རྡོ་རྗེ་ཕུར་པའི་བཀའ་སྲུང་སློབ་དཔོན་པདྨའི་བཀའ་གཉན་ཞང་བློན་ཡེ་བརྫུ་ཞེས་བྱ་བའི་སྒྲུབ་ཐབས་ཡིག་རྙིང་གི་གབ་འཁྲུགས་གསལ་ཏེ་ཁྱེར་བདེར་བཀོད་པ།
རྡོ་རྗེ་ཕུར་པའི་བཀའ་སྲུང་སློབ་དཔོན་པདྨའི་བཀའ་གཉན་ཞང་བློན་ཡེ་བརྫུ་ཞེས་བྱ་བའི་སྒྲུབ་ཐབས་ཡིག་རྙིང་གི་གབ་འཁྲུགས་གསལ་ཏེ་ཁྱེར་བདེར་བཀོད་པ་བཞུགས་སོ།།
ན་མོ་པྲ་ཝ་ཀཱ་ར་ཡེ། རིགས་གསུམ་གྱི་མགོན་པོ་ལ་ཕྱག་འཚལ་ལོ། །སྔོན་བལ་ཡུལ་ཨ་སུ་ར་ཡི་བྲག་ཕུག་ཏུ་སློབ་དཔོན་པདྨས་རྡོ་རྗེ་ཕུར་པ་སྒྲུབ་པའི་ཚེ། ཞང་བློན་བརྫུ་སྐྱེ་རོག་སྣལ་ལ། །རྡོ་རྗེ་ཕུར་པའི་དབང་བསྐུར་ནས། །རྡོ་རྗེ་གུར་མགོན་གསང་མཚན་བཏགས། །བཀའ་སྲུང་བྱེད་པར་ཞལ་གྱིས་བཞེས། །དེ་ལྟར་ཞལ་གྱིས་བཞེས་ནས་སུ། །བལ་པོའི་ཡུལ་དུ་གནས་པའི་ཚེ། །བལ་པོའི་རྒྱལ་པོས་སེམས་ངན་གྱིས། །ཁ་ཆེའི་བླ་མཆོད་མུ་སྟེགས་བསྟེན། །དེ་ནས་བོད་ཡུལ་སྨར་ཁམས་རོང་། །ཟླ་བའི་ལུང་གི་བདག་པོ་མཛད། །འདི་ནི་ས་བདག་ཀླུ་གཉན་གྱི་གཉེན་པོ། ལྷ་འདྲེ་ཐམས་ཅད་ཀྱི་གཉའ་ནོན། །ཞེས་གསུངས་པའི་ཕྱིར། གསུང་རྒྱུན་ལ་འདུག་པ་དང་མཚུངས་པར། ས་འོག་ཏུ་གནས་
ཚེ་ཀླུ་མི་མགོན་དཀར་པོ། རི་ལ་གནས་ཚེ་གནས་པོ་རྡོ་རྗེ་གུར་མགོན། ནམ་མཁའི་བར་སྣང་ལ་གནས་ཚེ་ཡེ་བརྫུ་ཡིན་ཟེར་བ་རྨི་ལམ་དུ་བྱུང་བ་ཡང་དོན་ལ་གནས་སམ་སྙམ་སྟེ། ཀླུ་མི་མགོན་དཀར་པོ་འདི་ནཱ་ག་རཀ་དཀར་པོ་དེ་ཡིན་པར་སྔོན་གྱི་སྒྲུབ་ཐབས་སྒ་ལོའི་ལུགས་ལ་གསལ་ཞིང་ནཱ་ག་རཀྵ་འདི་ནི་ཀླུ་གཉན་འདུལ་བའི་གཉེན་པོ་ཡིན་པའི་ཕྱིར་རོ། །ལྷ་ཆེན་པོ་ཞང་བློན་འདི་སྒྲུབ་ཅིང་བརྟེན་པའི་རྣལ་འབྱོར་པ་མཐུ་དང་རྫུ་འཕྲུལ་ཚེ་དང་བསོད་ནམས་མྱུར་དུ་འཕེལ་བར་འགྱུར་རོ། །ཞེས་གསུངས་སོ། །དེ་སྒྲུབ་པའི་མཎྜལ་ས་ཕྱོགས་གཙང་མ་དམེ་མུག་དང་རོ་བྱུང་གི་ས་མ་ཡིན་པར། ས་བདག་ལ་ཅོག་ལྡོག་ཡུལ་ལ་ས་བླངས་པ་དང་ལྟོ་འཕྱེ་བརྩི། དེ་མི་ཤེས་ན་རྡོ་ལེབ་སྟེང་དུ་ས་བཀོད་ལ་ལེགས་པར་བཅག་སྟེ། དེའི་དབུས་སུ་པདྨ་འདབ་མ་བརྒྱད་
ཤར་དཀར། ལྷོ་སེར། ནུབ་དམར། བྱང་ལྗང་སྟེ་ཕྱོགས་ཚོན། མཚམས་བཞི་མཛེས་ཚོན། དེའི་མུ་ཁྱུད་ལ་ཁ་དོག་ལྔ་འཇའ་རིས་རེ་ཁ་བྱ། མཎྜལ་ཕྱི་ཐམས་ཅད་སྔོན་པོ་གཡུ་མདོག་བྱ། བསྡུ་ན་གྲ་ཕྱི་ནང་གཙང་མ་གྲུ་བཞིའི་སྟེང་ལ་དབུས་སུ་འབྲུའི་པདྨ་འདབ་བརྒྱད། ཕྱི་ར་བས་བསྐོར་རོ། །མདའ་རྒོད་སྒྲོ་མའི་སྨྱུག་རྒོད་ལ་དར་སྣ་ལྔ་ཚང་བར་བཏགས། སྟག་རས་གཟིག་རས་དང་། རྔ་མ་སྔོ་དམར་དང་། གསེར་དངུལ་གྱི་སོར་གདུབ་དང་། དུང་དང་མགྲོན་བུ་ལ་སོགས་པ་རིན་པོ་ཆེ་ཐམས་ཅད་བཏགས། དེ་མཎྜལ་གྱི་དབུས་སུ་འཇིམ་པ་གཙང་མ་ལ་རིའི་དབྱིབས་བྱས་པ་ལ་བཙུགས། དབུས་དང་ཕྱོགས་བཞིར་དེ་བཞིན་དུ་ཤུག་ཐིལ་རྟིང་དཀར་བྱས་པ་ལ་འཛུགས། ཕྱོགས་མཚམས་བརྒྱད་དུ་དར་སྣ་ཚོགས་མདའ་ལ་བཏགས་པ་འཛུགས། མ་འཛོམས་ན་དར་ཚོན་ཤུག་པ་བཞི་ལ་བཏགས། པད་འདབ་སྟེང་དུ་མཆོད་ཡོན་ཞབས་བསིལ། མེ་ཏོག་བདུག་སྤོས་མར་མེ་དྲི་ཆབ་ཞལ་ཟས་རོལ་མོ་མཚམས་འཛིན་མེ་ཏོག་སྟེ་ནས་བཤམས། མཎྜལ་ཟུར་བཞིར་གསེར་སྐྱེམས་ཕྱེ་མར་གཏོར་མ་དཔེའུ་རིས་ལྟར་རོ། །གཡག་ལུག་གི་ཙིཏྟ་སོགས་ཟས་ཕུད་སྣ་ཚོགས་བཤམས། མཚམས་བཅད་གནས་བདག་གཞི་བདག་ལ་དཀར་གཏོར་ཕུལ་ལ་བར་ཆད་མ་བྱེད་གྲོགས་གྱིས་ཤིག་ཅེས་བཀའ་བསྒོ། བགེགས་ལ་གཏོར་མ་བྱིན་ལ་བསྐྲད། སུཾ་བྷ་ནིའི་སྔགས་དང་ནས་ཡུངས་ཀར་བྲབ། གུ་གུལ་ནག་པོ་བདུག །རང་ཉིད་ཁྲུས་བྱེད། མི་གཙང་བ་ལ་འཛེམ། དེ་ནས་མཆོད་པ་ལ་རྒྱས་པར་ན་དུག་ཕྱུང་
སྤོས་རུམ། བསྡུ་ན་ཨ་མྲྀ་ཏའི་སྔགས་བརྗོད་ཅིང་ཆུ་གཙང་གིས་བྲན་ནོ། །དེ་ནས་བདག་ཡི་དམ་གང་རུང་གི་གཞུང་བསྲང་བའམ། སློབ་དཔོན་པདྨ་བསྒོམ་པ་ནི་མཆོག་ཏུ་ཤེས་ཏེ། གཉན་པོའི་ལྷ་ཡིན་ཏེ་གུ་རུ་ཞི་བ་རྒྱས་བསྡུས་གང་རུང་གི་ལས་བྱང་རབ། དེ་མེད་ན་མངོན་རྟོགས་རཏྣའི་ལུགས་ཀྱི་སྙན་བརྒྱུད་ཡིད་བཞིན་ནོར་བུ་ནས་འབྱུང་བ་ནི། ན་མོ། བདེར་གཤེགས་རྒྱལ་བ་འདུས་པའི་སྐུ། །དཀོན་མཆོག་གསུམ་གྱི་རང་བཞིན་ལ། །བདག་དང་འགྲོ་དྲུག་སེམས་ཅན་རྣམས། །བྱང་ཆུབ་བར་དུ་སྐྱབས་སུ་འཆི། །སེམས་བསྐྱེད་འགྲོ་བ་ཀུན་དོན་དུ། །བླ་མ་སངས་རྒྱས་བསྒྲུབས་ནས་ནི། །གང་ལ་གང་འདུལ་ཕྲིན་ལས་ཀྱིས། །འགྲོ་དྲུག་སྒྲོལ་བར་དམ་བཅའོ། །ཨོཾ་སྭ་བྷཱ་ཝ་སོགས། སྟོང་པ་ཉིད་དུ་གྱུར། སྟོང་པའི་ངང་ལས་པདྨ་འདབ་མ་སྟོང་ལྡན་གེ་སར་གྱི་སྟེང་དུ་ཉི་མ་དང་ཟླ་བའི་སྟེང་དུ་རང་ཉིད་ཨོ་རྒྱན་པདྨ་པཎྜི་ཏ་ལོ་བཅུ་དྲུག་ལོན་པའི་ཚུལ་ཅན། དཀར་དམར་མདངས་དང་ལྡན་པ་ཆོས་གོས་གསེར་གྱི་པ་ཏྲ་ཅན། ཟ་འོག་གི་བེར་དང་། པད་ཞུ་པདྨ་ཁ་ཕྱེས་པ་ལྟ་བུ་ལ་རྒོད་སྒྲོ་དར་སྣ་ཉི་ཟླ་རྒྱ་གྲམ་གྱིས་མཚན་པ། ཕྱག་གཡས་གསེར་གྱི་རྡོ་རྗེ་ཐུགས་ཀར་འཛིན་པ། གཡོན་ཡེ་ཤེས་ཀྱི་བདུད་རྩིས་བཀང་བའི་བྷནྡྲ་
