ལེའུ་ཉེར་གཅིག་པ། ཚེ་འདས་གཤིན་པོའི་སྒྲིབ་པ་སྦྱོང་བའི་ཕྱིར། །ལྷོ་སྒོའི་དམིགས་རིམ་ཐར་པའི་ལམ་སྟོན་ཡོད། །
༼ཞ༽ རི་ཆོས་མཚམས་ཀྱི་ཞལ་གདམས་ལས། ཀུན་རིག་རྣམ་གྲོལ་སྒོ་ཆེན་གྱི་ལྷོ་སྒོའི་ཆོ་གའི་དམིགས་རིམ་ཐར་པའི་ལམ་སྟོན་ཞེས་བྱ་བ་བཞུགས་སོ། །ན་མསརྦ་ཏ་ཐཱ་ག་ཏ་བིད་ཡེ། །སྦྱོང་རྒྱུད་གཙུག་དགུའི་རྒྱུད་རྒྱལ་ལྷ་ཡི་རྔ། །ཡོ་ག་མཁས་པ་གསུམ་གྱིས་བརྡུངས་བའི་སྒྲ། །ཚངས་པའི་དབྱངས་ལྟར་ཀུན་གྱི་རྣ་བར་སྙན། །དེ་ཕྱིར་རྣམ་གྲོལ་སྒོ་ཆེན་ཕྱག་ལེན་ནི། །ཀུན་གྱིས་ཤེས་ཤིང་དམིགས་རིམ་གཞུང་ཚིག་གསལ། །འོན་ཀྱང་ལྷོ་སྒོའི་ཆོ་ག་བསྡུས་དྲགས་པས། །དམིགས་རིམ་ཅུང་ཞིག་སློབ་དཔོན་ཞལ་ལས་ཤེས། །བློ་གསལ་རྣམས་ལ་ཕན་ཕྱིར་འདིར་བརྗོད་ན། །བདག་མདུན་གཉིས་ལས་མདུན་བསྐྱེད་གཙོ་ཆེ་ཞིང་། །ཚེ་འདས་ལྷོ་ཕྱོགས་གཤིན་རྗེའི་ཡུལ་སོང་བ། །དཀྱིལ་འཁོར་ལྷོ་ཡི་སྒོ་ནས་འགུག་དགོས་པས། །བདག་བསྐྱེད་དཀྱིལ་འཁོར་གཙོ་བོའི་ཐུགས་ཀ་ནས། །ལས་ལྷ་རྡོར་སེམས་སམ་ནི་གཙོ་རྐྱང་སྐུ། །རང་ཉིད་བྱས་ཏེ་དཀྱིལ་འཁོར་ལྷོ་སྒོའི་འགྲམ། །སེང་གེའི་ཁྲི་ལ་འདུག་པའི་ང་རྒྱལ་
བཟུང་། །བྱང་བུ་བསྐྱེད་ཚར་འགུག་གཞུག་བྱེད་པའི་སྐབས། །རང་གི་ཐུགས་ཀའི་འོད་ཀྱིས་གཙོ་བོ་བསྐུལ། །གཙོ་བོའི་འོད་ཀྱིས་སྒོ་བ་བཞི་པོ་བསྐུལ། །སྒོ་བ་བཞི་ལས་རང་འདྲ་གྲངས་མེད་སྤྲོས། །བྱམས་པའི་ལྕགས་ཀྱུས་ཚེ་འདས་སྙིང་ནས་བཟུང་། །སྙིང་རྗེའི་ཞགས་པས་ཚེ་འདས་མགུལ་ནས་བཅིང་། །རང་དབང་མེད་པར་བཀུག་ནས་བྱང་བུར་བསྟིམ། །ལྕགས་སྒྲོག་མ་ཡིས་དགའ་བའི་ལྕགས་སྒྲོག་བསྡམ། །མ་ཚར་བར་དུ་གཞན་དུ་མི་འཁྱར་བྱས། །དྲིལ་བུ་མ་ཡིས་བཏང་སྙོམས་དྲིལ་བུ་ཡིས། །ཤིན་ཏུ་དགའ་ཞིང་ཡིད་སེམས་བདེ་བ་བསྐྱེད། །ཐུགས་རྗེས་