ལེའུ་བཅུ་གསུམ་པ། དང་པོ་ཉམས་རྟོགས་སྐྱེ་ཚུལ་ཤེས་པའི་ཕྱིར། །མྱོང་བ་ཤུལ་རིང་མགྲོན་པོའི་ལམ་གླུ་ཡོད། །
༼པ༽ རི་ཆོས་མཚམས་ཀྱི་ཞལ་གདམས་ལས། རྟོགས་པའི་འཆར་ཚུལ་ཤུལ་རིང་མགྲོན་པོའི་ལམ་གླུ་ཞེས་བྱ་བ་བཞུགས་སོ། །ན་མོ་མ་ཧཱ་མུ་དྲུ་ཡེ། གསོན་།དང་བླ་མ་བཱིརྱ་སཱ་ག་ར། །ཕྱག་ཆེན་རྫོགས་ཆེན་ཟུང་འཇུག་ཉམས་ཁྲིད་དམ། །གང་རུང་ཁྲིད་ཐོབ་བླ་མར་རྟོགས་འབུལ་བྱས། །བླ་མས་དེ་ཡིན་མ་སྐྱུར་གསུངས་ཕྱི་ནས། །སྒོམ་སྐྱེས་བདག་པོ་མེད་པར་མི་སྐྱུར་བར། །རི་ཁྲོད་དབེན་པའི་གནས་སུ་སོང་ལ་སྒོམས། །གཅིག་པུར་རབ་ཡིན་གལ་ཏེ་གྲོགས་ཡོད་ཀྱང་། །ངོ་མི་གཏུགས་པར་རང་ཉིད་གཅིག་པུར་བསྡམ། །དེ་ནས་སྤྲོས་པ་གཅོད་པ་གལ་ཆེ་སྟེ། །འཇིག་རྟེན་སྤྲོས་པ་དགྲ་འདུལ་གཉེན་སྐྱོང་དང་། །ཟས་ནོར་བསོག་དང་ཁེ་སྐྱེད་སེམས་འཕྲེང་ན། །སྔར་ཡང་
འདི་ལྟར་བྱས་པས་འཁོར་བར་འཁྱམས། །ཚེ་འདིར་དེ་སྔ་ཕན་ཆད་དེ་འབད་ཀྱང་། །འདོད་པ་ཙམ་ཞིག་འགྲུབ་པར་མ་གྱུར་མོད། །ད་ནི་ཉམས་རྟོགས་ལེགས་པོ་མ་སྐྱེས་བར། །མུ་གེས་ཤི་ཡང་ལྟོ་གོས་ནོར་གྱི་ཕྱིར། །བསམ་བློ་གཏོང་རེ་ནཱ་ར་ཀན་ཞེས་བསམ། །རིག་གནས་ཤེས་བྱའི་ཕྱོགས་ལ་བློ་འཕྲེང་ན། །དེ་ཚོ་ཐམས་ཅད་ཚེ་འདིའི་ཆེ་ཐབས་ཡིན། །འབྲས་བུ་ཟས་ནོར་གདུལ་བྱ་འབྱུང་ཕྱིར་ཉིད། །ངས་ནི་ཕྱི་མའི་བདེ་སྐྱིད་དོན་དུ་གཉེར། །འབྲས་བུ་རྫོགས་པའི་སངས་རྒྱས་འདོད་པ་ཡིན། །རིག་གནས་མཁས་པས་སངས་རྒྱས་འཐོབ་ན་ནི། །མུ་སྟེགས་པཎྜི་ཏ་ཚོ་ཅིས་མི་རྒྱ། །ངས་ནི་ཉམས་རྟོགས་བཟང་པོ་དོན་དུ་གཉེར། །བཤད་པ་མཁས་པས་ཉམས་རྟོགས་སྐྱེ་ན་ནི། །དབུས་གཙང་ཡོངས་ལ་གྲགས་པའི་རབ་འབྱམས་པ། །མང་པོས་སླར་ཡང་བླ་མ་རྟོགས་ལྡན་བསྟེན། །གནས་འགྱུ་གསར་དུ་ངོ་སྤྲོད་ཅི་ལ་དགོས། །དེ་ཕྱིར་ཡོན་ཏན་ཆེ་འདོད་བསམ་པ་སྤང་། །དཔེ་ལྟས་ལ་སོགས་བྱེད་འདོད་བྱུང་བའི་ཚེ། །གླེགས་བམ་ཀློག་པས་ཉམས་རྟོགས་སྐྱེ་ན་ནི། །ཨ་མཆོད་འདི་ཚོ་སྔར་ནས་གྲུབ་ཐོབ་འོས། །གལ་ཏེ་ཡི་གེ་ལ་སོགས་
བྲི་འདོད་ན། །ཡི་གེ་བྲིས་པས་རྟོགས་པ་སྐྱེ་ན་ནི། །བྲིས་ཆེན་པ་ཚོ་སྔར་ནས་གྲོལ་འོས་གདའ། །ཆོས་སྤྱོད་བཏོན་པས་ཉམས་རྟོགས་སྐྱེ་ན་ནི། །གྲྭ་སའི་བན་ཤར་ཐམས་ཅད་གྲོལ་འོས་གདའ། །དེ་ཕྱིར་བླ་མས་རང་ལ་ངོ་སྤྲད་པའི། །རང་སེམས་ངོ་བོ་སྐྱོང་བ་མ་གཏོགས་པ། །བྱ་རྒྱུ་ཅི་ཡང་ཡོད་པ་མ་ཡིན་ནོ། །རྣམ་སྣང་ཆོས་བདུན་ལུས་གནད་ཁྲིག་གེར་བཅས། །རང་སེམས་མ་བཅོས་ཀློད་དེར་བཞག་པའི་ཚེ། །དངོས་པོ་ཅི་ཡང་མ་མཐོང་སྟོང་པ་ཉིད། །རང་རིག་རང་ལ་གསལ་བས་འོད་གསལ་ལོ། །མ་ཡེངས་རྩེ་གཅིག་གནས་པས་རྩེ་གཅིག་གོ །མཚན་མོ་རླུང་མེད་མར་མེ་གསལ་བ་བཞིན། །སྒོམ་འདོད་བྲོད་ཀ་ཆེན་པོ་ནང་ནས་རྙེད། །འདི་ཉིད་སྒོམ་ཡིན་སྙམ་པའི་ངེས་ཤེས་ཅན། །ཀུ་ཅོ་ཆུ་སྒྲ་ཁྱི་སྐད་ལ་སོགས་ཀྱིས། །གནོད་ཅིང་མི་གནས་དེ་རུ་འཕྲོ་བའི་ཚེ། །གནས་འདི་མི་དབེན་འདི་ལས་དབེན་པ་ཡི། །ལུང་སྟོང་ཞིག་ཏུ་ཕྱིན་ན་དགའ་སྙམ་བྱེད། །རང་སེམས་རང་གིས་བཀོལ་དུ་མ་བཏུབ་ན། །ཀླུ་རྒྱལ་ཨེ་ལའི་འདབ་མའི་ལོ་རྒྱུས་བཞིན། །ཏིང་འཛིན་ཕྲོག་པའི་རྐྱེན་དེ་མེད་ས་མེད། །དེ་ཕྱིར་ཁྱི་སྐད་ཆུ་སྒྲ་ལ་
