ལེའུ་གསུམ་པ། ངེས་འབྱུང་བསམ་པ་བརྟན་པོ་སྐྱེ་བའི་ཕྱིར། །འཁོར་བའི་ལམ་སྤང་ཤོ་མང་སུལ་འབྱེད་ཡོད། །
༼ག༽ རི་ཆོས་མཚམས་ཀྱི་ཞལ་གདམས་ལས། འཇིག་རྟེན་འཁོར་བའི་ལམ་སྤང་བའི་ཚུལ་ཤོ་མང་གི་སུལ་འབྱེད་ཅེས་བྱ་བ་བཞུགས་སོ། །ན་མོ་གུ་རུ་ཤཱཀྱ་མུ་ན་ཡེ། །བླ་མ་བརྩོན་འགྲུས་རྒྱ་མཚོ་གསོན་མཛོད་དང་། །རི་ཁྲོད་འགྲིམ་ཞིང་ཉམས་ལེན་སྐྱོང་བ་ལ། །བླ་མེད་བྱང་ཆུབ་ལམ་ལ་འཇུག་དགོས་ཏེ། །ལམ་གྱི་རྣམ་གྲངས་ཕྱོགས་ཙམ་མ་ཤེས་ན། །རང་ཉིད་གར་འགྲོའི་ལམ་ངོ་མི་ཤེས་པས། །ཞིབ་པར་བརྗོད་ན་གྲངས་ཀྱིས་མི་ལངས་ཀྱང་། །ཕྱོགས་འགོ་ཙམ་ཞིག་ཅིས་ཀྱང་ཤེས་དགོས་གདའ། །དེ་ལ་ལམ་མ་རྙེད་དང་ལམ་ལོག་དང་། །ལམ་གོལ་དམན་པའི་ལམ་རྣམས་སྤང་བྱ་ཡིན། །འཛམ་གླིང་རྔ་ཡབ་གླིང་གཉིས་མ་གཏོགས་པ། །གླིང་ཆེན་གླིང་ཕྲན་གཞན་ལ་ཆོས་མི་དར། །འཛམ་གླིང་ཡུལ་ཆེན་
དགུ་བཅུ་གོ་དགུ་ལས། །ཡུལ་ཆེན་ཉི་ཤུ་རྩ་བཞིར་ཆོས་དར་ཏེ། །དེ་མིན་མཐའ་འཁོབ་བརྒྱ་དང་རྩ་བརྒྱད་དང་། །ཡང་འཁོབ་སྟོང་རྩ་རྣམས་སུ་དམ་ཆོས་མེད། །ཡུལ་ཆེན་གཞན་ལའང་དེང་སང་དམ་ཆོས་ནུབ། །སྤྱན་རས་གཟིགས་ཀྱི་ཐུགས་རྗེའི་ཕྲིན་ལས་ཀྱིས། །སྙིགས་མའི་དུས་འདིར་བོད་དུ་དམ་ཆོས་རྒྱས། །རང་རེ་བོད་དུ་སྐྱེས་འདི་བསོད་ནམས་བསགས། །སྤྱིར་གྱི་གྲུབ་མཐའ་རྣམ་པ་སྣ་ཚོགས་པ། །སྤྱན་རས་གཟིགས་སོགས་སངས་རྒྱས་བྱང་སེམས་ཀྱིས། །གདུལ་བྱའི་བློ་ཚོད་འཚམ་པར་གསུངས་པ་སྟེ། །དེ་ཕྱིར་མུ་སྟེགས་ལ་སོགས་སྨད་མི་རུང་། །སངས་རྒྱས་སྲིད་ཕྱིར་བདུད་ཀྱང་སྲིད་པ་དང་། །དག་པའི་ཞིང་ཁམས་སྲིད་ཕྱིར་དམྱལ་བའང་སྲིད། །བདེ་འགྲོ་སྲིད་ཕྱིར་ངན་འགྲོ་སྲིད་པ་དང་། །ཉིན་མོ་སྲིད་ཕྱིར་མཚན་མོ་སྲིད་པ་དང་། །ཆོས་ལུགས་རྣམ་དག་སྲིད་ཕྱིར