ལེའུ་བཅུ་གཉིས་པ། བྱིན་རླབས་འཇུག་ཅིང་ཉམས་རྟོགས་འཕེལ་བའི་ཕྱིར། །བླ་མའི་རྣལ་འབྱོར་བྱིན་རླབས་ཆར་རྒྱུན་ཡོད། །
རི་ཆོས་མཚམས་ཀྱི་ཞལ་གདམས་ལས།་བླ་མའི་རྣལ་འབྱོར་བྱིན་རླབས་ཆར་རྒྱུན་ཞེས་བྱ་བ་བཞུགས་སོ། །ན་མོ་མ་ཧཱ་མུ་དྲ་ཡེ། བླ་མ་བརྩོན་འགྲུས་རྒྱ་མཚོ་ཚུར་གསོན་དང་། །མོས་གུས་སྒོམ་གྱི་མགོ་བོ་ཡིན་པའི་ཕྱིར། །བླ་མའི་རྣལ་འབྱོར་སྒོམ་གལ་ཆེ་ན་ཡང་། །གསོལ་བ་འདེབས་ཡུལ་བླ་མ་ངོས་འཛིན་དགོས། །དེ་ལ་བླ་མའི་སྒྱུ་རྣམ་དབྱེ་ཤེས་དགོས་གདའ། །དགེ་བསྙེན་སྐྲ་ཕུད་ཞུ་སའི་བླ་མ་ནི། །ཡུལ་དེར་དགེ་སློང་གཞན་དག་མེད་ན་ནི། །དགེ་བསྙེན་དགེ་ཚུལ་གྱིས་ཀྱང་རུང་བར་གསུངས། །རབ་
བྱུང་དགེ་སློང་ཞུ་སའི་མཁན་པོ་ནི། །ལྔ་ཕྲག་ཉེར་གཅིག་གང་རུང་ལྡན་པ་དགོས། །མི་ལྡན་ན་ཡང་སྡོམ་པ་སྐྱེ་མོད་ཀྱི། །གནང་མཁན་ཉིད་ལ་ཉེས་བྱས་འབྱུང་བ་ཡིན། །ཞུ་མཁན་ལ་ཡང་བར་ཆད་མེད་པ་དགོས། །བར་ཆད་ཅན་གྱིས་ཞུས་ཀྱང་སྐྱེ་མོད་ཀྱི། །དེ་ཡང་སྐྱེ་ལ་ཉེས་བྱས་ཞེས་བྱའོ། །བསམ་པ་འཁོར་བ་འདི་ལས་ཐར་འདོད་པའི། །ངེས་འབྱུང་བསམ་པ་ལེགས་པོ་མེད་ན་ནི། །སོ་ཐར་སྡོམ་པ་ཚད་ལྡན་སྐྱེ་བ་མིན། །སོ་ཐར་ཞུ་སའི་བླ་མ་བཟང་ན་ཡང་། །དགེ་འདུན་དཀོན་མཆོག་ཙམ་ཞིག་ཡིན་པ་ལས། །སངས་རྒྱས་ཡིན་པའི་བཤད་པ་མ་མཆིས་སོ། །ཐེག་ཆེན་སེམས་བསྐྱེད་ཞུ་སའི་བླ་མ་ནི། །བྱང་ཆུབ་སེམས་ཀྱི་སྡོམ་པ་ལྡན་པ་ན། །ཁྱིམ་པ་ཡིན་ཀྱང་ཞུ་རུ་རུང་བ་སྟེ། །མདོ་ཕྱོགས་བླ་མ་ཇི་ལྟར་བཟང་ན་ཡང་། །དགེ་བའི་བཤེས་གཉེན་ནམ་ནི་སེམས་དཔའ་ཙམ། །སོ་ཐར་མཁན་པོར་ཕ་ཡི་འདུ་ཤེས་དང་། །མདོ་ཕྱོགས་བླ་མར་སྨན་པའི་འདུ་ཤེས་དང་། །རང་ལ་ནད་པའི་འདུ་ཤེས་ཙམ་ཞིག་བཞག །གསང་སྔགས་ཞུ་སའི་བླ་མ་དེ་ལ་ནི། །གང་ཡིན་ཡི་དམ་ལྷ་དེ་དངོས་སུ་མོས། །དེ་དོན་རྒྱ་གཞུང་དབང་ཆོག་མང་པོ་
ནས། །བླ་མ་དང་ནི་ཡི་དམ་ལྷ། །ཐ་དད་དུ་ནི་མ་ལྟ་ཞིག །ངེས་པར་དངོས་གྲུབ་དམ་པ་འདི། །བདག་གིས་ཁྱོད་ལ་སྦྱིན་པར་བྱ། །ཞེས་སོགས་གསུངས་ཕྱིར་བླ་མ་ཡི་དམ་གཉིས། །ཐ་དད་རྟོག་ན་དངོས་གྲུབ་འབྱུང་བར་དཀའ། །རང་གི་གསང་སྔགས་ཞུ་སའི་བླ་མ་དེ། །སངས་རྒྱས་སེམས་ཅན་སུ་ཡིན་ཁྱད་པར་མེད། །རང་གི་ཡི་དམ་དངོས་སུ་མོས་བྱས་ན། །ཡི་དམ་དེ་ཡི་དངོས་གྲུབ་མྱུར་དུ་འབྱུང་། །དེ་ནི་མོས་བློས་ཡར་གཞལ་དད་གུས་ཏེ། །དེ་བྱས་བླ་མར་ཕན་རྒྱུ་མེད་ན་ཡང་། །རང་གི་ལྷ་དེ་འགྲུབ་པའི་གདམས་ངག་ཡིན། །དེ་དོན་རྣལ་འབྱོར་མི་ལ་རས་ཆེན་ལ། །ཁྱེད་ཉིད་སུ་ཡི་སྤྲུལ་པ་ཡིན་ཞུས་པས། །ང་ནི་སུ་ཡི་སྤྲུལ་པ་ཡིན་པ་ནི། །ང་རང་ལ་ཡང་ཆ་ནི་མ་མཆིས་པས། །ངན་སོང་གསུམ་གྱི་སྤྲུལ་པ་ཡིན་ཀྱང་རུང་། །རྡོ་རྗེ་འཆང་དུ་བསྒོམ་ནས་གསོལ་ཐོབ་དང་། །རྡོ་རྗེ་འཆང་གི་བྱིན་རླབས་འབྱུང་བ་ཡིན། །དེ་སྐད་གསུངས་པའི་དོན་དེ་གོ་བར་བྱ། །དེ་དག་དབང་བསྐུར་ཞུ་སའི་བླ་མ་ལགས། །ཕྱག་རྒྱ་ཆེན་པོ་ཞུ་སའི་བླ་མ་ནི། །གང་རུང་ཞིག་གིས་ཆོག་པར་མ་གསུངས་ཏེ། །བརྐོས་ཕོར་མེད་ན་སཱཙྪམི་
དོད་པས། །བླ་མ་རྟོགས་པར་ལྡན་པ་གལ་ཆེ་གསུངས། །རྟོགས་པར་ལྡན་པའི་བླ་མ་མ་རྙེད་ན། །ཁྲིད་ལུང་ཙམ་ཞིག་ཐོབ་པར་གྱུར་ཕྱི་ནས། །དྭགས་པོ་དུས་མཁྱེན་རྒོད་ཚང་པ་ལ་སོགས། །བཀའ་བརྒྱུད་གོང་མ་གང་ལ་མོས་པ་ཞིག །རྩ་བའི་བླ་མར་བཟུང་ནས་གསོལ་བཏབ་ན། །ཕྱག་རྒྱ་ཆེན་པོའི་རྟོགས་པ་སྐྱེ་བ་ནི། །བཀའ་བརྒྱུད་གོང་མ་རྣམས་ཀྱིས་ཞལ་བཞེས་ཡོད། །འདི་ནི་རྗེས་འཇུག་རྣམས་ལ་ཐུགས་རྗེ་ཆེ། །རང་གི་གང་མོས་བཀའ་བརྒྱུད་བླ་མ་ཞིག །རྩ་བའི་བླ་མར་བཟུང་ནས་གསོལ་འདེབས་ཚེ། །སྐུ་དེ་དངོས་སུ་བསྒོམ་ཀྱང་ལེགས་པ་ཡིན། །དེ་མིན་སྐྱོན་ཡོན་གཉིས་ལྡན་བླ་མ་ནི། །དངོས་སུ་བསྒོམ་ན་སྐྱོན་ཡོན་གཉིས་ཀ་འཇུག །ཡོན་ཏན་འཇུག་ཅིང་སྐྱོན་དེ་མི་འཇུག་ཐབས་།ངོ་བོ་བླ་མ་རྣམ་པ་ལྷ་སྐུར་བསྒོམ། །རྟོགས་པ་མ་སྐྱེས་པ་རྣམས་སྐྱེ་བའི་ཐབས། །སྐྱེས་པ་འཕེལ་ཞིང་མཐའ་རུ་ཕྱིན་པའི་ཐབས། །གེགས་དང་གོལ་ས་ཐམས་ཅད་སེལ་བའི་ཐབས། །ལུས་ངག་ཡིད་གསུམ་བྱིན་གྱིས་རླབས་པའི་ཐབས། །ཅི་བསམ་འགྲུབ་ཅིང་བར་ཆད་མེད་པའི་ཐབས། །བརྒྱུད་པའི་ཆོས་སྐྱོང་བཀའ་སྲུང་འགོ་བའི་
