ལེའུ་བཅུ་དྲུག་པ། བློ་ཆུང་རྨོངས་པས་ཉམས་ལེན་བདེ་བའི་ཕྱིར། །མཚམས་ཀྱི་ཞལ་གདམས་ཐར་ལམ་དཀར་པོ་ཡོད། །
༼མ༽ རི་ཆོས་མཚམས་ཀྱི་ཞལ་གདམས་ལས། །མཚམས་ཀྱི་ཞལ་གདམས་ཐར་ལམ་དཀར་པོ་ཞེས་བྱ་བ་བཞུགས་སོ། །ན་མོ་གུ་རུ་མ་ཧཱ་མུ་དྲ་ཡེ། བཀའ་བརྒྱུད་རིན་པོ་ཆེ་ལ་ཕྱག་འཚལ་ལོ། །བཀའ་བརྒྱུད་རྣམ་ཐར་རི་ཁྲོད་འགྲིམ་ལུགས་ནི། །ཡིད་ལ་ཤར་ཡང་ཉམས་སུ་མ་ལོན་ཕྱིར། །ཇི་བཞིན་སྨྲ་བར་ཤེས་ཀྱང་སྨྲ་མི་སྤོབས། །རང་གིས་ལག་བླངས་ཉམས་སུ་ལོན་ཚོད་ཙམ། །རང་འདྲའི་སྐལ་དམན་རྣམས་ལ་ཕན་སྲིད་པས། །འཕྲལ་དུ་ཡིད་ལ་གང་ཤར་བཀོད་པ་ནི། །ཞེན་ལོག་སྒོམ་གྱི་རྐང་པ་ཡིན་པའི་ཕྱིར། །འཇིག་རྟེན་ཚེ་འདིའི་བྱ་བ་ཐམས་ཅད་ནི། །བྲམ་ཟེའི་མདུན་དུ་བཤང་བ་བཞག་པ་བཞིན། །ཞེན་པ་གཏིང་ནས་ལོག་པ་གལ་ཆེ་གསུངས། །འཕྲལ་དུ་ཟས་གོས་གནས་མལ་གལ་ཆེ་ཡང་། །ཞག་གཅིག་སྡོད་པའི་མགྲོན་པོའི་བསམ་པ་བཞིན། །ཡུན་རིང་མི་ཐོགས་འཆི་བ་ཡིད་ལ་བཅང་། །ཤི་ནས་ལྷ་དང་མི་རུ་སྐྱེས་ན་ཡང་། །བདེ་སྐྱིད་མི་རྟག་འགྱུར་བའི་སྡུག་བསྔལ་བསམ། །བླ་མེད་ཉྩ། བྱང་ཆུབ་འབྲས་བུ་མ་གཏོགས་པ། །འཁོར་བའི་བདེ་སྐྱིད་གང་ལའང་ཡིད་མི་སྨོན། །དེ་ནི་འཁོར་བར་ཞེན་པ་ལྡོག་ལུགས་ཡིན། །དཔེར་ན་སྔོན་གྱི་བཀའ་གདམས་པ་ཀུན་
གྱིས། །དོ་དགོང་འཆི་བར་དོགས་ནས་མེ་མི་གསོ། །དེ་དོན་ཆོས་ལ་བརྩོན་འགྲུས་བསྐུལ་ཕྱིར་ཡིན། །ནམ་ཡང་མི་རྟག་མྱུར་དུ་འཆི་ན་ཡང་། ལོ་འགའ་བྱང་ཆུབ་སྒྲུབ་ལོང་ཡོད་ཕྱིར་དང་། །ཕྱི་མ་བདེ་ཆེན་ཞིང་ཁམས་བགྲོད་ཕྱིར་དུ། །ཚེ་སྒྲུབ་བྱས་པས་བྱ་བཏང་མིན་མི་འགྱུར། །དཔེར་ན་དྭགས་པོས་སྒྲོལ་དཀར་བསྒྲུབས་པ་བཞིན། །དེ་ནས་ཕ་ཡུལ་ཞེན་པའི་འཁོར་ཤིང་སྟེ། །གཉེན་ལ་གདུང་སེམས་དགྲ་ལ་སྡང་སེམས་འཕེལ། །དེ་ཕྱིར་ཕག་གྲུ་རས་ཆེན་ལ་སོགས་པ། །ཕ་ཡུལ་སྤངས་ནས་ཕྱོགས་དེར་མ་ཕེབས་སྐད། །འོན་ཀྱང་ཕ་ཡུལ་སྤངས་པའི་མི་ཡུལ་དུ། །ཆགས་སྡང་འཕེལ་ན་ཕ་ཡུལ་དེ་རང་ཡིན། །ཕ་ཡུལ་ཡིན་ཡང་ཆགས་སྡང་ཆེར་མེད་ནི། །མ་སྤང་ན་ཡང་བྱ་བཏང་མིན་མི་འགྱུར། །དཔེར་ན་མར་དྭགས་ས་སྐྱ་འབྲི་སྟག་རྣམས། །ས་མིང་བླ་མའི་མཚན་ལ་ཐོགས་དང་འདྲ། །ཕ་ཡུལ་མི་ཡུལ་གང་ན་འདུག་ཀྱང་འདྲ། །སུ་ལའང་མཛའ་ཆེས་མཁོན་ཆེས་སྤང་བར་བྱ། །གཉེན་དང་ཉེ་དུ་འཁོར་བའི་བཤལ་ཐག་སྟེ། །ཅི་ཡོད་བྱིན་ཀྱང་མི་མགུ་རེ་འཁང་མང་། །ལེགས་པར་དཔྱད་ན་འགྲོ་དྲུག་ཕ་མ་ཡིན། །དེ་ཕྱིར་ཉེ་དུར་ཧ་
ཅང་གདུང་སེམས་སྤང་། །ཉེ་དུར་འཁོན་པའང་བྱ་བཏང་མ་ཡིན་ཏེ། །ཆོས་ལ་ཚུད་ན་ཉེ་དུ་ཐབས་ཀྱིས་བསྐོར། །དེས་ནི་བསྟན་དང་ཉེ་དུ་གཉིས་ཀར་ཕན། །དཔེར་ན་འབྲི་སྟག་ས་སྐྱའི་གདུང་རིགས་བཞིན། །རང་དྲིན་ཡོད་ཚེ་བུ་ཚ་དྲིན་དུ་ཆུགས། །སུ་ལ་སུ་དགོས་མི་ཤེས་བོད་འབངས་རྣམས། །དེ་སྐད་གུ་རུ་པདྨའི་ཞལ་ཆེམ་གསུངས་། །ནོར་རྫ་ས་དགྲ་བོའི་གཡབ་མོ་སྡུག་བསྔལ་རྒྱུ། །མེད་ན་ཐབས་ཆག་ཡོད་ན་དགྲ་འདྲེའི་གཡབ། །ཅི་ཙམ་ཡོད་ཀྱང་མི་ངོམས་ད་རུང་འདོད། དེ་ཕྱིར་ཟས་ནོར་སེམས་ཀྱི་ཆགས་ཞེན་སྤང་། །དབུལ་ཞིང་ཕོངས་ཀྱང་སྡིག་པས་ནོར་མི་བསྒྲུབ། །བཀྲེས་ནས་ཤི་ཡང་མ་བྱིན་ལེན་པ་སྤང་། །དཔེར་ན་མི་ལས་ཟྭ་ལ་དཀའ་ཐུབ་བཞིན། །ཆུ་དང་རྡེའུ་ས་སོགས་བཅུད་ལེན་བྱ། །དེ་ནི་འདོད་པའི་མཐའ་ནི་སྤང་བ་སྟེ། །ཟས་ཀྱི་ཕྱིར་དུ་མི་དགེ་སྤངས་བ་ཡིན། །ཤུགས་ཀྱིས་བྱུང་ན་སྤང་ཡང་མི་དགོས་ཏེ། །ཟས་ཀྱི་རྣལ་་འབྱོར་ལྡན་པས་གང་བྱུང་སྤྱོད། །ཆང་དང་བསྔོས་ཤ་གཉིས་ནི་དུག་ལྟར་སྤང་། །དགེ་སློང་དགེ་ཚུལ་ཞུས་ནས་དགོང་བཅད་བྱ། །རྒྱུན་དུ་གདན་གཅིག་ཐུབ་ན་མཆོག་ཡིན་
ནོ། །ཟས་ཞིམ་འདོད་ཕྱིར་སྡིག་པས་བསྒྲུབ་པ་དང་། །ཅི་འདོད་ཡོད་ཀྱང་མི་ཟ་དཀའ་ཐུབ་གཉིས། །གཉིས་ཀ་གོལ་ས་ཡིན་པར་ཐུབ་པས་གསུངས། །དེ་ཡང་ཧ་ཅང་འགྲང་ཆེས་ལྟོགས་ཆེས་སྤང་། །འགྲང་ལྟོགས་རན་པར་བྱ་བ་མི་ལས་གསུངས། །ཟས་ཀྱི་མཆན་ནས་ཉེར་མཁོ་གོས་ཡིན་ཏེ། །གོས་ཀྱི་ཕྱིར་དུ་མི་དགེ་མི་བསག་ཅིང་། །ངན་ངོན་ལྷག་སྐྱོབ་ཙམ་གྱིས་ཆོག་པར་འཛིན། །དེ་ཕྱིར་སྟོན་པ་རབ་ཏུ་བྱུང་བའི་དུས། །གསེར་སྲང་བརྒྱ་ཕྲག་རི་བའི་གོས་སྤངས་ནས། །ཕྱག་དར་ཁྲོད་པའི་གོས་ནི་བསྣམས་པ་ཡིན། །ཤུགས་ཀྱིས་རྙེད་ན་ཆེད་དུ་མི་སྤངས་ཏེ། །གསེར་སྲང་བརྒྱ་ཕྲག་རི་བའི་གོས་རྙེད་ཀྱང་། །དགེ་སློང་རྣམས་ལ་གྱོན་པར་གནང་བ་ཡིན། །དེ་ཡང་དམར་དང་སེར་དང་ངུར་སྨྲིག་ལས། །རྒྱ་ཁ་སྔོ་ལྗང་དཀར་པོ་ལ་སོགས་སྤང་། །ཇི་ལྟར་སྙིང་ནས་བྱ་བཏང་ཡིན་གྱུར་ཀྱང་། །ཆོས་གོས་རྣམ་གསུམ་ལྷུང་བཟེད་སྤང་མི་རུང་། །ཆོས་གོས་སྣམ་སྦྱར་ཆ་ཚད་མི་ལྡན་སྤང་། །འཁར་གསིལ་ཆུ་ཚགས་གདིང་བ་རྙེད་ཀྱང་བཅིང་། །དེ་རྣམས་རྙེད་ཀྱང་མི་བཅང་རྒེབ་བེ་སོགས། །འདུལ་ཁྲིམས་འགལ་བའི་ཆ་ལུགས་བྱེད་པ་ནི། །
