ལེའུ་བཅུ་གཅིག་པ། དཀའ་ཚེགས་མེད་པར་བསོད་ནམས་ཚོགས་རྫོགས་ཕྱིར། །མཎྜལ་གདམས་པ་བསོད་ནམས་རི་བོ་ཡོད། །
༼ད༽ རི་ཆོས་མཚམས་ཀྱི་ཞལ་གདམས་ལས། མཎྜལ་བསོད་ནམས་རི་བོ་ཞེས་བྱ་བ་བཞུགས་སོ། །ན་མོ་རཏྣ་གུ་རུ་ཡེ། གསོན་དང་པདྨ་ཐབས་མཁས་པ། །སྐྱེ་བ་འདི་ནས་ཚེ་རབས་ཀུན། །བདེ་སྐྱིད་འབྱུང་བའི་རྒྱུ་གཅིག་པུ། །བསོད་ནམས་ཚོགས་ནི་བསག་དགོས་ཏེ། །མཐར་ཐུག་སངས་རྒྱས་ཐོབ་དུས་ཀྱང་། །མཚན་དང་དཔེ་བྱད་བརྒྱན་པའི་སྐུ། །བསོད་ནམས་ཚོགས་ལས་འབྱུང་བ་ཡིན། །
བསོད་ནམས་ཚོགས་ནི་བསག་པའི་ཐབས། །བསམ་གྱིས་མི་ཁྱབ་གྲངས་མང་ཡང་། །མཎྜལ་ལས་ནི་ཟབ་པ་མེད། །འདུས་བྱས་དགེ་བ་གཞན་རྣམས་ནི། །ཡར་ལ་མཆོད་དང་མར་ལ་སྦྱིན། །འབུལ་བ་འགྱེད་དང་མང་ཇ་སོགས། །དེ་བཞིན་ལྷ་བྲི་རྟེན་བཞེངས་སོགས། །རྒྱུ་ཡི་དངོས་པོ་བཏང་དགོས་རྣམས། །དྲི་མ་གསུམ་དང་ལྡན་པར་བཤད། །དང་པོ་སྒྲུབ་ཚེ་སྡིག་དང་འདྲེས། །དངོས་གཞིའི་སྐབས་སུ་དཀའ་ཚེགས་སྡིག །རྗེས་ནས་སེར་སྣའི་དྲི་མ་འདྲེས། །མཎྜལ་དྲི་མ་དེ་རྣམས་མེད། །ལག་པ་བརྐྱང་ནས་བསོད་ནམས་ཚོགས། །བསྒྲུབ་ལ་མཎྜལ་ལས་ཟབ་པ། །མེད་པར་གླིང་རྗེ་རས་པས་གསུངས། །མདོ་སྔགས་གསར་རྙིང་དགོངས་པ་མཐུན། །དེ་ཕྱིར་མཎྜལ་ལག་ཏུ་ལོངས། །དེ་ལ་ཕྱི་ནང་གསང་བ་གསུམ། །ཕྱི་ལྟར་མདུན་གྱི་ནམ་མཁའ་ལ། །སངས་རྒྱས་བྱང་སེམས་ཐམས་ཅད་བསྒོམ། །མཎྜལ་དངོས་སུ་ཡོད་ན་ཕུལ། །མེད་ན་་མཎྜལ་ཕྱག་རྒྱ་བྱ། །དེ་ཉིད་གླིང་བཞི་རི་རབ་བཅས། །ལྷ་མའི་ལོངས་སྤྱོད་ཀུན་གྱིས་བཀང་། །བྱེ་བ་ཕྲག་བརྒྱར་སྤྲུལ་ཏེ་འབུལ། །གཞན་ཡང་སྟོང་གསུམ་འཇིག་རྟེན་
