ལེའུ་བཅོ་ལྔ་པ། རི་ཁྲོད་ས་ཆ་གར་ལེགས་ཤེས་དགོས་ཕྱིར། །ས་དཔྱད་ཉུང་ངུ་རིན་ཆེན་ཀུན་འདུས་ཡོད། །
༼བ༽ རི་ཆོས་མཚམས་ཀྱི་ཞལ་གདམས་ལས། ས་དཔྱད་རིན་ཆེན་ཀུན་འདུས་ཞེས་བྱ་བ་བཞུགས་སོ། ༈ ན་མོ་ཨཱརྱ་མཉྫའི་ཡེ། །ཀུན་རྫོབ་ས་ཡི་བདེན་འབྲས་ནི། །སྤྱིར་ནི་ཕྱི་ནང་སྣོད་བཅུད་ཀུན། །འབྱུང་བ་ལྔ་ཡི་རང་བཞིན་ཡིན། ཁྱད་པར་ས་འདི་དབང་ཆེ་སྟེ། །གླིང་བཞི་དང་ནི་འཛམ་བུ་གླིང་། །རྒྱ་གར་རྒྱ་ནག་ཧོར་དང་བོད། །ས་ཡི་ཆགས་ཚུལ་ལ་བརྟེན་ནས། །སྐྱིད་སྡུག་དར་གུད་ཕྱུག་དབུལ་སྒྱུ་སོགས། །སོ་སོར་བྱུང་བའི་ལོ་རྒྱུས་ནི། །ཕུར་པའི་ས་དཔྱད་གཞུང་དུ་གསལ། །དེ་ཕྱིར་ཁང་པ་ལ་སོགས་པ། །གསོན་པོའི་ས་འདི་གལ་ཆེའོ། །སྲོག་དང་བླ་དང་རྣམ་ཤེས་
གསུམ། །སྲོག་ནི་གཤེད་མ་འདྲེ་ཡིས་བཅད། །རྣམ་ཤེས་ལས་ཀྱི་རྗེས་སུ་འབྲང་། །བླ་དེ་ཚེ་འདས་གཟུགས་བཟུང་ནས། །དུར་ས་དེ་ལ་གནས་པ་ཡིན། །དུར་ས་ལེགས་ན་བླ་དེ་དར། །གསོན་པོ་རྣམས་ལ་མགོན་སྐྱོབས་ནུས། །ཕ་མྱེས་བླ་ཡིས་སྲུང་ཞེས་བྱ། །དུར་ས་ངན་ན་བླ་དེ་གུད། །གསོན་པོ་རྣམས་ལ་སྐྱབས་ཚོལ་བས། །མི་ཁྱག་ན་ཚ་གོད་ཁ་འབྱུང་། །དེ་ཕྱིར་དུར་ས་གལ་ཆེ་སྟེ། །ས་དཔྱད་ངན་པར་རོ་བསྐྱལ་ན། །དུད་འགྲོ་ཡིན་ཀྱང་རྡུལ་དུ་བརླག །དེ་སྐད་འཕགས་པ་འཇམ་དཔལ་གྱི། །རྒྱུ་ནག་གཙུག་ལག་རྒྱུད་ནས་གསུངས། །ས་ཡི་བདེན་འབྲས་བཤད་པའི་ལེའུ་སྟེ་དང་པོའོ།། ༈ །།འཕགས་པ་འཇམ་དབྱངས་རིགས་ལྔ་དང་། །ཀོང་རྩེ་ལ་སོགས་རྒྱལ་པོ་བཞི།་་་་ཀོང་རྩེ་འཕྲུལ་གྱི་རྒྱལ་པོ། ཡེ་ཤེས་འཕྲུལ་གྱི་རྒྱལ་པོ། ཇི་རྩེ་འཕྲུལ་གྱི་རྒྱལ་པོ། ཇི་ནམ་འཕྲུལ་གྱི་རྒྱལ་པོ། །མཁས་པ་མི་བཞི་ལ་སོགས་ཀྱིས།་་་དྲང་སྲོང་ནོར་བུ་རིན་ཆེན། བྲམ་ཟེ་མུ་ཏིག །རྒྱ་ནག་ཟུར་ཕུད། རྒྱ་གཡུ་བཞེས་སྟག་ཚང་། མཛད་པའི་ས་གཞུང་བསམ་མི་ཁྱབ། །མདོ་སྡེ་སྤོམ་མགོ་ཞེས་བྱ་དང་། །ཁྲ་བོ་རི་རྩིས་ཞེས་བྱ་དང་། །གལ་པོ་ལ་བྱང་ཞེས་བྱ་དང་། །བྱ་རྒོད་ལ་དང་ཞེས་བྱ་དང་། །བྱང་
