གཡག་ལུག་བྱ་ར་བསྟབ་པ།
གཡག་ལུག་བྱ་ར་བསྟབ་པ་བཞུགས་པའི་དབུ་ཕྱོགས་ལགས་སོ། །
ན་མོ་མ་ཧཱ་ཀཱ་ལ་ཡ། ལྷ་དང་འཁོན་ཐུགས་སྦྱང་བའི་ཕྱིར། །བསྐང་བ་གཞུང་བཞིན་བཅའ་བྱ་སྟེ། །བྱ་མོ་ནག་མོའི་གཟུགས་བརྙན་དང་། །གཡག་ནག་ལུག་ནག་ར་སྐྱེས་རྣམས། །ཁྲུས་བྱས་དར་སྣ་རྔ་ཚོན་བརྒྱན། །བདུད་རྩིའི་བྲན་ལ་བསྐང་བ་གྱེར། །སྤུ་གྲི་ཀླད་གཟེར་རྒྱུད་དག་ལས། །ཐུགས་དང་འགལ་འཁྲུལ་མཆིས་ན་ཡང་། །བསྐང་དང་བཤགས་པ་འདི་ལྟར་ཏེ། །ཕྱི་རུ་གཡག་དང་ལུག་གིས་བསྐང་། །ཞེས་དང་། གཡག་ལུག་ནག་པོ་མར་གྱིས་བྱུགས། །དར་ནག་རུ་མཚོན་རུ་ལ་བརྒྱན། །ཞེས་དང་། ལྷ་མོའི་རྒྱུད་ལས། དང་པོ་ཤེལ་ནག་གསུམ་གྱིས་བསྐང་། །དེ་ནས་བྱ་མོ་གསུམ་གྱིས་བསྐང་། །ཞེས་སོགས་དང་། སྐྱེས་བུའི་ར་བསྐང་སོགས་རྒྱ་ཆེར་གསུངས་པའི་དོན་ཡིན་ནོ། །གཞན་ཡང་རྙིང་
མའི་མདངས་བསྐང་རྣམས་ནས། བསྐང་བ་གྱེར་ཞིང་བྱ་ལུག་རྣམས་བསྟབ་པ་བྱའོ། །ཞེས་གསུངས་སོ། །དང་པོ་རྣམ་འཇོམས་བཟླས་པའི་ཆབ་གཏོར་བས་བཀྲུས་ནས། །བདུད་རྩིས་བྲན་ལ། ཧཱུྃ། འོག་མིན་བརྟན་གཡོ་སྲིད་པའི་ཞིང་ཁམས་དང་། །རྩུབ་འགྱུར་ཚལ་དང་དུར་ཁྲོད་བརྒྱད་རྣམས་ནས། །ཡེ་ཤེས་ལས་དང་འཇིག་རྟེན་མགོན་པོའི་ཚོགས། །ཐུགས་དམ་བསྐང་ཕྱིར་གནས་འདིར་གཤེགས་སུ་གསོལ། །འོག་མིན་ཆོས་དབྱིངས་བྱང་ཤར་མུ་ལེ་མཚོ། །ཡོངས་འདུའི་ཤིང་དང་རྒྱ་མཚོའི་འགྲམ་རྣམས་ནས། །ཡེ་ཤེས་ལས་དང་འཇིག་རྟེན་མ་མོ་རྣམས། །ཐུགས་དམ་བསྐང་ཕྱིར་གནས་
འདིར་གཤེགས་སུ་གསོལ། །འོག་མིན་ཞིང་དང་མ་ལ་ཡ་ཡི་རྩེ། །ཕ་ཝང་ལོང་བུ་རྒྱ་བོད་མདོ་གཙང་ནས། །རྡོ་རྗེ་ལེགས་པ་མཆེད་འཁོར་སུམ་བརྒྱའི་ཚོགས། །ཐུགས་དམ་བསྐང་ཕྱིར་གནས་འདིར་གཤེགས་སུ་གསོལ། །གཙོ་འཁོར་རང་རང་འཚམས་པའི་གདན་ལ་བཞུགས། །བདག་ཅག་ཡོན་མཆོད་བསྲུང་བྱ་ཐམས་ཅད་ཀྱིས། །ཉེས་ལྟུང་འགལ་འཁྲུལ་བཤགས་ཕྱིར་ཕྱག་འཚལ་བསྟོད། །ལྷ་དང་འཁོན་འགྲས་སྦྱང་ཕྱིར་མཆོད་པ་འབུལ། །ཧཱུྃ། ཐུགས་དམ་གཉན་པོ་བསྐང་བའི་དམ་རྫས་ནི། །སྲིད་པའི་སེམས་ཅན་རྒྱལ་པོ་ཡ་མཚན་ཅན། །སྤྲིན་ནག་འཁྲུགས་འདྲ་སྤུ་ཡི་གོས་གྱོན་ཅིང་། །སྨིན་མའི་ཚལ་ཆེན་རྒྱས་འདྲའི་སྤུ་རྩིད་བརྗིད། །ཉི་ཟླ་འབར་བའི་སྤྱན་དང་གློག་དམར་ལྕེ། །ཁ་རླངས་གཡུ་དུད་རང་སྒྲ་འབྲུག་ལྟར་ལྡིར། །གནམ་ལྕགས་འབར་འདྲའི་རྭ་དང་རྨིག་བཞི་ལྕགས། །སེར་སྤྲིན་རྒྱས་འདྲའི་ཟིན་སྤུ་རྔ་མ་གཏིབས། །གཅིག་ལས་བརྒྱ་སྟོང་དུ་མའི་སྤྲུལ་པ་ཅན། །ཕུང་པོ་ཁམས་དང་སྐྱེ་མཆེད་ཡོངས་རྫོགས་པ། །འབྱུང་བ་ལྔ་ཡི་བཅུད་ལས་གྲུབ་པ་འདི། །དཔལ་ལྡན་མགོན་པོ་འཁོར་དང་བཅས་ལ་འབུལ། །བདག་ཅག་
ཡོན་མཆོད་བསྲུང་བྱ་ཐམས་ཅད་ཀྱིས། །ཆག་ཉམས་འཁོན་འགྲས་གནོད་པ་ཞི་བར་མཛོད། །འདི་ཡི་སྙིང་དང་ཡིད་ཀྱི་དབང་པོ་ཡིས། །ཡེ་ཤེས་མགོན་པོ་འཁོར་བཅས་ཐུགས་དམ་བསྐང་། །འདི་ཡི་ལྕེ་དང་ངག་གི་དབང་པོ་ཡིས། །ལས་མགོན་བྱ་རོག་གདོང་ལྔའི་ཐུགས་དམ་བསྐང་། །འདི་ཡི་མགོ་དང་ལུས་ཀྱི་དབང་པོ་ཡིས། །འཇིག་རྟེན་མགོན་པོ་འཁོར་བཅས་ཐུགས་དམ་བསྐང་། །འདི་ཡི་དབུགས་དང་མིག་གི་དབང་པོ་ཡིས། །སྦྱོར་དང་སྒྲོལ་བའི་ཡུམ་གྱི་ཐུགས་དམ་བསྐང་། །འདི་ཡི་ཡན་ལག་བཞི་དང་དོན་སྣོད་ལྔས། །ཕྱོགས་བཅུའི་མགོན་པོ་འཁོར་བཅས་ཐུགས་དམ་བསྐང་། །འདི་ཡི་ལྷ་དུམ་ལྷུ་ཚོགས་རུས་པ་ཡིས། །དྲེགས་པ་དོན་གཉིས་འཁོར་བཅས་ཐུགས་དམ་བསྐང་། །འདི་ཡི་ཤ་ཁྲག་རུས་པ་རྣམ་གསུམ་གྱིས། །དྲེགས་པ་སྡེ་གསུམ་འཁོར་བཅས་ཐུགས་དམ་བསྐང་། །འདི་ཡི་པགས་པ་རྨིག་བཞི་སྤུ་ཞོལ་གྱིས། །འཁོར་ཚོགས་དམ་ཅན་རྒྱ་མཚོའི་ཐུགས་དམ་བསྐང་། །ཆག་ཉམས་འཁོན་འགྲས་ཐམས་ཅད་བྱང་གྱུར་ཅིག །བདག་ཅག་སེམས་ཅན་ལགས་པས་འཁྲུལ་པ་བྱུང་། །སྒྱུ་མ་ལགས་པས་གནོང་ཞིང་
