ལེའུ་བརྒྱད་པ། རང་གཞན་དཀོན་མཆོག་ཐུགས་རྗེས་སྐྱོབ་པའི་ཕྱིར། །ཐུགས་དམ་སྐྱབས་འཇུག་ཐུགས་རྗེའི་བསིལ་གྲིབ་ཡོད། །
༼ཉ༽ རི་ཆོས་མཚམས་ཀྱི་ཞལ་གདམས་ལས། ཐུགས་དམ་སྐྱབས་འཇུག་ཐུགས་རྗེའི་བསིལ་གྲིབ་ཞེས་བྱ་བ་བཞུགས་སོ། །ན་མོ་རཏྣ་ཏྲ་ཡཱ་ཡ། ཡོན་ཏན་ཕུན་ཚོགས་རིན་ཆེན་ཏོག་འབར་བ། །ཐུགས་རྗེ་སྨོན་ལམ་ལྷ་རྫས་འཁོར་ཡུག་ཅན། །མོས་གུས་གསེར་གྱི་ཡུ་བས་རབ་བཏེགས་ནས། །འཁོར་བའི་ཚ་གདུང་སེལ་བའི་བསིལ་བྱེད་ཡིན། །ཤི་གསོན་གང་ལའང་ཐུགས་དམ་སྐྱབས་འཇུག་ཐབས། །སངས་རྒྱས་སྤྱན་གྱིས་དུས་དྲུག་འགྲོ་ལ་གཟིགས། །སེམས་ཅན་ཀུན་ལ་མ་ཡི་བུ་ལྟར་བརྩེ། །སྟོབས་བཅུའི་སྟོབས་མངའ་བདུད་ཀྱི་དཔུང་རྣམས་འཇོམ། །དེ་ལ་སྐྱབས་ཞུས་སྐྱོབ་ངེས་སྐྱབས་ཀྱི་ཨ་མཆོག །ཕྱག་ཆེན་སྔོན་འགྲོ་བཞི་སྦྱོར་སྒོམ་པའི་ཞོར། །དམིགས་པ་གཞན་རྣམས་གཞུང་ལྟར་ཡིན་པ་ལ། །ཟུར་འདེབས་ཐུགས་དམ་སྐྱབས་འཇུག་དམིགས་པ་ནི། །སྐྱབས་
འགྲོའི་སྐབས་སུ་བདག་དང་བསྲུང་བྱ་ཡི། །གཙོ་བྱས་འགྲོ་དྲུག་སེམས་ཅན་ཐམས་ཅད་ཀྱིས། །གུས་ཏེ་ཐལ་སྦྱར་སྐྱབས་འགྲོ་བྱེད་པར་བསམ། །གཞུང་གི་སྐྱབས་འགྲོ་སེམས་བསྐྱེད་ཚར་བའི་རྗེས། །བླ་མ་དཀོན་མཆོག་གསུམ་ལ་སྐྱབས་སུ་མཆི། །ཞེས་པ་དེ་ལ་བརྒྱ་རྩ་བརྒྱད་ཙམ་བརྗོད། །སྐྱབས་ཡུལ་འོད་ཞུ་བདག་དང་བསྲུང་བྱ་ལ། །ཐིམ་པས་དཀོན་མཆོག་བྱིན་རླབས་ཞུགས་པར་བསམ། །བདག་དང་བསྲུང་བྱ་སྐྱབས་ཡུལ་དབྱེར་མེད་པ། །སྟོང་ཉིད་ཉམས་ལེན་ངང་ལ་ཡུད་ཙམ་བཞག །དེ་ཡིས་ཀུན་རྫོབ་དོན་དམ་སྐྱབས་འགྲོ་ཚང་། །དཀོན་མཆོག་སྐྱབས་འོག་ངེས་པར་ཚུད་པ་ཡིན། །བདག་གཞན་སྐྱེ་བ་འདི་དང་སྐྱེ་བ་གཞན། །སྡུག་བསྔལ་འབྱུང་བའི་རྒྱུ་ནི་སྡིག་སྒྲིབ་ཡིན། །རྒྱུ་དེ་མེད་ན་འབྲས་བུ་རང་འགག་འགྲོ། །རྡོར་སེམས་སྒོམ་བཟླས་གཞུང་ལྟར་བསྒོམ་པའི་ཚེ། །རང་གི་སྤྱི་བོར་རྡོ་རྗེ་སེམས་དཔའ་ལས། །རང་འདྲའི་རྡོ་རྗེ་སེམས་དཔའ་མང་པོ་འཕྲོས། །ཤི་གསོན་བསྲུང་བྱ་ཀུན་གྱི་སྤྱི་བོར་བཞུགས། །གཞུང་གི་ཡིག་བརྒྱ་བཤགས་ཚིག་ཚར་བའི་རྗེས། །རྡོར་སེམས་ཀུན་གྱི་སྐུ་ལས་བདུད་རྩི་བབས། །བདག་གཞན་
