ལེའུ་བཅུ་བདུན་པ། ཚོགས་རྫོགས་ནད་གདོན་ལམ་དུ་སློང་བའི་ཕྱིར། །ལུས་སྦྱིན་བདག་འཛིན་གཅོད་པའི་སྟ་རེ་ཡོད། །
༼ཙ༽ རི་ཆོས་མཚམས་ཀྱི་ཞལ་གདམས་ལས། ཉལ་ཁ་ཀུ་ས་ལི་ཡི་ཚོགས་སོགས་བདག་འཛིན་གཅོད་པའི་སྟ་སྒྱུ་རེ་བཞུགས་སོ། །ན་མོ་པྲཛྙཱ་པ་ར་མི་ཏ་ཡེ། མཚོ་རྒྱལ་སྤྲུལ་པ་རྟོག་ཚོགས་གཏད་མེད་གཅོད། །ལབ་ཀྱི་སྒྲོན་མའི་ཞབས་ལ་ཕྱག་འཚལ་ནས། །ལུས་སྦྱིན་ཀུ་ས་ལི་ཡི་
ཚོགས་གསོག་བྲི། །གནས་གསུམ་ཌཱཀྐིས་བཀའ་གནང་བྱིན་གྱིས་རློབས། །སྙིང་རྗེའི་དབང་གིས་ས་ཐོབ་སེམས་དཔའ་རྣམས། །སྙིང་རྗེའི་དབང་གིས་རང་ལུས་དངོས་སུ་བཏང་། དཔེར་ན་སྟག་མོར་ལུས་སྦྱིན་ལྟ་བུ་ཡིན། །ས་ཐོབ་མིན་ན་དངོས་སུ་བཏང་མི་ནུས། །ནུས་ཀྱང་མི་རུང་གེགས་སུ་འགྲོ་བར་གསུངས། །དགེ་སྡིག་གང་ཡང་བསམ་པ་གཙོ་ཆེ་བས། །ཡིད་ཀྱིས་སྦྱིན་པར་བསྒོམ་པས་བསོད་ནམས་ཐོབ། །སྦྱིན་པའི་ནང་ནས་ལུས་སྦྱིན་མཆོག་ཡིན་ཏེ། །ལུས་སྲོག་གཉིས་ལས་འཕངས་པའི་ནོར་གཞན་མེད། །གཅོད་ལུགས་ཁོ་ན་ཉམས་སུ་ལེན་པ་ནི། །བདག་འཛིན་བློས་བཏང་གཅོད་དམིགས་ཁོ་ནས་འཐུས། །དེ་ནི་གཙོ་ཆེར་མདོ་ཡི་དགོངས་པ་སྟེ། །རང་ལུས་མི་གཙང་ཤ་ཁྲག་ཕུང་པོ་ཡིན། །འདི་ནི་གཙོ་ཆེར་ལྷ་བསྒོམ་སྔགས་བཟླས་ཤིང་། །ནུབ་མོ་ཉལ་ཁ་གཅོད་དམིགས་བསྒོམ་པའི་ཚེ། །རང་ལུས་ཕུང་ཁམས་ལྷ་ཡི་དཀྱིལ་འཁོར་དུ། །ཡིན་པར་ངོ་སྤྲོད་གསལ་བཏབ་ཡེ་ཤེས་བསྟིམ། །དེ་ཉིད་གཏུབས་ནས་སྦྱིན་པ་མི་འགལ་གནད། །ཐ་མལ་ལུས་དབུས་དབུ་མའི་རྩ་ཡི་ནང་། །རང་གི་རྣམ་ཤེས་ཐིག་ལེ་དཀར་པོ་དེ། །ལུས་ལྷ་
དབང་ལྷ་ཚེ་དང་བསོད་ནམས་དང་། །བསྙེན་སྒྲུབ་བྱས་པའི་བྱིན་རླབས་ནུས་མཐུ་རྣམས། །གཅིག་ཏུ་འདུས་པའི་ངོ་བོར་དམིགས་བྱས་ཏེ། །དབུ་མའི་ལམ་ནས་སྤྱི་བོར་རྒྱངས་སེ་འཕོས། །དེ་ཉིད་རྡོ་རྗེ་ཕག་མོའི་སྐུར་གྱུར་ཏེ། །གྲི་གུག་ཚད་པས་ཐོད་པ་སྒར་གྱིས་འཕར། །བྷནྡྷའི་སྣོད་ཆེན་སྟོང་གསུམ་མཉམ་པར་གྱུར། །དེ་ནང་གྲི་གུག་རྩེ་ཡིས་བེམ་རོ་འཕངས། །དེ་ལ་གྲི་གུག་ཚད་ཙམ་བྱས་པ་ཡིས། །ཤ་ཁྲག་དམར་སྟིམ་བྷན་ལྡེམས་སེ་གང་། །ཨོ་ཨཱ༔ཧཱུྃ་གསུམ་བརྗོད་པའི་བྱིན་རླབས་ཀྱིས། །ཡེ་ཤེས་བདུད་ཧཱུཾ། རྩི་དཀར་ལ་དམར་མདངས་ཆགས། །རོ་བརྒྱ་ནུས་པ་སྟོང་དང་ལྡན་པར་བསམ། །མགྲོན་བསྡུས་དབང་སྡུད་དམིགས་པ་མི་བྱ་བར། །མགྲོན་རིགས་ཐམས་ཅད་དྲན་རྫོགས་དམིགས་བྱས་ཏེ། །རང་ལས་སྤྲུལ་པའི་མཁའ་འགྲོ་གྲངས་མེད་ཀྱིས། །བྷན་དྷའི་སྐྱོགས་ཀྱིས་བདུད་རྩི་དེ་ལས་བཅུས། །ནམ་མཁའི་དབྱིངས་སུ་རྩ་བརྒྱུད་བླ་མ་མཆོད། །དེ་སྒྱུ་འོག་ཡི་དམ་དེ་འོག་མཁའ་འགྲོ་མཆོད། །དེ་འོག་ཆོས་སྐྱོང་དེ་འོག་འཇིག་རྟེན་སྐྱོང་། །ས་སྟེང་ས་འོག་གནོད་བྱེད་གདོན་གྱི་ཚོགས། །རིགས་དྲུག་སེམས་ཅན་རང་རང་གར་ཡོད་
སར། །སྤྲུལ་པའི་མཁའ་འགྲོས་སོ་སོར་ཚིམ་པར་མཆོད། །དེ་ནི་ཀུ་ས་ལི་ཡི་ཚོགས་གསོག་སྟེ། །རང་ལུས་ཚོགས་མཆོད་འབུལ་བ་སྔགས་ཀྱི་ལུགས། །ཁྲ་འགྱེད་ཅེས་བྱ་ལུས་ཚོགས་བསྡུས་པའང་ཡིན། །ཆོས་སྐྱོང་དྲག་པོ་སྒྲུབ་པས་མ་ནོན་ཚེ། །མགྲོན་གྱི་གཙོ་བོར་ཆོས་སྐྱོང་དེ་དམིགས་ནས། །དེ་ལྟར་བསྒོམས་པས་ཆོས་སྐྱོང་གནད་ལ་ཕེབས། །འཁུ་ལྡོག་ཞི་བར་གུ་རུ་པདྨ་ཡིས། །མ་ནིང་སྒྲུབ་པའི་གཞུང་ལས་གསུངས་པ་ཡིན། །གོང་གི་དམིགས་པའི་རྗེས་སུ་རྣམ་ཤེས་ནི། །སྤར་ཝིག་བྱས་ན་ལེགས་ཤིང་མ་བྱས་ཀྱང་། །གོང་གི་བདུད་རྩིའི་ལྷག་མ་དེ་ཉིད་ནི། །ཤ་རི་ཁྲག་མཚོ་རུས་པའི་གྲམ་ཁྲོད་བསམ། །དེ་ཡང་སྦེ་སྣུམ་རླངས་པ་མ་ཡོལ་བར། །ཕྱི་ཤ་གཟུགས་དྲུག་ནང་ཆེ་བུ་དགུ་རྣམས་། །རེ་རེ་ལའང་བརྒྱ་སྟོང་གྲངས་མེད་འཕྲོ། །གང་ལ་གང་འདོད་ལྷ་འདྲེས་ཟོས་ཁྱེར་བསྒོམ། །ལྷག་མ་ཉལ་ཉིལ་དབང་ཆུང་རྣམས་ཀྱིས་ཐོབ། །དེ་ནི་དམར་འགྱེད་ཞེས་བྱ་མདོ་ཡི་ལུགས། །རྣམ་ཤེས་སྤར་རམ་དེ་ཡི་ལྷག་མ་ལ། །དཀར་གསུམ་མངར་གསུམ་བདུད་རྩིས་འཇིག་རྟེན་གང་། །དམར་ལ་མི་དགྱེས་ལྷ་འདྲེ་ཐམས་ཅད་ཚིམ། །ཕུད་
