ལེའུ་བཅོ་བརྒྱད་པ། བླ་མ་མཆེད་གྲོགས་སྦྱིན་བདག་ཚེ་བསྲིང་ཕྱིར། །ཚེ་དཔལ་བསྐྱེད་པ་ཚེ་གཡང་ཁ་སྤྲོད་ཡོད།
༼ཚ༽ རི་ཆོས་མཚམས་ཀྱི་ཞལ་གདམས་ལས། རང་དང་བླ་མ་སྦྱིན་བདག་སོགས་ཀྱི་ཚེ་དཔལ་བསྐྱེད་པའི་གདམས་ངག་ཆེ་གཡང་ཁ་སྤྲོད་ཅེས་བྱ་བ་བཞུགས་སོ། །ན་མོ་ཨཱརྱ་ཏཱ་རེ་ཡེ། ཡིད་བཞིན་འཁོར་ལོའི་ཞབས་ལ་ཕྱག་འཚལ་ལོ། །བླ་མ་བརྩོན་འགྲུས་རྒྱ་མཚོས་ཞུས་པའི་ལན། །རང་དང་བླ་གླུ་མ་མཆེད་གྲོགས་སྦྱིན་བདག་སོགས། །གལ་ཆེན་རྣམས་ཀྱི་སྐུ་ཚེ་བསྲིང་བ་དང་། །བར་ཆད་སེལ་ཐབས་རྣམ་པ་མང་ན་ཡང་། །ཡེ་ཤེས་དང་ནི་འཇིག་རྟེན་ཁམས་བཞུགས་
པའི། །ཚེ་འཕེལ་ལྷ་མོ་གཉིས་ཀྱི་གདམས་པ་ཟབ། །རྒྱས་པར་སྤྲོ་ན་སྒྲོལ་དཀར་ཆོ་ག་འདོན། །འབྲིང་དུ་མངོན་རྟོགས་བསྡུས་པར་དམིགས་བཟླས་སྦྱར། །གཏོར་མ་འབུལ་ཞིང་འདོད་གསོལ་བསྟོད་པ་བྱ། །བསྡུས་པར་དམིགས་པ་བསྒོམས་ཤིང་སྔགས་བཟླས་ཏེ། །མཇུག་ཏུ་བསྟོད་པ་འདོད་གསོལ་ཚར་གཅིག་བརྗོད། །དམིགས་པ་རང་ཉིད་སྒྲོལ་དཀར་ཐུགས་ཀ་རུ། །འཁོར་ལོ་རྩིབས་བརྒྱད་ལྟེ་བ་མུ་ཁྱུད་བཅས། །དེ་ནི་འཁོར་རྒྱུ་མེད་དེ་གདན་ཐབས་ཡིན། །ཡིག་འབྲུ་ཐམས་ཅད་ལངས་ཏེ་ཁྲིག་གེར་གནས། །ཐུགས་ཀར་ཐུགས་སྲོག་ཧཱུྃ་ཡིག་དཀར་པོའི་མཐར། གུ་རུ་བཛྲ་དྷརྨ་དྷ་ཏུ་ཛྙཱ་ན་གནྡྷ་མ་མ་་འདིར་སྒྲུབ་པ་པོ་གང་ཡིན་མིང་བཀོད། །ཨཱ་ཡུཛྙཱ་ན་པུཏྟིཾ་ཀུ་རུ། །སྐུ་ཚེ་བསྲིངས་བའི་དོན་དུ་དེ་ལྟར་ཏེ། །༈ སརྦ་པཱ་པཾ་ཤཱནྟཾ་ཀུ་རུ་སོགས། །ནད་གདོན་བར་ཆད་ཞི་ཕྱིར་དེ་སྦྱར་བའི། །ཏཱཾ་ཡིག་མཐའ་རུ་འདོད་གསོལ་དེ་ཡིས་བསྐོར། །དེ་རྒྱབ་ཏྭཾ་གི་གཡས་ཨོ་གཡོན་དུ་ཧཱ། །རྩིབས་བརྒྱད་སྟེང་དུ་སྔགས་ཀྱི་ཡིག་འབྲུ་བརྒྱད། །ཏཱ་རེ་ཏུཏྟཱ་རེ་ཏུ་རེ་ས། བརྒྱད་པོ་མདུན་ནས་གཡས་སུ་སྐོར་དེ་ནས། །དེ་རྒྱབ་མུ་ཁྱུད་རིམ་པ་ལྔ་ཡོད་དེ། །ནང་མར་དབྱངས་ཡིག་
བཅུ་དྲུག་གཡོན་དུ་བཀོད། །དེ་རྒྱབ་གསལ་བྱེད་ཡིག་འབྲུ་གཡས་སུ་བཀོད། །དེ་རྒྱབ་རྟེན་འབྲེལ་སྙིང་པོ་གཡས་སུ་བཀོད། །དེ་རྒྱབ་རྡོ་རྗེ་དཀར་པོ་ནས་འབྲུ་ཙམ། །ཉལ་བའི་འཕྲེང་བས་ཁྲིག་གེར་བསྐོར་བའོ། །དེ་རྒྱབ་མེ་རི་དཀར་པོ་སོར་གཅིག་ཚད། །ཐམས་ཅད་མུ་ཏིག་རྡོག་པོ་བསྒྲིགས་པ་ལྟར། །རང་ཉིད་སྐུ་ལུས་མི་འགྱིང་དྲང་པོར་བསྒོམ། །དེ་ནི་ཚུལ་ཁྲིམས་གཙང་བའི་གདམས་པ་ཟབ། །ཡེ་ཤེས་བསྐྱེད་བསྟིམ་དབང་བསྐུར་ལ་སོགས་པ། །གཞུང་ན་གསལ་ཕྱིར་འདིར་སྨོས་མ་དགོས་སོ། །རང་གི་སྐུ་ཡི་འོད་ཟེར་ལས་གྲུབ་པའི། །འཁོར་ལོ་དཀར་པོ་ཡངས་ཤིང་རྒྱ་ཆེ་བ། །རྩིབས་བཅུ་ཕྱོགས་མཚམས་སྟེང་འོག་རྩིབས་རྩེ་བསྟན། །རྩིབས་རྣམས་རལ་གྲི་སོ་གཉིས་རྩེ་བཞིན་ནོ། །དེ་རྒྱབ་རྡོ་རྗེ་དཀར་པོའི་གུར་དང་ནི། །མེ་རི་དཀར་པོ་བར་མེད་འབར་བར་བསམ། །འཁོར་ལོའི་ནང་ནི་སྟོང་པ་རྒྱ་ཆེ་བ། །དཔེར་ན་སྦུབ་ཆལ་ཁ་སྦྱོར་ལྟ་བུ་ཡི། །དབུས་སུ་རང་ཉིད་སྒྲོལ་མ་བསྒོམ་པ་དེའི། །སྤྱི་བོའི་ཐད་དུ་བསྲུང་བྱ་བླ་མ་རྣམས། །གཡས་གཡོན་མདུན་རྒྱབ་བསྲུང་བྱ་ཐམས་ཅད་བསམ། །འཁོར་ལོ་དེ་ཡི་རྩིབས་
བརྒྱད་སྟོང་པའི་ནང་། །སྟེང་འོག་ཨོ་ཧ་རྩིབས་བརྒྱད་ཡིག་འབྲུ་བརྒྱད། །ཤིན་ཏུ་ཆེ་བ་མེ་དཔུང་འབར་བའོ། །འཁོར་ལོའི་རྩིབས་རྩེར་གནོད་བྱེད་ཐུལ་ཐུལ་གཅོད། །སྔ་དྲོ་གཡས་འཁོར་དགོང་མོ་གཡོན་འཁོར་བསམ། །དེ་ནི་སྲུང་དང་ཟློག་པའི་ཁྱད་པར་ཡིན། །སྲོད་དང་ཐོ་རངས་དམིགས་པ་ཐུན་རེ་བསྒོམ། །དེ་ནི་བདུད་དང་འཕྲད་ཀྱང་མི་ཕམ་གསུངས། ཐུགས་ཀའི་འཁོར་ལོ་འོད་ཟེར་དཀར་པོ་འཕྲོས། །ནད་གདོན་བར་ཆད་མུན་ལ་ཟླ་ཤར་བཞིན། །འོད་དེས་སངས་རྒྱས་བྱང