ལེའུ་བཅུ་དགུ་པ། ན་སོ་གཞོན་ཞིང་དཀའ་ཐུབ་འདོད་པ་ལ། །བྱ་སྤྱོད་ཉམས་ལེན་ཚངས་པའི་སྒྲ་དབྱངས་ཡོད། །
༼ཛ༽ རི་ཆོས་མཚམས་ཀྱི་ཞལ་གདམས་ལས། མདོསྔགས་ཀྱི་ཁྱད་པར་དང་བྱ་སྤྱོད་ཀྱི་ཉམས་ལེན་ཚངས་པའི་སྒྲ་དབྱངས་ཞེས་བྱ་བ་བཞུགས་སོ། །ན་མོ་གུ་རུ་བཛྲ་པཱ་ཎི་ཡེ། བླ་མ་བརྩོན་འགྲུས་རྒྱ་མཚོ་གསན་མཛོད་དང་། །རི་
ཁྲོད་འགྲིམས་ཤིང་ཉམས་སུ་ལེན་པ་ལ། །མདོ་སྔགས་གཉིས་ཀྱི་ཁྱད་པར་ཤེས་དགོས་གདའ། །མདོ་ལས་སྔགས་ནི་ཁྱད་པར་གསུམ་གྱིས་འཕགས། །མདོ་ཡི་ལུགས་ལ་ཉོན་་མོངས་དུག་གསུམ་པོ། །སྤང་བར་མ་བྱས་འབྲས་བུ་ཐོབ་ཐབས་མེད། །སྔགས་ཀྱི་ལུགས་ལ་ཉོན་མོངས་སྤང་བ་དང་། །ཉོན་མོངས་སྦྱང་དང་ཉོན་མོངས་བསྒྱུར་བ་དང་། །ཉོན་མོངས་ལམ་དུ་ཁྱེར་དང་རང་བཞིན་ཤེས། །ཐབས་ནི་དུ་མས་བྱང་ཆུབ་སྒྲུབ་ཐབས་ཡོད། །མདོ་ལུགས་བསྐལ་པ་གྲངས་མེད་གསུམ་གྱི་བར། །སྦྱིན་པའི་མཆོག་གྱུར་རང་གི་མགོ་བོ་ཡང་། །སྟོང་ཕྲག་ཚང་བར་སྦྱིན་པ་བཏང་དགོས་པས། །བུ་དང་ཆུང་མ་ལོངས་སྤྱོད་སྨོས་ཅི་དགོས། །དགྲ་བོས་ཡན་ལག་ཉིང་ལག་ཐམས་ཅད་ཀྱི། །ཤ་ནི་སྲང་ལ་འཇལ་ཞིང་བཅད་ན་ཡང་། །ཁོང་ཁྲོ་མེད་པའི་བཟོད་པ་བསྒོམ་པ་དང་། །ལོ་ནི་ཁྲི་ཕྲག་བཅུ་ཡི་བར་ཙམ་དུ། །ཏིང་འཛིན་གཅིག་ལ་གཡོ་བ་མེད་པ་སོགས། །བསྐལ་པ་གྲངས་མེད་གསུམ་དུ་ཚོགས་བསག་དགོས། །དེ་མ་བྱས་པར་སངས་རྒྱས་ཐོབ་ཐབས་མེད། །སྔགས་ལ་དེ་ཙམ་དཀའ་སྤྱད་མི་དགོས་པར། །བདེ་བའི་ངང་ནས་ཡུན་ཐུང་སངས་
རྒྱས་འགྲུབ། །མདོ་ལུགས་དབང་པོ་རྟུལ་པོའི་དབང་བྱས་པས། །བསྐལ་པ་གྲངས་མེད་གཅིག་གི་བར་དག་ཏུ། །བསོད་ནམས་ཚོགས་བསག་སྒྲིབ་སྦྱོང་མ་བྱས་པར། །སྟོང་ཉིད་དོན་དེ་མངོན་སུམ་རྟོགས་མི་ནུས། །སྔགས་ལ་ཚེ་གཅིག་གམ་ནི་ལོ་བཅུ་གཉིས། །ལོ་གསུམ་ཕྱོགས་གསུམ་མམ་ནི་ཁྲིད་ཐོག་གཅིག །དབང་པོ་རྣོན་པོའི་དབང་བྱས་སྟོང་ཉིད་རྟོགས། །དེ་ལྟར་ཁྱད་པར་གསུམ་གྱིས་ཁྱད་པར་འཕགས། །སྔགས་ལ་རྒྱུད་སྡེ་བྱེ་བ་བསམ་ཡས་ཀྱང་། །གསར་མའི་ལུགས་ལ་རྒྱུད་སྡེ་བཞི་རུ་གྲགས། །རྙིང་མའི་ལུགས་ལ་རྒྱུད་སྡེ་དྲུག་ཏུ་བཞེད། །བལྟ་དང་རྒོད་དང་ལག་བཅང་གཉིས་གཉིས་འཁྱུད། །འདོད་པའི་འདོད་ཆགས་བཞི་པོ་འཇོམ་པ་དང་། །བྲམ་ཟེ་རྗེའུ་རིགས་རྒྱལ་རིགས་གདོལ་པའི་རིགས། །མི་རིགས་བཞི་པོ་འདུལ་ཕྱིར་རྒྱུད་སྡེ་བཞི། །རྫོགས་ལྡན་གཉིས་ལྡན་སུམ་ལྡན་རྩོད་ལྡན་དུས། །དུས་བཞི་འདུལ་བའི་ཕྱིར་དུའང་རྒྱུད་སྡེ་བཞི། །སྒྱུ་བྱ་རྒྱུད་སྤྱོད་རྒྱུད་རྣལ་འབྱོར་བླ་མེད་དོ། །བྱ་སྤྱོད་རྣལ་འབྱོར་གསང་སྔགས་ཕྱི་ཡི་རྒྱུད། །ཡེ་ཤེས་ལྷ་ནི་ཕྱི་རོལ་ཞིང་ཁམས་བཞུགས། །ཕྱི་ནས་སྤྱན་དྲངས་མཆོད་ཅིང་དངོས་གྲུབ་