བསྣམས་པ། ཁ་ཊཾ་གཡོན་གྱི་མཆན་ཁུང་དུ་བཅུག་པ་ཞབས་རྡོ་རྗེའི་སྐྱིལ་ཀྲུང་གིས་བཞུགས་ཤིང་། འོད་ཟེར་སྟོང་གསུམ་ཁེངས་པའི་གནས་གསུམ་ཡི་གེ་གསུམ་དང་ཐུགས་ཀའི་ལས་འོད་ཟེར་འཕྲོས་པས། ལྷོ་ནུབ་རྔ་ཡབ་ནས་ཡེ་ཤེས་པ་སྤྱན་དྲངས། གུ་རུ་བཛྲ་ས་མ་ཡ་ཛ༔ ཛཿཧཱུྃ་བཾ་ཧོ༔ གཉིས་སུ་མེད་པར་གྱུར་པའི་ཐུགས་ཀར་ཟླ་བའི་དབུས་སུ་ཧཱུྃ་ལ་སྔགས་ཕྲེང་གཡས་སུ་འཁོར་བར་གྱུར། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཞེས་བརྒྱའམ་སྟོང་བསྙེན་ལ། གུ་རུ་པདྨ་བཛྲ་ཨརྒྷཾ་སོགས་ནས། ཤབྟ་པྲ་ཏིཙྪ་ཨཱ༔ མ་བཅོས་སྤྲོས་བྲལ་བླ་མ་ཆོས་ཀྱི་སྐུ། །བདེ་ཆེན་ལོངས་སྤྱོད་བླ་མ་ཆོས་ཀྱི་རྗེ། །པད་སྡོང་ལས་བྱོན་བླ་མ་སྤྲུལ་པའི་སྐུ། །སྐུ་གསུམ་རྡོ་རྗེ་འཆང་ལ་ཕྱག་འཚལ་བསྟོད། །དེ་ནས་མཆོད་པ་བྱིན་རླབས་ནི། །ཨོཾ་ཨ་མྲྀ་ཏེ་ཧཱུྃ་ཕཊ༔ ཅེས་བསང་། ཨོཾ་སྭ་བྷ་ཝས་སྦྱང་། སྟོང་པའི་ངང་ལས་ཧཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བར་ཕྱི་ནང་གསང་བའི་མཆོད་པ་ཀུན་ཏུ་བཟང་པོའི་མཆོད་སྤྲིན་ལྟ་བུར་གྱུར། ཨོཾ་བཛྲ་སྤ་ར་ཎ་ཁཾ། མདུན་བསྐྱེད་ནི། རང་ཉིད་དང་སློབ་དཔོན་པདྨར་གསལ་བའི་ཐུགས་ཀ་ནས་འོད་ཟེར་འཕྲོས་པས། མཎྜལ་ལ་ཕོག་པས་གཡུ་མཚོ་སྔོན་པོ་
ཞིག་ཏུ་གྱུར། མཚོ་དེའི་ནང་ནས་སྐད་ཅིག་ལ་སྒོ་ང་དྲུག་བྱུང་སྟེ། སྒོ་ང་དེ་རྣམས་རྡོལ་བའི་ནང་ཤེད་ནས། དཀྱིལ་འཁོར་དབུས་སུ་གཡུ་སྒོང་སྔོན་པོ་རྡོལ་བའི་ནང་ནས། དགེ་བསྙེན་རོག་སྣལ་ཞང་བློན་ནི། སྤྲུལ་པའི་མི་ཕོ་དཀར་པོ་ལ། འོད་ཟེར་འཕྲོས་པས་སྟོང་གསུམ་གང་བ། སྐུ་ལ་གངས་བྱིའི་ཐུལ་པ་མནབས་པ། དབུ་ལ་རིན་པོ་ཆེའི་པྲོག་ཞུ་ལ་སྟག་གི་ལྡེམ་འཕྲུ་བཙུགས་པ། དར་དཀར་གྱི་འཇོལ་བེར་གསོལ་པ། གཡས་ན་གསེར་གྱི་ཐོད་རྒོད་བསྣམས་པ། གཡོན་ན་ཁྲོ་ཐུལ་རྩེ་བརྒྱད་བསྣམས་པ། རིན་པོ་ཆེའི་ཕྱག་རྩེ་ལ་བཞུགས་པ། ས་བདག་ཀླུ་གཉན་འབངས་སུ་བཙས་ནས་བྲན་དུ་ཁོལ་བའོ། །དེའི་མདུན་དུ་དུང་སྒོང་རྡོལ་བའི་ནང་ནས། གུ་རུ་སྔགས་ཀྱི་དགྲ་ལྷ་ནི། དུང་གི་མི་ཕོ་དཀར་པོ་ལ་དུང་གི་ཐོར་ཚུགས་ཡོད་པ། ཕྱག་གཡས་ན་དུང་ལྕག་དང་། གཡོན་ན་མདུང་དར་དཀར་པོ་བསྣམས་པ། དུང་གཡག་དཀར་པོ་ལ་ཆིབས་པ། འཁོར་ནི་ལྷ་དམག་འབུམ་གྱིས་བསྐོར་བའོ། །ཤར་ཕྱོགས་སུ་གསེར་སྒོང་རྡོལ་བའི་ནང་ནས། དགྲ་ལྷ་འོ་ཁྲམ་མཐུ་ཆེན་ཞལ་གཅིག་ཕྱག་གཉིས་དབུ་ལ་ལྕགས་རྨོག་མནབས་པ།
སྐུ་ལ་གསེར་ཁྲབ་སེར་པོ་གསོལ་པ། གཡས་ན་གསེར་གྱི་ལྕག་ཚན་ཕྱར་བ། གཡོན་ན་མདུང་དར་སེར་པོ་བསྣམས་པ། ངང་པ་སེར་པོ་ལ་ཆིབས་པ། འཁོར་གཉན་དམག་གི་དབུས་ན་འགྱིང་བའོ། །དེའི་ལྷོ་ཕྱོགས་ན་ཟངས་སྒོང་རྡོལ་བའི་ནང་ནས། སྐུ་ལྷ་རུ་སྟོང་མཐུ་ཆེན་ཞལ་གཅིག་ཕྱག་གཉིས་སྐུ་མདོག་དམར་པོ་དབུ་ལ་དར་དམར་གྱི་འཇམ་ཐོད་བཅིངས་པ། སྐུ་ལ་ལིང་བེར་དམར་པོ་མནབས་པ། གཡས་ན་རལ་གྲི་དཔལ་ཆེན་འབར་བ་ཀླད་ལ་བསྐོར་བ། གཡོན་མདུང་དར་དམར་པོ་ཕྱིར་བ། རྟ་མཚལ་བུ་རྟིང་དཀར་ལ་ཆིབས་པ། བཙན་དམག་འབུམ་གྱི་དབུས་ན་འགྱིང་བའོ། །དེའི་ནུབ་ཕྱོགས་སུ་སྒོ་ང་རྡོལ་བའི་ནང་ནས། དགེ་བསྙེན་འར་ཆེན་ཤོ་ཙ་ཞལ་གཅིག་ཕྱག་གཉིས་པ། སྐུ་མདོག་སྨུག་ནག་དབུ་ལ་ལེ་བརྒན་གྱི་ལ་ཐོད་བཅིངས་པ། སྐུ་ལ་ཆུ་དར་སྔོན་པོའི་བེར་གསོལ་བ། གཡས་མཆོང་གི་ལྕག་ཚན་ཕྱར་བ། གཡོན་ན་གནམ་ལྕགས་ཀྱི་བེར་ཀ་བསྣམས་པ། མཆོང་གི་ར་སྐྱེས་སྨུག་པོ་ལ་ཆིབས་པ། འགྱིང་དྲུག་ལ་སོགས་ཀླུ་དམག་འབུམ་གྱི་དབུས་ན་འགྱིང་བའོ། །དེའི་བྱང་དུ་ཤེལ་སྒོང་རྡོལ་བའི་ནང་ནས་ཞང་བློན་
བདུད་འདུལ་ཆེན་པོ་ཞལ་གཅིག་ཕྱག་གཉིས། སྐུ་མདོག་སྔོན་པོ་གཡུ་འོད་འབར་བ། ཕྱག་གཡས་ན་གཡུ་ལྕག་སྔོན་པོ་ཕྱར་བ། གཡོན་ན་མཁར་ཐེལ་རྩེ་དགུ་བསྣམས་པ། སྐུ་ལ་དར་ལྗང་གི་བེར་ཆེན་གསོལ་བ། རྟ་ཕོ་གཡུ་རྔོག་ལ་ཆིབས་པ། ལྷ་ཕྲན་ཀླུ་ཕྲན་ཕོ་ཉར་འགྱེད་ཅིང་། གདོང་མོ་སྤུན་དགུ་དང་། ཞང་བློན་འབུས་ན་འགྱིང་བའོ། །ལྷ་ཚོགས་དེ་རྣམས་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་མཐིང་ཀ །ཐུགས་དབུས་སུ་རང་མདོག་ཏྲཿ འཁོར་རྣམས་ཀྱི་ཐུགས་ཀར་མིང་ཡིག་དང་པོ་ཐིག་ལེས་བརྒྱན་པ། བདག་ཉིད་ཡི་དམ་པད་མ་ཐོད་ཕྲེང་རྩལ་གྱི་ཐུགས་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས། རང་བཞིན་གྱི་གནས་དང་བཞུགས་གནས་ཐམས་ཅད་ནས་དགྲ་ལྷ་རོག་སྣལ་སྐུ་འཁོར་དང་བཅས་པ་སྐད་ཅིག་ལ་སྤྱན་དྲངས། བྷུ་མི་པ་ཏི་ས་པཱ་རི་ཝཱ་ར་ཨེ་ཧྱ་ཧི་བཛྲ་ས་མཱ་ཛ་ཛ༔ ཧཱུྃ། དད་པ་དང་ནི་དམ་ཚིག་གིས། །དམག་དཔོན་ཡེ་བརྫུ་སྤྱན་འདྲེན་ནོ། །སྐུ་ལྷ་འོད་དཀར་འཁོར་དང་བཅས། །མཆོད་པའི་གནས་འདིར་གཤེགས་སུ་གསོལ། །རྒྱ་གར་ཡུལ་གྱི་ཚུལ་རོལ་ན། །བལ་
པོའི་ཡུལ་གྱི་ཕ་རོལ་ན། །ཡང་ལེ་ཤོད་ཀྱི་བྲག་ཕུག་ཏུ། །པདྨ་འབྱུང་གནས་སྤྱན་སྔ་རུ། །ཇི་ལྟར་ཁས་བླངས་དམ་བཅས་པའི། །དམ་ལས་མ་འདའ་ད་ཚུར་བྱོན། །ཕུར་པའི་སྲུང་མར་ཞལ་གྱིས་བཞེས། །ཞལ་བཞེས་དམ་ལ་མ་འདའ་བར། །སྙིང་གི་གྲོགས་ལ་ད་ཚུར་བྱོན། །གཡུ་མཚོ་སྔོན་པོའི་དབུས་ན་གནས། །ཇི་ལྟར་ཁས་བླངས་དམ་བཅས་པའི། །དམ་ལ་མ་འདའ་ད་ཚུར་བྱོན། །ཤེལ་བྲག་དཀར་པོའི་ཡང་རྩེ་ནས་། །ཇི་ལྟར་ཁས་བླངས་དམ་བཅས་པའི། །དམ་ལ་མ་འདའ་ད་ཚུར་བྱོན། །འཇའ་ཚོན་སྤེལ་བའི་ཐེམ་སྟེང་ནས། །ཇི་ལྟར་ཁས་བླངས་དམ་བཅས་པའི། །དམ་ལ་མ་འདའ་ད་ཚུར་བྱོན། །སྔོན་གྱི་བསྐལ་པའི་དང་པོ་ལ། །སློབ་དཔོན་པདྨའི་སྤྱན་སྔ་རུ། །རོག་སྣལ་བདུད་འདུལ་མཐུ་ཆེན་གྱིས། །སྔོན་གྱི་དམ་བཅས་བཟང་འབྲེལ་དུ། །བརྫུས་སྐྱེས་པདྨ་དཔང་བཞུགས་ནས། །སྒྲུབ་པ་པོ་ནི་བདག་གིས་འབོད། །འབོད་ནི་ལྷ་སྔགས་གླང་གིས་འབོད། །འབོད་དོ་ལྷང་ངེ་སྙན་མ་སྲ། །དེ་རིང་བདག་གི་གྲོགས་ལ་བྱོན། །སྔོན་གྱི་ཐུགས་དམ་མ་བསྙེལ་བར། །བདག་གིས་ཁྱོད་ལ་འབོད་ཙམ་ན། །མ་ཐོགས་
