ལེའུ་བཞི་པ། གང་ཟག་ཐེག་པ་ཆེ་ཆུང་སོ་སོ་ཡི། །ཉམས་ལེན་གསལ་བྱེད་འཕགས་པའི་གཎྜི་ཡོད། །
༼ང༽ རི་ཆོས་མཚམས་ཀྱི་ཞལ་གདམས་ཀྱི་གཞུང་དང་པོ་ཐེག་པ་ཆེ་ཆུང་གི་ཉམས་ལེན་འཕགས་པའི་གཎྜི་ཞེས་བྱ་བ་བཞུགས་སོ། །ན་མོ་གུ་རུ་ཨཱརྱ་མཻ་ཏྲི་ཡེ། །མི་ཕམ་མགོན་པོའི་རྣམ་འཕྲུལ་བླ་མ་རྗེ། །དྲིན་ཅན་དྷརྨེ་ཤྭ་རའི་ཞབས་ལ་འདུད། །ཀརྨ་བརྩོན་འགྲུས་རྒྱ་མཚོ་གསན་མཛོད་དང་། །ཆོས་ཕུང་བརྒྱད་ཁྲི་བཞི་སྟོང་མདོར་བསྡུས་ན། །ཐེག་པ་ཆེ་ཆུང་གཉིས་སུ་འདུས་པར་གསུངས། །ཐེག་པ་དམན་ལ་ཉན་ཐོས་རང་རྒྱལ་གཉིས། །དེ་ལ་ཉན་ཐོས་ཐེག་པའི་ཉམས་ལེན་ནི། །དགེ་བསྙེན་དགེ་ཚུལ་དགེ་སློང་སོགས་ཞུས་ཏེ། །ཚེ་འདི་ཡུན་ཐུན་མང་
པོའི་ལོང་མེད་པས། །འདོད་པ་ཆུང་ཞིང་གང་བྱུང་ཆོག་ཤེས་བསྟེན། །ངན་སོང་གསུམ་དང་སྐྱེ་རྒས་ན་འཆིར་སྐྱག །འཁོར་བ་འདི་ནས་ཐར་ཐབས་སྙིང་ལ་འཆང་། །འདི་ཕྱིར་ལྷ་མིའི་བདེ་སྐྱིད་འདོད་ཡོན་ཀུན། །སྲོག་བཅད་གཤེད་མས་མགོ་བསྐོར་སྟོན་མོ་བཞིན། །ཇི་ལྟར་མཐོང་ཡང་འདོད་པ་གཏན་ནས་མེད། །རྫོགས་པའི་སངས་རྒྱས་ཐོབ་ལ་ཧ་ཐག་རིང་། །གྲངས་མེད་གསུམ་དུ་དཀའ་སྤྱད་ག་ལ་ནུས། །དཔེར་ན་རྒྱལ་པོ་བཙན་པོའི་ཁྲིམས་བཞིན་དུ། །སྡིག་ལྟུང་སྤྱད་ན་ངན་སོང་ཆད་པ་འབེབ། །དེ་ཕྱིར་སྟོན་པས་གང་གསུངས་ཁྲིམས་རྣམས་ལ། །ཅུང་ཟད་ཙམ་ཡང་འདའ་བར་མི་ཕོད་དེ། །ཁྲིམས་ཀྱི་རྩ་བ་གཞན་གནོད་གཞིར་བཅས་སྤངས། །སྡོམ་པའི་རྩ་བ་རྣམས་ནི་སྲོག་ལྟར་བསྲུང་། །ཕྲ་ཞིབ་ཉེས་བྱས་རྣམས་ལ་གསོ་སྦྱོང་འབད། །གསོ་སྦྱོང་ལ་ཡང་རྣམ་པ་མང་མོད་ཀྱི། །ཟླ་བ་ཕྱེད་ཕྱེད་དུས་ཀྱི་གསོ་སྦྱོང་ལ། །མར་ངོ་སྔོན་འགྲོ་ཡིན་ཀྱང་གོ་བདེ་བ། །དབོ་ཡི་ཟླ་བ་ས་ག་ཟླ་བ་དང་། །ཆུ་སྟོད་ཟླ་བ་ཁྲུམས་སྟོད་ཟླ་བ་དང་། །སྨིན་དྲུག་ཟླ་བ་རྒྱལ་གྱི་ཟླ་བ་དྲུག །དེ་དྲུག་ཉེར་དགུ་ཆད་ནས་གནམ་གང་བརྩི། །དེ་ལ་གསོ་སྦྱོང་བཅུ་
བཞི་པ་ཞེས་བྱ། །དེ་མིན་ཡར་ངོའི་ཉ་ནི་བཅུ་གཉིས་དང་། །མར་ངོའི་དྲུག་དང་གྲངས་ཀ་བཅོ་བརྒྱད་ནི། །གསོ་སྦྱོང་བཅོ་ལྔ་པ་ཞེས་བྱ་བ་ཡིན། །དེ་དུས་ཉི་མ་རྩེ་ཤར་ཙམ་གྱི་དུས། །དགེ་འདུན་སྡེ་རྣམས་ཀུན་གྱིས་གསོ་སྦྱོང་མཛད། །དགེ་འདུན་སྡེ་མེད་རི་ཁྲོད་པ་རྣམས་ཀྱི། །དེ་དུས་གསོ་སྦྱོང་བྱིན་རླབས་བྱ་བ་སྟེ། །གནས་བཅུའམ་ནི་ཐུབ་དབང་སྐུ་བཤམས་ཏེ། །ས་གཞི་བྱིན་རླབས་ལྟར་དུ་སྤྱན་འདྲེན་དང་། །ཕྱག་འཚལ་མཎྜལ་ཐུབ་པའི་བསྟོད་པ་འདོན། །ཤེས་ན་རྒྱུན་ཆགས་གསུམ་པའི་མདོ་དང་ནི། །སངས་རྒྱས་རབས་བདུན་གསོ་སྦྱོང་ཚིགས་བཅད་ནི། །གཞི་གསུམ་ཆོ་གའི་ནང་ནས་འབྱུང་ལྟར་འདོན། །མི་ཤེས་ན་ཡང་མ་ཚང་སྐྱོན་མེད་དེ། །ཕྱག་འཚལ་པུས་བཙུགས་ཙོག་པུར་ཐལ་མོ་སྦྱར། ལྷ་རྣམས་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅུ་བཞི་པའམ། བཅོ་ལྔ་པ་ལགས་ཏེ། བདག་ཤཱཀྱའི་དགེ་སློང་རྗེ་ཞེས་བགྱི་ཀླུ་བའི་ཡང་གསོ་སྦྱོང་བཅུ་བཞི་པའམ། བཅོ་ལྔ་པ་ལགས་ཏེ་བདག་ཤཱཀྱའི་དགེ་སློང་རྗེ་ཞེས་བགྱི་བ་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་བདག་སྨྲས་པ་དག་ཡོངས་སུ་དག་
པར་ལྷ་རྣམས་ཀྱིས་བཟུང་དུ་གསོལ། དེང་གསོ་སྦྱོང་བྱིན་གྱིས་བརླབ་སྟེ། གང་གི་ཚེ་དགེ་འདུན་གྱི་ཚོགས་པ་རྙེད་པ་དེའི་ཚེ་དགེ་འདུན་དང་ལྷན་ཅིག་ཏུ་གསོ་སྦྱོང་རྒྱ་ཆེར་ཉམས་སུ་མྱོང་བར་བྱ་ཞིང་། སོ་སོ་ཐར་པའི་མདོ་འདོན་པ་གདོན་པར་བགྱིའོ། །ལན་གསུམ་བརྗོད། ལྷ་རྣམས་ཀྱིས་གསུང་བར་བསམ་ལ། ཐབས་ཡིན་ནོ། །རང་གིས་ལེགས་སོ་བརྗོད། ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །ཞེས་སོགས་བརྗོད་པ་གསོ་སྦྱོང་བྱིན་རླབས་ཏེ། །ལྟུང་བ་མི་འཕེལ་བྱིན་གྱིས་བརླབ་འགྱུར་བ། །ཆོས་ཀྱི་དབང་ཕྱུག་གསུང་རྒྱུན་བསླད་མེད་ཡིན། །དེ་ནི་གོང་ལྟར་དུས་ཚོད་ངེས་ངེས་དགོས། །དུས་ལ་ངེས་མེད་ཞི་གནས་གསོ་སྦྱོང་ནི། །ཉེས་ལྟུང་ཕྲ་ཞིབ་དྲན་ནས་འགྱོད་པའི་བློས། །ཁྱིམ་གཙང་ཐུབ་དབང་སྐུ་དང་མཆོད་པ་བཤམས། །གོང་ལྟར་སྤྱན་འདྲེན་མཎྜལ་བསྟོད་པ་བྱ། །རྒྱུན་ཆགས་གསུམ་སོགས་བཟླས་ན་རབ་ཡིན་ཏེ། །མིན་ཀྱང་ཉེས་ལྟུང་བཤགས་པའི་བསམ་པ་ཡིས། །ལུས་སྲང་དྲན་པ་མངོན་དུ་གཞག་བྱས་ཏེ། །འདུས་བྱས་ཆོས་རྣམས་ཐམས་ཅད་མི་རྟག་པ། །ཟག་བཅས་འཁོར་བའི་ཆོས་རྣམས་སྡུག་བསྔལ་བ། །ཆོས་རྣམས་