་སེམས་ཐམས་ཅད་ཀྱི། །ཚེ་ཡི་དངོས་གྲུབ་འབྱུང་བའི་བཅུད་ཀུན་བསྡུས། །བདག་དང་བསྲུང་བྱ་རྣམས་ལ་ཐིམ་པར་བསྒོམ། །ཨོཾ་ཏཱ་རེ་ཏུཏྟཱ་རེ་ཏུ་རེ་གང་བྱེད་མཚན་སྔགས་དང་། མ་མ་ཨཱ་ཡུཔུཎྱེ་ཛྙཱ་ན་པུཎྚི་ཀུ་རུ་སྭཱ་ཧཱ། །ཞེས་བཟླས་ཐུན་མཇུག་དམིགས་མེད་ངང་ལ་བཞག །ཨཱ་ལི་ཀཱ་ལི་དབྱངས་དང་རྟེན་འབྲེལ་བཅས། །གསུམ་མམ་བདུན་སོགས་རབ་གནས་ཚུལ་དུ་བརྗོད། །དཔལ་ལྡན་བླ་མའི་སྐུ་ཚེ་བརྟན་པ་དང་། །ཞེས་སོགས་བརྟན་བཞུགས་ཚིགས་བཅད་གང་འོས་བརྗོད། །ཡང་ནི་སྐབས་འགར་གོང་ལྟར་སྐད་ཅིག་བསྒོམ། །རང་གི་ཐུགས་ལས་འོད་ཟེར་རིམ་
པར་སྤྲོས། །དཀར་སེར་དམར་སྔོ་ལྗང་དང་མཆིན་ཁ་དྲུག་་་་་་མཐིང་ནག་སྔོན་པོ་སྨུག་ཞད་ཅན་ཡིན་ནོ། མཆན། །འཁོར་ལོའི་ཕྱི་རོལ་གུར་ཁང་དྲུག་ཏུ་འགྱུར། །སྲ་ཞིང་བརྟན་ལ་རླུང་ཡང་མི་ཐར་བའི། །བར་རྣམས་ཐམས་ཅད་ཨུཏྤལ་སྔོན་པོས་གང་། །དེ་རྒྱབ་རྡོ་ར་མེ་རི་སྔར་ལྟར་བསྒོམ། །རྗེས་མ་འདི་ལ་སྔགས་བཟླས་མི་དགོས་སོ། །རང་དང་བླ་མ་བསྲུང་བྱ་གང་ལ་ཡང་། །བསྒོམ་དུ་རུང་བའི་སྲུང་འཁོར་ཟབ་མོ་འདི། །རྒྱུད་དང་རྒྱ་གཞུང་མན་ངག་དུ་མའི་བཅུད། །ཀཾ་ཚང་ལུགས་ཀྱི་གདམས་ངག་ཟབ་ཁྱད་ཡིན། །འདི་ཡིས་འཇིགས་པ་ཐམས་ཅད་སྐྱོབ་པའི་ཚུལ། །རྡོ་རྗེ་གདན་བཞིའི་རྒྱུད་ནས་གསུངས་པ་དང་། །སྒྲོལ་དཀར་རྒྱ་གཞུང་བརྒྱད་པོ་ཞལ་མཐུན་ནོ། །དེ་ཕྱིར་བློ་གཏད་ཐུབ་པའི་གདམས་ངག་ཡིན། །ཁྱད་པར་ནད་དང་དགྲ་དང་དམག་གིས་འཇིགས། །མདོར་ན་མི་མཐུན་གནོད་པ་གང་ཡང་རུང་། །འཇིགས་པ་ཐམས་ཅད་སེལ་བའི་གདམས་ངག་ནི། །སྔོན་དུ་བཤད་པའི་འཁོར་ལོའི་གུར་ཁང་དེ། །ཡངས་ཤིང་རྒྱ་ཆེ་གནམ་ས་ཙམ་དུ་བསྒོམ། །དེ་ནང་ས་གཞིར་ཟླ་བའི་དཀྱིལ་འཁོར་སྟེང་། །བསྲུང་བྱ་ཐམས་ཅད་
