ལེའུ་ཉི་ཤུ་པ། ཆོ་ག་འགྲིགས་ཆགས་ཕྱག་རྒྱ་མཁས་པ་ལ། །རྣལ་འབྱོར་རྒྱུད་སྒྲུབ་ངན་སོང་སྒོ་གཅོད་ཡོད། །
༼ཝ༽ རི་ཆོས་མཚམས་ཀྱི་ཞལ་གདམས་ལས། རྣལ་འབྱོར་རྒྱུད་ཀྱི་ཉམས་ལེན་ངན་སོང་སྒོ་གཅོད་ཅེས་བྱ་བ་བཞུགས། ན་མོ་གུ་རུ་བེ་རོ་ཙ་ན་ཡེ། བཱིརྱ་སཱ་ག་ར་ཁྱེད་སྙན་གསོན་དང་། །ངོ་མཚར་གཏམ་སྙན་འགའ་ཞིག་འདི་ན་ཡོད། །ལུས་ཀྱི་བྱ་སྤྱོད་གཙང་སྦྲ་གཙོ་མི་ཆེ། །ནང་གི་རྣལ་འབྱོར་ཏིང་འཛིན་གཙོ་ཆེ་བས། །དེ་ཕྱིར་རྣལ་འབྱོར་རྒྱུད་ཅེས་བྱ་བ་ཡིན། །ཤ་ཆང་ལ་སོགས་མི་གཙང་ཟས་རྣམས་ནི། །སྤང་བར་གསུངས་ཀྱི་གལ་ཏེ་མ་སྤང་ཡང་། །བྱ་སྤྱོད་བཞིན་དུ་གཏན་ནས་མི་རུང་མིན། །ཅི་ལྟར་བདེ་བར་དངོས་གྲུབ་སྒྲུབ་པའི་ཐབས། །དེ་ཕྱིར་སྔོན་ཚེ་ཆོས་རྒྱལ་ཁྲི་སྲོང་གིས། །རྒྱུད་སྡེ་བཞི་དྲུག་དཔག་མེད་བསྒྱུར་བའི་ནང་། །རྣལ་འབྱོར་རྒྱུད་ལ་ཤིན་ཏུ་ཐུགས་མཉེས་
ནས། །བསམ་ཡས་དབུ་རྩེའི་བར་ཁང་སྟེང་ཁང་དུ། །རྡོར་དབྱིངས་ལྷ་གྲངས་བཞེངས་པ་དེ་ལྟར་ལགས། །གསང་སྔགས་གསར་མའི་ཆོས་ཀྱི་ཆུ་ཕུགས་ནི། །མངའ་རིར་བྱོན་པའི་མ་ཧཱ་པཎྜི་ཏ། །སྡེ་སྣོད་རྒྱུད་སྡེ་རིག་གནས་ཀུན་ལ་མཁས། །འཇམ་དབྱངས་སྤྲུལ་པ་ལོ་ཆེན་རིན་བཟང་གིས། །རྣལ་འབྱོར་རྒྱུད་དང་ཁྱད་པར་སྤྱོད་རྒྱུད་འདི་། །བོད་ཡུལ་འདི་ན་རྒྱ་ཆེར་དར་བར་མཛད། །མཁས་པ་ཆེན་པོ་ཇོ་བོ་ཨ་ཏི་ཤས། །བོད་འདི་གཙང་སྦྲ་ཆུང་ཞིང་སྤྱོད་པ་རྩིང་། །བྱ་སྤྱོད་རྒྱུད་གཉིས་འགྲུབ་པའི་རེ་བ་མེད། །བོད་འདི་ཐེ་ཚོམ་ཆེ་ཞིང་རྣམ་རྟོག་ཧྲ །བླ་མེད་རྒྱུད་ནི་རྟོགས་པས་མི་ཆུན་ཏེ། །རྣལ་འབྱོར་རྒྱུད་འདིས་བོད་ལ་ཕན་འདུག་གསུངས། །རྒྱུད་སྡེ་བཞི་ཡི་ལྷ་ཚོགས་ཐམས་ཅད་ནི། །ཡེ་ཤེས་པ་ཡི་ལྷ་རུ་དོན་མཉམ་པས། །ལྷ་ལ་ཐེག་པ་མཐོ་དམན་ཡོད་མིན་ཏེ། །གདུལ་བྱའི་བློ་དང་འཚམས་པར་རྒྱུད་སྡེ་གསུངས། །དང་པོ་སྔོན་ལ་བྱ་རྒྱུད་། གསུངས་པའི་ཕྱིར། །རྒྱུད་སྡེ་བཞི་ཡི་རྩ་བ་བྱ་རྒྱུད་ཡིན། །དེ་ཕྱིར་བྱ་རྒྱུད་རང་ལུགས་ཉམས་ལེན་དང་། །བྱ་རྒྱུད་སྤྱོད་རྒྱུད་ལྟར་དུ་ཉམས་ལེན་ཡོད། །རྒྱ་གར་མཁས་པ་དགྲ་