ད་ལྟའི་སངས་རྒྱས་མངོན་སུམ་བཞུགས་མདོ་དང་། །ཡུལ་འཁོར་སྐྱོང་གི་མདོ་ལས་ལུང་བསྟན་བཞིན། །དཀོན་མཆོག་འབངས་སོགས་ཡབ་སྲས་རྣམས་ཀྱིས་བཀག །ཟས་གོས་འཛོམས་ནས་སྤང་དཀའ་གཏམ་ཡིན་ཏེ། །བསྟོད་པ་ཐོས་ན་ང་རྒྱལ་སེམས་འཕང་མཐོ། །ང་རྒྱལ་དེ་ནི་ཐར་པའི་བར་ཆད་ཡིན། །བསྟོད་འོས་མེད་པར་བསྟོད་ན་བསོད་ནམས་འཛད། །ཤི་བའི་ཚེ་ན་སྙན་གྲགས་རྗེས་མི་འབྲང་། །དེ་ཕྱིར་བསྟོད་ར་བྱུང་ཡང་དགའ་བ་སྤང་། །ངན་སྨྲས་བྱེད་པ་ཐོས་ན་ཁོང་ཁྲོ་སྐྱེ། །དེ་དུས་ངོ་བོ་བལྟས་ན་བོགས་སུ་ཐོན། །མ་ཉེས་ངན་སྨྲས་བྱུང་ན་སྒྲིབ་པ་འཛད། །དེ་ཕྱིར་ངན་སྨྲ་བྱུང་ཡང་དགའ་བ་བསྒོམ། །ངག་འདོན་མི་བྱ་ལྟ་བའི་ཀློང་དུ་བསྒྱུར། །གལ་ཏེ་བསྟན་པའམ་རང་གི་ཆོས་བརྒྱུད་ལ། །གནོད་པའི་སྐུར་འདེབས་ཡིན་ན་དག་བྱ་གསུངས། །དེ་ནས་རི་ཁྲོད་འགྲིམ་པའི་གནས་བཤད་པ། །དང་པོ་དཔའ་བོ་མཁའ་འགྲོས་བྱིན་བརླབས་ཤིང་་། །བར་དུ་ཨོ་རྒྱན་ཆེན་པོས་ཞབས་ཀྱིས་བཅགས། །རིམ་པར་གྲུབ་ཆེན་རྣམས་ཀྱིས་ངོས་བཟུང་བའི། །རྩྭ་རིའི་གནས་ལག་གནས་ཕྲན་དུ་གཏོགས་པའི། །གནས་ཆེན་
བརྒྱ་རྩ་གནས་ཕྲན་སྟོང་རྩ་གཉིས། །དེ་དག་རྣམས་སུ་ཞག་གཅིག་བསྒྲུབ་པ་དེ། །གཞན་དུ་ལོ་གཅིག་བསྒྲུབས་ལས་ལྷག་པ་ནི། །ལུང་བསྟན་བཀའ་རྒྱ་མ་ལས་གསུངས་པའི་ཕྱིར། །དེ་འདྲར་སྒྲུབ་གནས་བྱས་ན་མཆོག་ཏུ་བསྔགས། །དེ་ལྟ་མིན་ཀྱང་བཀའ་བརྒྱུད་གོང་མ་ཡི། །སྒྲུབ་གནས་སམ་ནི་ཞབས་ཀྱིས་བཅགས་པའི་གནས། །དེ་འདྲར་བསྒྲུབ་དགོས་སྒྲུབ་ཐབས་ཀུན་ནས་གསུངས། །དེ་ཡང་གནས་ཉམས་གནས་འཁྲེབ་སྤང་བྱ་སྟེ། །དང་པོ་གནས་དེ་བྱིན་རླབས་ལྡན་གྱུར་ཀྱང་། །དམ་ཉམས་སྡོམ་ཉམས་མང་པོས་སྤྱོད་ངན་གྱིས། །གནས་ལ་གྲིབ་ཕོག་ཉམས་ལེན་འཕེལ་སྐྱེད་མེད། །རྟོགས་པ་མཆོག་ཐོབ་ནུས་པར་ལྡན་ཡིན་ན། །ཚོགས་འཁོར་སྦྱིན་སྲེག་རབ་གནས་བྱས་པ་ཡིས། །གནས་ཉམས་སོར་ཆུད་ཉམས་རྟོགས་འཕེལ་མོད་ཀྱི། །གསར་བུ་ཉམས་རྟོགས་དམའ་བ་འདུག་མི་བྱ། །གནས་འཁྲེབ་ལ་ཡང་རྣམ་པ་གཉིས་ཡིན་ཏེ། །གནས་སྒོ་མ་ཕྱེད་ཕྱེ་དུས་རྟེན་འབྲེལ་འཆུག་།གནས་བདག་དཔའ་བོ་མཁའ་འགྲོ་ཤིན་ཏུ་རྩུབ། །ཏིང་འཛིན་དྲོད་ཉུལ་ཆོ་འཕྲུལ་ཅི་ཡང་སྟོན། །རྟོགས་པ་མཐོ་ན་བོགས་ཐོན་དངོས་གྲུབ་ཐོབ། །དཔེར་ན་མི་
ལ་ལིང་པའི་བྲག་བཞུགས་བཞིན། །རྟོགས་པ་དམའ་ན་བར་ཆད་སྲོག་དང་བྲལ། །དཔེར་ན་སྤུ་བོའི་རྨ་ཡི་རྐུང་ལུང་བཞིན། །གནས་དང་དགོན་སྡེ་རི་ཁྲོད་ལ་སོགས་པ། །དང་པོ་བཀྲ་ཤིས་བྱིན་རླབས་ལྡན་གྱུར་ཀྱང་། །བར་སྐབས་སྤྱོད་པ་ངན་པས་དམ་སྲི་ཞུགས། །སུ་བསྡད་བཀྲ་མི་ཤིས་ཤིང་བར་ཆད་རྒོད། །ནུས་པ་ལྡན་པས་སྲེག་མནན་བྱིན་འབེབས་བྱ། །དེ་མིན་གསར་བུ་བསྡད་ན་བར་ཆད་འཁྱེར། །དེ་ལྟར་གནས་རྙིང་རྙེད་པར་མ་གྱུར་ན། །ཕ་ཡུལ་མི་ཡུལ་སྐབས་སུ་གང་བབས་ཀྱི། །ཡུལ་གྱི་དཔོན་དང་གཞི་བདག་ཆོས་ལ་དགའ། །ཁྱད་པར་ས་དེའི་བདག་པོས་བཀའ་གནང་དགོས། །དེ་མིན་དགེ་སློང་ཡིན་ན་ལྟུང་བ་ཆེ། །མཐུན་རྐྱེན་འཛོམས་ཤིང་ས་དཔལ་བཟང་བའི་ས། །ཁང་པ་རྙིང་པའམ་ནི་གསར་དུ་བརྩེགས། །གནས་རི་བཟང་པོའི་ས་སྣ་གང་རྙེད་བཏབ། །དེ་ཡིས་ས་གཞིར་རབ་གནས་བྱས་དང་འདྲ། །ཡབ་སྲས་ལ་སོགས་བླ་སྒྱུ་མའི་ཞབས་རྗེས་བཤམ། །དེས་ནི་ས་དེ་ཞབས་ཀྱིས་བཅགས་པ་དང་། །ཁྱད་པར་མེད་པ་མགོན་པོའི་རྒྱུད་ནས་གསུངས། །ཐོག་མར་ཁྱིམ་མམ་གནས་དེ་གར་སྐྱིད་སར། །
ཐུབ་དབང་སྐུ་དང་གླེགས་བམ་མཆོད་པ་བཤམ། །སྤྱན་འདྲེན་ལ་སོགས་ས་གཞི་བྱིན་རླབས་ལྟར། །བཀའ་གདམས་ལུགས་ཀྱི་ས་གཞི་བྱིན་རླབས་ཡིན། །དེ་ནས་ས་གཞི་གསེར་གྱི་རྡོ་རྗེ་ནི། །རྒྱ་གྲམ་སྲ་ཤིང་བརྟན་པའི་ལྟེ་བ་ན། །མེ་ཏོག་པདྨའི་སྡོང་པོ་ཆེན་པོ་སྐྱེས། །པདྨའི་འདབ་མས་ས་ཕྱོགས་དེ་ཀུན་ཁྱབ། །དེ་སྟེང་ཟླ་བའི་དཀྱིལ་འཁོར་སྟེང་དུ་ཧྲཱི༔ །དེ་ལས་རང་ཉིད་ཐུགས་རྗེ་ཆེན་པོ་ནི། །འགྲོ་འདུལ་དཀར་པོ་ཕྱག་བཞི་གཞུང་ལྟར་བསྒོམ། །ས་ཕྱོགས་དེ་ཡི་ལྷ་འདྲེ་མི་གསུམ་ལ། །བྱམས་དང་སྙིང་རྗེ་ཐུན་གཅིག་བསྒོམས་བྱས་པས། །ཐམས་ཅད་འདུས་ནས་དད་ཅིང་གུས་པ་ཡིས། །ཡིག་དྲུག་འདོན་ཅིང་ཕྱག་དང་སྐོར་བ་བྱེད། །ཡུལ་ཕྱོགས་འདི་ཡི་རྩྭ་ཤིང་ཆུ་དང་ས། །ཅི་དགར་སྤྱོད་ཅེས་ལྷ་འདྲེས་ཕུལ་བར་བསམ། །དེ་ལྟར་མིན་ན་མ་བྱིན་ལེན་དུ་འགྱུར། །དེ་ནི་རི་ཆོས་ལུགས་ཀྱི་བྱིན་རླབས་ཡིན། །དེ་ནས་ཁང་པ་གསར་བརྩེགས་ཡིན་ན་ནི། །ས་བསླང་ལྟོ་འཕྱེ་དཀྱིལ་འཁོར་དུས་བཞིན་བྱ། །ཁང་རྙིང་ཡིན་ན་དཀར་བགེགས་གཏོར་མ་བཤམ། །དཀར་གཏོར་གནས་བདག་གཉུག་མར་གནས་ལ་བསྔོ། །གནས་འདི་བདག་ལ་
གཡོར་དང་བྱང་ཆུབ་བསྒྲུབ། །བདག་གི་དགེ་རྩའི་ཆ་ཤས་ཁྱོད་ལ་སྦྱིན། །ངེད་རང་གཉིས་ཀའི་དོན་དུ་ཆོས་སྤྱོད་པས། །འདི་ལ་ཕྲག་དོག་མ་བྱེད་སྟོངས་གྲོགས་མཛོད། །ཅེས་བརྗོད་གཏོར་མ་རྒྱབ་རིའི་ཕྱོགས་སུ་འབུལ། །དེ་ནས་བགེགས་གཏོར་བགེགས་རིགས་སྤྱི་དང་ནི། །ཁྱད་པར་ཡུལ་འདྲེ་གནས་འདྲེ་རྣམས་ལ་བསྔོ། །བདག་གིས་འདི་རུ་བྱང་ཆུབ་བསྒྲུབ་པ་ལ། །ཁྱེད་རྣམས་སྡང་སེམས་བར་ཆད་མ་བྱེད་དང་། །ནམ་ཞིག་བདག་གིས་བྱང་ཆུབ་ཐོབ་པའི་ཚེ། །ཁྱེད་ཅག་རྣམས་ཀྱི་སྡུག་བསྔལ་སེལ་བ་དང་། །བདེ་སྐྱིད་ཐམས་ཅད་བདག་གིས་བསྒྲུབ་པར་བྱ། །ཞེས་བརྗོད་བགེགས་ཀྱི་གཏོར་མ་ཕྱིར་ལ་དོར། །དེ་ནས་བུམ་པར་སྨེ་བརྩེགས་རྣམ་འཇོམས་སོགས། །གཟུངས་སྒྲུབ་བྱས་པའི་ཆུ་ཡིས་མེ་ལོང་ངོས། །ཁང་པ་དེ་ལ་ཕྱི་ནས་ཁྲུས་གསོལ་བྱ། །ནང་དུ་གཟུངས་ཆུ་གཏོར་ཞིང་སྤོས་ཀྱིས་བདུག །ཁང་པ་སྟོང་པར་ལུས་ཚེ་གདོན་ཞུགས་སམ། །རོ་གྲིབ་ལ་སོགས་ཡོད་ཀྱང་དེ་ཡིས་བསང་། །དེ་ནས་ཁང་པ་སྲ་བྷཱའི་སྔགས་ཀྱིས་སྦྱང་། །སྟོང་པའི་ངང་ལས་སེང་ཁྲི་པད་ཟླའི་སྟེང་། །བློ་ལས་བྱུང་བའི་རྣམ་པར་སྣང་མཛད་ནི། །
དཀར་པོ་བྱང་ཆུབ་མཆོག་གི་ཕྱག་རྒྱ་ཅན། །བསྐྱེད་ནས་སྤྱན་དྲངས་དབང་བསྐུར་རྒྱས་གདབ་བྱ། །མཆོད་བསྟོད་བྱས་ཏེ་འོད་ཞུ་ཁང་པར་གྱུར། །དེ་ནི་གནས་དང་ཁང་པ་བྱིན་རླབས་ཡིན། །བདེ་མཆོག་རྒྱུད་ལས་སྒྲུབ་པའི་གྲོགས་ལ་ནི། །བུད་མེད་ཌཱཀྐིའི་མཚན་ལྡན་དགོས་གསུངས་པ། །གྲུབ་ཆེན་རྩེ་རླུང་རང་དབང་ཐོབ་རྣམས་ཡིན། །པད་འབྱུང་དྲིལ་བུ་པ་དང་མར་པ་བཞིན། །སོ་སོའི་སྐྱེ་བོ་རབ་ཏུ་བྱུང་རྣམས་ཀྱིས། །བུད་མེད་ཕྱོགས་སུ་ཉེ་བར་མི་བྱ་སྟེ། །ཁང་པར་ཡུད་ཙམ་བསྡད་ཀྱང་ལྟུང་བ་ཡིན། །དེ་ཕྱིར་རི་ཁྲོད་ཐེམ་པའི་ནང་ཉིད་དུ། །འཇའ་ལུས་ཌཱ་ཀིའི་ལྷ་མོ་མ་གཏོགས་པ། །མི་ཡི་བུད་མེད་བྱུང་ན་བཀའ་ཆད་ཐོངས། །ཞེས་བརྗོད་ཆོས་སྐྱོང་རྣམས་ལ་བཀའ་བསྒོ་བྱ། །སྒོ་རྩར་ཐོ་བརྩེགས་དེ་དོན་ཀུན་ལ་བསྒྲག །འདི་ནི་གལ་ཆེ་ཤིན་ཏུ་གནད་ཆེའོ། །གསང་བ་སྤྱི་ཡི་རྒྱུད་ལས་སྒྲུབ་པའི་གཡོག །རྒྱ་ཆེར་གསུངས་ཀྱང་དེ་ཡི་དོན་བསྡུས་ན། །བླ་མ་གཞན་ལ་དམ་ཚིག་ཆག་པ་དང་། །སྡོམ་པ་ཤོར་དང་དམེ་ཕོ་མཛེ་ཅན་དང་། །རང་གི་ཆོས་ལུགས་བླ་མར་ལོག་ལྟ་ཅན། །སྨྱོ་ནད་ཅན་དང་སྡིག་ཅན་སྒྲུབ་གཡོག་སྤང་། །དད་ལྡན་
ཆོས་དང་ཡོན་ཏན་དོན་དུ་གཉེར། །གཅོང་ནད་ཞ་གྲུམ་སོགས་མེད་གཡོ་སྒྱུ་ཆུང་། །གང་སྨྲས་ཉན་པའི་སྒྲུབ་གཡོག་བསྟེན་པར་བྱ། །སྒྲུབ་གཡོག་ངན་པ་ནམ་ཡང་མི་བསྟེན་ཏེ། །ཉེ་གནས་མཆོག་གྱུར་ཤེས་རབ་བརྩོན་འགྲུས་ཡིན། །གཅིག་པུར་རང་ཚོ་ཐུབ་ན་ཆོས་པ་རབ། །དེ་ནས་སྒྲུབ་པའི་མཐུན་རྐྱེན་སྟ་གོན་ནི། །གཉེན་འདུན་སོགས་ལ་རེ་བ་མི་བཅའ་བར། །ཐུབ་པས་གནང་བའི་བསོད་སྙོམས་སྒྲུབ་རྒྱགས་ཡིན། །བསོད་སྙོམས་བཟང་པོ་བྱུང་བར་ཆགས་པ་སྤང་། །ངན་ནམ་མ་བྱུང་ན་ཡང་ཁོང་ཁྲོ་སྤང་། །རྙེད་དང་མ་རྙེད་སེམས་ཀྱིས་རོ་སྙོམས་ཤིང་། །སྦྱིན་འབྲས་བྱང་ཆུབ་ཐོབ་པའི་བསྔོ་སྨོན་བྱ། །བུང་བ་ལྟ་བུ་གྲོང་དུ་རྒྱུ་གསུངས་པས། །དཔེར་ན་བུང་བས་མེ་ཏོག་བཟང་ངན་ལ། །ཆགས་དང་སྡང་བའི་བསམ་པ་མི་བྱེད་ཅིང་། །མེ་ཏོག་ཁ་དོག་དྲི་ལ་མི་གནོད་པར། །སྦྲང་རྩིའི་བཅུད་འཇིབ་ཚང་དུ་འགྲོ་བ་ལྟར། །གང་རྙེད་ཁྱེར་ཏེ་སྒྲུབ་པའི་གནས་སུ་འགྲོ། །རང་ཉིད་ངེས་པར་ཆོས་དང་མཐུན་གྱུར་ན། །བསོད་སྙོམས་ཆོས་རྒྱགས་ཕོངས་པར་མི་འགྱུར་ཏེ། །ཤཱཀ་ཐུབ་མངོན་པར་སངས་རྒྱས་ཐོབ་སྔ་བས། །
འཁོར་ལོས་བསྒྱུར་རྒྱལ་ལྔ་བརྒྱར་སྐྱེ་དགོས་པས། །བསོད་ནམས་མ་མཁོ་ཉན་ཐོས་འཚོ་བར་བསྔོས། །དེ་ཕྱིར་འབྲུ་དང་མུ་ཏིག་མཉམ་བརྗེས་ཀྱི། །མུ་གེ་བྱུང་ཡང་འཚོ་བས་མི་ཕོངས་གསུངས། །དེ་ཉིད་སེམས་འཆང་སྒྲུབ་རྒྱགས་སེམས་ཁྲལ་སྤང་། །འོན་ཏེ་སྔོན་གྱི་སྦྱིན་འབྲས་ཁྱད་པར་གྱིས། །སྤྱི་དང་མི་མཚུངས་རང་ཉིད་བཀྲེས་གྱུར་ན། །སྒབ་འདྲེ་མེད་ཅིང་སྒྲུབ་རྫས་མི་དཀའ་བའི། །ཡེ་ཤེས་པ་ཡི་ནོར་ལྷ་ཅུང་ཟད་བསྙེན། །དེ་ནི་རུང་བར་མཉམ་མེད་དྭགས་པོས་གསུངས། །གདམས་ངག་ངེས་ཤེས་མེད་པར་སྒྲུབ་བརྩོན་པ། །གེགས་དང་གོལ་ས་འབྱུང་བའི་རྒྱུ་ཡིན་སྤང་། །དབང་ལུང་མ་ཐོབ་སྒྲུབ་པ་བྱེད་པ་ནི། །ཆུ་བཤིགས་མར་འདོད་འདྲ་སྟེ་འབྲས་བུ་མེད། །བྱིན་རླབས་ཅུང་ཟད་བྱུང་ཡང་ངན་སོང་རྒྱུ། །དེ་ཕྱིར་དབང་ཁྲིད་མན་ངག་རྫོགས་པ་གཅེས། །དེ་ནས་སྒྲུབ་པའི་སྟ་གོན་བྱ་བ་ནི། །འབྱོར་པ་ཆེ་ཞིང་ཤེས་རབ་ལྡན་པ་ན། །སྒྲུབ་ཆེན་ཆ་ལག་ཐམས་ཅད་ཚང་བར་བསག །འབྲིང་ལ་སྒྲུབ་ཕྲན་ཐ་མ་སྤྲོས་མེད་ལུགས། །རང་གི་འབྱོར་པ་ཤེས་རབ་དག་དང་དཔག །གནས་དེར་ཕྱིན་ནས་ཟླ་ཤས་ཙམ་གྱི་བར། །ཆུ་ཤིང་ལ་སོགས་