ཀྱིས་སངས་རྒྱས་བྱང་སེམས་བྱ་སྤྱོད་ལྷ། །ལྷག་མས་གདོན་བགེགས་རིགས་དྲུག་བར་དོ་ཚིམ། །དེ་ནི་དཀར་འགྱེད་རྩ་བ་མདོར་བསྡུས་ཡིན། །འདི་ལ་ཕཊ་སྒྲ་མ་གཏོགས་འདོན་མི་དགོས། །རྣམ་ཤེས་སྤར་བ་གོང་དང་མཐུན་པ་ལ། །གནོད་བྱེད་ལུས་གདོན་ནད་བདག་ཕུང་པོར་བསྟིམ། །རང་གི་ཐུགས་ལས་སྤྲོས་པའི་ཌཱ་ཀི་ནི། །བྱ་རྒོད་ཁྱུང་དང་ཁྭ་ཏ་འུག་པའི་གདོང་། །ཕག་ཁྱི་ལྕེ་སྤྱང་སྟག་གི་གདོང་ཅན་ཚོགས། །བྷནྡྷའི་སྐྱོགས་ཀྱིས་བདུད་རྩིའི་རྒྱ་མཚོར་བཅས། །ནམ་མཁའི་དབྱིངས་སུ་རྒྱ་བོད་གྲུབ་ཐོབ་མཆོད། །དེ་འོག་འཁོར་ལོ་སྡོམ་པའི་ལྷ་ཚོགས་མཆོད། །དེ་འོག་དཔལ་ལྡན་མགོན་པོ་ཕྱག་བཞི་པ། །སྐུ་ལྔ་མགོན་པོ་ཡབ་ཡུམ་འཁོར་གྱི་ཚོགས། །ནག་པོ་སྟོང་ཚོགས་ཤ་ཟ་འབུམ་སྡེ་དང་། །མ་མོ་བྱེ་བ་གནོད་སྦྱིན་ཁྲི་ཡི་ཚོགས། །ཁྲབ་ཆེན་བྱེ་བ་དུང་ཕྱུར་ཐམས་ཅད་མཆོད། །དེ་ནས་ལན་ཆགས་གདོན་བགེགས་རིགས་དྲུག་མཆོད། །འདི་ནི་མགོན་པོའི་རྟེན་གཏོར་བཅས་པའི་དུས། །ཟླ་ཤས་རྒྱུན་བསྙེན་བྱས་པའི་རྨི་ལམ་དུ། །འདི་ལྟར་བསྒོམ་པས་འཆི་ངེས་ནད་པ་ཡང་། །ལོ་ནི་བཅུ་གཉིས་ཚེ་བསྲིང་ནུས་ཞེས་
འབྱུང་། །འཁྲུལ་བའི་རྨི་ལམ་བདེན་པ་མ་མཆིས་ཀྱང་། །དྲུང་ཆེན་མཁའ་སྤྱོད་པ་ཡིས་མཛད་པ་ཡི། །མགོན་པོའི་ཚོགས་སྐབས་ནད་པར་བསྟབ་པ་ཡི། །དམིགས་རིམ་ཡི་གེ་མེད་པའི་སྙན་བརྒྱུད་ཞིག །རང་གི་ཕ་མེས་བརྒྱུད་ལ་ཡོད་དང་མཐུན། །བསྒོམ་པས་གཞན་ལ་ཕན་ཐོགས་མྱོང་བས་གྲུབ། །འདིར་ནི་དོན་བསྡུས་ཉུང་ངུ་ཚིག་གིས་བཀོད། །དེ་མིན་གོང་གི་དམིགས་རིམ་ཚན་གསུམ་པོ། །གར་ཕྱིན་གར་འགྲོ་རྣམས་སུ་བསྒོམསབྱས་པས། །གཉན་ཐོག་བརྒྱ་རྩ་དོན་གྱིས་ཆོད་འགྱུར་ཞིང་། །དང་པོ་དབང་སྡུད་དམིགས་པ་མ་བྱས་པས། །ཚར་ཚད་སློང་ཚད་བསྒུགས་ནས་སྡོད་མི་དགོས། །རྗེས་གཅོད་དམིགས་པ་མི་དགོས་འགྲོ་བས་ཆོག །དེ་སྐད་གཅོད་མཁན་སློབ་དཔོན་རྣམས་ཀྱིས་གསུངས། །དེ་ཡི་མིང་ལ་གཉན་འབྲེལ་ཞེས་སུ་གྲགས། །ངེས་པ་མེད་པས་ཚར་སློང་རིམ་གྱིས་འབྱུང་། །བར་ཆད་སེལ་ཞིང་ཉམས་རྟོགས་འཕེལ་བའི་མཆོག །རང་ཉིད་གློ་བུར་ནད་ཀྱིས་བཏབ་གྱུར་ཏེ། །ཆོ་ག་ཆོས་སྤྱོད་འདོན་པར་མི་ནུས་སྐབས། །དམིགས་པ་དེ་དག་ཡིད་ཀྱིས་བརྒྱ་ཚར་བསྒོམ། །འདོན་པ་མི་དགོས་གྲེ་ཁུང་ཕཊ་བརྗོད་ཙམ། །ཞག་རེ་ཙམ་
ནས་འཕྲལ་དུ་བདེ་བ་ནི། །ལན་གྲངས་དུ་མར་མྱོང་བས་གྲུབ་པ་ཡིན། །ནད་པ་གཞན་ལ་དམིགས་པ་བྱེད་པའི་ཚེ། །བདག་ལུས་གཞན་ལུས་བསྲེ་ནས་རྣམ་ཤེས་སྤར། །དེ་ནི་ཕན་ཐོགས་ཆེ་སྟེ་རང་ལ་གནོད། །རང་ཉིད་ལུས་པོ་མི་བདེ་མྱོང་བས་གྲུབ། །སོ་སོར་སྤར་ནས་རྣམ་ཤེས་གཉིས་བསྲེ་འབྲིང་། །སོ་སོར་སྤར་ཞིང་སོ་སོར་མཆོད་སྦྱིན་གྱིས། །རང་ལ་གནོད་པ་མེད་པ་མྱོང་བས་གྲུབ། །རང་ལ་ཉམས་རྟོགས་ཡོད་མེད་དེ་དང་བསྟུན། །གློ་བུར་དག་ཏུ་སེར་བས་བྲབ་བྱུང་ན། །ས་རྡོ་རི་བྲག་ཕག་མོ་དམར་མོར་བསྒོམ། །སྐུ་ལས་མེ་འབར་སེར་བ་སེར་སྤྲིན་བསྲེག །སྣང་སྲིད་ཐམས་ཅད་མེ་རུ་འབར་བར་བསྒོམ། །མ་ཐུབ་གནམ་ས་གཉིས་པོ་སྟེང་འོག་བརྗེ། །ས་གཞི་གདུགས་ཕུབས་རི་རྣམས་རྩེ་ཐུར་བསྟན། །ཉི་ཟླ་སྐར་གསུམ་འོག་ནས་ཡར་འཆར་བསམ། །དམིགས་པ་གསལ་ན་མི་ཐུབ་སྲིད་མི་འགྱུར། །ཐོག་སྲུང་རང་གི་སྤྱི་བོའི་ནམ་མཁའ་ལ། །གསེར་གྱི་འཁོར་ལོ་རྩིབས་སྟོང་ལྡན་པ་ཡི། །ལྟེ་བར་ཤཱཀ་ཐུབ་རྩིབས་སྟོང་སངས་རྒྱས་སྟོང་། །དེ་ནི་སྟེང་ཐོག་སྲུང་བའི་དམིགས་པ་ཟབ། །རང་གི་རྐང་འོག་གཡུ་ཡི་