པ་གསེར་གཞུང་ཞེས་བྱ་དང་། །ནག་པོ་སྟག་ཤམས་ཞེས་བྱ་དང་། །མོན་མོ་མཛུབ་ཚུགས་ཞེས་བྱ་དང་། །བྱེ་མ་ལག་ཁྲིད་ཅེས་བྱ་དང་། །ཆུང་དུར་དོན་བདུན་མ་ལ་སོགས། །རྒྱ་ནག་ལུགས་ཀྱི་ས་དཔྱད་ཡིན། །རྒྱ་གར་ལུགས་ཀྱི་ས་དཔྱད་ལ། །མདོ་རྒྱུད་རྣམས་ནས་གསུངས་པ་ཡི། །སྒྲུབ་གནས་ས་དཔྱད་མང་དུ་ཡོད། །སློབ་དཔོན་པདྨས་མཛད་པ་ཡི། །ས་དཔྱད་གསེར་གྱི་ལྡེ་མིག་སོགས། །དེ་དག་ཕན་བྱའི་ས་དཔྱད་ཡིན། །ནམ་མཁའི་སྙིང་པོས་མཛད་པ་ཡི། །ནག་པོ་འབུམ་ནག་ཅེས་བྱ་དང་། །གདུག་པའི་ལྕེ་མདུང་དགུ་བསྐོར་སོགས། །གནོད་བྱའི་ས་དཔྱད་མང་དུ་ཡོད། །ལབ་ཀྱི་སྒྲོན་མས་མཛད་པ་ཡི། །གཉན་མིག་ཁྲག་མིག་ས་དཔྱད་མང་། །སྒྲུབ་པ་བྱེད་པའི་ས་དཔྱད་ལ། །རི་ཆོས་ས་དཔྱད་མང་དུ་ཡོད། ས་དཔྱད་ཀྱི་ལུང་ཁུངས་བསྟན་པའི་ལེའུ་སྟེ་གཉིས་པའོ།། ༈ །།ལུང་འདྲེན་བྱས་ན་མང་དྲགས་པས། །ལག་ཏུ་ཀླུ་བླང་བྱའི་ངག་ཁྲིད་ལ། །བྱང་གི་སྟོད་སྨད་ནུབ་བྱང་དང་། །ནུབ་ཀྱི་སྟོད་སྨད་རྒྱབ་བསྟན་ས། །ཤར་སྨད་ཤར་ལྷོ་ལྷོ་ཡི་སྟོད། །དེ་ལ་མདུན་གྱི་སྟོན་ས་བྱ། །རྒྱབ་རི་མཐོ་
ཞིང་མདུན་རི་རྒུ། །གཡས་གཡོན་ཆུ་གཉིས་མདུན་དུ་འདུས། །མདུན་དུ་ཆུ་ཤིང་ན་བ་རྒྱས། །དེ་འདྲའི་ཕྱོགས་དེར་ས་ཚོལ་བྱ། །ས་ཡི་ཀ་བ་རྣམ་བཞི་ནི། །ཤར་ཕྱེས་ལྷོ་སྤུངས་ནུབ་འདན་པ། །བྱང་ནི་ཡོལ་བ་བྲེས་འདྲ་བཟང་། །ཤར་ལམ་ལྷོ་ལམ་གྲོགས་དང་གཡང་། །ནུབ་ལམ་བྱང་ལམ་བདུད་དང་དགྲ། །གཡས་གཡོན་ཤིང་གཅིག་ངན་པ་ཡིན་། །འོག་གི་ཤིང་གཅིག་བརྟན་ཕུར་ཡིན། །སྟེང་གི་ཤིང་གཅིག་ལྟག་པའི་འཛེར། །གནམ་ནི་ཟླུམ་ཞིང་འཁྱིལ་ན་བཟང་། །གནམ་ཟུར་སྦོམ་ལ་འཁོར་ལོའི་རྩིབས། །ཕྲ་ན་བུད་མེད་འཆི་བའི་ས། །བྲག་ཟུར་རྣོན་པོ་གནམ་དུ་ཟུག །ལོ་མལ་གང་ཡིན་མི་དེ་འཆི། །ཤར་ལྷོའི་ནམ་མཁའ་མདའ་སྟོང་འདྲ། །ཡོན་ཏན་འགྲིམ་སྒོ་ཆེ་བའི་ས། །འབྱུང་བའི་སྒྲོན་ཆེན་བཞི་པོ་ནི། །གནམ་སྒྲོན་གཤིན་རྗེའི་མཆེ་བ་དང་། །བྲག་སྒྲོན་ཕུག་པ་སྐར་ཁུང་དང་། །ས་སྒྲོན་གད་པ་མདུང་རྩེ་དང་། །ཆུ་སྒྲོན་ཉི་མའི་སྲབ་མདའ་དང་། །ཤིང་སྒྲོན་རེ་བའི་གཡབ་མོ་དང་། །རླུང་སྒྲོན་གང་བུ་མདའ་སྟོང་དང་། །དེ་རྣམས་སྤྱི་ལ་ངན་པའི་སྒྲོན། །མདུན་དུ་ཆུ་ཤིང་ན་བ་རྫ་། །ཕུན་སུམ་ཚོགས་ན་དངོས་
