ལེའུ་བཅུ་པ། ཚེ་རབས་ལས་ཀྱི་སྡིག་སྒྲིབ་སྦྱོང་བའི་ཕྱིར། །སྒྲིབ་སྦྱོང་ཞལ་གདམས་བདུད་རྩིའི་ཆུ་རྒྱུན་ཡོད། །
༼ཐ༽ རི་ཆོས་མཚམས་ཀྱི་ཞལ་གདམས་ལས། སྒྲིབ་སྦྱོང་བདུད་རྩིའི་ཆུ་རྒྱུན་བཞུགས་སོ། །ན་མོ་བཛྲ་སཏྲ་ཡེ། གསོན་དང་བླ་མ་བརྩོན་འགྲུས་རྒྱ་མཚོ་བ། །རང་རེ་མི་རྣམས་དགྲ་ལ་ཞེ་སྡང་ཆེ། །དམའ་བར་ཐུབ་ཀྱང་མི་ཚིམ་གསོད་སྙིང་འདོད། །དགྲ་དེ་རྩད་ནས་བརླག་སྟེ་མེད་པར་འདོད། །ལེགས་པར་དཔྱད་ན་དགྲ་ཀུན་གཉེན་གྱི་མཆོག །ཚེ་རབས་མང་པོའི་ཕ་མ་དྲིན་ཅན་ལགས། །དགྲ་རྣམས་ཕལ་ཆེར་གཉེན་དུ་གྱུར་པ་མང་། །གལ་ཏེ་དགྲ་ཡིས་ཤིན་ཏུ་གནོད་ན་ཡང་། །ལན་གཅིག་གསོད་ཀྱིས་ཡང་ཡང་གསོད་པ་མིན། །སྐྱེ་བ་འདི་དང་ཚེ་རབས་ཐམས་ཅད་དུ། །གནོད་ཅིང་འཚེ་བའི་དགྲ་ནི་སྡིག་པ་ཡིན། །དམྱལ་བའི་གནས་སུ་ལན་གྲངས་གྲངས་མེད་དུ། །ཡང་ཡང་སོས་ཀྱང་ཡང་ཡང་གསོད་པར་བྱེད། །སྡིག་སྒྲིབ་འདི་ནི་དགྲ་བོ་མ་རུངས་པ། །འདི་ཉིད་མེད་ཐབས་བརླག་ཐབས་བྱེད་ནུས་ན། །ཕོ་རྒོད་ཡིན་ནོ་བརྩོན་འགྲུས་རྒྱ་མཚོ་བ། །བཤགས་པ་མ་ཐེང་སྡིག་ནི་ཆུང་ན་ཡང་། །ཞག་རེ་སོང་ཞིང་སྐྱེད་ནི་རེ་རེ་འགྲོ། །བླུན་པོའི་
སྡིག་པ་ཆུང་ཡང་ལྗིད་ཅེས་བཤད། །བཤགས་པ་ཐེངས་ན་རྩད་ནས་མ་དག་ཀྱང་། །སྐྱེད་མི་འཕེལ་བས་ཉེས་པ་ཆུང་བ་སྟེ། །མཁས་པའི་སྡིག་སྒྲིབ་ཆེ་ཡང་ཡང་ཞེས་བཤད། །བཤགས་པ་མ་ཐེང་སྡིག་ལྟུང་ཆུང་ངུ་ཡང་། །བསྐལ་པ་བྱེ་བ་བརྒྱར་ཡང་ཆུད་མི་ཟ། །གཞན་ལ་མི་སྨིན་ས་རྡོ་ལ་མི་སྨིན། །རང་གི་ཕུང་ཁམས་སྐྱེ་མཆེད་ཉིད་ལ་སྨིན། །བཤགས་པ་ཤེས་ན་སྡིག་ལྟུང་མི་དག་མེད། །མ་སྐྱེས་དགྲ་ཡིས་ཕ་བསད་བསྟན་པ་བཤིག །རྒྱལ་བའི་སྐུ་ལ་ངན་སེམས་ཁྲག་ཀྱང་བྱུང་། །སོར་མོའི་ཕྲེང་གིས་མི་ནི་དགུ་བརྒྱ་དང་། །གོ་དགུ་བསད་པའང་བཤགས་པ་རེ་རེས་དག །དཔེར་ན་མེ་སྟག་གཅིག་གིས་རྩྭ་ཕུང་ནི། །ཆེན་པོ་སྲེག་ལྟར་བཤགས་པ་རེ་རེས་ཀྱང་། །སྡིག་ལྟུང་ཆེན་པོ་འདག་པར་ཐུབ་པས་གསུངས། །དེ་ལྟར་འདག་ལ་བཤགས་པའི་གདམས་ངག་དགོས། །གདམས་ངག་སྟོབས་བཞིའི་སྒོ་ནས་བཤགས་པ་ཡིན། །རྟེན་གྱི་སྟོབས་ནི་རྟེན་གསུམ་བྱིན་རླབས་ཅན། །དཀྱིལ་འཁོར་གཉེན་པོའམ་ནི་བླ་མའི་དྲུང་། །མེད་ན་སངས་རྒྱས་བྱང་སེམས་སྤྱན་དྲངས་དྲུང་། །རྣམ་པར་སུན་འབྱིན་སྟོབས་ནི་སྡིག་ལྟུང་རྣམས། །བཙན་
དུག་ཁོང་དུ་ཤོར་བཞིན་འགྱོད་སེམས་བསྐྱེད། །གཉེན་པོ་ཀུན་ཏུ་སྤྱོད་པའི་སྟོབས་ཞེས་པ། །ཕྱག་བསྐོར་ལ་སོགས་དགེ་བ་མཐའ་དག་སྟེ། །མཆོག་ཏུ་གྱུར་པ་རྡོར་སེམས་སྒོམ་བཟླས་ཡིན། །ཆུར་ལོན་སྟོབས་ནི་ཕྱིན་ཆད་སྡིག་ལྟུང་ལས། །མི་བྱའི་དམ་བཅའ་དྲག་པོ་བཟུང་བའོ། །དེ་ཡི་གནད་ལ་སྔར་བྱས་སྡིག་ལྟུང་རྣམས། །ང་ཡིས་དེ་ཐུབ་སྙམ་པའི་ང་རྒྱལ་དང་། །གཞན་ལ་ངོམས་ཤིང་ངོ་ཚ་མེད་པ་ན། །དེ་ཡིས་བཤགས་ཀྱང་འདག་པར་མི་འགྱུར་རོ། །སྡིག་ལྟུང་བྱས་ཀྱང་སྐྱོན་མེད་བཤགས་ཆོག་བསམ། །ཕྱིན་ཆད་གཅོད་ཅིང་སྡོམ་པར་མ་བྱས་ན། །དེ་ཡིས་བཤགས་ཀྱང་འདག་པར་མི་འགྱུར་གསུངས། །བཤགས་པའི་གསང་སྔགས་ཡི་གེ་འབྲུ་བརྒྱ་པ། །ཐུན་མཚམས་རྣམས་སུ་ཉེར་གཅིག་རེ་བརྗོད་པས། །ཉེས་ལྟུང་གང་བྱས་འཕེལ་བར་མི་འགྱུར་ཞེས། །རྒྱ་བོད་མཁས་གྲུབ་ཐམས་ཅད་དགོངས་པ་མཐུན། །ལན་གཅིག་ཙམ་ཞིག་བརྗོད་པར་བྱས་ན་ཡང་། །ཉེས་ལྟུང་ཐམས་ཅད་འདག་པར་འགྱུར་རོ་ཞེས། །རྟ་མཆོག་རོལ་པའི་རྒྱུད་ནས་གསུངས་པ་བཞིན། །གྲངས་ཀྱི་ཚད་ནི་འབུམ་ཕྲག་གཅིག་ཡིན་ཏེ། །སྙིགས་མའི་དུས་སུ་བཞི་འགྱུར་
དགོས་གསུངས་པས། །གཞན་དང་ངག་མ་འདྲེས་པར་འབུམ་ཕྲག་བཞི། །བཟླས་ན་རྩ་བའི་དམ་ཚིག་ཉམས་པ་ཡང་། །སོར་ཆུད་འགྱུར་བ་གསར་རྙིང་དགོངས་པ་མཐུན། །གལ་ཏེ་ཡིག་བརྒྱ་དག་པར་ཀློག་དཀའ་ན། །རྩ་བའི་སྙིང་པོ་ཡི་གེ་འབྲུ་དྲུག་པ། །འབུམ་ཕྲག་བཅུ་དྲུག་བཟླས་ཀྱང་འདྲ་བ་སྟེ། །ཚེ་འདིར་རྩ་བའི་དམ་ཚིག་ཉམས་པ་རྣམས། །མནར་མེད་དམྱལ་བའི་འོག་གི་བྱང་ཤར་ཕྱོགས། །མདོ་ནས་དམྱལ་བ་ཤམ་བྷ་ལ་ཞེས་བཤད། །སྔགས་ནས་རྡོ་རྗེ་དམྱལ་བ་ཞེས་གསུངས་ཏེ། །དམྱལ་ཁམས་བཅོ་བརྒྱད་ལས་ཀྱང་བདུན་འགྱུར་གྱི། །སྡུག་བསྔལ་ཆེ་ཞིང་བར་མཚམས་མེད་པ་སྟེ། །དེ་ཡི་སྡུག་བསྔལ་དང་ནི་ཚེ་ཡི་ཚད། །བཅོམ་ལྡན་འདས་ཀྱིས་གསུངས་པར་མི་ཕོད་དེ། །གསུངས་ན་བྱང་ཆུབ་སེམས་དཔའ་སྙིང་རྗེ་ཅན། །ཐམས་ཅད་ཁ་ནས་ཁྲག་སྐྱུག་འཆི་བར་བཤད། །དེ་རུ་སྐྱེ་བའི་ཆག་ཉམས་སྡིག་སྒྲིབ་ཀྱང་། །རྡོར་སེམས་སྒོམ་བཟླས་གླུ་བསྐྱེད་རིམ་གསལ་བ་དང་། །སྙིང་པོ་འབྲུ་དྲུག་བཟླས་པའི་གྲངས་ཐེམ་ན། །དམྱལ་ཁམས་དེ་རུ་སྐྱེ་བར་མི་འགྱུར་ཞེས། །ཕྱག་རྡོར་གོས་སྔོན་ཅན་གྱི་རྒྱུད་ལས་གསུངས། །
སྡིག་ལྟུང་དྲག་པོས་ནོན་པའི་མི་རྣམས་ལ། །གདམས་པ་འདི་ནི་ཡིད་བཞིན་རིན་པོ་ཆེ། །བརྒྱ་སྟོང་བས་ཀྱང་རིན་ཐང་མི་ཆེ་རེ། །དེ་ཕྱིར་བླ་མ་བརྩོན་འགྲུས་རྒྱ་མཚོ་ཁྱོད། །གདམས་པ་འདི་ཡིས་འགྲོ་དོན་དཔག་མེད་མཛོད། །ཁྲིད་རིམ་ཀུན་གྱི་ཐོག་མར་འདི་ཉིད་ཤོད། །ལྭ་བ་བཀྲུས་ན་ཚོས་མདོག་ལེགས་པ་ལྟར། །སྡིག་སྒྲིབ་དག་ན་ཉམས་རྟོགས་སྐྱེ་བར་སླ། །ཐབས་ལམ་བསྒོམ་ན་བདེ་དྲོད་སྐྱེ་བའི་ཐབས། །འདི་ཉིད་ཟབ་ཅེས་སྟག་ལུང་ཐང་པས་བཞེད། །མ་མགོན་ལ་སོགས་ཆོས་སྐྱོང་སྒྲུབ་ན་ཡང་། །ཉམས་ཆག་འདག་ཕྱིར་འཁུ་ལྡོག་འོང་བ་མིན། །ནད་གདོན་འབྱུང་བའི་རྒྱུ་ནི་སྡིག་སྒྲིབ་སྟེ། །སྡིག་སྒྲིབ་མེད་ན་ནད་གདོན་ག་ལ་འབྱུང་། །རྐྱེན་ངན་བཟློག་ལ་འདི་བས་ཟབ་པ་མེད། །སྒྲུབ་པའི་རྟགས་མཚན་མི་གསལ་སྒྲིབ་པས་བསྒྲིབས། །དག་སྣང་གསལ་ཐབས་འདི་ལས་ཟབ་པ་མེད། །ཕྱག་རྒྱ་ཆེན་པོའི་ངོ་བོ་མི་མཐོང་བ། །ལྷན་ཅིག་སྐྱེས་པ་མ་རིག་སྒྲིབ་པས་་བསྒྲིབས། །སྒྲིབ་པ་དེ་བསལ་ངོ་བོ་ཅིས་མི་མཐོང་། །རྟོགས་པ་སྐྱེ་ཐབས་འདི་ལས་ཟབ་པ་མེད། །མདོར་ན་མང་པོ་བརྗོད་པས་ཅི་ཞིག་བྱ། །དེ་ཉིད་ཁོ་ནས་སངས་རྒྱས་
འཐོབ་པར་གསུངས། །དེ་ཕྱིར་བརྩོན་འགྲུས་རྒྱ་མཚོས་ཉམས་ལེན་མཛོད།། ༈ །།ན་མོ་གུ་རུ་བཛྲ་སཏཱ་ཡེ། གསོན་དང་བླ་མ་བརྩོན་འགྲུས་རྒྱ་མཚོ་བ་། །རྡོར་སེམས་སྒོམ་བཟླས་ཕྱི་ནང་གསང་བ་དང་། །ཡང་གསང་བཞི་ཡི་དམིགས་རིམ་གལ་ཆེ་ཞིང། །རང་ཉིད་ཐ་མལ་སྤྱི་བོར་པད་དཀར་དང་། །ཟླ་སྟེང་ཧཱུཾ་ཡིག་དཀར་པོའི་འཕྲོ་འདུ་ལས། །རྡོ་རྗེ་སེམས་དཔའ་སྐུ་མདོག་ཤེལ་གྱི་མདོག །དར་དང་རིན་ཆེན་དུ་མས་སྐུ་ལ་བརྒྱན། །ཕྱག་གཡས་རྡོ་རྗེ་ཐུགས་ཀར་བཏོད་དེ་འཛིན། །གཡོན་པས་དྲིལ་བུ་དཀུར་བརྟེན་ཞབས་ཕྱེད་སྐྱིལ། །ཐུགས་ཀར་ཟླ་སྟེང་ཧཱུྃ་ལ་ཡིག་བརྒྱས་བསྐོར། །དེ་ལས་འོད་འཕྲོས་ཕྱོགས་བཅུའི་སངས་རྒྱས་དང་། །བྱང་སེམས་ཐམས་ཅད་སྤྱན་དྲངས་དབྱེར་མེད་བསྟིམ། །སྔགས་ཕྲེང་བདུད་རྩིའི་རྒྱུན་བབས་སྐུ་ལུས་གང་། །ཞབས་གཡས་མཐེ་བོང་རྩེ་ནས་བདུད་རྩི་རྡོལ། །ཚངས་བུག་ནས་ཞུགས་ལུས་གང་སྡིག་སྒྲིབ་སྒྱུ་ཀུན་། །འོག་སྒོ་དང་ནི་རྐང་པའི་མཐིལ་གཉིས་ནས། །དུད་ཁུ་སོལ་ཁུ་ལྟ་བུར་ས་འོག་སོང་། །དེ་ལྟར་བསྒོམ་ཞིང་ཡིག་བརྒྱའམ་འབྲུ་དྲུག་བཟླས། །རང་ལུས་ཤེལ་སྒོང་ལྟར་
གྱུར་བདུད་རྩིས་གང་། །དཔེར་ན་ཤེལ་བུམ་འོ་མས་གང་བ་བཞིན། །རྡོར་སེམས་ཞལ་ནས་རིགས་ཀྱི་བུ་ཁྱོད་ཀྱི། །སྡིག་སྒྲིབ་དག་གོ་གསུངས་ནས་འོད་དུ་ཞུ། །བདག་ལ་དབྱེར་མེད་ཐིམ་བསྒོམ་ངོ་བོ་ལྟ། །དེ་ནི་ཕྱི་ཡི་རྡོར་སེམས་སྒོམ་བཟླས་ཏེ། །གསར་རྙིང་ཁྲིད་རིམ་ཕལ་ཆེར་དགོངས་པ་མཐུན། །ཡང་ན་རང་གི