འཛིན་བྱེད་ལྕགས་ཀྱུའི་དམིགས་པའོ། །དེ་ནས་ལྟུང་བ་སློང་བའི་དམིགས་པ་ནི། །གལ་ཏེ་ངན་སོང་གསུམ་དུ་ལྷུང་ཚར་ན། །མདུན་བསྐྱེད་གཙོ་བོའི་ཐུགས་ཀའི་འོད་ཟེར་ནི། །ལྕགས་ཀྱུའི་དབྱིབས་ཅན་རྩེ་གསུམ་འོག་ཏུ་འཕྲོས། །ངན་སོང་གསུམ་ནས་ཚེ་འདས་ཡར་འཐེན་ཏེ། །རང་དབང་མེད་པར་བྱང་བུར་ཐིམ་པར་བསྒོམ། །ལྟུང་བ་སློང་བའི་སྔགས་དང་ཕྱག་རྒྱ་བྱ། །གལ་ཏེ་སྡིག་པས་ཕྱིར་འཐེན་མི་དྲོངས་ན། །མདུན་བསྐྱེད་ཐུགས་ཀའི་འོད་ཟེར་འཕྲོས་པ་ཡིས། །སྡིག་
དང་ཚེ་འདས་སོ་སོར་ཕྱེས་ནས་ཀྱང་། །དྲངས་བསྒོམ་སྡིག་པ་གྲོལ་བའི་སྔགས་རྒྱ་བྱས། །དེ་ཡན་ཚེ་འདས་བཀུག་པའི་རིམ་པའོ། །སྤྱིར་ནི་སྦྱོང་བ་བྱེད་ལུགས་ངོས་བཟུང་བ། །དུས་གསུམ་སངས་རྒྱས་མན་ནས་སྲིན་བུ་ཡན། །སྲོག་གཅོད་གཤེད་མ་ལས་ཀྱི་གཤིན་རྗེར་གསུངས། །འགྲོ་བ་ཀུན་གྱི་དབུགས་ནི་ལེན་པ་པོ། །དཔལ་ལྡན་ལྷ་མོ་ཡིན་པར་རྒྱུད་ལས་གསུངས། །གཞན་ཡང་དྲི་ཟ་ཀུན་ཏུ་ཁྱབ་བྱེད་དང་། །གནོད་སྦྱིན་རྟོགས་འདོད་འབྱུང་པོ་བ་ར་ཧི། །དེ་སོགས་ནག་ཕྱོགས་བདུད་རིགས་མང་པོ་ཡིས། །འཆི་ཁར་དབུགས་ལེན་ཕུང་པོ་བདག་དུ་འཛིན། །ཚེ་འདས་གཟུགས་བཟུང་གསོན་པོ་རྣམས་ལ་གནོད། །ཚེ་འདས་ལ་བསྔོས་ཟས་སྐོམ་བར་ནས་འཇོམས། །ཚེ་འདས་ཡིན་པར་བརྫུས་ནས་ཆ་ཕྲིན་བསྐུར། །དེ་འདྲ་དཔག་ཏུ་མེད་པར་ཡོད་པའི་ཚུལ། །ཚེ་འཕོས་ཇི་ལྟར་འགྱུར་བའི་མདོ་ལས་གསུངས། །དེ་དག་རྣམས་ནི་ཕྱེ་བར་མ་བྱས་ཉྩན། །གསོན་པོ་རྣམས་ལ་གནོད་པས་གསོན་བདུད་ཟེར། །གཤིན་པོ་ཡར་འགྲོ་མི་བཅུག་བཅག་པའི་ཕྱིར། །དེ་ལ་གསོན་བདུད་གཤིན་ལྕགས་ཞེས་བྱའོ། །དེ་ལ་རིགས་ནི་