དང་། །སངས་རྒྱས་ཞིང་ཁམས་ཐམས་ཅད་ན། །མཆོད་པའི་རྣམ་པ་ཅི་ཡོད་ཀུན། །ཐམས་ཅད་བློ་ཡིས་བླངས་ཏེ་འབུལ། །བསོད་ནམས་དངོས་སུ་ཕུལ་དང་མཉམ། །གོང་གི་དྲི་མ་དེ་གསུམ་མེད། །མཆོད་ཡུལ་རང་ལ་མི་བསྟིམ་སྟེ། །རང་བཞིན་གཤེགས་སམ་མི་དམིགས་བྱ། །དེ་ནི་ཕྱི་ཡི་མཎྜལ་ཡིན། །མདུན་གྱི་ནམ་མཁར་བླ་མ་དང་། །ཡི་དམ་ལྷ་ཚོགས་ཐམས་ཅད་བསྒོམ། །བེམ་རིག་བྲལ་ཡང་མི་དགོས་ཏེ། །རང་ལུས་མཎྜལ་དམིགས་ལ་ཕུལ། །ཡན་ལག་བཞི་ནི་གླིང་བཞིར་དམིགས། །སྒལ་ཚིགས་རི་བོ་མཆོག་རབ་སྟེ། །ལྤགས་པ་དབང་ཆེན་གསེར་གྱི་གཞི། །དབུ་མ་དཔག་བསམ་ལྗོན་པའི་ཤིང་། །སྙིང་ནི་ཡིད་བཞིན་ནོར་བུ་སྟེ། །ཤ་ཁྲག་རུས་པ་དོན་སྣོད་རྣམས། །ལྷ་མའི་འདོད་ཡོན་དཔག་མེད་སྤྲུལ། །མཆོད་པའི་ལྷ་མོ་བཅུ་དྲུག་དང་། །ཟག་མེད་བདེ་བ་བསྐྱེད་པ་ཡི། །མཆོད་རྫས་དཔག་མེད་སྤྲུལ་ཏེ་འབུལ། །མཆོད་ཡུལ་ལྷ་རྣམས་རང་ལ་བསྟིམ། །དེ་ནི་ནང་གི་མཎྜལ་ཡིན། །མདུན་གྱི་ནམ་མཁར་བླ་མ་དང་། །ཡི་དམ་ལྷ་ཚོགས་སྤྲིན་བཞིན་བསམ། །རང་སེམས་ཡིད་བཞིན་ནོར་བུར་བསྒོམ། །དེ་ལས་
ཡིད་ཀྱིས་སྤྲུལ་པ་ཡི། །ཀུན་ཏུ་བཟང་པོའི་རྣམ་ཐར་བཞིན། །ནམ་མཁའི་མཐར་ཐུག་ཞིང་ཁམས་ཀུན། །མཆོད་པའི་སྤྲིན་གྱིས་དགྱེས་པར་འགེངས། །ཕྱོགས་བཅུ་དུས་གསུམ་བདེ་གཤེགས་ལ། །རྒྱུན་ཆད་མེད་པར་མཆོད་པར་དམིགས། །དེ་ནི་གསང་བའི་མཎྜལ་ཡིན། །དེ་ལྟར་ཕྱི་ནང་གསང་བ་ཡི། །མཎྜལ་གསུམ་པོ་རྒྱུན་དུ་འབུལ། །མཎྜལ་ཁོ་ན་རྩེ་གཅིག་ཏུ། །བདུན་གཅིག་བདུན་གཉིས་བདུན་གསུམ་ཙམ། །དམ་པར་མཚམས་བསྡམས་ཕུལ་བ་ན། །དངོས་སུ་སེམས་དགའ་རིག་པ་དྭངས་། །ཟས་མ་ཟོས་ཀྱང་བཀྲེས་པ་མེད། །རྨི་ལམ་ཉི་ཟླ་ཤར་བ་དང་། །དར་ཕྱར་དུང་འབུད་ཁྲི་ལ་འདུག །དམར་པོ་མིན་པའི་མེ་ཏོག་ཚལ། །ལོ་ལེགས་རིན་ཆེན་གཏེར་ཁ་རྙེད། །དེ་དག་བསོད་ནམས་ཚོགས་རྫོགས་རྟགས། །རྟགས་ཙམ་བྱུང་བས་མི་ཆོག་སྟེ། །བྱང་ཆུབ་མ་ཐོབ་བར་དུ་ནི། །བསོད་ནམས་ཚོགས་ལ་འབད་པར་བྱ། །རྒྱུན་དུའང་མཎྜལ་རྒྱས་པ་རེ། །བསྡུས་པ་ཤོ་ལོ་ཀ་རེ་ཙམ། །ཤིན་ཏུ་བསྡུས་ན་མཎྜལ་སྔགས། །བརྒྱ་རྩ་རེ་ཙམ་བརྗོད་པར་བྱ། །དམིགས་པའང་དེ་བཞིན་བརྒྱ་རྩ་བྱ། །