་ཆོས་ལོག་སྲིད། །གཏེར་སྟོན་སྲིད་ཕྱིར་གཏེར་རྫུན་གཏེར་ལོག་སྲིད། །ལྟ་བ་རྣམ་དག་སྲིད་ཕྱིར་ལྟ་ལོག་སྲིད། །སྡོམ་ལྡན་དམ་གཙང་སྲིད་ཕྱིར་དམ་ཉམས་སྲིད། །འདི་དག་རྟེན་འབྲེལ་ལྟོས་གཞག་ཆོས་ཉིད་དེ། །ངོན་པ་མེད་ན་བཟང་པོ་
མི་འབྱུང་ཕྱིར། །གྲུབ་མཐའ་ལོག་པ་རྣམས་ལའང་གཤེ་མི་རུང་། །ཤེས་པར་བྱ་ལ་དེ་རུ་འཇུག་མི་བྱ། །དེ་ཕྱིར་རྒྱ་གར་པཎྜི་ཏ་རྣམས་ཀྱིས། །མུ་སྟེགས་གཞུང་རྣམས་བསླབས་ནས་མཁས་པར་སྦྱངས། །ལོག་པའི་ལམ་དེ་ཕྱོགས་འགོ་མ་ཤེས་ན། །མུན་ནག་ནང་དུ་མ་མཐོང་གཡང་ས་བཞིན། །རང་ཉིད་དེ་རུ་ལྟུང་ཉན་ཆེ་བ་ཡིན། །རྒྱ་གར་ཡུལ་དུ་ཕྱི་པ་ནང་པ་ཟེར། །རྒྱ་ནག་ཡུལ་དུ་ཧྭ་ཤང་ཧོ་ཤང་ཟེར། །བོད་ཀྱི་ཡུལ་དུ་བན་དང་བོན་དུ་གྲགས། །དེ་དག་རྣམས་ཀྱང་ལྟོས་གཞག་རྟེན་འབྲེལ་ལགས། །སྡང་སེམས་མི་འཛིན་རྟེན་འབྲེལ་མཚར་པོར་བལྟ། །སློབ་དཔོན་ཆེན་པོ་པདྨ་འབྱུང་གནས་ཀྱིས། །བརྟན་མ་བཅུ་གཉིས་ལ་ནི་བཀའ་བསྒོས་པས། །མུ་སྟེགས་དངོས་ནི་བོད་འདིར་འོང་ས་མེད། །འོན་ཀྱང་སྔོན་གྱི་ལས་སྒྲིབ་ཆེ་བ་དེས། །མཐའ་འཁོབ་མིན་ཀྱང་མཐའ་འཁོབ་འདྲ་བ་དང་། །མུ་སྟེགས་མིན་ཀྱང་མུ་སྟེགས་འདྲ་ཉན་གདའ། །བོན་པོ་མིན་ཀྱང་བོན་དང་འདྲ་ཉན་གདའ། །ཧྭ་ཤང་མིན་ཀྱང་ཧྭ་ཤང་འདྲ་ཉན་གདའ། །ཀྱེ་མ་ད་རེས་མི་ལུས་ཐོབ་པ་འདི། །ཚེ་སྔོན་གང་ནས་འོངས་ཀྱང་མི་ཤེས་ལ། །ད་རེས་འདུག་ལོང་ཅི་ཙམ་ཡོད་མི་
ཤེས། །ཕྱི་མ་གར་འགྲོའི་གཏད་སོ་མེད་བཞིན་དུ། །འཆི་བ་མི་དྲན་དགྲ་འདུལ་གཉེན་སྐྱོང་དང་། །ཟས་ནོར་བསག་འདོད་ཁོ་ནའི་དོན་གྱི་ཕྱིར། །མི་དགེ་མི་་རུང་མཚམས་མེད་སྣ་ཚོགས་བྱེད། །དེ་ནི་མཐའ་འཁོབ་མི་དང་ཁྱད་པར་ཅི། །མཐའ་འཁོབ་ལ་ཡང་དེ་བས་ཐུ་བ་མེད། །ལ་ཆེན་བྱེད་སྤྱོད་དེ་དང་འདྲ་བ་ལས། །ཕྱི་མ་མི་དྲན་ད་ལྟའི་རྐྱེན་ཟློག་ལ། །བན་བོན་མོ་མ་གཏོ་པ་གང་རྙེད་བརྟེན། །བན་བཟང་བོན་བཟང་ཁྱད་པར་མེད་དོ་ཟེར། །གངས་ཅན་བོད་དུ་སྐྱེས་པའི་བྱིན་རླབས་ཀྱིས། །ཡི་གེ་དྲུག་པ་ཁ་ཐོན་བྱེད་ན་ཡང་། །དབང་མེད་ལུང་མེད་བསྒོམ་བྱའི་དམིགས་པ་མེད། །སྔགས་སྒྲ་འབྲུ་མེད་རྟ་ཡི་ཡིག་དྲུག་འདྲ། །དེ་དག་འཇིག་རྟེན་སྐྱེ་བོ་ཕལ་པ་སྟེ། །ལམ་མ་རྙེད་དང་ལམ་མ་ཞུགས་པ་ཟེར། །ལམ་ལོག་མུ་སྟེགས་པ་ལའང་རིགས་མང་སྟེ། །ཞིབ་པར་ལྟ་ལོག་སུམ་བརྒྱ་དྲུག་ཅུ་གསུངས། །བསྡུ་ན་མུ་བཞིའམ་ནི་རྟག་ཆད་གཉིས། །མུ་སྟེགས་ནག་པོ་ཆད་པར་ལྟ་བ་སྟེ། །སྔོན་དུས་མུ་སྟེགས་པཎ་ཆེན་མཁས་པ་ཞིག །སྲིང་མོ་མཛེས་མ་སྤྱོད་འདོད་མ་ཉན་པས། །དེ་མགོ་བསྐོར་ཕྱིར་ལོག་པའི་བསྟན་བཅོས་
བརྩམས། །དེ་ཡི་རྗེས་འཇུག་མུ་སྟེགས་ཆད་ལྟ་སྟེ། །མཛེས་མ་མ་ཤི་བར་དུ་ཅི་དགར་སྤྱོད། །ཤི་ནས་དེ་ཡི་སྤྱོད་ཡུལ་མིན། །ལུས་ནི་ཐལ་བ་ལྟར་སོང་བས། །སེམས་ནི་ནམ་མཁའི་བག་ལ་ཞ། །སླར་སྐྱེ་བ་དག་ག་ལ་ཡོད། །ཀྱེ་མ་མང་ཐོས་གོང་སྨྲས་པ། །གཡོན་ཅན་སྤྱང་ཀིའི་རྗེས་དང་མཚུངས། །ཞེས་བཤད་མི་ཤི་ཡུ་མེད་ཡིན་པར་འདོད། །སངས་རྒྱས་མི་བདེན་རྒྱུ་འབྲས་མི་བདེན་ཟེར། །ཚེ་འདིའི་སྐྱིད་སྡུག་དབང་ཕྱུག་ཆེན་པོས་བྱེད། །དེ་ཕྱིར་དབང་ཕྱུག་སྙིང་ཁྲག་དྲོན་མོས་མཆོད། །རྫས་ངན་དུག་སྦྱོར་མང་པོས་དགྲ་རྣམས་བརླག །སེམས་ལ་དུག་ལྔ་འཇོལ་ཉོག་ཅི་དགར་སྤྱོད། །དེ་ནི་མུ་སྟེགས་ནག་པོའི་ཆོས་ལུགས་ཡིན། །དེ་དང་ཆ་མཐུན་དེང་སང་འདི་ན་ཡང་། །སྟེང་ནི་ནམ་མཁའ་སྟོང་པ་ཡིན་པ་དང་། །འོག་ནི་ས་ཚོང་རྡོ་ཚོང་ཡིན་འདུག་པས། །དམྱལ་བ་གར་ཡོད་འཁྲུལ་སྣང་ཙམ་ཡིན་ཟེར། །སྡིག་པའི་ཉེས་དམིགས་ངན་སོང་སྡུག་བསྔལ་ཀུན། །ཇི་ལྟར་བཤད་ཀྱང་བདེན་པར་མི་འཛིན་པར། །དེ་ཚོ་ཤེས་ཚོད་བཤད་ཚོད་ཙམ་ཡིན་ཟེར། །གཟུངས་སོགས་དགེ་བའི་ཕན་ཡོན་ཅི་ཐོས་ཀྱང་། །དེ་ལྟར་ཕན་ན་མང་པོ་ཅི་དགོས་