ཞུ། །དེ་ཕྱིར་གསང་སྔགས་ཕྱི་ཡི་རྒྱུད་ཅེས་བྱ། །བླ་མེད་ཕ་རྒྱུད་མ་རྒྱུད་གཉིས་མེད་རྒྱུད། །རྙིང་མའི་མ་ཧཱ་ཨ་ནུ་ཨ་ཏི་སྟེ། །གསར་རྙིང་རྒྱུད་གསུམ་དོན་ལ་ཁྱད་མེད་ཅེས། །བདག་གི་འདྲེན་མཆོག་དྷརྨེ་ཤྭ་རས་གསུངས། །ཡེ་ཤེས་ལྷ་ནི་ཕྱི་ན་ཡོད་མིན་ཏེ། །ནང་གི་སེམས་ཉིད་ཡི་དམ་ལྷ་རུ་བཞེད། །དེ་ཕྱིར་གསང་སྔགས་ནང་པའི་རྒྱུད་ཅེས་བྱ། །བྱ་བའི་རྒྱུད་ལ་རྒྱུད་སྡེ་སྟོང་ཕྲག་བཞི། །སྤྱོད་པའི་རྒྱུད་ལ་རྒྱུད་སྡེ་སྟོང་ཕྲག་དྲུག །རྣལ་འབྱོར་རྒྱུད་ལ་རྒྱུད་སྡེ་སྟོང་ཕྲག་བརྒྱད། །བླ་མེད་རྒྱུད་ལ་རྒྱུད་སྡེ་གྲངས་མེད་གསུངས། །དེ་ལྟར་རྒྱུད་སྡེ་དེ་དག་ཐམས་ཅད་ནི། །རིག་པ་འཛིན་པའི་སྡེ་སྣོད་ཅེས་བྱ་སྟེ། །མདོ་ལུགས་འདུལ་བ་མདོ་སྡེ་མངོན་པ་རྣམས། །དེ་ཡི་ལམ་སྟེགས་ཡིན་ཕྱིར་འཁོར་དུ་བཞེད། །ད་ལྟ་ཤཱཀ་ཐུབ་བསྟན་པ་མ་གཏོགས་པ། །སངས་རྒྱས་སྟོང་རྩ་གཞན་གྱིས་བསྟན་པ་ལ། །གསང་སྔགས་ཆོས་ནི་མི་འབྱུང་གསུངས་པའི་དོན། །གཏན་ནས་མི་འབྱུང་བ་ནི་མ་ཡིན་ཏེ། །སྐལ་ལྡན་རྣམས་ལ་སྙན་བརྒྱུད་ཚུལ་དུ་གནང་། །ད་ལྟ་བཞིན་དུ་མི་རྣམས་ཐམས་ཅད་ཀྱིས། །གསང་སྔགས་ཞེས་བྱའི་མིང་ཡང་མི་ཐོས་སོ། །མདོ་ལུགས་སྡེ་སྣོད་
གསུམ་གྱི་སྟོན་པ་ནི། །སྤྲུལ་སྐུ་ཤཱཀྱ་ཐུབ་པ་ཉིད་ཡིན་ཏེ། །བསྟན་པ་ལོ་གྲངས་ལྔ་བརྒྱ་ཕྲག་བཅུར་གནས། །རིམ་པ་བཞིན་དུ་དགྲ་བཅོམ་འབྲས་གནས་དང་། །དགྲ་བཅོམ་རྒྱུན་ཞུགས་ཕྱིར་མི་འོང་འབྲས་གནས། །ཕྱིར་མི་འོང་རྒྱུན་ཞུགས་ཕྱིར་འོང་འབྲས་གནས་དང་། །ཕྱིར་འོང་རྒྱུན་ཞུགས་རྣམས་ནི་རིམ་པ་བཞིན། །ཕྱིར་མི་འོང་དང་རྒྱུན་ཞུགས་འབྲས་བུར་གནས། །ཤེས་རབ་ཏིང་འཛིན་ཚུལ་ཁྲིམས་བསླབས་པ་གསུམ། །རྩ་བའི་མ་དཔེ་སྡེ་པར་ལ་གོང་བཞིན་འདུག་པ་མ་དག་པ་ཡིན་ནམ་སྙམ་ཡང་བཅོས་བསྒྱུར་མ་ཕོད། འོན་ཀྱང་གོ་དོན་ངོ་མ་གུག་རྟགས་ནང་འདི་བཞིན་ཡིན་པ་འདྲ་བསམ་ནས་ཚིག་རྐང་གཉིས་བྲིས་པ་ཡིན་ཀྱང་དཔྱད་མཆན། །ལྔ་བརྒྱ་ཕྲག་རེར་དེ་དག་ཐོབ་པ་མང་། །དེ་དག་འབྲས་བུའི་དུས་དང་སྒྲུབ་པའི་དུས། །དེ་རྗེས་ལུང་གི་བསྟན་པ་ལྔ་བརྒྱ་ཕྲག་གསུམ་ལ་རིམ་བཞིན་མངོན་པ་མདོ་སྡེ་དང་། །འདུལ་བ་རྣམས་ཀྱི་བཤད་པ་རྒྱ་ཆེར་དར། །བཤད་པ་ཙམ་ལས་འབྲས་བུ་ཐོབ་པ་ཉུང་། །དེ་ཕྱིར་ལུང་གི་བསྟན་པ་ཞེས་བྱའོ་། །དེ་རྗེས་ལྔ་བརྒྱ་ཕྲག་གཅིག་རྟགས་ཙམ་འཛིན། །བཙུན་པའི་རྟགས་དང་ཆ་ལུགས་འཛིན་ཙམ་ལས། །བཤད་སྒྲུབ་གཉིས་ཀ་ཚད་ལྡན་འཛིན་པ་ཉུང་། །ལྔ་བརྒྱ་ཐ་མ་
རྟགས་ཙམ་འཛིན་པ་ཟེར། །མཆོད་རྟེན་སྐུ་གཟུགས་གླེགས་བམ་ལ་སོགས་ནི། །ཡར་འཕེལ་ཚེ་ལོ་དྲུག་བརྒྱའི་བར་དུ་གནས། །དེ་ནི་མདོ་ལུགས་བསྟན་པའི་གནས་ཚད་དེ། །བསྟན་རྩིས་བཞེད་པ་མི་མཐུན་མང་ན་ཡང་། །པད་འབྱུང་སྲོང་བཙན་སྒམ་པོ་ས་ལུགས་སོགས། །མང་པོ་གོ་བསྟུན་རིག་པས་ལེགས་དཔྱད་ན། །དེང་སང་ལྔ་བརྒྱ་དགུ་པའི་དཀྱིལ་ཙམ་སེམས། །མདོ་ལུགས་འབྲས་བུ་སྒྲུབ་པའི་བསྟན་པ་ཡོལ། །ཉམས་སུ་བླང་ཡང་འབྲས་བུ་ཐོབ་པ་དཀོན། །སྔགས་ལུགས་གྲི་གུག་བརྩེགས་པའི་རྒྱུད་ཀྱི་དོན། །སྐུ་གསུང་ཐུགས་ཀྱི་བསྟན་པ་ལྔ་བརྒྱ་གསུམ། །ཡོན་ཏན་བཞི་དང་ལྔ་བརྒྱ་ཕྲག་དགུ་སྟེ། །དེ་རྗེས་ཆོས་སྐྱོང་མགོན་པོའི་ཕྲིན་ལས་བཞི། །རེ་རེ་ལ་ཡང་ལྔ་བརྒྱ་ཕྲག་རེ་གནས། ། དུས་འཁོར་ལུགས་ལ་སྟོང་ཕྲག་མང་པོ་སྟེ། །ཁྱད་པར་རྫོགས་པ་ཆེན་པོའི་བསྟན་པ་ནི། །ཚེ་ལོ་དྲུག་ཅུའི་པ་ནས་བཅུ་ཡི་བར། །ཀུན་ཏུ་བཟང་པོའི་ཐུགས་ཀྱི་བསྟན་པ་གནས། །དེ་ཕྱིར་རྫོ་གས་ཆེན་སྒོམ་ན་གྲོལ་སླ་གསུངས། །ཁྱད་པར་ཨོ་རྒྱན་གཏེར་གྱི་བསྟན་པ་ནི། །རེ་རེ་ནུབ་ཀྱང་རེ་རེ་དར་བ་སྟེ། །ཐུབ་པའི་བསྟན་པ་མིང་མེད་གྱུར་ན་