ཐབས། །བླ་མའི་རྣལ་འབྱོར་ཁོ་ན་མཆོག་ཡིན་ཏེ། །དེ་ལ་ཕྱི་ནང་གསང་བ་ཡང་གསང་བཞི། །ཕྱི་ལྟར་བླ་མའི་རྣལ་འབྱོར་ལ་ཡང་ནི། །ཐོ་བརྩེགས་ཁྲོམ་ཚོགས་ཀུན་འདུས་གསུམ་ཡིན་ནོ། །རང་ཉིད་ཡི་དམ་ལྷ་འམ་ཐ་མལ་ལུས། །རང་གི་སྤྱི་བོར་སེང་ཁྲི་པད་ཟླའི་སྟེང་། །རྩ་བའི་བླ་མ་རྡོ་རྗེ་འཆང་དུ་བསྒོམ། །དེ་ཡི་གཙུག་ཏུ་བརྒྱུད་པའི་བླ་མ་རྣམས། །མུ་ཏིག་སྟར་ལ་བརྒྱུས་བཞིན་ཐོ་བརྩེགས་བསྒོམ། །དེ་ལ་ཡེ་ཤེས་སྤྱན་འདྲེན་མི་དགོས་ཏེ། །ཆུ་ཟླ་བཞིན་དུ་གར་དམིགས་དེར་སྣང་བ། །ཡེ་ནས་དམ་ཡེ་དབྱེར་མེད་བསྒོམ་པས་འཐུས། །དེ་ནས་གསོལ་བ་འདེབས་པའི་ཚིགས་བཅད་ཀྱང་། །རྒྱས་པར་བརྒྱུད་པའི་བླ་མའི་གསོལ་འདེབས་སམ། །བསྡུ་ན་གསར་རྙིང་ཀུན་ནས་གསུངས་པ་ལྟར། །མ་ནམ་བཞི་སྐོར་འདི་ཉིད་འཐུས་ཆེ་སྟེ། །དེ་དོན་ཅུང་ཞིག་གོ་དཀའ་བཀྲོལ་བ་ནི། །རང་གི་དོན་དུ་གསོལ་འདེབས་མ་ཡིན་པས། །ནམ་མཁའ་དང་«མཉམ་སེམས་ཅན་ཐམས་ཅད་ཀུན། །ཕྱག་རྒྱ་ཆེན་པོ་རྟོགས་ཕྱིར་གསོལ་འདེབས་ཡིན། །སངས་རྒྱས་ཐམས་ཅད་ཆོས་སྐུ་གཅིག་ཡིན་པས། །ཡིན་རྟོགས་ཀུན་ཏུ་བཟང་དང་རྡོ་
རྗེ་འཆང་། །ཡུམ་ཆེན་མོ་དང་ཤེས་རབ་ཕ་རོལ་ཕྱིན། །གཞོན་ནུ་བུམ་སྐུ་དང་པོའི་སངས་རྒྱས་ཏེ། །བླ་མའི་ཐུགས་ཀྱང་དེ་ལས་གཞན་མིན་པས། །དེ་ལ་བླ་མ་ཆོས་ཀྱི་སྐུ་ཞེས་བྱ། །སངས་རྒྱས་ཐམས་ཅད་ལོངས་སྐུ་ལྔ་ཡིན་ཏེ། །རིགས་ལྔ་མ་གཏོགས་ལོངས་སྐུ་ཡོད་མ་ཡིན། །དེ་ལ་བླ་མ་ལོངས་སྤྱོད་རྫོགས་ཞེས་བྱ། །སྤྲུལ་པའི་སྐུ་ནི་གྲངས་མེད་བརྗོད་ལས་འདས། །བསྡུ་ན་མདོ་ཡི་ལུགས་ལ་རྣམ་པ་གསུམ། །མཆོག་གི་སྤྲུལ་སྐུ་སྐྱེ་བ་སྤྲུལ་སྐུ་དང་། །བཟོ་ཡི་སྤྲུལ་སྐུ་རྣམ་པ་གསུམ་དུ་གསུངས། །འཛམ་གླིང་བྱེ་བ་ཕྲག་བརྒྱའི་ཞིང་ཁམས་ན། །སངས་རྒྱས་སྟོང་རྩ་བྱེ་བ་ཕྲག་བརྒྱ་དང་། །སྤྱན་རས་གཟིགས་དང་སྒྲོལ་མ་པདྨ་འབྱུང་། །ཕྱག་རྡོར་འཇམ་དབྱངས་བྱེ་བ་ཕྲག་བརྒྱ་སྟེ། །དེ་ལས་གཞན་པའི་འཇིག་རྟེན་ཁམས་དག་ནི། །གང་གཱའི་ཀླུང་ནི་དྲུག་ཅུ་རྩ་གཉིས་ཀྱི། །བྱེ་མ་སྙེད་ཀྱི་གྲངས་མཉམ་འཇིག་རྟེན་ཁམས། །དེ་ཡང་སངས་རྒྱས་སྟོང་དང་པད་འབྱུང་སོགས་། །དེ་སྙེད་བཞུགས་པ་དེ་དག་ཐམས་ཅད་ཀྱང་། །སྤྱན་རས་གཟིགས་ཀྱི་སྤྲུལ་པ་ཡིན་པར་གསུངས། །སྤྱན་རས་གཟིགས་དང་པད་འབྱུང་ཀརྨ་པ། །ངོ་བོ་གཅིག་པར་
ལུང་བསྟན་རྣམས་ནས་གསལ། །དེ་དག་ཐམས་ཅད་བླ་མ་སྤྲུལ་པའི་སྐུ། །རྒྱལ་བ་ཡབ་སྲས་རྣམས་དང་ངོ་བོ་གཅིག །དེ་ལ་དགོངས་ནས་མི་བསྐྱོད་ཞབས་ཀྱིས་ཀྱང་་། །རབ་འབྱམས་ཞིང་གི་བདག་པོ་ལ་གསོལ་བ་འདེབས་སོ། །ཞིང་ཁམས་སྤྲུལ་པས་ཁྱབ་པ་ལ་གསོལ་བ་འདེབས་སོ། །བསམ་བརྗོད་རེ་བ་ལས་འདས་པ་ལ་གསོལ་བ་འདེབས་སོ། །གསུངས་པའི་དོན་ཡང་དེ་ལ་དགོངས་པ་ཡིན། །དེ་དག་མཆོག་གི་སྤྲུལ་པའི་སྐུ་རུ་རྟོགས། །སངས་རྒྱས་སྐྱེས་རབས་རྣམས་ལས་གསུངས་པ་ལྟར། །སངས་རྒྱས་སྤྲུལ་པ་ཉ་དང་རི་བོང་སོགས། །དེ་འདྲ་ཐམས་ཅད་སྐྱེ་བ་སྤྲུལ་སྐུ་ཟེར། །གངས་ཅན་བོད་ཡུལ་བྱེ་བ་ཕྲག་བརྒྱ་ན། །ཇོ་ཤཱཀ་རྣམ་གཉིས་བྱེ་བ་ཕྲག་བརྒྱ་སྟེ། །དེ་འདྲའི་རྟེན་རྣམས་བཟོ་ཡི་སྤྲུལ་སྐུ་ཟེར། །དེ་བཞིན་ངོ་བོ་སངས་རྒྱས་བྱང་སེམས་ཀྱི། །གང་འདུལ་རྒྱལ་པོ་བློན་པོ་བླ་མ་སོགས། །གང་ལ་གང་འདུལ་སྤྲུལ་པ་ཐམས་ཅད་དང་། །ཡང་སྤྲུལ་ཉིང་སྤྲུལ་སུམ་སྤྲུལ་བདུན་སྤྲུལ་སོགས། །སེམས་ཅན་གཅིག་ལ་ཕན་གཅིག་ཐོགས་པ་ན། །སྐྱེ་བ་གཅིག་ལེན་འཆི་ལ་མི་འཚེར་བར། །དཔེར་ན་མི་བསྐྱོད་རྡོ་རྗེ་ཁོ་ན་
ཡི། །སྤྲུལ་པ་གངས་ཅན་བོད་ཡུལ་འདི་ཉིད་ན། །འབུམ་ཕྲག་ལྔ་ཙམ་ཡོད་པར་གསུངས་དང་མཚུངས། །དེ་ཀུན་ཐམས་ཅད་བླ་མ་སྤྲུལ་པའི་སྐུ། །དེ་དག་ཀུན་ལ་གསོལ་བ་འདེབས་པ་ཡིན། །བླ་མ་སངས་རྒྱས་རིན་པོ་ཆེ་ཞེས་པ། །རང་གི་བླ་མ་དེ་ཉིད་ཡིན་པ་སྟེ། །གསང་སྔགས་བླ་མེད་ལུགས་ཀྱི་བླ་མ་ནི། །སངས་རྒྱས་ཐམས་ཅད་འདུས་པའི་ངོ་བོར་གསུངས། །བླ་མའི་ཐུགས་ནི་སངས་རྒྱས་ཀུན་འདུས་ཡིན། །བླ་མའི་གསུང་ནི་དམ་ཆོས་ཀུན་འདུས་ཡིན། །བླ་མའི་སྐུ་ནི་དགེ་འདུན་ཀུན་འདུས་ཡིན། །བླ་མའི་ཡོན་ཏན་ནོར་ལྷ་ཀུན་གྱི་ངང་། །བླ་མའི་ཕྲིན་ལས་མཁའ་འགྲོ་ཆོས་སྐྱོང་སོགས། །ཀུན་འདུས་བླ་མ་སངས་རྒྱས་རིན་པོ་ཆེ། །དེ་ལ་གསོལ་བཏབ་ཀུན་ལ་གསོལ་བཏབ་འགྱུར། །དེ་ལྟར་མ་ནམ་བཞི་སྐོར་དོན་ཤེས་པས། །མ་ནམ་བཞི་སྐོར་གསོལ་འདེབས་གཙོ་བོར་བྱ། །ཡང་ན་རྒྱལ་བ་ཡབ་སྲས་གང་རུང་གི །གསོལ་འདེབས་སམ་ནི་མཚན་སྔགས་༈ བཟླས་ཀྱང་རུང་། །བརྒྱུད་པའི་བླ་མའི་སྐུ་ལས་བདུད་རྩི་བབས། །།རང་གི་སྤྱི་བོ་ཚངས་པའི་བུག་ནས་ཞུགས། །སྤྱི་བོ་བདེ་ཆེན་འཁོར་ལོའི་རྩ་འདབ་གང་། །ལུས་ཀྱི་སྒྲིབ་