ཟེར། །སངས་རྒྱས་བྱང་སེམས་བཀའ་བརྒྱུད་བླ་མ་ཡི། །རྣམ་ཐར་ཡོན་ཏན་ངོ་མཚར་ཅི་ཐོས་ཀྱང་། །དེ་ཙམ་མི་བདེན་བསྟོད་པ་ཙམ་ཡིན་ཟེར། །དེ་ཚོ་མུ་སྟེགས་ཆད་ལྟ་ཆ་མཐུན་ཏེ། །ཚེ་སྔོན་སྒྲིབ་པ་ཆེ་བའི་ལས་ངན་གྱིས། །ལྟ་བ་ལོག་པ་འཛིན་པར་འགྱུར་བ་ཡིན།། །དེ་བཞིན་མུ་སྟེགས་རྟག་ལྟའི་རིགས་རྣམས་ཀྱིས། །ཕྱི་མ་སྐྱེ་བ་ལེན་རྒྱུ་ཡོད་ལགས་ཏེ། །དགེ་སྡིག་དབང་གིས་མཐོ་དམན་མ་ཡིན་ཏེ། །སྲིད་པའི་བདག་པོ་དབང་ཕྱུག་ཆེན་པོ་ནི། །མཉེས་ན་མཐོ་རིས་མ་དགའ་ངན་སོང་སྐྱུར། །ལྷ་ཆེན་རྒྱུ། དབང་ཕྱུག་འགྲུབ་པར་གྱུར་ན་ནི། །།འཇིག་རྟེན་འདི་ཡི་སྟེང་ཕྱོགས་ནམ་མཁའ་ལ། །གདུགས་ནི་དཀར་པོ་གྱེན་བཀན་འདྲ་བ་ཡི། །ཐར་པའི་ཞིང་ཁམས་དེ་ན་སྐྱེལ་བའི་ཕྱིར། །དབང་ཕྱུག་བསྒྲུབ་ཅིང་མཆོད་པ་བྱ་དགོས་ཏེ། །དེ་ཡང་སྙིང་དང་སྙིང་ཁྲག་དྲོན་མོར་མཉེས། །དེ་ཕྱིར་མི་དང་མ་ཧེ་ར་ལུག་སོགས། །ལྔ་བརྒྱའམ་ནི་སྟོང་ཕྲག་གསོད་ནས་ཀླུ་མཆོད། །དེ་དང་ཆ་མཐུན་བོད་ཡུལ་འདི་ན་ཡང་། །སྲོག་བཅད་འབྲས་བུས་ཚེ་ཐུང་དམྱལ་བར་ལྟུང་། །གསུངས་པའི་རྒྱུ་འབྲས་དོན་ལ་བློ་མི་གཏོད། །གསོན་པོའི་རིམ་གྲོ་
གཤིན་པོའི་དགེ་རྩ་ལ། །བསྔོས་ཤ་མང་པོ་བྱེད་པའང་མུ་སྟེགས་འདྲ། །མུ་སྟེགས་ལ་ལས་སྔར་བྱས་སྡིག་པ་རྣམས། །མི་ཡི་ཟས་གོས་སྤངས་ན་དག་པར་འདོད། །མི་ཟས་གཅོད་ནས་ཆུ་དང་བ་རྙི་ཟ། །གོས་སྤང་ཐལ་བ་བྱུགས་ནས་གཅེར་བུ་བྱེད། །དེ་བཞིན་ལོངས་སྤྱོད་ཡོད་ཀྱང་དཀའ་ཐུབ་དང་། །དཀའ་ཐུབ་ཆུ་འཐུང་དེ་ཡི་ཕྱོགས་ལ་ཉེ། །མུ་སྟེགས་ཚངས་པའི་རྗེས་འབྲངས་བྲམ་ཟེའི་རིགས། །དཀོན་མཆོག་གསུམ་ལ་སྐྱབས་སུ་མི་འཛིན་པར། །ལྷ་ཆེན་ཚངས་པ་གདོང་བཞི་སྐྱབས་སུ་འཛིན། །མི་དགེ་བཅུ་སྤངས་ཚངས་པ་མཆོད་ཅིང་སྒྲུབ། །ལེགས་པར་སྦྱར་བ་ཚངས་པ་ལྷ་ཡི་སྐད། །ཕན་ཡོན་ཆེ་ཟེར་སྒྲ་དང་སྙན་དངགས་སློབ། །གཟུགས་ཁམས་ཚངས་པའི་གནས་སྐྱེའི་སྨོན་ལམ་འདེབས། །དེ་དང་ཆ་མཐུན་བོད་ཡུལ་འདི་ན་ཡང་། །དཀོན་མཆོག་གསུམ་ལ་སྐྱབས་སུ་མི་འཛིན་པར། །གཙང་གི་གཞི་བདག་ལྷ་རྒོད་ཐོགས་པ་དང་། །མངའ་རིས་གཞི་བདག་ནག་མོ་སྟག་རི་རོང་། །ལྷ་ཡི་འདྲེ་ལྔ་གཤེན་ལྷ་འོད་དཀར་སོགས། །འཇིག་རྟེན་ལྷ་འདྲེ་མཐུ་ཆེན་སྐྱབས་སུ་འཛིན། །མི་དགེ་བཅུ་སྤངས་དགེ་བ་བཅུ་སྤྱོད་ཅིང་། །
གསེར་གྱི་ཉི་མ་དུང་གི་ཟླ་བ་ཤར། །ཆོས་ནུབ་དབུས་ནུབ་བོན་དར་མཐའ་ནས་དར། །འོལ་མོ་ལུང་རིང་སྐྱེ་བའི་སྨོན་ལམ་འདེབས། །མུ་སྟེགས་བྲམ་ཟེའི་རིགས་དང་ཆ་མཐུན་ཡིན། །དེ་ལྟར་མིན་པར་བེ་རོ་ཙ་ན་ཡིས། །རྒྱལ་པོ་དགའ་ཕྱིར་དམ་པའི་ཆོས་བསྒྱུར་ཏེ། །བློན་པོའི་ངོ་བསྲུང་བོན་ཡང་བསྒྱུར་དགོས་བྱུང་། །དེ་དུས་ཆོས་ལ་བོན་མིང་བཏགས་པ་ཡི། །མང་པོ་གཏེར་དུ་སྦས་ནས་ཐོན་པ་རྣམས། །རྙིང་མའི་ཆོས་དང་ཁྱད་མེད་ལེགས་པའང་ཡོད། །དེ་ལ་བོན་གྱི་རིག་འཛིན་སྒྲུབ་པ་ཟེར། །དེ་སོགས་བན་མ་བོན་ཡང་མང་དུ་བཤད། །རྒྱ་ནག་ཧྭ་ཤང་ཆོས་ཕུགས་ངན་པའང་མིན། །ཉན་ཐོས་འོད་སྲུང་ཆེན་པོའི་ཆོས་བརྒྱུད་ལགས། །འོན་ཀྱང་ཞི་གནས་གཙོ་ཆེ་ལྷག་མཐོང་མེད། །དགེ་བས་མཐོ་རིས་སྡིག་པས་ངན་སོང་ལྟུང་། །མཐོ་རིས་ངན་སོང་གཉིས་ཀ་འཁོར་བ་ཡིན། །དེ་ཕྱིར་དགེ་བ་སྡིག་པ་གཉིས་ཀ་སྤངས། །སེམས་ལ་རྣམ་རྟོག་འགྱུ་བ་འཁྲུལ་པ་ཡིན། །ཡིད་ལ་དྲན་པ་མེད་ན་སྒོམ་དུ་འདོད། །དེ་དང་ཆ་མཐུན་དེང་སང་ཁྲིད་གྲར་ཡང་། །ཚོགས་བརྒྱད་འགགས་པའི་ཞི་གནས་འཐོམ་པོར་སོང་། །