ཡང་། །ས་ཆ་ཁོལ་བུ་ཁོལ་བུར་གཏེར་ཕྲན་རྡོལ། །བྱམས་མགོན་མ་བྱོན་བར་དུ་རྒྱུན་མི་ཆད། །བྱ་རྒྱུད་སྤྱོད་རྒྱུད་རྣལ་འབྱོར་རྒྱུད་གསུམ་ནི། །ལོངས་སྐུ་རྣམ་སྣང་ཆེན་པོའི་བསྟན་པ་ཡིན། །མ་ཧཱ་ཨ་ནུ་ཨ་ཏིའི་རྒྱུད་གསུམ་ནི། །ཆོས་སྐུ་ཀུན་ཏུ་བཟང་པོའི་བསྟན་པ་ཡིན། །བསྟན་པ་སོ་སོ་གནས་ཚད་སོ་སོར་བཞེད། །དེ་དག་ཕལ་གྱི་སྙན་དུ་མི་འགྲོ་ཡང་། །གསར་རྙིང་རྒྱུད་གཞུང་རྒྱ་ཆེར་གཟིགས་དང་གསལ། །མདོ་སྔགས་ཁྱད་པར་འབྱེད་པའི་དབྱངས་ཆུང་འདི། །རཱ་ག་ཨ་སྱས་འཕྲལ་དུ་གང་དྲན་སྨྲས། ༈ །ན་མོ་གུ་རུ་ཨཱརྱ་པ་ལོ་ཡེ། །ལུས་ཀྱི་བྱ་བ་ཕྱག་དང་བསྐོར་བ་དང་། །གཙང་སྦ་སྨྱུང་གནས་ལ་སོགས་གཙོ་ཆེ་བས། །བྱ་བའི་རྒྱུད་ཅེས་བྱ་བ་དེ་ཡིན་ནོ། །བསམ་པ་བྱང་ཆུབ་མཆོག་ཏུ་སེམས་བསྐྱེད་དེ། །ཁྱིམ་པའམ་ནི་རབ་བྱུང་ཡིན་ཡང་རུང་། །ཆུ་དང་ཅོད་པན་དར་དཔྱང་དབང་བསྐུར་ཞུས། །ཡི་དམ་དེ་ཡི་རིག་གཏད་སྒྲུབ་ལུང་ཞུ། །རང་གིས་བྲི་འམ་གལ་ཏེ་མི་ཤེས་ན།། །ལྷ་བཟར་བསྙེན་གནས་བསྲུངས་ལ་བྲིས་བཅུག་སྟེ། །ཚོན་དང་རས་གཞིར་ཀོ་སྤྱན་མ་འདྲེས་པ། །གྲོ་ཁུའམ་ནི་ཟར་ཁུས་སྦྱིན་བྱས་
ལ། ཡི་དམ་གང་ཡིན་དེ་ཡི་སྐུ་གཟུགས་བྲིས། །སྤྱན་འབྱེད་བྱས་མ་ཐག་ཏུ་རབ་གནས་བྱ། །སྐུ་གཟུགས་འཛོམ་ན་དཀྱིལ་འཁོར་མེད་ཀྱང་ཆོག །དཀྱིལ་འཁོར་པདྨ་འདབ་བརྒྱད་མུ་ཁྱུད་ཅན། །མེད་ན་འབྲས་ཀྱི་ཚོམ་བུ་བཀོད་ཀྱང་ཆོག །དེ་མདུན་ཤ་ཆང་སྒོག་སོགས་མ་འདྲེས་པའི། །མཆོད་པ་རྣམ་ལྔ་དཀར་གསུམ་གཏོར་མ་བཤམ། །སྒྲུབ་གཡོག་གུས་ལྡན་གཙང་སྦྲ་ཆེ་བ་དང་། །གོས་གསར་མཆོད་རྫས་སྤོས་དང་མེ་ཏོག་ཚོགས། །དེ་ནས་རང་ཉིད་དཀར་ཕྱོགས་བསྲུང་བྱས་ཏེ། །ནངས་རེ་བཞིན་དུ་ཡན་ལག་ལྔ་ཁྲུས་བྱ། །གོས་གསར་གྱོན་ཏེ་དཀྱིལ་འཁོར་དྲུང་དུ་འོང་། །ཕྱག་འཚལ་ཀུ་ཤ་གདན་དཀར་སྟེང་དུ་འདུག །སྐྱིལ་ཀྲུང་མི་བཅའ་ཙོག་པུར་ཐལ་མོ་སྦྱར། །སྐྱབས་འགྲོ་སེམས་བསྐྱེད་སྤྱི་ལྟར་བྱས་པའི་རྗེས། །ས་ཕྱོགས་ཐམས་ཅད་སངས་རྒྱས་ཞིང་ཁམས་དང་། །མཆོད་རྫས་མཆོད་སྤྲིན་བསམ་མི་ཁྱབ་པར་དམིགས། །མཆོད་པའི་སྤྲིན་གྱི་གཟུངས་ཀྱིས་བྱིན་གྱིས་བརླབ། །དཀྱིལ་འཁོར་ཡོད་པའི་རིགས་ལ་གཞལ་ཡས་བསྐྱེད། །མེད་པའི་རིགས་ལ་པདྨའི་སྡོང་པོ་ནི། །ཡལ་ག་ལོ་འདབ་བར་སྣང་ཁམས་ཁྱབ་པ། །དེ་དབུས་
