རི་ཆོས་མཚམས་ཀྱི་ཞལ་གདམས་ལས། ལེའུ་དང་པོ། འཆོལ་བར་འགྲོ་དོགས་ཐེམ་ཡིག་རྩིས་སུ་མནན། །དེ་ལ་ཐེམ་ཡིག་རིན་ཆེན་ཕྲེང་བ་ཡོད།
རི་ཆོས་མཚམས་ཀྱི་ཞལ་གདམས་བཞུགས་པའི་དབུའོ། །
ན་མོ་གུ་རུ་དེ་ཝ་ཌཱ་ཀི་ནཱི་སརྦ་སིདྡྷི་ཧཱུཾ། ཆོས་དབྱིངས་མཁའ་ལ་མཁྱེན་པའི་དཀྱིལ་འཁོར་རྒྱས། །ཐུགས་རྗེའི་འོད་ཟེར་འགྲོ་བའི་མུན་སེལ་བ། །དྲིན་ཆེན་དྷརྨེ་ཤྭ་རའི་ཞབས་ལ་འདུད། །མདོ་ཁམས་བྱང་ཕྱོགས་ངོམ་དུ་རུང་བའི་ཡུལ། །ཆུ་བོ་གསེར་ལྡན་འབབ་པའི་འགྲམ་རོལ་ངོགས། །གནམ་ས་གྲུ་གསུམ་ཕག་མོའི་དཀྱིལ་འཁོར་འདྲ། །རྒྱལ་པོ་གདན་ལ་བཞུགས་འདྲའི་རི་བོའི་ངོས། །སྒྲུབ་གནས་དཔལ་རི་རྩེ་ཡི་མཚམས་ཁང་དུ། །ཤིང་སྦྲུལ་བདུད་རྩི་འཁྱིལ་པའི་ལོ་མཇུག་ནས། །ཅང་ཤེས་རཱ་གའི་མདོག་མཚུངས་ལོ་སྐེད་ཀྱི། །ཟླ་བ་འགའ་ཟུང་
བར་ལ་དུས་རྒྱུན་དུ། །ཕུག་སྒོ་ཆོས་བཤད་བྱས་ནས་ཐུན་རེ་ལ། །ཆོས་ཐུན་དམིགས་ཐུན་རེ་རེ་བཤད་པ་རྣམས། །དད་བརྩོན་ཤེས་རབ་ལྡན་པའི་བརྩོན་འགྲུས་པས། །ཡི་གེར་བྲིས་ལ་རི་ཆོས་གླེགས་བམ་བྱུང་། །ཨེ་མ་ཧོ། དུས་མཐའི་དགེ་སློང་ཀརྨ་ཆགས་མེད་བདག་གཞུང་ལུགས་རྒྱ་ཆེན་འགའ་ལ་མ་བྱུང་ཞིང་། །རྩོམ་གཞི་དཔེ་མང་བསྡུས་ནས་མ་བལྟས་པས། །མཁས་རྣམས་དགྱེས་པའི་རྒྱུད་གཞུང་ལུང་འདྲེན་མེད། །སྒྲ་དང་སྙན་དངགས་ཚིག་རྒྱན་མི་མཁས་ཤིང་། །ལེགས་པར་བསམ་བློ་བཏང་ནས་མ་བྲིས་པས། །མཁས་རྣམས་
མགུ་བའི་ས་བཅད་སྡེབ་སྦྱོར་མེད། །རླུང་རྣམས་དབུ་མར་ཚུད་པར་མ་གྱུར་ཞིང་། །ངག་གི་བདེན་ཚིག་འགྲུབ་པ་མ་ཡིན་ཕྱིར། །གཞན་ཕན་བྱིན་རླབས་འབྱུང་བར་རེ་མི་ཆེ། །འོན་ཀྱང་བླ་མ་ཡི་དམ་དབྱེར་མེད་ལ། །ཡུན་རིང་གསོལ་བ་བཏབ་ཅིང་བསྒྲུབས་པའི་མཐུས། །མདོ་རྒྱུད་གསར་རྙིང་གནད་ཀྱི་མན་ངག་རྣམས། །མེ་ལོང་གཟུགས་བཞིན་ཡིད་ལ་གསལ་སྙམ་བྱེད། །བསླབ་ཅིང་བཟུང་བའི་ཚིག་ཀུན་བརྗེད་ལགས་ཀྱང་། །དོན་རྣམས་ཕལ་ཆེར་ཡིད་ལ་མྱོང་བས་གསལ། །ཁ་ནག་ཡིག་ནག་སྤྱད་པའང་མ་ཡིན་ཞིང་། །ཆོས་བཤད་བློ་འཛིན་བཤར་སྦྱངས་མ་བྱས་ཀྱང་། །བཤད་ན་ཟད་མེད་ཆུ་བོ་འདྲ་སྙམ་བྱེད། །མཁས་པས་མ་ལེགས་གསུངས་ནས་བཀག་སྲིད་ཀྱང་། །རང་འདྲའི་རྨོངས་པ་གཞན་ལ་ཕན་ཡང་སྲིད། ༼ཀ༽ འཆོལ་བར་འགྲོ་དོགས་ཐེམ་ཡིག་རྩིས་སུ་མནན། །དེ་ལ་ཐེམ་ཡིག་རིན་ཆེན་ཕྲེང་བ་ཡོད། །༼ཁ༽ །སྐྱེ་བོ་ཐ་མལ་ཆོས་སྒོར་འཇུག་པའི་ཕྱིར། །རི་ཆོས་གླེང་གཞི་མཐོང་བ་འཛུམ་ཤོར་ཡོད། ༼ག༽ །ངེས་འབྱུང་བསམ་པ་བརྟན་པོ་སྐྱེ་བའི་ཕྱིར། །འཁོར་བའི་ལམ་སྤང་ཤོ་མང་སུལ་འབྱེད་ཡོད། ༼ང༽ །གང་