བཤགས་པར་བགྱི། །ཐུགས་རྗེ་ཆེན་པོས་ཚངས་པར་བསྩལ་དུ་གསོལ། །དེང་ནས་བཟུང་སྟེ་ཚེ་རབས་ཐམས་ཅད་དུ། །མགོན་པོ་འཁོར་བཅས་ཁྱེད་ལ་སྐྱབས་གསོལ་གྱིས། །རྟག་ཏུ་སྲུང་སྐྱོབ་སྡོང་གྲོགས་མཛད་དུ་གསོལ། །ཨོ་ས་མ་ཡ། ཨཱས་མ་ཡ། ཧཱུྃ་ས་མ་ཡ། ཨོཾ་མ་ཧཱ་ཀཱ་ལ་ས་པཱ་རི་ཝཱ་ར། ཨོཾ་བཛྲ་སཏཱ་ས་མ་ཡ་སོགས། གཡག་དེ་གནོད་ཕྱོགས་སམ༔ བྱང་ཕྱོགས་སུ་བརྒྱབ་བོ། ༈ །དེ་ནས་བྱ་གཟུགས་བཀྱག་ལ། བྷྱོ༔ མ་གཅིག་ལྷ་མོ་སྲིད་པའི་རྒྱལ། །རང་བྱུང་གི་ནི་རྒྱལ་མོ་ལ། །ཐུགས་དམ་བསྐང་བའི་དམ་རྫས་ནི། །ལས་ཀྱི་འབྲེལ་བའི་བྱ་མོ་འབུལ། །ཆོས་ཉིད་སྟོང་པའི་དབྱིངས་རུམ་ནས། །སྲིད་པའི་སྒོ་ང་གཅིག་ཏུ་སྲིད། །སྒོ་ང་རྡོལ་བའི་ནང་ཤེད་ནས། །མ་གཅིག་ལྷ་མོ་ནག་མོ་གསེར་ས། །སྤྱན་གྱི་ཚུལ་དུ་ལྷན་ཅིག་འཁྲུངས། །དེ་ནས་སྐྱེ་བ་བཅུ་གཉིས་ལ། །ལྷ་མོ་བྱ་མོ་འབྲལ་བ་མེད། །མ་འོངས་དུས་མཐའི་བསྐལ་པ་ལ། །མ་གཅིག་དཔལ་ལྡན་ལྷ་མོ་དང་། །བྱ་མོ་ལྷན་ཅིག་རྫོགས་སངས་རྒྱས། །ད་རེས་སྐྱེ་བ་འདི་ཉིད་ལ། །ལྷ་མོའི་བསྐང་བའི་རྫས་སུ་བྱུང་། །བྱ་མོས་རུ་ལུ་རུ་ལུ་ཞེས། །མ་གཅིག་ལྷ་མོའི་རྟག་
ཏུ་འདོད། །ལྷ་མོ་མི་བརྗིད་ཐུགས་དམ་བསྐང་། །སྲིད་པའི་མ་མོ་ཐམས་ཅད་ཀྱིས། །ཐུགས་ལ་གཅེས་ཞེས་ཁམས་ལ་ཕན། །སྤྱན་ལ་མཛེས་ཤིང་ཡིད་དུ་འོངས། །མ་ཡི་སྔོན་གྱི་བུ་གཅིག་འདྲ། །རྒྱུ་ནི་འབྱུང་བ་ལྔ་ལས་གྲུབ། །སྔགས་དང་ཕྱག་རྒྱས་བྱིན་གྱིས་བརླབས། །མཁའ་ལྡིང་བྱ་མོ་གསེར་མིག་འདི། །དར་ཚོན་དར་ནག་ལེའུ་བརྒྱན། །གསེར་གཡུ་མུ་མེན་བརྒྱན་དུ་བཏགས། །སྐག་དང་རམ་གྱིས་ཁ་དོག་བསྒྱུར། །སྐུ་མདོག་མུན་པའི་མདོག་འདྲ་ལ། །རིན་ཆེན་དུང་གི་ཕྲེང་བས་བརྒྱན། །རིན་ཆེན་བྱི་རུའི་གདོང་རལ་ནས། །པདྨ་རཱ་གའི་ཟེ་བ་འབར། །ཨོག་ཞོལ་པད་འདབ་འཁྱིལ་འདྲ་ལ། །གསེར་གྱི་ལྷ་མོ་ཨུཏྤལ་རིས། །རྣ་བ་གུ་ལང་རིན་ཆེན་ལ། །རིན་ཆེན་གསེར་གྱི་འཁོར་ལོས་སྤྲས། །སྣ་ནི་རིན་ཆེན་གདུ་གུ་ལ། །མུ་ཏིག་མཛེས་པའི་ལེན་ཚར་འཁྲིགས། །སྤྱན་མིག་དམར་པོ་མཚལ་གྱི་མདོག །ཉི་མ་ཟླ་བའི་འོད་ཟེར་འཕྲོ་།མགུལ་པ་མུ་ཏིག་ཆུན་འཕྱང་རིས། །རྫི་མ་འོད་ཟེར་སྤྲུལ་པ་འགྱེད། །གནམ་ལྕགས་རྡོ་རྗེའི་ཡ་མཆུ་ལ། །མ་མཆུ་པདྨའི་སྦྲ་གུ་ཅན། །དུང་སོ་རིན་ཆེན་ཕྲེང་བ་
འཛིན། །གཙུག་ཕུད་ཡེ་ཤེས་འོད་ཟེར་འཕྲོ། །ཨོག་ཞོལ་རིན་ཆེན་འབྲུ་ཡི་གཏེར། །ཡ་མཆུ་ལྕགས་ཀྱུས་བསྟན་དགྲ་འགུགས། །མ་མཆུ་སོག་ལེས་དགྲ་སྲོག་གཅོད། །ལྕགས་དམར་དགྲ་བགེགས་ཤ་ལ་རོལ། །གཤོག་པ་གཡས་པས་ལྷ་ཁམས་འདུལ། །གཤོག་པ་གཡོན་པས་ཀླུ་ཁམས་འདུལ། །མཇུག་སྒྲོ་འཇའ་ལམ་འདོད་ཡོན་འཆར། །བྱི་རུས་རྐང་པ་ལྕགས་ཀྱུའི་སྡེར། །འགྲོ་དྲུག་དག་པའི་ཞིང་དུ་འདྲེན། །སྐུ་སྟོད་རི་རབ་བུམ་པ་ན། །རིན་ཆེན་གུར་ཁང་འཇའ་གུར་ཕུབ། །ཡེ་ཤེས་ལྷ་མོ་བཞུགས་པའི་གནས། །སྐུ་སྨད་གཡུ་ཡི་ལྡིང་ཀ་ན། །སྤུ་རྣམས་དར་གྱིས་འཕུར་མ་གཏིབས། །འཁོར་གྱི་ལྷ་མོ་འདུ་བའི་གནས། །ཐོར་ཚུགས་ལྗོན་ཤིང་བདུད་རྩི་འབབས། །ལྡེམ་ཆེན་རལ་གྲིས་ཕོ་གདོན་འདུལ། །ལྡེམ་ཆུང་སྤུ་གྲིས་མོ་གདོན་འདུལ། །སྤུ་ཕྲན་ཐལ་ཆུང་ཐེའུ་རང་འདུལ། །སྐད་སྙན་རུ་ལུའི་མ་ཚོགས་འབོད། །མཁའ་ལ་འཕུར་ཞིང་སྤྲུལ་པ་འགྱེད། །ངོ་མཚར་བསྐང་བྱ་ནག་མོ་འདི། །མ་གཅིག་རིང་བྱུང་རྒྱལ་མོ་ནི། །མ་མོ་འབུམ་དང་བཅས་ལ་འབུལ། །ཁྱེད་ཀྱི་ཐུགས་དམ་བསྐངས་གྱུར་ནས། །ཆག་ཉམས་འཁོན་རྩུབ་སྦྱང་