གྲུབ་འབྱུང་། །མདུན་རི་གཡས་གཡོན་དབུས་དང་གསུམ། །ཆེ་རྒྱུད་ཆུང་རྒྱུད་འབྲིང་རྒྱུད་ས། །རྩེ་དང་བར་དང་སྨད་དང་གསུམ། །ཕ་ཁུ་དར་མ་བུ་ཆུང་ས། །རྒྱབ་རི་རྩེ་འཛིན་ས་མཁན་རང་། །ཡང་རི་དབོན་དང་མི་རྒྱུད་ས། །ཤར་ལྷོ་བུ་མོ་མག་པའི་ས། །ལོ་སྐོར་བཅུ་གཉིས་ལོ་མལ་གྱི། །ས་ནི་དགྲ་དང་གྲོགས་གང་ཡོད་། །རང་རང་ལོ་སྙིང་ཅན་གྱིས་ཐོབ། །རང་རང་ལོ་མལ་ས་ཕྱོགས་ནས། །ལོ་སྐོར་སོ་སོའི་གཟུགས་འདྲ་བ། །བྱུང་ན་སོ་སོའི་ལོ་པར་བཟང་། །ཤར་གྱི་ལམ་ནི་སྟག་སྐྱ་བོ། །གད་པས་ཆོད་ན་ས་མདའ་ཕོག །ལྷོ་ཆུ་གཡུ་འབྲུག་སྔོན་མོ་སྟེ། །ཆུ་ཆད་བྱུང་ན་དོང་དུ་ལྷུང་། །ནུབ་ཀྱི་ས་དམར་བྲག་དམར་ནི། །ནུབ་སྲུང་བྱ་ནི་དམར་མོ་སྟེ། །ལམ་གྱི་དཀྱིལ་གཏུབས་རྙི་ཡིས་ཟིན། །བྱང་གི་རྫ་ཤུར་ཕ་ཝང་བྲག །བྱུང་སྲུང་རུས་སྦལ་རྒྱ་བོ་སྟེ། །ཆུ་འགོ་ལོང་རོ་ཚྭ་ཆུས་འགྲངས། །སྐྱོན་མེད་སྲུང་བཞི་ཚང་བ་ནི། །མཐའ་བརྟེན་མི་ནི་དྲག་པོ་ཚར། །སྐྱོན་བཞིས་ཟིན་ན་མི་ངན་སྐྱེ། །ས་ཡི་སྲུང་བཞི་མ་ཚང་ན། །ཡུལ་འཁྱར་འཁྱམས་པ་སྤྲང་པོ་མང་། །འོག་ནི་ཧ་ཅང་གཟར་བ་ན། །ཅུང་
ཞིག་ཆགས་ནི་དཀའ་བར་བཤད། །འོག་ཏུ་ཚ་ཁང་མ་ཎི་དང་། །སྐྱེ་ཤིང་བཙུགས་ན་ཕན་པ་ཡིན། །ས་ལ་ས་དགྲ་མེད་ན་ཡང་། །རང་གིས་ས་དགྲ་བཟོས་པ་ནི། །ཤར་དུ་མཆོད་རྟེན་ཚ་ཁང་དང་། །མ་ཎི་ཆེན་པོ་བརྩེགས་པ་ན། །གྲོང་པ་དེ་ནི་གུད་པར་འགྱུར། །ལྷོ་ན་མ་ཎི་ཚ་ཁང་དང་། །མཆོད་རྟེན་ལ་སོགས་བརྩེགས་པ་ན། །ཁ་ཡི་གྲོག་དེ་ལྕེ་ཡིས་ཕུད། །ནུབ་དང་བྱང་དུ་ཚ་ཁང་དང་། །མ་ཎི་བརྩེགས་ན་ཤིན་ཏུ་ཕན། །གྲོང་དང་ཁང་པའི་གཉའ་ལྟག་ཏུ། །བརྩིགས་ན་གཉའ་ནོན་འོང་བས་ངན། །དེ་རྣམས་སྤྱི་ཡི་ས་དཔྱད་ཡིན། །སྤྱི་ཡི་ས་དཔྱད་ཀྱི་ལེའུ་སྟེ་གསུམ་པའོ།། ༈ །།དེ་ནས་དུར་གྱི་ས་དཔྱད་ནི། །རུས་ཆེན་ཡོན་ཏན་ཆེ་བ་དང་། །སྤུ་རྒན་ཡང་ཚ་མཐོང་བ་རྣམས། །གདན་ཁྲི་བང་རིམ་མང་པོ་དང་། །མཐོ་བའི་ས་ལ་བཞག་པར་བྱ། །ལོ་ཡི་མང་ཉུང་རུས་ཆེ་ཆུང་། །དེ་དང་མཐུན་པའི་མཐོ་དམན་བྱ། །རྒན་དུར་དམའ་བར་གྱུར་པ་དང་། གཞོན་དུར་མཐོ་བར་གྱུར་པ་རྣམས། །ཤི་རེས་གཞོན་ལ་བབས་པ་ཡིན། །གཞོན་དུར་གཉའ་ནོན་ཆེ་ཆུང་ནི། །ཤི་གྲངས་མང་ཉུང་དེ་དང་བསྟུན། །རི་ཡི་སྣ་དང་བྲག་གི་