ལངས་རྒྱུ་མི་རྙེད་བོས་ཀྱང་མི་གོ་བ། །སྒོམ་ནི་སྐྱེ་བའི་སྔ་ལྟས་ཡིན་མོད་ཀྱི། །དེ་ཉིད་སྒོམ་དུ་བཟུང་ན་ཧྭ་ཤང་ལུགས། །དེ་བཞིན་དེང་སང་སྒོམ་ཆེན་ལ་ལ་ཞིག །འགྱུ་བ་མང་པོ་འཕྲོ་ལ་ཡིད་མི་དགའ། །དྲན་མེད་ས་ལེ་གནས་ལ་འདོད་པ་ཆེ། །དེ་ཡང་ཧྭ་ཤང་ལུགས་ལ་ཉེ་བ་ཡིན། །ཐ་མལ་སྐྱེ་བོ་བོན་དང་མུ་སྟེགས་རྣམས། །སྲོག་གཅོད་སྤངས་དང་མ་བྱིན་ལེན་སྤངས་དང་། །མི་ཚངས་སྤྱོད་སྤངས་རྫུན་སྨྲ་སྤངས་པ་དང་། །དེ་བཞིན་སྦྱིན་པ་རྒྱ་ཆེན་བཏང་ལ་སོགས། །དགེ་བའི་རྩ་བ་རྒྱ་ཆེན་ཅི་བྱས་ཀྱང་། །བྱང་ཆུབ་ཐོབ་པའི་རྒྱུར་ནི་སྨོས་ཅི་དགོས། །ཐར་པ་ཐོབ་པའི་རྒྱུར་ཡང་མི་འགྱུར་ཏེ། །འཇིག་རྟེན་ལྷ་དང་མི་ཡི་བདེ་སྐྱིད་ལ། །སྐྱེ་བ་བརྒྱ་སྟོང་མང་པོ་སྤྱོད་འགྱུར་ཏེ། །དགེ་རྩ་ཟད་ནས་སླར་ཡང་ངན་སོང་ལྟུང་། །དེ་ཕྱིར་དཀོན་མཆོག་གསུམ་ལ་སྐྱབས་མ་ཞུས། །ངེས་འབྱུང་བསམ་པ་བརྟན་པོས་མ་ཟིན་པའི། །དགེ་བའི་རྩ་བ་རྒྱ་ཆེན་ཅི་སྤྱད་ཀྱང་། །ཐར་པ་ཆ་མཐུན་དགེ་བ་ཞེས་བྱའམ། །བར་མིའི་དགེ་བ་ཞེས་ཀྱང་བྱ་བ་སྟེ། །འཁོར་བ་འདི་ནས་ཐར་པར་མི་འགྱུར་བས། །སྐྱབས་འགྲོ་སེམས་བསྐྱེད་འདི་ལ་གནད་ཆེན་ཡོད། །
དཀོན་མཆོག་གསུམ་ལ་སྙིང་ནས་བློ་གཏད་དང་། །སེམས་བསྐྱེད་བརྟན་པོ་མཛོད་ཅིག་བརྩོན་འགྲུས་བ། །དེ་སྐད་དགེ་སློང་རཱ་ག་ཨ་སྱ་ཡིས། །རྟ་ལོ་རྒྱལ་ཟླའི་། ཚེས་དགུའི་དགོང་ཐུན་ལ། །བན་རྒན་བཅོས་གཏམ་མགུར་གྱི་ཚུལ་དུ་སྨྲས། །ལམ་མ་ཞུགས་དང་ལམ་ལོག་དམན་པའི་ལམ། །འཇིག་རྟེན་འཁོར་བའི་ལམ་ཀུན་སྤོངས་མཛོད་ལ། །བྱང་ཆུབ་སྐྱོན་མེད་ལམ་དེར་གཤེགས་པར་རིགས། །ཡི་གེ་པའང་བིརྱ་སཱ་ག་ར། །ལེའུ་གསུམ་པ་མངྒ་ལཾ།། །།