ལས་རྣམ་རྒྱལ་པས། །བྱ་རྒྱུད་རྣལ་འབྱོར་རྒྱུད་ལྟར་ཉམས་ལེན་གསུངས། །དཔེར་ན་ཚེ་དཔག་ལྷ་དགུ་ལྟ་བུ་ཡིན། །དེ་བཞིན་ཇོ་བོ་རྗེས་ཀྱང་དེ་ལྟར་མཛད། །སྨེ་བརྩེགས་ལྗང་གུ་མི་འཁྲུགས་ཆོ་ག་བཞིན། །དེ་བཞིན་པཎ་ཆེན་རྡོ་རྗེ་གདན་པས་ཀྱང་། །བྱ་རྒྱུད་བླ་མེད་རྒྱུད་ལྟར་ཉམས་ལེན་མཛད། །དཔེར་ན་བི་མའི་རྣམ་འཇོམས་དཀར་པོ་བཞིན། །དེ་བཞིན་རྡོ་རྗེ་གདན་པ་ཆེ་ཆུང་གིས། །སྒྲུབ་ཐབས་རྒྱ་མཚོ་བརྒྱ་རྩ་གཉིས་པོ་དང་། །དབང་ཕྱུག་རྡོ་རྗེས་གཅིག་ཤེས་ཀུན་ཁྲོལ་གྱི། །བདག་མདུན་བུམ་གསུམ་དབང་གི་སྒྲུབ་ལུགས་ནི། །རྣལ་འབྱོར་རྒྱུད་དང་དགོངས་པ་མཐུན་པ་ཡིན། །སྐུ་གསུང་ཐུགས་ཀྱི་རྗེས་གནང་བྱ་ཚུལ་ནི། །གོང་གི་རྒྱ་གཞུང་དེ་དག་ཀུན་དང་མཐུན། །རྒྱས་པར་ཡོན་ཏན་ཕྲིན་ལས་དབང་བསྐུར་ནི། །ཞི་ཆས་ཁྲོ་ཆས་ཕྱག་མཚན་ལ་སོགས་དང་། །གཏོར་དབང་ལ་སོགས་རྙིང་མའི་དོན་བསྡུས་ཏེ། །དབང་བསྐུར་རྒྱལ་པོའི་རྒྱུད་ནི་ཆེན་པོ་དང་། །ཆོས་སྐྱོང་མགོན་པོའི་གཏོར་རྒྱུད་སོགས་དང་མཐུན། །དོན་ལ་གསར་རྙིང་ཀུན་གྱི་དགོངས་པ་བསྡུས། །ཀུན་མཐུན་ཀུན་ལས་ལྷག་པ་ཡིན་མོད་ཀྱི། །འདི་ལ་ཟུག་རྔུ་ལྡན་པ་
འགའ་ཞིག་གིས། །འདི་ཡི་རྒྱུད་ནི་གང་ལ་བརྟེན་པ་ཡིན། །ཟེར་ནས་ཅོ་འདྲི་བྱེད་པ་བདག་གིས་ཐོས། །རྡོར་ཕྲེང་སྒྲུབ་ཐབས་རྒྱ་མཚོ་བརྒྱ་རྩ་སོགས། །རྒྱུད་སྡེ་གཅིག་ལས་དེ་ལྟར་གསུངས་པ་མེད། །འོན་ཀྱང་པཎ་ཆེན་མཁས་པས་གཅིག་ཏུ་བསྡུས། །དེ་བཞིན་གསར་རྙིང་རྒྱུད་སྡེ་མཐའ་ཡས་དང་། །བཀའ་གཏེར་མན་ངག་ཀུན་གྱི་དོན་བསྡུས་ཡིན། །དེ་ཕྱིར་འདུས་ཆེ་ཟབ་ལ་རྒྱ་ཆེ་བ། །གྲུབ་མཐའ་གཞན་ལ་སྔོན་ཆད་མ་བྱུང་བས། །ཐེ་ཚོམ་སྤང་ལ་སྙིང་ལ་ཆོངས་ཤིག་ཀྱེ། །རྣལ་འབྱོར་རྒྱུད་ལ་མོས་པའི་དབྱངས་ཆུང་འདི། །རྟ་ལོ་རྒྱལ་ཟླའི་བཅུ་གཉིས་དགོང་ཐུན་མཚམས། །གྲོང་ཆོག་རྒན་པོ་རཱ་ག་ཨ་སྱ་ཡིས།། །ཟོས་ཚོད་དྲན་ནས་རྒྱུད་ལ་བསྟོད་པ་བྱས། །བིརྱ་སཱ་ག་ར་ཡང་དགོད་ཅིང་བྲིས།། ༈ །།ན་མོ་གུ་རུ་སརྦ་བིད་ཡེ། རི་ཁྲོད་འགྲིམ་ཞིང་ཉམས་སུ་ལེན་པའི་མིས། །རྣལ་འབྱོར་རྒྱུད་ལ་འབྲེལ་པ་འཇོག་བྱ་སྟེ། །རྩ་བའི་རྒྱུད་ནི་དེ་ཉིད་འདུས་པ་ཡིན། །དེ་ལ་རྡོ་རྗེ་དབྱིངས་ཀྱི་དཀྱིལ་འཁོར་གསུངས། །བཤད་པའི་རྒྱུད་ནི་རྡོ་རྗེ་རྩེ་མོ་ཡིན། །དེ་ལ་ཁམས་གསུམ་རྣམ་རྒྱལ་དཀྱིལ་འཁོར་གསུངས། །དེ་གཉིས་
རྡོར་ཕྲེང་སོགས་ལས་འབྱུང་མོད་ཀྱི། །ཆོ་གའི་ཁོག་ནི་ཀུན་རིག་སོགས་དང་མཐུན། །འོན་ཀྱང་དར་སྲོལ་ཆུང་ཕྱིར་སྤྲོས་པ་བསྐྱུང་། །འཕྲོས་པའི་རྒྱུད་ནི་ངན་སོང་སྦྱོང་རྒྱུད་དང་།། །གཙུག་དགུའི་རྒྱུད་ནི་གཉིས་ཀ་ཡིན་ན་ཡང་། །གཙུག་དགུའི་རྒྱུད་ལ་ལ་ལས་ཐེ་ཚོམ་བྱེད། །སྦྱོང་རྒྱུད་རྩོད་མེད་ཉི་ཟླ་ལྟ་བུ་ཡིན། །དེ་ལ་རྒྱ་གཞུང་འགྲེལ་ཆེན་བཞི་ཡོད་དེ། །དེ་དག་བཅུད་བསྡུས་རྣམ་གྲོལ་སྒོ་ཆེན་ཡིན། །འགྲེལ་ཆེན་དེ་དག་རྣམ་དང་མི་མཐུན་པས། །གཞན་ཕན་མཐའ་ཡས་གཞན་ཕན་འོད་ཟེར་གཉིས། །ཇོ་བོའི་སློབ་མ་གོ་མའི་སྒོམ་ཆེན་གྱིས། །ཟིན་བྲིས་མཛད་པའི་རྗེས་འབྲང་ཡིན་པར་བཞེད། །ཟིན་བྲིས་དེ་ཡང་ཇོ་བོའི་གསུང་རྒྱུན་ཏེ། །ཇོ་བོ་ལོ་ཆེན་གཉིས་པོ་ཞལ་འཛོམ་ཚེ། །ལོ་ཆེན་རིན་བཟང་ཅུང་ཙམ་མ་མགུ་ནས། །རྣལ་འབྱོར་རྒྱུད་ལ་ང་རང་མཁས་འདུག་གསུངས། །དེ་ཕྱིར་རྣམ་གྲོལ་སྒོ་ཆེན་ཁུངས་བཙུན་ནོ། །རང་རེ་བཙུན་པ་རི་ཁྲོད་འགྲིམ་པ་རྣམས། རྫོགས་པའི་སངས་རྒྱས་བསྒྲུབ་པར་སེམས་བསྐྱེད་ཀྱང་། །སྡོམ་གསུམ་ཉེས་ལྟུང་ཕྲ་ཞིབ་ཆར་ལྟར་འབབས། །མདོ་སྔགས་བསླབ་སྦྱངས་རྒྱ་ཆེར་མ་བྱས་པའི། །ཉེས་ལྟུང་ཕལ་
ཆེར་སྲུང་རྒྱུའང་ངོ་མི་ཤེས། །ཉེས་བྱས་བདུན་བརྩེགས་ལྟུང་བ་གཅིག་ཏུ་འགྱུར། །ལྟུང་བ་གཅིག་ལའང་བཤགས་པ་མ་ཐོན་ན། །ངན་སོང་གནས་སུ་ལན་གཅིག་སྐྱེ་དགོས་ཏེ། །རང་དོན་ངན་སོང་སྦྱོང་ཐབས་གལ་ཆེན་ཡིན། །བྱང་བུ་ཕྱིར་ལྡོག་བསྔོ་ཞུས་ལ་སོགས་པ། །ཟས་ནོར་དངོས་པོ་ལེགས་པར་ཕུལ་བ་ཡང་། །ངན་སོང་སྡུག་བསྔལ་ཨེ་སྐྱོབ་རེ་བ་བཅས། །གསར་རྙིང་མདོ་རྒྱུད་མ་ལུས་ཐམས་ཅད་ནས། །སྦྱོང་རྒྱུད་ལས་ལྷག་ངན་སོང་སྦྱོང་ཐབས་མེད། །གཞན་གྱི་དོན་ལའང་སྦྱོང་རྒྱུད་འདི་གལ་ཆེ། །ཆོ་གའི་འགྲོས་ནི་གཞུང་ལ་གསལ་བ་ལྟར། །ད་ནངས་སྔོན་འགྲོ་རེ་རེ་བཏང་བས་ཆོག །དེ་ནས་ཐུན་བཞིའམ་ནི་ཐུན་གསུམ་དུ། །བདག་བསྐྱེད་དེ་ཉིད་ཁོ་ན་ཝིག་ནས་འདོན། བདག་ཉིད་གཙོ་བོའི་ཐུགས་ཀར་ཟླ་བའི་སྟེང་། །རྡོ་རྗེ་རྩེ་ལྔ་ཧཱུྃ་གིས་མཚན་པའམ། །ཡང་ན་ཧཱུཾ་ཡིག་དཀར་པོ་བསྒོམ་པས་ཆོག །དེ་མཐར་རྩ་རིག་ཡིག་འབྲུ་འགྲེང་སྒྱུ་ཐབས་བཀོད། །འཁོར་རྣམས་ཐུགས་ཀར་ཟླ་སྟེང་ས་བོན་མཐར། །རང་རང་སྔགས་རྣམས་མོས་པ་ཙམ་གྱིས་ཆོག །གཙོ་བོ་ནས་བཟུང་ཁྲོ་བོ་བརྒྱད་ཡན་གྱི། །ལྷ་ཚོགས་
ཐམས་ཅད་བདག་ཉིད་ཡིན་པར་དམིགས། །ཀུན་གྱི་ཞལ་ནས་སྔགས་སྒྲ་སྒྲོག་པར་བསྒོམ། །སྔགས་ཕྲེང་འོད་ཟེར་གཡས་འཁོར་བསྒོམ་ཡང་རུང་། །ཡུམ་རྣམས་ཐུགས་ཀར་སྔགས་རྣམས་གཡོན་བསྐོར་བཀོད། །ཡིག་འབྲུ་འཁོར་བའི་གསལ་ཁ་མ་གསུངས་སོ། །ཐུགས་ཀའི་སྔགས་ལས་འོད་ཟེར་ཁ་དོག་ལྔ། །དཔྲལ་བའི་མཛོད་སྤུའི་སྒོ་ནས་ཕྱིར་ཐོན་ཏེ། །འོད་དེ་དཔེར་ན་ཉི་མ་ཤར་བ་བཞིན། །ཁམས་གསུམ་སྤྱི་དང་ཁྱད་པར་བར་དོ་དང་། །ངན་སོང་གསུམ་གྱི་འགྲོ་བ་ཐམས་ཅད་གསལ། །ངན་སོང་སྐྱེ་བའི་རྒྱུ་ཡི་སྡིག་སྒྲིབ་དང་། །འབྲས་བུ་ངན་སོང་སྡུག་བསྔལ་ཐམས་ཅད་ནི། །བ་མོར་ཉི་ཟེར་བཞིན་དུ་སངས་སེ་དག །འོད་ཟེར་ཚུར་འདུས་རང་གི་ཐུགས་ཀར་ཐིམ། །ཡང་ནི་སྔར་ལྟར་འོད་ཟེར་འཕྲོས་པ་ཡིས། །སངས་རྒྱས་ཀུན་ལ་མཆོད་སྤྲིན་རྒྱ་མཚོས་མཆོད། །འོད་ཟེར་དེ་ཡི་ཟེར་མ་རེ་རེས་ཀྱང་། །ཤཱཀ་ཐུབ་བཞིན་དུ་མཛད་པ་བཅུ་གཉིས་བསྟན། །འོད་ཟེར་ཚུར་འདུས་རང་གི་ཐུགས་ཀར་ཐིམ། །དེ་ལྟར་བསྒོམ་ཞིང་བསྙེན་པ་ཅི་འགྲུབ་བྱ། །ཐུན་མཚམས་བདག་བསྐྱེད་གཙོ་བོའི་ཐུགས་ཀ་ནས། །རང་ཉིད་ཐ་མལ་ལུས་སུ་ཕྱིར་ཐོན་
ནས། །གང་དགོས་བྱ་བ་གཞན་ལ་འཇུག་བྱ་སྟེ། །སླར་ཡང་ཉེ་རེག་ཚབ་དང་ཁྲུས་བྱས་ནས། །ཐུགས་ཀར་ཞུགས་ཏེ་བཛྲ་དྷ་ར་སོགས། །སྔགས་བརྗོད་རང་དང་དབྱེར་མེད་ང་རྒྱལ་བཟུང་། །བསྐྱེད་རིམ་འཕྲལ་དུ་གསལ་ནི་འདེབས་པའི་ཕྱིར། །བདག་བསྐྱེད་སླར་ཡང་ཝིག་པར་བྱ་བ་ཡིན། །ཉལ་ཁ་ཡེ་ཤེས་ལྷ་རྣམས་གཤེགས་དགོས་ཆ་ཏེ་། །རྒྱས་འདེབས་བྱས་ན་ཕྱག་རྒྱ་བཀྲོལ་གལ་ཆེ། །མ་གཤེགས་མ་བཀྲོལ་བཙོན་བཟུང་ཉེས་པར་བཤད། །སྐུ་གཟུགས་རིས་བྲིས་བསྟིམ་ལ་འགལ་བ་མེད། །བསྔོ་བ་སྨོན་ལམ་བྱས་ལ་གཉིད་ལོག་སྟེ། །ཕྱིར་ནངས་ལངས་ནས་སྔར་ཉིན་ལྟ་བུར་བྱ། །དུས་ནི་རབ་ནི་ཟླ་དྲུག་འབྲིང་གིས་གསུམ། །ཐ་མ་ཟླ་གཅིག་གིས་ཀྱང་རུང་བ་ཡིན། །རབ་ནི་རྩ་རིག་འབུམ་ཕྲག་བཞི་དང་ནི། །འཁོར་སྔགས་སོ་སོར་ཁྲི་ཕྲག་བཞི་རེ་དང་། །སྦྱིན་སྲེག་ཁྲི་ཕྲག་བཞིའམ་ཡང་ན་གཅིག །དེ་ནི་ཀུན་རིག་བསྙེན་པ་རྒྱས་པ་ཡིན། །འབྲིང་ལ་ཀླུ་ཕྲེང་སྐོར་རེ་རེའི་གོ་ལ་ནི། །རྩ་རིག་ཚང་མ་རེ་རེ་སྦྱར་བྱ་ཞིང་། །ཨོཾ་ཤོ་དྷ་ནེ་མན་ཆད་གྲངས་སུ་བཞག །དེ་ལ་བཞི་འབུམ་རིགས་བཞི་ཁྲི་ཕྲག་རེ། །ཡུམ་བཞིར་སྟོང་རེ་གཞན་
རྣམས་བརྒྱ་རེ་ཙམ། །ཁ་སྐོང་སྒྲིབ་སྦྱོང་སྦྱིན་སྲེག་རྒྱས་པ་གཅིག །དེ་ནི་ཀུན་རིག་བསྙེན་པ་འབྲིང་པོའོ། །ལྷ་ཚོགས་ཐམས་ཅད་བདག་ཉིད་ཡིན་བསྒོམ་ཞིང་། །རྩ་རིག་ལ་ནི་ལྷ་ཚོགས་ཀུན་འདུས་ཕྱིར། །རྩ་རིག་ཁོ་ན་རབ་ཏུ་འབུམ་ཕྲག་བཞི། །འབྲིང་དུ་གསུམ་དང་ཐ་མ་གཅིག་ཡན་ཆད། །ཅི་འགྲུབ་བཟླ་ཞིང་སྦྱིན་སྲེག་གྲུབ་ན་ལེགས། །མི་ཤེས་ན་ནི་ཕྱིར་ལྡོག་སྐབས་ཉིད་ནས། །གསུངས་ལྟར་ཏིལ་ལ་རང་གི་སྡིག་པ་བསྟིམ། །བརྒྱའམ་སྟོང་སོགས་ཅི་འགྲུབ་བསྲེགས་པས་འཐུས། །རྟགས་ནི་རྟགས་ཡིག་སྤྱི་དང་མཐུན་པ་སྟེ། །སྒྲིབ་པ་དག་པའི་རྟགས་མཚན་སྣ་ཚོགས་པ། །འབྱུང་ཚུལ་སྦྱོང་རྒྱུད་ཉིད་ནས་གསུངས་