སོགས་པ། །རྣ་བར་གཟན་ཅིང་རྣམ་རྟོག་འཕྲོ་བའི་ཚེ། །རྣམ་རྟོག་དེ་ཉིད་དང་པོ་གང་ནས་བྱུང་། །བར་དུ་གར་གནས་ཐ་མ་གང་དུ་འགྲོ། །སེམས་ལ་གནོད་ཚེ་ངོ་བོ་ཅི་འདྲ་འདུག །ལེགས་པར་བརྟགས་པས་གཞི་མེད་སྟོང་པར་ཡལ། །དེ་ནི་མི་དབེན་གནོད་པའི་རྣམ་རྟོག་ཀུན། །དེ་ཉིད་དམིགས་རྟེན་བྱས་ལ་ནན་གྱིས་བསྒོམ། །དེ་ནས་མི་གནོད་རྐྱེན་ཀུན་གྲོགས་སུ་ཤར། །དེ་ནས་རིམ་གྱིས་གནས་ཉམས་ཆེ་རུ་འགྲོ། །མེ་རེ་འཁྱིལ་ལེ་མཚོ་ཆེན་འཁྱིལ་བ་བཞིན། །གནས་ནས་ཡོད་དོ་སྙམ་པའི་འཛིན་པ་ཡོད། །འཛིན་པ་དེ་ལ་བཅང་བཟུང་མི་བྱ་བར། །གནས་མཁན་ངོ་བོ་དེ་ལ་ཧྲིག་གེར་བལྟ། །གནས་པའི་ངོ་བོ་སྟོང་པར་ལྷག་གེར་མཐོང་། །གནས་པ་ཞི་གནས་སྟོང་པ་ལྷག་མཐོང་སྟེ། །དེ་གཉིས་གཅིག་ཏུ་འདྲེས་པ་ཟུང་དུ་འཇུག །དེ་ཉིད་བསྐྱང་བས་ལུས་བདེ་སེམས་ཀྱང་བདེ། །ང་ལས་སྐྱིད་པ་མེད་སྙམ་སེམས་རྩ་དགའ། །འདུག་སྙིང་འདོད་ཅིང་ལངས་འདུག་མང་མི་འདོད། །ཟས་དང་གོས་ཀྱི་སྲེད་པ་ཤུགས་ཀྱིས་ཆུང་། །ལུས་སེམས་བདེ་བས་ཁྱབ་པའི་ནུས་པ་དེས། །ཉིན་མོ་ཕལ་ཆེར་ཡེངས་མེད་འཁོར་ཡུག་འབྱམས། །མཚན་མོ་
རྨི་ལམ་ཡུལ་དུ་རེས་འགའ་ཟིན། །འདི་སྐབས་བྱ་རྒྱུ་བླ་མའི་རྣལ་འབྱོར་དང་། །ཐུན་སྐབས་གསོལ་འདེབས་རྒྱང་འབོད་ཁོ་ན་ཟབ། །དཔེ་སོགས་མི་ལྟ་བལྟས་ཀྱང་མི་ཕན་གནོད། །དེ་ནས་གནས་པ་རྒྱ་མཚོ་འདྲ་བ་དེ། །ཅུང་ཞིག་ཡལ་ནས་གསལ་སྟོང་རྗེན་པར་བུད། །དཔེར་ན་སྤྲིན་ཐག་ཆད་པའི་ནམ་མཁའ་བཞིན། །དྭངས་རྗེན་ལྷང་ངེ་ངེས་ཤེས་སྙིང་ནས་སྐྱེ། །འདི་ལས་ལྷག་པའི་རྟོགས་པ་མེད་སྙམ་བགྱི། །གསལ་སྟོང་རྗེན་ནོ་སྙམ་པའི་འཛིན་པ་ཡོད། །གསལ་ལོ་སྟོང་ངོ་སྙམ་པ་རྣམ་རྟོག་ཡིན། །དེ་ཡི་ངོ་བོ་བལྟས་པས་སྟོང་པར་ཡལ། །གསལ་དང་མི་གསལ་སྟོང་དང་མི་སྟོང་མེད། །དེ་ནས་གསལ་བའི་ངར་དེ་ཅུང་ཟད་ཡལ། །ཐམས་ཅད་སྟོང་པ་ཁོ་ན་ཡིན་པར་སེམས། །ས་རྡོ་རི་བྲག་རྩི་ཤིང་ཁང་ཁྱིམ་ཡང་། །ནམ་མཁའ་བཞིན་དུ་སྟོང་པར་འདུག་གོ་སྙམ། །རང་གི་ལུས་ཀྱང་མེད་དམ་སྙམ་པ་འབྱུང་། །སྟོང་པ་རེད་དོ་སྙམ་པའི་འཛིན་པ་ཡོད། །འཛིན་པ་དེ་ཡི་ངོ་བོར་ཧྲིག་གེར་བལྟ། །སྟོང་དང་མི་སྟོང་གཉིས་ཀ་བརྗོད་ལས་འདས། །དེ་ལྟར་བདེ་གསལ་མི་རྟོག་ཉམས་གསུམ་པོ། །ལོ་ཤས་ཟླ་ཤས་ཞག་ཤས་ལ་སོགས་
པ། །གོ་རིམ་མ་ངེས་རིང་ཐུང་ཅི་ཡང་འབྱུང་། །སྡུག་བསྔལ་ཁ་སྨྲས་ལ་སོགས་རྐྱེན་གཅིག་གིས། །བདེ་གསལ་མི་རྟོག་ཉམས་བཟང་འཇའ་ལྟར་ཡལ། །འཕྲོ་རྒོད་དང་པོ་དུས་ལྟར་མང་བ་ལ། །ཞེ་སྡང་ཁོང་ཁྲོ་ཀོ་ལོང་རྣམ་རྟོག་དང་། །འདོད་ཆགས་སེར་སྣ་ཟས་གོས་སྲེད་པ་སོགས། །སྔར་ལས་ཆེ་ཞིང་ཚིག་སྣ་ཐུང་བ་འབྱུང་། །དེ་ནི་རྩུབ་ཉམས་སྒྲིབ་པ་དག་པའི་སློང་། །དེ་དུས་ངོས་བཟུང་ལུས་སེམས་བགས་ཀྱིས་ཀློད། །།ངོ་བོ་བལྟས་པས་བོགས་སྐྱེད་ཆེན་པོ་འབྱུང་། །འདི་སྐབས་ཆོས་ཀུན་རྩ་བ་སེམས་སུ་གོ །སེམས་ཀྱི་ངོ་བོ་སྟོང་པ་ཉིད་དུ་རྟོགས། །སེམས་ཀྱི་ངོ་བོར་ལྟ་བ་ཉམས་ལེན་ཏེ། །ལྟ་མི་ལྟ་རྒྱུ་སོ་སོར་ཡོད་འདྲ་བ། །རང་ཡིད་ཆེས་པའི་ངེས་ཤེས་འཛིན་པ་ཡོད། །བདེ་གསལ་མི་རྟོག་ཉམས་དང་རྩུབ་ཉམས་བཞི། །རེས་མོས་འཆར་བ་དཔྱིད་ཀའི་ཉི་མ་བཞིན། །རེས་འགའ་བྱིང་རྨུགས་མི་གསལ་འཐིབས་སེ་བ། །བལྟས་ཀྱང་ངོ་བོ་གསལ་སྟོང་མ་མཐོང་བས། །ཞེ་བློ་མི་ཚིམ་སེམས་ལ་ཡི་མུག་ཅན། །དེ་དུས་ལུས་གནད་གྲིམ་གྱིས་བསྒྲིམས་བྱས་ལ། །མིག་གི་ལྟ་སྟངས་དྲག་གཟིར་ཅེར་ཅེར་ལྟ། །དེ་བཞིན་སེམས་ཀྱིས་སེམས་ལ་བལྟས་
པའི་ཚེ། །རྙོག་མའི་ཆུ་ལ་དྲི་མ་ལྡང་བ་བཞིན། །རྣམ་རྟོག་འདི་ཡིན་ངོས་བཟུང་མེད་པ་རུ། །སེམས་ལ་བན་བུན་ལང་ལོང་འགའ་ཞིག་འཆར། །དེ་ནི་སེམས་ཀྱི་རྙོག་མ་ཞེས་ཀྱང་བྱ། །འགྱུ་བ་ཕྲ་བའི་ཕྲ་བ་ཞེས་བྱ་སྟེ། །གཡས་གཡོན་མདུན་སོགས་གང་ཡང་རུང་བ་རུ། །མིག་གིས་ལྟ་སྟངས་དྲག་ཏུ་གཟིར་བྱས་ཏེ། །ངོ་བོ་བལྟ་ཞིང་ལྟ་ཡུན་ཐུང་དུ་འཇུག །དེ་ལྟར་ཡང་ནས་ཡང་དུ་བྱས་པ་ཡིས། །རིག་པ་ངར་ཐོན་སེམས་ཀྱི་རྙོག་མ་དྭངས། །འདི་ནི་དམ་པའི་ཞི་བྱེད་གདམས་པ་མཆོག །དེ་ལྟར་བདེ་གསལ་མི་རྟོག་ཉམས་ཀྱི་ཚེ། །འཇིག་རྟེན་བྱ་བ་བློ་ཡིས་ཐོང་བ་དང་། །ཉོན་མོངས་དུག་ལྔའི་མགོ་བོ་ནོན་པ་དང་། །འཇིག་རྟེན་ཆོས་བརྒྱད་མགོ་བོ་སྙོམས་འདྲ་ཡང་། །རྟག་མི་ཐུབ་སྟེ་འགྱུར་ལྡོག་ཆེན་པོ་འབྱུང་། །དཔེར་ན་སེང་གེ་དཀར་མོའི་འགྲོས་བྱེད་ཚེ། །རྒྱངས་ཙམ་མཆོངས་ནས་ཚུར་ལ་བལྟ་བ་ལྟར། །དེ་བཞིན་སེམས་ཀྱིས་སེམས་ལ་ཚུར་ལྟ་བས། །སེང་གེ་རྣམ་པར་འགྱིང་བའི་ཏིང་འཛིན་ཟེར། །སྒོམ་དེ་ནང་དུ་བསྒོམ་པ་འདྲ་ཞིག་ཡོད། །བདེ་གསལ་མི་རྟོག་ཟུང་དུ་འཇུག་པ་ལ། །སེམས་ནི་རྩེ་གཅིག་གནས་པས་རྩེ་གཅིག་
ཟེར། །ཆེ་ཆུང་འབྲིང་གསུམ་གོམས་པ་ཆེ་ཆུང་དང་། །བརྟན་དང་མི་བརྟན་སོགས་ཀྱི་ཁྱད་པར་ལགས། །ཞི་ལྷག་གཉིས་ལས་ཞི་གནས་གཙོ་ཆེའོ། །སྒོམ་ཆེན་གསར་བུས་། ཉམས་སུ་ལེན་པའི་ཚུལ། །དཔེར་ན་འདམ་སེང་སྔོན་མོའི་ངར་སྒྲ་དེ། །སེང་གེ་དཀར་མོའི་རིགས་ནི་མ་ཐོབ་སྟེ། །སེང་རིགས་ཡིན་པས་སྡེར་ཆགས་ཟིལ་གྱིས་གནོན། །ཡ་མཚན་དཔའ་རྟགས་རལ་པ་དམར་པོས་བརྒྱན། །དེ་བཞིན་རྩེ་གཅིག་སྐབས་ཀྱི་གླུ་དབྱངས་འདི། །ཕྱག་རྫོགས་རྟོགས་པ་དངོས་ནི་མ་ཐོབ་ཀྱང་། །ཐ་སྙད་རྟོག་གེར་འབྱམས་རྣམས་ཟིལ་གྱིས་གནོན། །ཡ་མཚན་དཔའ་རྟགས་བླ་མའི་མོས་གུས་འབར། །སྒོམ་ཆེན་གསར་བུ་རྣམས་ཀྱིས་ཉམས་ལེན་ཚུལ། །འདམ་སྐྱེས་སེང་གེ་སྔོན་མོའི་ང་རོ་འདི། །རྟ་ལོ་རྒྱལ་ཟླའི་ཉེར་བཞིའི་དགོང་ཐུན་ལ། །རཱ་ག་ཨ་སྱས་ཉམས་ལ་ཤར་ནས་སྨྲས། །བཱིརྱ་སཱ་ག་ར་ཡིས་ཡི་གེར་བཀོད།། ༈ །།ན་མོ་མ་ཧཱ་མུ་དྲ་ཡེ། །རི་ཁྲོད་འགྲིམས་ཤིང་རྒྱུན་དུ་ཉམས་བླངས་ན། །ཉམས་ཀྱི་འཆར་ཚུལ་དབྱར་ཁའི་སྤང་དང་འདྲ། །རི་བྲག་རྩིག་པ་ཕྱི་ཡི་སྣང་བ་ཀུན། །ངོ་བོ་མ་གྲུབ་ཐམས་ཅད་སྟོང་པ་ཉིད། །རྒྱུག་མཆོངས་
སོང་ཡང་ཐོགས་པ་མེད་སྙམ་བགྱིད། །ལག་པས་རེག་ན་སྲ་མཁྲེགས་དེ་གར་སྣང་། །སྐྱིལ་ཀྲུང་བཅས་བཞིན་ནམ་མཁར་འཕུར་ན་ཡང་། །བདག་ལུས་གདོས་བཅས་མ་གྲུབ་ཐོགས་མེད་སྙམ། །ཨེ་ཆོག་ཚད་ན་མཐོ་གང་འཕག་མི་ནུས། །སེམས་དང་ནམ་མཁའ་དབྱེར་མེད་གཅིག་ཏུ་འདྲེས། །ནམ་མཁས་གར་ཁྱབ་རིག་པས་ཁྱབ་པ་དང་། །རིག་པས་གར་ཁྱབ་ཆོས་སྐུས་ཁྱབ་པ་ཡི། །བསྲེ་བ་དངོས་དེ་འདི་ཉིད་ཡིན་སྙམ་བགྱི། །འདྲེས་སོ་ཁྱབ་བོ་སྙམ་པའི་འཛིན་པ་ཡོད། །འཛིན་པ་དེ་ལ་ཧྲིག་གེར་བལྟས་པ་ན། །ཁྱབ་དང་མ་ཁྱབ་འདྲེས་དང་མ་འདྲེས་ཀྱི། །འཛིན་པ་རང་ཞི་བརྗོད་མེད་ཉམས་ཤིག་འཆར། །གོང་དུ་བདེ་ཉམས་དང་ནི་གསལ་ཉམས་ལ། །ཆགས་ཤིང་ཞེན་པས་འདོད་ཁམས་གཟུགས་ཁམས་གོལ། །འདི་སྐབས་སེམས་དང་ནམ་མཁའ་འདྲེས་པ་དང་། །ནམ་མཁའ་མཐའ་ཡས་བཞིན་དུ་སེམས་མཐའ་ཡས། །སེམས་ནི་ཡོད་མེད་གཉིས་ཀ་མ་ཡིན་དང་། །སེམས་ལས་མ་གཏོགས་ཆོས་ནི་རྡུལ་ཙམ་མེད། །སེམས་ལ་དངོས་པོ་ཅི་ཡང་ཡོད་མ་ཡིན། །སྙམ་པ་དེ་དག་རེ་རེའི་འཛིན་པ་ཞུགས། ངེས་ཤེས་སེམས་ལ་
འཆང་བའི་ཉེས་སྐྱོན་གྱིས། །གཟུགས་མེད་སྐྱེ་མཆེད་མུ་བཞིར་གོལ་བ་ཡིན། །དེ་ཡན་ཉམས་རྟོགས་ཇི་ལྟར་བཟང་བ་དང་། །རྟོགས་པ་ཇི་ལྟར་མཐོ་མཐོ་འདྲ་ན་ཡང་། །ཉམས་ཀྱི་འགྱུར་ལྡོག་ཡིན་གྱི་རྟོགས་པ་མིན།། ༈ །།ཨེ་མ་ཧོ། བདེ་སྟོང་ཕྱག་རྒྱ་ཆེན་པོའི་ཡེ་ཤེས་དང་། །འདོད་ཁམས་ལྷ་རིགས་དྲུག་གི་གོལ་ས་གཉིས། །འདྲ་འདྲ་འདྲ་ལ་ཁྱད་པར་སྤུ་ཙམ་ཞིག །བདེའོ་སྙམ་པའི་འཛིན་པ་གོལ་ས་ཡིན། །བདེ་བའི་ངོ་བོ་བལྟས་པས་འཛིན་པ་ཞིག །བདེ་སྟོང་དབྱེར་མེད་ཕྱག་རྒྱ་ཆེན་པོ་དངོས། །གཟུགས་ཁམས་གནས་རིགས་བཅུ་བདུན་གོལ་ས་དང་། །གསལ་སྟོང་ཕྱག་རྒྱ་ཆེན་པོའི་ཡེ་ཤེས་གཉིས། །ཁྱད་པར་མེད་དེ་ཁྱད་པར་སྤུ་ཙམ་ཞིག །གསལ་སྟོང་རྗེན་ནེ་ཡེ་རེ་ངེས་ཤེས་ཅན་། །འདི་བས་ལྷག་པ་མེད་བསམ་ང་རྒྱལ་ཅན། །དེ་ཡང་ང་རྒྱལ་ཆེ་ཆུང་ཁྱད་པར་གྱིས། །ཚངས་རིས་ཚངས་པའི་མདུན་ན་འདོན་ལ་སོགས། །བསམ་གཏན་བཞི་ཡི་ལྷ་གནས་རྣམས་སུ་གོལ། །གོལ་ཞེས་བྱ་བ་དེ་རུ་སྐྱེ་བའི་མིང་། །སྐབས་རེ་དེ་འདྲར་སྐྱེས་ཀྱང་མི་གོལ་ཏེ། །དེ་ལ་མཆོག་འཛིན་དེ་ངང་ཤི་ན་ཡིན། །གསལ་ཉམས་མངོན་ཤེས་