ཐམས་ཅད་སྟོང་ཞིང་བདག་མེད་པར། །མྱང་འདས་ཐོབ་ན་སྡུག་བསྔལ་ཐམས་ཅད་ཞི། །བདེ་བ་དམ་པ་ཡིན་ཚུལ་ཡིད་ལ་བསམ། །དེ་ནས་མ་ཡེངས་སེམས་ངོའི་ངང་ལ་བཞག །དེ་ནས་ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །ཞེས་སོགས་བརྗོད་པ་ཞི་གནས་གསོ་སྦྱོང་སྟེ། །ཡོངས་འཛིན་སྨྲ་བའི་སེང་གེའི་ཞལ་ནས་གསུངས། །དེ་ཡིས་ཉེས་བྱས་ཕྲ་ཞིབ་ཐམས་ཅད་དག །དགེ་འདུན་ལྷག་མའི་ཆོས་དང་ལྟུང་བ་རྣམས། །རྩད་ནས་མ་དག་ན་ཡང་སྐྱེད་མི་འགྲོ། །ཉོན་མོངས་འདོད་ཆགས་སེམས་ལ་ཤར་བའི་ཚེ། །རང་གཞན་ངོ་བཞིན་མཛེས་ལ་ཆགས་པ་སྟེ། །དེ་ཡི་ནང་ན་ཀེང་རུས་ཡོད་ཚུལ་བསམ། །ལུས་ལ་སྲིན་བུ་བརྒྱད་ཁྲི་བཞི་སྟོང་གནས། །དཔེར་ན་ཤ་རུལ་འབུ་ཡིས་གཟིང་བ་བཞིན། །ཁྲག་རྣག་གཅིན་རྟོག་མི་གཙང་རྫས་ཀྱིས་གང་། །མི་གཙང་རྐྱལ་པ་གོས་ཀྱིས་བཏུམས་པ་ཉིད། །དེ་ལ་ཆགས་པ་སྐྱེ་བ་ཤིན་ཏུ་འཁྲུལ། །རང་གཞན་ལུས་ཀླུ་ལ་མི་གཙང་འདུ་ཤེས་བསྒོམ། །དཔེར་ན་རྨ་དང་ཤུ་བ་མ་རུངས་པ། །རེག་ན་མི་བཟོད་ཟུག་གཟེར་ལྡང་བ་དང་། །ལུས་འདི་འཁྱགས་ལྟོགས་ལ་སོགས་རྐྱེན་མི་ཁྱག །ལུས་
ལ་རྨ་དང་ནད་ཀྱི་འདུ་ཤེས་བསྒོམ། །ཟས་དང་གོས་ལ་སྨན་གྱི་འདུ་ཤེས་བྱ། །ཞེ་སྡང་ཁོང་ཁྲོའི་རྟོག་པ་སྐྱེས་པའི་ཚེ། །དགྲ་འདིས་ངན་སོང་གནས་སུ་སྐྱུར་མི་བྱེད། །ཞེ་སྡང་ཁོང་ཁྲོ་འདི་ཡིས་ངན་སོང་སྐྱུར། །དེ་ཕྱིར་རང་གིས་རང་ལ་སྙིང་རྗེ་ལྟ། །ཁྲོས་པའི་ལན་དུ་ཁྲོ་བར་མི་བྱེད་ཅིང་། །གཤེ་བའི་ལན་དུ་གཤེ་བར་མི་བྱེད་ཅིང་། །མཚང་འབྲུ་བ་ཡི་ལན་དུ་མཚང་མི་འབྲུ། །རྡུང་བཏག་བྱས་པའི་ལན་དུ་ལག་མི་བརྫོག །དེ་ནི་དགེ་སྦྱོང་ཆོས་བཞི་བྱ་བ་སྟེ། །ངན་སོང་འཇིགས་པར་སྐྲག་ཕྱིར་མི་ཕོད་བསྲན། །གཏི་མུག་གཉིད་འདི་དགེ་བའི་ཆོམ་རྐུན་ཏེ། །བརྒྱད་ཅུ་ཐུབ་ཀྱང་བཞི་བཅུ་རོ་ལྟར་ཉལ། །སྲོད་དང་ཐོ་རངས་མི་ཉལ་ཡར་ལངས་ནས། །ཁྱིམ་དུ་ཕན་ཚུན་འཆགས་ཤིང་ཆོས་སྤྱོད་འདོན། །འགྲོ་མི་ནུས་ན་རྣ་བར་ཆུ་བུམ་བཏགས། །མཆོད་རྟེན་སྐུ་གཟུགས་བཞེངས་དང་ཕྱག་བསྐོར་བྱ། །རྒྱལ་བའི་བཀའ་རྣམས་བཞེངས་དང་ཀློག་པར་བྱ། །སེར་མོ་རྣམས་ལ་ཅི་འབྱོར་བཀུར་བསྟི་འབད། །འཁོར་བར་འཁྱམ་པའི་རྩ་བ་བདག་འཛིན་ཏེ། །ལུས་ཀྱི་ཕྱི་ནང་བར་དུ་བདག་མི་གནས། །སེམས་ནི་སྟོང་པར་འདུག་པས་བདག་མ་
གྲུབ། །ང་བདག་མེད་ལ་ང་ཞེས་ཅི་ཕྱིར་འཛིན། །ང་བདག་མེད་པའི་སེམས་ལ་རེ་རེ་བལྟ། །དེ་ནི་གང་ཟག་བདག་མེད་སྒོམ་པ་ཟེར། །དགེ་བ་ཐར་པ་ཐོབ་པའི་ཕྱིར་དུ་བསྔོ། །འབྲས་བུ་མ་འོངས་བྱམས་པ་འབྱོན་པའི་དུས། །མི་ལུས་ཐོབ་ནས་བྱམས་པ་ཞལ་མཇལ་ཏེ། །སངས་རྒྱས་སྐུ་གཟུགས་མཆོད་རྟེན་འབྲེལ་ཆེ་ན། །འདུས་པ་དང་པོའི་སྐབས་སུ་དགྲ་བཅོམ་ཐོབ། །གསུང་རབ་བྲི་ཀློག་ཆོས་ལ་འབྲེལ་ཆེ་ན། །འདུས་པ་གཉིས་པའི་སྐབས་སུ་དགྲ་བཅོམ་ཐོབ། །དགེ་འདུན་བཀུར་སྟི་ལ་སོགས་འབྲེལ་ཆེ་ན། །འདུས་པ་གསུམ་པའི་སྐབས་སུ་དགྲ་བཅོམ་ཐོབ། །སྔ་མ་སྔ་མའི་སངས་རྒྱས་བསྟན་པ་ལ། །དཀོན་མཆོག་གསུམ་ལ་འབྲེལ་བ་གང་བཞག་རྣམས། །ཕྱི་མ་ཕྱི་མའི་སངས་རྒྱས་བསྟན་ལ་གྲོལ། །དེ་དོན་བྱམས་པ་ལུང་བསྟན་མདོ་ལས་གསུངས། །ཁྱད་པར་བྱམས་པའི་སྤྲུལ་པ་ཞྭ་དམར་བ། །ཡང་སྤྲུལ་སྐུ་མདུན་སི་ཏུ་ཡིན་པར་བཤད། །དྲུག་པ་སེང་གེའི་རྣམ་འཕྲུལ་ཀརྨ་པ། །འདི་དག་རྣམས་ཀྱི་མིང་གནང་སྐྲ་ཕུད་དང་། །དགེ་ཚུལ་དགེ་སློང་ལ་སོགས་ཞུས་པ་རྣམས། །བྱམས་པའམ་ནི་དྲུག་པ་སེང་གེ་ཡི། །
ཞལ་མཐོང་དགྲ་བཅོམ་ངེས་པར་ཐོབ་པར་བཤད། །སོ་སོར་ཐར་པའི་ཉན་ཐོས་ཉམས་ལེན་ཚུལ། །རཱ་ག་ཨ་སྱས་མགུར་གྱི་ཚུལ་དུ་སྨྲས།། ༈ །།ན་མོ་གུ་རུ་སེང་ཧཱ་ནཱ་ད་ཡ། །གསོན་དང་བླ་མ་བརྩོན་འགྲུས་རྒྱ་མཚོ་ལགས། །འཁོར་བར་སྐྲག་ནས་ཚུལ་ཁྲིམས་གཙང་མར་སྲུངས། །མི་དགེ་བཅུ་སྤངས་དགེ་བ་བཅུ་ལ་སྤྱོད། །ཉམས་སུ་ལེན་ཚུལ་གོང་དང་འདྲ་བ་ལ། །འཁོར་བར་འཁོར་བའི་རྩ་བ་མ་རིག་པ། །དེ་ལས་འདུ་བྱེད་དེ་ལས་རྣམ་ཤེས་བྱུང་། །དེ་ལས་མིང་གཟུགས་དེ་ལས་སྐྱེ་མཆེད་དྲུག །དེ་ལས་རེག་པ་དེ་ལས་ཚོར་བ་བྱུང་། །དེ་ལས་སྲེད་པ་དེ་ལས་ལེན་པ་བྱུང་། །དེ་ལས་སྲིད་པ་དེ་ལས་སྐྱེ་བ་བྱུང་། །དེ་ལས་རྒ་ཤི་མྱ་ངན་སྡུག་བསྔལ་ཀུན། །དེ་ནི་རྟེན་འབྲེལ་སྲིད་པའི་འཁོར་ལོ་ཟེར། །མ་རིག་འགག་ན་དེ་ཀུན་རིམ་གྱིས་འགག །དེ་ནི་ཐར་པའི་འཁོར་ལོ་འཕགས་པའི་ལམ། །ཀུན་གྱི་རྩ་བ་མ་རིག་པ་དེ་ནི། །རང་སེམས་རང་གིས་མ་རིག་པ་ཡི་སྐྱོན། །རང་སེམས་རང་གིས་བལྟས་པས་དངོས་པོ་མེད། །དེ་ནི་གང་ཟག་བདག་མེད་གོང་དང་འདྲ། །ཕྱི་ཡི་སྣང་བ་དཀར་དམར་སྣ་ཚོགས་རྣམས། །ནང་གི་སེམས་ཀྱིས་སོ་
སོར་འཛིན་པས་འཁྲུལ། །སེམས་ནི་གདོད་ནས་ངོ་བོ་སྟོང་པ་ཡིན། །སྟོང་ཉིད་དེ་ཡི་ངང་ལ་མཉམ་གཞག་པས། །གང་ཟག་བདག་མེད་རྟོགས་པའི་སྟེང་དེ་ནས། །ཆོས་ཀྱི་བདག་མེད་ཕྱེད་ཙམ་རྟོགས་པ་ཡིན། །འཁོར་བ་འདི་ན་ད་ནི་ལུས་མི་ལེན། །བླ་མ་སློབ་དཔོན་གཞན་ལ་མི་རེ་བར། །རང་མགོ་ཐོན་ནས་རང་ཉིད་སངས་རྒྱ་བའི་། །བསྔོ་བ་སྨོན་ལམ་དེ་ལྟར་བྱས་པ་ཡིས། །བསྐལ་པ་ཉི་ཤུས