་སྤྱི་བོའི་གཙུག་རོལ་ན། །པདྨ་འདབ་བཞིའི་དབུས་དང་འདབ་མ་བཞིར། །ཉ་རྒྱས་ཟླ་བའི་དཀྱིལ་འཁོར་ལྔ་ཡི་སྟེང་། །ཨོཾ་ཧཱུཾ་སྭཱ་ཨཱ༔ཧཱ་ཡི་ཡི་གེ་ལྔ། །ཡོངས་སུ་གྱུར་ལས་རིགས་ལྔའི་རྡོར་སེམས་ནི། །དཀར་སྔོ་སེར་དམར་ལྗང་བའི་སྐུ་མདོག་ཅན། །གཡས་ཀྱི་ཕྱག་རྣམས་འཁོར་ལོ་རྡོ་རྗེ་དང་། །རིན་ཆེན་པདྨ་རྒྱ་གྲམ་ཐུགས་ཀར་འཛིན། །གཡོན་རྣམས་དེས་མཚན་དྲིལ་བུ་དཀུ་ལ་བརྟེན་། །ལོངས་སྤྱོད་རྫོགས་སྐུ་དར་དང་རིན་ཆེན་བརྒྱན། །ཀུན་ཀྱང་རྒྱལ་པོ་རོལ་པའི་འདུག་སྟངས་ཅན། །སོ་སོའི་ཐུགས་ཀར་སོ་སོའི་ས་བོན་མཐར། །སོ་སོའི་ཡི་གེ་བརྒྱ་པས་བསྐོར་བ་ལས། །འོད་ཟེར་འཕྲོས་པས་ཕྱོགས་བཅུའི་ཞིང་ཁམས་ནས། །རིགས་ལྔའི་རིགས་སུ་གཏོགས་པའི་སངས་རྒྱས་དང་། །བྱང་སེམས་ཐམས་ཅད་སྤྱན་དྲངས་དབྱེར་
མེད་བསྟིམ། །རིགས་ལྔའི་སྐུ་ལས་བདུད་རྩི་ཁ་དོག་ལྔ། །བབས་པ་ཚངས་བུག་ནས་ཞུགས་ལུས་གང་བས། །དུག་ལྔའི་སྒོ་ནས་བསགས་པའི་སྡིག་སྒྲིབ་དག །འགྲོ་བ་ལམ་རྒྱུད་ལྔ་ཡི་སྐྱེ་སྒོ་བཅད། །ཡེ་ཤེས་ལྔ་ཡི་བདུད་རྩིས་བདག་ལུས་གང་། །རྡོར་སེམས་རིགས་ལྔས་ཡིག་བརྒྱ་རིགས་ལྔ་ཡི། །སྔགས་སྒྲ་སྒྲོག་པས་འགྲོ་ཀུན་སྒྲིབ་པ་སྦྱང་། །ཨོཾ་བུདྡྷ་སཏྭ་ས་མ་ཡ། ཞེས་སོགས་དེ་བཞིན་གཤེགས་པའི་ཡིག་བརྒྱ་དང་། །བསྡུ་ན་ཨོཾ་བུདྡྷ་སཏྭ་ཧཱུཾ། ཧཱུཾ་བཛྲ་སཏྭ་ས་མ་ཡ། ཞེས་སོགས་རྡོ་རྗེ་རིགས་ཀྱི་ཡིག་བརྒྱ་དང་། །བསྡུ་ན་ཨོཾ་བཛྲ་སཏྭ་ཧཱུཾ། སཱ་རཏྣ་སཏྭ་ས་མ་ཡ། ཞེས་སོགས་རིན་ཆེན་རིགས་ཀྱི་ཡིག་བརྒྱ་དང་། །བསྡུ་ན་ཨོ་རཏྣ་སཏྭ་ཧཱུྃ། ཨཱཔདྨ་སཏཱ་ས་མ་ཡ། ཞེས་སོགས་པདྨ་རིགས་ཀྱི་ཡིག་བརྒྱ་དང་། །བསྡུ་ན་ཨོ་པདྨ་སཏྭ་ཧཱུཾ། ཧ་ཀརྨ་སཏྭ་ས་མ་ཡ། ཞེས་སོགས་ཀརྨ་རིགས་ཀྱི་ཡིག་བརྒྱ་དང་། །བསྡུ་ན་ཨོ་ཀརྨ་སཏྭ་ཧཱུཾ། ཞེས་པ་སྒྱུ་རྣམས་ནི་ཅི་ནུས་བརྗོད་བྱ་ཞིང་། །རྒྱས་པར་སྤྲོ་ན་རུ་ཏྲའི་སྨྲེ་བཤགས་འདོན། །འབྲིང་ལ་བཤགས་རྒྱུད་ལེའུ་རྒྱབ་མ་འདོན། །བསྡུ་ན་ལུས་ཀྱི་ལས་ནི་རྣམ་པ་གསུམ། །ཞེས་