མཐུན་རྐྱེན་སྒྲུབ་པའི་ཚེ། །ཐག་རིང་མི་འགྲོ་ལྡོག་མཚམས་ཚུལ་དུ་བྱ། །དེ་ནས་རང་གིས་རང་ལ་ཁྲིད་བཙུག་སྟེ། །དཔེ་ཆ་ཡོད་ན་ཁྲིད་དཔེ་བླ་མའི་ཚུལ། །ཁྲིད་དཔེ་མེད་ན་ཡིད་ཀྱིས་གསལ་འདེབས་ཤིང་། །དལ་འབྱོར་རྙེད་དཀའ་འཆི་བ་མི་རྟག་པ། །ལས་འབྲས་འཁོར་བའི་ཉེས་དམིགས་བསྒོམ་པ་བཞི། །རེ་རེ་ལ་ཡང་ཞག་པོ་གསུམ་མམ་བདུན། །ངེས་ཤེས་སྐྱེ་ཞིང་སྣང་བ་འགྱུར་ངེས་བསྒོམ། །དེ་བཞིན་སྐྱབས་སེམས་རྡོར་སེམས་མཎྜལ་དང་། །བླ་མའི་རྣལ་འབྱོར་ཁྱད་པར་སྔོན་འགྲོ་བཞི། །རེ་རེ་ལ་ཡང་ཞག་པོ་བདུན་རེ་ཙམ། །རེ་རེ་དག་ལ་རྩེ་གཅིག་ཕུར་ཚུགས་བསྒོམ། །དེ་ནས་སྒྲུབ་པའི་སྣ་སེལ་བྱ་བ་ནི། །བསང་དང་ཆུ་གཏོར་ཕྱག་དང་བསྐོར་བ་དང་། །སཱཙྪ་ཞལ་ནས་གསུངས་པའི་བཀའ་བཀླག་སོགས། །རེ་རེའང་ཉིན་རེ་ཙམ་རེ་གང་ཐོན་འབད། །དེ་ནས་སྒོ་ཙར་ཐོ་ནི་དཀར་པོ་བརྩེགས། །གཞི་བདག་དཀར་གཏོར་ཕུལ་ལ་བཀའ་བསྒོ་ཀྵ་ནི། །བདག་གིས་མཚམས་སྒྲུབ་མཐའི་རུ་མ་ཐོན་པར། །ཕྱི་ཡི་བར་ཆད་ནང་དུ་མ་གཏོང་ལ། །ནང་གི་དངོས་གྲུབ་ཕྱི་རུ་མ་གཏོང་པར། །གནས་མགྲོན་གཉིས་ཀྱི་དམ་ཚིག་
སྲུངས་ཞེས་བརྗོད། །བགེགས་གཏོར་རྒྱས་པར་བཏང་ཞིང་བགེགས་བསྐྲད་དེ། །རྫས་རྒོད་དམ་ནི་གུ་གུལ་དུད་པས་བདུག །འདི་སྐབས་མཚམས་རྡེལ་འཇོག་དགོས་ཡོད་ན་ནི། །ཤོག་བུར་མིང་བྲིས་རྡེའུ་བཏུམས་ནས་ནི། །རང་མདུན་བཞག་ལ་མི་དེ་ཡིན་པར་བསྒོམ། །མཚམས་གཡོག་གཏུག་དགོས་ཡོད་ན་མདུན་དེར་བཞག །དེ་ནས་སྲུང་བའི་འཁོར་ལོ་གསལ་བར་བསྒོམ།་་་་་གེགས་སེལ་བདུད་རྩི་ཐིག་པ་ལས་འབྱུང་བ་ལྟར་སྲུང་འཁོར་དྲུག་རིམ་མམ་ཡང་ན་དགུ་རིམ་སོགས་མ་ནོར་བར་བསྒོམ་པ་གནད་ཆེ་གསུངས། མཆན། །རང་ཉིད་ཁྲུས་བྱས་མལ་གོས་སྤོས་ཀྱིས་བདུག །གདན་འོག་གཡུང་དྲུང་དཀར་པོ་གཡས་འཁྱིལ་བྲི། །མལ་ས་སྤོ་དང་གདན་སྤྲུགས་མི་རུང་ཕྱིར། །ལེགས་པར་གཟབ་ནས་བཅོས་མི་དགོས་པར་བྱ། །གནས་ཁང་དེ་ནི་ཡི་དམ་གཞལ་ཡས་ཁང་། །མལ་སྟན་སེང་ཁྲི་པདྨ་ཟླ་བའི་གདན། །རང་ཉིད་ཡི་དམ་ལྷར་གསལ་རྡོར་སྐྱིལ་བཅའ། །སྒྲུབ་པ་ཅི་ཙམ་འདུག་པའི་དམ་བཅའ་བཟུང་། །དམ་བཅའ་རིང་ན་བདུད་ཀྱི་བར་ཆད་འཇུག །དམ་བཅའ་ཐུང་བཅུག་དོན་ལ་རིང་དུ་བསྲིང་། །མཚམས་བསྡམས་ནས་ནི་ཡུན་རིང་མ་སོང་སྐབས། །ཉེ་དུ་ཡོན་བདག་དབོན་རིགས་
ལ་སོགས་པ། །གློ་བུར་ནད་དང་གདོན་གྱིས་ཉེ་བར་འཚེ། །ད་རེས་འབྱོན་དགོས་གལ་ཏེ་མ་བྱོན་ན། །ཁ་གཏམ་མེད་དམ་བསྡིག་རྒྱུ་ཡོད་སྐད་ཟེར། །ནན་ཆེ་ཡུས་ཚེ་ཚིག་རྙིང་མནའ་ཡིས་མཐུད། །དེ་ནི་བདུད་ཀྱིས་ཉམས་ཚད་གླགས་ལྟ་ཡིན། །རེ་བ་ཆེའམ་བཙན་པོ་ཡིན་ཀྱང་རུང་། །དེ་ཡི་ངོ་བཟློག་མི་འགྲོ་གལ་ཆེ་སྟེ། །དེ་དུས་སོང་ན་བར་ཆད་ཀྱིས་ཁྱེར་བས། །ནམ་ཡང་སྒྲུབ་པ་ལམ་དུ་འགྲོ་མི་སྲིད། །ཉེ་དུ་བརྩེ་བ་ཤི་ཆད་བྱུང་ན་ཡང་། །བསྔོ་སྨོན་རྒྱས་འདེབས་མ་གཏོགས་འགྲོ་མི་རུང་། །རང་ཉིད་གློ་བུར་ནད་ཀྱིས་བཏབ་ན་ཡང་། །མཚམས་ཁང་ནང་ནས་རྩ་སྟོན་རུང་མོད་ཀྱི། །ཇི་ལྟར་ཐུ་ཡང་མཚམས་ནི་མི་ཀློད་དེ། །ཤི་ཡང་མལ་སྟན་སྟེང་དེར་ཤི་ནུས་བྱ། །དེ་ཡིས་བར་ཆད་གཡུལ་ལས་རྒྱལ་བ་སྟེ། །ཤི་བར་མི་འགྱུར་བདུད་ཀྱང་ཁ་སྐྱེངས་འབྲོས། །རོ་སྙོམས་ལུགས་དང་གཅོད་ལུགས་མ་ཡིན་པས། །ལྷ་རྗེར་མི་སྟོན་སྨན་ནི་མི་ཟ་སོགས། །ལ་མི་རུང་ཕུང་པོར་བརྙས་བྱེད་རྩ་ལྟུང་ཡིན། །དེ་ནས་ཇི་ལྟར་ཉམས་སུ་ལེན་པའི་ཚུལ། །ཆོས་ཀྱི་དབང་ཕྱུག་ཞལ་ནས་ཐོས་པའི་དོན། །དབང་རྣོན་ཆོས་ཀྱི་རྗེས་འབྲང་ཉམས་ལེན་
དང་། །དབང་རྟུལ་དད་པའི་རྗེས་འབྲང་ཉམས་ལེན་གཉིས། །ཆོས་ཀྱི་རྗེས་འབྲང་པཎྜི་ཏ་ཡི་ལུགས། །བྱུང་ན་དེ་ཉིད་མཆོག་ཏུ་གྱུར་མོད་ཀྱི། །དད་པའི་རྗེས་འབྲང་ཀུ་ས་ལི་། ཡི་ལུགས། །དེང་སང་ཕལ་ཆེར་དེ་ཉིད་ཡིན་ནོ་གསུངས། །དེ་ལའང་ཐ་མ་འབྲིང་དང་རབ་གསུམ་སྟེ། །དབང་ལུང་ཐོབ་ཀྱང་གོ་བ་ཤེས་རབ་དམན། །ཁྲིད་རིམ་ཐོབ་པས་སེམས་ངོ་སྲུང་ཤེས་ཙམ། །དད་ལྡན་འཆི་བ་དྲན་པས་ཉམས་ལེན་འདོད། །ཐ་ན་ཡི་གེ་ཙམ་ཡང་མི་ཤེས་པ། །དེ་འདྲས་་་་དབང་པོ་ཐ་མ། རི་ཁྲོད་འགྲིམས་ཤིང་མཚམས་སྡོམ་ན་་།ཐོ་རངས་གཉིད་ནི་སད་མ་ཐག་པའི་དུས། །བླ་མ་སངས་རྒྱས་ཀུན་འདུས་ངོ་བོར་དྲན། །དཔལ་ལྡན་རྩ་བའི་བླ་མ་མཁྱེན་ནོ་ཞེས། །གདངས་དབྱངས་མི་ཤེས་འབོད་པ་ཆེར་བྱེད་པ། །གསོལ་བ་ཁྱི་སྐད་མ་རུ་འདེབས་ཞེས་བྱ།། །དེ་ཡིས་གཉིད་དཀྲོག་རིག་པ་དྭངས་པ་དང་། །སྐྱབས་འགྲོ་སེམས་བསྐྱེད་སེམས་ཅན་བདེ་ལྡན་སོགས། །ཀུན་གྱིས་ཤེས་པ་དེ་ལ་ཚར་གསུམ་བརྗོད། །རང་ལུས་ཐུགས་རྗེ་ཆེན་པོར་ཝལ་གྱིས་བསྒོམ། །སྤྱི་བོར་བླ་མ་འོད་དཔག་མེད་པ་བསྒོམ། །མ་ནམ་བཞི་སྐོར་དེ་ལ་ཚར་གསུམ་འདོན། །