ཟག་ཐེག་པ་ཆེ་ཆུང་སོ་སོ་ཡི། །ཉམས་ལེན་གསལ་བྱེད་འཕགས་པའི་གཎྜི་ཡོད། ༼ཅ༽ །སྡོམ་གསུམ་རིམ་གྱིས་ཞུས་ནས་སྲུང་བདེའི་ཕྱིར། །སྡོམ་གསུམ་སྲུང་ཚུལ་ཉི་མའི་དཀྱིལ་འཁོར་ཡོད། ༼ཚ༽ །འཁོར་བའི་འཇིགས་པ་ཀུན་ལས་སྐྱོབ་པའི་ཕྱིར། །སྐྱབས་འགྲོའི་ཞལ་གདམས་འཇིགས་པ་ཀུན་སྐྱོབ་ཡོད། ༼ཇ༽ །ཅི་བྱེད་བྱང་ཆུབ་ལམ་དུ་འགྲོ་བའི་ཕྱིར། །སེམས་བསྐྱེད་གདམས་པ་བྱང་ཆུབ་གཞུང་ལམ་ཡོད། ༼ཉ༽ །རང་གཞན་དཀོན་མཆོག་ཐུགས་རྗེས་སྐྱོབ་པའི་ཕྱིར། །ཐུགས་དམ་སྐྱབས་འཇུག་ཐུགས་རྗེའི་བསིལ་གྲིབ་ཡོད། ༼ཏ༽ །ཉམ་ཆུང་ནད་པ་སོགས་ལ་ཕན་པའི་ཕྱིར། །ཐུན་སྐབས་དམིགས་ཐུན་བར་ཆད་ཀུན་སེལ་ཡོད། ༼ཐ༽ །ཚེ་རབས་ལས་ཀྱི་སྡིག་སྒྲིབ་སྦྱོང་བའི་ཕྱིར། །སྒྲིབ་སྦྱོང་ཞལ་གདམས་བདུད་རྩིའི་ཆུ་རྒྱུན་ཡོད། ད༽ །དཀའ་ཚེགས་མེད་པར་བསོད་ནམས་ཚོགས་རྫོགས་ཕྱིར། །མཎྜལ་གདམས་པ་བསོད་ནམས་རི་བོ་ཡོད། ༼ན༽ །བྱིན་རླབས་འཇུག་ཅིང་ཉམས་རྟོགས་འཕེལ་བའི་ཕྱིར། །བླ་མའི་རྣལ་འབྱོར་བྱིན་རླབས་ཆར་རྒྱུན་ཡོད། ༼པ༽ །དང་པོ་ཉམས་རྟོགས་སྐྱེ་ཚུལ་
ཤེས་པའི་ཕྱིར། །མྱོང་བ་ཤུལ་རིང་མགྲོན་པོའི་ལམ་གླུ་ཡོད། ༼ཕ༽ །སངས་རྒྱས་བདེན་པས་བར་ཆད་སྐྱོབ་པའི་ཕྱིར། །བྱམས་པའི་གོ་ཆ་སྙིང་རྗེའི་ཡ་ལད་ཡོད། ༼བ༽ ། རི་ཁྲོད་ས་ཆ་གར་ལེགས་ཤེས་དགོས་ཕྱིར། །ས་དཔྱད་ཉུང་ངུ་རིན་ཆེན་ཀུན་འདུས་ཡོད། ༼མ༽ །བློ་ཆུང་རྨོངས་པས་ཉམས་ལེན་བདེ་བའི་ཕྱིར། །མཚམས་ཀྱི་ཞལ་གདམས་ཐར་ལམ་དཀར་པོ་ཡོད། ༼ཙ༽ །ཚོགས་རྫོགས་ནད་གདོན་ལམ་དུ་སློང་བའི་ཕྱིར། །ལུས་སྦྱིན་བདག་འཛིན་གཅོད་པའི་སྟ་རེ་ཡོད། ༼ཚ༽ །བླ་མ་མཆེད་གྲོགས་སྦྱིན་བདག་ཚེ་བསྲིང་ཕྱིར། །ཚེ་དཔལ་བསྐྱེད་པ་ཚེ་གཡང་ཁ་སྤྲོད་ཡོད། ༼ཛ༽ །ན་སོ་གཞོན་ཞིང་དཀའ་ཐུབ་འདོད་པ་ལ། །བྱ་སྤྱོད་ཉམས་ལེན་ཚངས་པའི་སྒྲ་དབྱངས་ཡོད། ༼ཝ༽།ཆོ་ག་འགྲིགས་ཆགས་ཕྱག་རྒྱ་མཁས་པ་ལ། །རྣལ་འབྱོར་རྒྱུད་སྒྲུབ་ངན་སོང་སྒོ་གཅོད་ཡོད། ༼ཞ༽ །ཚེ་འདས་གཤིན་པོའི་སྒྲིབ་པ་སྦྱོང་བའི་ཕྱིར། །ལྷོ་སྒོའི་དམིགས་རིམ་ཐར་པའི་ལམ་སྟོན་ཡོད། ༼ཝ༽ །བར་དོ་རང་ངོ་འཕྲོད་ནས་གྲོལ་བའི་ཕྱིར། །བར་དོའི་ངོ་སྤྲོད་ཐོས་གྲོལ་བསྡུས་པ་ཡོད། ༼འ༽ །རི་ཁྲོད་ཆོམ་རྐུན་འཚེ་བ་མེད་པའི་ཕྱིར། །མྱ་