ཀུན་གྱི་སྡིག་སྒྲིབ་དག་པར་བསྒོམ། །ཨོཾ་བཛྲ་སཏྭ་ཧཱུཾ། རྡོར་སེམས་འབྲུ་དྲུག་དེ་ལ་བརྒྱ་རྩ་བཟླས། །རྡོར་སེམས་འོད་ཞུ་བདག་གཞན་སོ་སོར་བསྟིམ། །བཤགས་བྱ་བཤགས་བྱེད་བཤགས་པ་མི་དམིགས་པ། །ཉམས་ལེན་སྟོང་ཉིད་ངང་ལ་ཐུན་གཅིག་བཞག །དེ་ཡིས་ཀུན་རྫོབ་དོན་དམ་བཤགས་པ་ཚང་། །སྔོན་གྱི་ལས་ངན་ཡོད་ཀྱང་སྲབ་པར་ནུས། །ཚེ་འདི་དང་ནི་ཚེ་རབས་གཞན་དུ་ཡང་། །བདེ་སྐྱིད་འབྱུང་བའི་རྒྱུ་ནི་བསོད་ནམས་ཚོགས། །དཀའ་ཚེགས་མེད་པར་བསག་ཐབས་མཎྜལ་ཟབ། །གཞུང་ལྟར་མཆོད་ཡུལ་དཀོན་མཆོག་ནམ་མཁར་དམིགས། །བདག་དང་བསྲུང་བྱའི་ལུས་དང་ལོངས་སྤྱོད་དང་། །དུས་གསུམ་བསགས་པའི་དགེ་རྩ་གཅིག་ཏུ་བསྡུས། །གླིང་བཞི་རི་རབ་བྱེ་བ་ཕྲག་བརྒྱར་སྤྲུལ། །ལྷ་མའི་ལོངས་སྤྱོད་འདོད་ཡོན་ཕྱུར་བུར་གཏམས། །གཞུང་ལྟར་མཎྜལ་འབུལ་ཚིག་རྫོགས་པའི་རྗེས། །གུ་རུ་དེ་བ་ཌཱ་ཀི་ནི་རཏྣ་མཎྜལ་པྲ་སྒྱུ་ཏཱིཙྪ་སྭཱ་ཧཱ། མཎྜལ་འབུལ་སྔགས་དེ་ལ་བརྒྱ་རྩ་བརྗོད། །ནམ་མཁའི་ལྷ་ཚོགས་བདག་དང་བསྲུང་བྱར་བསྟིམ། །ཉམས་ལེན་སྟོང་ཉིད་ངང་ལ་ཐུན་གཅིག་བཞག །སྔོན་མ་
བསོད་ནམས་རྗེས་ནི་ཡེ་ཤེས་ཚོགས། །ཚོགས་གཉིས་འཕེལ་བས་བསོད་ནམས་སྐྱེ་བར་འགྱུར། །རང་གཞན་ལུས་ངག་ཡིད་གསུམ་བྱིན་རླབས་ཐབས། །མོས་གུས་བླ་མའི་རྣལ་འབྱོར་ཟབ་པའི་ཕྱིར། །རང་གི་སྤྱི་བོར་རྩ་བརྒྱུད་བླ་མ་བསྒོམ། །གཞུང་ལྟར་གསོལ་འདེབས་མང་ཉུང་གང་བྱེད་མཇུག །བླ་མ་རིན་པོ་ཆེ་ལ་གསོལ་བ་འདེབས། །ཚིག་གཅིག་དེ་ལ་བརྒྱ་དང་རྩ་བརྒྱད་བརྗོད། །རྩ་བརྒྱུད་བླ་མའི་སྐུ་ལས་འོད་ཟེར་འཕྲོས། །བསྲུང་བྱ་ཀུན་གྱི་ཚངས་པའི་ལམ་ནས་ཞུགས། །སྡིག་སྒྲིབ་ནག་ཉིལ་འོག་སྒོ་རྐང་མཐིལ་ཐོན། །ལུས་ནི་དྲི་མེད་ཤེལ་སྒོང་ལྟ་བུར་གྱུར། །འོད་ཟེར་དེ་ཡང་ཁོ་རང་རྣམས་ལ་ཐིམ། །བླ་མ་རྣམས་ཀྱི་བྱིན་རླབས་ཞུགས་པར་དམིགས། །རྩ་བརྒྱུད་བླ་མ་རང་ལ་བསྟིམ་པ་ལས། །གཞན་ལ་བསྟིམ་པའི་གསལ་ཁ་མ་མཐོང་ངོ་། །སྔོན་འགྲོ་བཞི་སྦྱོར་ཐུགས་དམ་སྐྱབས་འཇུག་ནི། །གསར་རྙིང་ཁྲིད་རིམ་འགའ་ཡི་ཟུར་ནས་འབྱུང་། །དྲིན་ཅན་བླ་མའི་གསུང་ལས་དངོས་སུ་ཐོས། །དེ་ཕྱིར་རིག་བཟོ་ཡིན་པར་མི་དགོངས་འཚལ། །དཀོན་མཆོག་ཐུགས་རྗེ་ཨེ་འོང་ཨེ་འོང་ཞེས། །སྨྲ་བ་མང་སྟེ་ཐུགས་རྗེ་བསྐུལ་ཤེས་
དགོས། །རྔ་ལྕག་མེད་ན་རྔ་ལ་སྐད་མི་འབྱུང་། །དེ་ཕྱིར་བརྩོན་འགྲུས་རྒྱ་མཚོས་བསྐུལ་བྱས་ནས། །རཱ་ག་ཨ་སྱ་ཞེས་པའི་རི་ཁྲོད་པས། །ཤིང་སྦྲུལ་སྨིན་དྲུག་ཟླ་བའི་ཉེར་བདུན་ནུབ། །སྨྲས་པའི་ཡི་གེ་པ་ནི་བསྐུལ་བ་པོ། །འདི་ཡིས་གཞན་ཕན་རྒྱ་མཚོ་འབྱུང་བར་ཤོག །ལེའུ་བརྒྱད་པ་མངྒ་ལཾ།། །།