གྲོད་པ་ཞིག །ནེམ་ནེམ་མནན་པར་དམིགས་པས་འོག་ཐོག་སྲུང་། །ཕྱོགས་མཚམས་རྡོ་ར་ཁྲོ་བོ་མེ་རིའི་གུར། །བསྒོམས་པས་བར་ཐོག་སྲུང་བར་འགྱུར་བ་ཡིན། །ནི་ནཱ་ག་ཛ་མུན་ཏི་ཨཱ། །ཨོ་རྒྱན་རྗེ་དང་རང་བྱུང་རྡོ་རྗེའི་ལུགས། །དྲན་ཆོག་ཐོག་སྔགས་ལན་བདུན་བརྗོད་པས་ཐུབ། །ཤོག་སྔོན་གསེར་གྱིས་བྲིས་ལ་སྔགས་དེས་སྔགས། །སྦྲ་གུར་ཁང་པ་མི་སོགས་བཏགས་པས་ཐུབ། །སྒར་སོགས་རྣམ་གཡེང་མི་ཁོམ་པ་ཡི་སྐབས། །ཧ་ཅང་གལ་ཆེན་མིན་པའི་ཆར་ཞུས་བྱུང་། །ཀླུ་སྨན་སྔགས་པ་མཚོ་དང་ཆུ་མིག་བསྐུར། །དཀར་གཏོར་བསྔོས་ཤིང་དཀོན་མཆོག་བདེན་སྟོབས་བརྗོད། །ཀླུ་དང་ཡུལ་ལྷ་ཆར་འབེབས་ཕྲིན་ལས་བཅོལ། །དངོས་གཞི་གོང་ལྟར་ལུས་སྦྱིན་དམིགས་པའི་རྗེས། །རང་གི་པགས་པས་འཛམ་གླིང་ཁྱབ་པའི་སྟེང་། །ཀླུ་དང་གཞི་བདག་ཆར་ལ་དབང་བ་ཀུན། །ཁྲོམ་ཚོགས་བཞིན་དུ་ཕག་མོའི་འོད་ཀྱིས་བསྡུས། །དེ་ལ་དཀར་འགྱེད་དམར་འགྱེད་ལན་མང་བྱས། །ཕག་མོས་ཟིལ་མནན་ཆར་པའི་ལས་ལ་བསྐུལ། །ཀླུ་དང་ས་བདག་ལྷ་འདྲེ་ཐམས་ཅད་ཀྱི། །བུ་ག་དགུ་ནས་ཆར་ཞོད་ན་བུན་འཕྱུར། །འཇིག་རྟེན་ཐམས་ཅད་ཆུ་
ཡི་རང་བཞིན་བསམ། །ཞག་གསུམ་མི་འགོར་མྱུར་དུ་འབབ་པར་བཤད། །དེ་འདྲ་ལན་མང་མྱོང་བས་གྲུབ་པ་ཡིན། །ཆར་དམིགས་མང་ཡང་འདི་ཉིད་ཁོ་ན་ཟབ། །ཆར་བཀག་དམིགས་པའི་རྩ་བ་དེ་ཉིད་ལ། །ཕག་མོས་ཟིལ་མནན་ཆར་བཀག་ལས་ལ་བསྐུལ། །སྣང་སྲིད་ལྷ་འདྲེ་གཞི་བདག་ཐམས་ཅད་ཀྱི། །བུ་ག་དགུ་ནས་མེ་དཔུང་འུ་རུ་རུ། །གནམ་ས་མེ་འབར་སྤྲིན་དང་ཆར་བསྲེག་བསམ། །གོང་གི་ལུས་སྦྱིན་དམིགས་རིམ་གསུམ་གྱི་རྗེས། །མགྲོན་རིགས་ཐམས་ཅད་སེམས་ཀྱིས་བྱས་པ་བས། །བཀུག་ཀྱང་མ་བཀུག་འོང་བ་མེད་པའི་ཕྱིར། །གཤེགས་གསོལ་མི་དགོས་མི་དམིགས་ངང་ལ་བཞག །ནད་པ་ཡིན་ན་རང་དང་ནད་པ་གདོན། །གསུམ་ཀ་གཅིག་བསྲེས་ནམ་མཁའ་གཅིག་ཏུ་བསྲེས། །ནམ་མཁས་གར་ཁྱབ་སེམས་ཀྱིས་ཁྱབ་པ་དང་། །སེམས་ཀྱིས་གར་ཁྱབ་ཆོས་སྐུས་ཁྱབ་པ་ཡི། །ལྟ་བའི་གདེང་བྱས་ཉམས་ལེན་ངང་ལ་བཞག །དེ་ནི་བཀའ་བརྒྱུད་ལུགས་ཀྱི་བསྲེ་བ་སྟེ། །བསྲེ་བ་ཞུ་ཞེས་ཟེར་མཁན་མང་སྲོལ་ཡོད། །རང་གི་འོག་རྟ་གྲྭ་ཁལ་གོད་དོགས་ན། །དུད་འགྲོ་ཤ་མེད་ཀེང་རུས་སྐམ་པོ་ལ། །བུ་ག་