དུ་གསོལ། །བདག་ཅག་འཁོར་བའི་སེམས་ཅན་རྣམས། །མ་རིག་འཁྲུལ་པས་སྒྲིབ་གྱུར་པས། །མ་གཅིག་ཐུགས་དང་ཅི་འགལ་བ། །མཐོལ་ལོ་བཤགས་སོ་བཟོད་པར་གསོལ། །འདི་ནས་བྱང་ཆུབ་སྙིང་པོའི་བར། །མ་གཅིག་ལྷ་མོ་ནག་མོ་ལ། །སྐྱབས་སུ་མཆི་བས་བསྐྱབ་ཏུ་གསོལ། །མ་གཅིག་ཐུགས་ཉིད་བྱམས་པའི་ངང་། །བདག་དང་བསྲུང་བྱ་ཐམས་ཅད་ལ། །བུ་ལྟར་བརྩེ་བས་སྲུང་སྐྱོབ་མཛོད། །ཨོཾ་ས་མ་ཡ། ས་མ་ཡ། ཧཱུྃ་ས་མ་ཡ། ཨོཾ་མ་ཧཱ་ཀཱ་ལི་ས་པཱ་རི་ཝཱ་ར། ཨོཾ་བཛྲ་ས་ཟ། ཏཱ་ས་མ་ཡ་སོགས་ཡིག་བརྒྱ་བརྗོད། བྱ་གནོད་པའི་ཕྱོགས་སམ་བྱང་ཤར་ངོས་སུ་ཕུལ། ཡང་ན་ནམ་མཁའ་ངོས་སུ་འཕེན་ནོ།། ༈ དེ་ནས་ལུག་ནག་བཟུང་སྲུང་བསྐུལ་ལ་བྲན་ནས། བྷྱོ༔ ཡེ་མེད་སྟོང་པའི་དབྱིངས་རུམ་ནས། །ཕ་མ་མེད་པའི་བུ་མོ་གཉིས། །སྲིད་པ་ཆགས་པའི་སྔོན་ནས་བྱུང་། །སངས་རྒྱས་ཀུན་བས་ཤིན་ཏུ་སྔ། །མིང་ནི་རང་བྱུང་རྒྱལ་མོ་སྟེ། །དཔལ་ལྡན་ལྷ་མོ་དཔོན་གཡོག་ལ། །བསྐང་བའི་དམ་རྫས་འབུལ་བ་ནི། །ཕ་ནི་གནམ་ལུག་ཕལ་ཆེན་ཡིན། །མ་ནི་ས་ལུག་གྲོ་མོ་ཡིན། །དེ་གཉིས་རྫུ་འཕྲུལ་བསྡེབས་པའི་བུ། །སྲིད་
པའི་བསྐང་རྫས་ཤེལ་ནག་བྱུང་། །སྐུ་ལུས་མུན་པ་གཏིབས་པ་འདྲ། །སྤྱན་མིག་སྐར་ཆེན་ཤར་བ་འདྲ། །རུ་ཅོ་ཐབས་དང་ཤེས་རབ་ཚུལ། །སྤུ་རྩིད་ཆར་སྤྲིན་འཁྲིགས་པ་འདྲ་། །རྨིག་བཞིས་བདུད་བཞི་ཟིལ་གྱིས་གནོན། །ལུས་ནས་དར་ལོང་པུ་རུ་རུ། །ཁ་རླངས་གཡུ་དུད་ཕྱུ་རུ་རུ། །འབའ་སྐད་ལམ་ལམ་ལྷ་མོ་གཉིས། །སྲིད་པའི་ཤེལ་ནག་གསེར་མིག་འདིས། །རང་བྱུང་རྒྱལ་མོའི་ཐུགས་དམ་བསྐང་། །འདི་ཡི་ཤ་ཡི་ཚོགས་རྣམས་ཀྱིས། །རེ་མ་ཛ་ཡི་ཐུགས་དམ་བསྐང་། །འདི་ཡི་ཁྲག་གི་ཚོགས་རྣམས་ཀྱིས། །རེ་མ་ཇུ་ཡི་ཐུགས་དམ་བསྐང་། །འདི་ཡི་རུས་པའི་ཚོགས་རྣམས་ཀྱིས། །རེ་མ་ཏི་ཡི་ཐུགས་དམ་བསྐང་། །འདི་ཡི་རྒྱུ་མ་ནང་རོལ་གྱིས། །མ་མོ་བདུན་གྱི་ཐུགས་དམ་བསྐང་། །འདི་ཡི་རྐང་ལག་བཞི་པོ་ཡིས། །དུས་བཞི་ལྷ་མོའི་ཐུགས་དམ་བསྐང་། །འདི་ཡི་ཡན་ལག་བཞི་པོ་ཡིས། །དམག་གི་རྒྱལ་མོའི་ཐུགས་དམ་བསྐང་། །འདི་ཡི་སྒལ་ཚིགས་ཉེར་བརྒྱད་ཀྱིས། །དབང་ཕྱུག་ཉེར་བརྒྱད་ཐུགས་དམ་བསྐང་། །འདི་ཡི་ལྷུ་གཟུགས་བཅུ་གཉིས་ཀྱིས། །བརྟེན་མ་བཅུ་གཉིས་ཐུགས་དམ་བསྐང་། །འདི་ཡི་པགས་པ་སྤྱི་བལ་
གྱིས། །མ་མོ་འབུམ་གྱི་ཐུགས་དམ་བསྐང་། །ཁྱོད་ཀྱི་ཐུགས་དམ་བསྐངས་གྱུར་ནས། །བདག་དང་བསྲུང་བྱ་ཐམས་ཅད་ཀྱིས། །ཚིག་ཉམས་འཁོན་གཅུགས་བྱང་བར་མཛོད། །ཐུགས་དང་འགལ་བ་བཟོད་པར་གསོལ། །མ་རིག་འཁྲུལ་པའི་དབང་གྱུར་པས། །ཉེས་པ་གང་བྱུང་བཟོད་པར་གསོལ། །བདག་དང་བསྲུང་བྱ་འཁོར་བཅས་རྣམས། །མ་གཅིག་ཁྱོད་ལ་སྐྱབས་གསོལ་གྱིས། །མ་ལྟར་བྱམས་པས་སྲུང་སྐྱོབ་མཛོད། །ཨོ་ས་མ་ཡ། ཨཱས་མ་ཡ། ཧཱུྃ་ས་མ་ཡ། ཨོཾ་མ་ཧཱ་ཀཱ་ལི་ས་པཱ་རི་ཝཱ་ར། ཨོཾ་བཛྲ་ས་ཏྭ་ས་མ་ཡ། སོགས་ཡིག་བརྒྱ་བརྗོད། ལུག་དེ་གནོད་པའི་ཕྱོགས་སམ་བྱང་ཤར་རྒྱབ། ༈ དེ་ནས་རི་ལ་བསྲུང་བསྐུལ་བྲན་ནས་བཟུང་ལ། ཧཱུྃ། ཁྲོ་རྒྱལ་པདྨ་དབང་ཆེན་གྱི། །ཐུགས་ལས་སྤྲུལ་པ་དྲེགས་པའི་གཙོ། །སྐྱེས་མཆོག་རྡོ་རྗེ་ལེགས་པ་ལ། །བསྐང་བའི་དམ་རྫས་འབུལ་བ་ནི། །རྫུ་འཕྲུལ་ར་སྐྱེས་ཁམ་པ་འདི། །མིག་གིས་ཉིན་གྱི་བྱ་ར་བྱེད། །རུ་ཅོས་མཚན་གྱི་མེལ་ཚེ་བྱེད། །རྨིག་བཞི་ས་ལ་འཁྲབ་པ་ལ། །སྤུ་རྩིད་ས་ལ་ཤམས་སེ་ཤམ། །ལྕེ་ལ་གློག་འོད་ཀྱུགས་སེ་ཁྱུག །རྭ་ཅོ་གནམ་ལྕགས་ལྡེམས་
སེ་ལྡེམ། །ཨོག་ཞོལ་ཤམ་ཤམ་འབའ་སྐད་སྒྲོག །དར་ཚོན་སྣ་ལྔ་རྔ་མས་བརྒྱན། །སྐྱེས་བུ་འཁོར་བཅས་སྤྱན་ལམ་དུ། །མཛེས་སྡུག་ཡིད་འོད་ཐུགས་ལ་གཅེས། །ཁམས་ལ་ཕན་ཅིང་ཡིད་གར་འོང་། །ལས་ཀྱི་འབྲེལ་བའི་མཐུན་རྫ་ས་འདི། །སྐྱེས་བུ་ཆེན་པོའི་ཐུགས་དམ་བསྐང། །མགར་བ་ནག་པོའི་ཐུགས་དམ་བསྐང་། །དམག་དཔོན་ཆེན་པོའི་ཐུགས་དམ་བསྐང་། །ཚོང་དཔོན་ཆེན་པོའི་ཐུགས་དམ་བསྐང་། །ར་ཡི་དབང་པོ་རྣམ་ལྔ་ཡིས། །སྐུ་གསུང་ཐུགས་ཡོན་ཕྲིན་ལས་ཀྱི། །སྐྱེས་བུ་རིགས་ལྔའི་ཐུགས་དམ་བསྐང་། །ར་ཡི་རྒྱུ་མ་ནང་རོལ་གྱིས། །ཐིག་ལེ་རྩལ་དང་ཁྱུང་དྲག་རྩལ། །འཛིན་གིང་བཞི་བཅུའི་ཐུགས་དམ་བསྐང་། །ཤ་ཁྲག་རུས་པ་པགས་པ་ཡིས། །ལྷ་བཙན་བདུད་ཀྱི་དགེ་བསྙེན་ཏེ། །སུམ་བརྒྱ་དྲུག་ཅུའི་ཐུགས་དམ་བསྐང་། །གཞན་ཡང་དུང་གི་ར་སྐྱེས་དང་། །གཡུ་དང་ལྕགས་ཀྱི་ར་སྐྱེས་སོགས། །སྤུ་སྡུག་ར་སྐྱེས་ཐམས་ཅད་ཀྱིས། །སྐྱེས་བུ་འཁོར་བཅས་ཐུགས་དམ་བསྐང་། །ཕོག་ཐུག་འགྲམ་འཁྲུག་འཁོན་འགྲས་རྣམས། །ཐམས་ཅད་བྱང་ཞིང་དག་གྱུར་ཅིག །ཧཱུྃ། དམ་ཅན་ཁྱོད་ཀྱི་ཐུགས་དང་ཅི་འགལ་
བ། །མ་རིག་དབང་གིས་ཉེས་པ་བྱུང་བ་རྣམས། །རབ་ཏུ་འགྱོད་པའི་སེམས་ཀྱིས་མཐོལ་ལོ་བཤགས། །སྐྱེས་བུ་ཁྱོད་ལ་ཕྲག་དོག་མ་མཆིས་ཀྱང་། །ཁྱོད་ཀྱི་འཁོར་དུ་གཏོགས་པའི་འཇིག་རྟེན་པ། །གདུག་པའི་ཚོགས་ནི་དེ་དག་ཐམས་ཅད་ལ། །ཐུགས་དང་འགལ་བར་གྱུར་པ་ཅི་མཆིས་པ། །རབ་ཏུ་འགྱོད་པའི་སེམས་ཀྱིས་མཐོལ་ལོ་བཤགས། །བདག་གིས་རབ་ཏུ་བཤགས་པའི་བསོད་ནམས་ཀྱིས། །བདག་ཅག་དཔོན་སློབ་ཡོན་མཆོད་འཁོར་བཅས་ཀྱིས། །མི་མཐུན་ཕྱོགས་རྣམས་མ་ལུས་ཞི་བ་དང་། །བསམ་པ་འགྲུབ་པའི་དངོས་གྲུབ་བསྩལ་དུ་གསོལ། །ཨོ་ས་མ་ཡ། ཨཱཿས་མ་ཡ། ཧཱུྃ་ས་མ་ཡ། ཨོཾ་བཛྲ་སཱ་དྷུ་ས་མ་ཡ་ཝཀ་ཏྭཾ་ཀྲྀ་ཤི་ནི་ཀྲ་མ་ནི་ས་མ་ཡ་སཱ་དྷ་ཏྲི་ཛ༔ ཛཧཱུྃ་བཾ་ཧོ༔ ཨོཾ་བཛྲ་སཏཱ་ས་མ་ཡ་སོགས་ནས། ར་ནུབ་ཕྱོགས་སམ་གནོད་པའི་ཕྱོགས་སུ་རེ་ཞིག་བརྒྱབས་ནས། སེམས་ཅན་དེ་དག་ཚེ་ཐར་བྱ། ལུད་མི་བཀལ། སྤུ་མི་བྲེག་ན་བཟང་། ཞེས་དགོས་པ་ཞིག་བྱུང་བས། ཨ་རཱ་གས་བྲིས་པའོ། །མངྒ་ལཾ།། །། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།