རིན་ཆེན་སྣ་ཚོགས་ལས་གྲུབ་པའི། །པདྨ་འདབ་མ་འབུམ་ལྡན་གྱིས་པའི་དབུས། །གེ་སར་རིན་ཆེན་སྣ་ཚོགས་ཟེའུ་འབྲུའི་སྟེང་། །ཉ་རྒྱས་ཟླ་བའི་དཀྱིལ་འཁོར་གདན་དུ་བཏིང་། །གོས་ཚགས་གཟབ་སྟེ་ལག་ཏུ་སྤོས་ཐུར་ཐོགས། །ལྷ་དེ་བཞུགས་པའི་ཕྱོགས་སུ་ཁ་བལྟས་ལ། །མ་ལུས་སེམས་ཅན་མགོན་སོགས་སྤྱན་འདྲེན་བྱ། །མཁྱེན་པས་གཟིགས་ཏེ་སྐད་ཅིག་དེ་ཉིད་ལ། །གློག་ལྟར་མྱུར་བར་བྱོན་ནས་གདན་བཞུགས་བསམ། །ཕྱག་འཚལ་མཆོད་བསྟོད་མཎྜལ་ལ་སོགས་པ། །ཆོ་གའི་འགྲོས་ནི་སྨན་བླའམ་གནས་ཆོག་དང་། །ས་གཞི་བྱིན་རླབས་ལྟར་དུ་བྱས་པའི་རྗེས། །མདུན་བསྐྱེད་ལྷ་ཡི་ཐུགས་ཀར་ལྷ་ཡི་ཐུགས། །ཟླ་བའི་དཀྱིལ་འཁོར་ཉ་རྒྱས་བསྒོམ་པའི་སྟེང་། །ས་བོན་མཐའ་རུ་སྔགས་སམ་གཟུངས་དེ་ཉིད། །མེ་ལོང་ནང་གི་གཟུགས་བརྙན་ཅི་བཞིན་དུ། །ཡིག་མགོ་ཕྱི་ན་བསྟན་ཏེ་ལམ་མེར་གསལ། །སྔགས་ལ་སོ་སོའི་རང་སྒྲ་གྲག་པ་ལ། །ལྕེ་།སྔགས་ཕྲེང་འཁོར་བ་སོགས་ནི་མ་ཡིན་ནོ། །དེ་ནས་དམ་ཚིག་རྡོ་རྗེ་ཞེས་བྱ་བ། །རིན་པོ་ཆེའམ་ཤིང་ལས་བྱས་ཀྱང་རུང་། །སོར་བཞི་ཚོན་སྐུད་སྣ་སྔས་དཀྲིས་པ་ཞིག །
ལག་པ་གཡས་པས་རང་གི་སྙིང་གར་བཟུང་། །ཕྲེང་ལུང་ཀོ་བས་མི་རུང་ཏོང་སྐུད་ཀྱིས། །བརྒྱུས་པའི་ཕྲེང་བ་ལག་པ་གཡོན་པས་བཟུང་། །ཕྲེང་བ་ཤ་རྗེན་མི་རེག་གོས་གསེབ་བགྲང་། །དབུགས་ནི་ཕྱིར་ལ་འགྲོ་བའི་དུས་ཉིད་དུ། །མདུན་བསྐྱེད་ཐུགས་ཀའི་སྔགས་ལ་རིག་པ་གཏད། །དབུགས་ནི་ནང་དུ་རྔུབ་པའི་དུས་ཉིད་དུ། །མདུན་བསྐྱེད་ཐུགས་ལས་ཟླ་བ་སྔགས་བཅས་པ། །འཕྲོས་ནས་རང་གི་སྙིང་གར་ཐིམ་པར་བསྒོམ། །སྔགས་སྒྲ་མི་ཆེ་མི་ཆུང་སིལ་བུར་བགྲང་། །ཐུན་མཚམས་མ་གཏོགས་ཇ་ཡང་བཏུང་མི་ཉན། །གདན་གཅིག་ཉིན་པར་གྲོ་དཀར་གདན་གཅིག་སྟེ། །ངག་བཅད་ཉིན་པར་ཟས་སྤང་ཆུ་ཡང་སྤང་། །ཐོ་རངས་ངག་བཀྲོལ་ཐུག་པ་སླའུ་ནི། །ཁ་ངོ་དོད་པ་ཕོར་པ་གང་བཏུང་བ། །ཁོག་པའི་འབུ་སྲིན་བཀྲེས་པ་སེལ་ཕྱིར་ཡིན། །དེ་ཉིན་ཕྱག་དང་བསྐོར་བ་མི་བྱ་ཞིང་། །ཆོ་ག་ངག་ཏུ་མི་བརྗོད་ཡིད་འདོན་བྱ། །གདན་གཅིག་ཉིན་པར་ཕྱག་བསྐོར་ཆོ་ག་འདོན། །སྦྲིད་པ་འོག་རླུང་གད་མོ་ཤོར་བ་ན། །ཕྲེང་བ་ས་ལ་བཞག་ནས་ཆབ་བླངས་ཏེ། །ཆོ་ག་སླར་ཡང་བསྐྱར་ནས་འདོན་དགོས་སོ། །ཐུན་མཚམས་མ་གཏོགས་ཆབ་
བསིལ་མི་རུང་ཞིང་། །ཚར་ནས་སླར་ཡང་ཁྲུས་དང་ཆབ་བླང་ངོ་། །འདི་སྐབས་ཉོན་མོངས་དུག་ལྔ་འདུལ་ཚུལ་ནི། །སྲོང་བཙན་སྒམ་པོ་ལྟ་བུ་མངོན་ཤེས་ལ། །ཐོགས་པ་མེད་པའི་རྒྱལ་པོ་བཙན་པོའམ། །བླ་མ་ཆེན་པོ་མངོན་ཤེས་ཐོགས་མེད་པའི། །དྲུང་དུ་ཡུད་ཙམ་ཕལ་པའི་མིས་མཇལ་ཚེ། །སེམས་ལ་རྣམ་རྟོག་ངན་པ་འགྱུ་མི་ཕོད། །འགྱུས་ན་བླ་མས་མཁྱེན་ནས་ཐུགས་ཁྲེལ་ལམ། །རྒྱལ་པོས་མཁྱེན་ནས་བཀའ་བཀྱོན་འབྱུང་ཕྱིར་རོ། །དེ་བཞིན་ཆུ་བུར་མིག་གིས་མ་མཐོང་ཡང་། །ཡེ་ཤེས་ལྷ་དེ་མདུན་དུ་ངེས་པར་བཞུགས། །དེ་ཕྱིར་ཉོན་མོངས་རྟོག་པ་འཕྲེང་མི་ཕོད། །དེ་ལ་གོམས་ནས་ཉོན་མོངས་ཤུགས་ཀྱིས་འགག །ཁྱད་པར་དཀར་ཕྱོགས་སྨྱུང་གནས་བྱེད་པ་དེས། །གཉིད་དང་འདོད་ཆགས་ཞེ་སྡང་ཤུགས་ཀྱིས་ཆུང་། །གཅིན་རྟོག་འོག་རླུང་ཉུང་ཕྱིར་གཙང་སྦྲ་སླ། །དེ་ཕྱིར་དཀར་ཕྱོགས་དགོས་པའི་དོན་དེ་ཡིན། །དེ་ནས་ཐུན་་མཚམས་འཇོག་པའི་མཚམས་དེ་རུ། །ཕྲེང་བ་བསྐྱིལ་ལ་ཕུ་བཏབ་གནས་གསུམ་རེག །སྔགས་ཀྱི་བྱིན་རླབས་རང་ལ་ཐིམ་པར་བསམ། །རིན་ཆེན་སྣོད་ནི་འབྲུ་ཡིས་བཀང་སྟེང་