ཡིག་དྲུག་སྐད་ནི་ཆེ་ཆུང་རན་པར་བཟླས། །ས་ཕྱོགས་དེ་ཉིད་བདེ་བ་ཅན་དུ་མོས། །སྲོག་ཆགས་ཐམས་ཅད་སྤྱན་རས་གཟིགས་སུ་བསྒོམ། །དེ་ལ་སེམས་གནས་དམིགས་པ་མ་གསལ་བར། །ཡིག་དྲུག་བཟླས་པ་གཟུགས་ཀྱི་བཟློས་པའམ། །སྣང་བ་སྐུ་ཡི་ཁྱེར་སོ་ཞེས་བྱ་ཡིན། །འགྲོ་ཀུན་སྤྱན་རས་གཟིགས་སུ་གྱུར་པ་དེས། །རང་གི་རམ་བུ་བཀྱག་བསམ་ཡིག་དྲུག་བཟླས། །དེ་ནི་སྒྲ་ཡི་བཟླས་པ་ཞེས་བྱའམ། །གྲག་པ་གསུང་གི་ཁྱེར་སོ་ཞེས་བྱ་སྟེ། །ཡིག་དྲུག་སྒྲ་ལ་རིག་པ་གཏད་པ་ཡིན། །དེ་ཡིས་བསྐྱེད་རིམ་དོན་རྩ་འདུས་པའོ། །དེ་ནས་རང་གི་སྙིང་གའི་དཀྱིལ་དུ་ནི། །ཐིག་ལེ་དཀར་པོ་སྲན་མ་ཙམ་ཞིག་བསྒོམ། །དེ་ལ་རིག་པ་གནས་སུ་ཅི་ཐུབ་བྱ། །ཧ་ཅང་མི་འཕྲོ་དེ་ལ་སེམས་གནས་ན། །སེམས་འཛིན་ཞི་གནས་དོན་རྩ་དེ་ལ་འདུས། །དེ་ནས་ཡིད་ལ་ཅི་ཡང་མི་བསམ་པར། །སེམས་ཀྱིས་སེམས་ལ་ཧྲིག་གེར་བལྟས་ལ་བཞག །གཟུགས་དང་ཁ་དོག་དངོས་པོ་མ་མཐོང་ཡང་། །རྣམ་རྟོག་འགྱུ་བ་ཐོལ་ཐོལ་སྐྱེས་པའི་ཚེ། །བྱུང་ས་འགྲོ་ས་གནས་ས་རྩད་གཅོད་བྱ། །མ་རྙེད་དེ་ཡི་ངང་ལ་མཉམ་པར་བཞག །དེ་ཡིས་
ལྷག་མཐོང་དོན་རྩ་འདུས་པ་ཡིན། །དེ་ནས་རྒྱུན་དུ་རྩད་གཅོད་མི་དགོས་ཏེ། །ནམ་དྲན་དུས་སུ་རང་ངོར་ཅེར་གྱིས་ལྟ། །མ་མཐོང་ངང་ལ་ཀློད་དེ་ཤིག་གེར་གཞག །རྣམ་རྟོག་སྐྱེས་ན་ཆུ་དང་རླབས་བཞིན་དུ། །སེམས་ལས་བྱུང་ཞིང་སེམས་ཀྱི་ཀློང་དུ་ཐིམ། །ཡིག་དྲུག་ཤུབ་བུར་བཟླས་ཤིང་དེ་ཉིད་སྐྱོང་། །ཉི་མ་ཤར་ཚེ་བརྒྱ་ཕྱག་འགའ་ཟུང་འཚལ། །ཐུག་པ་ལ་སོགས་ཟས་ཀྱི་སྤྱོད་ལམ་བྱ། །དེ་ནས་ནམ་མཁའི་མཐོང་ཞིང་སྣང་གཡེལ་སར། །སེམས་ངོ་སྐྱོང་ཞིང་ཡིག་དྲུག་བཟླས་པ་བྱ། །མོས་གུས་སྐྱེ་ཞིང་ཉམས་ཀྱི་འཆར་སྒོ་དུས༔ གསོལ་འདེབས་རྒྱང་འབོད་ལན་གསུམ་ཙམ་རེ་བྱ། །དགོང་བཅད་ཡིན་ནམ་གདན་གཅིག་སྲུང་བ་ན། །རང་གི་སྙིང་གར་སྤྱན་རས་གཟིགས་བསྒོམས་ནས། །དེ་ལ་མཆོད་པའི་མོས་པས་གུང་ཚིགས་བྱ། །སླར་ཡང་སྐྱབས་སེམས་ལ་སོགས་ད་ནངས་བཞིན། །ཉི་ནུབ་བར་དུ་ཐུན་གཅིག་བྱས་ལ་བསྒོམ། །ལུས་ལ་བད་ཀན་ལ་སོགས་ནད་ཡོད་ན་། །ཀ་བའི་ངོས་ལ་དཔེ་འམ་སྐུ་འདྲ་བཞག །བསྐོར་ཐག་ཐུང་ན་མགོ་ཡུ་འཁོར་ནས་འགྱེལ། །ཅུང་ཟད་རྒྱང་ནས་བསྐོར་བ་ཉི་ཤུ་ཙམ། །མུན་རུག་ནས་ནི་སྲོད་ཀྱི་མཚམས་
དེ་ལ། །བཛྲ་གུ་རུ་བཛྲ་ཕཊ་ལ་སོགས། །ལྷ་བསྒོམ་མི་དགོས་སེམས་ངོའི་ངང་ལ་བཟླ། །དེ་ནས་སླར་ཡང་ད་ནངས་ཅི་བཞིན་དུ། །རྒྱང་འབོད་ནས་བཟུང་རིམ་བཞིན་ཐུན་གཅིག་བསྒོམ། །དེ་ནས་ཤེས་ན་ཀུ་ས་ལི་ཡི་ནི། །ཚོགས་བསོག་ངག་ཏུ་མི་དགོས་ཡིད་ཀྱིས་བསྒོམ། །རྐང་དུང་གསུམ་བུས་ཕཊ་སྒྲ་འགའ་ཟུང་རྒྱབ། །གལ་ཏེ་ལུས་སྦྱིན་དམིགས་པ་མི་ཤེས་ན། །ཕཊ་སྒྲ་རྐང་དུང་ལ་སོགས་མི་བྱའོ། །ཐུན་འཇུག་དེ་ལ་བསྔོ་སྨོན་གང་ཤེས་བྱ། །སྙིང་གར་བླ་མ་ཡི་དམ་ངོ་བོ་ནི། །ཐིག་ལེ་དཀར་པོ་ཤེལ་གྱི་ཁ་དོག་ཅན། །འོད་ཀྱིས་ཁོང་པའི་ནང་ཀུན་གསལ་བ་ལ། །རིག་པ་གཏད་ལ་ཡིག་དྲུག་ཤུབ་བུར་བཟླས། །ཙོག་པུའམ་སེང་གེའི་ཉལ་སྟབས་གང་བདེ་བྱ། །མ་གཉིད་བར་དུ་ཉམས་ལེན་སྐྱོང་བྱས་པས། །དེས་ནི་རྨི་ལམ་འོད་གསལ་ཟིན་པར་སླ། །ལོ་ཟླ་ལ་སོགས་རིང་ཐུང་ཅི་འདུག་ཀྱང་། །ཉིན་གཅིག་བཞིན་དུ་ཉམས་ལེན་བྱེད་ལུགས་སྒྱུ་གཅིག་དེ་ནི་རྨོངས་པ་ཐ་མལ་པ་ཡི་མཚམས། །དེ་བས་ཤེས་རབ་་་་་དབང་པོ་འབྲིང་གི་ཉམས་ལེན། མཆན། ཅུང་ཟད་དྲག་པ་ན། །གཏོར་བསྔོས་པ་ཡི་གཏོར་མ་གང་འཛོམ་
བཅའ། །ཐོ་རངས་གཉིད་ནི་སད་པའི་དེ་མ་ཐག །སྔོན་འགྲོ་བཞི་སྦྱོར་རྒྱས་བསྡུས་གང་རུང་འདོན། །སྒྲོལ་དཀར་ལ་སོགས་ཚེ་སྒྲུབ་གང་ཤེས་དེ། །ཕྲེང་སྐོར་གཉིས་གསུམ་ཡན་ཆད་ཅི་ནུས་བཟླས། །རྒྱལ་བ་རྒྱ་མཚོ་ལ་སོགས་གསར་མ་ཡི། །ཡི་དམ་གཙོ་བོ་གང་ཡིན་མངོན་རྟོགས་སམ། །འོད་འབར་ལ་སོགས་རྙིང་མའི་ལས་བྱང་ཞིག །བཏོན་ལ་ཉི་ཤར་བར་དུ་བསྙེན་པ་བྱ། །དེ་ནས་ཇ་འམ་ཐུག་པར་མེ་འབུད་ཅིང་། །བརྒྱ་ལས་མི་ཉུང་ཕྱག་འཚལ་ལྟུང་བཤགས་སོགས། །ཉེས་ལྟུང་གང་ཡོད་དྲན་ཅིང་བཤགས་པ་བྱ། །ཤེས་ན་གཏོར་མ་ཆ་བཅུ་འཛམ་གཏོར་བཏང་། །དེ་ནས་ཇ་ཐུག་གང་ཡོད་ལ་སྤྱོད་ཅིང་། །སྐབས་དེར་གྲུབ་ཐོབ་གོང་མའི་གསུང་འབུམ་མམ། །སེམས་ལ་ཕན་པའི་དཔེ་ཆ་གང་ཡང་རུང་། །མང་པོ་མ་ཡིན་ལྡེབ་མ་གསུམ་བཞི་བལྟ། །སླར་ཡང་ད་ནངས་བཞིན་དུ་ཐུན་བཟུང་སྟེ། །དགོང་ཀའི་བར་དུ་དེ་ཡི་བསྙེན་པ་བྱ། །དེ་ནས་ཇ་སོགས་གང་ཡིན་མེ་བཏང་ལ། །ཆོས་སྤྱོད་གང་ཤེས་བརྗོད་དོགས་འདོན་རེས་དང་། །མདོ་སྒྲུབ་སེང་གདོང་བདུད་ཟློག་ཆག་མེད་བྱ། །ཉི་ནུབ་མི་རྣམས་ཁྱིམ་དུ་སོང་སྐབས་དེར། །རང་གི་ཆུ་ལེན་