ལྟར་རོ། །སྦྱོང་རྒྱུད་འདི་ལ་བདག་བསྐྱེད་བསྙེན་པ་ལས། །སྒྲུབ་པ་ཟེར་བའི་གསལ་ཁ་མེད་ན་ཡང་། །དཀྱིལ་འཁོར་ལས་རིམ་སྒྲུབ་མཆོད་སྒྲུབ་པར་མཚུངས། །དེ་ལ་བདག་མདུན་བུམ་གསུམ་ཐུན་གསུམ་མམ། །ཐུན་བཞི་ལ་སོགས་ཚར་གྲངས་སྤྱི་ལྟར་ཏེ། །ཐུན་མཚམས་མདུན་བུམ་ལ་དམིགས་བསྙེན་པར་འབད། །མདུན་བུམ་རྣམས་ཀྱང་སྔགས་སྒྲ་སྒྲོག་པ་དང་། །ཐུགས་ཀའི་འཕྲོ་འདུའི་དམིགས་པ་སྔར་དང་འདྲ། །དེ་
ལྟར་ཞག་ནི་གསུམ་ལྔ་བདུན་ལ་སོགས། །འབད་པ་སྒྲུབ་མཆོད་ཅེས་ནི་བྱ་བ་སྟེ། །རང་དོན་ཡིན་ན་མཇུག་ཏ་བདག་འཇུག་བླང་། །གཞན་དོན་ཡིན་ན་གཞན་ལ་དབང་བསྐུར་རམ། །བྱང་བུ་ཕྱིར་ལྡོག་ལ་སོགས་གཞན་དོན་དུ། །མ་གྲུབ་བུམ་ཆུ་ཀུན་ལ་བཀྱེ་བར་བྱ། །བསྙེན་པའམ་ནི་འདི་ལྟར་སྒྲུབ་མཆོད་དུས། །བྱེ་མ་མང་པོར་སྔགས་ནས་ཚགས་བྱ་སྟེ། །རོ་དང་མི་དང་དུད་འགྲོའི་རུས་པ་ལ། །འདེབས་སམ་འདེབས་རྒྱུ་བསྐུར་ན་འགྲོ་དོན་ཆེ། །སྦྱོང་རྒྱུད་བསྙེན་པ་བྱ་ཚུལ་དབྱངས་ཆུང་འདི། །རྟ་ལོ་རྒྱལ་། ཟླའི་བཅུ་གསུམ་དགོང་ཐུན་ལ། །རཱ་ག་ཨ་སྱས་ཕྲལ་དུ་གང་དྲན་སྨྲས། །བཱིརྱ་སཱ་ག་ར་ཡིས་ཡི་གེར་བྲིས། ༈ །ན་མོ་གུ་རུ་སརྦ་བིད་ཡེ། །གསོན་དང་བླ་མ་བཱིརྱ་སཱ་ག་ར། །རྣམ་གྲོལ་སྒོ་ཆེན་དབང་དང་བདག་འཇུག་དུས། །དམིགས་རིམ་གཞུང་ན་མི་གསལ་ངག་ཁྲིད་ནི། །བདག་བསྐྱེད་དཀྱིལ་འཁོར་གཙོ་བོའི་ཐུགས་ཀ་ནས། །ཐ་མལ་ལུས་སུ་ཐོན་ལ་ཤར་སྒོའི་དྲུང་། །པུས་བཙུགས་ཐལ་མོ་སྦྱར་ཏེ་གནས་པར་བསམ། །མདུན་བསྐྱེད་གཙོ་བོ་རྩ་བའི་བླ་མ་གཉིས། །དབྱེར་མེད་དྲུང་དུ་སྡོམ་པ་དམ་ཚིག་དང་། །
དབང་རྣམས་ཞུ་བར་དམིགས་ལ་དབང་ཚིག་རྣམས། །མདུན་གྱི་གཙོ་བོས་གསུང་བསྒོམ་རང་གིས་འདོན། །བདག་འཇུག་རྫོགས་ནས་རང་ཉིད་རྡོར་སེམས་དེ། །བདག་བསྐྱེད་ཐུགས་ཀར་ཞུགས་ལ་དབྱེར་མེད་བསམ། །བཛྲ་དྷ་ར་ལ་སོགས་སྔགས་བརྗོད་ལ། །སློབ་མ་ལ་ནི་དབང་བསྐུར་བྱེད་པའི་ཚེ། །བདག་བསྐྱེད་ཐུགས་ལས་རང་ཉིད་གཙོ་རྐྱང་ངམ། །རྡོ་རྗེ་སེམས་དཔའི་རྣམ་པར་ཕྱིར་ཐོན་ཏེ། །ཤར་སྒོའི་འགྲམ་དུ་སེང་གེའི་ཁྲི་ལ་འདུག །རང་མདུན་འཇིག་རྟེན་འཁོར་ཡུག་རྣམས་ཀྱི་ནང་། །བར་ཁྱམས་སྟོང་པར་སློབ་མ་ཐམས་ཅད་བསྒོམ། །མདུན་གྱི་ལྷ་ལ་རང་གིས་ཞུ་སྣ་དང་། །ངོ་ཆེན་ཚུལ་དུ་བྱས་ནས་དབང་བསྐུར་ཏེ། །བསྐུར་ཚུལ་ཐམས་ཅད་གཞུང་དུ་གསལ་ན་ཡང་། །རྣལ་འབྱོར་རྒྱུད་ཀྱི་ཁྱད་ཆོས་ངོ་མཚར་ཅན། །ཟླ་བ་རྡོ་རྗེའི་སེམས་བསྐྱེད་ཅེས་བྱ་བ། །སྙིང་གར་ཀུན་རྫོབ་བྱང་ཆུབ་སེམས་དེ་ནི། །ཟླ་བའི་དཀྱིལ་འཁོར་ཉ་ནི་རྒྱས་པའི་སྟེང་། དོན་དམ་བྱང་ཆུབ་སེམས་ཀྱི་ངོ་བོ་ནི། །རྡོ་རྗེ་སྔོན་པོའམ་དཀར་པོ་རྩེ་ལྔ་པ། །བསྒོམ་ཞིང་སརྦ་ཡོ་གའི་སྔགས་བཟླས་པ། །ཏིང་འཛིན་དེ་བསྒོམ་སྔགས་དེ་བརྗོད་མ་ཐག་
