ལེའུ་དགུ་པ། ཉམ་ཆུང་ནད་པ་སོགས་ལ་ཕན་པའི་ཕྱིར། །ཐུན་སྐབས་དམིགས་ཐུན་བར་ཆད་ཀུན་སེལ་ཡོད། །
༼ཏ༽ རི་ཆོས་མཚམས་ཀྱི་ཞལ་གདམས་ལས། དམིགས་ཐུན་བར་ཆད་ཀུན་སེལ་ཞེས་བྱ་བ་བཞུགས་སོ། །ན་མོ་མ་ཧཱ་ཀ་རུ་ཎི་ཀ་ཡེ། རི་བོ་གྲུ་འཛིན་རྩེ་རུ་ལེགས་འཁྲུངས་པའི། དཔག་བསམ་གོར་ཤི་ཤ་ཡི་ལྗོན་པ་དེ། །མན་ངག་ཟབ་མོའི་སེར་བུ་འདིས་བསྐྱོད་པས། །ཕན་བདེའི་དྲི་བསུང་ཕྱོགས་བརྒྱར་ཁྱབ་བྱེད་ཡིན། །དེང་སང་དུས་ངན་སྙིགས་མ་ལྔ་བདོ་བས། །ནད་གདོན་བྱད་ཁ་འཇིགས་སུ་རུང་རྣམས་ཀྱིས། །མི་རྣམས་གློ་བུར་ཡེ་འདྲོགས་བར་ཆད་མང་། །དེ་ཚེ་ཅི་འབྱོར་དངོས་པོ་སྐུར་བྱེད་ཅིང་། །དམིགས་ཐུན་ཞུའོ་སྒྱུ་ཟེར་བའི་སྲོལ་འདི་འཇིགས། །དམིགས་པ་མ་བྱས་ནོར་བླང་ཡོན་བདག་བསླུས། །གཅོད་དམིགས་བྱས་ན་ཚར་ལྷོང་འགྲིག་པ་དཀའ། །ཚར་སློང་མ་འགྲིག་རང་གཞན་གཉིས་
ཀར་གནོད། །།སྦྱིན་བདག་ཕལ་ཆེར་བསྟན་དགྲ་ལྷ་འགྲས་ཆེ། །སྲུང་ཟློག་དམིགས་པ་བསྒོམ་ན་ཆོས་སྐྱོང་ཁྲོ། །བྱད་ཁ་ཆེ་ན་རང་གི་སྲོག་ལ་གཟན། །དེ་ཕྱིར་རང་ལ་མི་གནོད་གཞན་ཕན་ཆེ། །རྒྱུད་སྡེ་ཆེན་པོ་ནས་གསུངས་ཕུགས་ཆེ་ཞིང་། །མན་ངག་ཟབ་མོས་བརྒྱན་པའི་རྣོ་ནུས་ཅན། །ཉམས་མྱོང་ལྡན་པའི་མན་ངག་འདི་ལྟར་རོ། །རང་ཉིད་ཡི་དམ་རྒྱལ་བ་རྒྱ་མཚོའམ། །སྤྱན་རས་གཟིགས་ཀྱི་རིགས་ནི་གང་རུང་བསྒོམ། །ནད་པ་དེ་ཡི་སྤྱི་གཙུག་ཟླ་བའི་སྟེང་། །སྤྱན་རས་གཟིགས་དབང་དཀར་པོ་ཞལ་གཅིག་པ། །ཕྱག་གཉིས་གཡས་པ་སྐྱབས་སྦྱིན་གཡོན་པད་དཀར། །སྐྱིལ་ཀྲུང་དར་དང་རིན་ཆེན་རྒྱན་རྣམས་རྫོགས། །ཐུགས་ཀར་ཟླ་སྟེང་ཧྲིལ་སྔགས་གཡས་བསྐོར། །དེ་ལས་འོད་འཕྲོས་ཡེ་ཤེས་སྤྱན་དྲངས་བསྟིམ། །འཇིགས་པ་འཇིགས་པ་མེད་པ་སྦྱིན་པ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་དེ་ལ་ཕྱག་འཚལ་ལོ། །ཕྱག་འཚལ་ལོ། །ནད་པ་སྨྲེ་འདི་ནད་དང་གདོན་གྱི་འཇིགས་པ་འདི་ལས་ཐར་བར་མཛད་དུ་གསོལ། གསོལ་བ་བཏབ་པས་སྐུ་ལས་བདུད་རྩི་བབས། །ནད་གདོན་ཀུན་དག་