མངོན་སུམ་ལྟ་བུར་དམིགས། །རང་ཉིད་སྒྲོལ་མའི་ཐུགས་ལས་འོད་འཕྲོས་པས། །ཕྱོགས་བཅུའི་སངས་རྒྱས་བྱང་སེམས་ཐམས་ཅད་ནི། །སྒྲོལ་དཀར་སྐུར་གྱུར་ནམ་མཁར་སྤྱན་དྲངས་པ། །ཀུན་གྱི་ཕྱག་གཡས་བུམ་པ་དཀར་པོ་ཐོགས། །བསྲུང་བྱ་རྣམས་ལ་བདུད་རྩིས་ཁྲུས་གསོལ་བས། །ནད་གདོན་ཀུན་དག་ཤེལ་སྒོང་ལྟ་བུར་གྱུར། །སླར་ཡང་རང་ཐུགས་འཁོར་ལོའི་འོད་ཟེར་ནི། །དཀར་པོ་ཟླ་བ་ཤར་བ་ལྟར་འཕྲོས་པས། །དགྲ་དང་འཇིགས་པ་ནད་གདོན་གང་ཡིན་ཀུན། །མུན་པ་ལ་ནི་ཟླ་བ་ཤར་བའམ། །བ་མོར་ཉི་ཟེར་ཕོག་ལྟར་ཞི་བར་བསྒོམ། །་ཏཱ་རེ་ཏུཏྟ་རེ་ཏུ་རེ་ནད་གདོན་དགྲ་ཡི་འཇིགས་པའམ། འཇིགས་པ་ཌེ་ཤནི་ཀུ་རུ་སྭཱ་ཧཱ། །དམིགས་པ་དེ་ཉིད་ཐུན་རེར་བསྒོམ་པའམ། །གལ་ཆེན་ཞག་བདུན་མཚམས་བྱས་དེ་བསྒོམ་ཞིང་། །ཐུན་མཚམས་གཏོར་མ་བསྔོ་ཞིང་འདོད་དོན་གསོལ། །འཁོར་བ་ལས་སྒྲོལ་མ་ཡི་བསྟོད་པ་བྱ། །རྨི་ལམ་བར་ཆད་ཞི་བའི་རྨིས་ལྟས་དང་། །ལུང་བསྟན་ལ་སོགས་ངེས་པ་ཅན་འབྱུང་སྟེ། །དེ་བྱུང་སྐྱོན་མེད་ཁག་ཁུར་ཆོག་པ་ནི། །ཁོ་བོས་ལན་གྲངས་དྲུག་བདུན་མྱོང་བས་གྲུབ། །ཆུ་དང་གཡང་ས་ཆོམ་
རྐུན་ལ་སོགས་པ། །ལམ་དགྲ་ཡོད་སར་འགྲོ་བའི་དུས་ཀྱི་ཚེ། །དེ་ཐད་ནམ་མཁར་སྒྲོལ་དཀར་སྐུ་ཆེན་པོ། །སྐྱབས་སྦྱིན་མཛད་པའི་ཞབས་དེར་འགྲོ་བར་བསྒོམ་། ཆུ་དང་གཡང་ས་ལ་སོགས་ཡིན་ན་ནི། །འོག་ནས་ཡར་ལ་སྐྱོར་བའི་ཚུལ་དུ་བསམ། །ཨོཾ་ཏཱ་རེ་ཏུཏྟ་རེ་ཏུ་རེ་ཆུ་དང་གཡང་ས་ཆོམ་རྐུན་གྱི་འཇིགས་པ་ཤཱནཾ་ཀུ་རུ་སྭཱ་ཧཱ། །དེ་བྱས་ལམ་དགྲས་མི་ཚུགས་བདེ་བར་ཐར། །དོགས་པ་ཆེ་དུས་ལན་མང་མྱོང་བས་གྲུབ། །བལ་གཙང་སྲུང་སྐུད་རིང་པོ་ཞིག་བྱས་ཏེ། །བཟོ་མཁན་བུ་མོ་མགོ་གཙང་ཡོད་ན་མཆོག །ཨ་མྲི་ཏ་དང་ས་བྷས་བསངས་ཤིང་སྦྱང་། །མདུད་པ་ཉེར་གཅིག་སྒྲོལ་དཀར་ཉེར་གཅིག་བསྒོམ། །ཨོཾ་ཏཱ་རེ་ཏུཏྟཱ་རེ་འདི་འཆང་བ་ལ་ཆོམ་རྐུན་དང་གཅན་གཟན་གྱི་འཇིགས་པ་ལས་སྲུངས་ཤིག་རཀྵ་རཀྵ་ཀུ་རུ་ཡེ་སྭཱ་ཧཱ། །དེ་ལྟར་བརྒྱ་སྟོང་ལ་སོགས་ཅི་ནུས་སྔགས། །ལྷ་བསྟིམ་རྟེན་འབྲེལ་སྙིང་པོས་རབ་གནས་བྱས། །མི་དང་རྟ་ཕྱུགས་ནོར་སོགས་མགུལ་དུ་བཏགས། །མཁའ་འགྲོ་རྡོ་རྗེ་གུར་གྱི་རྒྱུད་ལས་གསུངས། །འདི་ཡང་མྱོང་བས་གྲུབ་པ་ལན་གྲངས་མང་། །ཡེ་ཤེས་ལྷ་མོ་ཚེ་འཕེལ་གོས་དཀར་མོ། །
རང་གཞན་ཚེ་བསྲིང་གདམས་ངག་ཟབ་བོ་རྒྱུ། །རང་ཉིད་དྲན་རྫོགས་རྡོ་རྗེ་ཕག་མོར་བསྒོམ། །རང་ལུས་སྟོང་གསལ་སྐུ་ཡི་གནས་ལྔ་ན། །སེང་གེ་རྨ་བྱ་གླང་ཆེན་རྟ་མཆོག་དང་། །ཤང་ཤང་བཏེག་པའི་རིན་ཆེན་ཁྲི་ལྔའི་སྟེང་། །ཚེ་དཔག་དཀར་དམར་མཐིང་སེར་ལྗང་གུ་ལྔ། །རང་གི་སྤྱི་བོར་པདྨ་ཟླ་བའི་སྟེང་། །རྩ་བའི་བླ་མ་ཡབ་སྲས་དབྱེར་མེད་པ། །རྗེ་བཙུན་མི་ལ་སྔོན་པོ་རས་གོས་ཅན། །ཕྱག་གཡས་སྙན་བརྟེན་ཞབས་གཉིས་རོལ་པའི་སྟབས། །ཕྱག་གཡོན་བ་མན་རྭ་ཅོ་བདུད་རྩིས་བཀང་། །དེ་ཡི་དབུ་གཙུག་སངས་རྒྱས་འོད་དཔག་མེད། །མཉམ་བཞག་སྟེང་དུ་ལྷུང་བཟེད་བདུད་རྩིས་བཀང་། །མདུན་དུ་ཚེ་རིང་མཆེད་ལྔ་གཞུང་བཞིན་བསམ། །རང་དང་མདུན་བསྐྱེད་བར་དེར་བླ་མ་སོགས། །བསྲུང་བྱ་ཐམས་ཅད་ཁྲོམ་ཚོགས་བཞིན་དུ་བསམ། །བདག་མདུན་ལྷ་རྣམས་ཡིད་ཀྱིས་སྤྱན་དྲངས་བསྟིམ། །ཨོཾ་བཛྲ་ཨ་ཡུ་ཥེ་ས་ར་ཧ། ཞེས་སོགས་སྔགས་ཀྱིས་གསོལ་བ་གདབ་པའི་ཚེ། །སྤྱི་བོའི་འོད་དཔག་མེད་ལས་འོད་ཟེར་འཕྲོས། །སྣང་སྲིད་འཁོར་འདས་ཚེ་དང་བསོད་ནམས་ཀུན། །འོད་ཀྱིས་བསྡུས་ནས་ལྷུང་བཟེད་ནང་དུ་
ཐིམ། །མདུན་གྱི་ཚེ་རིང་མཆེད་ལྔའི་འོད་ཟེར་གྱིས། །འཇིག་རྟེན་ཚེ་ཡི་དངོས་གྲུབ་འབྱུང་བའི་བཅུད། །བསྡུས་ཏེ་འོད་དཔག་མེད་ཀྱི་ལྷུང་བཟེད་ཐིམ། །ལྷུང་བཟེད་ནང་ནས་ཚེ་ཡི་བདུད་རྩི་ཕྱུར། །མི་ལའི་ཚངས་བུག་ནས་ཞུགས་སྐུ་ལུས་གང་། །ཞབས་གཡས་མཐེ་བོང་རྩེ་ནས་བདུད་རྩི་བབས། །རང་གི་ཚངས་བུག་ནས་ཞུགས་འརང་ལུས་གང་། །རང་གི་གནས་ལྔའི་ཚེ་དཔག་རིགས་ལྔ་ལས། །རང་མདོག་འོད་འཕྲོས་རིགས་ལྔའི་རིགས་གྱུར་པའི། །ཚེ་ཡི་དངོས་གྲུབ་ཐམས་ཅད་བསྡུས་ཐིམ་དམིགས། །སྔགས་ནི་ཨ་མཱ་ར་ཎི་ཚེ་གཟུངས་བཟླས། །ཨོ་ཨཉྫི་དྷ་རི་པཉྩ་ཌཀི་ནི་བཛྲ་ཨཱ་ཡུཛྙཱ་ན་སིདྡྷི་ཧཱུཾ་སྭཱ་ཧཱ། །དེ་ནི་རང་གི་ཚེ་བསྲིང་དམིགས་པ་སྟེ། །དེ་ནས་སྤྱི་གཙུག་འོད་དཔག་མེད་པ་ལས། །འོད་ཟེར་ཉི་མའི་ཟེར་བཞིན་དཔག་མེད་འཕྲོས། །འོད་དེའི་རྩེ་མོར་འོད་དཔག་མེད་རེ་རེ། །བསྲུང་བྱ་རེ་རེའི་སྤྱི་བོར་རེ་རེ་བཞུགས། །དེ་ནས་གོང་བཞིན་སྔགས་སྒྱུ་གསུམ་བཟླས་པ་ཡིས། །ཚེ་རིང་མཆེད་ལྔའི་སྐུ་ལས་འོད་ཟེར་འཕྲོས། །སྣོད་བཅུད་ཚེ་བསོད་དཔལ་གཡང་ཀུན་བསྡུས་ཏེ། །སོ་སོའི་སྤྱི་བོའི་འོད་དཔག་ལྷུང་བཟེད་ཐིམ། །
བདུད་རྩི་ཕྱུར་བ་ཚངས་པའི་ལམ་ནས་ཞུགས། །ལུས་གང་འཆི་མེད་ཚེ་ཡི་དངོས་གྲུབ་ཐོབ། །འདི་ལྟར་ཐུན་རེ་རྒྱུན་དུ་དམིགས་པའམ། །མ་གྲུབ་ཚེས་བརྒྱད་བཅོ་ལྔ་སོགས་སུ་བསྒོམ། །རྒྱས་པར་ཚེ་རིང་མ་ཡི་ཆོ་གའམ། །འབྲིང་དུ་གཏོར་འབུལ་བསྡུ་ན་གཏོར་བསྔོས་བཤམ། །བསྲུང་བྱའི་ཚེ་བསྲིང་དཔལ་བསྐྱེད་བཅོལ་གཏམ་བྱ། །འདི་ནི་ཚེ་རིང་མ་ཡི་སྒྲུབ་པའི་ཐབས། །རས་ཆུང་པ་དང་ངན་རྫོང་ཞི་བ་འོད། །མི་ལ་ཉིད་ཀྱིས་མཛད་པའི་རྡོ་རྗེའི་ཚིག །གཙང་སྨྱོན་པ་ཡིས་མཛད་སོགས་མང་པོ་ཞིག །འབྱུང་བའི་དོན་བསྡུས་གོ་བདེར་གནད་ཟབ་ཡིན། །ཡབ་སྲས་ལ་སོགས་སངས་རྒྱས་སྤྲུལ་པའི་སྐུ། །སྐྱེ་འཆི་རང་དབང་ཐོབ་པ་ཡིན་ངེས་པས། །ཐུགས་སུན་སྐྱོ་བ་སྐྱེས་པར་མ་གྱུར་ན། །མི་འཆི་བཞུགས་པར་རང་དབང་ཡོད་པ་དང་། །སྐུ་དངོས་དེ་ཡི་གདུལ་བྱ་མ་རྫོགས་ན། །དུག་མཚོན་ངན་སྔགས་བྱས་ཀྱང་མི་འདའ་བཞུགས། །གདུལ་བྱ་རྫོགས་ནས་བསྲུང་བ་བརྒྱ་བྱས་ཀྱང་། །སྐུ་དངོས་མི་བཞུགས་གཤེགས་པའི་ཚུལ་སྟོན་ཏེ། །དང་པོའི་ས་ཐོབ་ཡན་ཆད་གང་ཟག་ལ། །བདུད་དམག་བྱེ་བ་ཁྲག་ཁྲིག་རྣམས་ཀྱིས་ཀྱང་། །བ་སྤུའི་རྩེ་
མོ་ཙམ་ཡང་གཅོད་མི་ནུས། །མཐོང་བ་དོན་ལྡན་སྐུ་ན་ཕྲ་མོའི་དུས། །སྐུ་རྩེད་མ་ཡེངས་སྐུ་རིམ་མཛོད་ཞུས་པས། །ང་ཡི་སྐུ་རིམ་རང་རེས་བྱེད་མི་དགོས། །རྔ་ཡབ་གླིང་ནས་པདྨ་འབྱུང་གནས་དང་། །དགའ་ལྡན་གནས་ནས་བྱམས་པས་མཛད་དོ་གསུངས། །དེ་ཕྱིར་སྐུ་རིམ་གཙོ་བོར་བརྟན་བཞུགས་ཀྱི། །གསོལ་འདེབས་བརྩོན་པ་ཆོས་ལུགས་འདི་ཡི་སྲོལ། །རང་དབང་ཆེ་ཕྱིར་གསོལ་བ་བཏབ་ན་བཞུགས། །མ་བཞུགས་ནའང་རང་གི་ཚེ་འཕེལ་བའི། །རྒྱུ་འབྲས་རྟེན་འབྲེལ་བསླུ་བ་མེད་པ་ཡིན། །དེ་ནི་མདོ་ལུགས་དགོངས་པ་ཡིན་མོད་ཀྱི། །འོན་ཀྱང་སྔགས་ལུགས་དགོངས་པ་དེ་མིན་ཏེ། །ཕྱག་བཞི་པ་སོགས་མགོན་པོའི་རྒྱུད་རྣམས་ལས། །དྲག་སྔགས་ཞེ་སྡང་དྲག་པོས་བསྒྲུབས་པ་ན། །ས་བཅུ་ནོན་པའི་སྲོག་ཀྱང་གཡོ་འགྱུར་ཞིང་། །རྡོ་རྗེ་འཛིན་པ་ཉིད་ཀྱང་འཇིགས་ནུས་ལ། །ཚངས་པའི་ཚེ་དང་ལྡན་ཡང་འཆི་བར་གསུངས། །མུ་སྟེགས་པ་ཡི་དྲག་སྔགས་ཕུར་པ་ཡིས། །མགོན་པོའི་ལྡེར་སྐུའི་སྤྱི་བོར་བཏབ་པ་དེས། །ཕྱག་བཞི་པ་ཡི་ནུས་པ་ཉམས་པ་དང་། །རྭ་ལོས་འཇིགས་བྱེད་འགྲུབ་པའི་ནུས་མཐུ་ཡིས། །ས་