བཞག །དཀྱིལ་འཁོར་དྲུང་ངམ་གཙང་བའི་སར་བཞག་སྟེ། །ཕྱག་འཚལ་ལངས་ལ་ཟས་ཀྱི་བྱ་བ་སོགས། །དཀྱིལ་འཁོར་དྲུང་དུ་མི་བྱ་གཞན་དུ་བྱ། །ནུབ་མོ་ཉལ་ཁ་ཐུན་ནི་འཇོག་པའི་ཚེ། །རས་བྲིས་ཡོད་ན་མདུན་བསྐྱེད་དེ་ལ་བསྟིམ། །མེད་ན་གཤེགས་ཤིང་བསྔོ་སྨོན་བཀྲ་ཤིས་བྱ། །དེ་ནས་གོས་ཚགས་བཤིག་ལ་ཉལ་བར་བྱ། །ཕྱིར་ནངས་སྐྱ་རེངས་ཤར་ནས་གོས་ཚགས་བསྡམ། །ཡན་ལག་ལྔ་ཁྲུས་བྱས་ལ་སྔར་བཞིན་ཏེ། །ཞག་ནི་གསུམ་མམ་བདུན་ནམ་ཐ་ན་ཡང་། །ལྔ་ཙམ་མཚམས་ནས་གོས་གསར་བརྗེ་ཞིང་གྱོན། །གོས་རྙིང་རླུང་སིང་བྱ་ཞིང་སྤོས་ཁར་འདོན། །མཆོད་རྫས་རྣམས་ནི་བཟའ་བར་མི་རུང་སྟེ། །ལྷ་ལ་ཕུལ་བའི་དཀོར་དེ་སྒྲིབ་པ་ཆེ། །ཟོས་ན་ལྷ་ཞལ་མི་མཐོང་སྒྲིབ་པ་འགྱུར། །ཁྱི་དང་བ་གླང་བོང་བུ་ལ་སོགས་པ། །དུད་འགྲོ་དམན་པ་རྣམས་ལ་སྦྱིན་མི་རུང་། །གཙང་ཞིང་མཐོ་བའི་གནས་སུ་བསྐྱལ་བར་བྱ། །བྱ་ཡི་རིགས་ཀྱིས་ཟོས་ཀྱང་སྐྱོན་མེད་དེ། །ནམ་མཁར་འགྲོ་བ་མཁའ་འགྲོའི་རིགས་སུ་གཏོགས། །མཇུག་ཏུ་བསྙེན་པའི་ཁ་བསྐང་སྦྱིན་སྲེག་ཀྱང་། །སྦྱིན་སྲེག་སྤྱི་དང་མཐུན་པ་མ་ཡིན་ཏེ། །འཇིག་རྟེན་
མེ་ལྷ་དམ་ཚིག་ལྷ་ལ་སོགས། །བསྐྱེད་པ་མི་དགོས་མེ་དཔུང་དེ་ཡི་དཀྱིལ། །མདུན་གྱི་ལྷ་དེ་སྤྱན་དྲངས་མཆོད་པས་འཐུས། །སླར་ཡང་རིས་གཞི་འམ་ནི་དཀྱིལ་འཁོར་གཞུག །ཐུན་མཚམས་བདག་འཇུག་ལ་སོགས་ལེན་པ་ཡང་། །མདུན་བསྐྱེད་དཔྲལ་བ་མགྲིན་པ་ཐུགས་ཀ་ནས། །འོད་ཟེར་དཀར་དམར་མཐིང་གསུམ་བདག་ལ་བསྟིམ། །སྒྲུབ་པའི་མཇུག་ཏུ་དངོས་གྲུབ་ལེན་པའི་ཐབས། །ལྷུང་བཟེད་ནང་དུ་དཀར་གསུམ་མངར་གསུམ་དང་། །བསྲེས་པའི་ཞོ་ཟན་དག་གིས་བཀང་བྱས་ཏེ། །སྟེང་དུ་དར་ཚོན་སྣ་ལྔས་དགབ་པར་བྱ། །དེ་སྟེང་དམ་ཚིག་རྡོ་རྗེ་བཞག་བྱས་ཏེ། །མདུན་གྱི་ཐུགས་ཀའི་འོད་ཟེར་ཁ་དོག་ལྔ། །དངོས་གྲུབ་རང་བཞིན་ཟས་ལ་ཐིམ་བསྒོམ་ཞིང་། །ཉིན་ཞག་ཕྲུག་ཅིག་ཟས་དང་གཉིད་སྤངས་ནས། །ལྷུང་བཟེད་ལག་མཐིལ་གཡོན་བཞག་གཡས་པས་བཀབ། །ནམ་ལངས་བར་དུ་ལྷ་ཡི་སྙིང་པོ་བཟླས། །འོད་དང་དུ་བ་རྔ་སྒྲ་སྤོས་དྲི་འཐུལ། །དྲོད་སྐྱེས་རླངས་པ་འཐུལ་ན་དངོས་གྲུབ་ཐོབ། །རྟོགས་མ་བྱུང་ཡང་དེ་ཉིད་ཟོས་པ་ཡིས། །ཚེ་རིང་ནད་ཉུང་རྒས་པ་སྲ་བ་ཡིན། །སྒྲུབ་ཚེ་ཉི་ཟླ་འཆར་སོགས་རྨི་ལམ་ལྟས། །
རྟགས་ཡིག་གཞན་དང་མཚུངས་པ་དུ་མ་འབྱུང་། །རས་བྲིས་དམ་ཚིག་རྡོ་རྗེ་རྟེན་དུ་བཅང་། །ཡི་དམ་དངོས་སུ་མོས་ལ་དད་འདུན་བསྐྱེད། །དུས་བཟང་དུས་སུ་བཤམས་ལ་མཆོད་པ་འབུལ། །དེ་མདུན་སྦྱིན་སྲེག་ཕུལ་ཞིང་གསོལ་བཏབ་ན། །ཇི་ལྟར་བསམ་པ་ཐམས་ཅད་འགྲུབ་པ་ཡིན། །དམ་ཚིག་རྡོ་རྗེ་མི་སྟོན་སྦས་ལ་འཆང་། །རས་བྲིས་སློབ་མའམ་ནི་དད་ལྡན་ལ། །ཞལ་བསྟན་ཕྱག་དང་མཆོད་པ་ཕུལ་བཅུག་པས། །སྒྲིབ་པ་དཔག་མེད་འབྱང་པར་གསུངས་པ་ཡིན། །དེ་ལྟར་བྱ་རྒྱུད་ཉམས་སུ་བླང་བ་ན། །ཡི་དམ་ལྷ་དེས་རྗེས་སུ་བཟུང་བའི་མཐུས། །མི་ནས་མིར་སྐྱེས་སྐྱེ་བ་དྲུག་ཅུ་ལ། །དེ་ལྟར་བྱ་རྒྱུད་ཉམས་སུ་ལེན་འགྱུར