དཔག་ཏུ་མེད་ན་ཡང་། །ཕོ་གདོན་མོ་གདོན་ཀླུ་གདོན་གསུམ་དུ་བཟུང་། །ཀླུ་གདོན་ཞི་བ་ཕོ་གདོན་དྲག་པོ་དང་། །མོ་གདོན་ཞི་དྲག་ཕྱེད་མས་སྦྱང་བར་གསུངས། །ཅོག་ལྡོག་ཟླུམ་པོ་ཞི་བའི་གཏོར་མ་གསུམ། །ཨ་ཀཱ་རོ་ཡིས་བདུད་རྩིར་བྱིན་གྱིས་བརླབ། །བྷྱོ་བི་ཤྭ་ལན་གསུམ་གཡས་བསྐོར་ཚེ། །དགའ་མགུ་བུ་ལོན་ལན་ཆགས་བྱང་བར་བསམ། །ཆངས་རྗེས་ཟུར་ལྔ་འདོད་ཡོན་ལྔ་པོ་མཚོན། །སོར་མོའི་རྗེས་དྲུག་རིགས་དྲུག་ལན་ཆགས་བྱང་། །འབུར་ཆུང་བཅུ་གཉིས་ལོ་བདུད་བཅུ་གཉིས་ཚིམ། །ཏིང་ལོ་མར་མེའི་གཟུགས་ཡིན་ལམ་སྒྲོན་དང་། །ཆངས་བུ་སྦྱིན་པ་ཞི་བར་ལན་ཆགས་སྦྱངས། །སུམ་བྷ་ནི་ནི་ཁྲོ་བོ་གནོད་མཛེས་སྔགས། །ལན་གསུམ་བརྗོད་ཅིང་གཡོན་དུ་བསྐོར་བའི་ཚེ། །ཆངས་བུས་ཚིམ་ཞིང་ཁྲོ་བོའི་སྔགས་ཀྱིས་སྐྱག །གླིང་བར་མུན་པའི་ནང་དུ་སོང་བར་བསམ། །དེ་ནི་ཞི་དྲག་ཕྱེད་མར་སྦྱང་བའོ། །དེ་ནས་བདེན་སྟོབས་བརྗོད་པས་དཀར་ཕྱོགས་འགྲོ། །ནག་ཕྱོགས་གདུག་པ་ཅན་རྣམས་མི་འགྲོ་བས། །བདག་གིས་མདུན་བསྐྱེད་གཙོ་བོ་ཡིད་ཀྱིས་བསྐུལ། །གཙོ་བོའི་དགོངས་པ་སྒོ་སྲུང་བརྒྱད་ལ་གཏད། །འཇིགས་
པའི་ཧཱུཾ་སྒྲའི་བསྟོད་པ་བརྗོད་ཙམ་གྱིས། །ཁྲོ་བོ་བརྒྱད་ལས་རང་འདྲ་དཔག་མེད་འཕྲོས། །དཔེར་ན་བྱ་སྤུ་རླུང་གིས་གཏོར་བ་བཞིན། །བགེགས་རྣམས་བསྐྲད་ནས་ཁྲོ་བོ་རང་རང་བསྟིམ། །དེ་ནི་དྲག་པོའི་སྒོ་ནས་སྦྱང་བའོ། །དཔེར་ན་བྱིའུ་ཁྲ་ཡིས་བཏང་བ་བཞིན། །གཤེད་དང་ཕྲལ་ནས་ཚེ་འདས་ལུས་སེམས་བདེ། །བག་ཕེབས་བཤད་པའི་ཆོས་རྣམས་ཉན་པར་བསམ། །དེ་ནས་རྫས་གཅིག་བརྟེན་པའི་སྦྱིན་སྲེག་ནི། །ཚེ་འདས་སྙིང་གར་ཡི་གེ་ཀཾ་ནག་པོ། །དེ་ལ་ལུས་ངག་ཡིད་གསུམ་སྒྲིབ་པ་ཐིམ། །ཀཾ་ཡིག་སྣ་བུག་གཡས་ཐོན་ཏིལ་ལ་ཐིམ། །མེ་ཉིད་ཞི་བའི་ཐབ་ཁུང་མེ་དཔུང་དབུས། །ཁྲོ་བོ་ཧཱུྃ་མཛད་མཐིང་ནག་རྡོར་དྲིལ་འཛིན། །ཞལ་ནི་མེ་ཡི་རང་བཞིན་གདངས་པའི་ནང་། །སྡིག་པ་བསྲེགས་ནས་ཁྲོ་བོ་མི་དམིགས་བསམ། །ཧཱུྃ་མཛད་སྒོམ་པ་བྱ་སྤྱོད་ཀུན་ལ་འཐད། །ཁྲོ་བོ་མ་སྒོམ་ན་ཡང་མི་འགལ་ཏེ། །ཕྱག་ན་རྡོ་རྗེས་འགྲོ་དྲུག་སྒྲིབ་སྦྱང་སྲེག་།རོ་རྣམས་རྒྱ་མཚོར་འདོར་བའི་ཚུལ་ཡིན་ཏེ། །མེ་དེ་ཆུ་རུ་འདོར་བས་འཐུས་པར་གསུངས། །ལ་ལས་ཟ་བྱེད་རྡོ་རྗེ་མཁའ་འགྲོ་བསྐྱེད། །དེ་ནི་བླ་མེད་རྒྱུད་ཡིན་མི་
འཐད་དོ། །བྱེ་མ་གཙང་མ་མི་ཡིས་མ་བརྫིས་པ། །སྡིག་སྒྲིབ་བསྲེག་པར་བྱ་བའི་རྟེན་འབྲེལ་གྱིས། །སླ་ངར་བརྗོས་ལ་གྲང་རྗེས་ཡུངས་ཀར་བསྲེ། །ཀུན་རིག་བསྙེན་དུས་བསྔགས་ནས་འཚགས་ན་མཆོག །མེད་ཀྱང་ཆོ་གའི་བསྙེན་པ་བྱེད་པའི་སྐབས། །ཕུ་འགྲིམ་བྱེད་པ་ཤིན་ཏུ་གལ་ཆེ་སྟེ། །མ་སྔགས་བྱེ་མ་བཏབ་པས་ཅི་ཞིག་ཕན། །རང་གི་ཐུགས་ཀའི་འོད་ཀྱིས་མདུན་བསྐྱེད་བསྐུལ། །ལྷ་ཚོགས་ཐུགས་ཀར་ཟླ་སྟེང་ས་བོན་མཐར། །རང་སྔགས་ཕོ་གཡས་མོ་གཡོན་དྲག་ཏུ་འཁོར། །དེ་ལས་འོད་ཟེར་ཁ་དོག་ལྔ་ལྡན་འཕྲོས་། །རང་རང་མཛོད་སྤུའི་སྒོ་ནས་ཕྱིར་ཐོན་ནས། །བྱེ་མ་དང་ནི་འོད་ཟེར་དབྱེར་མེད་པ། །ཚེ་འདས་ལ་ཐིམ་དུག་ལྔའི་སྡིག་སྒྲིབ་རྣམས། །བ་མོར་ཉི་ཟེར་ཕོག་པ་ལྟ་བུར་བསྒོམ། །རྒྱས་པར་དཀྱིལ་འཁོར་ཡོངས་རྫོགས་ལྷ་སྔགས་དང་། །བྲབ་སྔགས་འདོན་ཅིང་འབྲིང་པོ་རྩ་རིག་དང་། །བྲབ་སྔགས་གཉིས་བཟླས་བསྡུ་ན་རྩ་རིག་ཆོག །ཚན་ཆེར་སྔགས་པའི་བྱེ་མ་ཡོད་གྱུར་ན། །མི་དང་དུད་འགྲོའི་རོ་དང་རུས་པ་ལ། །ཕྱིར་ལྡོག་མིན་ཀྱང་འདེབས་རྒྱུ་བསྐུར་ན་ཕན། །དེ་ནས་ཁྲུས་ཀྱི་གོ་བ་ལེན་པ་ནི། །ཐུབ་རྣམས་