ཡོད་འདྲ་ཤར་ཡང་ནི། །ང་རྒྱལ་འཁྲི་བར་རང་རྩིས་མི་བྱ་བར། །གསལ་བའི་ངོ་བོ་བལྟས་པས་སྟོང་པར་འཆར། །གསལ་སྟོང་ཟུང་འཇུག་ཕྱག་རྒྱ་ཆེན་པོ་དངོས། །འདི་སྐབས་གཉིད་དང་མ་གཉིད་སོ་མཚམས་ན། །ཤེལ་སྒོང་ཟླ་ཐིག་མར་མེའི་འོད་འདྲ་བའི། །འོད་ཞིག་མིག་གི་ཐད་དུ་བྱུང་བ་ཡིས། །རྐྱེན་བྱས་སེམས་ངོའི་སྟེང་དུ་གནས་པའི་ངང་། །ས་རྡོ་རི་བྲག་སོགས་ཀྱིས་མི་སྒྲིབ་པར། །ཐག་རིང་གནས་པའི་མི་ཡིས་ཅི་བྱེད་མཐོང་། །ཅི་སྨྲས་ཐོས་སོགས་མངོན་ཤེས་ལྟ་བུར་ཐིག །དེ་འདྲ་རྒྱུན་དུ་མི་འབྱུང་རེས་འགའ་འབྱུང་། །མངོན་ཤེས་ཡིན་པར་རློམས་ཤིང་ང་རྒྱལ་ན། །བར་ཆད་ཡིན་ཏེ་རྟོགས་པའི་འཕེལ་འཕྲོ་ཆད། །དེ་ནི་ཉམས་ཀྱི་འོད་གསལ་ཞེས་བྱ་ཡིན། །དེ་བཞིན་རང་ཉིད་ཉལ་ནས་འདུག་པའི་ཚེ། །གཉིད་པ་ཤེས་ཤིང་གཉིད་ཀྱི་འོད་གསལ་ཟིན། །མུན་ཁུང་ཡིན་ཀྱང་རང་ཁྱིམ་ཉིན་བཞིན་གསལ། །གཞན་དག་རྣམས་ཀྱི་ཡིད་ལ་ཅི་་བསམ་པ། །ཁོ་རང་སྨྲས་ནས་བྱུང་སྙམ་གསལ་པོར་ཐིག །དེ་ཚོ་ཉམས་ཀྱི་འོད་གསལ་ཞེས་བྱ་སྟེ། །མངོན་ཤེས་ཡོད་སྙམ་སྨྲས་ཤིང་ཐིག་པའི་ཚེ། །ང་རྒྱལ་སྐྱེས་ན་བདུད་ཀྱི་
བར་ཆད་ཞུགས། །རྣལ་འབྱོར་ཉམས་ལ་ཅི་ཡང་འཆར་བའི་དཔེ། །ང་རྒྱལ་མི་བྱ་གཡེལ་ཆུང་རང་གར་སྒྱུར། །དེ་ཡི་བར་ཆད་མི་འབྱུང་ལམ་དུ་འགྲོ། །ཆོས་རྣམས་ཐམས་ཅད་རང་གི་སེམས་སུ་འདུས། །དཔེར་ན་ལན་ཚྭ་ཆུ་ལ་ཐིམ་པ་བཞིན། །སེམས་ཉིད་གདོད་ནས་རྣམ་དག་ཆོས་ཀྱི་སྐུ། །ཡིན་ཀྱང་དེ་ལྟར་ཡིན་སྙམ་འཛིན་པ་དེ། །སེམས་ཙམ་ལྟ་བ་ཡིན་གྱི་ཕྱག་ཆེན་མིན། །སེམས་ནི་ནམ་མཁའ་ལྟ་བུར་མཐའ་བྲལ་ཞེས། །བསམ་པའི་འཛིན་པ་ཕྲ་འུ་དེས་བཅིངས་ནས། །རྣམ་ཤེས་མཐའ་ཡས་གཟུགས་མེད་ཁམས་སུ་སྐྱེ་། །ནམ་མཁས་གར་ཁྱབ་སེམས་ཀྱིས་ཁྱབ་པ་དང་། །ནམ་མཁའི་ཁམས་ནི་དཔག་མེད་བསམ་ལས་འདས། །བསམ་པའི་འཛིན་པ་ཕྲ་འུ་དེས་བཅིངས་པས། །ནམ་མཁའ་མཐའ་ཡས་གཟུགས་མེད་ཁམས་སུ་སྐྱེ། །ཆོས་ཀུན་གདོད་ནས་མ་གྲུབ་སྟོང་པ་ཉིད། །ཅི་ཡང་དམིགས་སུ་མེད་པ་ཡིན་མོད་ཀྱི། །དེ་ལྟར་ཡིན་ནོ་བསམ་པའི་འཛིན་པ་དེས། །ཅི་ཡང་མེད་པའི་སྐྱེ་མཆེད་གོལ་ས་ཡིན། །ཕྱི་ནང་སྣོད་བཅུད་རང་གི་སེམས་དང་བཅས། །དོན་དམ་ཅི་ཡང་མེད་དེ་སྟོང་པ་ཉིད། །ཀུན་རྫོབ་ཅི་ཡང་འཆར་ཏེ་ཅི་ཡང་སྲིད། །
དེ་ཕྱིར་ཡོད་མེད་གཉིས་ཀ་མིན་བསམ་པའི། །འཛིན་པ་ཕྲ་འུས་ཡོད་མིན་མེད་མིན་སྐྱེ། །དེ་ལྟར་སྟོང་ཉམས་རྣམ་པ་བཞི་ཡོད་དེ། །མུ་སྟེགས་པ་ཡི་རྟོགས་པ་མཆོག་ཡིན་ཏེ། །དེ་ལ་མཆོག་འཛིན་དེ་ངང་ཚེ་འཕོས་ན། །གཟུགས་མེད་སྐྱེ་མཆེད་མུ་བཞིར་སྐྱེ་བར་གསུངས། །བསྐལ་པ་བརྒྱད་ཁྲིར་ལུས་ནི་མི་ལེན་ཏེ། །བདེ་དང་སྡུག་པའི་ཚོར་བ་གཅིག་ཀྱང་མེད། །འཛིན་པ་མ་ཞུགས་སྟོང་པའི་རང་ངོ་ལྟ། །སྟོང་དང་མི་སྟོང་སྨྲ་བསམ་བརྗོད་ལས་འདས། །དེ་ནི་སྟོང་ཉིད་ཕྱག་རྒྱ་ཆེན་པོ་དངོས། །ཉམས་རྟོགས་དེ་དག་ཡུན་གྱི་རིང་ཐུང་དང་། །ཚབས་ཀྱི་ཆེ་ཆུང་རྣམ་པ་སྣ་ཚོགས་འབྱུང་། །གང་ལྟར་མ་ཡེངས་ས་ལེ་རྗེན་ནེ་བ། །མར་མེ་རླུང་གིས་མ་བསྐྱོད་ལྟ་བུ་དེ། །རྩེ་གཅིག་གནས་པས་རྩེ་གཅིག་མིང་དུ་བཏགས། །དེ་ལ་རེས་འགའ་བ་དང་ཕལ་ཆེ་བ། །གཉིད་དུས་མ་གཏོགས་འབྲལ་བ་མེད་པ་གསུམ། །རྩེ་གཅིག་ཆུང་འབྲིང་ཆེ་གསུམ་མིང་དུ་བཏགས་། །དེ་མིན་ཇི་ལྟར་བཟང་བཟང་འདྲ་ན་ཡང་། །རྟོགས་པའི་ངོ་བོ་མ་མཐོང་ཉམས་ཀྱི་གཡོས། །དེ་ཡང་གང་ཟག་དབང་པོའི་ཁྱད་པར་གྱིས། །ཉམས་རྟོགས་སྐྱེ་དཀའ་