དག་བུམ་པའི་དབང་བསྐུར་ཐོབ། །སྐུ་ཡི་རྡོ་རྗེ་འགྲུབ་པའི་སྐལ་ལྡན་གྱུར། །མགྲིན་པའི་རྩ་གནས་གང་བས་ངག་སྒྲིབ་དག །གསང་བའི་དབང་ཐོབ་གསུང་གི་རྡོ་རྗེ་འགྲུབ། །སྙིང་གི་རྩ་འདབ་གང་བས་ཡིད་སྒྲིབ་དག །ཤེར་ཡེའི་དབང་ཐོབ་ཐུགས་ཀྱི་རྡོ་རྗེ་འགྲུབ། །ལྟེ་བ་རྐང་མཐིལ་ཡན་ཆད་རྩ་གནས་གང་། །སྒོ་གསུམ་ཆ་མཉམ་བསགས་པའི་སྡིག་སྒྲིབ་དག །བཞི་པ་ཚིག་དབང་རིན་པོ་ཆེ་ཐོབ་ཅིང་། །དབྱེར་མེད་ངོ་བོ་ཉིད་ཀྱི་རྡོ་རྗེ་འགྲུབ། །དེ་ནས་བརྒྱུད་པའི་བླ་མ་ཐམས་ཅད་ནི། །འོད་དུ་ཞུ་ནས་རྩ་བའི་བླ་མར་ཐིམ། །རྩ་བའི་བླ་མ་འོད་ཞུ་རང་ལ་ཐིམ། །རྩ་བརྒྱུད་བླ་མ་དེ་རྣམས་ཐམས་ཅད་ཀྱི། །སྐུ་གསུང་ཐུགས་དང་རང་གི་ལུས་ངག་ཡིད། །ཆུ་ལ་ཆུ་བཞག་བཞིན་དུ་དབྱེར་མེད་བསྒོམ། །བྱིན་རླབས་སྟོབས་ཀྱིས་འཕྲལ་ལ་ཉམས་རྟོགས་ནི། །གང་སྐྱེས་དེ་ལ་སླད་མེད་བསྒོམ་པས་འཐུས། །དེ་ནི་བླ་མ་ཐོ་བརྩེགས་བསྒོམ་པ་དང་། །བྱིན་ཀླུ་རླབས་ཆུ་རྒྱུན་གཅིག་མའི་དབང་ལེན་ཚུལ། །གསར་རྙིང་ཁྲིད་རིམ་ཕལ་ཆེར་མཐུན་པའོ།། ༈ །།ན་མོ་གུ་རུ། ཡང་གཅིག་གསོན་དང་ཀརྨ་བརྩོན་འགྲུས་པ། །རྩ་བརྒྱུད་
བླ་མ་ཁྲོམ་ཚོགས་སྒོམ་གསུངས་པ། །བརྒྱུད་པའི་བླ་མའི་རྣམ་དབྱེ་ཤེས་དགོས་པས། །དེ་ལ་གསར་རྙིང་ལུགས་གཉིས་སོ་སོར་གདའ། །རྙིང་མའི་བླ་མ་བརྒྱུད་པ་དྲུག་ལྡན་ཟེར་། །ཀུན་བཟང་རིགས་ལྔ་རྡོ་རྗེ་འཆང་ཆེན་པོ། །སྔོན་བྱོན་བསྐལ་མགོན་སངས་རྒྱས་དྲུག་ཅུ་ལྔ། །ཞིང་འདིར་བྱོན་པའི་སྟོན་པ་བཅུ་གཉིས་སོགས། །གོང་མ་གོང་མས་འོག་མས་འོག་མ་ལ། །དགོངས་པ་གཏད་ཙམ་ཆོས་ཀུན་ཐུགས་སུ་ཆུད། །དེ་ལ་རྒྱལ་བ་དགོངས་པའི་བརྒྱུད་པ་ཟེར། །དགའ་རབ་ཤྲཱི་སེང་རྒྱ་གར་རིག་འཛིན་བརྒྱད། །པད་འབྱུང་མན་ར་བ་ལ་སོགས་པ། །བརྡའ་བསྟན་ཙམ་གྱིས་ཆོས་ཀུན་ཐུགས་སུ་ཆུད། །དེ་ལ་རིག་འཛིན་བརྡ་ཡི་བརྒྱུད་པ་ཟེར། །དེ་བཞིན་ཡེ་ཤེས་ལས་ཀྱི་མཁའ་འགྲོ་མས། །ཤོག་སེར་རམ་ནི་གླེགས་བམ་གཏད་ཙམ་གྱིས། །དེ་ཡི་དོན་རྟོགས་ཆོས་ཀྱི་བདག་པོར་གྱུར། །དེ་ལ་མཁའ་འགྲོ་གཏད་རྒྱ་བརྒྱུད་པ་ཟེར། །པད་འབྱུང་དྲུང་དུ་དབང་ལུང་ཐོབ་པའི་མི། །སྐྱེ་བརྒྱུད་དམ་ནི་སྤྲུལ་པས་གཏེར་ལ་དབང་། །པད་འབྱུང་སྤྲུལ་པས་དབང་ལུང་བག་ཆགས་གསོ། །དེ་ནི་གཏེར་ཆོས་སྨོན་ལམ་བརྒྱུད་པ་ཟེར། །ཆོས་དེའི་བདག་
པོར་པད་འབྱུང་ལུང་བསྟན་བཞིན། །རྟེན་འབྲེལ་མ་འཆུག་ཉམས་སུ་བླངས་པ་ཡིས། །ཆོས་དེའི་བཀའ་བབས་རང་གཞན་དོན་གྲུབ་པ། །དེ་ནི་བཀའ་བབས་དོན་གྱི་བརྒྱུད་པའམ། །ཐུགས་རྗེ་བྱིན་རླབས་བརྒྱུད་པ་དོན་གཅིག་གོ །གང་ཟག་གཅིག་གིས་གཅིག་ལ་དབང་ལུང་རྫོགས། །དེ་ནི་གང་ཟག་སྙན་ཁུང་བརྒྱུད་པ་སྟེ། །དབང་ལུང་ཕྱག་དཔེའི་ངོས་ནས་མཛད་པ་ཡི། །ཤོག་སེར་ཚིག་བརྒྱུད་བླ་མ་ཚང་བའི་ཕྱིར། །བྱིན་རླབས་ཆེ་བར་བཞེད་པ་རྙིང་མའི་ལུགས། །བརྒྱུད་པ་དེ་དྲུག་ལྡན་ན་མཆོག་ཏུ་བཤད། །གསར་མའི་བརྒྱུད་པ་ཉེ་བརྒྱུད་རིང་བརྒྱུད་དང་། །དག་སྣང་བརྒྱུད་པ་རྟོགས་པ་དོན་བརྒྱུད་བཞི། །དེ་ཡང་མདོ་སྔགས་གཙོ་བོའི་བརྒྱུད་པ་གཉིས། །འཇམ་དབྱངས་ཀླུ་སྒྲུབ་ཨཱརྱ་དེ་ཝ་ལས། །བརྒྱུད་པ་ཟབ་མོ་ལྟ་བའི་བརྒྱུད་པ་ཟེར། །བྱམས་པ་ཐོགས་མེད་དབྱིག་གཉེན་སོགས་བརྒྱུད་པ། །དེ་ནི་རྒྱ་ཆེན་སྤྱོད་པའི་བརྒྱུད་ཡིན་ནོ། །འཇམ་དབྱངས་ཞི་བ་ལྷ་དང་གསེར་གླིང་པ། །ཇོ་འབྲོམ་སོགས་ལས་བརྒྱུད་པ་ཉེ་བརྒྱུད་དེ། །འདི་དག་མདོ་ཡི་ཉམས་ལེན་བརྒྱུད་པ་ཡིན། །སྔགས་ཀྱི་རིང་བརྒྱུད་བཀའ་བཞི་བརྒྱུད་པ་