སོགས་བརྗོད་པས་རིགས་ལྔ་འོད་དུ་ཞུ། །རང་ལ་ཐིམ་བསམ་མི་དམིགས་ངང་ལ་བཞག །དེ་ནི་ན་རཀ་དོང་སྤྲུགས་རྒྱུད་ཆེན་གྱི། །དགོངས་པ་ཡིན་ཏེ་ན་རཀ་དོང་སྤྲུགས་དོན། །དེ་ནི་ནང་གི་རྡོར་སེམས་སྒོམ་བཟླས་ཡིན། །རང་གི་སྤྱི་བོར་པདྨ་ཉི་མའི་སྟེང་། །ཧཱུྃ་ལས་བླ་མ་རྡོར་སེམས་ཧེ་རུ་ཀ་།སྐུ་མདོག་དཀར་པོ་ཞལ་གཅིག་སྤྱན་གསུམ་པ། །ཁྲོ་འཛུམ་དབུ་སྐྲ་གྱེན་བརྫེས་ཐོད་སྐམ་བརྒྱན། །རྡོ་རྗེ་ཕྱར་ཞིང་བྷནྡྷ་ཐུགས་ཀར་འཛིན། །རུས་རྒྱན་སྟག་ཤམ་གླང་ཆེན་ཀོ་རློན་གསོལ། །ཡུམ་ནི་རྡོ་རྗེ་སྙེམས་མ་སྐུ་མདོག་དམར། །གཅེར་བུ་རུས་རྒྱན་ཡབ་དང་གཉིས་མེད་སྦྱོར། །རོལ་སྟབས་སམ་ནི་གཡས་བསྐུམ་གཡོན་བརྐྱང་གར། །རང་འོད་མེ་དཔུང་འཁྲུགས་པའི་ཀློང་ན་བཞུགས། །ཐུགས་ཀར་ཟླ་སྟེང་ཧཱུྃ་ལ་སྔགས་ཀྱིས་བསྐོར། །བླ་མ་ཡི་དམ་ཌཱཀྐི་ཐམས་ཅད་ནི། །སྤྱན་དྲངས་བསྟིམས་པས་ཡབ་ཡུམ་བདེ་བ་རྒྱས། །སྦྱོར་མཚམས་བྱང་སེམས་རྒྱུན་བབས་ཚངས་བུག་ཞུགས། །ལུས་གང་སྡིག་སྒྲིབ་དག་ཅིང་བདེ་དྲོད་འབར། །ཨོཾ་ཤྲཱི་ཧེ་རུ་ཀ་སཏྭ་ས་མ་ཡ། ཞེས་སོགས་ཧེ་རུ་ཀ་ཡི་ཡིག་བརྒྱའམ། །ཨོཾ་ཨཱགུ་རུ་བཛྲ་སཏྭ་ཧཱུཾ། དེ་
གཉིས་གང་རུང་ཅི་ནུས་བཟླས་པའི་རྗེས། །མགོན་པོ་བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་ཀྱེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །བླ་མ་རྡོར་སེམས་འོད་ཞུ་བདག་ལ་ཐིམ། །དེ་ནི་གསང་བའི་རྡོར་སེམས་སྒོམ་བཟླས་ལགས། །གསར་རྙིང་བཀའ་གཏེར་རྒྱུད་ཀྱིདགོངས་པའོ། །མི་དམིགས་ངང་ལས་རང་ཉིད་སྐད་ཅིག་གིས། །རྡོ་རྗེ་སེམས་དཔའ་ཞི་འཛུམ་ཞལ་གཅིག་པ། །རིགས་ལྔས་དབུ་བརྒྱན་རིན་ཆེན་རྒྱན་རྣམས་རྫོགས། །རྡོ་རྗེ་བཏོད་ཅིང་དྲིལ་བུ་དཀུ་ལ་བརྟེན། །དར་དཀར་སྟོད་གཡོགས་སྨད་དཀྲིས་རོལ་སྟབས་ཀྱིས། །པད་ཟླ་གླང་ཆེན་བརྒྱད་ཀྱི་ཁྲི་ལ་བཞུགས། །ཐུགས་ཀར་ཉ་རྒྱས་ཟླ་སྟེང་ཧཱུྃ་ཡིག་མཐར། །ཡི་གེ་བརྒྱ་པ་སྐར་མའི་ཕྲེང་བ་བཞིན། །དེ་ལས་འོད་འཕྲོས་སངས་རྒྱས་བྱང་སེམས་སྒྱུ་ཀུན་། །སྤྱན་དྲངས་སྔགས་ཕྲེང་ལ་བསྟིམ་གཡས་སུ་འཁོར། །བདུད་རྩིའི་རྒྱུན་བབས་བདག་ལུས་ལྟེམས་སེ་གང་། །སྡིག་སྒྲིབ་ནད་གདོན་བ་སྤུའི་བུ་ག་ནས། །ནག་དང་ཉིལ་
ཉིལ་ཕྱིར་ཐོན་བདག་ཉིད་ནི། །ཤེལ་སྒོང་བཞིན་དུ་དྲི་མ་དག་པར་བསྒོམ། །ཡིག་བརྒྱ་འམ་ནི་སྙིང་པོ་ཅི་ནུས་བཟླས། །རྗེས་སུ་ཨགྷཾ་སོགས་བརྗོད་བདག་བསྐྱེད་མཆོད། །རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་དང་པོ་ཀུན་ཏུ་བཟང་། །རྡོ་རྗེ་དེ་བཞིན་གཤེགས་པ་ཀུན། །ཕྱག་འཚལ་རྡོ་རྗེ་སེམས་དཔའ་ལའོ། །ཡེ་ཤེས་མི་གཤེགས་མི་དམིགས་ངང་ལ་བཞག །བདུན་བརྒྱ་ཉི་ཤུའི་ལྷ་འདུས་རིགས་བརྒྱ་སྟེ། །རིགས་བརྒྱ་བསྣུས་ན་རིགས་ནི་ཉི་ཤུ་ལྔ། །ཉེར་ལྔ་བསྡུས་པ་རྒྱལ་བ་རིགས་ལྔ་སྟེ། །རིགས་ལྔ་གཅིག་བསྡུས་རིགས་གཅིག་རྡོ་རྗེ་སེམས། །འདི་འགྲུབ་སངས་རྒྱས་ཐམས་ཅད་འགྲུབ་པ་ཡིན། །བཀའ་བརྒྱད་ཞི་ཁྲོ་ཀུན་གྱི་དོན་འདུས་ཏེ། །ཡང་གསང་རྡོ་རྗེ་སེམས་དཔའི་སྒོམ་བཟླས་སོ། །ཆོས་ཀུན་རྟེན་འབྲེལ་བསླུ་བ་མེད་པ་ཡི། །སྡིག་པ་སྦྱོང་ཐབས་མཆོག་ཏུ་ཟབ་པའོ། །སྡིག་དང་བཤགས་པ་གཉིས་ཀ་ཀུན་རྫོབ་སྟེ། །ངེས་པའི་དོན་ལ་སྡིག་དང་བཤགས་པ་མེད། །སྡིག་དང་ཉེས་ལྟུང་གདོད་ནས་མ་གྲུབ་སྟེ། །གདོད་ནས་རྣམ་དག་ཆོས་ཀྱི་དབྱིངས་དེ་ལ། །དགེ་བས་མ་ཕན་སྡིག་པས་གནོད་མ་བསྐྱལ། །དམྱལ་བར་