ཐོབ་སེམས་དཔའ་སུམ་ཅུ་སོ་གཉིས་བསྒྲལ། །ས་ལུགས་རྡོ་རྗེ་གདན་པ་མཆེད་གྲོགས་གཉིས། །མཐུ་ཁ་ཚད་པས་གཉིས་ཀ་འདས་པ་དང་། །ར་ལོ་གཉན་ལོ་ཕར་ཐུབ་ཚུར་ཐུབ་བྱས། །སེམས་དཔའ་རང་བྱུང་རྡོ་རྗེ་བསྙུང་བའི་ཚེ། །རང་རེར་ངན་སྔགས་མཐུ་གཏད་བྱེད་མཁན་འདུག །སྲུང་ཟློག་གྱིས་གསུངས་ཞྭ་དམར་གྲགས་སེང་བས། །གཤིན་རྗེ་ཁ་ཐུན་སྒོ་ནས་ཟློག་པ་མཛད། །མཐུ་བྱེད་མཁན་གྱི་གྲོང་ལ་དམར་བཤལ་འབྱམས། །ཕུག་པ་བརྡིབས་ནས་མཐུ་སྒྲུབ་མཁན་དགུ་ཤི །རང་བྱུང་རྒྱལ་བའི་བསྙུང་གཞི་དྭངས་པར་གྱུར། །དེ་ཕྱིར་ས་ལམ་མཐོན་པོའི་བླ་མ་ལའང་། །སློབ་བུ་མཆེད་གྲོགས་བརྩེ་གདུང་ཅན་ཡོད་ན། །སྲུང་ཟློག་དམིགས་རིམ་ཟབ་ན་ཕྱག་ཕྱི་ཚེ། །དེ་ཡང་དྲག་སྔགས་སྒོ་ནས་མ་ཡིན་པར། །ཡེ་ཤེས་ལྷ་མོ་སྒྲོལ་དཀར་ཚེ་འཕེལ་མ། །དེ་ཡི་སྤྲུལ་པ་བཀྲ་ཤིས་ཚེ་རིང་མ། །ཡེ་ཤེས་ལྷ་མོ་ཐུགས་རྗེ་བྱིན་རླབས་ཆེ། །འཇིག་རྟེན་ལྷ་མོ་རྣོ་མྱུར་ནུས་པར་ལྡན། །འདི་གཉིས་སྒོ་ནས་བླ་མ་མཆེད་གྲོགས་དང་། །རང་དང་བུ་སློབ་སྦྱིན་བདག་ལ་སོགས་པའི། །ཚེ་བསྲིང་དཔལ་བསྐྱེད་གདམས་ངག་ཟབ་མོ་འདིས། །གཞན་ལ་མི་
གནོད་རང་ལ་ཉེས་སྒྲིབ་མེད། །དམིགས་ཡུལ་བསྲུང་བྱ་ཀུན་ལ་ཕན་ཐོགས་ཆེ། །རང་བཟོ་མ་ཡིན་རྒྱུད་གཞུང་ཕུགས་ཆེ་ཞིང་། །བཤད་ཚོད་མ་ཡིན་ལག་ཏུ་ལེན་པར་བདེ། །ཡི་གེ་མཐོང་ཙམ་མ་ཡིན་ཉམས་མྱོང་ཡོད། །བདག་གི་རྒྱུན་གྱི་ཉམས་ལེན་ཟབ་མོ་འདི། །སྙིང་གི་བུ་མཆོག་བརྩོན་འགྲུས་ཁྱོད་ལ་གདམས། །མ་སྦས་མ་བསྐུང་འགྲོ་དོན་གང་ཆེ་མཛོད། །དེ་སྐད་རྣལ་འབྱོར་རཱ་ག་ཨ་སྱ་ཡིས། །རྟ་ལོ་ཁྲུམས་ཀྱི་ཟླ་བའི་ཉི་ཤུ་བརྒྱད། །བླ་མའི་དུས་མཆོད་སྐབས་ཀྱི་སྔ་དྲོའི་ཐུན། །ཇི་ལྟར་སྨྲས་བཞིན་ཞུ་བ་པོ་དེས་བྲིས། །སྦ་འོས་གསལ་བཀོད་འཇིག་རྟེན་ཌཱ་ཀིར་བཤགས། །དགེ་བས་བསྟན་པའི་བདག་དང་བསྟན་འཛིན་གྱི། །སྐྱེས་ཆེན་དམ་པ་རྣམས་ཀྱི་ཞབས་བརྟན་ཅིང་། །བར་ཆད་ཀུན་ཞི་ཕྲིན་ལས་མཐའ་རྒྱས་ཤོག །ལེའུ་བཅོ་བརྒྱད་པའོ་མངྒ་ལཾ།། །།