་ཞིང་། །དེ་ནས་ཚེ་འཕོས་མངོན་ཤེས་རྫུ་འཕྲུལ་སོགས། །ཡི་དམ་ལྷ་དེ་ཉིད་དང་མཉམ་འགྱུར་ཞིང་། །པོ་ཊ་ལ་སོགས་ལྷ་དེའི་ཞིང་ཁམས་སུ། །ལྷ་དང་ལྷ་མོའི་གཟུགས་ཅན་རིག་འཛིན་ནི། །རྟག་ཏུ་ལྷ་དེའི་ཞབས་འབྲིང་བྱེད་པར་འགྱུར། །མིང་ནི་གྲུབ་པའི་རིག་འཛིན་ཞེས་བྱ་སྟེ། །སྤྱན་རས་གཟིགས་དང་སྒྲོལ་མ་ལ་སོགས་པའི། །འཁོར་ལ་བྱེ་བ་དུང་ཕྱུར་ཡོད་པར་གསུངས། །དགོངས་པ་ངོ་བོ་རིགས་གསུམ་
མགོན་དང་མཉམ། །སྐབས་སུ་སྤྲུལ་པའམ་ནི་སྐྱེ་རྒྱུད་ནི། །ཕལ་ཆེར་བྲམ་ཟེའི་རིགས་སུ་སྐྱེ་འགྱུར་ཏེ། །བྱ་བའི་རྒྱུད་ཀྱི་བསྟན་པ་འཛིན་པར་བྱེད། །དཔེར་ན་བྲམ་ཟེ་སྐྱེ་བ་བདུན་པ་བཞིན། །མཐོང་ཐོས་དྲན་རེག་ཐམས་ཅད་འདྲེན་ནུས་སོ། །བྱ་རྒྱུད་ཉམས་སུ་ལེན་ཚུལ་དབྱངས་ཆུང་འདི། །རྟ་ལོ་རྒྱལ་ཟླའི་བཅུ་གཅིག་དགོང་ཐུན་མཚམས། །སྦྱིན་སྲེག་ཚར་མཚམས་བྱུང་རྒྱལ་སྨྲ་བ་པོ། །སྙིགས་དུས་དྲང་སྲོང་རཱ་ག་ཨ་སྱའོ། །ཡི་གེ་པ་ཡང་བཱིརྱ་སཱ་ག་ར།། ༈ །།ན་མོ་གུ་རུ་བཛྲ་པཱ་ཎི་ཡེ། །ལུས་ཀྱི་སྤྱོད་པ་བྱ་རྒྱུད་དང་འདྲ་ཞིང་། །སེམས་ཀྱི་ཏིང་ངེ་འཛིན་དང་གཉིས་ཀ་སྤྱོད། །དེ་ཕྱིར་སྤྱོད་པའི་རྒྱུད་ཅེས་བྱ་བ་ཡིན། །ལུས་ཀྱི་སྤྱོད་པ་བྱ་རྒྱུད་དང་མཚུངས་ཤིང་། །ཏིང་འཛིན་རྣལ་འབྱོར་རྒྱུད་དང་ཕྱོགས་འདྲ་ཙམ། །དེ་ཕྱིར་གཉིས་ཀའི་རྒྱུད་ཅེས་ལ་ལས་བཞེད། །ཆུ་དང་ཅོད་པན་དར་དཔྱང་དབང་གི་སྟེང་། །རྡོ་རྗེ་དྲིལ་བུ་མིང་གི་དབང་ཞུས་ཤིང་།སྔགས་ཀྱི་རྗེས་གནང་རིག་གཏད་སྒྲུབ་ལུང་ཞུ། །དེ་ནས་དཀྱིལ་འཁོར་བྲིས་སྐུ་མཆོད་རྫས་སོགས། །བྱ་བའི་རྒྱུད་དང་ཁྱད་པར་མེད་པ་ཡིན། །སྤྱོད་པ་ངག་བཅད་
སྨྱུང་གནས་མི་དགོས་ཏེ། །གསོ་སྦྱོང་ཡན་ལག་བརྒྱད་པ་ཉིན་བཞིན་ལས། །གདན་གཅིག་མི་དགོས་དཀར་གྲོ་དགོང་བཅད་ཆོག །དེ་དོན་མ་ཧཱ་མ་ཡའི་འགྲེལ་ཆེན་ལས། །སྨྱུང་བར་ཕྱི་དྲོའི་ཁ་ཟས་སྤངས་པའོ། །ཞེས་གསུངས་ཁྱིམ་པ་སྐྱེ་བོའི་བསྙེན་གནས་དང་། །འདི་ཡི་གསོ་སྦྱོང་ཡན་ལག་བརྒྱད་པ་གཉིས། །བསྲུང་ཚུལ་འདྲ་ཡང་དོན་ལ་མི་འདྲ་སྟེ་། །འདུལ་བ་ལས་གསུངས་བསྙེན་གནས་ཡན་ལག་བརྒྱད། །སློབ་དཔོན་ལ་ནི་ངེས་པར་ཞུ་དགོས་ཏེ། །རྟེན་གྱི་དྲུང་དུ་རང་གིས་ལེན་མི་ཆོག །འདི་ཡི་གསོ་སྦྱོང་སློབ་དཔོན་ཡོད་ན་རབ། །མེད་ན་ཉིན་རེ་བཞིན་དུ་རྟེན་དྲུང་བླང་། །འདུལ་བ་ནས་གསུངས་བསྙེན་གནས་ཡན་ལག་བརྒྱད། །ཁྱིམ་པ་རྣམས་ཀྱི་སྡོམ་པ་ཡིན་པའི་ཕྱིར། །རབ་བྱུང་རྣམས་ཀྱིས་སྲུང་བར་མི་རུང་སྟེ། །བསྲུང་ན་རབ་བྱུང་སྡོམ་ལ་གནོད་ཅེས་བཤད། །འདི་ཡི་གསོ་སྦྱོང་ཡན་ལག་བརྒྱད་པ་ནི། །ཉིན་ཞག་གཅིག་གི་སྡོམ་པ་ཡིན་ན་ཡང་། །ཐེག་ཆེན་བྱ་སྤྱོད་རྒྱུད་ཀྱི་སྡོམ་པ་སྟེ། །ཚངས་སྤྱོད་དགེ་བསྙེན་བནྡེས་དེ་བསྲུངས་ན། །དགེ་བསྙེན་ཉེས་བྱས་ཕྲ་ཞིབ་ཐམས་ཅད་དང་། །དོན་ལ་དགེ་བསྙེན་གསོ་སྦྱོང་ཡིན་པའི་ཕྱིར། །