སྟེ། །ཉེ་བརྒྱུད་རྡོར་འཆང་ཏེ་ལོ་ནཱ་རོ་སྟེ། །དག་སྣང་བརྒྱུད་པ་བཀའ་བརྒྱུད་གོང་མ་རྣམས། །སོ་སོའི་ཡི་དམ་ལྷ་ལས་གསན་པ་དང་། །སྔོན་བྱོན་གྲུབ་ཐོབ་རྣམས་ལའང་གསན་པ་མང་། །དེ་དག་དངོས་སུ་གསན་པ་ཡིན་མོད་ཀྱི། །རྨི་ལམ་ཡུལ་དུ་དབང་ལུང་ཐོབ་པ་རྣམས། །རང་གི་ཉམས་བླངས་བྱིན་རླབས་འབྱུང་མོད་ཀྱི། །ས་ཐོབ་མིན་ན་གཞན་ལ་སྤེལ་མི་རུང་། །དེ་སྐད་དགེ་བཤེས་མཚན་ཉིད་པ་འགས་གསུངས། །རང་བྱུང་བ་དང་དེ་བཞིན་གཤེགས་པས་ནི། །ས་ཐོབ་མ་ཐོབ་དབྱེ་བ་མི་མཛད་པར། །ངེས་ཤེས་གྱིས་དང་དངོས་སུ་ཐོབ་པ་ལས། །དེ་ཉིད་ལྷག་ཅེས་སློབ་མ་འགའ་ལ་གསུངས། །དེ་བཞིན་ངག་དབང་བཀྲ་ཤིས་དཔལ་གྲུབ་པས། །མངོན་སུམ་དང་ནི་རྨི་ལམ་གཉིས་ཀ་ཡང་། །དོན་ལ་བདེན་པར་མ་གྲུབ་རྨི་ལམ་འདྲ། །དེ་ཕྱིར་རྨི་ལམ་ཐོབ་པས་གོ་ཆོད་གསུངས། །དེ་དག་དག་སྣང་བརྒྱུད་པ་ཞེས་བྱའོ། །རང་གི་སྤྱི་བོའི་ནམ་མཁར་པད་ཟླའི་སྟེང་། །རྩ་བའི་བླ་མ་རྡོ་རྗེ་འཆང་གི་སྐུ། །དེ་ལ་བརྒྱུད་པའི་བླ་མ་ཐམས་ཅད་དང་། །འབྲེལ་ཐོགས་རེ་ཞིང་ལྟོས་པའི་བླ་མ་ཀུན། །དང་པོ་སོ་སོའི་ཆ་ལུགས་ཉིད་དུ་
བསྒོམ། །དམ་ཡེ་དབྱེར་མེད་དྲན་རྫོགས་བསྒོམ་པས་འཐུས། །དེ་ནས་བརྒྱུད་པའི་བླ་མའི་གསོལ་འདེབས་སམ། །རྒྱ་གར་སྐད་དུ་ཀརྨ་ཞེས་བྱ་སྟེ། །བོད་སྐད་སྒྲ་ཡི་འགྱུར་ལ་ལས་ཞེས་བྱ། །དོན་འགྱུར་སངས་རྒྱས་ཀུན་གྱི་ཕྲིན་ལས་པ། །དེ་ཕྱིར་བརྒྱུད་པའི་བླ་མ་ཐམས་ཅད་ཀྱང་། །སངས་རྒྱས་ཕྲིན་ལས་སྒྲུབ་མཁན་ཁོ་ནའི་ཕྱིར་། །ཀརྨ་པ་མཁྱེན་བརྗོད་ཀྱང་ཆོག་པ་ཡིན། །དེ་ནས་འཁོར་རྣམས་ཐམས་ཅད་གཙོ་བོར་ཐིམ། །གཙོ་བོ་བླ་མ་རྡོ་རྗེ་འཆང་ཆེན་གྱི། །དཔྲལ་བའི་གནས་ནས་འོད་ཟེར་དཀར་པོ་འཕྲོས། །རང་གི་དཔྲལ་བར་ཐིམ་པས་ལུས་སྒྲིབ་དག །སྐུ་ཡི་དབང་དང་བྱིན་རླབས་ཐོབ་པར་བསྒོམ། །མགྲིན་པའི་གནས་ནས་འོད་ཟེར་དམར་པོ་འཕྲོས། །མགྲིན་པར་ཐིམ་པས་ངག་གི་སྒྲིབ་པ་དག །གསུང་གི་དབང་དང་བྱིན་རླབས་ཐོབ་པར་བསྒོམ། །ཐུགས་ཀྱི་གནས་ནས་འོད་ཟེར་མཐིང་ག་འཕྲོས། །སྙིང་གར་ཐིམ་པས་ཡིད་ཀྱི་་སྒྲིབ་པ་དག །ཐུགས་ཀྱི་དབང་དང་བྱིན་རླབས་ཐོབ་པར་བསྒོམ། །ལྟེ་བའི་གནས་ནས་འོད་ཟེར་སེར་པོ་འཕྲོས། །ལྟེ་བར་ཐིམ་པས་ཆ་མཉམ་སྒྲིབ་པ་དག །ཡོན་ཏན་དབང་
དང་བྱིན་རླབས་ཐོབ་པར་བསམ། །གསང་བའི་གནས་ནས་འོད་ཟེར་ལྗང་གུ་འཕྲོས། །གསང་བར་ཐིམ་པས་ཤེས་བྱའི་སྒྲིབ་པ་དག །ཕྲིན་ལས་དབང་དང་བྱིན་རླབས་ཐོབ་པར་བསམ། །དེ་ནས་བླ་མ་དགྱེས་བཞིན་འོད་དུ་ཞུ། །རང་ལ་བསྟིམས་ནས་ངོ་བོ་སྐྱོང་བ་སྟེ། །རྩ་བརྒྱུད་བླ་མ་ཁྲོམ་ཚོགས་སྒོམ་པའི་ལུགས། །གྲུབ་མཐའ་སྤྱི་ཡི་ལུགས་དང་མཐུན་པ་ཡིན། །འདི་སྐབས་རྩ་བརྒྱུད་བླ་མའི་མཐའ་བསྐོར་དུ། །གྲུབ་ཆེན་བརྒྱད་ཅུ་རྗེ་འབངས་ཉེར་ལྔ་སོགས། །རིག་འཛིན་གྲུབ་ཐོབ་ཐམས་ཅད་བསྒོམ་པར་རུང་། །འོད་ཟེར་སྤྲོ་བསྡུ་བྱ་རྒྱུད་ལུགས་དང་མཚུངས། །བླ་མའི་རྣལ་འབྱོར་ཁྲོམ་ཚོགས་སྒོམ་པའི་ལུགས། །རཱ་ག་ཨ་སྱས་འཕྲལ་དུ་བྱུང་རྒྱལ་སྨྲས།། ༈ །།ན་མོ་གུ་རུ། བླ་མ་ཀརྨ་བཱིརྱ་གསོན་མཛོད་དང་། །།རྩ་བའི་བླ་མ་དཀོན་མཆོག་ཀུན་འདུས་སུ། །སྒོམ་ཚུལ་རྩ་བའི་བླ་མ་ངོས་འཛིན་དགོས། །དེང་སང་སེར་མོ་འཛིན་པ་ཕལ་ཆེར་གྱིས། །ཆོས་སྒོར་བཅུག་མཁན་སྐུ་ཕུད་ལེན་མཁན་དང་། །རབ་བྱུང་བསྙེན་རྫོགས་ཞུ་སའི་མཁན་པོ་དེ། །རྩ་བའི་བླ་མ་ཡིན་པར་བརྩི་ལགས་ཏེ། །དེ་འདྲ་མདོ་རྒྱུད་གང་ནས་བཤད་པ་མེད།
གྲུབ་མཐའ་སྤྱི་ལུགས་སུམ་ལྡན་རྡོ་རྗེ་འཛིན། །སོ་ཐར་དགེ་བསྙེན་དགེ་ཚུལ་བསྙེན་རྫོགས་གསུམ། །གསུམ་ཀའམ་ནི་གང་རུང་ཞུས་དང་གཅིག །བྱང་ཆུབ་སེམས་དཔའི་སྡོམ་པ་ཞུས་དང་གཉིས། །གསང་སྔགས་དབང་བཞི་རྫོགས་པར་ཞུས་དང་གསུམ། །སུམ་ལྡན་རྡོ་རྗེ་འཛིན་པ་ཞེས་བྱ་སྟེ། །རྩ་བའི་བླ་མ་ཡིན་པར་བཞེད་པ་སྟེ། །སྔགས་ལུགས་རང་གི་ཡི་དམ་གང་ཡིན་གྱི། །དབང་བཞི་ཡོངས་སུ་རྫོགས་པར་ཐོབ་པ་དང་། །དེ་ཡི་རྒྱུད་ཀྱི་ལུང་དང་བཤད་པ་ཐོབ། །དེ་ཡི་སྒྲུབ་ཐབས་མན་ངག་ཟབ་མོ་ཐོབ། །དེ་དག་སྔགས་ཀྱི་སུམ་ལྡན་རྡོ་རྗེ་འཛིན། །ཡིན་ཕྱིར་རྩ་བའི་བླ་མ་མང་པོ་འབྱུང་། །བཀའ་བརྒྱུད་ལུགས་ཀྱི་རྟོགས་པ་དོན་བརྒྱུད་དེ། །སྡོམ་པ་ཞུས་དང་དབང་ལུང་རྒྱ་མཚོ་ཐོབ། །རིག་གནས་ཡོན་ཏན་དཔག་མེད་བསླབ་ན་ཡང་། །དྲིན་ཐོབ་ཡིན་གྱི་རྩ་བའི་བླ་མ་མིན། །དེ་བཞིན་ཁྲིད་རིམ་མང་པོ་ཐོབ་པ་དང་། །གནས་འགྱུ་བདེ་གསལ་མི་རྟོག་ངོ་འཕྲོད་ཀྱང་། །དྲིན་ཅན་ཡིན་གྱི་རྩ་བའི་བླ་མ་མིན། །ཞལ་མཐོང་གསུང་ཐོས་ཕྱག་དབང་ཐོབ་པའམ། །ཆོས་འབྲེལ་དབང་འབྲེལ་མང་ཉུང་གང་ཡང་རུང་། །མ་མཇལ་