རིམ་གྱིས་སྐྱེ་བ་ནི། །རིམ་སྐྱེས་པ་ཡི་རིགས་ཏེ་གང་སྐྱེས་བརྟན། །དང་པོ་ཉམས་རྟོགས་སྐྱེ་སླ་མྱུར་དུ་སྐྱེ། །སྐྱེས་པ་མི་བརྟན་འགྱུར་ལྡོག་མཐོ་དམན་ཆེ། །དེ་ནི་ཐོད་རྒལ་བ་ཡི་་རིགས་ཡིན་ནོ། །དང་པོ་ཉིད་ནས་རྟོགས་པ་མཐོན་པོ་སྐྱེ། །བསྒོམ་ཡུན་ཐུང་དུས་དེ་ཡི་རྩལ་རྫོགས་པ། །གཅིག་ཆར་པ་ཡི་རིགས་ཏེ་དཀོན་པ་ཡིན། །རྟོགས་པ་སྐྱེ་དཀའ་རིམ་གྱིས་སྐྱེ་བ་ལ། །དེ་ཡང་འགྱུར་ལྡོག་མཐོ་དམན་མང་བ་ནི། །རིམ་གྱིས་པ་ཡི་ཐོད་རྒལ་བ་ཡིན་ཏེ། །དཔེར་ན་རཱ་ག་ཨ་སྱ་བདག་ལྟ་བུ། །རྟོགས་པ་ཅུང་ཞིག་སྐྱེ་བ་བུལ་བ་ལ། །།སྔོན་འགྲོ་ལ་སོགས་ཁྲིད་རིམ་ཅི་བཞིན་དུ། །ཉམས་སུ་བླངས་རིམ་དེ་དང་མཐུན་པ་ཡི། །རྟོགས་པ་བཟང་པོ་སྐྱེས་པར་གྱུར་པ་ནི། །རིམ་གྱིས་པ་ཡི་གཅིག་ཆར་པ་ཡིན་ནོ། །དེ་བཞིན་ཐོད་རྒལ་བ་དང་གཅིག་ཆར་བ། །རེ་རེ་ལ་ཡང་གསུམ་གསུམ་དབྱེ་བའི་ཚུལ། །གོང་གི་རིགས་པས་དཔག་པས་ཤེས་པར་སླ། །དེ་ནས་རྟོགས་པ་ཇི་ལྟར་འཆར་བའི་ཚུལ། །མོས་གུས་གསོལ་འདེབས་འབད་པའི་བྱིན་རླབས་སམ། །ཡི་དམ་འགྲུབ་པའི་མཆོག་གི་དངོས་གྲུབ་བམ། །བསོད་ནམས་ཚོགས་ཆེན་བསགས་པའི་ནུས་
མཐུའམ། །ཚེ་སྔོན་ལས་འཕྲོ་ཡོད་པའི་ལས་སད་པས། །སྔར་གྱི་ཉམས་རྟོགས་ཤུན་པ་ལྟ་བུར་བུད། །བསྒོམ་བྱ་སྒོམ་བྱེད་འཛིན་པ་དབྱིངས་སུ་སྟོར། །འདི་བསྒོམ་དེ་བསྒོམ་གཏད་སོ་གཅིག་ཀྱང་མེད། །འདི་ཡིན་དེ་ཡིན་ངེས་ཤེས་འཛིན་པ་ཞིག །ནང་དུ་བཀུག་ནས་ལྟ་བ་འདྲ་དེ་མེད། །ཕྱི་རུ་བལྟས་པས་གསལ་བ་འདྲ་དེ་མེད། །ལྟ་མི་ལྟ་རྒྱུ་སོ་སོར་ཡོད་འདྲ་བ། །དེ་ཉིད་ཞིག་ནས་འདི་ལྟ་དེ་ལྟ་མེད། །ལྟ་མི་ལྟ་རྒྱུ་གཉིས་པོ་གཅིག་ཏུ་འདྲེས། །འདི་ཡིན་དེ་ཡིན་འདི་བསམ་དེ་བསམ་མེད། །རང་ག་ཁ་རོག་སྡོད་པ་འདྲ་ཞིག་འབྱུང་། །དེ་ཚེ་ཡིད་གཉིས་ཐེ་ཚོམ་དུ་མ་ལྡང་། །སྔར་དང་གཏན་ནས་མི་འདྲ་ཅི་ཡིན་ཨང་། །ཧྭ་ཤང་ལྟ་བ་ཨམ་དེ་ཨུ་ཡིན་ཨང་། །སྟོང་ལྟ་ཧད་པོ་ཨམ་དེ་ཨུ་ཡིན་ཨང་། །སྔར་གྱི་སྒྲོམ་དེ་བོར་བ་ཨུ་ཡིན་ཨང་། །འདི་བསྒོམ་དེ་བསྒོམ་ཅི་ཡང་མི་འདུག་པས། །སྒོམ་མེད་ཨང་དེ་རྟོགས་པ་ཨུ་ཡིན་ཨང་། །ཉམས་ཆེན་དྲི་ས་ཡོད་ན་སྒྱུ་དགའ་བ་ལ། །བསམ་པའི་བློ་མང་རྩབ་རྩུབ་ཅི་ཡང་དྲན། །ཐོས་པ་ཆུང་ན་ང་ཡི་སྒོམ་བོར་སྙམ། །སྔར་གྱི་བདེ་གསལ་མི་རྟོག་ཉམས་བཟང་པོ། །དེ་འདྲ་ཨེ་ཡོང་བསམ་ཞིང་
བསྒོམ་ན་ཡང་། །སྔར་བཞིན་མི་འོང་ཡི་མུག་སེམས་སྡུག་ཆེ། །ཧམ་པ་ཆེ་ན་སྒོམ་མེད་རྟོགས་ཡོད་སྙམ། །འགྲོ་དོན་རིན་བསམ་གཡེང་བས་འཁྱེར་ཡང་སྲིད། །དེ་ནས་བདེ་། གཤེགས་བཀའ་ཡི་བླ་མ་བསྟེན། །བཀའ་བརྒྱུད་གོང་མའི་གསུང་དང་རྒྱུད་སྡེ་སོགས། །དཔེ་ལྟས་བྱས་པས་སེམས་ཀྱི་ཐེ་ཚོམ་ཆོད། །རང་སེམས་ངོ་བོ་མཐོང་བ་དངོས་དེ་ཡིན། །ཐ་མལ་ཤེས་པ་རྗེན་པ་ཞེས་ཀྱང་བྱ། །སྤྲོས་བྲལ་ཆུང་ངུའི་ངོ་མཐོང་ཞེས་ཀྱང་བྱ། །དཔེར་ན་ཚེས་པ་གསུམ་གྱི་ཟླ་བ་དེ། །ཆུང་ཡང་ཟླ་བ་ཡིན་པར་ཐག་ཆོད་ལྟར། །ད་དུང་ཉམས་རྟོགས་རྩལ་ནི་མ་རྒྱས་ཀྱང་། །ཕྱག་རྒྱ་ཆེན་པོའི་རྟོགས་པ་ཤར་བ་ཡིན། །འདི་ནས་རྟོགས་ལྡན་མིང་ཡང་ཐོབ་པར་བཤད། །དེ་ནས་ངོ་བོ་འགྱུར་བ་མེད་ན་ཡང་། །གསལ་དང་འགྲིབ་པ་ཅུང་ཟད་ཡོད་པ་ཡིན། །ཉམས་ནི་ཤས་ཆུང་རྟོགས་པ་ཤས་ཆེ་ཡི། །ཉམས་ནི་གཏན་ནས་དག་པ་མ་ཡིན་ཏེ། །ད་དུང་ཉམས་ཀྱི་གསལ་འགྲིབ་མང་དུ་འབྱུང་། །མ་ཡེངས་རྩེ་གཅིག་ཉམས་ལེན་སྐྱོང་བའི་ཚེ། །ཕྱི་ནང་མེད་པར་མཉམ་དང་ཀད་དེ་བ། །མ་ཡེངས་དྲན་རྫི་ཙམ་ཞིག་མ་གཏོགས་པ། །འདི་བསྒོམ་གཏད་སོ་མེད་
