ལེའུ་དྲུག་པ། འཁོར་བའི་འཇིགས་པ་ཀུན་ལས་སྐྱོབ་པའི་ཕྱིར། །སྐྱབས་འགྲོའི་ཞལ་གདམས་འཇིགས་པ་ཀུན་སྐྱོབ་ཡོད། །
༼ཆ༽ རི་ཆོས་མཚམས་ཀྱི་ཞལ་གདམས་ལས། སྐྱབས་འགྲོ་འཇིགས་པ་ཀུན་སྐྱོབ་བཞུགས་སོ། །ན་མོ་རཏྣ་ཏྲ་ཡཱ་ཡ། བླ་མ་བརྩོན་འགྲུས་རྒྱ་མཚོ་ཁྱེད། །མ་ཡེངས་བདག་ལ་སྙན་གསོན་དང་། །སྐྱབས་འགྲོ་བྱེད་པ་མང་ལགས་ཀྱང་། །སྐྱབས་འགྲོའི་རྣམ་དབྱེ་ཤེས་པ་དཀོན། །བྱིས་པ་རྒྱུག་ཐུབ་ཕོན་ཆད་རྣམས། །སྐྱབས་གནས་ཕ་དང་མ་ལ་ཞུ། །ཐ་མལ་སྐྱེ་བོ་ཕལ་ཆེར་རྣམས། །ཡུལ་ལྷ་གཞི་བདག་རྣམས་ལ་སྐྱབས། །ཕྱི་པ་མུ་སྟེགས་པ་རྣམས་ཀྱིས། །དབང་ཕྱུག་ཁྱབ་འཇུག་སོགས་ལ་སྐྱབས། །དེ་དང་ཆ་མཐུན་བོན་ལུགས་རྣམས། །དཀོན་མཆོག་གསུམ་པོ་སྐྱབས་མི་འཛིན། །དེ་དག་རྣམས་ཀྱིས་གནས་སྐབས་ཀྱི། །སྡུག་བསྔལ་ཅུང་ཟད་སྐྱབས་ནུས་ཀྱི། །འཁོར་བའི་སྡུག་བསྔལ་སྐྱབས་མི་ནུས། །སྐྱབས་ཡུལ་དེ་དག་རྣམས་ཀྱིས་ཀྱང་། །འཁོར་བའི་སྡུག་བསྔལ་མ་སྤངས་པས། །གཞན་དག་སྐྱོབ་པར་ག་ལ་ནུས། །སྐྱབས་གནས་དཀོན་མཆོག་གསུམ་ཡིན་ཏེ། །གསུམ་ཀ་གཏན་གྱི་སྐྱབས་མ་ཡིན། །ཆོས་ནི་ལམ་དང་འདྲ་བ་སྟེ། །ཕ་
རོལ་ཕྱིན་ཚར་དགོས་པ་མེད། །དགེ་འདུན་ལམ་གྲོགས་ལྟ་བུ་སྟེ། །ཁོང་རང་འཇིགས་དང་མ་བྲལ་ལོ། །སྐྱབས་ནི་སངས་རྒྱས་ཁོ་ན་ཡིན། །ཅི་ཕྱིར་སྐྱོན་ནི་་ཐམས་ཅད་སངས། །ཡོན་ཏན་ཐམས་ཅད་ཤིན་ཏུ་རྒྱས། །བདུད་བཞིའི་འཇིགས་པ་ཐམས་ཅད་བཅོམ། །མངོན་པར་ཤེས་པ་དྲུག་དང་ལྡན། །འཁོར་བའི་མྱ་ངན་ཕ་རོལ་འདས། །བརྩེ་བས་མ་གཅིག་བུ་བཞིན་དུ། །ཉིན་མཚན་དུས་དྲུག་འགྲོ་ལ་གཟིགས། །སྟོབས་བཅུའི་སྟོབས་དང་ལྡན་པའི་ཕྱིར། །སྐྱབས་འོས་སྐྱབས་མཆོག་དམ་པ་ཡིན། །དེ་ལྟར་དཀོན་མཆོག་གསུམ་པོ་ལ། །གྲུབ་མཐའ་སོ་སོའི་ངོས་འཛིན་མང་། །སོ་སོར་ཐར་པའི་ལུགས་ལ་ནི། །སངས་རྒྱས་སྤྲུལ་སྐུ་ཤཱཀ་ཐུབ་ཡིན། །ཆོས་ནི་བདེན་བཞིའི་ཆོས་འཁོར་ཡིན། །དགེ་འདུན་ཉན་ཐོས་རང་རྒྱལ་གཉིས། །རྒྱུན་ཞུགས་ཕྱིར་འོང་ཕྱིར་མི་འོང་། །དགྲ་བཅོམ་རྣམས་ནི་ཡིན་པར་གསུངས། །དེ་རྣམས་དཀོན་མཆོག་གསུམ་དངོས་ཡིན། །ཀུན་རྫོབ་དཀོན་མཆོག་གསུམ་གྱི་རྟེན། །མཆོད་རྟེན་སངས་རྒྱས་སྐུ་གཟུགས་དང་། །ཡི་གེ་སེར་མོ་གྱོན་རྣམས་ཡིན། །དེང་ནས་མ་ཤི་བར་དུ་སྐྱབས། །ཅི་
ཕྱིར་འཁོར་བའི་འཇིགས་ལ་སྐྲག །རང་ཉིད་ཁོ་ན་སྐྱབས་ཞུ་བ། །ཐེག་པ་དམན་པའི་སྐྱབས་འགྲོའོ། །སངས་རྒྱས་ཆོས་སྐུ་གཟུགས་སྐུ་གཉིས། །ཆོས་ནི་ཐེག་ཆེན་སྡེ་སྣོད་གསུམ་། །དགེ་འདུན་དང་པོའི་ས་ཐོབ་ཡིན། །དེ་ནི་ཐེག་ཆེན་དཀོན་མཆོག་གསུམ། །དེང་ནས་བྱང་ཆུབ་མ་ཐོབ་བར། །བདག་གཞན་འགྲོ་ཀུན་སྐྱབས་ཞུ་བ། །ཐེག་ཆེན་མདོ་ལུགས་སྐྱབས་འགྲོ་ལགས། །བྱ་སྤྱོད་ལུགས་ཀྱི་དཀོན་མཆོག་གསུམ། །སངས་རྒྱས་སྐུ་གསུམ་བདག་ཉིད་ཅན། །ཆོས་ནི་བྱ་སྤྱོད་རྒྱུད་སྡེ་རྣམས། །དགེ་འདུན་རིག་སྔགས་གྲུབ་རྣམས་སོ། །དུས་དང་བསམ་པ་མདོ་དང་མཚུངས། །རྣལ་འབྱོར་རྒྱུད་ཀྱི་དཀོན་མཆོག་གསུམ། །སངས་རྒྱས་རྒྱལ་བ་རིགས་ལྔ་སྟེ། །ཆོས་ནི་རྣལ་འབྱོར་རྒྱུད་སྡེ་རྣམས། །དགེ་འདུན་སེམས་དཔའ་སེམས་མའི་ཚོགས། །དུས་དང་བསམ་པ་གོང་དང་འདྲ། །བླ་མེད་རྒྱུད་ཀྱི་དཀོན་མཆོག་གསུམ། །སངས་རྒྱས་སྐུ་ལྔའི་བདག་ཉིད་ཅན། །ཆོས་ནི་གསང་སྔགས་རྒྱུད་སྡེ་རྣམས། །དགེ་འདུན་འཇིག་རྟེན་འདས་པ་ཡི། །དཔའ་བོ་མཁའ་འགྲོ་ཆོས་སྐྱོང་ཚོགས། །བླ་མེད་ཡང་རྩེ་གདམས་ངག་ལུགས། །དཀོན་མཆོག་
གསུམ་པོ་བླ་མ་སྟེ། །ཐུགས་ནི་སངས་རྒྱས་ཐམས་ཅད་འདུས། །གསུང་ནི་དམ་ཆོས་ཀུན་འབྱུང་གནས། །སྐུ་ནི་དགེ་འདུན་དཀོན་མཆོག་དངོས། །ཡོན་ཏན་།དཀྱིལ་འཁོར་ལྷ་ཚོགས་ཀུན། །ཕྲིན་ལས་མཁའ་འགྲོ་ཆོས་སྐྱོང་ཚོགས། །ཐམས་ཅད་བླ་མའི་རོལ་པ་ལགས། །དེ་ཕྱིར་དེ་ལ་སྐྱབས་སུ་འགྲོ། །བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཡིན། །གསུངས་པའི་དོན་ཡང་དེ་ལ་དགོངས། །བདག་དང་འགྲོ་ཀུན་སྐྱབས་འགྲོ་སྟེ། །ཚེ་གཅིག་ལུས་གཅིག་འདི་ཉིད་ལ། །རྡོ་རྗེ་འཆང་དབང་བླ་མ་ཡི། །གོ་འཕང་ཐོབ་ཕྱིར་སྐྱབས་སུ་འགྲོ། །ཡང་གསང་ཨ་ཏི་ཡོ་གའི་ལུགས། །སངས་རྒྱས་ཆོས་སྐུ་ཀུན་ཏུ་བཟང་། །ཆོས་ནི་འབུམ་ཕྲག་དྲུག་ཅུའི་རྒྱུད། །དགེ་འདུན་རིག་འཛིན་ཌཱ་ཀིའི་ཚོགས། །བདག་དང་འགྲོ་ཀུན་སྐད་ཅིག་ལ། །ཐོས་གྲོལ་ཉིད་དུ་སངས་རྒྱས་ཕྱིར། །སྐྱབས་སུ་འགྲོ་བ་རྫོགས་ཆེན་ལུགས། །སྐྱབས་ཡུལ་སྒོམ་པའི་ཁྱད་པར་ཡང་། །སོ་སོར་ཐར་པའི་ལུགས་ལ་ནི། །སྐྱབས་ཡུལ་སྒོམ་པའི་གསལ་ཁ་མེད། །ཅི་ཕྱིར་སངས་རྒྱས་ཐམས་ཅད་ནི། །
མངོན་ཤེས་དྲུག་ལྡན་དུས་རྟག་ཏུ། །ཉིན་མཚན་དུས་དྲུག་འགྲོ་ལ་གཟིགས། །རྡོ་རྗེའི་སྤྱན་དང་སྙན་མངའ་བས། །འགྲོ་བ་སེམས་ཅན་ཐམས་ཅད་ཀྱི། །ཅི་བསམས་གང་སྨྲས་ཐམས་ཅད་ནི། །མ་འདྲེས་སོ་སོར་དགོངས་ཤིང་གསན། །དེ་ཕྱིར་སྐྱབས་ཡུལ་སྒོམ་མི་དགོས། །བསམ་ཞིང་ངག་གི་སྨྲས་པས་ཆོག །ཐེག་ཆེན་མདོ་ཡི་སྐྱབས་ཡུལ་ནི། །གོང་དང་འདྲ་བས་མ་བསྒོམ་ཡང་། །འགལ་བ་ཡོད་པ་མ་ཡིན་ཀྱང་། །སྐྱབས་སེམས་སྡོམ་པ་ལེན་འདོད་ན། །ཤཱཀ་ཐུབ་གཙོ་བོར་སྤྱན་དྲངས་ཏེ། །དཔེར་ན་ས་གཞི་བྱིན་རླབས་བཞིན། །དེ་ཡི་མདུན་དུ་སྐྱབས་འགྲོ་བྱ། །སྐྱབས་ཡུལ་གཤེགས་སམ་མི་དམིགས་བསམ། །བྱ་སྤྱོད་རྣལ་འབྱོར་རྒྱུད་གསུམ་ལ། །ཡི་དམ་གང་ཡིན་དེ་ཉིད་ལ། །སངས་རྒྱས་བྱང་སེམས་ཀུན་གྱིས་བསྐོར། །གང་ཞུས་རྩ་བའི་བླ་མ་དེ། །རིགས་བདག་ཚུལ་དུ་དབུ་གཙུག་བཞུགས། །དེ་ཡི་མདུན་དུ་སྐྱབས་འགྲོ་བྱ། །སྐྱབས་ཡུལ་གཤེགས་སམ་མི་དམིགས་བྱ། །རང་ལ་བསྟིམ་པར་མ་བཤད་དོ། །བླ་མེད་ལུགས་ཀྱི་སྐྱབས་འགྲོ་ནི། །ནམ་མཁར་ཡི་དམ་དེ་ཉིད་བསྒོམ། །སྟེང་དུ་བླ་མ་རིགས་བདག་ཚུལ། །