དགོས་ན་རྐུ་ཐབས་བླང་། །དེ་ནས་ཕུག་གཏོར་གསོས་ལ་བྲན་བྱས་ཏེ། །རྙིང་མ་ཡིན་ན་ལས་བྱང་སླར་ལ་ཝིག །གསར་མ་ཡིན་ན་མདུན་བསྐྱེད་ཚང་བར་འདོན། །ཆོས་སྐྱོང་ལས་བྱང་ཤེས་ན་དེ་ལ་སྦྱར། །མི་ཤེས་ན་ཡང་གཏོར་བསྔོས་གང་ཤེས་བྱ། །གཅིག་པུར་ཆོམ་རྐུན་གཅན་གཟན་གནོད་དོགས་ན། །གཏོར་བསྔོས་ཚེ་དེར་རྔ་བརྡུང་རྒྱུན་དུ་བྱ། །དེ་ཡི་གཅན་གཟན་མི་འོང་རྐུན་པོས་རྩི། །དོགས་པ་མེད་ན་རྔ་བརྡུང་མི་བྱ་སྟེ། །སྔགས་ནག་མིག་ལྟོས་ཡིན་པས་ལེགས་རྒྱུ་མེད། །དེ་ནས་རྒྱས་པར་ལུས་སྦྱིན་ཤེས་པའམ། །མི་ཤེས་ཀུ་ས་ལ་ཡི་ཚོགས་གསོག་བྱ། །དེ་དག་རྣམས་ཀྱི་བར་སྐབས་ཐམས་ཅད་དུ། །ཡི་དམ་བསྙེན་པ་ཆུ་བོའི་གཞུང་ལྟར་བཟླས། །བསྐྱེད་རིམ་དང་ནི་སེམས་ངོ་རེས་མོས་བྱ། །དེ་ལ་གོམས་ནས་ཟུང་འཇུག་ཨེ་འོང་བལྟ། །ཉལ་ཁ་བདག་བསྐྱེད་བསྡུ་བའི་དམིགས་རིམ་དེ། །བསྒོམས་ནས་སེམས་ངོའི་སྟེང་དུ་བཞག་ཉལ་ཀླུ་བས། །འོད་གསལ་འཛིན་པའི་གདམས་པ་དེ་ཉིད་ཡིན། །དེ་ལས་ལྷག་ཙམ་ཤེས་རབ་ཡོད་པའི་རིགས། །གཉིད་ནི་སད་མ་ཐག་ཏུ་ནམ་མཁའ་ནས། །དཔའ་བོ་མཁའ་
འགྲོས་ཌཱ་མ་རུ་འཁྲོལ་བས། །གཉིད་ནི་སད་པ་ཡིན་པའི་མོས་པ་བྱ། །ཁ་མ་བཤལ་བར་སྔགས་མི་ཟླ་གསུངས་པས། །གཟུངས་སྔགས་བཟླས་པའི་བུམ་ཆུའི་སྔགས་ཆབ་བླངས། དེ་ནས་བཟླས་བརྗོད་ནུས་པ་སྟོབས་འབྱིན་སོགས། །ངག་གི་བྱིན་རླབས་རྒྱས་པར་བྱ་བའམ། །དབྱངས་གསལ་ལན་གསུམ་བརྗོད་པས་ཆོག་པ་སྟེ། །དེ་ཉིན་བཟླས་ཚད་དུང་ཕྱུར་འགྱུར་དུ་གསུངས། །དམིགས་པ་ལྕེ་ནི་རལ་གྲི་རབ་རྣོ་བ། །ཡུ་བ་པདྨ་དཀར་པོ་དྷིས་མཚན་པ། །བསྒོམས་པས་ངག་མནན་ལ་སོགས་ཉེས་སྐྱོན་སེལ། །དེ་ནས་སྔོན་འགྲོ་བཞི་སྦྱོར་བྱེད་པའམ། །སྐྱབས་འགྲོ་སེམས་བསྐྱེད་སྣང་བ་འགྱུར་ངེས་བྱ། །དེ་ནས་གཏུམ་མོ་ལ་སོགས་དམིགས་རིམ་གྱིས། །རླུང་རོ་བུས་ཤིང་བུམ་ཅན་ཐུན་གཅིག་བསྒོམ། །དེ་ཡིས་ཁམས་དངས་ནད་སེལ་ཚེ་ཡང་རིང་། །དེ་ནས་སྒྲོལ་དཀར་ཚེ་དཔག་ལ་སོགས་པ། །ཚེ་སྒྲུབ་གང་ཤེས་བསྙེན་པ་རབ་ཞིག་བྱ། །མང་ཉུང་རང་ལ་སྐག་སོགས་ཡོད་མེད་བསྟུན། །དེ་ནས་རྩ་བའི་ཡི་དམ་གང་ཡིན་གྱི། །གསར་མ་ཡིན་ན་བདག་བསྐྱེད་ཚར་གཅིག་དང་། །རྙིང་མ་ཡིན་ན་བདག་མདུན་ཟུང་འཇུག་གི །ལས་
བྱང་ཚར་གཅིག་ཛབ་དགོངས་ཡན་ཆད་འདོན། །དེ་ནས་ཉི་ཤར་བར་དུ་བསྙེན་པ་བྱ། །དེ་ཡང་གསར་མ་ཡིན་ན་བདག་བསྐྱེད་བསྡུ། །ཟུང་འཇུག་སྐུར་ལྡང་ཐུན་མཚམས་སྤྱོད་པ་སྟེ། །ཇ་ཐུག་བསྐོལ་སོགས་བྱ་བ་གང་དགོས་བྱ། །ནུབ་ཏུ་ཁ་བལྟས་བདེ་ཆེན་ཞིང་ཁམས་ནི། །འོད་དཔག་མེད་པ་གཙོ་འཁོར་མངོན་སུམ་ལྟར། །ཡིད་ཀྱིས་གསལ་བཏབ་བརྒྱ་ཕྱག་འཚལ་བའམ། །ཧ་ཅང་མི་མང་འགའ་ཟུང་འཚལ་བ་ན། །དཀོན་མཆོག་གསུམ་ལ་ཕྱག་འཚལ་ལོ། །ན་མོ་མཉྫཤྲཱི་ཡེ། ན་མ་སུ་ཤྲཱི་ཡེ། ན་མོ་ཨུཏྟ་མ་ཤི་ཡེ་སྭཱ་ཧཱ། གཅིག་བརྗོད་ཕྱག་གཅིག་འབུམ་ཐེར་འགྱུར་བ་ཡིན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་ལ་ཕྱག་འཚལ་ལོ། །དེ་ནི་ཞིང་དེར་སྐྱེ་བའི་རྒྱུ་ཡིན་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ནས་འོད་ཀྱི་རྒྱལ་སྒྱུ་པོ་མེ་འོད་རབ་ཏུ་གསལ་བ་ལ་ཕྱག་འཚལ་ལོ། །དེ་ལ་ཕྱག་འཚལ་དཀོར་སྒྲིབ་བྱང་བ་ཡིན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་མགོན་པོ་ཀུན་ཏུ་གཟིགས་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་དེ་ལ་ཕྱག་འཚལ་ལོ། །རིག་པའི་རྒྱལ་པོ་མཆོག་ལག་ན་རྡོ་རྗེ་ལ་ཕྱག་འཚལ་ལོ། །དེ་གསུམ་རེ་རེར་ཕྱག་རེ་འཚལ་ན་ཡང་། །གངྒཱའི་ཀླུང་ནི་དྲུག་ཅུ་རྩ་གཉིས་ཀྱི། །བྱེ་མ་སྙེད་ཀྱི་སངས་རྒྱས་མཚན་བརྗོད་ཅིང་། །ཕྱག་འཚལ་བ་དང་བསོད་ནམས་མཉམ་མོ་ཞེས། །འཇམ་དཔལ་ཞིང་བཀོད་མདོ་དང་པད་དཀར་མདོ། །ཕྱག་རྡོར་དབང་བསྐུར་རྒྱུད་ལས་གསུངས་པ་ཡིན། །དཀའ་ཚེགས་མེད་པར་བསོད་ནམས་རྒྱ་ཆེན་པོ། །ཐོབ་ཐབས་ཤེས་ན་མི་དེ་མཁས་པ་ཡིན། །མདུན་གྱི་ཀ་བར་དཔེ་ཆའམ་སྐུ་གཟུགས་བཅིང་། །ཨོཾ་ན་མོ་བྷ་ག་ཝ་ཏེ་རཏྣ་ཀེ་ཏུ་རཱ་ཛཱ་ཡ། །ཏ་ཐཱ་ག་ཏཱ་ཡ། ཨདྷ་ཏེ། སམྱཀཾ་བུདྡྷཱ་ཡ། ཏདྱ་ཐཱ། ཨོཾ་རཏྟེ་རནྡྷེ་མ་ཧཱ་རཏེ་རཏྣ་བི་ཛ་ཡེ་སྭཱ་ཧཱ། །ད་ནངས་ལན་གཅིག་བརྗོད་པར་བྱས་ནས་ཀྱང་། །ཆབ་བསིལ་ལ་སོགས་ལངས་འདུག་བྱེད་པའི་ཚེ། །ཀ་བ་དེ་ལ་བསྐོར་བ་འོང་བར་བྱ། །བསྐོར་བ་གཅིག་གིས་བསྐོར་བ་འབུམ་ཐེར་འགྱུར། །དེ་བཞིན་ཆབ་བསིལ་བཏང་བར་བྱ་བའི་ཚེ། །
རང་ལུས་གསེར་གྱི་བུམ་པ་ཆེན་པོ་ནས། །བདུད་རྩིའི་རྒྱུན་བབས་ཡི་དྭགས་དྲི་ཆུ་ལ། །དགའ་བ་ཐམས་ཅད་ངོམས་ཤིང་ཚིམས་བསམ་ལ། །ཨོཾ་ཨཱམུ་ཏྲ་ཨཱཿཧ་རེ་སྭཱ་ཧཱ། །ཡི་དྭགས་དྲི་ཆུ་ལ་ལོངས་སྤྱོད་པ་རྣམས་ཚིམ་པར་གྱུར་ཅིག །ཅེས་བརྗོད་དེ་བཞིན་དྲི་ཆེན་འདོར་བའི་ཚེ། །དྲི་མ་ཟས་ཚོགས་ཕུན་སུམ་ཚོགས་པར་བསམ། །ཨོཾ་ཨཱབིཥྛ་ཨཱ་ཧ་རེ་བྱུསྭཱ་ཧཱ། །སརྦ་པྲ་ཏ་ནཾ་ཁ་ཁ་ཁཱ་ཧི། ཡི་དྭགས་དྲི་ཆེན་ལ་ལོངས་སྤྱོད་པ་རྣམས་ཚིམ་པར་གྱུར་ཅིག །ཅེས་བརྗོད་དྲི་ཆེན་དྲི་ཆུའང་ཚོགས་སུ་འགྱུར། །ཉི་མ་ཤར་དྲོས་དེ་ལ་འཛམ་གཏོར་སོགས། །གཏོར་མ་བརྒྱ་རྩ་འམ་ནི་རྒྱས་པར་གཏོང་། །ཀླུ་ཐེབས་ཡོད་ན་ཀླུ་གཏོར་གང་འགྲུབ་བཏང་། །ཀླུ་ནི་ལྡོག་དུས་ཕན་ལས་གནོད་པ་ཆེ། །དེ་ནས་སྔ་དྲོའི་བཟའ་བཏུང་ཚར་བ་དང་། །སློབ་གཉེར་བྲིས་དང་དཔེ་ལྟས་ཅུང་ཞིག་བྱ། །བསྐྱེད་རིམ་བརྟན་ན་ཆོ་ག་ཝིག་མི་དགོས། །བསྐྱེད་རིམ་དམིགས་པས་གསལ་་འདེབས་ཁོ་ནས་ཆོག །མི་གསལ་ན་ནི་བདག་བསྐྱེད་སླར་ལ་ཝིག །དེ་ནས་བསྙེན་པ་ཅི་འགྲུབ་ཅུང་ཟད་བྱ། །གདན་གཅིག་དགོང་བཅད་ལ་སོགས་ཡིན་པ་ན། །མདོ་ལྟར་