ངན་མེད་པའི་ཤིང་གི་བསིལ་གྲིབ་ཡོད། ༼ཡ༽ །དད་ལྡན་འབྱོར་ལྡན་སྒྲིབ་པ་སྦྱོང་བའི་ཕྱིར། །གསོན་བྱང་བཞུ་ཐབས་འབྲེལ་ཚད་དོན་ལྡན་ཡོད། ༼ར༽ །འབྲེལ་ཚད་ཚེ་འདས་དག་པའི་ཞིང་ཐོབ་ཕྱིར། །ཚེ་འདས་གནས་འདྲེན་ཐུགས་རྗེའི་ལྕགས་ཀྱུ་ཡོད། ༼ལ༽ །བསྐྱེད་རིམ་གཙོར་སྟོན་མ་ཧཱ་ཡོ་གའི་ལུགས། །ཡི་དམ་སྤྱི་སྒྲུབ་སྔགས་ཀྱི་འབྲུག་སྒྲ་ཡོད། ༼ཤ༽ །མཆོད་གཏོར་སྒྲུབ་རྫས་ལ་སོགས་འཛོམ་པ་ལ། །ནང་ལྟར་སྒྲུབ་པ་དཔའ་བོའི་རྔམ་སྐད་ཡོད། ༼ས༽ །བསྐྱེད་རིམ་དམིགས་པ་ཤིན་ཏུ་གསལ་བ་ལ། །གསང་སྒྲུབ་ཡེ་ཤེས་མཁའ་འགྲོའི་གདུང་གླུ་ཡོད། ༼ཧ༽ །འབྱོར་པ་ཆུང་ཞིང་སྒྲུབ་ལ་བརྩོན་པ་ལ། །སྦྱིན་སྲེག་ནོར་བུ་སྣ་ཚོགས་མདོག་ཅན་ཡོད། ༼ཨ༽། །ཨ་ནུ་ཡོ་གའི་རྒྱུད་གཞུང་ཉམས་ལེན་ཐབས། །ཡང་གསང་སྒྲུབ་པ་བདེ་ཆེན་རབ་འབར་ཡོད། ༼ཀི༽ །ཨ་ཏི་ཡོ་གའི་རྒྱུད་ཀྱི་ཉམས་ལེན་ཐབས། །དེ་བཞིན་ཉིད་སྒྲུབ་དག་པ་རབ་འབྱམས་ཡོད། ཁི༽ །ཏིང་འཛིན་རྩལ་རྫོགས་སྤྲོས་པར་མི་དགའ་ན། །དྲིལ་སྒྲུབ་ཡིད་བཞིན་ནོར་བུ་བསམ་འཕེལ་ཡོད། ༼གི༽ །རྟེན་འབྲེལ་ལུས་ལ་བསྒྲིག་པར་བྱ་
བའི་ཕྱིར། །འཁྲུལ་འཁོར་རྩ་ཚིག་འཛམ་བུ་ཆུ་གསེར་ཡོད། ༼ངི༽ །རྩ་གསུམ་ལྷ་ཚོགས་འགྲུབ་དང་མ་འགྲུབ་པའི། །ཚོད་འཛིན་རྟགས་ཡིག་འཕྲུལ་གྱི་མེ་ལོང་ཡོད། ༼ཅི༽།བྱང་ཆུབ་སྐྱོན་མེད་ལམ་ལ་འཇུག་པའི་ཕྱིར། །གོལ་ས་གཅོད་པ་མ་ནོར་ལམ་སྟོན་ཡོད། ༼ཆི༽ །ཕྱི་ནང་གསང་བའི་གེགས་སྐྱོན་བསལ་བའི་ཕྱིར། །གེགས་སེལ་གདམས་པ་བདུད་རྩིའི་ཆར་རྒྱུན་ཡོད། ཇི༽ །ཉམས་རྟོགས་ཡར་ངོའི་ཟླ་ལྟར་འཕེལ་བའི་ཕྱིར། །བོགས་འདོན་གདམས་པ་ཡིད་བཞིན་ནོར་བུ་ཡོད། ༼ཉི༽ །ཉོན་མོངས་དུག་ལྔའི་སྒྲིབ་པ་སྤང་བའི་ཕྱིར། །རྒྱབ་ཆོས་དུག་འཇོམ་རྨ་བྱ་ཆེན་མོ་ཡོད། ༼ཏི༽ །སྤྱོད་པ་རྒྱལ་བའི་བཀའ་དང་མཐུན་པའི་ཕྱིར། །སྤྱོད་པའི་གདམས་པ་རྒྱལ་སྲས་ལག་ལེན་ཡོད། ༼ཐི༽ །བསྟན་དང་འགྲོ་བའི་དོན་ཆེན་བསྒྲུབ་པའི་ཕྱིར། །འགྲོ་དོན་གདམས་པ་ཕྲིན་ལས་རྒྱ་མཚོ་ཡོད། ༼དི༽ །ཆོས་པ་རབ་འབྲིང་ཐ་མ་ཡང་ཐ་རྣམས། །འཆི་ལུགས་དཔག་བསམ་ཤིང་གི་འབྲས་བུ་ཡོད། ༼ནི༽ །རང་ཉིད་གར་འགྲོ་གཏད་སོ་ཡོད་པའི་ཕྱིར། །ཞིང་ཁམས་འདམ་པ་དེད་དཔོན་ནོར་ལེན་ཡོད། ༼པ༽ །བསྒོམ་ལོང་མ་བྱུང་
