེ་ཝ་པྲ་ཏིའི་དུས་ལ་བབ། །ཟ་བ་ལྗང་དམར་དུས་ལ་བབ། །ཡ་མ་རྭ་ཙའི་དུས་ལ་བབ། །སྤྱི་གཤེད་དུག་གདོང་དུས་ལ་བབ། །བདག་ཅག་རྣམས་ལ་གནོད་བྱེད་པའི། །བན་བོན་ཤན་པ་མུ་སྟེགས་ཚོགས། །དྲེགས་ཆེན་བཅོ་བརྒྱད་ལྷ་འདྲེ་སྟོང་། །བྱད་མ་འབུམ་དང་བཅས་པ་རྣམས། །སྐད་ཅིག་ཉིད་ལ་བརླག་པར་མཛོད། །བརྒྱན་པའི་གཏོར་མ་འདི་བཞེས་ལ། །བཅོལ་བའི་ཕྲིན་ལས་འགྲུབ་པར་མཛོད། །
ཧཱུྃ༔ སངས་རྒྱས་བསྟན་པ་སྲུང་བྱེད་པའི། །ལེགས་ཉེས་ཀུན་གྱི་ཤན་འབྱེད་ཅིང་། །བླ་མེད་བཀའ་ཡི་བྱ་ར་བ། །དྲང་སྲོང་འཁོར་བཅས་གཏོར་མ་ལོངས། །སྡང་བ་དགྲ་ཡི་སྟེང་དུ་བྷྱོ། །ཞེས་ཟློག་སྔགས་རྣམས་བརྗོད། དེ་ནས་གཏོར་གཞོང་སྒྲུབ་ལ་རྟ་བྲོ་ནི། ཧྲཱིཿ ཁྲོ་བོའི་རྒྱལ་པོ་རྟ་མཆོག་དཔལ། །དབང་ཆེན་རྔམ་པའི་སྒྲ་སྒྲོག་ཅིང་། །དཔལ་གྱི་རྟ་སྐད་ཙེ་རེ་རེ། །ཁྲོ་བོའི་འབྲུག་སྒྲ་དི་རི་རི། །རོལ་པའི་རྟ་བྲོ་ཆེམས་སེ་ཆེམ། །བདུད་དང་དམ་སྲི་རྡུལ་དུ་རློགས། ཨོཾ་ཧྲཱིཔདྨན་ཀྲི་ཏ་བཛྲ་ཀྲོ་དྷ་ཧྱ་གྷི་ཝ་ཧུ་ལུ་ཧུ་ཧཱུྃ་ཕཊ༔ རྟ་མགྲིན་གྱི་སྔགས་བརྗོད། ཨོཾ་ལཾ་ཧཱུྃ་ལཾ་སྟམྦྷ་ཡ་ནན༔ ཞེས་དབོན་ཆུང་པདྨ་འགྲོ་དོན་གྱིས་བསྐུལ་ནས་ཤིང་སྦྲུལ་སྨིན་དྲུག་ཟླ་བའི་ཉེར་གསུམ་ཉིན་༧ ཨ་རཱ་གས་སྦྱར་བ་སྟེ། འཐུས་ཆེ་ཕྱིར་རང་གི་ཡང་ཐུགས་དམ་བྱ་བར་སེམས་སོ། །བྷ་ཝནྟུ། བཀྲ་ཤིས། དགེའོ།། །། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།