བཀའ་ཤོག་གནང་བ་ཡིན་ཚད་ཀྱི། །རང་སེམས་ངོ་བོ་རྗེན་པར་རྟོགས་གྱུར་ན། །དེ་ཉིད་རྩ་བའི་བླ་མར་འཛིན་པ་སྟེ། །དྭགས་པོས་བཀའ་གདམས་བླ་མ་རྣམས་བསྟེན་པས། །ཞག་བདུན་ཙམ་ལ་མི་འཕྲོའི་ཞི་གནས་ཐོབ། །ཕག་གྲུས་ས་སྐྱ་གྲགས་རྒྱལ་བསྟེན་པ་ཡིས། །བདེ་གསལ་མི་རྟོག་ཏིང་འཛིན་མཐར་ཕྱིན་ཏེ། །འོན་ཀྱང་ངོ་བོ་ཕྱིས་ནས་མཐོང་བའི་ཕྱིར། །མི་ལ་དྭགས་པོ་རྩ་བའི་བླ་མར་བཟུང་། །ཨོ་རྒྱན་པ་ཡིས་ཐུན་མོང་དངོས་གྲུབ་དང་། །གྲུབ་རྟགས་ཐོགས་པ་མེད་པ་ཡོད་ན་ཡང་། །པཀིས་ཀ་ཊོ་ར་ཞིག་ནས་ཀྱིས་བཀང་། །རྒྱལ་བ་རྒྱ་མཚོའི་སྦ་ལྕག་གིས་དཀྲུགས་ནས། །དབུ་གཙུག་བཞག་ནས་བྱིན་རླབས་བཀའ་བསྒོ་མཛད། །དེ་མ་ཐག་ཏུ་རྟོགས་པ་མཆོག་གྱུར་སྐྱེས། །ཞྭ་ནག་སྐུ་གསུམ་ངོ་སྤྱོད་ཕྱག་དཔེ་ཡང་། །གཏད་ནས་ང་ཡི་བརྒྱུད་པ་ཟུངས་ཤིག་གསུངས། །དཔོན་སློབ་ཞག་པོ་གཉིས་ལས་མ་མཇལ་ཡང་། །དོན་བརྒྱུད་ཟུང་འཇུག་བརྒྱུད་པར་ཁོང་བཞུགས་ཏེ། །རང་བྱུང་རྒྱལ་བས་རྩ་བའི་བླ་མར་འཛིན། །པཀྴི་ནས་བརྒྱུད་དབང་ལུང་ཚིག་བརྒྱུད་རྣམས། །གཉན་རས་དགེ་འདུན་འབུམ་ལས་གསན་པ་ལགས། །དེ་
བཞིན་མཐོང་བ་དོན་ལྡན་སློབ་མ་ནི། །འཇམ་དཔལ་བཟང་པོ་དཔལ་འབྱོར་དོན་གྲུབ་གཉིས། །མཆེད་གྲོགས་ཡིན་པས་དབང་ལུང་མཉམ་ཐོབ་ཀྱང་། །མཐོང་བ་དོན་ལྡན་ལ་བསྟེན་དབང་ལུང་གིས། །དཔལ་འབྱོར་དོན་གྲུབ་རྟོགས་པ་མཆོག་མ་སྐྱེས། །ཕྱིས་སུ་འཇམ་དཔལ་བཟང་པོར་ཞུ་ཝིག་བྱས། །དེ་ནས་དཔལ་འབྱོར་དོན་གྲུབ་རྟོགས་པ་ཐོབ། །དེ་ཕྱིར་འཇམ་དཔལ་བཟང་པོ་བཙུད་དགོས་བྱུང་། །འདི་ཡི་ལུགས་ལ་དབང་ལུང་བརྒྱུད་པ་རྣམས། །སོ་སོར་ཞིབ་ཀྱིས་འདེད་པ་མ་ཡིན་ཏེ། །དོན་བརྒྱུད་ཉིད་ལ་ཐམས་ཅད་འདུས་པར་བཞེད། །ཅི་ཕྱིར་རྟོགས་པ་སྐྱེས་པ་དེ་ཡི་ཚེ། །དབང་རྣམས་ཀུན་གྱི་དབང་དོན་ཡེ་ཤེས་ཡིན། །སྡེ་སྣོད་གསུམ་དང་རྒྱུད་སྡེ་བཞི་རྣམས་ཀྱི། །དོན་གྱི་རྩ་བ་རྟོགས་པ་མཆོག་དེ་ཡིན། །དོན་བརྒྱུད་བྱིན་རླབས་འཕོ་བའི་དབང་ཞེས་བྱ། །རྙིང་མའི་ལུགས་ལ་རིག་པའི་རྩལ་དབང་ཟེར། །འདི་ཐོབ་དབང་ལུང་ཀུན་གྱི་དོན་རྩ་ཀླུ་ཐོབ་། །དེ་ཕྱིར་རྩ་བའི་བླ་མར་འཛིན་པ་ཡིན། །དེ་ཉིད་རང་གི་སྤྱི་གཙུག་པད་ཟླའི་སྟེང་། །ཡབ་སྲས་ལྟ་བུ་སངས་རྒྱས་ཡིན་ངེས་རྣམས། །སྐུ་དངོས་བསྒོམ་ཡང་དག་སྣང་
འཕེལ་བས་ལེགས། །སྐྱོན་ཡོན་གཉིས་ལྡན་རྩ་བའི་བླ་མ་ནི། །རྡོ་རྗེ་འཆང་གི་སྐུར་བསྒོམ་མན་ངག་ཡིན། །དེ་ཡི་དཔྲལ་མགྲིན་སྙིང་ག་ལྟེ་བ་རུ། །ཨོཾ་དཀར་ཨཱདམར་ཧཱུཾ་། མཐིང་ཧོསེར་བསྒོམ། །འོད་འཕྲོས་ཕྱོགས་བཅུའི་སངས་རྒྱས་བྱང་ཆུབ་སེམས། །བརྒྱུད་པའི་བླ་མ་ཡི་དམ་མཁའ་འགྲོའི་ཚོགས། །ཐམས་ཅད་སྤྱན་དྲངས་བླ་མ་ཉིད་ལ་བསྟིམ་།དཀོན་མཆོག་ཀུན་འདུས་ངོ་བོར་མོས་གུས་བསྐྱེད། །བླ་མ་རིན་པོ་ཆེ་ལ་གསོལ་བ་འདེབས། །ཞེས་སོགས་གང་མོས་གསོལ་བ་བཏབ་པར་བྱ། །བླ་མའི་དཔྲལ་བའི་ཨོ་ལས་ཨོ་དཀར་འཕྲོས། །རང་གི་དཔྲལ་བར་ཐིམ་པས་སྐུ་དབང་ཐོབ། །བླ་མའི་མགྲིན་པའི་ཨཱཋལས་ཨཱདམར་འཕྲོས། །རང་གི་མགྲིན་པར་ཐིམ་པས་གསུང་དབང་ཐོབ། །བླ་མའི་ཐུགས་ཀའི་ཧཱུྃ་ལས་ཧཱུྃ་མཐིང་འཕྲོས། །རང་གི་སྙིང་གར་ཐིམ་པས་ཐུགས་དབང་ཐོབ། །བླ་མའི་ལྟེ་བའི་ཧོལས་ཧོསེར་འཕྲོས། །རང་གི་ལྟེ་བར་ཐིམ་པས་དབང་བཞི་རྫོགས་། །བླ་མ་འོད་ཞུ་རང་ལ་དབྱེར་མེད་བསྟིམ། །བཟོ་བཅོས་མེད་པར་རང་སེམས་ངོ་བོ་སྐྱོང་། །རྩ་བའི་བླ་མ་སངས་རྒྱས་ཀུན་འདུས་སུ། །བསྒོམ་པའི་མན་ངག་ཁྲིད་
རིམ་ཀུན་གྱི་བཅུད། །བླ་མ་བརྩོན་འགྲུས་རྒྱ་མཚོའི་ཐུགས་ལ་ཞོག །དེ་ཡན་ཕྱི་ཡི་བླ་མའི་རྣལ་འབྱོར་ཡིན།། ༈ །།ན་མོ་གུ་རུ། །གསོན་དང་བརྩོན་འགྲུས་རྒྱ་མཚོ་བ། །ནང་གི་བླ་མའི་རྣལ་འབྱོར་ནི། །རང་ལུས་ཡི་དམ་ལྷ་ཡི་སྐུ། །ཕྱི་ནི་གུར་ཕུབ་ལྟ་བུ་ལ། །ནང་ནི་ཕྲུ་མ་ཕུས་བཏབ་བཞིན། །སྣང་ལ་རང་བཞིན་མེད་པར་བསྒོམ། །སྙིང་ག་ཆོས་ཀྱི་འཁོར་ལོ་ན། །སེང་ཁྲི་པདྨ་ཉི་ཟླའི་སྟེང་། །དྲིན་ཆེན་རྩ་བའི་བླ་མ་དེ། །སྤྲུལ་སྐུ་ཤཱཀ་ཐུབ་སྐུ་རུ་བསྒོམ། །ས་གནོན་མཉམ་བཞག་ཆོས་གོས་ཅན་། །གནས་གསུམ་འབྲུ་གསུམ་ཐུགས་ཀར་ཧཱུྃ། །དེ་ལས་འོད་ཟེར་ཕྱོགས་བཅུར་འཕྲོས། །བསྐལ་བཟང་སངས་རྒྱས་སྟོང་རྩ་སོགས། །སྤྲུལ་སྐུ་ཐམས་ཅད་སྤྱན་དྲངས་བསྟིམ། །མ་ནམ་བཞི་སྐོར་སྤྲུལ་སྐུ་ཡི། །གསོལ་འདེབས་གཅིག་པོ་ཅི་མང་བཟླས། །ཐུབ་པ་འོད་ཞུ་རང་ལ་བསྟིམ། །ཚུལ་ཁྲིམས་གཙང་བར་འགྱུར་བ་དང་། །བསྟན་ལ་སྒྱུ་ཕན་ནུས་རྟེན་འབྲེལ་འགྲིགས། །སྤྲུལ་སྐུ་བླ་མའི་རྣལ་འབྱོར་ཡིན། །སྙིང་གར་སེང་ཁྲི་པད་ཟླའི་སྟེང་། །བླ་མ་ལོངས་སྐུ་རྣམ་སྣང་མཛད། །བྱང་ཆུབ་མཆོག་གི་ཕྱག་རྒྱ་
ཅན། །དར་དང་རིན་ཆེན་རྒྱན་གྱིས་ཀླུབས། །འོད་འཕྲོས་རྒྱལ་བ་རིགས་ལྔ་སོགས། །ལོངས་སྐུ་ཐམས་ཅད་སྤྱན་དྲངས་བསྟིམ། །མ་ནམ་བཞི་སྐོར་ལོངས་སྐུ་ཡི། །གསོལ་འདེབས་གཅིག་པུ་ཅི་ནུས་བརྗོད། །རྣམ་སྣང་འོད་ཞུ་རང་ལ་བསྟིམ། །མི་དམིགས་ངང་ལ་ཀློད་དེ་བཞག །སྡོད་ཚུགས་ས་ནོན་བདེ་སྟོང་སྐྱེ། །ལོངས་སྐུ་བླ་མའི་རྣལ་འབྱོར་ཡིན། །སྙི་གར་སེང་ཁྲི་པད་ཟླའི་སྟེང་། །བླ་མ་ཆོས་སྐུ་རྡོ་རྗེ་འཆང་། །རྒྱན་རྫོགས་ནམ་མཁའ་དྭངས་པའི་མདོག །རྡོར་དྲིལ་ཕྱག་རྒྱ་ཐུགས་ཀར་བསྣོལ། །འོད་འཕྲོས་ཆོས་སྐུའི་སངས་རྒྱས་ཀུན། །སྤྱན་དྲངས་རྡོ་རྗེ་འཆང་ལ་བསྟིམ། །ང་ཡི་རྩ་བའི་བླ་མ་འདི། །ཆོས་སྐུ་རྗེན་པ་ཁོ་ན་ལས། །གཟུགས་སྐུ་ཙམ་ཡང་མ་ཡིན་པའི། །ངེས་ཤེས་གདུང་ཤུགས་དྲག་པོ་བྱ། །མ་ནམ་བཞི་སྐོར་ཆོས་སྐུ་ཡི། །གསོལ་འདེབས་རྒྱང་འབོད་ཚུལ་དུ་བྱ། །འོད་ཞུ་རང་སེམས་དབྱེར་མེད་བསྲེས། །འཕྲལ་དུ་ཉམས་ལ་གང་ཤར་དེ། །བཟོ་བཅོས་མེད་པར་ལྷོད་དེ་བཞག །རིག་པ་དྭངས་སྙིགས་ཕྱེད་པ་དང་། །གསལ་སྟོང་རྗེན་པའི་ཉམས་རྟོགས་སྐྱེ། །ཆོས་སྐུ་བླ་མའི་རྣལ་འབྱོར་ཡིན། །སྐུ་
གསུམ་བླ་མའི་རྣལ་འབྱོར་འདི། །ཕྱག་ཆེན་ལྔ་ལྡན་གཞུང་ལས་གསུངས། །ནང་གི་བླ་མའི་རྣལ་འབྱོར་ཡིན། །ཉམས་དང་རྟོགས་པ་སྐྱེ་འདོད་ན། །བརྩོན་འགྲུས་རྒྱ་མཚོས་ཉམས་ལེན་མཛོད།། ༈ །།ན་མོ་གུ་རུ། བླ་མ་བརྩོན་འགྲུས་རྒྱ་མཚོ་ལགས། །མཆོག་གི་བླ་མའི་རྣལ་འབྱོར་དང་། །ཡི་དམ་བླ་མའི་རྣལ་འབྱོར་ནི། །སྙན་བརྒྱུད་རྩ་བ་ཡིན་པའི་ཕྱིར། །ཡིད་ཀྱིས་སྒོམ་བཟླས་མ་གཏོགས་པ། །ངག་ཏུ་བརྗོད་ཀྱང་མི་རུང་ན། །སྨོད་ཅིང་བྲི་བ་ག་ལ་རུང་། །དེ་མིན་བླ་མའི་རྣལ་འབྱོར་ནི། །རང་ཉིད་ཡི་དམ་སྤྱི་བོའི་གཙུག །པདྨ་ཟླ་བ་ཉི་མའི་སྟེང་། །བླ་མ་ཨོ་རྒྱན་དབྱེར་མེད་པ། །ཆོས་སྐུ་རྡོ་རྗེ་འཆང་གི་སྐུ། །ཕྱག་ན་རྡོ་རྗེ་དྲིལ་བུ་འཛིན། །མཚོ་རྒྱལ་དམར་མོ་གྲི་ཐོད་འཁྱུད། །ཐུགས་ཀའི་ཧཱུྃ་ལས་འོད་འཕྲོས་པས། །རྩ་བ་གསུམ་གྱི་ལྷ་ཚོགས་རྣམས། །སྤྱན་དྲངས་གཉིས་སུ་མེད་པར་བསྟིམ། །ཡིད་ཀྱིས་མཆོད་ཅིང་བསྟོད་པ་དང་། །དབང་བཞི་བསྐུར་བར་གསོལ་བ་གདབ། །བླ་མ་ཡབ་ཡུམ་སྙོམས་འཇུག་གི །སྒྲ་ནི་སི་སི་ཀུན་དྷུ་རུ། །བཛྲ་དྷིག་སོགས་སྒྲ་གྲགས་པས། །སངས་རྒྱས་བྱང་སེམས་
ཡི་དམ་ལྷ། །ཐམས་ཅད་རང་དབང་མེད་པར་བྱོན། །ཡབ་རྣམས་ཡབ་ཀྱི་ཞལ་དུ་ཞུགས། །ཡུམ་རྣམས་ཡུམ་གྱི་ཞལ་དུ་ཞུགས། །བྱང་སེམས་དཀར་དམར་ངོ་བོར་ཞུ། །ཡབ་ཡུམ་སྦྱོར་མཚམས་ནས་བབས་ཏེ། །རང་གི་ཚངས་པའི་བུག་ནས་ཞུགས། །སྤྱི་བོ་གང་བས་བུམ་དབང་ཐོབ། །མགྲིན་པ་གང་བས་གསང་དབང་ཐོབ། །སྙིང་ག་གང་བས་ཤེར་དབང་ཐོབ། །རྐང་མཐིལ་ཡན་ཆད་གང་བ་ཡིས། །སྒྲིབ་པ་ཀུན་དག་དབང་བཞི་རྫོགས། །རང་ལུས་གངས་ལ་ཉི་ཤར་འདྲ། །གསལ་དྭངས་གཟི་བརྗིད་འོད་དུ་འབར། །དབང་རྟགས་རང་གི་གནས་གསུམ་དུ། །ཨོ་དཀར་ཨཱདམར་ཧཱུྃ་མཐིང་མཚན། །བླ་མའི་སྐུ་ཡི་བུམ་པ་ནི། །བུམ་པའི་དབང་བསྐུར་རྫོགས་པ་ཡིན། །བྱང་སེམས་ཆུ་ལྷག་སྤྱི་བོར་འཕྱུར། །ཡབ་ཡུམ་བཀྲག་མདངས་འོད་དུ་འབར། །རྡོ་རྗེས་པདྨ་དྲག་དཀྲུགས་པས། །བྱང་སེམས་ཆུ་བོའི་རྒྱུན་བཞིན་བབས། །མགྲིན་པ་ནས་ཞུགས་རྩྭ་གནས་གང་། །དེ་ནི་བདུད་རྩི་གསང་བའི་དབང་། །བླ་མའི་ཡུམ་ལས་ཡུམ་གཅིག་འཕྲོས། །རང་ཉིད་ཡི་དམ་ཡུམ་ལ་ཐིམ། །རང་ཉིད་ཡབ་ཡུམ་སྙོམས་འཇུག་པས། །སྤྱི་
བོའི་ཧཾ་ལས་བྱང་སེམས་བབས། །གནས་བཞི་གང་བས་དགའ་བཞི་མྱོང་། །ལྷན་སྐྱེས་ཡེ་ཤེས་མངོན་དུ་བྱས། །ཡབ་ཡུམ་དགོངས་པ་བདག་ལ་གཏད། །རང་སེམས་ཆོས་སྐུ་རྗེན་པར་མཐོང་། །ཕྱག་མཚན་རྡོར་དྲིལ་གར་སྟབས་བསྒྱུར། །རྡོ་རྗེ་ཐུགས་ཀྱི་དམ་ཚིག་ནི། །རང་གི་སྤྱི་བོ་སྙིང་གར་བསྟན། །དྲིལ་བུ་གསུང་གི་དམ་ཚིག་ནི༔ །རང་གི་མགྲིན་པའི་གནས་སུ་བསྟན། །ཕྱག་རྒྱ་སྐུ་ཡི་དམ་ཚིག་ནི། །ཕྱག་གཉིས་བསྣོལ་བའི་ཚུལ་གྱིས་བསྟན། །ཡབ་ཡུམ་འོད་དུ་སྟེམས་སེ་ཞུ། །རང་ལ་དབྱེར་མེད་སིབས་སེ་ཐིམ། །མ་བཅོས་ངང་ལ་མཉམ་པར་བཞག །རྫོགས་རིམ་རླུང་སེམས་གཉིས་མེད་དང་། །ཆོས་དྲུག་བདུད་རྩི་སྙིང་ཁུ་དང་། །ཐུགས་སྒྲུབ་དབང་གི་བདག་འཇུག་གི །དོན་བསྡུས་ཤིན་ཏུ་ཟབ་པ་ཡིན། །རང་ཉིད་ཡི་དམ་སྤྱི་བོའི་གཙུག །པདྨ་ཉི་མ་ཟླ་བའི་སྟེང་། །བླ་མ་རྡོ་རྗེ་སེམས་དཔའ་དཀར། །ཡབ་ཡུམ་ཞལ་སྦྱོར་ལོངས་སྤྱོད་རྫོགས། །ཡབ་ཀྱི་རྡོ་རྗེ་དྲིལ་བུ་དང་། །ཡུམ་གྱིས་གྲི་གུག་ཐོད་ཁྲག་འཛིན། །ཡབ་ཀྱི་སྐུ་ལུས་དྭངས་གསལ་ནང་། །སྙིང་གར་ཀུན་བཟང་ཡབ་ཡུམ་དང་། །རིགས་ལྔ་ཡབ་