ཟུར། །སྣ་རུ་མི་རུང་ཅུང་ཞིག་གཟུར། །གྲི་དུར་ལུང་པའི་ཡངས་དོགས་ནི། །མདའ་འཕེན་ཙམ་ལས་ཡངས་མི་བཙལ། །དེ་ཡང་ཕ་རི་ཚུ་རི་གཉིས། །བྲག་ཟུར་ཐད་ཐད་རྒྱུ་གྲི་ཡིན། །དེ་ལ་ཤིན་ཏུ་འཛེམ་པར་བྱ། །རྒྱབ་རི་ང་རྒྱལ་ཆེ་བ་དང་། །མདུན་རི་འཇམ་ན་བཟང་བ་ཡིན། །ལོ་སྐོར་བཅུ་གཉིས་ས་དཔྱད་ལ། །ཤར་ཕྱོགས་ནགས་ཚལ་ཤིང་གཅིག་ནི། །ཁྱི་འབྲུག་གླང་ལུག་ལོ་པའི་བདུད། །སྟག་ཡོས་ལོ་པའི་སྲོག་ལ་ཕན། །ལྷོ་ཕྱོགས་བྲག་དམར་ས་དམར་ནི། །རྟ་སྦྲུལ་ལོ་པའི་ཚེ་བསྲིང་སྟེ། །བྱ་སྤྲེལ་ལོ་པའི་སྲོག་གཅོད་བྱེད། །ནུབ་ཕྱོགས་བྲག་དཀར་རྫ་དཀར་ནི། །བྱ་སྤྲེལ་ལོ་པའི་སྲོག་སྲུང་སྟེ། །སྟག་ཡོས་ལོ་པའི་སྲོག་བདུད་བྱེད། །བྱང་གི་ཆུ་བོ་རྒྱུན་འབབ་ནི། །བྱི་ཕག་ལོ་པའི་ཚེ་བསྲིང་སྟེ། །རྟ་སྦྲུལ་ལོ་པའི་སྲོག་གཅོད་བྱེད། །མཚམས་བཞི་གང་ཡང་རུང་བ་ནི། །ལྷ་ཁང་མཆོད་རྟེན་ཚ་ཁང་དང་། །གྱང་རལ་ཐང་ཆུང་གྲུ་བཞི་ནི། །མཚམས་བཞི་ལོ་པའི་སྲོག་ལ་ཕན། །བྱི་ཕག་ལོ་པའི་ཚེ་ལ་གནོད། །དེ་དག་དགྲ་དང་འཕྲད་གྱུར་ན། །ལོ་གསུམ་མི་འགྱང་རྟགས་སྟོན་ནོ། །གལ་ཏེ་ཁང་པ་ལ་
སོགས་ནི། །ས་དགྲ་དེ་དག་ལ་སོགས་པ། །མཚམས་བཞི་ས་ཡི་དགྲ་བྱུང་ན། །དེ་ཕྱོགས་ཁང་ཟུར་སྐྱེ་ཤིང་བཙུགས། །ལྷོ་ཕྱོགས་བྲག་དམར་ས་དམར་རྩར། །ཆུ་སྣ་དགུ་བླུག་བུམ་པ་སྦས། །ཤར་ཕྱོགས་ཤིང་གི་དགྲ་བྱུང་ན། །ཤིང་ལ་གྲི་ལྕགས་གཟེར་བུ་རྒྱབ། །བྱང་ཕྱོགས་ཆུ་ཡི་དགྲ་བྱུང་ན། །རི་ཆེན་གསུམ་གྱི་ས་བླངས་བླུག །ནུབ་ཕྱོགས་བྲག་དཀར་དགྲ་བྱུང་ན། །དར་ལྕོགས་དམར་པོ་བཙུགས་པའམ། །།རྡོ་དམར་རྣམ་བཅུ་དབང་ལྡན་བཞག །དེ་ནི་ཁང་པའི་ས་བཅོས་ཏེ། །དུར་ས་བཅོས་པས་ཐུབ་པ་མིན། །དེ་ནས་ཆུང་དུར་མན་ངག་ནི། །གཉའ་གནོན་ཆེ་ན་ཕ་འཆི་ལ། །ཆུང་ན་འཆི་སྒྲ་མི་ཆོད་པས། །ཆེ་ཆུང་ཤི་བའི་གྲངས་དང་སྦྱར། །སྟེང་དུ་ལམ་གྱིས་ཆོད་པ་ནི། །གཞན་ལ་ལྟག་པའི་གཉའ་ཤིང་སྟེ། །ཆུང་དུར་ལ་ནི་གཉའ་གནོན་ཡིན། །གཞན་ལ་གཡས་ཀྱི་ཤིང་གཅིག་ངན། །ཆུང་དུར་ལ་ནི་སྲུང་མདའ་བཟང་། །མདུན་དུ་ཐང་ཆུང་མ་པང་ཡིན། །མེད་ན་བྱིས་པ་མི་སོས་པས། །ཧ་ཅང་ཆེ་ན་མ་འཆིའོ། །མདུན་གྱི་ཐད་ནས་ཚུར་ལ་ནི། །ཆུ་བྲན་དྲག་ཏུ་འབབ་པ་དང་། །གཞུང་ཆུ་གཡུ་འབྲུག་མ་བུ་འདྲེས། །