ཤཱཀ་ཐུབ་མངོན་པར་རྫོགས་པར་སངས་རྒྱས་སོ། །དེ་ཕྱིར་བསྙེན་པའི་ཐུན་སྐབས་རྣམས་སུ་ཡང་། །དེ་ཉིད་བསྒོམ་ན་ཞི་ལྷག་ཏིང་འཛིན་སྐྱེ། །རྣལ་འབྱོར་རྒྱུད་ཀྱི་བསྒོམ་བྱའི་གཙོ་བོ་ཡིན། །དེ་མིན་དབང་གཞུང་ཉིད་དུ་གསལ་མོད་ཀྱི། །བདག་འཇུག་གམ་ནི་སློབ་མ་ཡིན་ཀྱང་རུང་། །མདུན་བསྐྱེད་ལྷ་ཚོགས་སོ་སོའི་ཐུགས་ཀ་ནས། །སོ་སོའི་སྔགས་ཕྲེང་ཡིག་འབྲུ་གསེར་གྱི་མདོག །འཕྲོས་ནས་སྤྱི་བོ་ནས་ཞུགས་ལུས་གང་བ། །སྔགས་དབང་དེ་ནི་ཀུན་གྱིས་ཤེས་ལྟར་རོ། །བདག་གི་ཡིད་ཀྱིས་མདུན་བསྐྱེད་གཙོ་བོ་ལ། །ཡིད་ཀྱིས་གསོལ་བ་བཏབ་པས་གཙོ་བོ་ཡིས། །འཁོར་ལྷ་རྣམས་ལ་དགོངས་པ་གཏད་ཙམ་གྱིས། །གཙོ་བོ་རིགས་ལྔས་དབང་བསྐུར་དགོངས་པ་གཏད། །ཡུམ་བཞིའི་ཐུགས་ལས་སྤྲུལ་པའི་ཡུམ་བཞི་ཡིས། །ཤར་སྒོའི་རྣམ་རྒྱལ་བུམ་པ་ནམ་མཁར་བཏེག །སློབ་མ་རྣམས་ཀྱི་སྤྱི་བོ་ནས་བླུགས་པས། །སྒྲིབ་པ་ཀུན་དག་ལུས་ནང་བདུད་སྒྱུ་རྩིས་གང་། །དེ་ཚེ་སེམས་དཔའ་བཅུ་དྲུག་བཀྲ་ཤིས་བརྗོད། །སྒེག་སོགས་བརྒྱད་ཀྱིས་གླུ་དང་རོལ་མོ་བྱེད། །ཁྲོ་བོ་བརྒྱད་ཀྱིས་བར་ཆད་བགེགས་རྣམས་སྲུང་། །དེ་ལྟར་
བསྒོམ་ཞིང་བུམ་པས་དབང་བསྐུར་རོ། །དེ་ནི་མི་བསྐྱོད་ངོ་བོ་ཆུ་ཡི་དབང་། །མི་བསྐྱོད་སྦྱོང་བའི་རྒྱལ་པོ་དོན་གཅིག་གོ །དེ་ནས་རིན་འབྱུང་རྒྱལ་མཆོག་རིན་ཆེན་གྱི། །ངོ་བོ་རིན་པོ་ཆེ་ཡི་དབུ་རྒྱན་ཞིག །ཡུམ་བཞིའི་སྤྲུལ་པ་སློབ་མའི་མགོར་བཅིང་བསམ། །དེ་བཞིན་མེ་ཏོག་ཁ་དོག་སྣ་ལྔ་ཡི། །ཕྲེང་བ་དང་ནི་དེ་བཞིན་དར་དཔྱང་ཡང་། །མགོ་བོའི་གནས་ལྔ་དང་ནི་གཡས་གཡོན་རྒྱབ། །ཡུམ་འི་སྤྲུལ་པས་དངོས་སུ་བཏགས་པར་བསྒོམ། །དེ་རྗེས་རྒྱལ་བ་རིགས་ལྔའི་ཐུགས་ཀ་ནས། །ཕྱག་རྒྱ་ལྔ་སྤྲོས་སློབ་མའི་ལག་པ་ཡི། །ཕྱོགས་བཞི་དབུས་དང་ལྔ་ལ་བཀོད་པར་བསམ། །དེ་ནས་སློབ་དཔོན་རང་གི་རྡོར་དྲིལ་ཐོགས། །མདུན་གྱི་གཙོ་བོའི་མིང་དེ་གདགས་པར་བསམ། །དེ་ཡན་ཐོབ་ནས་ཀུན་རིག་བསྒོམ་བཟླས་རུང་། །མ་སྨིན་སྨིན་བྱེད་སློབ་མའི་དབང་ཞེས་བྱ། །སྨིན་ཅིང་གྲོལ་ནས་འགྲོ་དོན་ནུས་པ་ལ། །གཞན་གྱི་སློབ་དཔོན་བྱ་ཕྱིར་སློབ་དཔོན་དབང་། །སློབ་མ་རྡོར་སེམས་བསྐྱེད་སོགས་གཞུང་དུ་གསལ། །དེ་ནས་རྡོ་རྗེ་སློབ་དཔོན་རང་ཉིད་ཀྱིས། །ཕྲིན་ལས་བཞི་མཚོན་སྣ་ཚོགས་རྡོ་རྗེ་དེ། །ལག་གཡས་གཏད་པས་