སྡིག་སྒྲིབ་ཆུ་ཡིས་མི་བཀྲུ་ཞིང་། །འགྲོ་བའི་སྡུག་བསྔལ་ཕྱག་གིས་མི་སེལ་ཏེ།། །འོན་ཀྱང་གདམས་ངག་བསྟན་ནས་སེལ་གསུངས་པ། །སྔགས་དང་ཏིང་འཛིན་མེད་པའི་ཆུ་གཙང་གིས། །ཕ་མའི་རུས་པ་བཀྲུས་ན་ཕན་ནོ་ཞེས། །ཕྱི་རོལ་པ་རྣམས་སྨྲ་བ་དགག་ཕྱིར་ཡིན། །སྔགས་ཅན་ཆུ་ཡིས་རང་གཞིན་ཁྲུས་བྱས་ན། །ལུས་ཅན་སྡིག་པ་འདག་ཅེས་རྒྱུད་ལས་གསུངས། །ལྷ་ལ་དྲི་མ་མེད་ཀྱང་ཁྲུས་གསོལ་བས། །རང་གཞན་སྒྲིབ་པ་དག་པའི་རྟེན་འབྲེལ་ཡིན། །མདུན་བསྐྱེད་དཀྱིལ་འཁོར་ཤར་གྱི་ཁྱམས་དེ་ན་། །ཁྲུས་ཀྱི་ཁང་པ་རིན་ཆེན་ཀ་བས་བཏེག །ལོགས་གསུམ་ཧད་པོར་ཡོད་པ་བསིལ་གཡབ་འདྲ། །དེ་ནང་མདུན་བསྐྱེད་དཀྱིལ་འཁོར་ལྷ་ཚོགས་རྣམས། །མེ་ལོང་ནང་གི་གཟུགས་བརྙན་ལྟ་བུར་བསམ། །མེ་ལོང་དེ་དང་དེ་གཉིས་དབྱེར་མེད་ཡིན། །དེ་ལ་ཁྲུས་གསོལ་སྐུ་ཕྱི་ན་བཟའ་གསོལ། །རྣམ་རྒྱལ་བུམ་པར་ལྷ་ཞུའི་བདུད་རྩི་དེས། །ལྷ་ཁྱུ་ཚོགས་སྐུ་ལུས་བཀྲུས་པའི་བྱིན་རླབས་ཅན། །ཁྲུས་ཆབ་བུམ་པ་གཞན་ནམ་ལས་བུམ་བླུགས། །དེ་ཡིས་བྱང་བུ་ལ་ནི་ཁྲུས་བྱ་སྟེ། །རྣམ་པ་བདུད་རྩི་ངོ་བོ་དཀྱིལ་འཁོར་ལྷ། །
ཕ་རོལ་ཕྱིན་དྲུག་རྫོགས་པའི་རང་བཞིན་ཆུས། །ཁྲུས་བྱས་ཉོན་མོངས་དྲུག་པོ་དག་པར་བསྒོམ། །དེ་ནས་དུག་བཅོམ་བྱེད་པའི་དམིགས་པ་ཡང་། །ཀུ་ཤ་རྨ་བྱའི་སྒོ་བཅས་ལག་ཏུ་ཐོགས། །རྨ་བྱ་དུག་རྣམས་འཇོམས་པའི་མཆོག་ཡིན་ཅིང་། །ཁ་དོག་ལྔ་ནི་ཡེ་ཤེས་ལྔ་པོ་མཚོན། །དེ་དབུས་ཟླ་དཀྱིལ་སྟེང་དུ་ཧཱུྃ་དཀར་པོ། །དེ་མཐར་རྩ་རིག་སྔགས་ཀྱིས་བསྐོར་བ་ལས། །འོད་ཟེར་ཁ་དོག་རྣམ་ལྔ་འཕྲོས་པ་ཡིས། །ཚེ་འདས་རྒྱུད་ཀྱི་དུག་ལྔའི་དུག་རྣམས་ཀུན། །རྩིག་གསེང་དུ་བ་རླུང་གིས་དེད་པ་ལྟར། །ཕྱི་རུ་བྱུང་དམིགས་སྒྲོ་ཡིས་བྱབ་ཚུལ་བྱ། །ངག་ཏུ་གཞུང་གི་བདེན་ཚིག་དེ་རྣམས་བརྗོད། །དེ་ནས་གཟུངས་བརྗོད་ཆུ་ཡིས་ཁྲུས་གཅིག་བྱ། །དེ་ནས་ས་ཆུ་མེ་གསུམ་མདུན་དུ་བཞག །ཡོད་ན་རླུང་གཡབ་མེད་ན་མེ་ལོང་བཞག །ཚིགས་བཅད་བརྗོད་ཅིང་བསྐོར་ལ་དོར་བའི་ཚེ། །གང་བའི་ནང་དུ་དུག་སོང་ཟེར་བའི་དོན། །ཚེ་འདས་རྒྱུད་ཀྱི་འབྱུང་བཞི་སོ་སོའི་དུག ། འབྱུང་བཞི་སོ་སོའི་རྫ་ས་ལ་ཐིམ་པར་བསྒོམ། །རྒྱས་པར་རྩ་རིག་བསྡུ་ན་ཚིགས་བཅད་ཀྱིས། །བྱང་བུ་ལ་ནི་བསྐོར་ཞིང་ཕྱིར་ལ་དོར། །མཇུག་ཏུ་གཟུངས་བཅས་ཁྲུས་གཅིག་
བྱེད་པ་ཡིན། །གང་སེར་མ་ནི་ཤིས་བརྗོད་ཡིན་པ་སྟེ། །བདག་དང་དཀྱིལ་འཁོར་ལྷ་ཚོགས་ཐམས་ཅད་ཀྱིས། །ཚེ་འདས་ལ་ནི་མེ་ཏོག་ཆར་འབེབས་ཤིང་། ཚངས་པའི་དབྱངས་ཀྱིས་ཤིས་པ་བརྗོད་པར་བསམ། །དེ་ནས་དཀྱིལ་འཁོར་ལྷ་ལ་ཕྱག་འཚལ་བ། །ཚེ་འདས་ལུས་ནི་གྲངས་མེད་སྤྲུལ་བྱས་ནས། །རང་གིས་རམ་བུ་བཀྱག་ཅིང་ཕྱག་འཚལ་བསམ། །གང་གི་དྲིན་གྱིས་བླ་མར་ཕྱག་འཚལ་དང་། །སྨྲ་བསམ་བརྗོད་མེད་ཆོས་སྐུར་ཕྱག་འཚལ་ཏེ། །རྒྱས་པར་ཆོས་དབྱིངས་ཡེ་ཤེས་ཤོ་ལོ་ལྔ། །བསྡུ་ན་ཆོས་སྐུ་ནམ་མཁའ་ཤོ་ལོ་གཅིག །དེ་ནི་ལོངས་སྐུའི་ལྷ་ལ་ཕྱག་བཙལ་ཡིན། །དེ་ནས་ཐབས་མཁས་ཐུགས་རྗེས་སྟོན་པ་ལ། །དེ་ནས་གྲགས་ཆེན་ཤེས་རབ་སངས་རྒྱས་སྟོང་། །སྐུ་ཡི་དཀྱིལ་འཁོར་དབང་ཕྱུག་རྡོ་རྗེ་ལ། །མཁྱེན་རབ་ཐུགས་རྗེས་མཆོག་གི་སྤྲུལ་སྐུ་ལ། །ཕྱོགས་བཅུར་བཞུགས་པའི་སངས་རྒྱས་བྱང་སེམས་ཀུན། །དེ་བཞིན་སྒྱུ་སྤྲུལ་སྐུ་དང་ནི་སྤྱི་ལའོ། །དེ་ནས་ཚེ་འདས་ལུས་ཀུན་གཅིག་ཏུ་བསྡུས། །དཀྱིལ་འཁོར་ལྷ་ལ་སྐྱབས་ཚོལ་སྨྲེ་སྔགས་ནི། །རང་གིས་ངོ་ཆེན་ཚུལ་དུ་ཞུ་རོགས་དང་། །ཚེ་འདས་
ལུས་རྙིང་དོར་དང་ལུས་གསར་ལེན། །ད་ལྟ་བར་དོའི་ཡིད་ལུས་དང་བཅས་པ། །ཅི་མཛད་ཁྱེད་ཤེས་ཚུལ་དུ་འབུལ་བསམ་ཞིང་། །གཙོ་རྒྱལ་མ་ནི་དབྱངས་བཅས་གྱེར་བ་ཡིན། །དེ་ཡང་ལྷོ་སྒོའི་ཆོ་ག་ཞེས་བྱའོ། །དེ་ནས་རང་ཉིད་གཙོ་རྐྱང་ང་རྒྱལ་གྱིས། །ཚེ་འདས་ཁྲིད་ནས་མདུན་བསྐྱེད་དཀྱིལ་འཁོར་ལ། །བསྐོར་བ་ལན་གསུམ་བྱས་ནས་ཤར་སྒོ་ཡི། །གཡས་འགྲམ་རྣམ་རྒྱལ་བུམ་པ་བཞུགས་པ་སྟེ། །གཡོན་འགྲམ་སེང་གེའི་ཁྲི་ལ་རང་ཉིད་བཞུགས། །རང་མདུན་འཁོར་ལོ་དཀར་པོ་རྩིབས་བརྒྱད་སྟེང་། །པདྨ་དཀར་པོ་འདབ་བརྒྱད་ལྟེ་བ་ལ། །ཚེ་འདས་པུས་བཙུགས་ཐལ་སྦྱར་མེ་ཏོག་ཐོགས། །རས་དཀར་དྲི་མེད་གྱོན་ནས་ཐལ་སྦྱར་བསམ། །ཚེ་འདས་ཉིད་ཀྱིས་རྗེས་ཟློས་བྱེད་བསྒོམ་ལ། །རྒྱུད་ལས།་མིང་ལ་ཡང་དབང་བསྐུར་བར་གྱིས་ཤིག །གཟུགས་བརྙན་ལ་ཡང་དབང་བསྐུར་བར་གྱིས་ཤིག །གསུངས་ཕྱིར་དབང་བསྐུར་སྤྱི་དང་མཐུན་པར་བྱ།་་་་དབང་གི་དམིགས་རིམ་ཞལ་ཁྲིད་རྣལ་འབྱོར་རྒྱུད་སྒྲུབ་ངན་སོང་སྒོ་གཅོད་ལ་བལྟ་བར་བྱའོ། །མཆན། །སློབ་མའི་དབང་བསྐུར་ཁོ་ནས་ཆོག་མོད་ཀྱི། །ཚེ་འདས་དེ་ཉིད་སྐྱེ་བ་གཞན་རྣམས་སུ། །རྡོ་རྗེ་སློབ་དཔོན་གོ་
འཕང་ཐོབ་བྱའི་ཕྱིར། །རྡོ་རྗེ་སློབ་དཔོན་དབང་ཡང་རུང་བ་ཡིན། །སྐྱེ་བ་གཞན་དུ་འཁོར་ལོས་བསྒྱུར་རྒྱལ་སོགས། །འབྱོར་པ་ཐོབ་ཕྱིར་རྒྱལ་སྲིད་དབང་བསྐུར་རུང་། །དེ་ནས་འདོད་ཡོན་ཟས་བསྔོའི་དོགས་གཅོད་ལ། །ཕ་མ་སྔར་དུས་ཤི་ལ་ལོ་དུས་བཞིན། །ཟས་བསྔོ་བྱ་ཚུལ་མདོ་ཞིག་མདོ་མང་བཞུགས། །སྔོན་ཚེ་བོད་འདིར་རྒྱལ་རབས་ཉེར་ལྔ་ལ། །དམ་ཆོས་མ་དར་བོན་ལུགས་དར་ཆེ་བས། །རྒྱལ་པོ་རྣམས་ལ་བང་སོའི་མཆོད་པ་ཟེར། །ཕལ་པ་རྣམས་ལ་ལོ་དུས་ཤི་བའི་ཚོད། །གཏད་ཡར་ཞེས་པ་མཆོད་པ་རྒྱ་ཆེར་དང་། །བྱང་བུ་ལ་ནི་རྟ་ཡི་སྲབ་མདའ་གཏད། །བྱང་བུ་རྟ་གོང་བསྐྱོན་ལ་བྱ་རུ་ཟེར། །དེ་བཞིན་ཁལ་མའི་སྣ་ཐག་གོ་ཁྲབ་སོགས། །ཟས་དང་ཆོས་ཀ་བྱང་བུ་ལ་བསྔོས་ནས། །དེ་རྣམས་སློབ་དཔོན་ཉིད་ཀྱིས་ཁྱེར་སྲོལ་བྱུང་། །བནྡེའི་ལུགས་ལ་དེ་རྣམས་མེད་པའི་ཕྱིར། །བོན་རྣམས་མ་མགུ་བན་ལ་མ་དད་པས། །ཨོ་རྒྱན་ལ་ལྟ་སོགས་པཎྜི་ཏ་རྣམས་ཀྱིས། །བོན་ལ་དཔེ་བླངས་ཟས་གཏད་ཆོ་ག་ནི། །དཀར་ཆོག་ཅེས་བྱ་ཙཀྲི་གཏད་རྒྱུ་མཛད། །དེ་ཉིད་དེང་སང་ཧོར་སོག་ཕྱི་འབྲོག་ལ། །ཀུན་རིག་ཞི་ཁྲོ་