དགུ་ནས་མེ་སྟག་འཕྲོ་བར་དམིགས། །དེ་ལ་ལྷ་འདྲེས་མི་འཚེ་སྲུང་བའི་མཆོག །ནད་པ་ལ་སོགས་བྱིན་རླབས་བྱེད་པའི་ཚེ། །རང་ཉིད་སྐད་ཅིག་དམ་པ་རྒྱ་གར་གསལ། །སྐུ་དང་ཕྱག་ལས་ཡེ་ཤེས་མེ་མཆེད་པས། །ནད་པའི་ལུས་དང་ནད་དང་གདོན་ཀུན་བསྲེག །སྟོང་པར་གྱུར་རྗེས་ཁོ་ལ་རིག་པ་གཏད། །ཉམས་ལེན་སྐྱོང་བ་གཅོད་ཀྱི་བྱིན་རླབས་ཡིན། །དེ་ལྟར་ཀུ་ས་ལི་ཡི་ཚོགས་གསོག་འདི། །བསོད་ནམས་ཚོགས་ཆེན་རྫོགས་པའི་ཐབས་ཟབ་ཅིང་། །རི་ཁྲོད་གསར་པ་གཉན་ས་ལ་སོགས་སུ། །འདི་ཉིད་མེད་ན་ལྷ་འདྲེས་སྡོད་མི་བཅུག །ཏིང་འཛིན་དྲོད་ཉུལ་ཉམས་ཚད་ཆོ་འཕྲུལ་སྟོན། །འདི་ཡོད་ས་ནོན་ལྷ་འདྲེའི་སྟོངས་གྲོགས་བྱེད། །ནད་གདོན་ཆོ་འཕྲུལ་བྱུང་ཡང་གྲོགས་སུ་འགྲོ། །རི་༈ ཁྲོད་འགྲིམ་ལ་འདི་ཉིད་མེད་ཐབས་མེད། །དེ་ཕྱིར་རི་ཆོས་འདི་ཡི་རྒྱབ་ཆོས་སུ། །ཀུ་ས་ལི་ཡི་རྣལ་འབྱོར་ཨ་རཱ་གས། །རྟ་ལོ་ཐ་སྐར་ཟླ་བའི་ཚེས་བཞི་ཡི། །གུང་གི་ཐུན་ལ་ཇི་ལྟར་སྨྲས་པ་རྣམས། །གཅིག་པུར་སྡོད་འདོད་ཆེ་བའི་བརྩོན་འགྲུས་ཀྱིས། །མི་སྐབས་སེམས་རྩ་བྲེལ་ཡང་འབད་ནས་བྲིས། །ཕྱི་རབས་རི་ཁྲོད་འགྲིམ་པའི་ཉམ་ཆུང་འགར། །
སྙིང་གི་ནོར་མཆོག་འདི་འདྲ་བཞག་ཡོད་དོ། །ཀུ་སུ་ལུ་ཞེས་བྱ་བ་མ་དག་སྟེ། །རྒྱ་གར་སྐད་དུ་ཀུ་ས་ལི་ཞེས་བྱ། །བོད་ཀྱི་སྐད་དུ་འདུ་ཤེས་གསུམ་པ་ཟེར། །བཟའ་བཏུང་འདུ་ཤེས་ཆུ་གཅིན་འདོར་བ་དང་། །གཉིད་པ་གསུམ་པོ་དེ་ཉིད་མ་གཏོགས་པ། །བྱ་བ་ཐམས་ཅད་སྤངསནས་ཏིང་འཛིན་བསྒོམ། །དེ་ལ་དེང་སང་ཀུ་སུ་ལུ་པར་གྲགས། །རྒྱ་གར་ཀུ་ས་ལི་པ་ཆེ་ཆུང་གཉིས། །བོད་དུ་འདས་ལོག་ཀུ་སུ་ལུ་པ་སྟེ། །དོན་ལ་བྱ་བཏང་རི་ཁྲོད་བཟུང་ཚད་ཡིན། །ཀུ་སུ་ལུ་ཞེས་བྱ་བའི་སྒྲ་དོན་ནོ། །ལེའུ་ལྕི་བཅུ་བདུན་པའོ་མངྒ་ལཾ།། །།