ཕྲིན་ལས་བཞི་འགྲུབ་བསམ། །གསེར་གྱི་འཁོར་ལོ་རྩིབས་སྟོང་ལྡན་པ་ཞིག །རྐང་པའི་བར་རམ་ལག་པ་གཡོན་དུ་བཞག །ཆོས་ཀྱི་འཁོར་ལོ་བསྐོར་བའི་དབང་ཐོབ་བསམ། །དེ་ནས་རྒྱལ་བ་རིགས་ལྔའི་ཐུགས་ཀ་ནས། །རང་རང་རིགས་ཀྱི་སེམས་དཔའ་ལྔ་འཕྲོས་ཏེ། །སློབ་མ་ལ་ཐིམ་རྣལ་འབྱོར་རྒྱུད་རྣམས་ཀྱི། །དཀྱིལ་འཁོར་རྣམས་ཀྱི་བདག་པོར་གྱུར་པར་བསམ། །དེ་ནས་ཡུམ་བཞིའི་ཐུགས་ཀར་ཕྱག་མཚན་དང་། །གཙོ་བོའི་ཡུམ་ནི་སྦས་པའི་ཚུལ་ཡིན་པས། །སྐུ་གཞོགས་གཡོན་ནས་ཆོས་འབྱུང་གཟུགས་ལ་སོགས། །ཕྱག་རྒྱ་འཕྲོས་ནས་སློབ་མ་ལ་ཐིམ་པས། །རྣལ་འབྱོར་རྒྱུད་ཀྱི་གསང་བའི་མན་ངག་རྣམས། །རང་གིས་རྟོགས་ཤིང་གཞན་ལ་སྟོན་རུང་གྱུར། །་དེ་བཞིན་རིགས་ལྔའི་སྐུ་ལས་སོ་སོ་ཡི། །ཕྱག་མཚན་འཕྲོས་ནས་སློབ་མ་ལ་ཐིམ་པས། །སྐུ་གསུང་ཐུགས་ཡོན་ཕྲིན་ལས་དབང་ཐོབ་སྟེ། །ཡེ་ཤེས་ལྔ་ནི་མྱུར་དུ་རྟོགས་པར་བསམ། །དེ་ནས་རྡོ་རྗེ་སློབ་དཔོན་རང་ཉིད་ཀྱིས། །སློབ་མའི་ལག་ཏུ་རྡོ་རྗེ་དྲིལ་བུ་བཞག །སློབ་མས་ཐབས་དང་ཤེས་རིབ་དོན་རྟོགས་བསམ། །སློབ་མས་རྡོར་དྲིལ་ཐུགས་
ཀར་བསྣོལ་བཅུག་སྟེ། །ཐབས་ཤེས་ཡ་བྲལ་བྱང་ཆུབ་ཐོབ་ཐབས་མེད། །ཐབས་ཤེས་ཟུང་འཇུག་དོན་དེ་རྟོགས་པར་བསྒོམ། །དེ་ཡན་དབང་གི་དངོས་གཞི་རྫོགས་པ་སྟེ། །མཐའ་རྟེན་རྒྱལ་སྲིད་སྣ་བདུན་དབང་བསྐུར་ནི། །ཤིས་བརྗོད་ཡིན་ཏེ་དོན་ལ་བཀྲ་ཤིས་ཡིན། །བྱ་སྤྱོད་རྒྱུད་ལ་སངས་རྒྱས་རྣམ་ཐར་དང་། །རྗེས་མཐུན་བཀྲ་ཤིས་རྫས་བརྒྱད་འཐོབ་པ་ཡིན། །རྣལ་འབྱོར་རྒྱུད་ལ་ཡོ་ག་རྒྱལ་པོ་དང་། །ཆོས་ལུགས་མཐུན་ཕྱིར་རྒྱལ་སྲིད་སྣ་བདུན་འཐོབ། །བླ་མེད་རྒྱུད་ལ་སངས་རྒྱས་མཚན་དཔེ་དང་། །རྗེས་སུ་མཐུན་པར་བཀྲ་ཤིས་རྟགས་བརྒྱད་ཐོབ། །བླ་མེད་རྒྱས་པར་འདོད་ན་གསུམ་ཀ་སྦྱར། །འདི་རུ་རྒྱལ་སྲིད་སྣ་བདུན་བྱ་བ་ཡང་། །ཐ་མལ་བུད་མེད་རྟ་དང་གླང་པོ་མིན། །ངོ་བོ་འཕགས་པའི་ནོར་བདུན་ཡིན་པ་ལ། །རྣམ་པ་རྒྱལ་སྲིད་སྣ་བདུན་དངོས་ལྟ་བུ། །གཙོ་བོའི་ཐུགས་ཀྱི་འོད་ཟེར་ལས་སྤྲུལ་ཏེ། །དཔེར་ན་སློབ་མར་བསྐོ་འཇའ་གནང་བའི་ཚུལ། །འཁོར་ལོ་ནོར་བུ་གཉིས་པོ་ལག་ཏུ་བཞག །བཙུན་མོ་སྐུ་གཞོགས་གཡོན་དང་བློན་པོ་གཡས། །དམག་དཔོན་རྒྱབ་དང་རྟ་གླང་གཉིས་པོ་མདུན། །གནང་སྦྱིན་ཚུལ་དུ་བྱིན་པར་