སྲེག་ཀྱང་ངན་དུ་མ་སོང་བ། །རྫོགས་སངས་རྒྱས་ཀྱང་བཟང་དུ་མ་སོང་བ། །ནམ་མཁའ་བཞིན་དུ་ཅིས་ཀྱང་མ་གོས་པ། །བཤགས་བྱ་བཤགས་བྱེད་བཤགས་པའི་སྤྲོས་དང་བྲལ། །དེ་དོན་རྟོགས་ན་དོན་གྱི་བཤགས་པ་སྟེ། །དྲི་མེད་བཤགས་རྒྱུད་ལེའུ་དང་པོའི་དོན།། དོན་ཉམས་སུ་ལེན་པར་འདོད་པ་ན། །སེམས་ཀྱིས་སེམས་ལ་བལྟས་ཏེ་ཀློད་དེར་བཞག །དེ་དོན་ཏེ་ལོ་པ་ཡི་ཞལ་ནས་ཀྱང་། །བསྐལ་པ་སྟོང་དུ་བསགས་པའི་མུན་པ་ཡང་། །སྒྲོན་མེ་གཅིག་གིས་བསལ་བ་དེ་བཞིན་དུ། །རང་རིག་འོད་གསལ་རྟོགས་པའི་སྐད་ཅིག་ལ། །བསྐལ་པར་བསགས་པའི་མ་རིག་སྡིག་སྒྲིབ་བསྲེག །བསྟན་པའི་སྒྲོན་མེ་ཞེས་ནི་བཤད་པ་ཡིན། །ཞེས་སོགས་གསུངས་པའང་དེ་ལ་དགོངས་པ་སྟེ། །རང་གི་སེམས་ཉིད་གཞོམ་གཞིག་བྲལ་བ་ན། །ལེགས་པར་རྟོགས་པ་དོན་གྱི་རྡོ་རྗེ་ཡིན། །དེ་ཉིད་སེམས་ཀྱིས་ལེགས་པར་བསྒོམ་པ་ནི། །དོན་གྱི་རྡོ་རྗེ་སེམས་དཔའ་སྒྱུ་ཡིན་པ་སྟེ། །གཞན་ནས་མི་འཚོལ་རང་སེམས་ངོ་བོ་སྐྱོང་། །དེ་ཁོ་ན་ཡི་རྡོར་སེམས་སྒོམ་བཟླས་ཡིན། །དེ་ལྟར་ཕྱི་ནང་གསང་བ་ཡང་གསང་དང་། །དེ་བཞིན་ཉིད་ཀྱི་རྡོར་
སེམས་སྒོམ་བཟླས་ལྔ། །ཉམས་སུ་བླངས་ན་སྡིག་ལྟུང་རྩད་ནས་གཅོད། །མི་ལུས་དོན་ལྡན་བདེ་ནས་བདེ་བར་འགྲོ། །དེ་རྟགས་དངོས་སུ་ཁམས་བདེ་རིག་པ་དྭངས། །ངེས་འབྱུང་དད་པ་ཉམས་རྟོགས་ཤུགས་ཀྱིས་སྐྱེ། །རྨི་ལམ་ཁྲུས་བྱས་གོས་དཀར་གསར་པ་གྱོན། །བདུད་རྩི་འོ་མ་འཐུང་དང་ནམ་མཁར་འཕུར། །དེ་སོགས་དག་སྣང་དཔག་མེད་འཆར་བར་འགྱུར། །སྒྲིབ་སྦྱང་གླུ་ཆུང་ཚིགས་བཅད་ཟུང་ཅིག་འདི། །རྟ་ལོ་རྒྱལ་ཟླའི་ཡར་ཚེས་ལྔ་ཡི་ནུབ། །རཱ་ག་ཨ་སྱས་བྱུང་རྒྱལ་སྨྲས་པ་སྟེ། །བཱིརྱ་སཱ་ག་ར་ཡིས་ཡི་གེར་བློབྲིས། །འབྲེལ་ཚད་སྒྲིབ་གཉིས་སྦྱོང་བའི་བདུད་རྩིར་ཤོག །ལེའུ་བཅུ་སྟེ་མངྒ་ལཾ།། །།