མྱུར་བར་གཤེགས་སུ་གསོལ། །སྐུ་བླ་འོད་དཀར་མཐུ་བོ་ཆེ། །ཞང་བློན་འཁོར་བཅས་ད་ཚུར་བྱོན། །སྐུ་བླ་ཆེན་པོ་ད་ཚུར་བྱོན། །རོག་སྣལ་ཆེན་པོ་ད་ཚུར་བྱོན། །བཙན་གྱི་ཡང་བཙན་གཤེགས་སུ་གསོལ། །དམག་དཔོན་ཆེན་པོ་གཤེགས་སུ་གསོལ། །དབུ་རུ་རྩེ་གཅིག་ད་ཚུར་བྱོན། །སྐྱེས་བུ་ཆེན་པོ་ད་ཚུར་བྱོན། །ཝེར་སྟོང་ཆེན་པོ་ད་ཚུར་བྱོན། །ལྷ་ཡི་ཡང་ལྷ་ད་ཚུར་བྱོན། །སྐུ་བླ་ཝེར་ནི་ད་ཚུར་བྱོན། །བཙན་གྱི་ཡང་བཙན་ད་ཚུར་བྱོན། །རྡོ་རྗེ་གུར་མགོན་ད་ཚུར་བྱོན། །ཨ་ཇོ་ཞང་བློན་ད་ཚུར་བྱོན། །སྐུ་བླ་རོག་སྣལ་ད་ཚུར་བྱོན། །སྟག་གི་དགྲ་ལྷ་ད་ཚུར་བྱོན། །འོད་ཕྲོམ་མཐུ་ཆེན་ད་ཚུར་བྱོན། །འར་ལྡོང་མཐུ་ཆེན་ད་ཚུར་བྱོན། །རྡོ་རྗེ་སྨུག་པོ་ད་ཚུར་བྱོན་། །འཁོར་ཚོགས་བཅས་ཏེ་ད་ཚུར་བྱོན། །ཨ་ཕྱི་ར་ཡི་ཕུག་ནས་བྱོན། །གཡུ་མཚོ་སྔོན་པོའི་དབུས་ནས་བྱོན། །འཇའ་ཚོན་སྤེལ་བའི་སྟེང་ནས་བྱོན།། །འོར་དུ་བྱམས་ཆེན་དྲུང་ནས་བྱོན། །ཟླ་རྒྱལ་ཡང་ལུང་རྩེ་ནས་བྱོན། །མོ་ཁད་ཐོག་གི་རྫོང་ནས་བྱོན། །སྤྱི་དུ་བར་བུའི་རྩེ་ནས་བྱོན། །སྨར་ཁམས་ཀེ་རུའི་སྒང་ནས་བྱོན། །ནམ་མཁའ་
དབྱིངས་ཀྱི་གནས་ནས་བྱོན། །སེང་ཞོན་སུམ་བརྒྱ་དྲུག་ཅུ་བྱོན། །བར་སྣང་སྤྲིན་གྱི་ནང་ནས་བྱོན། །སྟག་ཞོན་སུམ་བརྒྱ་དྲུག་ཅུ་བྱོན། །འབྱུང་བཞི་ས་ཡི་གནས་ནས་བྱོན། །ར་ཞོན་སུམ་བརྒྱ་དྲུག་ཅུ་བྱོན། །ཆུ་ཆེན་ཀུན་གྱི་རྒྱུད་ནས་བྱོན། །ཀླུ་འཁོར་སུམ་བརྒྱ་དྲུག་ཅུ་བྱོན། །འོད་དཀར་འཐིབས་པའི་ནང་ནས་བྱོན། །ལྷ་འཁོར་སུམ་བརྒྱ་དྲུག་ཅུ་བྱོན་། །འཇའ་སྤྲིན་འཁྲིགས་པའི་ནང་ནས་བྱོན། །སྨན་འཁོར་སུམ་བརྒྱ་དྲུག་ཅུ་བྱོན། །གངས་དཀར་ཀུན་གྱི་རྩེ་ནས་བྱོན། །གངས་བཙན་སུམ་བརྒྱ་དྲུག་ཅུ་བྱོན། །རིན་ཆེན་ཀུན་གྱི་སྔས་ནས་བྱོན། །བཙན་འཁོར་སུམ་བརྒྱ་དྲུག་ཅུ་བྱོན། །ཕོ་བྲང་གསེར་སྒོང་སྟེང་ནས་བྱོན། །རང་བཞིན་གནས་ནས་གཤེགས་སུ་གསོལ། །ཏྲི་ར་ཙ་ས་མཱ་ཡ་ཛ་ཛཿ ཛཿཧཱུྃ་བཾ་ཧོ༔ ཧཱུྃ། དགྲ་ལྷ་འཁོར་བཅས་བྱོན་པ་ལེགས། །ཡིད་ལས་སྤྲུལ་པའི་ཕོ་བྲང་མཆོག །གཡུ་མཚོ་མེར་བ་རྦ་ཀློང་འཕྱོ། །རིན་ཆེན་སྣ་ཚོགས་གྲམ་པའི་བརྡལ། །ཐ་མ་ལྗོན་ཤིང་ར་བས་བསྐོར། །ཆུ་གནས་རི་དྭགས་ཆུ་བྱ་སྟེང་། །དེ་དབུས་རིན་ཆེན་གཞལ་ཡས་ཁང་། །གྲུ་བཞི་སྒོ་བཞི་རྟ་བབས་ལྡན། །ལོངས་སྤྱོད་འདོད་
ཡོན་གཅལ་དུ་བཀྲམ། །དེ་དབུས་པདྨ་ཟླ་བའི་སྟེང་། །གཙོ་དང་འཁོར་དང་འཚམས་པ་ཡི། །རིན་ཆེན་དར་ཟབ་གདན་སྟེང་དུ། །ཇི་སྲིད་མཆོད་པ་དེ་སྲིད་དུ། །དགྱེས་པའི་ཚུལ་གྱིས་བཞུགས་སུ་གསོལ། །ཛཿཧཱུྃ་བཾ་ཧོས་གཉིས་མེད་གྱུར། །པདྨ་འབྱུང་གནས་སྤྱན་སྔ་རུ། །ཇི་ལྟར་ཁས་བླངས་དམ་བཅས་པའི། །དམ་ལ་མ་འདའ་ཕྲིན་ལས་མཛོད། །དྲི་རཱ་ཙ་ས་མ་ཡ་སཿ ས་མ་ཡ་ཧོ༔ རང་ཡི་དམ་པདྨ་ཐོད་ཕྲེང་རྩལ་གྱི་ཐུགས་ཀ་ནས་འོད་ཟེར་འཕྲོས་པས། དབང་གི་ལྷ་རིགས་ལྔ་འཁོར་བཅས་སྤྱན་དྲངས་བཛྲ་ས་མཱ་ཡ་ཛ༔ དེ་བཞིན་གཤེགས་པ་རྣམས་ཀྱིས། དགྲ་ལྷ་རོག་སྣལ་འཁོར་བཅས་ལ། དབང་བསྐུར་དུ་གསོལ། སངས་རྒྱས་རྣམས་ཀྱི་བུམ་པའི་དབང་། །དེ་རིང་ཁྱོད་ལ་བསྐུར་བར་བྱ། །ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མཱ་ཡ་ཤྲི་ཡེ་ཧཱུྃ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། ལུས་ངག་ཡིད་གསུམ་གྱི་དྲི་མ་དག །ཆུའི་ལྷག་མ་ཡར་
ལུད་པ་ལས་གསེར་གྱི་རྡོ་རྗེ་རྩེ་ལྔ་པ་རེ་རེས་དབུ་རྒྱན་པར་གྱུར། ཧཱུྃ། རྒྱལ་བ་ཀུན་གྱི་མཁྱེན་བརྩེ་དང་། །ནུས་མཐུ་གཅིག་བསྡུས་དྲེགས་པའི་གཉེན། །འཆི་མེད་འཇའ་ལུས་རྡོ་རྗེའི་སྐུ། །པདྨ་འབྱུང་གནས་ལ་ཕྱག་འཚལ། །དེ་ཡི་བཀའ་སྡོད་དྲེགས་པའི་གཙོ། །དཔལ་ཆེན་རྟ་མགྲིན་ཡང་སྤྲུལ་ཏེ། །རྡོ་རྗེ་གཞོན་ནུའི་བཀའ་སྲུང་བ། །དམ་ཅན་ཡེ་བརྫུར་ཕྱག་འཚལ་བསྟོད། །ཁྱེད་ལ་མཆོད་པ་འབུལ་བ་ནི། །མཆོད་ཡོན་ཞབས་བསིལ་མེ་ཏོག་དང་། །བདུག་སྤོས་སྣང་གསལ་དྲི་བསུང་དང་། །ཞལ་ཟས་རོལ་མོའི་མཆོད་པ་འབུལ། །དགྲ་བགེགས་འདུལ་ཕྱིར་བཞེས་སུ་གསོལ། །བཟང་ཤིང་སྤོས་དཀར་དུད་པས་བསང་། །བདུད་རྩི་ཕུད་རྒོད་གསེར་སྐྱེམས་མཆོད། །ཇ་ཕུད་འོ་ཞོ་ཕྱེ་མར་མཆོད་། །གཡག་ལུག་ར་སྐྱེས་དོན་ཤ་མཆོད། །འབྲུ་སྣ་ཀླུ་སྨན་ཤིང་ཐོག་དང་། །རིན་ཆེན་དར་ཟབ་སྣ་ཚོགས་འབུལ། །འཁོར་བཅས་མཉེས་ཤིང་ཚིམས་གྱུར་ཅིག །ཏྲི་རྭ་ཙ་ས་པཱ་རི་ཝཱ་ར་ཨབྷཾ་པཱ་དྱེ་པུཥྛ་དྷུ་པེ་ཨཱ་ལོ་ཀེ་གྷནེ་ནེ་ཝི་དྱ་ཤཐཱ་པྲ་ཏིཙྪ་ཨཱཿཧཱུྃ། ཨོཾ་བཛྲ་ཡཀྵ་ཧཱུྃ། ཨོཾ་སྭ་བྷ་སོགས། སྟོང་པའི་ངང་ལས་ཧཱུྃ་ལས་རིན་པོ་
ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། ཁཾ་འོད་དུ་ཞུ་བ་ལས་བྱུང་བའི་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་འདོད་པའི་ཡོན་ཏན་ལྔ་དང་ལྡན་པ་རྒྱ་ཆེར་འཕྲོ་ཞིང་ཟད་མི་ཤེས་པའི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ཧ་ཧོ་བྷིསྭཱ་ཧཱ། ཡེ་ཤེས་ཀྱི་བདུད་རྩིས་ཟག་མེད་ཀྱི་བདེ་བ་བསྐྱེད་པར་གྱུར། ཨོཾ་ཏྲ་མ་ཏྲི་ཏ། ཡ་ན་བྷ་ས། རྨི་ནམ། ༀ་ཀྱི་ཡ་ཀྱི་ཡ། མ་མ་ཏེ་ཏེ། ཧ་ཧ་ཏེ་ཏེ། ཀྱུ་ཙུ་ཀྱུ་ཅུ། མུ་མུ་ཀེ་ཏེ། སང་སྟོང་ངོ་། ན་མསརྦ་ཏ་ཐཱ་ག་ཏ་བློ་བི་ཤྭ་མུ་ཁེ་བྷྱ༔ སརྦ་ཐ་ཁཾ་ཨུཏྟ་ཏེ་སྤ་ར་ཎ་ཨི་མཾ་ག་ག་ན་ཁཾ་གྷིཧཱུ་ཨི་དཾ་བ་ལིཾ་ཏ་སྭཱ་ཧཱ། ལན་གསུམ། ཏྲི་རཱ་ཙ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་བྷ་མི་པ་ཏི་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། དམ་རྫས་བརྒྱན་པའི་གཏོར་མ་རྒྱ་ཆེན་པོ་འདི་བསྔོ་ཞིང་འབུལ་བའི་གནས་སུ་གྱུར་པ་ནི། དགེ་བསྙེན་རོག་སྣལ་ཞང་བློན་ཆེན་པོ་གུ་རུ་སྟག་གི་དགྲ་ལྷ། འོར་ཕྲོམ་མཐུ་ཆེན་ནོར་ཆེན་ཤཱ་ཙ། ཞང་བློན་བདུད་འདུལ་ཆེན་པོ། འར་ལྡོང་མཐུ་ཆེན། ཡབ་ཡུམ་འཁོར་སྤྲུལ་པ་དང་བཅས་པ་ཐམས་ཅད་ལ་འབུལ་ལོ། །ཀླུ་ཡི་མགོན་པོ་དཀར་པོ། གནས་པོ་རྡོ་རྗེ་
གུར་མགོན། རྡོ་ཐི་གངས་དཀར་མཆེད་བརྒྱད། ཇོ་བོ་སྒྱོགས་ཆེན་གདོང་ར། གྲུ་གུའི་ལྷ་བྲག་དཀར་པོ། དགེ་བསྙེན་ཞི་བ་རྒྱལ་ལ་སོགས་པ་སྨར་ཁམས་སྒང་གི་ཡུལ་ལྷ་ཐམས་ཅད་གསོལ་ལོ། །མཆོད་དོ། །འབུལ་ལོ། །མཉེས་ཤིང་ཚིམས། དགའ་ཞིང་མགུ་ནས་སྤྱིར་སངས་རྒྱས་ཀྱི་བསྟན་པ་དར་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་དམ་པ་རྣམས་ཀྱི་སྐུ་ཚེ་བརྟན་ཞིང་ཕྲིན་ལས་རྒྱས་པ། འཛམ་གླིང་སྤྱི་དང་ཁྱད་པར་ཡུལ་ཕྱོགས་འདིར། ནད་མུག་མཚོན་གྱི་བསྐལ་པ་ཞི་བ་དང་། ཁྱེད་ཉིད་ཕོ་ལྷར་བརྟེན་པའི་སྡེ་རིས་འདིར་མི་ནད་ཕྱུགས་ནད་དང་། ནང་འཁྲུག་ལ་སོགས་ཀྱི་གནོད་པ་མི་འབྱུང་བ་དང་། དཔལ་འབྱོར་ཆོས་སྲིད་དར་ཞིང་རྒྱས་པ་དང་། ཆུ་དྲུག་སྒང་ལྔ་དབང་དུ་འདུ་བ་དང་། ཕ་རོལ་དགྲ་ཡི་གཡུལ་ལས་དུས་རྟག་ཏུ་རྒྱལ་བའི་ཕྲིན་ལས་མཛོད་ཅིག །མཐུ་ཆེན་དགྲ་ལྷ་ཁྱེད་རྣམས་ལ་མཐུ་རྩལ་ཅི་གདའ་བལྟའོ། །སྐུ་གསུང་ཐུགས་མ་གཡེལ་ཅིག །ཅེས་སོགས་འདོད་གསོལ་གང་དགོས་བྱའོ། །དེ་ནས་བསྟོད་པ་ནི། ཧཱུྃ། ཨ་ཇོ་ཞང་བློན་ཆེན་པོ་ནི། །སྐུ་མདོག་མཐིང་ནག་འོད་ཟེར་འབར། །ཞལ་གཅིག་ཕྱག་གཉིས་རྔམ་པའི་སྐུ། །
གཡས་པས་གསེར་གྱི་རལ་གྲི་འདེབས། །གཡོན་པས་ལྕགས་ཀྱི་སྦར་ཤེད་འཛིན། །དབུ་ལ་གནམ་ལྕགས་དབུ་རུ་བཞུགས། །སྟོང་ཁམས་ལྷ་རྣམས་འདར་ཞིང་འདུ། །ཆིབས་སུ་ཤེལ་གྱི་ར་སྐྱེས་ཆིབས། །ཞལ་ནི་གསེར་ཆུ་ཐ་ར་ར། །དགྲ་བགེགས་ཐལ་བ་རྡུལ་དུ་བརླགས། །ཨ་ཇོ་ཞང་བློན་ཁྱེད་ལ་བསྟོད། །ཧཱུྃ། སྐུ་བླ་རོག་སྣལ་མཐུ་ཆེན་ནི། །སྤྲུལ་པ་གཡུ་སྒོང་ནང་དུ་རྡོལ། །ཞལ་གཅིག་ཕྱག་གཉིས་འོད་ཟེར་འབར། །ཁམས་ནག་རལ་པ་གྱེན་དུ་འཁྱིལ། །དབུ་སྐྲའི་འོད་ཟེར་ཚྭ་ཚྭ་འཕྲོ། །སྤྱན་མིག་ཉི་ཟླའི་གདངས་མིག་གཟིགས། །སྐུ་ལ་འཇའ་ཚོན་ལྷག་པ་མནབས། །ཕྱག་གཡས་མཁར་ཐོགས་དམར་པོ་བསྣམས། །རྒྱལ་ཁམས་དགྲ་བགེགས་ཆམ་ལ་ཕོབ། །གཡོན་ན་ལྕགས་ཐོགས་རྩེ་བརྒྱད་བསྣམས། །དགྲ་བགེགས་གནོད་བྱེད་ཐམས་ཅད་ལ། །མཁར་ཐོགས་རྒྱོབ་ཅིང་ལྕགས་ཀྱུས་འདྲེན། །རྟ་སྔོན་གཡུ་རྔོག་ཆིབས་སུ་བཅིབས། །བདུད་ཀྱི་དམག་ཚོགས་འཁོར་གྱིས་བསྐོར། །མཐུ་ཆེན་ཁྱོད་ལ་བདག་བསྟོད་དོ། །ཧཱུྃ། གུ་རུ་སྟག་གི་དགྲ་ལྷ་ནི། །སྐྱེས་ཀྱི་ཕོ་ལྷ་དགྲ་ལྷ་ཆེ། །སྤྲུལ་པ་དུང་སྒོང་ནང་ནས་
རྡོལ། །དུང་གི་མི་ཕོ་ཐོད་ལྡེང་ཅན། །ཕྱག་ན་བ་དན་རྩེ་བརྒྱད་བསྣམས། །དུང་གཡག་དཀར་པོ་གཡུ་རུ་ཆིབས། །འཁོར་ནི་ལྷ་དམག་འབུམ་དང་བཅས། །སྐྱེས་ཀྱི་ཕོ་ལྷ་། ཁྱོད་ལ་བསྟོད། །ཧཱུྃ། དགྲ་ལྷ་འོ་ཕྲོམ་མཐུ་ཆེན་ནི། །སྤྲུལ་པ་གསེར་སྒོང་ནང་ནས་རྡོལ། །འོད་ཟེར་འཕྲོ་བའི་མི་ཕོ་ལ། །སྤྱན་ལ་རྫི་རླུང་འཚུབ་ནག་བསྐྱོད། །དབུ་ལ་གནམ་ལྕགས་སྲོག་ཞུ་མནབས། །སྐུ་ལ་དུང་ཁྲབ་དཀར་པོ་གསོལ། །ཕྱག་ན་མདུང་དར་སྔོན་པོ་ཕྱར། །དཔའ་མཚོན་གོ་མཚོན་མེ་ལྟར་འབར། །བྱམས་སྡང་གཉིས་ཀྱི་གོ་འབྱེད་པོ། །དཀར་ནག་གཉིས་ཀྱི་མདངས་སུ་གསལ། །བཟང་ངན་གཉིས་ཀྱི་ཤན་ཡང་འབྱེད། །ཡོ་དྲང་གཉིས་ཀྱི་ཐིལ་ཡང་བསྲང་། །ཆིབས་སུ་ངང་པ་སེར་པོ་ཆིབས། །འཁོར་ནི་གཉན་དམག་འབུམ་དང་བཅས། །ལྷ་དམག་འབུམ་གྱི་དབུས་ན་འགྱིངས། །འོ་ཕྲོམ་ཁྱོད་ལ་བདག་གིས་བསྟོད། །ཧཱུྃ། སྐུ་བླ་འར་ལྡོང་མཐུ་ཆེན་ནི། །སྤྲུལ་པ་ཟངས་སྒོང་ནང་དུ་རྡོལ། །སྟོབས་ལྡན་མི་ཕོ་དམར་པོ་ལ། །ཆིབས་སུ་མཚལ་བུ་རྟིང་དཀར་ཆིབས། །དབུ་ལ་རྩི་དར་དམར་པོ་བཅིངས། །སྐུ་ལ་ལིང་བེར་དམར་པོ་
མནབས། །གཡས་ན་རལ་གྲི་མེ་འབར་བསྣམས། །གཡོན་ན་ བ་དན་དམར་པོ་ཕྱར། །ཕྲིན་ལས་བཙན་ཁམས་དབང་དུ་བསྡུ། །བཙན་དམག་འབུམ་གྱི་དབུས་ན་འགྱིང་། །འར 
་ལྡོང་ཁྱོད་ལ་བདག་བསྟོད་དོ། །ཧཱུྃ། དགེ་བསྙེན་འར་ཆེན་ཤྭ་ཙ་ནི། །སྤྲུལ་པ་ཁྱུང་སྒོང་ནང་ནས་རྡོལ། །གསང་མཚན་རྡོ་རྗེ་སྨུག་པོ་བྱ། །ཁྱུང་གི་མི་ཕོ་སྨུག་པོ་ལ། །དབུ་ལ་ལེ་བརྒན་འགྱིང་ཐོད་བཅིངས། །སྤྱན་མིག་དགྲ་དང་བགེགས་ལ་གཟིར། །སྐུ་ལ་ཆུ་དར་བེར་ཆེན་གསོལ། །གཡས་ན་ཁྱུང་ལྕགས་སྨུག་པོ་ཕྱར་། །གཡོན་ན་གནམ་ལྕགས་བེར་ག་བསྣམས། །ཆིབས་སུ་ར་སྐྱེས་ཁམ་པ་ཆིབས། །དར་གྱི་ཅོད་པན་པུ་རུ་རུ། །འགྱིང་དྲུག་ལ་སོགས་འཁོར་གྱིས་བསྐོར། །ཀླུ་གཉན་འབུམ་གྱི་དབུས་ན་འགྱིང་། །སྤྲུལ་པའི་དམག་ཚོགས་ལས་ལ་འགྱེད། །འར་ཆེན་ཤཱ་ཙ་ཁྱོད་ལ་བསྟོད། །ཧཱུྃ། ཞང་བློན་བདུད་འདུལ་ཆེན་པོ་ནི། །སྤྲུལ་པ་ཤེལ་སྒོང་ནང་ནས་རྡོལ། །རྫུ་འཕྲུལ་ཤེལ་གྱི་ར་སྐྱེས་ཆིབས། །མཁར་ཐིལ་རྩེ་དགུ་ཕྱག་ན་བསྣམས། །སྐུ་ལས་འོད་ཟེར་སྣ་ཚོགས་འཕྲོ། །འཁོར་ནི་ཞང་བློན་འབུམ་གྱིས་བསྐོར། །ལྷ་