སངས་རྒྱས་བྱང་སེམས་དཀྱིལ་འཁོར་ལྷ། །སྤྲིན་ཚོགས་བཞིན་དུ་གཏིབས་པར་བསྒོམ། །དེ་ཡི་མདུན་དུ་སྐྱབས་འགྲོ་བྱ། །ཕྱག་རྒྱ་ཆེན་པོའི་ལུགས་ལ་ནི། །མདུན་དུ་མཚོ་དབུས་དཔག་བསམ་གྱི། །ལྗོན་ཤིང་ཡལ་ག་ལྔ་ལྡན་པ། །དབུས་སུ་བླ་མ་རྡོ་རྗེ་འཆང་། །རྩ་བརྒྱུད་བླ་མ་ཀུན་གྱིས་བསྐོར། །གཡས་སུ་ཤཱཀ་ཐུབ་སངས་རྒྱས་ཚོགས་། །གཡོན་དུ་བྱམས་པ་དགེ་འདུན་ཚོགས། །རྒྱབ་ཏུ་དམ་ཆོས་གླེགས་བམ་ཚོགས། །མདུན་དུ་ཡི་དམ་རྒྱུད་སྡེའི་ལྷ། །བར་མཚམས་མཁའ་འགྲོ་ཆོས་སྐྱོང་ཚོགས། །དེ་རྣམས་སྒོམ་ལུགས་དབྱིབས་འདྲ་སྟེ། །ཚེ་ཁྲིད་ཐུགས་རྗེ་ཆེན་པོའི་ཁྲིད། །བྱེད་ཚེ་བླ་མ་འོད་དཔག་མེད། །ཡེ་ཤེས་སྤྱན་འདྲེན་མི་དགོས་ཏེ། །གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་དུ་ཐུབ་པ་བཞུགས། །དེ་ལྟར་ཤེས་པས་སྐྱབས་སུ་འགྲོ། །ལྗོན་ཤིང་མ་གཏོགས་སྒོམ་ལུགས་རྣམས། །ཁྲིད་རིམ་ཕལ་ཆེར་འདྲ་བ་ལ། །ཁྱད་པར་ཨ་རྫོགས་ཆེན་ཁྲིད་སོགས་ལ། །བླ་མ་ཀུན་ཏུ་བཟང་པོར་བསྒོམ། །དེ་འདྲའི་སྐྱབས་འགྲོ་ཚར་བའི་རྗེས། །སྐྱབས་ཡུལ་རང་གི་སྙིང་ཁར་བསྟིམ། །རང་གི་སེམས་ལ་ཧྲིག་གེར་
བལྟས། །ངོ་བོ་སྟོང་པ་ཆོས་སྐུར་མཐོང་། །རང་བཞིན་གསལ་བ་ལོངས་སྤྱོད་རྫོགས། །སྣ་ཚོགས་འགགས་མེད་སྤྲུལ་པའི་སྐུ། །དེ་གསུམ་དབྱེར་མེད་ངོ་བོ་ཉིད། །སྐུ་བཞིའི་བདག་ཉིད་སངས་རྒྱས་ཏེ། །རང་གི་སེམས་ལ་རྙེད་པ་ཡིས། །རྫོགས་སངས་རྒྱས་ལ་སྐྱབས་འགྲོ་ཡིན། །སྨྲ་བསམ་བརྗོད་མེད་རྒྱལ་བའི་ཡུམ། །རང་གི་སེམས་ལ་རྙེད་པ་ནི། །ཆོས་ལ་སྐྱབས་སུ་སོང་བ་ཡིན། །སངས་རྒྱས་ཆོས་གཉིས་སེམས་ལ་རྙེད། །རང་ཉིད་དགེ་འདུན་གྲལ་དུ་ཚུད། །དགེ་འདུན་ལ་ནི་སྐྱབས་སོང་ཡིན། །དེ་ལ་དགོངས་ནས་རྒྱུད་རྣམས་ནས། །རང་སེམས་སྐྱབས་ཀྱི་མཆོག་ཏུ་གསུངས། །ངོ་བོ་རང་བཞིན་ཐུགས་རྗེ་ལ། །སྐྱབས་སུ་མཆིའོ་གསུངས་པའི་དོན། །དོན་དམ་མཆོག་གི་སྐྱབས་འགྲོ་ཡིན། །སྐྱབས་སུ་འགྲོ་བའི་གླུ་ཆུང་འདི། །དགེ་སློང་རཱ་ག་ཨ་སྱ་ཡིས། །རྟ་ལོ་རྒྱལ་ཟླའི་ཚེས་གསུམ་ནུབ། །ཉམས་ལ་ཤར་ནས་སྨྲས་པ་སྟེ། །བརྩོན་འགྲུས་རྒྱ་མཚོས་བརྗེད་ཐོར་བྲིས། །ལེའུ་དྲུག་སྟེ་མངྒ་ལཾ།། །།