བདེ་བས་ལུས་ཁེངས་བསྒོམ། །ཨོཾ་མ་ཎི་པདྨེ་ཧཱུཾ། རྒེའི་ནད་སརྦ་ཤཱནྟི་ཀུ་རུ་ཡེ་སྭཱ་ཧཱ། སྔགས་གྲངས་མང་ཉུང་སྐབས་དང་བསྟུན་ནས་བཟླས། །སྤྱི་བོའི་ལྷ་ཉིད་འོད་ཞུ་ནད་པར་བསྟིམ། །མདོ་སྡེ་པད་དཀར་རྡོ་རྗེ་གུར་གྱི་རྒྱུད། །གནམ་ཆོས་ཐུགས་གཏེར་གསུམ་གྱི་དོན་བསྡུས་ཡིན། །དུས་འཁོར་ཡུམ་མཆོག་སྒྲོལ་མ་སྣ་ཚོགས་ཡུམ། །གཙོ་རྐྱང་སྐུ་རུ་རང་ཉིད་བསྒོམ་པའམ། །ཡང་ན་གཉིས་མེད་རྒྱུད་མཆོག་ཡིན་གསུངས་ཕྱིར། །རང་ཉིད་རྒྱལ་བ་རྒྱ་མཚོ་བསྒོམས་ཀྱང་རུང་། །རང་གི་ཐུགས་ཀའི་འོད་ཟེར་རྩེ་མོ་ལ། །སྣ་ཚོགས་ཡུམ་ནི་དཀར་མོ་ཕྱག་གཉིས་པ། །གཡས་པས་བུམ་པ་གཡོན་པས་པད་དཀར་འཛིན། །གླང་ཆེན་དཀར་པོའི་སྟེང་ན་བཞུགས་པ་ཞིག །འོད་ཟེར་རྩེ་ལ་བསྐྱོན་དེ་དྲུང་དེར་བཏང་། །ཕྱག་གི་བུམ་པས་ནད་པར་ཁྲུས་བྱས་པས། །ནད་གདོན་དག་ནས་ཤེལ་སྒོང་ལྟ་བུར་གྱུར། །སྤྲུལ་པའི་ལྷ་མོ་མང་པོས་གླུ་དབྱངས་བཅས། །མེ་སྒྱུ་ཏོག་ཆར་འབེབས་ཤིས་པ་བརྗོད་པར་བསམ། །ཨོ་ཕྲེམ་བི་ཤྭ་མ་ཏ་སྭཱ་ཧཱ། །ཧྥེའི་ནད་གདོན་སརྦ་ཤཱནྟཾ་ཀུ་རུ་ཡེ་སྭཱ་ཧཱ། །མང་ཉུང་གལ་དང་བསྟུན་ཏེ་བརྗོད་པར་བྱ། །ལྷ་མོ་
ནད་པར་བསྟིམ་མམ་རང་ལ་བསྡུ། །འདི་ཡི་དབང་ནི་སྒྲུབ་ཐབས་རྒྱ་མཚོར་ཡོད། །དམིགས་པ་དུས་འཁོར་རྒྱུད་འགྲེལ་རྣམས་ནས་གསུངས། །འཇིགས་པ་བཅུ་དྲུག་ལ་སོགས་སྐྱོབ་པའི་ཚུལ། །འགྲེལ་ཆེན་དྲི་མེད་འོད་ལས་རྒྱ་ཆེར་བཤད། །སྦྱིན་བདག་གཅིག་གི་བད་ཀན་མིག་སྒྲིབ་ནས། །ཟླ་གཅིག་ཙམ་ཞིག་བདག་གིས་ཐུན་རེ་བསྒོམས། །ནད་པའི་རྨི་ལམ་བུད་མེད་རས་དཀར་ཅན། །གཅིག་གིས་ཁྲུས་བྱས་རྨིས་པའི་ཕྱིར་ནངས་ནས། །མིག་གསལ་ལམ་མཐོང་དེ་ནས་ཇེ་གསལ་སོང་། །དེ་ཕྱིར་བདག་ཀྱང་ངེས་ཤེས་ཐོབ་པ་ཡིན། །ཡང་ན་རང་ཉིད་སྒྲོལ་དཀར་བསྒོམ་པའམ། །ཡང་ན་ཐུགས་རྗེ་ཆེན་པོ་བསྒོམ་ཡང་རུང་། །རང་གི་ཐུགས་ལས་འཕྲོས་པའི་འོད་ཟེར་གྱིས། །པོ་ཊ་ལ་ནས་སྒྲོལ་དཀར་སྤྱན་དྲངས་ཏེ། །ནད་པའི་ཐད་ཀྱི་ནམ་མཁར་བཞུགས་པར་དམིགས། །ཡིད་ཀྱིས་འཇིགས་པ་ཞི་བར་གསོལ་བ་བཏབ། །སྐུ་ལས་བདུད་རྩི་འོ་མའི་རྒྱུན་བཞིན་བབས་། །ནད་པ་ལ་ཐིམ་ནད་གདོན་དག་པར་བསམ། །འཁོར་བ་ལས་སྒྲོལ་ལ་སོགས་བསྟོད་པའམ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཧྥེའི་ནད་གདོན་སརྦ་ཤཱནི་ཀུ་རུ་ཡེ་སྭ་ཧཱ། །
མཐར་ནི་སྒྲོལ་མ་ན་ས་དེ་རུ་བསྟིམ། །ཐུན་གཅིག་བསྒོམ་པས་ནད་ལས་གྲོལ་བ་ནི། །བཀའ་གདམས་དགེ་བཤེས་མང་པོས་མྱོང་གྲུབ་གསུངས། །དེ་བཞིན་ཆུ་དང་གཡང་ས་དགྲ་རྐུན་ཇག །ནད་རིམས་འཁྲུག་པ་ལམ་དགྲ་ལ་སོགས་པ། །ཉམ་ངའི་ཕྱོགས་སུ་རང་གཞན་འགྲོ་བ་ན། །གོང་ལྟར་སྒྲོལ་དཀར་སྐྱབས་སྦྱིན་ཕྱག་རྒྱ་ཅན། །དེ་ཐད་ནམ་མཁར་སྤྱན་དྲངས་བཞུགས་པར་དམིགས། །སྔགས་ལ་འཇིགས་པ་གང་ཡིན་བསྒྱུར་ཁ་བྱ། །དེ་ཡིས་གནོད་པ་ཐམས་ཅད་སྐྱོབ་པ་ནི། །གདན་བཞིའི་རྒྱུད་དང་སྒྲོལ་མའི་བསྟོད་འབུམ་དང་། །སྒྲོལ་དཀར་ལས་ཚོགས་བླ་མའི་གསུང་རྒྱུན་རྣམས། །གཅིག་ཏུ་བསྡུས་ཤིང་རང་གི་ཉམས་མྱོང་ཡིན། །མན་ངག་དེ་གསུམ་རང་ལ་མི་གནོད་ཅིང་། །ཡོན་བདག་ལ་ཡང་འདི་ཕྱི་ཀུན་ལ་ཕན། །འདི་ནི་འཁྱག་སྒུར་ནུས་པའི་སྙིང་རུས་ཅན། །གདམས་ངག་བྲི་བར་ནུས་པའི་བརྩོན་འགྲུས་ཅནོ། །བརྩོན་འགྲུས་རྒྱ་མཚོས་བསྐུལ་སྒྱུ་ཞིང་བྲིས་པར་བྱས། །ཤིང་སྦྲུལ་སྨིན་དྲུག་ཟླ་བའི་ཉེར་བརྒྱད་ནུབ། །དཔལ་ལྡན་བླ་མའི་དུས་མཆོད་ཚར་བའི་སྐབས། །དགེ་སློང་རཱ་ག་ཨ་སྱས་སྨྲས་པ་འདིས། །ཕྱི་རབས་འགྲོ་བ་མང་པོར་ཕན་ཐོགས་ཤོག །ལེའུ་དགུ་པ་སྟེ་མངྒ་ལཾ།། །།