ཕྲན་ཀླུ་ཕྲན་ཕོ་ཉར་འགྱེད། །གདོང་མོ་སྤུན་དགུ་འཁོར་གྱིས་བསྐོར། །སྤྲུལ་པ་མཛད་པས་སྟོང་ཁམས་ཉུལ། །འཁོར་དང་སྤྲུལ་པར་བཅས་ལ་བསྟོད། །ཧཱུྃ། རོག་སྣལ་བདུད་འདུལ་ཆེན་པོ་ནི། །ཉི་མ་ཤར་དུ་རྒྱུག་ཙམ་ན། །ཆུ་གླང་དཀར་པོ་ཆིབས་སུ་ཆིབས། །ཀླུ་ཡི་མགོན་པོ་ཁྱོད་ལ་བསྟོད། །དགྲ་བགེགས་ཐུལ་ལ་བསྟན་པ་སྲུངས། །བཅོལ་བའི་ཕྲིན་ལས་འགྲུབ་པར་མཛོད། །དེ་ནས་བཟླས་པ་བྱ་བ་ནི། བདག་ཉིད་ཡི་དམ་པདྨར་གསལ་བའི་ཐུགས་ཀ་ནས་འོད་ཟེར་འཕྲོས་པས། མདུན་གྱི་དགྲ་ལྷ་རོག་སྣལ་སྐུ་འཁོར་དང་བཅས་པ་ཐམས་ཅད་ཀྱི་རྒྱུད་བསྐུལ། ལྷ་རྣམས་ཀྱི་ཐུགས་ཀ་ནས་འཁོར་རང་འདྲ་བ་གྲངས་མེད་པ་འཕྲོས་པས། ལྷ་འདྲེ་མི་གསུམ་ས་བདག་ཀླུ་གཉན་གྱི་བཅུད། ཚེ་བསོད་ནམས་ལོངས་སྤྱོད་རྣམས་བསྡུས་ནས་བདག་གི་བང་ཁང་ཐམས་ཅད་བཀང་སྟེ་ཕུལ་བར་བསམ། ལྷ་རྣམས་ཀྱི་སྲོག་སྙིང་བསྒྲུང་བ་ཙམ་གྱིས་བཀའ་དང་དམ་ལས་མི་འདའ་བར་བསམས་ལ། ཨོཾ་ཏྲ་ལ་ཏྲི་ཏ་ཡ་ན་བྷ་ས། སྣེ་ནཾ། ཨོཾ་ཀྱི་ཡ་ཀྱི་ཡ། མ་མ་ཏེ་ཏེ། ཧ་ཧ་ཏེ་ཏེ། ཀྱུ་ཙུ་ཀྱུ་ཙུ། མུ་མུ་ཀེ་ཏེ་སམ་སྟོང་ངོ་། ས་མ་ཡ་ཛ་ཛ༔ ཞེས་འབུམ་ཚོ་གཅིག་བཟླས་པ་བྱའོ། །གྲངས་ཀྱི་བསྙེན་པའོ། །འགྲུབ་པའི་རྟགས་ནི་
རླུང་ཐོག་དང་། ར་སྐྱེས་དང་། གཡག་དང་གཡག་དཀར་པོ་དང་། དམག་མི་དང་། གོ་མཚོན་རབ་དངོས་འབྲིང་ཉམས་སུ་འོང་། ཐ་མ་རྨི་ལམ་དུ་འོང་། དེ་ནི་འགྲུབ་པའི་རྟགས་སོ། །དེ་ནས་བསྐང་བ་བྱ་བ་ནི་གཏོར་མ་གསོ་བྲན་བྱས་ལ། ཨོཾ་ཨ་མྲྀ་ཏེ་སོགས། སྭ་བྷ་ཝས་སྦྱངས། སྟོང་པའི་ངང་ལས་བསྐང་རྫ་ས་སྒྲུབ་རྫས། གོ་མཚོན་དར་ཟབ་རིན་པོ་ཆེ་ལ་སོགས་པ་ནམ་མཁའ་དང་ས་གཞི་བར་སྣང་གང་བ་དགྲ་བླ་ཡེ་བརྫུ་འཁོར་བཅས་མཉེས་ཤིང་ཚིམ་པ་བསྐྱེད་པར་གྱུར། ཨོཾ་བཛྲ་སྤུ་ར་ཎ་ཁཾ། ཧཱུྃ། དཔལ་ཆེན་པདྨ་ཐོད་ཕྲེང་གིས། །དམ་ལ་བཏགས་པའི་དམ་ཚིག་ཅན། །རྡོ་རྗེ་ཕུར་པའི་དཀའ་སྲུང་བ། །ཡེ་བརྫུ་མཆེད་དང་འཁོར་བཅས་ཀྱི། །ཐུགས་དམ་གཉན་པོ་བསྐང་བའི་རྫས། །ཤེལ་ར་ཁམ་དཀར་ཆེ་བཞིན་བཞག །དམར་ཆེན་གཏོར་མ་རི་ལྟར་སྤུངས། །ར་གསུར་དུད་པ་སྤྲིན་ལྟར་གཏིབས། །སྣང་གསལ་སྒྲོན་མེ་ཉི་ལྟར་འབར། །བཟང་ཤིང་སྤོས་དཀར་བདུག་སྤོས་དང་། །གཡག་ལུག་ཞིབ་མར་མཆོད་པ་དང་། །གསེར་སྐྱེམས་གཡག་ལུག་དོན་ཤ་དང་། །རི་གཡག་ཙིཏྟ་བྱ་རྒོད་སྒྲོ། །སྨྱུག་རྒོད་དར་དཀར་དར་སྣ་ལྔ། །དངུལ་དཀར་མེ་ལོང་སྦ་གླིང་དང་། །
གཡག་ལུག་ར་དང་རི་དྭགས་གཟུགས། །བདུད་རྩི་ཇ་ཆང་ཕུད་རྒོད་དང་། །སྨན་གཏོར་རཀྟའི་དམ་རྫས་སོགས། །སྣ་ཚོགས་མཆོད་རྫས་དཔག་མེད་ཀྱིས། །ཡེ་བརྫུ་འཁོར་བཅས་ཐུགས་དམ་བསྐང་། །ཧཱུྃ། དགེ་བསྙེན་བདུད་འདུལ་ཆེན་པོ་ནི། །མཁར་ཐོལ་རྩེ་དགུ་སྐྱེད་ལ་བཅུག །གནམ་ལྕགས་ཐོ་ལུམ་ཕྱག་ན་བསྣམས། །དགྲ་བོ་དམ་ཉམས་སྙིང་ལ་འདེབས། །བསྐང་ངོ་ཁྱོད་ཀྱི་ཐུགས་དམ་བསྐང་། །རྣལ་འབྱོར་བདག་གི་སྡོང་གྲོགས་མཛོད། །སྐུ་བླ་ཝེར་དཀར་འཁོར་དང་བཅས། །ཉི་མ་ཤར་དུ་བྱོན་ཙམ་ན། །ཀླུ་གླང་དཀར་པོ་ཆིབས་སུ་ཆིབས། །ལྷ་འཁོར་འབུམ་གྱི་འཁོར་དང་བཅས། །བསྐང་ངོ་ཁྱོད་ཀྱི་ཐུགས་དམ་བསྐང་། །ཉི་མ་ལྷོ་རུ་བྱོན་ཙམ་ན། །ཤེལ་གྱི་ར་སྐྱེས་པའི་ཆིབས་སུ་ཆིབས། །རླུང་འཁོར་འབུམ་གྱི་འཁོར་གྱིས་བསྐོར། །བསྐང་ངོ་ཁྱོད་ཀྱི་ཐུགས་དམ་བསྐང་། །ཉི་མ་ནུབ་ཏུ་བྱོན་ཙམ་ན། །འཇའ་ཚོན་སླག་པ་སྐུ་ལ་གསོལ། །སྦྲུལ་ནག་རེ་འབྱམས་རྟ་རུ་ཞོན། །བདུད་དམག་འབུམ་གྱི་འཁོར་གྱིས་བསྐོར། །བསྐང་ངོ་ཁྱོད་ཀྱི་ཐུགས་དམ་བསྐང་། །ཉི་མ་བྱང་དུ་བྱོན་ཙམ་ན། །སྐུ་ལ་འོད་ཟེར་མེ་དཔུང་
འབར། །འཚུབ་མ་ཁམ་པ་རྟ་རུ་ཞོན། །བཙན་དམག་འབུམ་གྱི་འཁོར་གྱིས་བསྐོར། །བསྐང་ངོ་ཁྱོད་ཀྱི་ཐུགས་དམ་བསྐང་། །ཇོ་མོ་གདོང་མོ་སྤུན་དགུ་དང་། །ལྷ་ཀླུ་གཉན་དམག་སྡེ་བརྒྱད་དང་། །མཆེད་ཟླ་སུམ་བརྒྱ་དྲུག་ཅུས་བསྐོར། །བསྐང་ངོ་ཁྱོད་ཀྱི་ཐུགས་དམ་བསྐང་། །རྣལ་འབྱོར་བདག་གི་དགྲ་ལྷ་མཛོད། །ཡང་གཅིག་ཐུགས་དམ་བསྐང་བ་ནི། །ཇོ་མོ་གདོང་མོ་སྤུན་དགུ་ནི། །སྐུ་མདོག་དཀར་ལ་འོད་ཟེར་འབར། །སྐུ་ལ་འཇའ་ཚོན་རལ་ག་གསོལ། །ཕྱག་ན་དངུལ་དཀར་མེ་ལོང་བསྣམས། །གཡོན་ན་སྦ་དཀར་གླིང་བུ་སྒྲོག །ཆིབས་སུ་བཙོས་མོ་ཁ་དཀར་ཆིབས། །རོལ་དུ་ར་སྐྱེས་ཁམ་པ་ཁྲིད། །སྨན་བཤོས་རྩེ་བརྒྱད་ཐུགས་དམ་བསྐང་། །སྦ་དཀར་གླིང་བུས་ཐུགས་དམ་བསྐང་། །དངུལ་དཀར་མེ་ལོང་ཐུགས་དམ་བསྐང་། །ཡང་གཅིག་ཐུགས་དམ་བསྐང་བ་ནི། །སྐུ་བླ་གཉན་པོ་འཁོར་དང་བཅས། །རྫུ་འཕྲུལ་སྤྲུལ་པ་མཛད་ཙམ་ན། །མི་དཀར་ས་ཡ་བྱེ་བ་འབུམ། །རྟ་དཀར་བྱེ་བ་འབུམ་ལ་ཆིབས། །དར་དཀར་འཇོལ་བེར་སྐུ་ལ་གསོལ། །དུང་རྨོག་དཀར་པོ་དབུ་ལ་མནབས། །ཁྱུང་