ཕུད་མཆོད་ཆངསབུ་ལ་སོགས་བཞག །སྔགས་ལྟར་ཡི་དམ་ལུས་དཀྱིལ་གསལ་བཏབ་ནས། །ལྟེ་འོག་གཏུམ་མོ་ཡེ་ཤེས་མེ་ཡིན་ལ། །ཁ་ནི་ཐབ་ཁུང་ལྕེ་ནི་མེ་ལྕེ་ཡིན། །ལག་པ་དགང་གཟར་བླུགས་གཟར་རང་བྱུང་སྟེ། །དེ་ལྟར་བསྒོམ་རྒྱུ་མ་ཡིན་ཤེས་པས་ཆོག །ཟས་རྣམས་བསྲེག་རྫ་ས་བདུད་རྩིའི་རང་བཞིན་བསམ། །ལུས་ཀྱི་ལྷ་ལ་སྦྱིན་སྲེག་འབུལ་བར་དམིགས། །ཡི་དམ་སྔགས་ཀྱང་ཡིད་ཀྱིས་བཟླས་ཤིང་བཟའ། །དེ་ནི་ནང་གི་སྦྱིན་སྲེག་ཅེས་བྱ་སྟེ། །སྦྱིན་སྲེག་གོ་ཡང་ཆོད་པར་གསུངས་པ་ཡིན། །ཨ་མྲྀ་ཏེ་ཧཱུཾ་ཕཊ། །བཟླས་པའི་ཆུ་ཡིས་ཆབ་ཀྱང་བླངས་རུང་ཞིང་། །བགེགས་ཀྱི་བར་ཆད་སྲུང་བའི་མཆོག་ཏུ་གསུངས། །དེ་མིན་སྒྲུབ་ཚེ་ཆུ་ཡིས་ཁ་མི་བཤལ། །མཚོན་རྩེ་ཁ་རུ་མི་བཅུག་ལྕེ་མི་ཟ། །མེ་ལ་ཕུ་མི་བྱ་བར་སྦྱད་པ་ཚགས། །སྐུ་དང་སེན་མོའི་རྩེ་ཡང་མི་བྲེག་གསུངས། །གཟུངས་ཆུ་མིན་པའི་ཆུ་ཡིས་ལུས་མི་བཀྲུ། །བྱིན་རླབས་ཚོགས་འཁོར་ལ་སོགས་མ་བྱས་པའི། །ཤ་ཆང་སྒོག་པ་ལ་ཕུག་མི་ཟ་གསུངས། །དེ་ཚོ་ངག་ནུས་ཆེ་བའི་དམ་ཚིག་ལགས། །ངག་ནུས་འདོད་པ་མེད་ན་འགལ་བ་ཆུང་། །ཤ་ཆང་སྒོག་པ་ལ་ཕུག་ལ་
སོགས་པ། །ཚོགས་འཁོར་བྱས་ནས་ཟོས་ན་ཉེས་པ་མེད། །དེ་རྣམས་རྒྱ་གར་ཀུ་ས་ལི་ཡི་ལུགས། །བོད་ཡུལ་སྒོམ་ཆེན་རྣམས་ཀྱི་མཚམས་ཀྱི་ལུགས། །དབང་རྟུལ་དད་པའི་རྗེས་འབྲང་ཞེས་བྱའོ། །དེ་ནས་དབང་རྣོན་ཆོས་ཀྱི་རྗེས་འབྲང་ནི། །མཁས་པ་པཎྜི་ཏ་ཡི་ཉམས་ལེན་ཏེ། །དབང་ལུང་མང་ཐོབ་དེ་རྣམས་ཕྱག་ལེན་ཤེས། །ཐོབ་དང་ཤེས་པ་ཙམ་དུ་མི་བཞག་པར། །གསར་རྙིང་རྒྱུད་སྡེ་ཀུན་ལ་ཉམས་ལེན་བྱེད། །ཉམས་སུ་བླངས་ཙམ་མ་ཡིན་རྟགས་ཐོན་བྱེད། །རྒྱུན་དུ་ཉམས་ལེན་གཅིག་ཏུ་མ་ངེས་ཏེ། །སྒྲུབ་པ་གང་ཡིན་ཕྱག་ལེན་ཐེབས་ངེས་བྱེད། །དེ་ཡང་རབ་འབྲིང་ཐ་མ་གསུམ་ཡིན་ཏེ། །རབ་ནི་ཤེས་རབ་འབྱོར་པ་གཉིས་ཀ་འཛོམ། །སྒྲུབ་པའི་རྫས་དང་སྒྲུབ་གཡོག་ཐབས་མི་ཆག །རྙིང་མ་ཡིན་ན་སྒྲུབ་ཆེན་རྒྱས་པ་ནི། །སྔགས་རྒྱུན་མ་གཏོགས་ཐམས་ཅད་གཞུང་ལྟར་བྱ། །དུས་ནི་བཞིའམ་གསུམ་ནམ་ཉིན་མཚན་གཉིས། །གཞུང་བསྲང་སྒྱུ་དེ་མིན་ཛབ་ཀྱི་བསྙེན་པ་བྱ། །ཧ་ཅང་མི་བསྲིང་ཟླ་བ་གཅིག་ཙམ་སྟེ། །ཕྱི་ཡི་རྒྱལ་ཐོ་སྒོ་བྱང་མི་བསྡུ་བཞག །ནང་གི་དཀྱིལ་འཁོར་བསྡུ་ཆོག་གཞུང་བཞིན་བྱ། །གསར་མ་
ཡིན་ན་དཀྱིལ་འཁོར་ས་ཐིག་སོགས། །དཀྱིལ་འཁོར་ལས་རིམ་སྒྲུབ་མཆོད་བཞིན་དུ་བྱ། །ཟླ་གཅིག་ཙམ་ལས་བདག་མདུན་བསྙེན་སྒྲུབ་བྱ། །དེ་ནས་མཇུག་ཏུ་བདག་འཇུག་བླང་བར་བྱ། །དེ་ནས་རྗེས་ཆོག་དཀྱིལ་འཁོར་བསྡུ་ཆོག་བྱ། །གསར་མ་རྙིང་མའི་སྒྲུབ་པ་གང་ཡིན་ཀྱང་། །མཇུག་དེར་ལས་བཞིའི་སྦྱིན་སྲེག་རྒྱས་པར་བྱ། །དེ་ཡིས་ལྷག་ཆད་ཁ་བསྐང་དངོས་གྲུབ་འབྱུང་། །དེ་ནས་ཞག་བདུན་ཙམ་ལ་སྤྲོས་མེད་བྱ། །ལུས་དཀྱིལ་བསྒོམ་ལ་རྩ་རླུང་འཁྲུལ་འཁོར་སྦྱང་། །དེ་ནས་ཞག་བདུན་ཙམ་ལ་ངལ་བསོ་ཚུལ། །ཤིན་ཏུ་སྤྲོས་མེད་སེམས་ངོ་ཁོ་ན་སྐྱོང་། །དེ་ཡིས་རྙིང་ལུགས་ཡོ་ག་རྣམ་གསུམ་དང་། །གསར་མའི་ལུགས་ཀྱི་སྤྲོས་བཅས་སྤྲོས་མེད་དང་། །ཤིན་ཏུ་སྤྲོས་མེད་བསྐྱེད་རྫོགས་ཉམས་ལེན་ཚང་། །སྐབས་དེར་བསྔོ་བ་སྨོན་ལམ་རྒྱ་ཆེར་བྱ། །དེ་ནས་ཡང་ནི་དཀྱིལ་འཁོར་གཞན་ཞིག་ལ། །སྔ་མ་བཞིན་དུ་ཐམས་ཅད་རྫོགས་པར་བྱ། །དེ་བཞིན་ཡི་དམ་ཆོས་སྐྱོང་མཐོ་ཐོག་ལ། །བསྐྱེད་རྫོགས་སྒྲུབ་པ་ཉམས་ལེན་ལག་ཏུ་ལེན། །རྒྱུད་སྡེ་ཆེན་པོ་ཀུན་གྱི་བསྙེན་སྒྲུབ་ཐེམ། །རྫོགས་རིམ་ཟབ་མོའི་ཁྲིད་ཀུན་ཞོར་ལ་རྫོགས། །ཤི་
ཡང་འགྱོད་མེད་སྐལ་པ་བཟང་པོ་ཡིན། །མ་ཤི་མ་འོངས་སློབ་མ་བྱུང་ན་ཡང་། །སྒྲུབ་པ་ཕྱག་ལེན་བྱིན་བརླབས་བརྒྱུད་པར་ལྡན། །སྒྲུབ་པའི་བསྟན་ལ་ཕན་པ་ཆེན་པོ་ཡིན། །འབྲིང་ནི་སྒྲུབ་ཆེན་རྫས་དང་ཡོ་བྱད་དཀོན། །རས་བྲིས་ཚོམ་བུ་བུམ་པ་གཏོར་མ་སོགས། །སྒྲུབ་ཕྲན་སོ་སོའི་གཞུང་ནས་འབྱུང་བ་ལྟར། །སྒྲུབ་ཆེན་གྱི་ནི་ཁ་སབ་མི་བྱེད་པར། །ལས་བྱང་སྒྲུབ་གཞུང་གཉིས་པོ་རྐྱང་པར་བྱེད། །གསར་མ་ཡིན་ན་བདག་བསྐྱེད་ཁ་རྐྱང་ལ། །ཐུན་བཟུང་བསྙེན་པ་བྱ་བ་མ་གཏོགས་པ། །ཡི་དམ་རིགས་ལ་དཀྱིལ་འཁོར་མི་དགོས་སོ། །སྒྲུབ་པ་རྫོགས་ནས་སྤྲོས་མེད་ལ་སོགས་ཀྱི། །ཉམས་ལེན་བྱ་ཚུལ་གོང་དང་མཚུངས་པ་ཡིན། །ཐ་མ་དབང་ལུང་མན་ངག་ཀུན་ཐོབ་ཀྱང་། །བློ་སྣ་མི་མང་གཅིག་ལ་དྲིལ་འདོད་པས། །སྣ་མང་མི་བསྒྲུབ་སྒྲུབ་པ་གཅིག་ལ་འབད། །ལྷ་གཅིག་སྔགས་གཅིག་སྒྲུབ་ཐབས་གཅིག་གྱུར་ཀྱང་། །སྒྲུབ་པ་གཅིག་ལ་ཟླ་གཅིག་ཕན་མི་བསྲིང་། །དེ་ཉིད་རྫོགས་བཅུག་སྦྱིན་སྲེག་བསྔོ་སྨོན་བྱ། །སླར་ཡང་སྤྲོས་མེད་བྱེད་ཚུལ་གོང་དང་འདྲ། །དེ་ནས་སྤྲོས་བཅས་སྤྲོས་མེད་སྒྲུབ་པ་དེ། །ལན་གྲངས་དུ་མར་