་རང་རྒྱལ་འགྲུབ་པ་སྟེ། །བསེ་རུ་ལྟ་བུ་བསྐལ་པ་བརྒྱ་ཡིས་འགྲུབ། །སངས་རྒྱས་སྔ་མའི་བསྟན་པ་ནུབ་ནས་ཀྱང་། །སངས་རྒྱས་ཕྱི་མའི་བསྟན་པ་མ་བྱུང་སྐབས། །ཆོས་སྒྲ་མེད་པའི་ཡུལ་དུ་མི་རུ་སྐྱེ། །རང་གིས་རང་ཉིད་རབ་ཏུ་བྱུང་བྱས་ཏེ། །དབེན་པ་བསྟེན་པས་རང་ཉིད་སངས་རྒྱས་ཏེ། །།ཆོས་ནི་ཚིག་གཅིག་ཙམ་ཡང་གསུང་མི་འགྱུར། །སྦྱིན་བདག་རྣམས་ཀྱིས་གུང་ཚིགས་དྲངས་པའི་ཚེ། །ནམ་མཁར་འཕུར་སོགས་རྫུ་འཕྲུལ་རེ་རེ་སྟོན། །དེ་ཚེ་སྦྱིན་བདག་དེ་ཡི་ཕྱག་འཚལ་ནས། །ང་ཡང་ཁྱེད་དང་འདྲ་བར་ཤོག་ཅེས་བརྗོད། །དེ་ཙམ་ཞིག་ལས་འགྲོ་དོན་གཞན་མེད་དེ། །དེ་འདྲ་ལྔ་བརྒྱ་སྟོང་ཕྲག་ལ་སོགས་པ། །
དུས་གཅིག་འབྱུང་ཞིང་ཕྱོགས་གཅིག་བཞུགས་པ་ལ། །ཚོགས་ན་སྤྱོད་པའི་རང་རྒྱལ་ཞེས་བྱ་བ། །གཅིག་ལས་མེད་ཅིང་གཅིག་པུར་བཞུགས་པ་ལ། །བསེ་རུ་ལྟ་བུ་རང་སངས་རྒྱས་ཞེས་བྱ། །ཐུབ་བསྟན་ནུབ་ནས་བྱམས་པ་མ་བྱུང་བར། །རང་རྒྱལ་བརྒྱད་ཁྲི་འབྱོན་པར་གསུངས་པ་ཡིན། །རང་སངས་རྒྱས་ཀྱི་ཉམས་ལེན་གླུ་ཆུང་འདི། །རཱ་ག་ཨ་སྱས་འཕྲལ་དུ་སྨྲས་པའོ།། ༈ །།ན་མོ་གུ་རུ་བུདྡྷ་ཡ། །གསོན་དང་བླ་མ་བརྩོན་འགྲུས་རྒྱ་མཚོ་བ། །ཐེག་པ་ཆེ་ཆུང་ཁྱད་པར་ཡིད་ལ་ཟུངས། །།ཐེག་པ་ཆུང་ངུ་ཉན་ཐོས་རང་རྒྱལ་གཉིས། །སྙིང་རྗེ་ཆུང་བས་གཞན་ཕན་བསམ་པ་མེད། །ཤེས་རབ་ཆུང་བས་སྟོང་ཉིད་ཕྱེད་མ་རྟོགས། །དེ་ཕྱིར་ཐེག་པ་ཆུང་ངུ་ཞེས་བྱའོ། །ཐེག་པ་ཞེས་བྱ་ཁྱག་པའི་དོན་ཡིན་ལ། །བྱང་ཆུབ་སེམས་དཔའི་འགྲོ་བ་གཞན་དོན་དུ། །ལུས་སྲོག་བརྒྱ་སྟོང་གཏོང་བའི་སྡུག་བསྔལ་ཁྱག །ཉན་རང་གཉིས་ཀྱིས་དེ་ལྟར་ག་ལ་ཁྱག །ཁྱབ་པ་འདུ་བྱེད་སྡུག་བསྔལ་ཞེས་བྱ་བ། །ཤ་ཁྲག་ལུས་འདི་ཡོད་ནས་སྡུག་བསྔལ་ནི། །ཅུང་ཟད་ཡོད་པ་རེ་ཡང་མི་ཁྱག་སྟེ། །འཁོར་བར་ཡུན་རིང་མི་བཞུགས་མྱ་ངན་འདའ། །ཉན་རང་དགྲ་
བཅོམ་ཟེར་བ་གང་ཞེ་ན། །དགྲ་ནི་ཉོན་མོངས་དུག་ལྔ་དུག་གསུམ་སྟེ། །གཏན་ནས་བཅོམ་པས་སེམས་ལ་སྐྱེ་མི་སྲིད། །བལྟ་བའི་འདུན་པ་བཏང་ན་མངོན་ཤེས་ཀྱིས། །བསྐལ་པ་བརྒྱ་སྟོང་སྔ་ཕྱིའི་དོན་རྣམས་ཤེས། །།མ་བལྟས་དགྲོང་མི་ཡོད་ཀྱང་མི་རིག་གོ །རྫུ་འཕྲུལ་ཡིད་ལ་གང་བསམ་ཐོགས་པ་མེད། །འདས་ཁ་སྐུ་ལུས་ནམ་མཁའི་དབྱིངས་སུ་འཕག །འབྲུག་སྒྲོག་གློག་འབྱིན་ས་ཡང་རྣམ་པར་གཡོ། །སྐུ་སྟོད་མེ་འབར་སྐུ་སྨད་ཆུ་རྒྱུན་འབེབ། །སྐུ་སྨད་མེ་འབར་སྐུ་སྟོད་ཆུ་རྒྱུན་འབེབ། །ཉིད་ཀྱི་ཐུགས་ལས་ཡེ་ཤེས་མེ་འབར་ཏེ། །སྐུ་ལུས་བསྲེགས་ནས་རིང་བསྲེལ་ཆར་པ་ཕབ། །དད་རྟེན་ཆོས་གོས་ལྷུང་བཟེད་ས་ལ་འབུལ། །དེ་ཕྱིན་འཁོར་བ་འདི་ན་ལུས་མི་ལེན། །དག་པའི་ཞིང་དུའང་སྐྱེ་བ་མི་བཞེས་ཏེ། །སྟོང་ཉིད་ཞི་བའི་ངང་ལ་བཞུགས་པ་སྟེ། །དེ་ནི་བདེ་བའི་རང་བཞིན་སྡུག་བསྔལ་བྲལ། །ཐེག་པ་དམན་པའི་ལུགས་ལ་དེ་ཕྱི་ནས། །བུད་ཤིང་ཟད་པའི་མེ་བཞིན་ནམ་དུ་ཡང་། །ལུས་ནི་མི་ལེན་སྟོང་ཉིད་ཞི་བར་བཞུགས། །ཐེག་ཆེན་ལུགས་ལ་བསྐལ་པ་བརྒྱད་ཁྲི་བར། །དེ་ལྟར་བཞུགས་ཤིང་བསྐལ་པ་བརྒྱད་
ཁྲི་ནས། །སངས་རྒྱས་འོད་ཟེར་ཕོག་པས་དྲན་པ་རྙེད། །དེ་ནས་སངས་རྒྱས་སྐུ་བསྟན་གསུང་དབྱངས་ཀྱིས། །ཁྱོད་ཀྱི་འདི་ནི་མཐར་ཐུག་འབྲས་བུ་མིན། །རྫོགས་པའི་བྱང་ཆུབ་ལམ་དུ་ཞུགས་ཤིག་གསུངས། །དེ་ནས་བྱང་ཆུབ་མཆོག་ཏུ་སེམས་བསྐྱེད་ནས། །སླར་ཡང་རྫོགས་པའི་བྱང་ཆུབ་བསྒྲུབ་དགོས་ཏེ། །དེ་ལྟར་བསྐལ་པ་བརྒྱད་ཁྲིར་འགྲོ་དོན་འགག །དེ་ཕྱིར་ཐེག་ཆེན་བྱང་ཆུབ་སེམས་དཔའི་ལུགས། །རེ་ཞིག་དམྱལ་བའི་ཡུལ་དུ་སྐྱེས་པ་བས། །ཉན་རང་ལམ་དུ་གོལ་ན་ལོད་པར་བཞེད། །ཐེག་དམན་གོལ་ས་བསྟན་པའི་དབྱངས་ཆུང་འདི། །རཱ་ག་ཨ་སྱས་འཕྲལ་དུ་སྨྲས་པའོ།། ༈ །།ན་མོ་གུ་རུ་མ་ཧཱ་ཀ་རུ་ཎི་ཀ་ཡེ། ཀརྨ་བརྩོན་འགྲུས་རྒྱ་མཚོ་ལེགས་པར་གསོན། །རྒྱུ་ཡི་ཐེག་པ་མཚན་ཉིད་ལུགས་ཞེས་པ། །ཐེག་ཆེན་བྱང་ཆུབ་སེམས་དཔའི་ཉམས་ལེན་ནི། །བྱང་ཆུབ་སེམས་དཔའི་སྡོམ་པ་ཞུས་བྱས་ཏེ། །རབ་ཀྱིས་འགྲོ་ཀུན་སངས་རྒྱས་སར་བཀོད་བསམ། །འབྲིང་གིས་རང་གཞན་མཉམ་དུ་སངས་རྒྱས་འདོད། །ཐ་མས་རང་ཉིད་སངས་རྒྱས་ཐོབ་བྱས་ནས། །འཁོར་བ་ཇི་སྲིད་འགྲོ་དོན་བྱེད་པར་འདོད། །འགྲོ་བ་ཀུན་ལ་
ཕན་པར་མ་བྱས་ན། །རྫོགས་པའི་བྱང་ཆུབ་ཐོབ་པའི་ཐབས་མེད་པས། །གཞན་ཕན་སྒྲུབ་པ་རང་དོན་མཆོག་ཏུ་གོ །བསྐལ་པ་བྱེ་སྟོང་བསམ་གྱིས་མི་ཁྱབ། །པར། །ལུས་ནི་བསམ་འདས་བརྗོད་མི་གྲངས་བླངས་ཚེ། །རང་དོན་བསྒྲུབས་པས་མ་འགྲུབ་འཁོར་བར་འཁྱམས། །ད་ནས་བཟུང་སྟེ་བསྐལ་པ་གྲངས་མེད་གསུམ། །གཞན་དོན་བསྒྲུབ་ན་སངས་རྒྱས་ཐོབ་པར་གསུངས། །མཐའ་མེད་འཁོར་བར་འཁྱམས་པའི་དོན་བསམ་ན། །དེ་ཡང་ཡུན་རིང་མ་ཡིན་ཡུན་ཐུང་ཡིན། །བཅོམ་ལྡན་ཤཱཀྱ་ཐུབ་པ་ལ་སོགས་ཀྱང་། །ཤིག་དང་ལྕི་བ་སོགས་ལའང་སྐྱེས་གསུངས་ན། །བདག་གིས་ད་རེས་དལ་འབྱོར་མི་ལུས་ཐོབ། །རྫོགས་པའི་བྱང་ཆུབ་བསྒྲུབ་ན་ཅིས་མི་འགྲུབ། །སྙམ་དུ་བློ་སྟོབས་ཆེན་པོ་བསྐྱེད་པར་བྱ། །ཉེས་ལྟུང་ཕྲ་ཞིབ་ཐམས་ཅད་དག་པ་དང་། །སྡོམ་པ་འཕེལ་ཞིང་རྒྱས་པར་བྱ་བའི་ཕྱིར། །བྱང་སྡོམ་རང་གིས་ཡང་ཡང་ལེན་པར་བྱ། །དཔེར་སྤུ་ན་གསེར་དངུལ་སྣོད་ནི་ཞོམ་པ་ལྟར། །བཅོས་པར་སླ་སྟེ་ཉམས་ཀྱང་འཕྲལ་དུ་སྐྱེ། །ཉམས་ལེན་གཙོ་བོ་ས་གཞི་བྱིན་རླབས་ལྟར། །ཐུབ་དབང་སྤྱན་དྲངས་མཆོད་བསྟོད་མཎྜལ་
ཕུལ། །ཐུགས་དམ་གཙོ་བོ་ཡན་ལག་བདུན་པས་བྱེད། །ཞེ་སྡང་སྐྱེས་ན་བྱམས་པས་འདུལ་བ་སྟེ། །སེམས་ཅན་ཐམས་ཅད་སྐྱེ་བ་མང་པོའི་མ། །ཁོང་ཚོས་མ་ཤེས་དེ་ལ་དགྲ་བྱེད་ཀྱང་། །བདག་གིས་ཤེས་བཞིན་ལན་བྱེད་ག་ལ་རུང་། །མ་རྒན་སྨྱོ་རྒོད་བུ་ཡིས་མི་བཟོད་ལྟར། །དེ་ལ་སྙིང་རྗེ་བསྐྱེད་ལ་ཅི་ཕན་བསྒྲུབ། །འདོད་ཆགས་སྐྱེས་ན་མི་སྡུག་མ་པས་འདུལ། །རོ་རུལ་འབུ་ཡིས་གཟིངས་དང་ཀེང་རུས་རྣམས། །མདུན་དུ་བསྒོམ་པས་འདོད་ཆགས་ངང་གིས་ཞི། །གཏི་མུག་འཐིབས་པ་རྟེན་འབྲེལ་བསྒོམས་པས་ཡལ། །གོང་ལྟར་མ་རིག་དབང་གིས་འདུ་བྱེད་སོགས། །རྟེན་འབྲེལ་ལུགས་འབྱུང་ལུགས་ལྡོག་ཡིད་ལ་བགྲང་། །ཁྱད་པར་ཐུབ་པའི་མཛད་པ་བཅུ་གཉིས་པོ། །ངག་ཏུ་འདོན་ཞིང་དེ་དོན་ཡིད་ཀྱིས་བསམ། །དེ་ནས་ཞི་གནས་ལྷག་མཐོང་དོན་བསྒོམ་པ། །མདུན་དུ་ཐུབ་པའི་དབང་པོ་གསལ་བར་བསྒོམ། །དེ་ཡི་མཚན་དང་དཔེ་བྱད་རེ་རེ་ནས། །སེམས་གཏད་རིག་པ་ཇི་ལྟར་གནས་གནས་བྱ། །བྱིང་ཞིང་རྨུགས་ན་དཔྲལ་བའི་མཛོད་སྤུ་དང་། །འཕྲོ་རྒོད་ཆེ་ན་སྐྱིལ་ཀྲུང་བསྣོལ་མཚམས་དང་། །བྱིང་རྒོད་མེད་ན་
ཐུགས་ཀྱི་དཔལ་བེའུ་ལ། །གར་གཏད་སེམས་གནས་ཡུན་རིང་མི་འཕྲོ་ན། །དེ་ནི་ཐུན་མོང་ཞི་གནས་འགྲུབ་པ་སྟེ། །དེ་ཡི་ཕན་ཡོན་དཔག་ཏུ་མེད་པ་ནི། །ད་། ལྟའི་སངས་རྒྱས་མངོན་སུམ་བཞུགས་མདོ་དང་། །ཏིང་འཛིན་རྒྱལ་པོའི་མདོ་ལས་རྒྱ་ཆེར་གསུངས། །མདོར་ན་རང་གི་རིག་པ་གང་གཏད་སར། །ཡུན་རིང་མི་འཕྲོ་ཅི་འདོད་བར་གནས་པ། །རྣམ་རྟོག་ཞི་ནས་གནས་པའི་ཞི་གནས་ཏེ། །ཐུན་མོང་ཟག་བཅས་མངོན་ཤེས་གྲུབ་རྟགས་སོགས། །དེ་ལས་འབྱུང་ཚུལ་སྟོང་ཕྲག་བརྒྱ་པར་གསུངས། །དེ་ནས་ཐུན་མོང་ལྷག་མཐོང་བསྒོམ་བྱ་བ། །ཐུན་མོང་ལྷག་མཐོང་རྟོག་དཔྱོད་ཤེས་རབ་ཡིན། །བདག་གི་ལུས་འདིའི་ཤ་རུས་ལྤགས་པ་དང་། །དོན་སྣོད་གང་ལ་དཔྱད་ཀྱང་བདག་མ་གྲུབ་། །སེམས་ལ་དངོས་པོ་མེད་ཕྱིར་བདག་མ་གྲུབ། །མ་གྲུབ་སྟོང་པའི་ངང་ལ་ས་ལེ་བཞག །དེ་ནི་གང་ཟག་བདག་མེད་བསྒོམ་ཚུལ་ཡིན། །ཕྱི་ཡི་དངོས་པོ་དཔེར་ན་ཀ་བ་གཅིག་རིག་པས་སོ་སོར་བསལ་ནས་དཔྱད་ཙམ་ན། །ཀ་བའི་འགོ་དང་མཇུག་དང་སྐེད་པ་དང་། །ཕྱོགས་བཞི་མཚམས་བརྒྱད་དཀྱིལ་དང་དགུ་པོ་རྣམས། །སོ་སོར་དཔྱད་
པས་གང་ཡང་ཀ་བ་མིན། །ཀ་བ་བདེན་པར་མ་གྲུབ་མིང་བཏགས་ཙམ། །དེ་བཞིན་ཕྱི་སྣོད་ནང་བཅུད་དངོས་པོ་ཀུན། །གང་ཡང་བདེན་པར་མ་གྲུབ་སྟོང་པ་ཉིད། །དེ་ནི་ཆོས་ཀྱི་བདག་མེད་སྒོམ་ལུགས་ཏེ། །དེ་དག་པཎྜི་ཏ་ཡི་དཔྱད་སྒོམ་ཟེར། །དེ་ལ་གོ་བའི་ངེས་ཤེས་སྐྱེ་མོད་ཀྱི། །སྟོང་ཉིད་དངོས་ནི་རྟོགས་པར་མི་འགྱུར་ཏེ། །བསྐལ་པ་གྲངས་མེད་གཅིག་ཏུ་ཚོགས་བསགས་པས། །སྟོང་ཉིད་རྟོགས་དང་དང་པོའི་ས་ཐོབ་མཉམ། །གྲངས་མེད་གཉིས་ཀྱིས་མ་དག་ས་བདུན་བགྲོད། །གྲངས་མེད་གསུམ་གྱིས་ས་བཅུ་མཐར་ཕྱིན་ཏེ། །དེ་ནས་བསྐལ་པ་བཞི་བཅུར་མཚན་དཔེ་སྒྲུབ། །དེ་ནས་མཛད་པ་བཅུ་གཉིས་ཚུལ་གྱིས་ནི། །བཅུ་གཅིག་ཀུན་ཏུ་འོད་ཀྱི་ས་ཐོབ་ནས། །ཤཱཀ་ཐུབ་བཞིན་དུ་མངོན་པར་སངས་རྒྱས་ཏེ། །ཆོས་ཀྱི་འཁོར་ལོ་བསྐོར་ནས་འགྲོ་དོན་མཛད། །དེ་ལྟར་ཉན་ཐོས་བྱང་ཆུབ་དགྲ་བཅོམ་དང་། །རང་རྒྱལ་བྱང་ཆུབ་བསེ་རུའམ་ཚོགས་ན་སྤྱོད། །རྫོགས་པའི་བླ་མེད་བྱང་ཆུབ་ཐོབ་པའི་ཚུལ། །བདག་འདྲ་རྨོངས་པས་སྨྲ་བར་མི་སྤོབས་ཀྱང་། །ཤེས་བྱ་ཀུན་མཁྱེན་དྷརྨེ་ཤྭ་ར་ཡི། །ཞལ་གྱི་བདུད་རྩིའི་ཟེར་གྱིས་ཚིམ་པའི་
ཕྱིར། །ཟུར་ཙམ་སྨྲས་ལ་འགལ་བ་མཆིས་སྲིད་ན། །གཞུང་ལུགས་སྨྲ་བ་རྣམས་ཀྱི་དྲུང་དུ་བཤགས། །བན་རྒན་བཅོས་པས་གང་དྲན་སྨྲས་པའི་ཚིག །བརྩོན་འགྲུས་རྒྱ་མཚོས་ཆོས་སུ་བསྒོམས་ནས་བྲིས། །རྟ་ལོ་རྒྱལ་ཟླའི་ཚེས་བཅུའི་དགོང་ཐུན་ནུབ། །རཱ་ག་ཨ་སྱས་བིརྱ་སཱ་ག་ར། །ཞུས་ལན་མགུར་དུ་བྱས་པ་མངྒ་ལཾ། །སྡེབ་སྦྱོར་མ་ལེགས་ཚིག་ཚོགས་མ་མཛེས་ཀྱང་། །མདོ་ལུགས་ཆོས་ཀུན་དོན་འདུས་ཡིན་ནོ་ཨང་། །གཞུང་ལུགས་རྒྱ་ཆེན་ཐོས་བསམ་མ་བྱས་རྣམས། །འདི་མཐོང་མདོ་ལུགས་ཁོག་ཀུན་གྲོལ་བར་ཤོག །ལེའུ་བཞི་པའོ་མངྒ་ལཾ།། །།