གི་རུ་མཚོན་དབུ་ལ་བཙུགས། །གནམ་ལྕགས་འབར་བའི་གཞུ་ཡང་བཀུག །དྲག་པོའི་ཐོག་རྒོད་མདའ་ཡང་འཕེན། །ཡང་འཁོར་བྱེ་བ་འབུམ་གྱིས་བསྐོར། །བསྐང་ངོ་ཁྱོད་ཀྱི་ཐུགས་དམ་བསྐང་། །སྐུ་བླ་གཉན་པོ་འཁོར་དང་བཅས། །ཡང་གཅིག་སྤྲུལ་པ་མཛད་ཙམ་ན། །ཟླ་རྒྱལ་ཡང་ལུང་རྩེ་ཡང་ན། །མི་དཀར་བྱེ་བ་ས་ཡ་འབུམ། །དར་དཀར་འཇོལ་བེར་སྐུ་ལ་གསོལ། །དུང་རྨོག་དཀར་པོ་དབུ་ལ་མནབས། །གཡག་དཀར་དར་མ་འབུམ་ལ་ཆིབས། །གནམ་ལྕགས་འབར་བའི་གཞུ་ཡང་བདུངས། །དྲག་པོའི་ཐོག་རྒོད་མདའ་ཡང་འཕེན། །འཁོར་ཡང་བྱེ་བ་འབུམ་གྱིས་བསྐོར། །བསྐང་ངོ་ཁྱོད་ཀྱི་ཐུགས་དམ་བསྐང་། །ཡེ་བརྫུ་མཐུ་ཆེན་འཁོར་དང་བཅས། །ཡང་གཅིག་སྤྲུལ་པ་མཛད་ཙམ་ན། །མོ་ཁད་མཆེད་བརྒྱད་ཡང་རྩེ་ན། །མི་སྔོན་བྱེ་བ་ས་ཡ་འབུམ། །རྟ་སྔོན་བྱེ་བ་འབུམ་ལ་ཆིབས། །དར་སྔོན་འཇོལ་བེར་སྐུ་ལ་གསོལ། །དབུ་ལ་གཡུ་རྨོག་སྔོན་པོ་མནབས། །གནམ་ལྕགས་འབར་བའི་གཞུ་ཡང་བདུངས། །དྲག་པོའི་ཐོག་རྒོད་མདའ་ཡང་འཕེན། །བསྐང་ངོ་ཁྱོད་ཀྱི་ཐུགས་དམ་བསྐང་། །དགྲ་ལྷ་ཝེར་དཀར་
འཁོར་དང་བཅས། །ཡང་གཅིག་སྤྲུལ་པ་མཛད་ཙམ་ན། །སྤྱི་དུ་བར་བུའི་ཡང་རྩེ་ན། །ཤེལ་གྱི་མི་ཆུང་བྱེ་བ་འབུམ། །ཤེལ་གྱི་ར་སྐྱེས་འབུམ་ལ་ཆིབས། །ཤེལ་ཁྲབ་དཀར་པོ་སྐུ་ལ་མནབས། །ཤེལ་རྨོག་དཀར་པོ་དབུ་ལ་གྱོན། །ཁྱུང་དང་རྒོད་ཀྱི་ལྡེམ་འཕྲུ་བཙུགས། །གནམ་ལྕགས་འབར་བའི་གཞུ་མོ་བདུངས། དྲག་པོའི་ཐོག་རྒོད་མདའ་ཡང་འཕེན། །བསྐང་ངོ་ཁྱོད་ཀྱི་ཐུགས་དམ་བསྐང་། །ཡེ་བརྫུ་མཐུ་ཆེན་འཁོར་དང་བཅས། །ཡང་གཅིག་སྤྲུལ་པ་མཛད་ཙམ་ན། །ཤེལ་གྱི་ར་སྐྱེས་བྱེ་བ་འབུམ། །རྭ་ནི་སུམ་བརྩེགས་དགུང་ལ་རན། །སྟོད་ན་ཉི་མ་ཟླ་བ་ཤར། །བར་ན་འབྲུག་སྒྲ་འུ་རུ་རུ། །སྨད་ན་ཐོག་སེར་བུ་ཡུག་འཚུབ། །སྤྱན་ལ་བསྐལ་པའི་མེ་ཆེན་འབར་། །ཤངས་ནས་བསྐལ་པའི་རླུང་ནག་འཚུབ། །ལྗགས་ལ་གློག་དམར་ལྗིབས་སེ་ལྗིབ། །སྤུ་ལ་གནམ་ལྕགས་ཚྭ་ཚྭ་འཕྲོ། །རྨིག་བཞི་ཁྲོ་ཆུའི་རྦ་རླབས་འདྲིལ། །ར་སྲིད་གནམ་དུ་ཤ་ར་ར། །རྫི་སྨིན་ས་ལ་ཞོལ་སེ་ཞོལ། །བསྐང་ངོ་ཁྱོད་ཀྱི་ཐུགས་དམ་བསྐང་། །ཐུགས་དམ་བསྐང་བའི་བྱིན་རླབས་ཀྱིས། །བྱད་ཀ་ཕུར་ཁ་བཟློག་ཏུ་
གསོལ། །མོ་ངན་ལྟས་ངན་བཟློག་ཏུ་གསོལ། །ཆག་ཆེན་ཉམ་ང་བཟློག་ཏུ་གསོལ། །མི་ནད་ཕྱུགས་ནད་བཟློག་ཏུ་གསོལ། །ལོ་ཀག་ཟླ་ཀག་བཟློག་ཏུ་གསོལ། །གོད་ཀ་སྙིང་སྟོང་བཟློག་ཏུ་གསོལ། །དུས་མིན་འཆི་བ་བཟློག་ཏུ་གསོལ། །ཟ་འདྲེ་ཤི་གཤེད་བཟློག་ཏུ་གསོལ། །ནད་འདྲེ་གཅོང་སྲི་བཟློག་ཏུ་གསོལ། །དམག་སྣ་ཇག་སྣ་བཟློག་ཏུ་གསོལ། །ཕྱི་ནང་འཁྲུག་རྩོད་བཟློག་ཏུ་གསོལ། །རྒྱལ་བསེན་དམ་སྲི་བཟློག་ཏུ་གསོལ། །རྐྱེན་ངན་བར་ཆད་བཟློག་ཏུ་གསོལ། །ཁྱེད་ཀྱང་སྔོན་གྱི་དམ་ཚིག་ཅན། །བདག་ཅག་སྔོན་གྱི་དམ་ཚིག་ཅན། །སྔོན་གྱི་ཐ་ཚིག་དགོངས་མཛོད་ལ། །སྡང་བའི་དགྲ་དང་གནོད་པའི་བགེགས། །དབང་དུ་བསྡུས་ལ་རྡུལ་དུ་རློགས། །བཅོལ་བའི་ཕྲིན་ལས་འགྲུབ་པར་མཛོད། །དེ་ནས་གསོལ་ཁ་བྱ་བ་ནི། སླར་གཏོར་མ་གསོ་བྲན་བྱས་ལ། སྤྲོ་ན་གསུར་དུད་བྱ། མཆོད་གཡོག་པས་ཇ་ཆང་ཕུད་ཐོགས་ལ་གསོལ་ལོ་ཟེར་དུས་ནམ་མཁའ་ལ་གཏོར་བ་དང་གཏོར། རྫ་འུར་བརྡུང་རོལ་མོ་བྱའོ། །ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ་གྱིས་བྱིན་བརླབས། ཧོཿ དགོངས་སུ་གསོལ། གསན་དུ་གསོལ། སྔོན་སློབ་དཔོན་པདྨ་འབྱུང་གནས་ཀྱི་སྤྱན་སྔར་ཁས་བླངས་དམ་
བཅས་པའི་དགེ་བསྙེན་ཆེན་པོ་ཡེ་བརྫུ། རྡོ་རྗེ་གུར་གྱི་གནས་པོ། གསང་མཚན་རྡོ་རྗེ་གུར་མགོན། དབུ་ལ་སྟག་ཞུ་ཁྲ་བོ་གསོལ་བ། སྐུ་ལ་གསེར་ཁྲབ་སེར་པོ་གསོལ་བ། ཕྱག་གཡས་ན་དུང་ལྕག་དཀར་པོ་ཀླད་ལ་གཡུགས་པ། གཡོན་ན་མདུང་དར་ལྕེ་བརྒྱད་བསྣམས་པ། གཡས་ན་སྟག་རལ་ཁྲ་བོ་སྟག་ལྟར་འཁྱུག་པ། གཡོན་ན་རལ་གྲི་གཞུ་ཤུབས་གཟིག་ལྟར་འཁྱུག་པ། ཆིབས་སུ་རྟ་ཕོ་གཡུ་རྔོག་ལ་ཆིབས་པ། སྟེང་ན་ཐང་དཀར་དང་ཐང་ནག་ལྡིང་བ། ཀླད་ལ་ལྕགས་ཀྱི་བྱ་ཁྲ་འཇུམ་པ། སྔོན་ལ་ལྷ་གཡག་དཀར་པོ་ངར་བ། རྒྱབ་ན་དུང་གི་སེང་གེ་འགྱིང་བ། འོག་ན་རྒྱ་སྟག་དམར་པོ་མཆོང་བ། ཟུར་ན་སྤྱང་སྔོན་འདྲིལ་བ། ཕོ་ཉ་སྦྲུལ་ནག་མགོ་དགུ་འགྱེད་པ། འཁོར་དུ་བདུད་དམག་འབུམ་གྱིས་བསྐོར་བ། ཁྱེད་རྣམས་ལ་གཏོར་མ་རྒྱ་ཆེན་པོ་འདིས་གསོལ་ལོ་མཆོད་དོ། །ཕྱེ་མར་དང་གསེར་སྐྱེམས་ཀྱིས་མཆོད་དོ་གསོལ་ལོ། །རྣལ་འབྱོར་པ་བདག་ཅག་ཡོན་མཆོད་འཁོར་དང་བཅས་པ་རྣམས་ཀྱི་ཚེ་དང་བསོད་ནམས་སྤེལ་ཅིག །འཁོར་དང་བསྟན་པ་སྲུངས་ཤིག །གནོད་བྱེད་དགྲ་བགེགས་ཐུལ་ཞིག་
བཅོལ་བའི་ཕྲིན་ལས་སྒྲུབས་ཤིག །ཧོ༔ ཡང་གཅིག་དགོངས་སུ་གསོལ་ལོ། །གུ་རུ་སྟག་གི་དགྲ་ལྷ་ཆེན་པོ། དུང་གི་མི་ཕོ་དཀར་པོ་ལ་དུང་གི་ཐོར་ཚུགས་ཅན། ཕྱག་གཡས་ན་དུང་ལྕག་ཕྱར་བ། གཡོན་ན་མདུང་དར་དཀར་པོ་བསྣམས་པ། སྟག་རལ་ཁྲ་བོ་གཡས་སུ་བཀྲ་བ། གཞུ་རལ་གཟིག་ཤུབས་གཡོན་དུ་ཐོགས་པ། དུང་གཡག་དཀར་པོ་རི་ཙམ་ཆིབས་པ། ལྷ་དམག་འབུམ་གྱིས་བསྐོར་བ་ཁྱེད་རྣམས་ལ་གསོལ་ལོ་མཆོད་དོ། །ཕྱེ་མར་དང་གསེར་སྐྱེམས་ཀྱིས་གསོལ་ལོ་མཆོད་དོ། །རྣལ་འབྱོར་པ་བདག་ཅག་ཡོན་མཆོད་འཁོར་དང་བཅས་པ་རྣམས་ཀྱི་ཚེ་དང་བསོད་ནམས་སྤེལ་ཅིག །འཁོར་དང་བསྟན་པ་སྲུངས་ཤིག །གནོད་བྱེད་དགྲ་བགེགས་ཐུལ་ཞིག །བཅོལ་བའི་ཕྲིན་ལས་སྒྲུབས་ཤིག ཧོཿ ཡང་གཅིག་དགོངས་སུ་གསོལ་ལོ། དགྲ་ལྷ་འོར་ཕྲོམ་མཐུ་ཆེན། །དབུ་ལ་ལྕགས་རྨོག་སྔོན་པོ་མནབས་པ། སྐུ་ལ་གསེར་ཁྲབ་སེར་པོ་གསོལ་བ། །གཡས་ན་གསེར་གྱི་ལྕག་ཚན་ཕྱར་བ། གཡོན་ན་མདུང་དར་སྔོན་པོ་བསྣམས་པ། ངང་པ་སེར་པོ་ལ་ཆིབས་པ། འཁོར་གསུམ་སྤེལ་མར་ཐོགས་པ། གཉན་དམག་འབུམ་