དེ་ལ་གཏད་པས་སྲིད་འབྱུང་སྟེ། །རྦ་ཀློང་སྐྱ་འཚུབ་ཆུ་སྒྲ་ཆེ། །དེ་ལ་ངེས་པར་བུ་འབྱུང་སྟེ། །ཆུ་སྒྲ་རྦ་ཀློང་མེད་པ་ན། །དེ་ལ་བུ་མོ་འབྱུང་བར་འགྱུར། །གཉའ་ནོན་མ་པང་སྲུང་མདའ་དང་། །ཆུ་ཡི་མགྱོགས་སོ་དེ་ཙམ་ལས། །ས་དཔྱད་སྤྱི་རྣམས་དཔྱད་མི་དགོས།། ༈ །།དེ་ནས་གོད་གཅོད་ས་དཔྱད་ལ། །རི་བྲག་དམར་པོ་ནག་པོ་ནི། །བཙན་བདུད་གནས་པས་ཤ་ལ་དགའ། །དེ་འདྲར་མནན་ན་གོད་འབྱུང་ངོ་། །བྲག་ཆེན་མིན་པའི་བྲག་དཀར་དང་། །ཕ་བོང་དཀར་པོ་གཏན་གཟུགས་སོགས། །སྲོག་ཆགས་འདྲ་བའི་ཞབས་སུ་མནན། །མདུན་གྱི་ཐད་དེར་དཔལ་ཁ་ནི། །ཆུ་དང་ན་བ་གལ་ཆེ་ཞིང་། །དུད་འགྲོ་གང་དང་གང་ཡིན་པའི། །སོ་སོའི་བླ་ཤིང་ནགས་ཚལ་བཟང་། །ཤུག་པ་འོམ་བུ་རྟ་ཡི་ཤིང་། །ཐང་ཤིང་ནོར་ཡིན་སུར་དཀར་ལུག །སྤེན་མ་བ་གླང་སྨྲ་ག་ར། །ཤིང་ནི་གླང་མ་མང་བ་ན། །དུད་འགྲོ་མོ་ཕྱུགས་འཕེལ་སྒྱུ་བ་ཡིན། །སྟག་པ་མང་ན་ཕོ་རིགས་འཕེལ། །གཉའ་ནོན་དཔལ་ཁ་འཛོམ་པ་ན། །ཁ་ཡི་རྒྱུ་ཕྱོགས་ནོར་ཀྱང་རུང་། །གཉའ་ནོན་ཅུང་ཟད་ཆེ་དགོས་ཀྱི། །ལྟས་ངན་གཡང་
དུ་ལེན་པ་ཡི། །ས་དཔྱད་ཀྱང་ནི་དེ་དང་འདྲ། །དུར་སའི་ལེའུ་སྟེ་བཞི་པའོ།། ༈ །།དེ་ནས་ཁང་སའི་ཁྱད་པར་ནི། །བྱང་ཕྱོགས་ཤོ་དང་ནུབ་ཕྱོགས་ཡངས། །དགྲ་དང་ན་ཚ་རྒོད་པ་ཡིན། །དེ་ཕྱོགས་བརྒྱ་མཁར་ཚ་ཁང་བརྩེགས། །ཤར་ཕྱོགས་དོགས་ན་ཚེ་ཐུང་སྟེ། །ལུང་མདའ་ཤོ་ན་གྱ་གུད་འབྱུང་། །ཕྱག་རྒྱ་བསྣོལ་བ་འདྲ་ན་བཟང་། ཁྱད་པར་དགོན་པའི་ས་ཆ་ལ། །འབྲུ་ཡི་ཕུང་པོ་སྤུངས་འདྲ་བཟང་། །གཉའ་ནས་འབོ་བ་འདྲ་བ་དང་། །འོག་ནས་སྐྱོར་བ་འདྲ་ན་བཟང་། །འོག་ཏུ་ཆུ་མིག་ཡོད་པ་ནི། །བུམ་པའི་ཞབས་རྡོལ་ཡིན་པས་ངན། །གཡས་གཡོན་ཆུ་མིག་ཡོད་པ་ནི། །ཕྱག་དཀར་གསེར་སྐྱེམས་ཡིན་པས་བཟང་། །སྟེང་གི་རྒྱབ་རིའི་ཆུ་འགོ་ནི། །སྡུག་གི་མཆི་མ་ཡིན་པས་ངན། །ཤར་ལྷོའི་བྲག་དམར་ས་དམར་ནི། །བཙན་གྱི་རྒྱུགས་སྲང་རྟ་ལ་ངན། །དེ་ཕྱོགས་མཆོད་རྟེན་གཟུགས་བཞེངས་བཞག །ནུབ་ཏུ་ཤིང་གཅིག་ཁེར་སྐྱེས་ནི། །ལྷ་འདྲེའི་མདུན་སྤུངས་ཡིན་པས་ངན། །དེ་ལ་གྲི་ལྕགས་གཟེར་བུ་རྒྱབ། །ནུབ་བྱང་མཚམས་ཀྱི་ཕུག་པ་ནི། །མ་མོའི་ཉལ་ས་ཡིན་པའི་ཕྱིར། །གྲོང་དེར་ནད་རིམས་རྒྱུན་མི་