ཡུམ་ཞལ་སྦྱོར་དང་། །སེམས་དཔའ་བཅུ་དྲུག་ཡབ་ཡུམ་སྦྱོར། །དེ་བཞིན་སྒོ་སྲུང་ཡབ་ཡུམ་སྦྱོར། །མགྲིན་པར་རིག་འཛིན་ཡབ་ཡུམ་བཅུ། །སྤྱི་བོར་ཁྲག་འཐུང་ཡབ་ཡུམ་ནི། །གཙོ་བོ་ཡབ་ཡུམ་བཅུ་གཉིས་སྦྱོར། །གཞན་རྣམས་བག་ཆགས་རང་གྲོལ་ལྟར། །སྐུ་ལ་དམ་པ་རིགས་བརྒྱ་རྫོགས། །ཡེ་ཤེས་སྤྱན་དྲངས་གཉིས་མེད་བསྟིམ། །ལྷ་ཚོགས་སྦྱོར་བའི་བྱང་སེམས་ཀྱིས། །སྐུ་ལུས་གང་བས་བདེ་བ་རྒྱས། །སྦྱོར་མཚམས་བདུད་རྩིའི་རྒྱུན་བབས་པས། །སྔོན་ལྟར་རྩ་གནས་བཞི་པོ་གང་། །སྒྲིབ་བཞི་དག་ཅིང་དབང་བཞི་རྫོགས། །སྐུ་བཞི་འགྲུབ་པའི་སྐལ་ལྡན་གྱུར། །བླ་མ་རྡོར་སེམས་ཡབ་ཡུམ་དེ། །འོད་ཞུ་རང་ཐིམ་མི་དམིགས་བསམ། །རྫོགས་ཆེན་སྤྱི་དང་ཞི་ཁྲོའི་ལུགས། །རྫོགས་ཆེན་བསྒོམ་ན་གལ་ཆེན་ཡིན། །རང་གི་སྤྱི་བོའི་གཙུག་རོལ་ན། །བླ་མ་ཡི་དམ་དབྱེར་མེད་བསྒོམ། །གསར་རྙིང་ཡི་དམ་གང་ཡིན་དེའི། །ལུས་དཀྱིལ་གཞུང་བཞིན་བསྒོམ་པ་སྟེ། །དཔེར་ན་བཀའ་བརྒྱུད་ལྟ་བུ་ལ། །བླ་མ་ཆེ་མཆོག་ཧེ་རུ་ཀ །ཞལ་གསུམ་ཕྱག་དྲུག་ཞབས་བཞི་བསྒྲད། །གནམ་ཞལ་ཡུམ་དང་གཉིས་མེད་འཁྲིལ། །བླ་
མའི་སྐུ་ལུས་དྭངས་གསལ་ནང་། །རྩ་གསུམ་འཁོར་ལོ་ལྔ་ལྡན་བསྒོམ། །སྤྱི་བོ་བདེ་ཆེན་འཁོར་ལོ་ན། །འཇམ་དཔལ་སྐུ་ཡི་ལྷ་ཚོགས་བསྒོམ། །མགྲིན་པ་ལོངས་སྤྱོད་འཁོར་ལོ་ན། །པདྨ་གསུང་གི་ལྷ་ཚོགས་བསྒོམ། །ཐུགས་ཀ་ཆོས་ཀྱི་འཁོར་ལོ་ན། །ཡང་དག་ཐུགས་ཀྱི་ལྷ་ཚོགས་བསྒོམ། །ལྟེ་བ་སྤྲུལ་པའི་འཁོར་ལོ་ན། །བདུད་འདུལ་ཕུར་པའི་ལྷ་ཚོགས་བསྒོམ། །གསང་གནས་བདེ་སྐྱོང་འཁོར་ལོ་ན། །གཟི་བརྗིད་མ་མོའི་ལྷ་ཚོགས་བསྒོམ། །བརླ་ཡི་པུས་མོའི་རྩ་འཁོར་ན། །དྲེགས་པ་ཀུན་འདུལ་ལྷ་ཚོགས་བསྒོམ། །པུས་མོ་གཡོན་གྱི་རྩ་འཁོར་ན། །སྟོབས་ལྡན་ནག་པོའི་ལྷ་ཚོགས་བསྒོམ། །གཙུག་ཏོར་ཚངས་པའི་འཁོར་ལོ་ན། །རིག་འཛིན་ཐོད་པའི་ལྷ་ཚོགས་བསྒོམ་། །རང་རང་ལྷ་ཚོགས་སྤྱན་དྲངས་བསྟིམ། །ཡིད་ཀྱིས་མཆོད་ཅིང་གསོལ་བ་བཏབ། །འདི་དག་སྐབས་སུ་གསོལ་འདེབས་ནི། །སྤྲོ་ན་བྱ་ཆོག་མི་སྤྲོ་ན། །གསོལ་བ་འདེབས་པའི་སྙིང་པོ་སྟེ། །བཛྲ་གུ་རུ་བཟླས་པས་ཆོག །ལྷ་རྣམས་སྦྱོར་མཚམས་བདུད་རྩི་བབས། །བླ་མ་ཆེ་མཆོག་སྐུ་ལུས་གང་། །སྦྱོར་མཚམས་ནས་བབས་ཚངས་བུག་
ཞུགས། །རང་གི་ལུས་དང་རྩ་ཀུན་གང་། །སྡིག་སྒྲིབ་ཉེས་ལྟུང་ཐམས་ཅད་དག །བདེ་གཤེགས་སྒྲུབ་པ་བཀའ་བརྒྱད་ཀྱི། །བྱིན་རླབས་དབང་དང་དངོས་གྲུབ་ཐོབ། །བླ་མེད་ལུགས་ཀྱི་ཡི་དམ་ནི། །ཀུན་ལ་དེ་ཡིས་རིགས་འགྲེས་བྱ། །དེ་ལྟར་བསྒོམ་ལུགས་གསུམ་པོ་དེ། །གསང་བ་བླ་མའི་རྣལ་འབྱོར་ཡིན། །སྣོད་ལྡན་མ་གཏོགས་གསང་བར་བྱ། །བརྩོན་འགྲུས་རྒྱ་མཚོས་ཐུགས་དམ་མཛོད།། ༈ །།ན་མོ་གུ་རུ། བླ་མའི་རྣལ་འབྱོར་གང་བསྒོམས་ཀྱང་། །མཐར་ནི་བླ་མ་རང་ལ་བསྟིམ། །བླ་མ་རང་སེམས་དབྱེར་མེད་བསྲེས། །བྱིན་རླབས་སྟོབས་ཀྱིས་ཉམས་རྟོགས་ནི། །གང་སྐྱེས་དེ་ལ་གེགས་སྐྱོན་མེད། །གཟུགས་དང་ཁ་དོག་དངོས་པོ་མེད། །སྟོང་ཉིད་བླ་མ་ཆོས་ཀྱི་སྐུ། །ཅི་ཡང་མེད་པའི་སྟོང་པ་མིན། །རང་རིག་རང་གསལ་ལོངས་སྤྱོད་རྫོགས། །སྣ་ཚོགས་འགགས་མེད་སྤྲུལ་པའི་སྐུ། །དེ་གསུམ་དབྱེར་མེད་ངོ་བོ་ཉིད། །རྒྱ་གར་ཆུ་དང་བོད་ཀྱི་ཆུ། །ལུང་པའི་དབང་གིས་སོ་སོ་ཡང་། །ཆུ་ཡི་ངོ་བོ་གཅིག་པ་ལྟར། །བླ་མའི་ཐུགས་དང་རང་གི་སེམས། །སྐུ་ལུས་དབང་གིས་སོ་སོར་ཡང་། །སྟོང་ཉིད་སྤྲོས་