གྱིས་བསྐོར་བ་ཁྱེད་རྣམས་བརྒྱན་པའི་གཏོར་མ་རྒྱ་ཆེན་འདིས་མཆོད་དོ་གསོལ་ལོ། །ཕྱེ་མར་དང་གསེར་སྐྱེམས་ཀྱིས་མཆོད་དོ་གསོལ་ལོ། །རྣལ་འབྱོར་པ་བདག་ཅག་ཡོན་མཆོད་འཁོར་དང་བཅས་པ་རྣམས་ཀྱི་ཚེ་དང་བསོད་ནམས་སྤེལ་ཅིག །འཁོར་དང་བསྟན་པ་སྲུངས་ཤིག །གནོད་བྱེད་དགྲ་བགེགས་ཐུལ་ཞིག །བཅོལ་བའི་ཕྲིན་ལས་སྒྲུབས་ཤིག །ཧོ༔ ཡང་གཅིག་དགོངས་སུ་གསོལ་ལོ། །སྐུ་ལྷ་འར་ལྡོང་མཐུ་ཆེན་ནི། སྐུ་མདོག་དམར་པོ་དབུ་ལ་དར་དམར་གྱི་ལ་ཐོད་བཅིངས་པ། སྐུ་ལ་ལིང་བེར་དམར་པོ་གསོལ་བ། ཕྱག་གཡས་ན་རལ་གྲི་མེ་འབར་བ་ཀླད་ལ་བསྐོར་བ། གཡོན་ན་མདུང་དར་དམར་པོ་ཕྱར་བ། སྟག་ཆས་འཁོར་གསུམ་སྐེད་ལ་ཐོགས་པ། མཚལ་སྟག་དམར་པོ་རྔམས་པ་ལ་ཆིབས་པ། བཙན་དམག་འབུམ་གྱི་འཁོར་གྱིས་བསྐོར་བ། ཁྱེད་རྣམས་བརྒྱན་པའི་གཏོར་མོ་རྒྱ་ཆེན་པོ་འདིས་མཆོད་དོ་གསོལ་ལོ། །རྣལ་འབྱོར་པ་བདག་ཅག་ཡོན་མཆོད་འཁོར་དང་བཅས་པ་རྣམས་ཀྱི་ཚེ་དང་བསོད་ནམས་སྤེལ་ཅིག །འཁོར་དང་བསྟན་པ་སྲུངས་ཤིག །གནོད་བྱེད་དགྲ་བགེགས་ཐུལ་ཞིག །
བཅོལ་བའི་ཕྲིན་ལས་སྒྲུབས་ཤིག །ཧོ༔ ཡང་གཅིག་དགོངས་སུ་གསོལ་ལོ། །དགེ་བསྙེན་
འར་ཆེན་ཤོ་ཙ་སྐུ་མདོག་སྨུག་པོ་དབུ་ལ་ལེ་བརྒན་གྱི་ལ་ཐོད་གསོལ་བ ། སྐུ་ལ་ཆུ་དར་སྔོན་པོའི་བེར་ཆེན་གསོལ་བ། གཡས་ན་སྦ་ལྕག་དཀར་པོ་ཀླད་ལ་གཡུགས་པ། གཡོན་ན་གནམ་ལྕགས་ཀྱི་བེར་ཀ་ཕྱུར་བ། དཔའ་མཚན་འཁོར་གསུམ་ཀླད་ལ་ཐོགས་པ། མཆོང་གི་ར་སྐྱེས་ཁམ་པ་ལ་ཆིབས་པ། འགྱིང་དྲུག་ལ་སོགས་ཀླུ་གཉན་འབུམ་གྱི་དབུས་ན་འགྱིང་བ། སྐུ་འཁོར་དང་བཅས་པ་ཁྱེད་རྣམས་ལ། བརྒྱན་པའི་གཏོར་མ་རྒྱ་ཆེན་པོ་འདིས་མཆོད་དོ་གསོལ་ལོ། །ཕྱེ་མར་དང་གསེར་སྐྱེམས་ཀྱིས་མཆོད་དོ་གསོལ་ལོ། །རྣལ་འབྱོར་པ་བདག་ཅག་ཡོན་མཆོད་འཁོར་དང་བཅས་པ་རྣམས་ཀྱི་ཚེ་དང་བསོད་ནམས་སྤེལ་ཞིག །འཁོར་དང་བསྟན་པ་སྲུངས་ཤིག །གནོད་བྱེད་དགྲ་བགེགས་ཐུལ་ཞིག །བཅོལ་བའི་ཕྲིན་ལས་སྒྲུབས་ཤིག །ཧོ༔ ཡང་གཅིག་དགོངས་སུ་གསོལ་ལོ། །ཞང་བློན་བདུད་འདུལ་ཆེན་པོ་སྐུ་མདོག་སྔོན་པོ་གཡུ་འོད་འབར་བ། ཕྱག་གཡས་ན་སྦ་ལྕག་དཀར་པོ་ཕྱར་བ། གཡོན་ན་མཁར་ཐེལ་རྩེ་དགུ་བསྣམས་པ། སྐུ་ལ་
དར་ལྗང་གི་བེར་ཆེན་གསོལ་བ། འཁོར་གསུམ་སྤེལ་མ་སྐེད་ལ་ཐོགས་པ། རྫུ་འཕྲུལ་རྟ་ཕོ་གཡུ་ངོག་ལ་ཆིབས་པ། ལྷ་བྲན་ཀླུ་བྲན་ཕོ་ཉར་འགྱེད་པ། །གདོང་མོ་སྤུན་དགུ་དང་ཞང་བློན་འབུམ་གྱི་དབུས་ན་འགྱིང་བ། སྐུ་འཁོར་དང་བཅས་པ་ཁྱེད་རྣམས་ལ། དམ་རྫས་བརྒྱན་པའི་གཏོར་མ་རྒྱ་ཆེན་པོ་འདིས་གསོལ་ལོ་མཆོད་དོ། །ཕྱེ་མར་དང་གསེར་སྐྱེམས་ཀྱིས་གསོལ་ལོ་མཆོད་དོ། །རྣལ་འབྱོར་པ་བདག་ཅག་ཡོན་མཆོད་འཁོར་དང་བཅས་པ་རྣམས་ཀྱི་ཚེ་དང་བསོད་ནམས་སྤེལ་ཅིག །འཁོར་དང་བསྟན་པ་སྲུངས་ཤིག །གནོད་བྱེད་དགྲ་བགེགས་ཐུལ་ཞིག །བཅོལ་བའི་ཕྲིན་ལས་མཛོད་ཅིག །གཞན་ཡང་ལྷ་ཡི་ལྷ་གཡག་ཤམ་པོ། འཇམ་ཁུ་རོག་ཆུང་། སྨན་རྒོད་བདུན་འགྲོལ། ལ་བོ་མཛོད་སྒོ་ཕུར་བུ། ངས་ནུས་མ་སྲིང་ལ་སོགས་པ་འཁོར་སྤྲུལ་པ་ཡང་སྤྲུལ་དང་བཅས་པ་ཁྱེད་རྣམས་ལ་མཆོད་དོ་གསོལ་ལོ། །དམ་རྫས་གཏོར་མ་རྒྱ་ཆེན་པོ་དང་ཕྱེ་མར་དང་གསེར་སྐྱེམས་ཀྱིས་མཆོད་དོ་གསོལ་ལོ། །རྣལ་འབྱོར་པ་བདག་ཅག་ཡོན་མཆོད་འཁོར་དང་བཅས་པ་རྣམས་ཀྱི་ཚེ་དང་བསོད་ནམས་སྤེལ་ཅིག །འཁོར་དང་བསྟན་པ་
སྲུངས་ཤིག །གནོད་བྱེད་དགྲ་བགེགས་ཐུལ་ཞིག །རྐྱེན་ངན་བར་ཆད་ཟློག་ཅིག །མི་ལ་ན་ཚ་མ་གཏོང་། ཕྱུགས་ལ་གོད་ཁ་མ་བཏང་ཞིག །ཞིང་ལ་བཙའ་སད་སེར་གསུམ་མ་བཏང་ཞིག །ཕྱི་ཡི་དགྲ་བགེགས་ནང་ལ་མ་བཏང་ཞིག །ནང་གི་དངོས་གྲུབ་ཕྱྭ་གཡང་ཕྱིར་མ་བཏང་ཞིག །ཕ་སྤུན་དང་བུ་སྲིང་ཤག་རོགས་ཡུལ་ལ་མ་འཁྱམས་ཤིག །གཞི་ལ་འདུག་ན་རྒྱབ་རྟེན་མཛོད་ཅིག །བྱེས་སུ་འགྲོ་ན་ལམ་ལྷ་མཛོད་ཅིག །དམག་ལ་འགྲོ་ན་དམག་དཔོན་མཛོད་ཅིག །ཇག་ལ་འགྲོ་ན་ཇག་དཔོན་གཛོད་ཅིག ། ཚོང་ལ་འགྲོ་ན་ཚོང་དཔོན་མཛོད་ཅིག །མགྲོན་ལ་འགྲོ་ན་མགྲོན་དཔོན་མཛོད་ཅིག །སྔོན་གྱི་བསུ་མ་དང་རྒྱབ་ཀྱི་སྐྱེལ་མ་མཛོད་ཅིག །རྟ་ལུག་ནོར་ཕྱུགས་ཀྱི་རྫི་བོ་མཛོད་ཅིག །འཆི་མེད་ཚེ་ཡི་དངོས་གྲུབ་སྩོལ་ཅིག །ནད་མེད་བདེ་བའི་དངོས་གྲུབ་སྩོལ་ཅིག །ཆེ་བཙན་གྲགས་པའི་དངོས་གྲུབ་སྩོལ་ཅིག །རིགས་རྒྱུད་བཙན་དར་གྱི་དངོས་གྲུབ་སྩོལ་ཅིག །མི་འཕན་རྟ་བྲག་གི་དངོས་གྲུབ་སྩོལ་ཅིག །ཕོ་རྣམས་བཙན་རྒོད་ལྟར་གྲགས་པའི་དངོས་གྲུབ་སྩོལ་ཅིག །མོ་རྣམས་སྨན་མོ་ལྟར་འཕྱོར་བའི་དངོས་གྲུབ་སྩོལ་
ཅིག །བང་མཛོད་འབྲུའི་དངོས་གྲུབ་སྩོལ་ཅིག །རྨ་གཡང་ཟས་ཀྱི་དངོས་གྲུབ་སྩོལ་ཅིག །རྐང་བཞི་ཕྱུགས་ཀྱི་དངོས་གྲུབ་སྩོལ་ཅིག །སྣང་གསལ་པྲ་ཡི་དངོས་གྲུབ་སྩོལ་ཅིག །ཆུས་སྲིད་དབང་ཐང་གི་དངོས་གྲུབ་སྩོལ་ཅིག །ཕ་མྱེས་རྒྱུད་ཀྱི་དགྲ་ལྷ་ཁྱེད་ཡིན་ནོ། །མི་རབས་རྒྱུད་ཀྱི་དགྲ་ལྷ་ཁྱེད་ཡིན་ནོ། །རང་བཞིན་ཤུགས་ཀྱིས་འཁོར་བའི་དགྲ་ལྷ་ཁྱེད་ཡིན་ནོ། །རེ་ལྟོས་གཞན་ལ་མི་བཅའོ། །དཔའ་དར་དུ་ཁྱོད་ཕྱིར་རོ། །དཔུང་དུ་ཁྱོད་ཁུར་རོ། །ཐོད་དུ་ཁྱོད་བཅིངས་སོ། །ཅི་རེ་ཁྱོད་ལ་རེའོ། །སྐུ་གསུང་ཐུགས་མ་གཡེལ་བར་ཅི་བསམ་པའི་དོན་ཐམས་ཅད་ཡིད་བཞིན་དུ་འགྲུབ་པའི་ཕྲིན་ལས་མཛོད། །ཅེས་ཚར་རེའི་གསོལ་ཀ་ཡིན་ན་བཤོས་བུ་གཙང་སར་ཕུལ་ལོ། །ཚར་མང་ཡིན་ན་།སླར་གསོས་ལ་མགོ་ནས་འདོན། སྒྲུབ་པ་ཚར་ནསོ། རྗེས་ཆོག་ནི། ཏྲི་ར་ཙ་ས་པཱ་རི་ཝཱ་ར་ཨབྷཾ་སོགས། པདྨའི་བཀའ་ཉན་དམ་ཚིག་ཅན། །སྲིད་པའི་དགྲ་ལྷ་མཐུ་བོ་ཆེ། །ཕ་མྱེས་གཉན་གྱི་སྲུང་མ་མཆོག །ཡེ་བརྫུ་འཁོར་དང་བཅས་ལ་བསྟོད། །བདག་ཅག་ཡོན་མཆོད་འཁོར་བཅས་རྣམས། །མངོན་ཤེས་སྤྱན་དང་མི་ལྡན་པས། །ཕོག་ཐུགས་འགྲམ་འཁྲུག་ཤོར་