ཁྱད་པར་ཕྱག་རྒྱ་ཆེན་པོའི་ལུགས། །སྒྲུབ་པའི་མཎྜལ་བཟང་བ་ལ། །ཚོམ་བུ་ལྔ་ནི་བཀོད་བྱའོ། །རིན་ཆེན་གཞལ་ཡས་ཁང་དུ་དམིགས། །དེ་དབུས་རིན་ཆེན་ཁྲི་ལྔའི་སྟེང་། །དབུས་མར་བླ་མ་རྡོ་རྗེ་འཆང་། །རྩ་བརྒྱུད་བླ་མ་ཀུན་གྱིས་བསྐོར། །གཡས་སུ་ཤཱཀ་ཐུབ་སངས་རྒྱས་ཚོགས། །གཡོན་དུ་ཉེ་སྲས་དགེ་འདུན་ཚོགས། །རྒྱབ་ཏུ་དམ་ཆོས་གླེགས་བམ་ཚོགས། །མདུན་དུ་ཡི་དམ་རྒྱུད་སྡེའི་ལྷ། །ཁྲི་ལྔའི་བར་མཚམས་ཆོས་སྐྱོང་ཚོགས། །སྤྱན་འདྲེན་བཞུགས་གསོལ་རྒྱས་པའམ། །བསྡུ་ན་ཡིད་ཀྱིས་བསྒོམ་པས་འཐུས། །དེ་ཡི་མདུན་དུ་མཎྜལ་འབུལ། །ཚོགས་ཞིང་ལྷ་ཚོགས་བདག་ལ་བསྟིམ། །དེ་དག་ཀུན་རྫོབ་མཎྜལ་ཡིན། །དེ་ནས་སེམས་ཀྱིས་སེམས་ལ་བལྟ། །མ་ཡེངས་ལྷུག་པར་མཉམ་པར་བཞག །དེ་ནི་ཡེ་ཤེས་ཚོགས་བསག་ཐབས། །དེ་གཉིས་ཟུང་འཇུག་བྱུང་ན་རབ། །མ་བྱུང་རེས་མོས་བྱ་བ་སྟེ། །ཏེ་ལོ་པ་ཡི་ཞལ་ནས་ཀྱང་། །ཚོགས་གཉིས་ཤིང་རྟའི་འཁོར་ལོ་ལ། །བུ་འབྲལ་བར་མ་བྱེད་ནཱ་རོ་པ། །གསུངས་པའི་དོན་ཡང་དེ་འདྲར་དགོངས། །ཚོགས་གཉིས་བྲེ་ཁ་ཁེངས་པ་ན། །རྟོགས་པ་ཤུགས་ཀྱིས་སྐྱེ་བ་
ཡིན། །ཤེས་རབ་ཤུགས་ཀྱིས་འཕེལ་བ་ཡིན། །ཆོས་མཐུན་བསམ་པ་འགྲུབ་པ་ཡིན། །གསུང་རབ་དོན་ཀུན་གོ་བ་ཡིན། །ས་ལམ་རིམ་གྱིས་བགྲོད་པ་ཡིན། །མཐར་ཐུག་བྱང་ཆུབ་འཐོབ་པར་གསུངས།།བསོད་ནམས་བསག་ཐབས་གླུ་ཆུང་འདི། །དགེ་སློང་རཱ་ག་ཨ་སྱ་ཡིས། །རྟ་ལོ་རྒྱལ་ཟླའི་ཡར་ཚེས་གསུམ། །ཐུན་ཉམས་ལ་ཤར་ནས་སྨྲས། །ཐབས་མཁས་ཞེས་བྱས་བརྗེད་ཐོར་བྲིས། །འབྲེལ་ཚད་བསོད་ནམས་ཚོགས་རྫོགས་ཤོག །ལེའུ་བཅུ་གཅིག་མངྒ་ལཾ།། །།