བསྒོམ་པ་སྟེ། །དེང་སང་སྟབས་བདེའི་ཕྱིར་དུ་མགོར་འགྲིམ་ཡང་། །བསྒོམ་པའི་དུས་སུ་དེ་ནི་མི་རུང་སྟེ། །དམག་དཔོན་མགོ་མནན་གླང་ཆེན་སྟེང་ནས་བཛིས། །དམིགས་པ་གསལ་ན་གནོད་ཅིང་རྟེན་འབྲེལ་ངན། །དེ་ནས་དམ་ཚིག་ཁས་ལེན་སྦྱིན་པ་ཡང་། །གསང་སྔགས་འདི་ལ་སངས་རྒྱས་བཀའ་ལས་ཀྱང་། །བླ་མའི་བཀའ་ནི་གཉན་ཅིང་ནུས་པ་ཆེ། །དེ་ཕྱིར་དམ་ཚིག་ཚུལ་བཞིན་བསྲུང་དགོས་ཞེས། །མི་བརྗོད་མི་ནག་ལ་སོགས་ཕལ་ཆེར་གྱིས། །རྒྱུད་ནས་གསུངས་པའི་དམ་ཚིག་ག་ལ་ཐུབ། །དེ་ཕྱིར་ད་ལྟ་ཅི་ཙམ་ནུས་ལྟར་བསྲུང་། །དེ་ནས་རིམ་བཞིན་རྟོགས་པ་ན་འཕར་ཚེ། །རིམ་བཞིན་རྒྱུད་ནས་གསུངས་ལྟར་བསྲུང་སྙམ་པའི། །མོས་པ་མཛོད་ཅེས་གཙོ་བོས་ཇི་ལྟར་བརྗོད། །དེ་ལྟར་རྣལ་འབྱོར་རྒྱུད་འདི་ཉམས་བླངས་པས། །མི་ནས་མིར་སྐྱེ་སྐྱེ་བ་བཅུ་དྲུག་ཏུ། །རྣལ་འབྱོར་རྒྱུད་འདི་ཉམས་སུ་ལེན་འགྱུར་ཞིང་། །དེ་ནས་ཚེ་འཕོས་སྒྱུ་རྣམ་སྣང་ཞིང་ཁམས་སོགས། །རིགས་ལྔ་གང་དུ་མོས་པའི་ཞིང་ཁམས་སུ། །དགོངས་པ་རིགས་ལྔ་དངོས་དང་མཉམ་འགྱུར་ཞིང་། །དོན་ལ་རྫོགས་པའི་སངས་རྒྱས་ཡིན་ན་
ཡང་། །ཆ་ལུགས་བྱང་ཆུབ་སེམས་དཔའི་ཚུལ་བཟུང་སྟེ། །རྟག་ཏུ་རིགས་བདག་དེ་ལས་ཆོས་ཉན་ཞིང་། །སྤྲུལ་པ་དུ་མས་འགྲོ་བ་འདྲེན་པར་བཤད། །རྣལ་འབྱོར་རྒྱུད་ཀྱི་དབང་དང་ལམ་འབྲས་བུ། །རྟ་ལོ་རྒྱལ་ཟླའི་བཅུ་གསུམ་དགོང་ཐུན་ལ། །རཱ་ག་ཨ་སྱས་མགུར་གྱི་ཚུལ་དུ་སྨྲས། །དེང་སང་བླ་མ་ཆེ་ཕྲ་ཐམས་ཅད་ཀུན། །སྦྱོང་རྒྱུད་སྒོ་ནས་གདུལ་བྱ་བསྡུ་དགོས་པས། །ཀུན་རིག་བསྙེན་པ་ཐེམ་པ་གལ་ཆེན་གདའ། །བསྙེན་པ་མ་ཐེམ་དབང་དང་བྱང་བུ་དང་། །རོ་སྲེག་ལ་སོགས་ཉེས་པ་ཆེ་བ་སྟེ། །བསྙེན་སོགས་་པར་མ་བྱས་ཞེས་བྱ་བ། །ཡན་ལག་ལྟུང་བ་བརྒྱད་ཀྱི་ཡ་གྱལ་བ། །ལྟུང་བ་སྦོམ་པོ་ཞེས་ནི་བྱ་བའོ། །བསྙེན་པ་ཐེམས་ནས་སྒྲིབ་སྦྱོང་སྒོ་བདུན་དང་། །རྒྱལ་བ་རིགས་ལྔ་ན་ལས་ཚོགས་ལྔ། །སེམས་དཔའ་བཅུ་དྲུག་ལས་ཚོགས་བཅུ་དྲུག་དང་། །དེ་བཞིན་ཁྲོ་བོ་བརྒྱད་ཀྱི་ལས་ཚོགས་བརྒྱད། །སྦྱོང་རྒྱུད་སྤྱི་ཡི་རས་བྲིས་ཆོ་ག་སོགས། །ལས་ཚོགས་རྣམས་ཀྱང་སྒྲུབ་རུང་འགྲུབ་པར་གསུངས། །དད་བརྩོན་ལྡན་པའི་བཱིརྱ་སཱ་ག་རས། །དཀའ་བ་དང་བླངས་ཞུན་མར་ངོགས་ལ་བྲིས། །བདག་འདྲའི་ཕྱི་རབས་རྨོངས་
པ་མང་པོ་ལ། །ལོང་བར་མིག་བྱིན་བཞིན་དུ་ཕན་ཆེར་ཤོག །ལེའུ་ཉི་ཤུ་ཐམ་པ་མངྒ་ལཾ།། །།