པའི་ཕྱ་ལེ་བ། །མིག་གི་ཡུལ་དུ་གཟུགས་ནི་ཅི་མཐོང་ཡང་། །བྱིས་པ་ལྷ་ཁང་ནང་དུ་ཕྱིན་པ་བཞིན། །མིག་གིས་མཐོང་ཡང་འདི་ཡིན་འཛིན་པ་མེད། །སྣང་། སྟོང་ཕྱག་རྒྱ་ཆེན་པོ་དངོས་སུ་འཆར། །རྣ་བའི་ཡུལ་དུ་སྙན་དང་མི་སྙན་སྒྲ། །དགའ་དང་མི་དགའ་མེད་དེ་བྲག་ཆ་ལྟར། །གྲག་སྟོང་ཕྱག་རྒྱ་ཆེན་པོ་དངོས་སུ་འཆར། །དྲི་རོ་རེག་བྱ་རྣམས་ཀྱང་དེ་ཡིས་འགྲེས། །མ་ཡེངས་ཉམས་ལེན་སྐྱོང་ཚེ་དེ་ལྟར་ཏེ། །ཡེངས་སྐབས་ཐ་མལ་འཁྲུལ་པའི་དུག་ལྔ་ལྡང་། །འདི་སྐབས་འཇིག་རྟེན་བྱ་བ་ཅི་ནུས་སྤང་། སྤྲོས་བཅས་མི་བྱ་ཆོས་སྤྱོད་ཉུང་ངུར་བསྡུ། །ཉམས་ལེན་རྩེ་གཅིག་སྐྱོང་ན་བོགས་རྩལ་ཆེ། །སྤྲོས་བཅས་མང་ན་ཉམས་དེ་ཡལ་དོགས་ཆེ། །ཉམས་ད་རེས་འགའ་བ་དང་ཕལ་ཆེར་རམ། །གཉིད་ཚོ་མ་གཏོགས་འཁོར་ཡུག་འགྲོ་བ་དང་། །གཉིད་དང་རྨི་ལམ་རེས་ཟིན་རེས་མི་ཟིན། །སྤྲོས་བྲལ་ཆུང་འབྲིང་ཆེ་གསུམ་ཡིན་པར་ངེས། །ཕྱི་རོལ་གཟུགས་སྒྲ་དྲི་རོ་ཅི་ཤར་ཡང་། །སེང་གེ་གངས་ལ་ཟིན་པ་ཇི་བཞིན་དུ། །འཇིགས་སྐྲག་ཡ་ངའི་རྟོག་པ་མི་འཇུག་སྟེ། །དེ་ཕྱིར་དཔའ་བར་འགྲོ་བའི་ཏིང་འཛིན་ཟེར། །དོན་ལ་གང་
ཟག་བདག་མེད་རྟོགས་པར་འདོད། །ཅི་ཕྱིར་སེམས་དང་བདག་ཅེས་དོན་གཅིག་པས། །སེམས་ཉིད་སྐྱེ་འགག་གནས་གསུམ་བྲལ་བར་རྟོགས། །བདག་དང་སེམས་ཞེས་བྱ་བའི་དངོས་པོ་ཞིག །མེད་པར་ཐག་ཆོད་ཡིད་ཆེས་གདེང་རྙེད་ཅིང་། །སེམས་ཉིད་ལས་གཞན་ཆོས་སྐུ་མེད་པར་རྟོགས། །དེ་ཕྱིར་དོན་ལ་གང་ཟག་བདག་མེད་ཡིན། །གང་ཟག་བདག་མེད་སྟོང་ཉིད་ཕྱེད་པ་སྟེ། །ནང་གི་སེམས་ཉིད་གཏན་ལ་ཕེབས་ན་ཡང་། །ཕྱི་ཡི་སྣང་བ་གཏན་ལ་མ་ཕེབས་པས། །སྟོང་དང་མི་སྟོང་འཛིན་པ་མ་ཞུགས་སོ། །དེ་ནས་སྣང་བ་གཏན་ལ་ཕབ་པ་ནི། །ས་རྡོ་རི་བྲག་སྐྱེས་པ་ཐམས་ཅད་དང་། །སྦྲ་ཁང་སྐྱེས་པ་བུད་མེད་དུད་འགྲོ་སོགས། །མིག་གིས་གང་མཐོང་དེ་ལ་རིག་པ་གཏད། །ངོ་བོ་བལྟས་པས་དབྱེར་མེད་གཅིག་ཏུ་འདྲེས་། །ཕྱི་ཡི་གཟུགས་དང་ནང་གི་སེམས་ཉིད་གཉིས། །སོ་སོར་ཕྱེ་རྒྱུ་མེད་པའི་ཉམས་ཤིག་འཆར། །དེ་ལ་གོམས་ན་གཏད་ནས་བསྒོམ་མི་དགོས། །གང་མཐོང་ཤུགས་འབྱུང་དེ་ཡི་ངང་ལ་འགྲོ། །དེ་ནས་གླིང་བཞི་སྟོང་གསུམ་འཇིག་རྟེན་ཁམས། །ཡིད་ལ་བཀོད་ནས་བསྒོམ་པས་དབྱེར་མེད་འདྲེས། །དེ་བཞིན་
སེམས་དང་ནམ་མཁའ་བསྲེས་བསྒོམས་པས། །འདི་ཕན་ནམ་མཁའ་འདི་ཚུན་སེམས་ཉིད་ཅེས། །སོ་སོར་ཕྱེ་རྒྱུ་མེད་པར་དབྱེར་མེད་འདྲེས། །དེ་བཞིན་ནམ་མཁས་གར་ཁྱབ་སེམས་དང་བསྲེས། །ངོ་བོ་བལྟས་པས་དབྱེར་མེད་གཅིག་ཏུ་འདྲེས། །འདི་ཚུན་ནམ་མཁའ་སེམས་ཀྱིས་ཁྱབ་པ་ལ། །འདི་ཕན་མ་ཁྱབ་སྙམ་པའི་ས་མཚམས་མེད། །དེ་ནས་བསྲེ་ཞིང་བསྒོམ་སོགས་མི་དགོས་པར། །སྣང་སྲིད་འཁོར་འདས་ཆོས་རྣམས་ཐམས་ཅད་ཀུན། །རྣམ་པ་གསལ་ཡང་ངོ་བོ་སྟོང་པ་ཉིད། །རྣམ་པ་གསལ་བ་སྟོང་པས་མ་བསྒྲིབས་ཤིང་། །དངོས་པོའི་གཟུགས་དེ་སྟོང་པས་མ་བསྒྲིབས་པར། །འཇའ་ཚོན་ཆུ་ཟླ་མེ་ལོང་གཟུགས་བརྙན་བཞིན། །ཉམས་ལེན་ནམ་སྐྱོང་དུས་སུ་དེ་ལྟར་འཆར་། །ཡེངས་པའི་སྐབས་སུ་ཐ་མལ་འཁྲུལ་པ་ཉིད། །ཡེངས་སྐབས་རིང་ཐུང་བརྩོན་འགྲུས་ཆེ་ཆུང་ལགས། །རྣམ་གཡེང་ཆེ་འམ་སྡུག་བསྔལ་སྐྲག་སྔངས་དུས། །ཡེངས་སྐབས་མི་འབྱུང་ཕལ་ཆེར་ཚུར་ལ་འཆར། །བདེ་སྐྱིད་སྡུག་བསྔལ་མེད་དུས་ཡེངས་སྐབས་མང་། །འདི་སྐབས་ཡང་ཡང་དྲན་རྫིས་གསལ་འདེབས་ལས། །གཞན་པའི་བསྒོམ་རྒྱུ་
