ལེའུ་བདུན་པ། ཅི་བྱེད་བྱང་ཆུབ་ལམ་དུ་འགྲོ་བའི་ཕྱིར། །སེམས་བསྐྱེད་གདམས་པ་བྱང་ཆུབ་གཞུང་ལམ་ཡོད། །
༼ཇ༽ རི་ཆོས་མཚམས་ཀྱི་ཞལ་གདམས་ལས། སེམས་བསྐྱེད་བྱང་ཆུབ་གཞུང་ལམ་བཞུགས་
སོ། །ན་མོ་གུ་རུ་བུདྡྷ་བོ་དྷི་སཏྭ་ཡེ། བླ་མ་བརྩོན་འགྲུས་རྒྱ་མཚོ་ཁྱེད། །ངེས་པར་དམ་ཆོས་བསྒྲུབ་དགོངས་ན། །སྔོན་བྱོན་སངས་རྒྱས་གཤེགས་པའི་ཤུལ། །མ་འོངས་རྒྱལ་བ་སྲས་བཅས་ཀུན། །ཐམས་ཅད་འབྱོན་པའི་གཞུང་ལམ་ནི། །ཐེག་ཆེན་སེམས་བསྐྱེད་ཁོ་ན་ལགས། །དེ་ལ་ཀླུ་སྒྲུབ་ཐོགས་མེད་གཉིས། །ཤིང་རྟའི་སྲོལ་ལམ་གཉིས་སུ་གྲགས། །རྒྱ་ཆེན་སྤྱོད་བརྒྱུད་ཐོགས་མེད་ལུགས། །འཁོར་ལོས་སྒྱུར་རྒྱལ་སྤྱན་འདྲེན་པའི། །ཁྱིམ་བཟང་གཙང་ཞིང་གདན་ཁྲི་དགོས། །དེ་མིན་རྒྱལ་པོ་འབྱོན་གནས་མེད། །དེ་བཞིན་ཐེག་ཆེན་སེམས་བསྐྱེད་ཀྱང་། །སུ་ཡིན་རྒྱུད་ལ་མི་སྐྱེ་སྟེ། །སོ་ཐར་སྡོམ་པ་ལེགས་བསྲུངས་ཤིང་། །ཐེག་ཆེན་སྡེ་སྣོད་ཤེས་པ་དགོས། །སེམས་བསྐྱེད་ཆོ་གའང་རྒྱས་པར་ཡོད། །ཟབ་མོ་ལྟ་བརྒྱུད་ཀླུ་སྒྲུབ་ལུགས། །གར་བཏབ་སྐྱེ་བའི་ས་བོན་བཞིན། །ཞུ་འདོད་རྗེས་ཟློས་ཤེས་པ་ན། །ཀུན་གྱི་རྒྱུད་ལ་སྐྱེ་བར་་བཤད། །གཉིས་ཀ་བླ་མར་ཞུ་བའམ། །མ་རྙེད་རང་གིས་ལེན་ཤེས་ནི། །རྟེན་གསུམ་དྲུང་ངམ་མི་འཛོམས་ཀྱང་། །སྐྱབས་ཡུལ་སྤྱན་དྲངས་དེ་དྲུང་བླངས། །ལན་གཅིག་
ཐོབ་ནས་མི་སྐྱུར་བར། །སྡོམ་པ་རྒྱས་ཤིང་འཕེལ་བའི་ཕྱིར། །རྒྱུན་དུ་རང་གིས་བླང་བར་བྱ། །ཉེས་ལྟུང་ཕྲ་ཞིབ་གང་བྱུང་རྣམས། །དེ་ཡིས་འཕྲལ་དུ་སོར་ཆུད་དེ། །སྒྲ་མི་སྙན་པའི་ལོངས་སྤྱོད་བཞིན། །ད་ལྟ་ཉམས་ཀྱང་ད་ལྟ་སྐྱེ། །དཔེར་ན་གསེར་འགྱུར་རྩི་ཡི་རྫ་ས། །ལྕགས་ལ་བྱུག་ན་གསེར་དུ་འགྱུར། །དེ་བཞིན་ཐ་མལ་སོ་སྐྱེ་ཡང་། །ཐེག་ཆེན་སེམས་བསྐྱེད་བླང་མ་ཐག །བྱང་ཆུབ་སེམས་དཔའི་རིགས་སུ་འགྱུར། །དེ་བཞིན་གཤེགས་པའི་རིགས་སུ་སྐྱེ། །སངས་རྒྱས་རྣམས་ཀྱི་སྲས་གྱུར་པས། །ཉན་ཐོས་དགྲ་བཅོམ་རང་རྒྱལ་ཚོགས། །ཐམས་ཅད་ཟིལ་གྱིས་གནོན་པ་སྟེ། །དཔེར་ན་རྒྱལ་པོ་ཆེན་པོའི་སྲས། །སྐྱེས་མ་ཐག་ཏུ་ཤེད་མེད་ཀྱང་། །བློན་པོའི་ཚོགས་ཀུན་ཟིལ་གནོན་འདྲ། །ལྷ་དང་བཅས་པའི་འཇིག་རྟེན་གྱིས། །བཀུར་སྟི་བྱས་ཀྱང་དཀོར་འཇུ་སྟེ། །འགྲོ་བ་སེམས་ཅན་མ་ལུས་པ། །སངས་རྒྱས་ས་ལ་བཀོད་སྙམ་པའི། །སེམས་བསྐྱེད་བསམ་པ་བཟང་ཕྱིར་རོ། །སེམས་བསྐྱེད་དོན་དེ་གང་ཞེ་ན། །སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །དེ་སྐད་རྒྱལ་བ་བྱམས་པས་
གསུངས། །དེ་ལ་རྣམ་པ་གཉིས་ཡིན་ཏེ། །སྨོན་པ་དང་ནི་འཇུག་པ་གཉིས། །སྨོན་པ་སངས་རྒྱས་ཐོབ་འདོད་བློ། །ཡིད་སྨོན་ལྟ་བུའི་སེམས་བསྐྱེད་ཡིན། །འཇུག་པ་སངས་རྒྱས་སྒྲུབ་པ་སྟེ། །ཕ་རོལ་ཕྱིན་དྲུག་སྤྱོད་པ་ཡིན། །ལེན་ཚུལ་ཆོས་སྤྱོད་རབ་གསལ་ནས། །བྱང་ཆུབ་སྙིང་པོར་མཆིས་ཀྱི་བར། །ཞེས་སོགས་གསུངས་པ་ཀླུ་སྒྲུབ་ལུགས། །དེ་ཉིད་ཁོ་ནར་འདུས་པ་ཡིན། །བསླབ་པ་སྲུང་ཚུལ་གྲངས་མང་ཡང་། །བཅོམ་ལྡན་འདས་ཀྱིས་རྒྱལ་པོ་ལ། །གདམས་པའི་མདོ་ཡི་དོན་བསྡུས་ན། །འཕགས་པ་རྣམས་དང་སོ་སྐྱེ་ཡི། །དགེ་བ་ཀུན་ལ་ཡི་རང་བསྒོམ། །དེ་ཡི་བསོད་ནམས་མཉམ་དུ་ཐོབ། །རང་གི་དགེ་རྩ་ཅི་འགྲུབ་བཅས། །གཅིག་ཏུ་བསྡུས་ཏེ་སེམས་ཅན་ཀུན་། །སངས་རྒྱས་ས་ལ་བཀོད་པའི་ཕྱིར། །རང་ཉིད་མྱུར་དུ་སངས་རྒྱས་པར། །སྨོན་ལམ་དུས་ཀུན་རྒྱུན་དུ་འདེབས། །དེ་ཡིས་འཐུས་པར་ཐུབ་པས་གསུངས། །འཇུག་པ་སེམས་བསྐྱེད་བསླབ་བྱ་ནི། །ཕར་ཕྱིན་དྲུག་ལ་ཅི་ནུས་འབད། །དེ་དག་ཀུན་རྫོབ་སེམས་བསྐྱེད་ལགས། །དོན་དམ་སེམས་བསྐྱེད་ཆོ་ག་ཡིས། །སྐྱེ་དང་མི་སྐྱེ་བཞེད་པ་