ཆད། །དེ་ནང་རྣམ་སྣང་སྐུ་བྲིས་བཞག །བྱང་དུ་མཚོ་ཆུང་ཡོད་པ་ན། །གྲོང་པ་དེ་ལ་རྐྱེན་ངན་མང་། །རི་ཆེན་གསུམ་གྱི་ས་བླངས་བླུག །ཉི་ཟླ་ཆུ་ཡིས་ཁྱེར་བ་དང་། །ཉི་ཟླའི་སྐྱ་ལམ་བརྟོད་པ་ནི། །ངན་ཏེ་བཅོས་ཐབས་མེད་པ་ཡིན། །རི་བོ་ཆེན་པོའི་རྩེ་དང་ནི། །ཐང་ཆེན་ཡངས་པའི་དཀྱིལ་དང་ནི། །རི་ཐང་གཉིས་ཀྱི་མཚམས་རྣམས་ནི། །ས་ཟད་ཡིན་པས་བཀྲ་མི་ཤིས། །ཁྱད་པར་སྒྲུབ་གནས་ས་དཔྱད་ནི། །ས་མདོག་དཀར་ཞིང་སུར་དཀར་སྐྱེ། །ནམ་མཁའ་ཟླུམ་ཞིང་ས་གཞི་འཇམ། །དེ་རུ་ཞི་བའི་ལས་རྣམས་འགྲུབ། །ནགས་ཚལ་མེ་ཏོག་གླིང་ཆེན་རྒྱས། །རི་བྲག་རྫོ་རྣམས་ནོར་བུའི་དབྱིབས། །དེ་རུ་རྒྱས་པའི་ལས་རྣམས་འགྲུབ། །བྲག་མདོག་ས་མདོག་དམར་ཤས་ཆེ། །ཤུག་པ་འོམ་བུ་སེ་བ་སྐྱེ། །ཕུག་པ་ཐང་ཆུང་ཟླ་གམ་དབྱིབས། །ནུབ་ཀྱི་ཕྱོགས་ནས་ཆུ་ཆེན་འབབས། །དེ་རུ་དབང་གི་ལས་རྣམས་འགྲུབ། །ལུང་གསུམ་མདོ་དང་ཆུ་གསུམ་འདུས། །ས་གཞི་གྲུ་གསུམ་ཚེར་མ་སྐྱེས། །བྲག་ནག་བྲག་དམར་ཁྲོས་པའི་གཟུགས། །དེ་རུ་དྲག་པོའི་ཕྲིན་ལས་འགྲུབ། །ཁང་པ་དུར་ས་སྒྲུབ་གནས་
སོགས། །ཉེ་ལོགས་ཆུ་མིག་གཉན་པོ་དང་། །ལྷ་འདྲེ་གདུག་པ་ཅན་གནས་ན། །ས་དཔྱད་བཟང་ཡང་ངན་དགུ་འབྱུང་། །དྲག་སྔགས་ལ་སོགས་བསྒྲུབ་པ་ན། །ས་གཞི་ཤིན་ཏུ་གཉན་པ་དང་། །གནས་བདག་གདུག་པ་ཆེ་ན་འགྲུབ། །དེ་གཉིས་བྱེ་བྲག་ཤེས་པར་གྱིས། །ཁྱད་པར་རི་ཁྲོད་ས་ཆ་ནི། །རྒྱབ་རི་སྒོམ་ཆེན་འདྲ་བ་དང་། །སྐྱིལ་ཀྲུང་བཅས་འདྲའི་པང་དུ་བཟང་། །གསས་མཁར་ལྷ་ཐོ་བརྩེགས་པའི་ས། །རི་ཡི་རྩེ་ལ་བརྩེགས་མི་བརྩེགས། །གཞི་བདག་ལེན་དང་མི་ལེན་ཡོད། །དེ་ཕྱིར་རྩེ་རུ་བརྩེགས་མི་བྱ། །རི་ཡི་རྩེ་ལྐོག་དཀྱིལ་ཙམ་གྱི། །ས་དགྲ་མེད་ཅིང་ས་དཔལ་བཟང་། །དེ་རུ་བརྩེགས་ལ་ཉེས་འགལ་མེད། །མཎྜལ་མཆོད་འབུལ་ཚུལ་དུ་འོང་། །དེ་རྣམས་ཕྱི་ཡི་ས་དཔྱད་ཡིན། །དེ་ནས་ནང་གི་ས་དཔྱད་ནི། །སྒོ་ནི་ཤར་དུ་བཙུགས་པ་ཡི། །སྒོ་ཐེམ་ཤར་གྱི་སྟག་སྐྱ་བོ། །ཆུ་ར་ལྷོ་རུ་བཞག་པ་ཡི། །ལྷོ་ཡི་གཡུ་འབྲུག་སྔོན་མོ་ཡིན། །ཐབ་ཁ་ནུབ་བཅས་བྱ་དམར་མོ། །རང་ཐག་བྱང་བཙུགས་རུས་སྦལ་ཡིན། །དཀྱིལ་ཀ་དབུས་ཀྱི་གསེར་སྦྲེལ་ཏེ། །ཁྱིམ་གྱི་སྲུང་བཞི་ཚང་བ་ཡིན། །ཁང་པ་རྩེག་གཉིས་བྱེད་པ་