ཅི་ཡང་མེད་པ་ལ། །ཆོ་ག་ཆོས་སྤྱོད་དུས་མཆོད་ལ་སོགས་དང་། །རིམ་པར་བསྲེ་ཞིང་གཉིས་ཀ་མ་ཤོར་བྱ། །བླ་མའི་ཐུགས་དང་རང་གི་སེམས་ཉིད་གཉིས། །དབྱེར་མེད་གཅིག་ཏུ་བསྲེས་ནས་ངོ་བོ་ལྟ། །དབྱེར་མེད་འདྲེས་པའི་རྟོགས་པ་ནང་ནས་འཆར། །དཔེར་ན་རྒྱ་གར་ཆུ་དང་བོད་ཀྱི་ཆུ། །ལུང་པའི་དབང་གིས་ཐ་དད་སོ་སོ་ཡང་། །ངོ་བོ་ཆུ་རུ་གཅིག་ལ་ཐ་དད་མེད། །དེ་བཞིན་བླ་མའི་ཐུགས་དང་རང་གི་སེམས། །ངོ་བོ་སྟོང་ལ་རང་བཞིན་གསལ་བ་དང་། །རྣམ་པ་འགག་མེད་འཆར་ལ་ཁྱད་པར་མེད། །འདི་མན་རང་སེམས་འདི་ཡན་བླ་མའི་ཐུགས། །སོ་སོར་དབྱེ་རྒྱུ་མེད་པར་གཅིག་ཏུ་འདྲེས། །དེ་ཡང་གོ་བ་སྐམ་པོ་མ་ཡིན་པར། །རྟོགས་པ་གདེང་ནས་འཆར་བར་གྱུར་པ་ལ། །ཐུགས་ཡིད་གཅིག་ཏུ་འདྲེས་པ་དེ་ལ་ཟེར། །དེ་བཞིན་ཕྱོགས་བཅུ་དུས་གསུམ་སངས་རྒྱས་ཀྱི། །ཐུགས་དང་རང་སེམས་བསྲེས་ལ་ངོ་བོ་བལྟ། །གོང་བཞིན་དབྱེར་མེད་འདྲེས་པའི་ངོ་བོ་་འཆར། །དེ་བཞིན་དམྱལ་བ་ཡི་དྭགས་དུད་འགྲོ་སོགས། །འགྲོ་དྲུག་སེམས་ཅན་ཀུན་གྱི་སེམས་རྒྱུད་དང་། །རང་སེམས་བསྲེས་ནས་བལྟས་ཀྱང་ཁྱད་པར་མེད། །དོན་དམ་
ཆོས་སྐུ་ཉག་གཅིག་རྗེན་པར་རྟོགས། །སེམས་ཉིད་ལས་གཞན་འཁོར་བ་མེད་པར་རྟོགས། །འཁོར་བ་དོང་ནས་སྤྲུགས་པའང་དེ་ལ་ཟེར། །རང་གི་ངོས་ནས་འཁོར་བ་དོང་སྤྲུགས་ཡིན། །མ་རྟོགས་འཁྲུལ་ངོར་འཁོར་བ་མཐའ་མེད་ཡིན། །རང་གི་ཉམས་ལེན་སྟེང་དུ་བཞག་པའི་ཚེ། །འཁོར་བ་མྱང་འདས་དབྱེར་མེད་སྟོང་པ་ཉིད། །མཐོ་དམན་བཟང་ངན་ཁྱད་པར་མེད་པར་རྟོགས། །འདི་ནི་ལྟ་བ་འཁོར་འདས་དབྱེར་མེད་ཡིན། །ལྟ་བའི་ཕྱོགས་སུ་སྤྱོད་པ་མ་ཤོར་བར། །རྒྱུ་འབྲས་ཕྲ་ཞིབ་འཛེམ་པ་གནད་དུ་ཆེ། །རྟོགས་པ་མཐོ་དུས་དེ་ལྟར་རྟོགས་པ་དང་། །ཡེངས་སྐབས་ཉོན་མོངས་ཧྲག་ཅིང་ཐ་མལ་པ། །དེ་ནི་ཉམས་ཀྱི་རོ་གཅིག་ཆུང་ངུ་སྟེ། །འདི་སྐབས་ཁྲོ་གཏུམ་ཆེ་དང་ཉོན་མོངས་ཧྲག །འདོད་པ་ཆེ་སོགས་བསྒོམ་འཁྲེབ་སོང་བ་འདྲ། །སྒོམ་ཆེན་རྙིང་པས་ལྷམ་ཀྲད་མཐོང་སྡུད་དཔེ། །རོ་གཅིག་འདྲེས་པའི་རྦ་ལ་གཡེང་ཞེས་པ། །སྤྱོད་པ་རྩིང་ན་ངན་འགྲོར་ལྟུང་དོགས་གསུངས། །དེ་དུས་རྒྱུ་འབྲས་བླང་དོར་གཟབ་པ་གཅེས། །རྟེན་འབྲེལ་ལེགས་ཚོགས་བསྒྲིག་ན་ཤུགས་ཀྱིས་འགྲིག །དེ་ནས་རྩུབ་སློང་ཉོན་མོངས་ཕལ་
ཆེར་ཞི། །གཏམ་སོགས་ཀོ་ལོང་ཕྲག་དོག་རྣམས་ཀྱང་མེད། །བཀུར་སྟི་བསྟོད་བསྔགས་བྱུང་ཡང་དགའ་བ་ཆུང་། །ཉམས་ལེན་སྟེང་དུ་ནམ་བཞག་དེ་ཡི་ཚེ། །སྣོད་བཅུད་གསལ་སྟོང་ཆུ་ཟླ་ལྟ་བུ་ལས། །བསྲེ་སོགས་བཅས་བཅོས་མི་དགོས་ཤུགས་ཀྱིས་འཆར། །རྨི་ལམ་འོད་གསལ་ཟིན་གྲངས་ཉུང་དུ་སོང་། །ཉམས་དང་རྨི་ལམ་དག་སྣང་དཔག་མེད་འཆར། །བསྒྲུབ་དང་མ་བསྒྲུབ་ཡི་དམ་ཞལ་མང་མཐོང་། །སྔོན་བྱོན་ད་ལྟར་བཞུགས་པའི་གྲུབ་ཆེན་ཚོགས། །མ་ངེས་དུ་མ་མཇལ་ཞིང་བརྡའ་ཆོས་སྟོན། །དེ་འདྲ་བྱུང་ཡང་ཧ་ཅང་མཆོག་འཛིན་མེད། །འོན་ཀྱང་ཡེངས་སྐབས་བརྗེད་སྐབས་མང་བའི་ཕྱིར། །ཡེངས་སྐབས་བྱུང་བར་འགྱོད་པས་བློ་མི་ཚིམ། །འདི་ནི་རོ་གཅིག་འབྲིང་ཙམ་ཡིན་ནམ་སྙམ། །བློ་མི་ཚིམ་པ་མཉམ་རྗེས་མ་འདྲེས་རྟགས། །དེ་ནས་བླ་མའི་བྱིན་རླབས་ཞུགས་པའམ། །ཡི་དམ་བསྙེན་སྒྲུབ་སོགས་ཀྱིས་རྐྱེན་བྱས་ཏེ། །གཞི་ལམ་འབྲས་བུ་གཞི་ཡི་ཕྱག་ཆེན་གྱི། །གོ་བ་སྐམ་པོ་དེ་ཡང་མ་ཡིན་ལ། །རིགས་པས་བརྟག་ཅིང་དཔྱད་པའང་མ་ཡིན་པ། །མདོ་རྒྱུད་ཚིག་ལའང་གོ་བ་བརྒྱབ་པ་མིན། །གཞན་གྱིས་གསུངས་པའི་
རྗེས་ཟློས་མ་ཡིན་པར། །ཡེངས་སྐབས་བརྗེད་སྐབས་གཉིད་སྐབས་ཡོད་ན་ཡང་། །ཡེངས་དང་མ་ཡེངས་ཁྱད་པར་མེད་པར་རྟོགས། །བརྗེད་དང་མ་བརྗེད་ཁྱད་པར་མེད་པར་རྟོགས། །གཉིད་དང་མ་གཉིད་ཁྱད་པར་མེད་པར་རྟོགས། །རང་བཞིན་ཡོངས་སུ་ཤེས་པའི་ཤེས་རབ་ཀྱིས། །ཡེ་ནས་ཆོས་སྐུ་རྗེན་པ་ཡིན་པར་རྟོགས། །དོན་དམ་གཉུག་མ་རྒྱུན་ཆད་མེད་པར་རྟོགས། །དེ་ལྟར་རྟོགས་ཀྱང་ད་རུང་དྲན་པ་ཡིས། །ཡང་ཡང་གསལ་འདེབས་བྱེད་པ་ཟབ་པར་གོ །འཁོར་བ་རང་བཞིན་མེད་པར་རྟོགས་ན་ཡང་། །དག་པའི་ཞིང་དུ་སྨོན་ལམ་འདེབས་པ་ཟབ། །དོན་ལ་དགེ་སྡིག་མེད་པའི་དོན་རྟོགས་ཀྱང་། །དགེ་བ་བསྒྲུབ་ཅིང་སྡིག་པ་སྤང་བ་ཟབ། །ཉེས་ལྟུང་དྲི་མ་གདོད་ནས་མ་དམིགས་ཀྱང་། །ཉེས་ལྟུང་སྦྱང་ཞིང་བསོད་ནམས་བསག་པ་ཟབ། །དེ་ལྟར་གོང་དུ་བཤད་པའི་རྟོགས་པ་དེ། །རེས་འགའ་ཤར་ཞིང་རྟག་ཏུ་མི་བརྟན་ན། །ཉམས་ཀྱི་རོ་་གཅིག་ཅེས་བྱའི་མིང་དུ་བཏགས། །འཕོ་འགྱུར་མེད་ཅིང་རྟོགས་པ་བརྟན་པ་ན། །ད་རུང་རྟོགས་པའི་རྩལ་ནི་མ་རྫོགས་ཤིང་། །རྟོགས་པའི་ཡོན་ཏན་དངོས་སུ་མ་ཤར་ཡང་། །
རོ་གཅིག་ཞེས་བྱའི་མིང་ནི་ཐོག་གོ་སྙམ། །སྣང་སྲིད་ཐམས་ཅད་སྒྱུ་མར་མཐོང་བའི་ཕྱིར། །སྒྱུ་མ་ལྟ་བུའི་ཏིང་འཛིན་ཞེས་ཀྱང་བྱ། །དེ་དག་རང་གི་ཉམས་དང་བསྟུན་བྱས་ཏེ། །གཞན་ལ་ཕན་ཕྱིར་བརྩོན་འགྲུས་ཁྱོད་ལ་བཤད། །འདི་ནི་བཤད་པའི་ཆོས་ནི་མ་ཡིན་ཏེ། །ཉམས་ལེན་སྒྲུབ་པའི་དམིགས་རིམ་ཡིན་པའི་ཕྱིར། །རང་ལ་ཉམས་མྱོང་མེད་པའི་མང་པོ་འགའ། །ཁྲིས་ཀྱང་ཤོག་བུ་འཛད་ལས་དགོས་པ་ཆུང་། །འོན་ཀྱང་ཆོས་ཀྱི་མགོ་རྐང་ཚང་བའི་ཕྱིར། །བཀའ་བརྒྱུད་གསུང་ལ་དཔང་བཞག་ཟུར་ཙམ་སྨྲ། །དྲན་རྫི་བརྟེན་དགོས་བར་དུ་བསྒོམ་ཡོད་དེ། །དྲན་རྫི་བསྟེན་མི་དགོས་པར་དུས་རྒྱུན་དུ། །ངོ་བོ་འགྱུར་མེད་ངང་དུ་སོང་བ་ནི། །སྒོམ་མེད་ཡིན་ཞེས་རླུང་སེམས་གཉིས་མེད་ཀྱི། །ཤོག་དྲིལ་མི་ལས་དྭགས་པོར་གནང་བ་ཡི། །ཡིག་རྙིང་ཁུངས་བཙུན་ནང་དུ་གསལ་བར་སྣང་། །དེ་ལའང་ཆུང་འབྲིང་ཆེན་པོ་གསུམ་དུ་བཤད། །སྤང་བྱའི་དྲི་མ་ཐམས་ཅད་དེས་བཅོམ་ཞིང་། །སེམས་ལ་གེགས་སྐྱོན་གང་གིས་མི་ཚུགས་པས། །རྡོ་རྗེ་ལྟ་བུའི་ཏིང་འཛིན་ཡིན་པར་བཤད། །སྒོམ་མེད་ཆེན་པོ་རྫོགས་པའི་སངས་རྒྱས་ས། །ཡིན་པར་ཁྲིད་
ཡིག་ཐམས་ཅད་དགོངས་པ་མཐུན། །དེ་དོན་བླ་མེད་རྒྱུད་སྡེ་ཐམས་ཅད་ནས། །ཚེ་གཅིག་སངས་རྒྱས་ཐོབ་པར་གསུངས་པ་དེ། །དབུ་ལ་གཙུག་ཏོར་ཞབས་ལ་འཁོར་ལོ་སོགས། །ཤཱཀ་ཐུབ་འདྲ་བ་འོང་བ་མ་ལགས་ཏེ། །སྐལ་ལྡན་ཚེ་གཅིག་སྒྲུབ་པ་བྱས་པ་ན། །སྒོམ་མེད་ཆེན་པོ་ཚེ་འདིར་རྟོགས་འགྱུར་པས། །དེ་ནི་ཚེ་གཅིག་སངས་རྒྱས་ཡིན་ལ་དགོངས། །དེ་ལྟར་ཉམས་ལེན་སྐྱོང་ཚུལ་དེ་དག་ནི། །རྫོགས་ཆེན་པ་ཡི་ཁྲེགས་ཆོད་ཉམས་ལེན་ཟེར། །རྫོགས་ཆེན་སེམས་སྡེའི་ཉམས་ལེན་མཐར་ཐུག་ཡིན། །རྫོགས་ཆེན་ཀློང་སྡེ་མན་ངག་སྡེ་རྣམས་ནས། །དེ་ལ་བཀག་པ་མཛད་པའང་མང་ཡོད་དེ། །ཚིག་གི་བཤད་ཕྱོགས་རྩིང་ཞིབ་ཁྱད་ཙམ་ལས། །དོན་ལ་མི་འགལ་ཁྱད་པར་སྤུ་ཙམ་མེད་། །དེ་དོན་གྲུབ་ཆེན་ཀརྨ་པཀྴི་ཡིས། །ཕྱག་རྒྱ་ཆེན་པོ་རྫོགས་པ་ཆེན་པོ་གཉིས། །ཚིག་ལ་ཁྱད་ཡོད་དོན་ལ་ཁྱོད་མེད་གསུངས། །ཕྱག་རྫོགས་ཟུང་འཇུག་ཉམས་ལེན་སྐྱོང་བའི་ཚུལ། །སེང་གེ་དཀར་མོའི་ངར་སྐད་འདི་བསྒྲགས་པས། །སྐལ་མེད་ལོག་ལྟ་ཐེ་ཚོམ་གྱིས་སྐྲག་ཀྱང་། །སྐལ་ལྡན་སེང་ཕྲུག་དགའ་བས་ཉམས་སུ་ལེན། །རང་གི་ཉམས་
ལ་གང་ཤར་སྨྲས་པ་ལ། །ཡིན་རུང་མིན་རུང་རྫུན་གྱི་ཚིག་མི་འདྲེས། །རྣལ་འབྱོར་ཉམས་ལ་ཅི་ཡང་འཆར་བའི་ཕྱིར། །མཁས་གྲུབ་རྣམས་ཀྱིས་གཟིགས་ཀྱང་ཐུགས་མ་ཁྲེལ། །ཞེས་པ་རྟ་ལོ་རྒྱལ་ཟླའི་ཉེར་བཞི་ལ། །བྲི་མཚམས་ལུས་ནས་ཟླ་བ་འགའ་འདས་ཏེ། །ཁྲུམས་ཟླའི་ཉེར་གཉིས་ཉིན་པར་འཕྲོ་མཐུད་བྱས། །དགོང་མོའི་ཐུན་ལ་རྫོགས་པར་སྨྲས་པ་དེ། །བླ་མ་བརྩོན་འགྲུས་རྒྱ་མཚོས་གུས་བཏུད་ནས། །ཕྱག་འཚལ་མཎྜལ་ཕུལ་ནས་མགྱོགས་པར་བྲིས། །དགེ་བས་སྒོམ་ཆེན་འགའ་ལ་ཕན་ཐོགས་ཤོག །ལེའུ་བཅུ་གསུམ་པའོ་མངྒ་ལཾ།། །།