མང་། །འོན་ཀྱང་སྟོང་ཉིད་ལྟ་བ་དེ། །རྟོགས་ན་དོན་དམ་སེམས་བསྐྱེད་ལགས། །ཉམས་ལེན་གཙོ་བོ་གཏོང་ལེན་ཏེ། །བདག་བདེ་གཞན་གྱི་སྡུག་བསྔལ་གཉིས། །ཡང་དག་བརྗེ་བར་མ་བྱས་ན། །སངས་རྒྱས་ཐོབ་པའི་ཐབས་མེད་ཅིང་། །འཁོར་བ་ན་ཡང་བདེ་བ་མེད། །དེ་སྐད་སྤྱོད་འཇུག་གཞུང་ལས་གསུངས། །བདག་གཞན་དངོས་སུ་བརྗེ་བ་ནི། །ས་ཐོབ་མིན་པས་མི་རུང་སྟེ། །བརྗེས་ན་གེགས་དང་བར་ཆད་རྒྱུ། །རང་རེ་སོ་སོའི་སྐྱེ་བོ་རྣམས། །བསམ་པས་བདག་གཞན་བརྗེས་དམིགས་ན། །ཆོས་རྣམས་བསམ་པ་གཙོ་ཆེ་བས། །དངོས་སུ་བརྗེས་འདྲའི་ཕན་ཡོན་ཐོབ། །དེ་ཕྱིར་རླུང་ནི་ཕྱིར་འབུད་དུས། །རང་གི་བདེ་སྐྱིད་བསོད་ནམས་ཚོགས། །ཐམས་ཅད་འགྲོ་བ་ཀུན་ལ་བསྟིམ། །བདེ་བའི་རྒྱུ་ནི་དགེ་བ་དང་། །བདེ་བའི་འབྲས་བུ་བདེ་སྐྱིད་ལ། །འགྲོ་བ་ཐམས་ཅད་སྤྱོད་པར་བསྒོམ། །དེ་ནི་བྱམས་པ་ཚད་མེད་ཡིན། །རྒྱུན་དུ་བྱམས་པ་དེ་བསྒོམ་ན། །མེ་ཆུ་དུག་མཚོན་མི་ཚུགས་ཤིང་། །ལྷ་འདྲེ་མི་གསུམ་འདུ་ཞིང་བྱམས། །མཐར་ཐུག་སངས་རྒྱས་ཐོབ་པ་དང་། །གནས་སྐབས་ཚངས་པའི་རྒྱལ་པོར་སྐྱེས། །
བྱམས་པའི་གོ་ཆ་བླ་ན་མེད། །བདུད་ཀྱི་དཔུང་གིས་མི་ཚུགས་ཤིང་། །སྲུང་བ་ཀུན་གྱི་མཆོག་ཏུ་འགྱུར། །རླུང་ཞིག་ནང་དུ་རྔུབ་པའི་ཚེ། །འགྲོ་དྲུག་ཀུན་གྱི་སྡིག་སྒྲིབ་དང་། །སྡུག་བསྔལ་ཐམས་ཅད་བདག་ལ་བསྟིམ། །སྡུག་བསྔལ་རྒྱུ་ཡི་སྡིག་པ་དང་། །སྡུག་བསྔལ་འབྲས་བུ་འཁོར་བ་ཡི། །འགྲོ་ཀུན་སྡུག་བསྔལ་བྲལ་བར་བསྒོམ། །དེ་ནི་སྙིང་རྗེ་ཚད་མེད་དེ། །དང་པོར་སངས་རྒྱས་འཐོབ་པའི་རྒྱུ། །ས་བོན་ལྟ་བུ་ཡིན་པར་གསུངས།་་།བར་དུ་སངས་རྒྱས་འཐོབ་པའི་རྐྱེན། །སོ་ནམ་ཆུ་ལུད་འདྲ་བར་བཤད། །ཐ་མར་སངས་རྒྱས་ཐོབ་པའི་ཚེ། །ཕྲིན་ལས་འགྲོ་དོན་ཀུན་གྱི་སྒོ། །ལོ་ཏོག་ཕུན་སུམ་ཚོགས་པ་ལྟར། །སྙིང་རྗེ་དེ་ལས་འབྱུང་བར་གསུངས། །ཉན་ཐོས་རང་རྒྱལ་དགྲ་བཅོམ་སོགས། །བཅོམ་ལྡན་འདས་ཀྱི་གསུང་ལས་སྐྱེས། །རྫོགས་སངས་རྒྱས་པའི་བཅོམ་ལྡན་ཀུན། །བྱང་ཆུབ་སེམས་དཔའ་རྣམས་ལས་འཁྲུངས། །བྱང་ཆུབ་སེམས་དཔའ་ཐམས་ཅད་ཀྱང་། །སྙིང་རྗེ་ཉིད་ལས་འཁྲུངས་པའི་ཕྱིར། །ཆོས་ཀྱི་རྩ་བ་སྙིང་རྗེ་ལགས། །དེ་སྐད་དབུ་མ་འཇུག་པར་བཤད། །དཔེར་ན་འཁོར་ལོ་རིན་པོ་