ཝིག་ནས་བསྒྲུབ་པ་སྟེ། །ཇི་ལྟར་སྐལ་པ་མེད་པའི་མི་ཡིན་ཀྱང་། །ལན་བདུན་ལན་དགུ་ལ་སོགས་ཝིག་གྱུར་ན། །མི་འགྲུབ་མི་སྲིད་གསུངས་པའི་གནད་ཡིན་ཏེ། །དེ་ལ་སྤོགས་པའི་ཆོ་ག་ཞེས་བྱའོ། །སྒྲུབ་པ་གཅིག་ལ་ཡུན་རིང་བསྲིང་གྱུར་ན། །ལུས་ངག་ཡིད་གསུམ་ཇེ་ལྷོད་བཏང་སྙོམ་འགྱུར། །རྟགས་ཀྱང་མི་གསལ་བགེགས་ཀྱང་འཇུག་ཉན་ཆེ། །བསྙེན་སྒྲུབ་དལ་དྲག་ཡུན་ཐུང་བྱས་པ་ཡིས། །སུན་པར་མི་འགྱུར་སྤྲོ་བ་འཕེལ་བར་འགྱུར། །སྤྲོས་བཅས་སྤྲོས་མེད་རེས་མོས་བྱས་པ་ཡིས། །གཅིག་བོགས་གཅིག་གིས་ཐོན་ཏེ་ཉམས་རྟོགས་འཕེལ། །དེ་རྣམས་ཆོས་ཀྱི་རྗེས་འབྲང་མཁས་པའི་ལུགས། །དེ་ལྟར་མཚམས་ནི་བྱེད་པའི་དུས་དག་ཏུ། །སྒྲུབ་ཆེན་ཡིན་ན་རྒྱལ་ཐོ་ཕན་ཆད་དང་། །སྒྲུབ་ཕྲན་ཡིན་ན་དྲིལ་བུའི་སྐད་ཐོས་ཕན། །སོང་ན་བར་ཆད་འོང་བས་ཤིན་ཏུ་འཛེམ། །སྒྲུབ་ཆེན་སྒྲུབ་ཕྲན་སོང་བའི་བར་སྐབས་སམ། །རྫོགས་རིམ་སྤྲོས་མེད་སྒོམ་པའི་དུས་དག་གམ། །སྒྲུབ་རྫས་དཀྱིལ་འཁོར་ལ་སོགས་མེད་པ་ཡི། །བདག་བསྐྱེད་ཁོ་ན་བསྙེན་པའི་དུས་སྐབས་སུ། །ཕ་མ་མཆེད་གྲོགས་ཡོན་བདག་ལ་སོགས་པ། །ནའམ་ཤི་འམ་
མི་འགྲོ་ཀ་མེད་ན། །མུན་རུབ་འགྲོ་ནས་ཐོ་རངས་ཚུར་འཁོར་བ། །དེ་འདྲ་བྱེད་པའི་ཕྱག་སྲོལ་སྔར་ནས་གདའ། །དེ་ཚེ་ཕྱི་རྒྱབ་མི་ལ་མི་གཏུགས་ཤིང་། །ངག་མཚམས་ཡིན་ན་ཁོ་རང་དེ་མ་གཏོགས། །གཞན་ལ་ངག་ནི་བསྲེ་བར་མི་བྱ་སྟེ། །འགྲོ་ཁ་རང་གི་ཉལ་ས་མལ་གོས་ནང་། །དཔེ་ཆ་སྐུ་འདྲ་རང་གི་ཕྲེང་བ་བཞག །སྒྲུབ་ཁང་བདག་བསྐྱེད་གཞལ་ཡས་ཁང་དུ་བསྒོམ། །གོས་དང་མལ་ས་བདག་བསྐྱེད་གཙོ་བོར་བསྒོམ། །དེ་ཉིད་མི་བསྡུ་རྟག་ཏུ་བཞུགས་པར་དམིགས། །དེ་ཡང་རང་ཉིད་ཡིན་པའི་ང་རྒྱལ་བསྐྱེད། །དེ་ཡི་ཐུགས་ལས་སྤྲུལ་པའི་གཙོ་རྐྱང་གཅིག་།ཡིན་པར་བསྒོམ་ནས་རང་ཉིད་འགྲོ་བ་ཡིན། །དབང་དང་བྱིན་རླབས་འཕོ་འདེབས་གང་དགོས་རུང་། །ཚུར་ལ་འཁོར་ནས་སྒྲུབ་ཁང་དཀྱིལ་འཁོར་གྱི། །སྒོ་ནས་ཞུགས་ཏེ་ཉལ་སར་འདུག་པའི་དུས། །བདག་བསྐྱེད་གཙོ་བོའི་ཐུགས་ཀར་བདག་ཞུགས་ནས། །དབྱེར་མེད་གྱུར་དམིགས་སྒྱུ་ཡི་དམ་ལྷ་སྔགས་ཤམ། །ཡིག་བརྒྱ་སྦྱར་ལ་དེ་ནུབ་ཅུང་ཟད་བཟླ། །ཕྱི་ནང་བསྐང་བ་རྒྱས་པ་ཞིག་འདོན་ནོ། །ལར་ནི་བསྙེན་སྒྲུབ་བྱེད་པའི་མཚམས་ལ་ནི། །ཚུར་ལ་མི་ཡིས་
མཐོང་ན་བུག་པ་ཟེར། །ཕར་ལ་མཐོང་ན་རལ་བ་ཞེས་བྱའོ། །ཕར་ལ་མཐོང་བ་ཐུ་བ་ཡིན་ནོ་ཟེར། །ངག་མཚམས་དམ་ན་རྡུལ་བྱུང་མ་གཏོགས་པ། །ངག་གཏམ་ཡང་ནི་མི་བྱ་མཆོག་ཏུ་ཤིས། །མཚམས་གཡོག་ཡི་གེ་མི་ཤེས་ངག་གཏམ་བྱ། །ཁ་ནས་རླངས་པ་ཤོར་བར་མ་གྱུར་ན། །ཚིག་འབྲུ་གསལ་ཡང་ངག་མཚམས་གོ་ཆོད་གསུངས། །མཚམས་གཡོག་དེ་ཡིས་ངག་གཏམ་མི་གོ་ན། །ཕྱེད་ངག་ཅེས་བྱ་སོ་ནི་བསྒྲིགས་ནས་གཏམ། །དེས་ཀྱང་ངག་བཅད་ཕྱོགས་གཏོགས་གོ་ཆོད་རྩི། །སྤྱིར་ནི་བསྙེན་སྒྲུབ་གཙོ་བོར་སྟོན་པ་ན། །མི་ཚིག་བར་མ་ཆོད་པར་བཟླ་གསུངས་པས། །བསྙེན་པའི་གྲངས་ཚད་ངག་བཅད་བསྙེན་པ་ཡིན། །ངག་མ་ཆོད་ན་དེ་ཡི་སུམ་འགྱུར་དགོས། །དེ་ཕྱིར་རྙིང་ལུགས་ངག་ནི་འཁོར་ཡུག་གཅོད། །གསར་མར་ཐུན་མཚམས་ངག་ནི་བཏང་བྱ་སྟེ། །ཆག་མེད་ཐུགས་དམ་རིམ་པ་གཞན་རྣམས་དང་། །ཞལ་བསྒོས་ལ་སོགས་གང་དགོས་བྱེད་སྲོལ་སྣང་། །རྫོགས་རིམ་རྩ་རླུང་སེམས་ངོ་སྐྱོང་སོགས་ཀྱི། །མཚམས་ནི་དམ་ཡང་ངག་གཅོད་དགོས་པ་མིན། །དེ་ནས་མཚམས་ཀྱི་དམ་བཅའ་རྫོགས་པ་དང་། །འཛོམ་ན་སྦྱིན་
སྲེག་ལས་བཞི་རྒྱས་པར་བླུགས། །རྒྱལ་ཐོ་སྒོ་བྱང་དམ་ཡིག་ཡོད་ན་བསྡུ། །བསྔོ་བ་སྨོན་ལམ་བཀྲ་ཤིས་རྒྱས་པར་བྱ། །མི་རྣམས་ངོ་གཏུགས་རབ་ནི་ཞག་བདུན་དང་། །འབྲིང་ལ་ཞག་ལྔ་ཐ་མ་གསུམ་མམ་གཅིག །ཐག་རིང་མི་འགྲོ་གནས་སྲུང་ཚུལ་དུ་འདུག །དེ་ནས་རང་གཞན་དོན་དུ་གར་དགོས་འགྲོ། །དེ་ཡིས་མཚམས་ཀྱི་ཞལ་གདམས་ཧྲག་བསྡུས་ཚང་། །ཞིབ་པར་གོལ་ས་གཅོད་དང་གེགས་སེལ་དང་། །བོགས་འདོན་རྟགས་ཡིག་སྤྱི་ལྟར་རིམ་གྱིས་བཤད། །དེ་སྐད་ཤིང་སྦྲུལ་གླང་ཟླའི་ཡར་ཚེས་ཚུ་ལ། །བླ་མ་བརྩོན་འགྲུས་རྒྱ་མཚོས་བསྐུལ་བའི་ཕྱིར། །རཱ་ག་ཨ་སྱས་ཐུན་མཚམས་གསུམ་ལ་སྨྲས། །ཡི་གེ་པའང་བཱིརྱ་སཱ་ག་ར། །བློ་ཆུང་འགའ་ལ་ཕན་ཐོགས་རྒྱ་ཆེར་ཤོག །ལེའུ་བཅུ་དྲུག་པའོ་མངྒ་ལཾ།། །།