བྲལ་ངོ་བོ་གཅིག །བླ་མ་རང་སེམས་གཅིག་ཏུ་འདྲེས། །གསོལ་བ་འདེབས་ཡུལ་མ་རྙེད་དོ། །བཀའ་བརྒྱུད་གསུངས་པའི་དོན་དེ་ཡིན། །གུ་རུ་པདྨའི་གསུང་ལས་ཀྱང་། །རང་རིག་སྣང་བ་མཐའ་ཡས་སྐུ། །མ་འགག་རང་གསལ་ཐུགས་རྗེ་ཆེ། །དྲན་རྟོག་རང་གྲོལ་པདྨ་འབྱུང་། །ཞེས་སོགས་གསུངས་པ་དེ་ལ་དགོངས། །དེ་དོན་ངེས་པར་རྟོགས་པ་ན། །བླ་མ་ཆོས་སྐུའི་མོས་གུས་དང་། །ཐུགས་ཡིད་གཅིག་ཏུ་འདྲེས་པ་དང་། །བླ་མ་འདུ་འབྲལ་མེད་པ་ནི། །དེ་ཁོ་ན་ཉིད་རྣལ་འབྱོར་ཡིན། །།བླ་མ་མཇལ་བར་ནམ་འདོད་ཚེ། །སེམས་ཉིད་བླ་མའི་རང་ཞལ་ལྟོས། །དེ་མཐོང་སངས་རྒྱས་ཐམས་ཅད་མཇལ། །བཀའ་བརྒྱུད་རྣམས་ཀྱི་ལུགས་ལ་ནི། །ཡི་དམ་ལྷ་ཡི་ཞལ་མཐོང་བས། །ངོ་བོ་མཐོང་བ་ལྷག་པར་རྩི། །དེ་ཕྱིར་བརྩོན་འགྲུས་རྒྱ་མཚོ་ཁྱོད། །ཆོས་སྐུ་བླ་མའི་རྣལ་འབྱོར་ལ། །རྒྱུན་གྱི་ཐུགས་དམ་མཛད་པར་ཞུ།། ༈ །།ན་མོ་སྒྱུ་གུ་རུ། དད་གུས་གཙོ་བོར་བྱེད་པ་ཡི། །བརྩོན་འགྲུས་རྒྱ་མཚོ་ཚུར་གསོན་དང་། །དཔེར་ན་ནོར་བུ་སྣ་ཚོགས་མདོག །གདན་ནི་གང་བཞག་ཁ་དོག་བསྒྱུར། །དེ་བཞིན་
དཔལ་ལྡན་བླ་མ་ཡང་། །གང་མོས་ལྷ་ཡི་སྐུར་བསྒོམ་པས། །གང་བསྒོམ་དེ་ཡི་བྱིན་རླབས་འཇུག །ཡིད་བཞིན་ནོར་བུ་རིན་པོ་ཆེ། །དེ་ལ་རྣམ་རྟོག་མི་མངའ་ཡང་། །རྒྱལ་མཚན་རྩེར་བཏགས་གསོལ་བཏབ་ན། །ཟས་གོས་རིན་ཆེན་ཆར་པ་འབེབ། །དེ་བཞིན་བླ་མ་རིན་པོ་ཆེ། །མོས་གུས་རྒྱལ་མཚན་རྩེར་ཕྱར་ནས། །མོས་གུས་དྲག་པོས་གསོལ་བཏབ་ན། །མཆོག་ཐུན་དངོས་གྲུབ་ཆར་དུ་འབེབ། །སྡིག་སྦྱོང་བླ་མ་རྡོ་རྗེ་སེམས། །སྒྲིབ་སྦྱོང་བླ་མ་མི་འཁྲུགས་པ། །ནད་ཞི་འདོད་ན་སྨན་གྱི་ལྷ། །གདོན་ཞི་འདོད་ན་གསང་བའི་བདག །རྫུ་འཕྲུལ་ཆེ་འདོད་པདྨ་འབྱུང་། །ལོངས་སྤྱོད་ཆེ་འདོད་ཛམ་བྷ་ལ། །ཚེ་འཕེལ་འདོད་ན་ཚེ་དཔག་མེད། །འགྲོ་དོན་ཆེ་འདོད་སྤྱན་རས་གཟིགས། །ཤེས་རབ་ཆེ་འདོད་འཇམ་པའི་དབྱངས། །བསྟན་པ་བཙུགས་འདོད་བསྟན་པའི་བདག །འཇིགས་པ་ཞི་འདོད་སྒྲོལ་མ་སྟེ། །ངོ་བོ་རྩ་བའི་བླ་མ་ལ། །རྣམ་པ་ལྷ་སྐུ་གང་འདོད་སྐུར་།བསྒོམས་པས་ཕྲིན་ལས་འགྲུབ་པ་ནི། །དེ་ཡང་ཞྭ་དམར་པས་མཛད་པའི། །མོས་གུས་གཏེར་མཛོད་ནང་ན་གསལ། །དེ་ཡི་ལུང་རྒྱུན་བདག་གིས་ཐོབ། །གསོལ་
བ་འདེབས་དུས་སྤྱི་བོའི་གཙུག །མཆོད་པ་འབུལ་དུས་མདུན་གྱི་མཁར། །རྒྱུན་དུ་བླ་མ་སྙིང་གི་དཀྱིལ། །ན་ན་གཟེར་སའི་དམིགས་དེ་རུ། །སྐྲག་ན་འཇིགས་པའི་ཕྱོགས་དེ་རུ། །བསྒོམ་པས་ནད་གདོན་འཇིགས་པ་ཞི། །ཐ་ན་སོ་ཙམ་ན་ན་ཡང་། །སོ་དཀྱིལ་བླ་མ་སྨན་བླར་བསྒོམ། །བླ་མའི་རྣལ་འབྱོར་ལས་ཚོགས་འདི། །བརྩོན་འགྲུས་རྒྱ་མཚོའི་ཐུགས་ལ་ཟུངས། །དེ་ལྟར་བླ་མའི་རྣལ་འབྱོར་ལ། །ཁ་ཙམ་མིན་པར་ཉམས་བླངས་ན། །བཟོད་མེད་གདུང་ཤུགས་ཁོང་ནས་འབར། །བླ་མ་མིན་པ་བསམ་རྒྱུ་མེད། །ཕྱོགས་བཅུའི་སངས་རྒྱས་བྱང་སེམས་ཀུན། །བླ་མའི་སྤྲུལ་པ་ཡིན་པར་གོ །མཁས་བཙུན་བཟང་པོ་གཞན་རྣམས་ཀྱི། །རྣམ་ཐར་ལེགས་པོ་མཐོང་ཐོས་ན། །རང་གི་བླ་མའི་སྤྲུལ་པར་གོ །མཁའ་འགྲོ་ཆོས་སྐྱོང་ལ་སོགས་པའི། །མཐུ་སྟོབས་ནུས་པ་ཐོས་པའི་ཚེ། །བླ་མའི་ཕྲིན་ལས་སྤྲུལ་པར་གོ །སངས་རྒྱས་ཀུན་ལས་བླ་མ་ལྷག །བླ་མ་ལ་ནི་དཀོན་མཆོག་ཀུན། །འདུས་པར་སྙིང་ནས་ཐག་ཆོད་དེ། །བླ་མ་མཆོད་ཕྱིར་རང་ལུས་ཀྱི། །ཤ་ཁྲག་གཏོར་ཡང་སྙིང་མི་ཚིམས། །བླ་མ་དྲན་ཅིང་
གསོལ་འདེབས་ཚེ། །དབང་མེད་མཆི་མ་ཆར་ལྟར་འབེབ། །ཤ་རུས་ཞིག་ནས་འགྲོ་སྙམ་བྱེད། །དེ་ཚེ་ཉམས་དང་རྟོགས་པ་ནི། །བཀག་ཀྱང་མི་ཁོག་ཤུགས་ཀྱིས་སྐྱེ། །ཉམས་དང་རྨི་ལམ་ཕལ་ཆེར་ལ། །བླ་མ་ཞལ་མཇལ་དབང་ལུང་དང་། །ལུང་སྟོན་གེགས་སེལ་བོགས་འདོན་མཛད། །བརྡ་འམ་ཞལ་འཛུམ་དཀར་ནག་གིས། །ལེགས་ཉེས་ལུང་དུ་སྟོན་པ་འབྱུང་། །ཨ་ཏི་བཀོད་པའི་རྒྱུད་སོགས་ནས། །དྲིན་དང་ལྡན་པའི་བླ་མ་དེ། །སྤྱི་བོའི་གཙུག་གམ་སྙིང་གི་དཀྱིལ། །ཡན་ལག་མཐིལ་དུ་གང་བསྒོམ་པ། །སངས་རྒྱས་སྟོང་གི་ཡོན་ཏན་ཀྱང་། །གང་ཟག་དེ་ཡིས་འཛིན་པར་འགྱུར། །བསྙེན་སྒྲུབ་བཟླས་པ་ས་ཡ་བས། །བླ་མའི་གསོལ་འདེབས་ལན་གཅིག་དགའ། །དེ་སོགས་ཕན་ཡོན་མཐའ་ཡས་གསུངས། །དེ་ཕྱིར་བཀའ་བརྒྱུད་ཆོས་ལུགས་ཀུན། །ཆོས་སྤྱོད་གཙོ་བོ་གསོལ་འདེབས་ཡིན། །བླ་མའི་རྣལ་འབྱོར་བསྒོམ་པའི་ཚུལ། །གླུ་ཆུང་ཚན་པ་འགའ་ཟུང་འདི། །རྟ་ལོ་རྒྱལ་ཟླའི་ཡར་ཚེས་ཀྱི། །དྲུག་བདུན་བརྒྱད་ཀྱི་དགོང་ཐུན་སྐབས། །བྱ་བྲལ་རཱ་ག་ཨ་སྱ་ཡིས། །བཅོས་གཏམ་མགུར་གྱི་ཚུལ་དུ་བྱས། །བརྩོན་འགྲུས་
རྒྱ་མཚོས་ཡི་གེར་བཀོད། །ཕྱི་རབས་མོས་གུས་ལྡན་པ་ཡི། །བྱ་བྲལ་ཉམ་ཆུང་མང་པོ་ལ། །བྱིན་རླབས་ཆར་རྒྱུན་ཕབས་ནས་ཀྱང་། །ཉམས་དང་རྟོགས་པའི་ལོ་ཏོག་ནི། །ཕུན་སུམ་ཚོགས་པ་འཁྲུང་པར་ཤོག །འགྲོ་བ་ཀུན་ལ་འཕེལ་བར་ཤོག །འགྲོ་དོན་རྒྱུན་ཆད་མེད་པར་ཤོག །ལེའུ་བཅུ་གཉིས་མངྒ་ལཾ།། །།