ཆེ། །གང་གི་ལག་ཏུ་ཡོད་པ་དེར། །རྒྱལ་སྲིད་དཔལ་འབྱོར་ཐམས་ཅད་འབྱུང་། །དེ་བཞིན་སྙིང་རྗེ་ཆེན་པོ་དེ། །སུ་ལ་ཡོད་པའི་མི་དེ་ལ། །སངས་རྒྱས་ཆོས་ཀུན་ཐམས་ཅད་འདུ། །དེ་སྐད་མདོ་སྡེ་རྣམས་ནས་གསུངས། །དཔེར་ན་ལྕགས་ཀྱི་རིལ་བུ་ཞིག །ཆུ་རུ་འཕངས་ན་ཞབས་སུ་འགྲོ། །དེ་བཞིན་སེམས་བསྐྱེད་མི་ལྡན་པ། །སྡིག་པ་ཆུང་དུས་ངན་འགྲོར་ལྟུང་། །ལྕགས་སྣོད་ཆེན་པོ་ཁུང་མེད་པ། །ཆུ་རུ་སྐྱུར་ན་སྟེང་དུ་ལྡིང་། །དེ་བཞིན་སེམས་བསྐྱེད་ཐབས་མཁས་ན། །སྡིག་པ་ཆེ་ཡང་ལྟུང་མི་ནུས། །ཅི་ཕྱིར་སེམས་བསྐྱེད་ཐབས་མཁས་པས། །སྡིག་པ་ཕལ་ཆེར་དགེ་བར་འགྱུར། །གསང་སྔགས་རྒྱུད་གཞུང་ཐམས་ཅད་ནས། །སྦྱོར་སྒྲོལ་མཐུ་གཏད་རྫས་ངན་སེམས། །བསམ་མི་རུང་བ་མང་གསུངས་པའང་། །སེམས་བསྐྱེད་ཁོ་ནས་ཁ་བསྒྱུར་བས། །བྱང་ཆུབ་ལམ་དུ་འགྲོ་ཕྱིར་གསུངས། །གསང་སྔགས་ཀུན་གྱི་རྩ་བ་ནི། །སེམས་བསྐྱེད་འདི་ལ་ཐུག་ནི་གདའ་། །བརྩོན་འགྲུས་རྒྱ་མཚོའི་ཐུགས་ལ་ཆོངས། །འདི་ན་གནད་ཆེན་འདུག་གོ་ཨང་། །སེམས་བསྐྱེད་རྩི་ཡིས་མ་ཟིན་ན། །གསར་མའི་བདེ་དགྱེས་གསང་གསུམ་
དང་། །རྙིང་མའི་བཀའ་དགོངས་ཕུར་གསུམ་སོགས། །གསང་སྔགས་ཉམས་སུ་བླང་ལགས་ཀྱང་། །སྔགས་ནག་མུ་སྟེགས་ཆ་མཐུན་ཡིན། །ཕྱི་རབས་སྔགས་པ་ཀུན་གྱིས་ཀྱང་། །གནད་འདི་གོ་བར་མ་གྱུར་ན། །མི་ཚེར་བསྙེན་སྒྲུབ་བྱས་གྱུར་ཀྱང་། །ཚེ་གཅིག་སངས་རྒྱས་ལྟ་ཅི་སྨོས། །བྱང་ཆུབ་ལམ་དུའང་འགྲོ་བར་དཀའ། །དེ་བཞིན་དཀའ་ཐུབ་སྙིང་རུས་དང་། །སྡོམ་པ་དམ་ཚིག་གཙང་ན་ཡང་། །བྱང་ཆུབ་ལམ་དུ་མི་འགྲོ་སྟེ། །འབྲས་བུ་ཉན་ཐོས་རང་རྒྱལ་ཙམ། །སེམས་བསྐྱེད་འདི་དང་མ་ལྡན་ན། །ཟག་བཅས་མངོན་ཤེས་ལྔ་ཐོབ་ཀྱང་། །སངས་རྒྱས་ཐོབ་ལ་