ན། །གདུང་མ་སྦྲུལ་ནག་ལྟོ་སྦྱོར་སྤང་། །ཁང་པ་ཆུང་ངུ་འགེབ་ན་ཡང་། །ཀ་གཅིག་རླུང་གི་འཁོར་ལོ་སྤང་། །རྩིག་པའི་སྣ་དང་གདུང་མའི་སྣ། །གདུང་མའི་འོག་ཏུ་ཉལ་ས་སྤངས། །གཟར་ཁ་ཕྱི་ལ་བསྟན་མི་བྱ། །ཁྱིམ་ཕུག་གསལ་ན་ནོར་མི་ཆགས། །ཁྱིམ་ཕུག་ཁུང་དུ་མུན་ནག་བྱ། །སྒོ་ཐེམ་རྒྱབ་ཀྱི་ས་མཐོ་ཞིང་། །ནང་དུ་འབོ་བ་འདྲ་ན་བཟང་། །སྒོ་ཐེམ་ནང་དུ་སྐས་ཐེམ་ནི། །ཐུར་དུ་ཆེ་ན་ཚེ་ལ་གནོད། །སྒོ་ཡི་གཡས་གཡོན་སྟེང་ལ་སོགས། །ཁྲོལ་མང་བཀལ་ནས་བཞག་པ་ན། །འདྲེ་ངན་ཕལ་ཆེར་ཁོག་པར་བཤད། །བྱ་ཁྲི་ལེགས་པོ་བཟོས་ནས་ཀྱང་། །གཞུ་རྣམས་སྟེང་དུ་བཀྲམ་བཞག་ན། །དགྲ་ལྷ་གཉེན་པོ་འཁོར་བ་ཡིན། །དེ་རྣམས་འཇིག་རྟེན་སྐྱེ་བོའི་ཁྱིམ། །དེ་ནས་རི་ཁྲོད་སྒྲུབ་ཁང་ས། །སྒོ་ཐོད་སྟེང་དུ་མཆིག་མི་བཙུག །ཤར་ལྷོ་མེ་ལྷར་ཐབ་ཁ་བཅའ། །ལྷོ་ནུབ་སྲིན་པོར་མགོན་ཁང་བྱ། །ནུབ་ཕྱོགས་ཀླུ་ནི་གནས་པའི་སར། །སྒྱུ་རྟ་ཕྱུགས་དུད་འགྲོ་བཏགས་ས་བྱ། །ནུབ་བྱང་རླུང་ལྷ་གནས་པའི་སར། །རླུང་འཁོར་བསྐོར་དང་གོས་གདང་བྲེ། །བྱང་ཕྱོགས་གནོད་སྦྱིན་གནས་པའི་སར། །མཛོད་བྱ་ཇ་
མར་ནས་སོགས་བཞག །བྱང་ཤར་དབང་ལྡན་གནས་པའི་སར། །གཟིམ་མལ་གྲ་ཁྲི་བཅའ་བར་བྱ། །ལུང་མདོའི་ཕྱོགས་སུ་སྔས་མི་བྱ། །དེ་ཕྱོགས་བླ་མ་བཞུགས་པའམ། །མདུན་དུ་རྟེན་གསུམ་གནས་ན་རུང་། །ལྷམ་དང་གཞོང་པ་སྔས་མི་བྱ། །མལ་སྐེད་གདུང་མས་བཅད་མི་བྱ། །སྤྱིར་ནི་རི་ཁྲོད་ཁང་པའི་ཚད། །གྲུ་བཞི་འདོམ་སྐོར་ཞེས་བྱ་སྟེ། །ལོགས་སུ་བདེ་བར་གཤེགས་པའི་མཐོ། །བཅུ་གཉིས་ཡིན་ཏེ་ཁྲུ་བརྒྱད་དོ། །ལོགས་གཉིས་བདུན་རེ་བྱ་བ་སྟེ། །སངས་རྒྱས་ཀྱི་ནི་མཐོ་རེ་ལ། །ཚད་མའི་མི་ཡི་ཁྲུ་ཕྱེད་དོ། །སྤོང་བའི་ཁང་པ་ཞེས་བྱའོ། །ཁང་པ་དེ་ཡི་གར་སྐྱིད་དུ། །དང་པོ་མཆོད་བཤམ་བྱས་ནས་ཀྱང་། །ཐུབ་པའི་སྐུ་བཤམས་རྟེན་འབྲེལ་བྱ། །ཁང་པའི་ལེའུ་སྟེ་ལྔ་པའོ།། ༈ །།དེ་ནས་གཅོད་ཀྱི་ས་དཔྱད་ལ། །བྲག་དཀར་རྫ་རི་དཀར་པོ་ལ། །གཙང་མའི་ལྷ་རིགས་དཀར་ཕྱོགས་གནས། །བྲག་རི་སྐུ་གཟུགས་མཆོད་རྟེན་དབྱིབས། །དབང་ཕྱུག་ལིང་གའི་གཟུགས་འདུག་ན། །དེ་རུ་གནས་རི་ཡོད་པའི་རྟགས། །ཡེ་ཤེས་དཔའ་བོ་མཁའ་འགྲོ་གནས། །གཉན་ཐོག་གཅོད་པར་མི་རུང་ངོ་། །