གསོ་སྦྱོང་ཡན་ལག་བརྒྱད་པ་ཞེས་གྲགས་སོ། །གསོ་སྦྱོང་གོ་དོན་དགེ་བ་གསོ་བ་དང་། །སྡིག་པ་སྦྱོང་ཕྱིར་གསོ་སྦྱོང་ཞེས་བྱའོ། །དེ་བཞིན་དགེ་ཚུལ་དང་ནི་གིས། །ངག་བཅད་སྨྱུང་གནས་དཀར་ཕྱོགས་བྱས་པ་ན། །སྡོམ་པའི་ཉེས་ལྟུང་ཐམས་ཅད་སོར་ཆུད་ནས། །ཚུལ་ཁྲིམས་རྣམ་པར་དག་འགྱུར་རྒྱུད་ལས་གསུངས། །དེ་ཕྱིར་ཁྱིམ་པས་བསྙེན་གནས་སྲུང་བ་དང་། །བཙུན་པས་གསོ་སྦྱོང་ཡན་ལག་བརྒྱད་སྲུང་བ། །སྲུང་ཚུལ་འདྲ་ཡང་དོན་ལ་མི་འདྲ་བ། །མདོ་སྔགས་སོ་སོ་ཡིན་པ་མཁྱེན་པར་མཛོད། །དེ་ནས་དཀྱིལ་འཁོར་མདུན་དུ་རང་ཉིད་ནི། །སྐྱབས་འགྲོ་སེམས་བསྐྱེད་མཆོད་པ་བྱིན་རླབས་སོགས། །བྱ་བའི་རྒྱུད་དང་འདྲ་བར་བྱས་པའི་རྗེས། །སྭ་བྷཱ་ཝ་ཡི་སྔགས་ཀྱིས་སྦྱངས་བྱས་ཏེ། །སྟོང་པའི་ངང་ལས་པད་ཉིའམ་པད་ཟླའི་སྟེང་། །རང་སེམས་ས་བོན་ཡིག་འབྲུའི་འོད་ཟེར་འཕྲོས། །དོན་གཉིས་བྱས་ཏེ་འོད་ཟེར་ཚུར་འདུས་པས། །ས་བོན་ཕྱག་མཚན་ཡིག་འབྲུས་མཚན་པར་བསམ། །ལྷ་དེས་ཕྱག་རྒྱ་བཅིངས་ཤིང་སྔགས་བརྗོད་པས། །ཕྱག་མཚན་འོད་ཞུ་རང་ཉིད་ཡི་དམ་བསྒོམ། །རྒྱན་དང་ཆ་
ལུགས་སོ་སོའི་མངོན་རྟོགས་བཞིན། །གནས་གསུམ་ཨོཾ་ཨཱཿཧཱུྃ་གི་ཡི་གེ་གསུམ། །སྐུ་གསུང་ཐུགས་ཀྱི་ངོ་བོར་བྱིན་གྱིས་བརླབ། །ཡེ་ཤེས་སྤྱན་དྲངས་དབང་བསྐུར་རྒྱས་གདབ་མེད། །མདུན་གྱི་དཀྱིལ་འཁོར་སངས་རྒྱས་ཞིང་ཁམས་དབུས། །རིན་ཆེན་ཁང་བཟང་གྲུ་བཞི་སྒོ་བཞི་སོགས། །ཕྱི་རོལ་པད་རྭ་རྡོ་རྗེའི་རྭ་བ་དང་། །འོད་ཀྱི་ཕྲེང་བ་ལྕགས་རིའི་ཚུལ་དུ་སྐོར། །རྡོ་རྗེའི་གུར་སོགས་འདི་ལ་ཡོད་པ་མིན། །དཀྱིལ་འཁོར་མེད་ན་པད་སྡོང་འདབ་སྟོང་སྟེང་། །ཞི་ཁྲོའི་ཁྱད་ཀྱི་ཟླ་ཉི་གང་རུང་བསྒོམ། །སྤོས་བལྟམས་དྲིལ་བུ་གསིལ་ཞིང་ལག་གཡས་ཀྱིས། །བཞུགས་པའི་ཕྱོགས་ནས་རྡོ་རྗེས་གཡབ་ཚུལ་གྱིས། །སྤྱན་འདྲེན་ཚིག་གིས་བྱོན་ནས་མདུན་བཞུགས་བསམ། །བྱོན་སྐྱེམས་ཆུ་གཉིས་འབུལ་ཞིང་ཕྱག་འཚལ་ཏེ། །དེ་རྗེས་མཆོད་པ་ལྔ་ཡིས་མཆོད་ཅིང་བསྟོད། །དཀྱིལ་འཁོར་དྲུང་དུ་གདན་ནི་གཙང་མའི་སྟེང་། །སྐྱིལ་ཀྲུང་ཕྱེད་པས་འདུག་ཅིང་སེམས་རྩེ་གཅིག་བདག་མདུན་གཉིས་ཀའི་ཐུགས་ཀའི་གཞི་དེ་ན། །ཟླ་བའི་དཀྱིལ་འཁོར་ཉ་ནི་རྒྱས་པའི་སྟེང་། །ས་བོན་འགྲེང་སྟེ་གནས་མཐར་སྔགས་སམ་གཟུངས། །སྔགས་ཕྲེང་ཡིག་མགོ་
ཕྱིར་བསྟན་འཁོད་པར་བསྒོམ། །མདུན་གྱི་ཟླ་བ་སྔགས་ཕྲེང་སྒྲར་བཅས་ལ། །རྩེ་གཅིག་ཡིད་གཏད་ཅི་ནུས་བཟླས་པའི་མཇུག །མདུན་བསྐྱེད་ཐུགས་ལས་སྔགས་ཕྲེང་ཟླ་བ་བཅས། །འཕྲོས་ནས་རང་གི་སྔགས་ཕྲེང་ཟླ་བར་ཐིམ། །དེ་ལ་རྩེ་གཅིག་རིག་པ་གཏད་ལ་བཟླས། །དབུགས་ཀྱི་དབྱུང་རྔུབ་དང་ནི་སྤྱད་ན་ལེགས། །མ་ཐུབ་ནའང་མ་གསལ་བར་དུ་བསྒོམ། །ཐུན་མཚམས་མདུན་བསྐྱེད་དཀར་གསུམ་གཏོར་མ་བསྔོ། །བཞུགས་གསོལ་བྱས་ནས་རང་ཉིད་དམ་ཚིག་པ། །སྟོང་པར་བསྡུས་ནས་ཐ་མལ་ལུས་ཀྱིས་ནི། །ཐུན་མཚམས་སྤྱོད་པ་བྱེད་ཅིང་འདི་ལ་ནི། །ཐུན་དུས་ཇ་སོགས་བཏུང་བར་རུང་བ་སྟེ། །ཆབ་ལེན་ལྷམ་ཕུད་ལ་སོགས་བྱ་རྒྱུད་མཚུངས། །འདི་ཡི་ལུགས་ཀྱི་དུག་གསུམ་འདུལ་བའི་ཐབས། །ཡེ་ཤེས་སེམས་དཔའ་རྒྱལ་པོ་ལྟ་བུའི་མདུན། །རང་ཉིད་དམ་ཚིག་སེམས་དཔའ་བློན་པོའི་ཚུལ། །རྒྱལ་བློན་ཚུལ་དུ་དངོས་གྲུབ་སྒྲུབ་པ་སྟེ། །སྒྱུ་དཔེར་ན་འཁོར་ལོས་བསྒྱུར་རྒྱལ་མངོན་ཤེས་ཅན། །ཤིན་ཏུ་བཀའ་ཁྲིམས་བཙན་པའི་མདུན་དེ་ན། །ཡུད་ཙམ་བློན་པོས་རང་དོན་ཞུ་འབུལ་ཚེ། །རྒྱལ་པོའི་ཞལ་བལྟ་གསུང་