འཆི་བ་བྱུང་བ་ལ། །ཞིང་བགྲོད་རྟ་མཆོག་བ་ལ་ཧ་ཞེས་ཡོད། ༼ཕི༽ །འཆི་དུས་གཞི་ཡི་འོད་གསལ་ངོ་འཕྲོད་ཕྱིར། །ཐུགས་དམ་གསལ་འདེབས་རྒྱལ་པོའི་བཀའ་ཕྲིན་ཡོད། ༼བི༽ །སངས་རྒྱས་བསྟན་པ་དར་ཞིང་རྒྱས་པའི་ཕྱིར། །ཆོས་སྐྱོང་སྤྱི་སྒྲུབ་ཕྲིན་ལས་རླབས་ཕྲེང་ཡོད། ༼མི༽ །ཆོས་སྐྱོང་ཕྲིན་ལས་མྱུར་དུ་འགྲུབ་པའི་ཕྱིར། །བུ་ཡིག་མདེའུ་ཐུང་ཕྲིན་ལས་ཀུན་འགྲུབ་ཡོད། ༼ཙི༽ །སྒྲུབ་པ་ཀུན་ལ་བར་ཆད་མེད་པའི་ཕྱིར། །སྒབ་འདྲེ་མནན་ཐབས་ཧ་ལའི་རི་རབ་ཡོད། ༼ཚི༽ །ཆོས་སྐྱོང་རང་བཞིན་ཤུགས་ལ་འཁོར་བའི་ཕྱིར། །བླ་རྡོ་བརྟེན་རྫས་ཤ་རུལ་སྦྲང་འཁོར་ཡོད། ༼ཛི༽ །བར་ཆད་ཀུན་སེལ་ཅི་བསམ་འགྲུབ་པའི་ཕྱིར། །གཏོར་མའི་ཡིག་སྣ་ལྷ་ཡི་ནོར་བུ་ཡོད། ༼ཝི༽ །གཞུང་དང་མན་ངག་གཉིས་པོ་གབ་འཕྲོད་ཕྱིར། །པཀཱིའི་ཁྱད་ཆོས་མ་མགོན་ཞལ་སྦྱོར་ཡོད། ཞི༽ །དཔལ་འབྱོར་མངའ་ཐང་ཤུགས་ལ་འཕེལ་བའི་ཕྱིར། །རས་ཆེན་ཁྱད་ཆོས་མགོན་པོའི་ནོར་སྒྲུབ་ཡོད། ༼ཟི༽ །རྩ་རླུང་སྒོ་ནས་ཕྲིན་ལས་ཀུན་འགྲུབ་ཕྱིར། །སྙན་བརྒྱུད་ལྷོ་བྲག་མགོན་པོའི་གདམས་ངག་ཡོད། ༼འི༽ །དགེ་རྩ་
འཛད་མེད་གཏེར་དུ་སྦ་བའི་ཕྱིར། །བསྔོ་བའི་ཞལ་གདམས་ནོར་བུ་རིན་ཆེན་ཡོད། ཡི༽ །གསང་སྔགས་མི་འཆལ་བྱིན་རླབས་བཅུད་ལྡན་ཕྱིར། །གཅིག་བརྒྱུད་ཨུ་པ་ཚེས་ཀྱི་གྲངས་ལྡན་ཡོད། །དེ་ལྟར་རི་ཆོས་མཚམས་ཀྱི་ཞལ་གདམས་ལ། །བདེན་ནམ་རྫུན་གྱི་ཐེ་ཚོམ་སྐྱེས་པ་ན། །གསར་རྙིང་བཀའ་གཏེར་རྒྱ་ཆེར་གཟིགས་དང་མངོན། །ཟབ་དང་མི་ཟབ་ཡིད་གཉིས་ཟ་བ་ན། །ལོ་གསུམ་མཚམས་སྡོམས་རྩེ་གཅིག་སྒྲུབ་དང་གསལ། །བརྒྱུད་པ་གང་ཡིན་ཐེ་ཚོམ་ཟ་བ་ན། །ཚིག་གི་བརྒྱུད་པ་རྒྱ་ཆེ་གྲངས་མང་ཡང་། །དོན་གྱི་བརྒྱུད་པ་ཟུང་འཇུག་བརྒྱུད་རིམ་ཡིན། །བླ་མ་གང་ཡིན་ཐེ་ཚོམ་ཟ་བ་ན། །འབྲེལ་ཐོབ་སློབ་དཔོན་སུམ་ཅུ་སོ་གྲངས་ཡང་། །རྩ་བའི་བླ་མ་བྱང་ཕྱོགས་པཎྜི་ཏ། །འཇམ་དབྱངས་བླ་མ་ཆོས་ཀྱི་སྣང་བ་ཅན། །འཇམ་དབྱངས་གསར་དུ་བཞད་པ་ཞེས་བྱ་བ། །ཀུན་མཁྱེན་དྷརྨེ་ཤྭ་ར་ཉིད་ཡིན་ནོ། །ཀྱེ་མ་མཁས་པ་འགའ་ལ་གཏུགས་ན་ཡང་།གཞུང་གི་བཤད་པ་ས་རྒྱ་རི་ནས་བསྐོར། །གནད་ཀྱི་མན་ངག་རྐུན་ནོར་བཞིན་དུ་སྦ། །དོན་རྩ་ཉམས་སུ་ལེན་བྱ་གཏོར་ཉེན་མཆི། །བཙུན་ཚུགས་དྭངས་བ་འདྲེན་ལ་