བ་དང་། །རྨེ་རྨུགས་མི་གཙང་མནོལ་གྲིབ་དང་། །མཆོད་གཏོར་དམན་ཞིང་འབག་བཙོག་ཤོར། །དུས་སུ་མཆོད་གཏོར་ཚིག་པ་སོགས། །ཐུགས་དང་འགལ་བ་གང་མཆིས་པ། །རབ་ཏུ་གནོང་ཞིང་འགྱོད་པས་བཤགས། །མི་སྒྲིབ་ཚངས་པའི་དངོས་གྲུབ་སྩོལ། །ཨོ་ས་མ་ཡ། ཨཱཋས་མ་ཡ། ཧཱུྃ་ས་མ་ཡ། ཁོའི་རྩ་སྔགས་དང་། ཨོཾ་བཛྲ་སཏཱ་ས་མ་ཡ་སོགས་ཡིག་བརྒྱ་བརྗོད། དགྲ་བླ་ཡེ་བརྫུ་སྐུ་མཆེད་རྣམས། །རྟེན་རྫས་གོ་མཚོན་འདི་རྣམས་ལ། །བརྟན་པར་བཞུགས་ལ་དུས་རྟག་ཏུ། །དགྲ་བླ་མི་དང་མ་འབྲལ་བར། །ཁ་འཛིན་སྡོང་གྲོགས་མེལ་ཚེ་དང་། །བཀྲ་ཤིས་བདེ་ལེགས་མཛད་དུ་གསོལ། །ཨོཾ་སུ་པྲ་ཏིཥྛ་བཛྲ་ཡེ་སྭཱ། །ཡེ་བརྫུ་འཁོར་ན་གནས་པ་ཡི། །ལྷ་ཀླུ་གཞི་བདག་སྡེ་བརྒྱད་ཚོགས་། །འབྱུང་པོ་ས་འོག་རྒྱུ་བ་དང་། །ས་བླར་འགོད་པ་གང་ཡིན་པ། །མགུ་བར་གྱིས་ལ་རང་གནས་སུ། །ཐམས་ཅད་ཐམས་ཅད་འགྲོ་བར་གྱིས། །སརྦ་བྷུ་ཏ་གཙྩུ། རྒྱ་གར་རྒྱལ་པོའི་རྒྱལ་སྲིད་དང་། །རྒྱ་ནག་རྒྱལ་པོའི་དཔལ་འབྱོར་དང་། །ཧོར་གྱི་རྒྱལ་པོའི་མཐུ་སྟོབས་སོགས། །འཛམ་གླིང་ཀུན་གྱི་མཐུ་སྟོབས་བཅུད། །ཐམས་ཅད་
གནས་འདིར་འདུ་གྱུར་ཅིག །ཡེ་བརྫུ་འོད་ཞུ་རྟེན་ལ་ཐིམ། །།འཁོར་རྣམས་རང་རང་གནས་སུ་གཤེགས། །རང་ཉིད་པད་འབྱུང་འོད་དུ་ཞུ། །ཐུགས་སྲོག་ཧྲཱིཿར་ཐིམ་དེ་ཉིད་ཀྱང་། །སྤྲོས་བྲལ་ཡེ་ནས་རྫོགས་པ་ཆེ། །དགེ་བས་ཨུ་རྒྱན་ཉིད་འགྲུབ་ཤོག །གནས་འདིར་ཉིན་མོ་བདེ་ལེགས༴ །བསོད་རྣམས་རི་བོ་སོགས་བཀྲ་ཤིས་བརྗོད། འདི་སྲིད་པ་ཆགས་པའི་ལྷ་དགུ་ནང་ནས་དགྲ་ལྷ་ཡིན། གཙོ་བོ་འདི་དྲུག་དོན་ལ། སྡང་ལ་སྡང་ཁྲོམ་དབྲ་མོ་དབྲ་ཁྲ། རྒ་མོ་ལེས་ཁྲོམ། འབྲུ་མོ་ཕྲོམ་ཕྲོམ། མཚལ་སྟག་དམར་པོ། ཤེལ་གྱི་ར་སྐྱེས། དུང་གི་ཁྱི་མོ། ཞེས་མིའུ་གདུང་དྲུག་གི་དགྲ་ལྷ་དེ་དང་ངོ་བོ་གཅིག་གམ་སེམས། ཁམས་སྟོད་དུ་གནས་པ་མང་བས་ཡུལ་ལྷ་ཡང་ཡིན། ཁྱེད་ལྷ་ཐོག་གི་རིགས་ལ་རང་བཞིན་ཤུགས་ཀྱིས་འཁོར་ཞིང་བཏགས་ཅིང་ཆགས་པའི་ལྷ་ཡང་ཡིན། ཕ་མྱེས་རྒྱུད་ཀྱི་སྲུང་མ་དང་མི་རབས་རྒྱུད་ཀྱི་སྲུང་མ་ཡིན་པས། ལྷ་ཐོག་གི་རུས་རིགས་མངའ་འབངས་དང་བཅས་པས་མཆོད་ན་བཀྲ་ཤིས་མི་ནོར་འཕེལ། དཔོན་རྣམས་ཀྱིས་མཆོད་ན་ཆོས་སྲིད་དབང་ཐང་འཕེལ། དམག་ཇག་ལས་རྒྱལ་ཁ་ཐོབ། རླུང་ཁ་ཐོབ། ལྷ་གཞན་གང་བས་ཀྱང་རྣོ་མྱུར་ཆེའོ། །ཆོས་པ་ཚད་ལྡན་གྱིས་འཇིག་རྟེན་གྱི་ལྷ་ལ་སྐྱབས་སུ་བཟུང་ན་སྐྱབས་སྡོམ་དང་འགལ་བས། འདི་ཕ་དང་ཕུ་བོའི་འདུ་ཤེས་བྱའི་སྐྱབས་སུ་འཛིན་པ་ནི་མིན། དམ་ཅན་དང་
ཐུགས་རྒྱུད་གཅིག་པའི་མཆེད་ཟླ་སུམ་བརྒྱ་དྲུག་ཅུའི་གྲ་ཡིན་པས་རྟ་མགྲིན་གྱི་ཡང་སྤྲུལ་དང་། ཀླུ་མི་མགོན་དཀར་པོ་དང་ཐུགས་རྒྱུད་གཅིག་པའི་ངག་རྒྱུན་ལྟར་ན་འཇམ་དབྱངས་ཀྱི་ཡང་སྤྲུལ་ཡིན་པས། དེ་ལྟར་ཤེས་ན་སྐྱབས་སུ་བཟུང་ཡང་མི་འགལ་ལོ། །ཨོ་རྒྱན་ཆེན་པོས། ཆོས་སྤྱོད་སྒོར་ཞུགས་བྱས་པས་ཀྱང་། །ཡུལ་དེར་གནས་པའི་ཡུལ་ལྷ་དང་། །ལྷ་སྲིན་སྡེ་བརྒྱད་ཐམས་ཅད་ལ། །གསོལ་ཀ་མཆོད་པ་བྱས་ན་ཤིས། །ཞེས་གསུངས། འདི་ནི་ཁྱད་པར་རྡོ་རྗེ་ཕུར་པའི་བཀའ་སྲུང་ཡིན་ན། བཀའ་སྲུང་གི་གྲྭ་ཡིན་པས་བཀའ་སྲུང་དམ་ཅན་རྒྱ་མཚོའི་གྲལ་གཏོགས་པར་ངེས་པ་དང་། ལྷ་འདྲེ་དབང་བསྐུར་མ་ཐོབ་པར་ཕུགས་གཏོར་གྲར་མི་རུང་བ་དང་། ནང་མཆོད་ཤ་ལྔ་བདུད་རྩི་ལྔ་སོགས་མཆོད་མི་རུང་ནའང་། འདི་ནི་རྡོ་རྗེ་ཕུར་པའི་དབང་ཐོབ་པའི་དགེ་བསྙེན་དམ་ཚིག་ཅན་ཡིན་པས། གཏོར་མ་ཕུགས་གཏོར་གྲལ་འཇོག་རུང་། བདུད་རྩི་རིལ་བུ་བཏབ་པའི་ནང་མཆོད་ཀྱིས་བྲན་ཡང་རུང་། དུད་ཕལ་པ་ཡིན་ན་གཤེགས་གསོལ་བྱ། ལྷ་ཐོག་གི་རིགས་རུས་དཔོན་རིགས་ཡིན་ན། དགྲ་བླ་གཤེགས་གསོལ་མི་ལེགས་པས་གོ་མཚོན་ལ་བསྟིམ་པའི་རྟེན་འབྲེལ་བཟང་། འཇིག་རྟེན་མཆོད་དང་བསྟོད་པས་འགྲུབ། །ཅེས་གསུངས་པས། འདི་ཡི་སྔགས་བསྒྲངས་བ་ལས་བྱང་གསོལ་མཆོད་གལ་ཆེ། འདི་ཡི་སྒྲུབ་པ་སྔགས་བསྙེན་བྱེད་པ་ལ་ནི། སྔོན་དུ་ཡི་དམ་གང་རུང་གི་བསྙེན་པ་ཐོན་པ་གལ་ཆེ། དེ་མིན་ན་གེགས། མི་ནོན་པའི་ཉན་ཡོད། དེ་བས་ཕལ་པ་རྣམས་གསོལ་མཆོད་ལ་བརྩོན་ན་
ལེགས། དེ་ཡང་རྒྱུན་དུ་མ་ཐོན་ན་ཡང་། ལོ་དུས་བཞིན་དུ་གཏོར་མཆོད་ཆེ་ཞིང་བཟང་བར་བཅས་ལ། འདི་ལ་ཚར་བརྒྱ་དང་བརྒྱད་རབ། རང་གི་ལོ་གྲངས་འབྲིང་། ཐ་མ་ཉེར་ལྔ་བཅུ་གསུམ། བདུན་ནམ། ལྔའམ། ཡང་ཐ་མ་ཚར་གསུམ་བྱ་སྟེ། དེ་ལ་དབྱངས་རོལ་མོ་གལ་ཆེའོ། །འདི་ནི་མ་འོངས་ལྷ་ཐོག་གི་སྡེ་དང་རིགས་རུས་ཐམས་ཅད་ལ་ཕན་བདེ་རྒྱ་ཆེན་པོ་འབྱུང་ཕྱིར་སེམས་བསྐྱེད་བཟང་པོས་བྲིས་པ་ཡིན་པས། དཔེ་འཁྱུད་མི་བྱ་བར་རྒྱ་ཆེར་སྤེལ་བར་བྱའོ། །ཞེས་དཔོན་ཀརྨ་ཚེ་བརྟན་གྱིས་བསྐུལ་ནས་སྔགས་འཆང་བའི་རྣལ་འབྱོར་པ་ཀརྨ་རཱ་ག་ཨ་སྱས་ཨིདྨ་ཁུག་ཏུ་ཡར་ཚེས་བཟང་པོ་ལ་སྔོན་གྱི་ཡིག་རྙིང་ཅི་འདྲ་བ་གབ་འཁྲུགས་གསལ་ཏེ་བཀོད་པ་མངྒ་ལཾ།། །། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།