ཉན་དགོས་པ་ཡིན། །ཞེ་ནི་ཡེངས་བའི་ལོང་མེད་སྒྲིམ་པ་ལྟར། །ཡེ་ཤེས་ལྷ་དེ་མངོན་སུམ་མདུན་དུ་དམིགས། །གཟུངས་སྔགས་སྒྲ་ལ་རིག་པ་རྩེ་གཅིག་གཏད། །ལག་གཡས་ལྷ་དེའི་དམ་ཚིག་ཕྱག་རྒྱ་ནི། །སྙིང་གར་འཆང་ཞིང་གཡོན་པས་ཕྲེང་བ་བགྲང་། །རྩེ་གཅིག་མ་ཡེངས་ཁབ་མིག་སྐུད་འཛུད་བཞིན། །དེ་ཚེ་ཉོན་མོངས་སྐྱེ་བའི་གོ་སྐབས་མེད། །ཉལ་ཁར་རས་བྲིས་ཡོད་ན་དེ་ལ་བསྟིམ། །མེད་ན་ཡེ་ཤེས་གཤེགས་ཤིང་ཤིས་པ་བརྗོད། །སྔོན་ལྟར་ཕྱིར་ནངས་ལངས་ལ་གསོ་སྦྱོང་བླང་། །དགོང་བཅད་རྒྱུན་དུ་བྱ་ཞིང་བསྙེན་པ་བྱ། །དེ་ལྟར་ཟླ་དྲུག་ཟླ་གསུམ་ཟླ་གཅིག་སོགས། །རྟགས་ནི་རྟགས་ཡིག་སྤྱི་དང་མཐུན་པ་ཡིན། །དེ་ནི་བསྙེན་པ་ཡིན་ཅིང་དུས་དེའམ། །དུས་གཞན་དུ་ཡང་རུང་སྟེ་སྒྲུབ་པ་དང་། །དངོས་གྲུབ་ལེན་པའི་ཆོ་ག་བྱ་བ་ནི། །རས་བྲིས་དཀྱིལ་འཁོར་གང་འཛོམ་དེ་ཡི་དྲུང་། །དཀར་གསུམ་མཆོད་པ་གཟབ་ཅིང་སྦྱིན་སྲེག་འབུལ། །ཚེས་གཅིག་ནས་ནི་བཅུ་བཞིའི་བར་དག་ཏུ། །བསྙེན་པ་བྱེད་ཚུལ་སྔོན་དང་འདྲ་བ་སྟེ། །བཅོ་ལྔའི་ཉིན་ནུབ་གཉིས་ལ་སྔགས་རྒྱུན་ནི། །བཟའ་བཏུང་ཚེ་ཡང་ཡིད་འདོན་མ་ཆད་བྱ། །
གཟས་འཛིན་འགྲིགས་ན་ཤིན་ཏུ་བཟང་བ་ཡིན། །ཉི་མ་ནུབ་ནས་ནམ་ནི་མ་ལངས་པར། །ལུས་པོ་བསྲང་ལ་གཉིད་རྨུགས་མ་ཤོར་བར། །ལག་གཉིས་ལྷ་དེའི་ཕྱག་རྒྱ་ཐུགས་ཀར་བཅའ། །ཕྲེང་བ་མི་བགྲང་སྔགས་ནི་སིལ་བུར་བཟླ། །ཐོ་རངས་དུས་སུ་ལག་པའི་ཕྱག་རྒྱ་ལ། །མེ་འབར་འོད་འཕྲོ་མེ་སྟག་འཚུབ་པའམ། །ཡི་དམ་ཐང་སྐུ་བཞད་སོགས་རྟགས་འབྱུང་སྟེ། །གྲུབ་པ་ཡིན་པས་གང་འདོད་ལས་ཚོགས་འགྲུབ། །གལ་ཏེ་རྟགས་མཚན་ཅི་ཡང་མ་བྱུང་ཡང་། །དབང་བསྐུར་རབ་གནས་སྦྱིན་སྲེག་ལ་སོགས་པ། །སྤྱོད་རྒྱུད་སློབ་དཔོན་བྱ་བ་ཐམས་ཅད་རུང་། །སྐྱེ་བ་དྲུག་ཅུར་འབྲས་བུ་ཐོབ་ཚུལ་སོགས། །བྱ་བའི་རྒྱུད་དང་ཁྱད་པར་མེད་པར་བཤད། །བོད་འདིར་སྤྱོད་རྒྱུད་མང་དུ་མ་འགྱུར་ཏེ། །འབྱུང་འདུལ་རྒྱུད་འདི་སྤྱོད་རྒྱུད་ཉིད་དུ་ངེས། །གཞན་འགའ་ཞལ་མ་འཆམས་པས་འདིར་མ་བརྗོད། །བྱ་སྤྱོད་རྒྱུད་གཉིས་ཉམས་སུ་ལེན་དཀའ་ཡང་། །སྒྱུ་ཤེས་རབ་ཡོད་ཅིང་བླ་མ་བསྟེན་པའི་དྲིན། །ཟླ་ཤས་ཙམ་རེ་འབྲེལ་པ་བཞག་པ་ན། །མི་ལུས་དོན་ལྡན་སྐལ་པ་བཟང་པོ་ཡིན། །དེ་ཕྱིར་ཡིད་ལ་ཟུངས་ཤིག་བཱིརྱ་པ། །སྤྱོད་
རྒྱུད་ལུགས་ཀྱི་ཆོ་གའི་འགྲོས་དེ་ནི། །འབྲུག་ལུགས་ཡི་གེ་དྲུག་པའི་སྒྲུབ་ཐབས་ལགས། །དེ་མིན་མང་པོ་བདག་གིས་མ་མཐོང་ངོ་། །སྤྱོད་རྒྱུད་ཉམས་སུ་ལེན་པའི་དབྱངས་ཆུང་འདི། །རྟ་ལོ་རྒྱལ་ཟླའི་བཅུ་གཉིས་དགོང་ཐུན་ལ། །རཱ་ག་ཨ་སྱས་འཕྲལ་དུ་གང་དྲན་སྨྲས། །ཡི་གེ་པ་ཡང་བཱིརྱ་སཱ་ག་ར། །ལེའུ་བཅུ་དགུ་པའོ་མངྒ་ལཾ།། །།