ནགས་རི་ས་སུལ་མང་པོ་འབྲེལ། །ཡང་ན་རི་སྐམ་ཆུ་མེད་པ། །གཉན་ཐོག་བཅད་ཀྱང་མི་ཆོད་པ། །རི་སྣ་ཆུ་སྣ་ལུང་པའི་སྣ། །མང་པོ་འདུས་པའི་ས་མདོ་རུ་། །གཉན་ཐོག་བཅད་ཀྱང་ཆོད་དཀའ་སྟེ། །གནས་བདག་སྣ་འདུས་མང་བའི་ཕྱིར། །རེ་རེ་ཆོད་ཀྱང་ཀུན་མི་ཆོད། །བྲག་དམར་བཙན་ལ་བྲག་ནག་བདུད། །གཡའ་རི་ན་མཚོ་ཆུ་མིག་ཀླུ། །སྤང་རི་ཕལ་ཆེར་གཉན་གྱི་རིགས། །བྲག་རི་རྒྱ་བོ་ཐེའུ་རང་ཡིན། །ཁྲག་དང་རི་རྣམས་མཚུངས་པ་སྟེ། །དབྱེ་བ་རྒྱབ་ལ་རྒུ་བ་མདུན། །ཕོ་རི་རྩེ་སྦོམ་མོ་རི་ཕྲ། །རི་ནི་ལུས་ལ་མཚོ་ནི་སྙིང་། །ཆུ་མིག་སྲོག་རྩ་ཤིང་ནི་སྐུ། །གླང་པོའི་སྤྱི་གཙུག་མི་ཡི་སྙིང་། །རྟ་དང་དུད་འགྲོའི་སྒལ་པའི་ཐོག །ཕར་ལ་ནོན་ཞིང་ས་དཔལ་བཟང་་། །དེ་རུ་གཅོད་པའི་འདུག་ས་བྱ། །དེ་ལ་གཉན་མིག་ཅེས་བྱའོ། །ཕག་འདྲའི་སྣ་དང་སྦྲུལ་འདྲའི་ལྕེ། །གཅན་གཟན་འདྲ་བའི་མཆེ་སྡེར་དང་། །རྭ་ཅན་འདྲ་བའི་རྭ་ཡི་རྩེ། །གླང་ཆེན་འདྲ་བའི་སྣ་ལྗགས་རྩེ། །རི་ཡི་སྣ་དང་བྲག་གི་ཟུར། །དེ་ལ་ཁྲམ་མིག་ཅེས་བྱ་སྟེ། །ནད་པ་གདོན་ཆེན་མཐའ་གཏད་ས། །ནད་མེད་བསྡད་ན་ནད་འབྱུང་
ས། །སྒར་དང་རུ་བ་ལ་སོགས་པ། །ས་དགྲ་མེད་ཅིང་ས་དཔལ་བཟང་། །དེ་འདྲར་བསྡད་ན་འཕྲལ་དུ་བདེ། །སྦྲ་གུར་ཅོག་པུའི་སྒོ་ཕྱོགས་ཀྱང་། །ཆུ་དཔལ་ལམ་དཔལ་བཟང་པོར་གཏད། །གལ་ཏེ་ས་དགྲ་འདུག་པ་ན། །དེ་ཕྱོགས་དཔེ་ཆ་རྟེན་གསུམ་བཞག །གཅོད་ཀྱི་ས་དཔྱད་ལེའུ་སྟེ་དྲུག་པའོ།། ༈ །།ས་དཔྱད་ལེའུ་དྲུག་པ་འདི། །རྒྱ་གར་ལུགས་དང་རྒྱ་ནག་ལུགས། །གཞུང་མང་འོ་མའི་རྒྱ་མཚོ་ལས། །བཅུད་བསྡུས་མར་གྱི་སྙིང་པོ་ཡིན། །བླ་མ་བརྩོན་འགྲུས་རྒྱ་མཚོ་པས། །བསྐུལ་ཕྱིར་རཱ་ག་ཨ་སྱ་ཡིས་། །ཤིང་སྦྲུལ་སྨིན་དྲུག་ཟླ་བ་ཡི། །དགོང་མོའི་ཐུན་མཚམས་རེ་རེ་ལ། །གང་དྲན་འཕྲལ་དུ་སྨོས་པ་རྣམས། །ཀརྨ་བཱིརྱ་ཉིད་ཀྱིས་བྲིས། །བཅོ་ལྔའི་ནུབ་པར་རྫོགས་པ་སྟེ། །འདི་ལ་འགལ་འཁྲུལ་ཆེ་མཆིས་ན། །མཁྱེན་པའི་སྤྱན་ལྡན་རྣམས་ལ་བཤགས། །འདི་བྲིས་དགེ་བ་གང་མཆིས་དེས། །འདི་ལ་འབྲེལ་པ་གང་ཐོབ་པའི། །ཡོན་ཏན་མཁན་རྣམས་ཞལ་དྲོ་ཞིང་། །སྦྱིན་བདག་བཀྲ་ཤིས་བདེ་ལེགས་ཤོག །ལེའུ་བཅོ་ལྔ་པའོ་མངྒ་ལཾ།།