གཏུགས་ན་ཡང་། །སྟོང་ཉིད་བསྒོམ་པའི་དུས་ནི་ད་ལྟ་མིན། །ཚོགས་བསགས་སྒྲིབ་སྦྱོང་ཁོ་ནར་འབད་དགོས་གསུངས། །ཉམས་ལེན་ཆོས་ཀྱི་སྐལ་བ་ཆད་ཉན་མཆི། །གྲུབ་ཐོབ་བཟང་པོ་འགའ་ལ་གཏུགས་ན་ཡང་། །བཀའ་བཀྱོན་དང་བཅས་གདམས་ངག་བརྡའ་ཙམ་གསུངས། །ཐ་མལ་རྨོངས་པས་བརྡའ་ཡི་དོན་མི་གོ །བླུན་བསྒོམ་གོལ་སའི་ལམ་དུ་འགྲོ་ཉན་ཆེ། །རིག་གནས་མཁས་པ་འགའ་ལ་གཏུགས་ན་ཡང་། །སྒྲ་ཚད་བགྲོ་གླེང་ཐ་སྙད་ཚིག་ལ་བྱམས། །མནཏའ་རྒྱ་མི་ཆོད་ནམ་མཁའ་འདོམ་འཇལ་འདྲ། །འཆི་དུས་སེམས་ལ་གཏད་སོ་མེད་ཉན་མཆི། །དབང་ལུང་ཐོབ་རྒྱ་ཅན་ལ་གཏུགས་ན་ཡང་། །གྲུབ་མཐའ་མང་པོའི་ལུང་ཡིག་པོ་ཏིར་ལངས། །ཕྱག་ལེན་ཞིན་པར་མི་གསུང་སྤོམ་ཡོར་ལུས། །ལག་ཏུ་ལོན་ངེས་གཅིག་ཀྱང་མེད་ཉན་མཆི། །གསར་རྙིང་དཔེ་རྒྱུད་རྒྱ་ཆེར་བལྟས་ན་ཡང་། །དེ་ལེགས་དེ་ལེགས་བསམ་པའི་ངང་ལ་ལུས། །སྒྱུ་དེ་དོན་སྙིང་པོ་རྟོགས་པར་མི་འགྱུར་བས། །ཀློག་མཁན་རྒན་པོ་འདྲ་ཞིག་འོང་ཉན་མཆི། །གདམས་ངག་ཟབ་དགུའི་དཔེ་བུམ་མང་ཡོད་ཀྱང་། །འདི་ཟབ་འདི་ཟབ་སྙམ་ནས་མི་
ལ་བསྐུང་། །ལག་ཁྲིད་མེད་ཕྱིར་གཅིག་ཀྱང་ལག་མི་ལོན། །ཕན་མེད་ཁྲེས་པོ་ལྕི་བའི་རྒྱུ་རུ་མཆིས། །དེ་བས་ཕྱི་རབས་སྒོམ་ཕྲུག་གསར་པ་རྣམས། །གཞུང་གི་དབང་ལུང་ཁྲིད་སོགས་ཐོབ་ཕྱི་ནས། །མན་ངག་ཀུན་འདུས་རི་ཆོས་འདི་ཉིད་ཞུས། །དང་པོའི་ལས་ཅན་ཆོས་སྒོར་ཞུགས་པ་ནས། །ཚེ་གཅིག་སྒྲུབ་པའི་གནད་འགག་འདི་ན་འདུས། །ཉམས་སུ་མི་ལོན་དཔེ་ཚོགས་ཅི་ཞིག་བྱ། །གླེགས་བམ་འདི་ཉིད་སྔས་སུ་བཞག་པ་ན། །སློབ་དཔོན་ཁྲོ་མེད་ཡིན་ནོ་སྐལ་ལྡན་རྣམས། །ཨེ་མ་ཧོ། རི་རབ་རྩེ་ཡི་མཁའ་ལྡིང་ག་རུ་ཊ། །ལུས་པོ་མི་འདྲ་འདབ་གཤོག་བྱ་དང་འདྲ། །བྱ་དང་མི་མིན་རླབས་ཆེན་ཁྱུང་ཆེན་ཡིན། །བར་སྣང་ཁམས་ཀྱི་གཡུ་འབྲུག་སྔོན་པོ་ཁོ། །ལུས་པོ་སྦྲུལ་འདྲ་འཕུར་སྐྱེན་བྱ་དང་འདྲ། །བྱ་མིན་སྦྲུལ་མིན་ངར་ཆེན་གཡུ་འབྲུག་ཡིན། །གངས་དཀར་རྩེ་ཡི་སེང་ལྕམ་དཀར་མོ་ཁོ། །ལུས་ནི་གཅན་གཟན་འདུག་གནས་རི་དྭགས་འདྲ། །གཉིས་ཀ་མ་ཡིན་རྩལ་ཆེན་སེང་གེ་ཡིན། །རི་ཆོས་མཚམས་ཀྱི་ཞལ་གདམས་གླེགས་བམ་འདི། །བཀའ་མའི་ཆོས་འདྲ་གཏེར་མའི་ཆོས་ཀྱང་འདྲ། །སོ་སོ་མ་ཡིན་གཅིག་བསྡུས་ཞལ་ཁྲིད་
ཡིན། །འཁོར་བའི་རྒྱུན་གཅོད་འཁོར་ལོ་རིན་ཆེན་ཡིན། །དགོས་འདོད་ཀུན་འབྱུང་ནོར་བུ་རིན་ཆེན་ཡིན། །བདེ་སྟོང་ཉམས་སྟེར་བཙུན་མོ་རིན་ཆེན་ཡིན། །ཕན་བདེའི་བློ་སྟོན་བློན་པོ་རིན་ཆེན་ཡིན། །སྒྲུབ་བརྒྱུད་ཁུར་ཐེག་གླང་པོ་རིན་ཆེན་ཡིན། །དག་པའི་ཞིང་བགྲོད་རྟ་མཆོག་རིན་ཆེན་ཡིན། །བདུད་བཞིའི་དཔུང་འཇོམས་དམག་དཔོན་རིན་ཆེན་ཡིན། །སྒོམ་ཕྲུག་སྒྲུབ་པའི་རྒྱལ་ས་འཛིན་འདོད་ལ། །མེད་ཐབས་མེད་པའི་ཕ་ནོར་རིན་ཆེན་བདུན། །ཕ་རྒན་ཀརྨ་ཆགས་མེད་བདག་གིས་བཞག །ང་དང་འཕྲད་ཀྱང་འདི་ལས་སྨྲ་རྒྱུ་མེད། །ཡུན་རིང་འགྲོགས་ཀྱང་ཟབ་གནད་སྟོན་རྒྱུ་མེད། །ཤི་ཡང་ཁ་ཆེམས་འདི་ལས་བཞག་རྒྱུ་མེད། །གསར་རྙིང་བཀའ་གཏེར་མན་ངག་བྱེ་བ་ཕྲག །གཅིག་བསྡུས་པོད་ཆུང་བྱེ་བ་རིང་བསྲེལ་ཡིན། །ཧཱུཾ། ཆོས་ཀྱི་སྲུང་མ་མ་ཧཱ་ཀཱ་ལ་ཡ། །མ་རྒྱུད་སྐོར་བཞིའི་རྒྱུད་སྲུང་གྲི་ཐོད་ཅན། །སྒྲུབ་བརྒྱུད་སྒོས་ཀྱི་སྲུང་མ་རྡོ་རྗེ་སྒྱུ་བེར། །སྒྲུབ་བརྒྱུད་སྙིང་པོའི་དོན་བཅུད་རི་ཆོས་འདི། །འཆད་ཉན་སྒོམ་སྒྲུབ་བྱས་པའི་གང་ཟག་རྣམས། །སྲུང་ཞིང་སྐྱོང་བའི་གཉེར་ཁ་ཁྱོད་ལ་གཏད། །སྲུངས་ཤིག་སྐྱོབས་
ཤིག་བཛྲ་རཀྵ་ཧཱུྃ། །བྷྱོ༔ མ་གཅིག་དཔལ་ལྡན་ལྷ་མོ་རང་བྱུང་མ། །སྔོན་ཚེ་བཅོམ་ལྡན་འདས་ཀྱི་སྤྱན་སྔ་རུ། །སྡེ་སྣོད་གསུམ་པོ་འཆད་ཉན་སྒོམ་སྒྲུབ་པོ། །དེ་ལ་སྲུང་སྐྱོབ་བྲན་དང་ཕོ་ཉ་བྱེད། །གལ་ཏེ་མ་བྱས་ལུས་སྲོག་མེ་འབར་ནས། །མནར་མེད་དམྱལ་བར་སྐྱེ་བའི་དམོད་བོར་བའི། །དམ་བཅའ་དམ་ཚིག་གཉེན་པོའི་དུས་ལ་བབས། །སྡེ་སྣོད་གསུམ་གྱི་བཅུད་བསྡུས་རི་ཆོས་འདི། །འཆད་ཉན་ཐོས་སྒོམ་ཉམས་སུ་ལེན་རྣམས་ལ། །སྲུང་སྐྱོབ་སྟོངས་གྲོགས་མེལ་ཚེ་མ་གཡེལ་ཅིག །ཨོ། ལྷ་སྨན་བཀྲ་ཤིས་ཚེ་ཡི་དབང་ཕྱུག་མ། །མ་མོ་རྦོད་གཏོང་དཀྱིལ་འཁོར་ལྷར་བཞུགས་པ། །དཀར་མོ་ཆེན་མོ་ཉི་ཟླའི་ཐོད་ཕྲེང་ཅན། །མིང་པོ་རྒྱལ་པོའི་བཀའ་བསྒྱུར་དབང་མོ་ཆེ། །རི་ཆོས་འདི་ཉིད་ཉམས་ལེན་གང་ཟག་ལ། །རྒྱལ་འགོང་དམ་སྲིའི་བར་ཆད་ཁྱོད་ཀྱིས་ཟློག །སློབ་དཔོན་པདྨས་དམ་བཏགས་དམ་ཚིག་ཅན། །ཚོགས་བདག་ཡུམ་སྟེ་རྡོ་རྗེ་བགེགས་ཀྱི་གཙོ། །རི་ཆོས་འཚད་དང་ཉན་དང་ཉམས་ལེན་ལ། །བགེགས་རིགས་སྟོང་ཕྲག་བརྒྱད་ཅུའི་འཚེ་བ་བཟློག །བཞད་པ་རྡོ་རྗེའི་གསང་ཡུམ་ཚེ་རིང་མ། །སྒྲུབ་བརྒྱུད་བསྟན་པ་སྤེལ་བའི་
གཡོར་དམ་ཅན། །སྒྲུབ་བརྒྱུད་སྙིང་པོའི་བཅུད་བསྡུས་རི་ཆོས་འདི། །གངྒཱའི་རྒྱུན་བཞིན་ཡུན་རིང་འཕེལ་རྒྱས་མཛོད། །ཏྲི། སྐྱེས་མཆོག་བཛྲ་སཱ་དྷུ་ས་མཱ་ཡ། །སྔགས་ཀྱི་སྲུང་མ་རྡོ་རྗེ་ལེགས་པ་སྐྱོང་། །སྡེ་བརྒྱད་ཀུན་གྱི་སྣ་འདྲེན་རྣོ་མྱུར་ཅན། །རི་ཆོས་ཐེམས་མེད་སྐོར་གྱི་བཀའ་འདི་སྲུངས། །སྣོད་མིན་ལག་ཏུ་མ་འཆལ་བྱ་ར་མཛོད། །གཅིག་བརྒྱུད་གདམས་པས་སྐལ་ལྡན་སྨིན་གྲོལ་བའི། །བྱིན་རླབས་བརྒྱུད་པ་གསེར་གྱི་ཕྲེང་བ་བཞིན། །བསྟན་པ་ཇི་སྲིད་བར་གནས་མི་འཆད་མཛོད། །ཧཱུཾ་ཧཱུཾ་ཧཱུྃ། མ་མགོན་སྐྱེས་བུ་ལྷ་སྨན་ཚེ་རིང་མ། །སྙན་གྱིས་གསོན་ལ་མངོན་ཤེས་ཐུགས་ཀྱིས་དགོངས། །རྡོ་རྗེ་འཆང་དབང་རྟ་མཆོག་གསང་བའི་བདག །པདྨ་འབྱུང་གནས་པཀཱི་རང་བྱུང་རྗེ། །ནམ་མཁའ་རྒྱལ་མཚན་ལ་སོགས་སྤྱན་སྔ་རུ། །གསང་སྔགས་ཆོས་ཀྱི་བཀའ་སྲུང་བྱེད་པ་དང་། །སྒྲུབ་པ་བྱེད་པའི་གང་ཟག་ཐམས་ཅད་ལ། །བུ་སྡུག་བཞིན་དུ་སྐྱོང་བར་དམ་བཅས་པའི། །ཐུགས་དམ་ཐ་ཚིག་གཉན་པོ་རྗེས་དགོངས་ལ། །དམ་ཆོས་ཀུན་གྱི་བཅུད་བསྡུས་རི་ཆོས་དང་། །འདི་ཉིད་འཆད་དང་ཉན་དང་ཉམས་ལེན་པ། །
ཀུན་ལ་བུ་བཞིན་སྐྱོངས་ཤིག་ས་མ་ཡ། །དེ་ལྟར་བརྩམས་མཁན་ཀརྨ་ཨ་རཱ་ག །བདག་ནི་སོ་སྐྱེའི་དབང་གྱུར་མི་ཤེས་པས། །དོན་ལོག་དོན་འགལ་སྦ་འོས་གསལ་བཀོད་སོགས། །འདི་བརྩམས་ལས་གྱུར་ཉེས་པ་གང་མཆིས་རྣམས། །མཁས་གྲུབ་ཆོས་ཀྱི་སྤྱན་ལྡན་ཐམས་ཅད་དང་། །རྩ་གསུམ་ཆོས་བདག་སྲུང་མ་རྣམས་ལ་བཤགས། །ཚེ་འདིའི་བར་ཆད་རྐྱེན་དུ་མི་འགྱུར་ཞིང་། །ཡུན་གྱི་སྒྲིབ་པར་ཡང་ནི་མ་གྱུར་ཅིག །རྩོམ་པའི་སློབ་དཔོན་ཀརྨ་ཆགས་མེད་དང་། །ཞུ་ཞིང་འབྲི་བའི་ངལ་བ་དང་ལེན་པ། །སློབ་བུ་རུ་པ་བརྩོན་འགྲུས་རྒྱ་མཚོ་དང་། །དེ་དག་གཉིས་ལ་འབྲེལ་ཐོགས་འགྲོ་བ་དང་། །ཆོས་འདི་མཐོང་ཐོས་འབྲེལ་ཐོགས་འགྲོ་བ་རྣམས། །ཚེ་འདིར་ཚེ་རིང་ནད་མེད་ཉམས་རྟོགས་འཕེལ། །ནམ་ཞིག་འཕོས་ཚེ་སྐྱེ་བ་གཞན་དག་གིས། །བར་མ་ཆོད་པར་བདེ་ཆེན་ཞིང་ཁམས་སུ། །བརྫུས་ཏེ་སྐྱེས་ནས་རིགས་བདག་ཞལ་མཐོང་ཞིང་། །བླ་མེད་རྫོགས་པའི་བྱང་ཆུབ་མ་ཐོབ་བར། །དཔོན་སློབ་མཆེད་གྲོགས་ཐམས་ཅད་མི་འབྲལ་བར། །བྱང་ཆུབ་སྤྱོད་པ་རླབས་ཆེན་སྤྱོད་པར་ཤོག །མདོར་ན་བདག་དང་སློབ་མ་བརྒྱུད་
པར་བཅས། །རི་ཆོས་འདི་ལ་འབྲེལ་པ་ཐོགས་ཚད་ཀུན། །སྐྱེ་བ་འདི་ནས་ཚེ་རབས་ཐམས་ཅད་དུ། །སྐུ་ཚེ་རྫུ་འཕྲུལ་པད་འབྱུང་ལྟ་བུར་ཤོག །སྤྱན་རས་གཟིགས་དང་འགྲོ་དོན་མཉམ་པར་ཤོག །འཇམ་པའི་དབྱངས་དང་མཁྱེན་རབ་མཉམ་པར་ཤོག །གསང་བའི་བདག་དང་མཐུ་སྟོབས་མཉམ་པར་ཤོག །རི་ཆོས་འདི་ལ་འབྲེལ་པ་ཐོགས་ཚད་རྣམས། །རང་སེམས་ཆོས་སྐུ་མངོན་སུམ་རྟོགས་པ་ཡི། །བཀའ་བརྒྱུད་བླ་མའི་བཀྲ་ཤིས་འབྱུང་བར་ཤོག །རང་ལུས་དཀྱིལ་འཁོར་མངོན་སུམ་གསལ་བ་ཡི། །ཡི་དམ་ལྷ་ཡི་བཀྲ་ཤིས་འབྱུང་བར་ཤོག །བཙུན་ཚུགས་ཉེ་བར་འཁོར་དང་མཉམ་པ་ཡི། །གནས་བརྟན་བཅུ་དྲུག་བཀྲ་ཤིས་འབྱུང་བར་ཤོག །ཕྲིན་ལས་ལྷུན་གྲུབ་བསྟན་པ་མཐའ་ཡས་པའི། །མ་མགོན་ལྕམ་དྲལ་བཀྲ་ཤིས་འབྱུང་བར་ཤོག །ཆོས་བརྒྱུད་ཆུ་བོའི་རྒྱུན་བཞིན་རིང་བ་ཡི། །ཚེ་རིང་མཆེད་ལྔའི་བཀྲ་ཤིས་འབྱུང་བར་ཤོག །མྱུར་ལྕེ་མགྱོགས་ཕྲིན་ལས་གློག་ལྟར་འཁྱུགས་པ་ཡི། །སྐྱེས་བུ་ཆེན་པོའི་བཀྲ་ཤིས་འབྱུང་བར་ཤོག །མངྒ་ལཾ་སིདྡྷི་ཛཱ་ཡ་ཨ་ལ་ལ་ཧོ། །ཅེས་བྱ་བ་འདི་ནི་ངོམ་དུ་རུང་བའི་ཡུལ་སྟོད་
གནས་ཆེན་རྡོ་རྗེའི་སྐྱེད་ཚལ་དཔལ་རི་རྩེ་ཡི་སྒྲུབ་ཁང་དུ། སྙིགས་དུས་ཀྱི་དགེ་སློང་སུམ་ལྡན་རྡོ་རྗེ་འཛིན་པ་ཀརྨ་ཨ་རཱ་ག་ཞེས་བྱ་བ་ཚེ་མཚམས་ཀྱི་དམ་བཅའ་ལ་གནས་པའི་སྐབས་སུ། བླ་མ་རུ་པ་བརྩོན་འགྲུས་རྒྱ་མཚོ་ཞེས་བྱ་བ་ཕུག་སྒོར་ཡང་ཡང་སླེབ་ཅིང་ཞུས་ལན་གྱི་ཚུལ་དུ། ཞུ་བ་པོ་ཉིད་ཀྱིས་ཡི་གེ་པ་བྱས་ཏེ། དཔལ་ཆེན་རྟ་མགྲིན་དམར་པོ་མཚོན་པའི་མེ་ཕོ་རྟའི་ལོ་ཁྲུམས་ཟླའི་ཉེར་གཉིས་ནས་འཕྲོ་མཐུད་དེ། ཡུམ་ཆེན་ཕག་མོ་དམར་མོ་མཚོན་པའི་མེ་ཕོ་ཕག་གི་ཟླ་བ། ལྷ་ལྔ་མཚོན་པའི་ཡར་ཚེས་ལྔའི་སྔ་དྲོ་རི་ཆོས་ཀྱི་གླེགས་བམ་ཡོངས་སུ་རྫོགས་པར་གྲུབ་པའོ། །ཐེམ་ཡིག་ལེའུ་དང་པོའོ། །མངྒ་ལཾ།། །།