མི་ཕན་ཏེ། །ཕྱི་རོལ་པ་ཡི་དྲང་སྲོང་འདྲ། །འཁོར་སློབ་གདུལ་བྱ་ཆེ་ན་ཡང་། །བྱང་ཆུབ་འཐོབ་ལ་མི་ཕན་ཏེ། །དགེ་སློང་ལྷ་ཆེན་པོ་དང་འདྲ། །ཐུན་མོང་གྲུབ་ཆེན་བརྒྱད་ཐོབ་ཀྱང་། །བྱང་ཆུབ་འཐོབ་ལ་མི་ཕན་ཏེ། །བོན་དང་ཕྱི་པའི་གྲུབ་ཐོབ་འདྲ། །དེ་ལ་དགོངས་ནས་གླིང་རས་ཀྱིས། །ཐུན་མོང་གྲུབ་ཆེན་བརྒྱད་ཐོབ་ཀྱང་། །ངོ་མཚར་ཆེ་ཙམ་མ་གཏོགས་པ། །བྱང་ཆུབ་འཐོབ་ལ་དགོས་རྒྱུ་ཆུང་། །གསུངས་པའི་དོན་ཡང་དེ་ལྟར་རོ། །
སེམས་བསྐྱེད་དེ་དང་མ་ལྡན་ན། །དཀའ་ཐུབ་ཆུ་འཐུང་རྡོ་འཆའ་ཡང་། །བྱང་ཆུབ་ཐོབ་ལ་མི་ཕན་ཏེ། །དྲང་སྲོང་སྒོག་པོའི་ལུས་སྐམ་འདྲ། །བྱང་ཆུབ་སེམས་བསྐྱེད་དེ་བཟང་ན། །ཇི་ལྟར་བྱས་ཀྱང་བྱང་ཆུབ་ལམ། །བཟའ་དང་བཏུང་དང་ཉལ་བ་དང་། །བག་མེད་སྤྱོད་ཀྱང་བསོད་ནམས་ཚོགས། །རྒྱུན་མི་ཆད་པར་དུ་མ་ཞིག །དབྱར་གྱི་ཆུ་བཞིན་འཕེལ་བར་གསུངས། །གསང་སྔགས་བླ་མེད་རྒྱུད་རྣམས་ནས། །ཚེ་གཅིག་སངས་རྒྱས་འཐོབ་གསུངས་པའི། །རྒྱུ་ནི་སེམས་བསྐྱེད་འདི་ཉིད་ལ། །རྐྱེན་ནི་གསང་སྔགས་ཐབས་ཟབ་པས། །ཚེ་གཅིག་སངས་རྒྱས་འགྲུབ་པར་གསུངས། །སེམས་བསྐྱེད་རྩི་ཡིས་མ་ཟིན་ན། །དུག་ལྔ་ཡིད་ལ་མི་འགྱུ་ཞིང་། །སྟོང་ཉིད་ལྟ་བ་དངོས་རྟོགས་ཀྱང་། །དགྲ་བཅོམ་ཙམ་ཞིག་མ་གཏོགས་པ། །སངས་རྒྱས་ཐོབ་པའི་རེ་སྒོ་མེད། །དེ་ཕྱིར་ཆོས་རྣམས་ཀུན་གྱི་བཅུད། །ཆོ་ག་ཀུན་གྱི་སྔོན་འགྲོ་བ། །སྒོམ་སྒྲུབ་ཀུན་གྱི་དངོས་གཞིའི་དོན་། །འགྲོ་དོན་ཕྲིན་ལས་འབྱུང་བའི་རྒྱུ། །བྱམས་དང་སྙིང་རྗེ་སེམས་བསྐྱེད་ཡིན། །དེ་ལས་ཟབ་པའི་ཆོས་གཞན་ཞིག །མདོ་རྒྱུད་ཀུན་ན་མ་མཆིས་པས། །འདི་ལ་
གཡེལ་ཆུང་མ་མཛད་པར། །བརྩོན་འགྲུས་རྒྱ་མཚོས་ཉམས་སུ་ལོངས། །དེ་སྐད་རྟ་ལོ་རྒྱལ་གྱི་ཟླ། །ཡར་ཚེས་བཞི་ཡི་དགོང་ཐུན་སྐབས། །རཱ་ག་ཨ་སྱས་གང་དྲན་སྨྲས། །ཀརྨ་བཱིརྱས་ཡི་གེར་བྲིས། །ལེའུ་བདུན་པ་མངྒ་ལཾ།། །།