སོགས་ལའང་སྦྱར་རོ་སྐད། །དེ་ཡི་ལུགས་ལ་ཤ་ཡང་གཏད་རྒྱུ་ཡོད། །དེ་མིན་ཀུན་རིག་མི་འཁྲུགས་རང་རྐང་ལ། །ཚེ་འདས་རྒྱུད་སྡེ་འོག་མའི་ལྷར་བསྐྱེད་པས། །འདོད་ཡོན་ཤ་ཆང་བཤམས་པ་མི་འཐད་དོ། །བསྔོས་པ་མ་གཏོགས་བཤམས་པས་མི་འཐོབ་པས། །འདོད་ཡོན་ལྔ་པོ་ཕྱག་ལེན་བཞིན་དུ་བསྔོ། །བར་དོའི་ཡིད་ལུས་དྲི་ཡིས་ཚིམ་པའི་ཕྱིར། །གསུར་ནི་བྱེད་པའི་རྒྱུ་མཚན་དེ་ལྟར་ཡིན། །སྦྱོང་རྒྱུད་འགྲེལ་པར་ཁྱི་སྙིང་ཕུ་བ་ལ། །ཆགས་བཞིན་འདོད་ཡོན་མ་བསྔོས་མི་འགྲོ་གསུངས། །དཔེར་ན་གལ་ཆེན་འགྲིམ་པ་ཐག་རིང་དུ། །འགྲོ་ཁ་བཟའ་བཏུང་གཟབ་ནས་གཏོང་དང་འདྲ། །བར་དོའི་སྐབས་སུ་བཀྲེས་སྐོམ་ཞི་བ་དང་། །སྐྱེ་བ་གཞན་དུ་འབྱོར་པའི་རྟེན་འབྲེལ་འགྱུར། །འབྲོག་པ་རྣམས་ཀྱིས་ཚེ་འདས་རྣམ་ཤེས་ཀྱིས། །བཙོག་ལྟ་བྱེད་འདུག་བསམ་ནས་སྡུག་དོགས་ཟེར། །འདོད་ཡོན་གསོན་པོ་རྣམས་ཀྱིས་ཟ་སྲོལ་སྣང་། །ཟོས་ཀྱང་མི་རུང་བ་ནི་མེད་ན་ཡང་། །བྱ་ཁྱི་སྤྲང་པོ་སོགས་ལ་བྱིན་ན་ལེགས། །དེ་ནས་བྱང་བུ་བཞུ་བའི་ཕྱག་ལེན་ནི། །དེ་ཡན་རང་ཉིད་དཀྱིལ་འཁོར་ཤར་སྒོའི་དྲུང་། །གཙོ་རྐྱང་ངམ་ནི་རྡོར་
སེམས་སྐུར་བཞུགས་པ། །བདག་བསྐྱེད་དཀྱིལ་འཁོར་གཙོ་བོའི་ཐུགས་ཀར་ཞུགས། །རང་ཉིད་བདག་བསྐྱེད་གཙོ་བོའི་ང་རྒྱལ་བྱ། །དེ་ནས་བདག་མདུན་རིགས་ལྔ་ཡུམ་བཞི་དང་། །ལྷ་ཚོགས་ཀུན་གྱི་སྐུ་ལས་འོད་ཟེར་ནི། །ཁ་དོག་སྣ་ལྔ་མེ་ཡི་རང་བཞིན་འཕྲོས། །སློབ་མ་རྡོར་སེམས་སྐུ་རུ་བསྐྱེད་མོད་ཀྱང་། །ད་དུང་བག་ཆགས་ཡིད་ལུས་དབང་ཆེ་བས། །མ་དག་ཆ་ཡི་ཕུང་པོ་ལྔ་པོ་དེ། །རིགས་ལྔའི་སྐུ་ལས་ཡེ་ཤེས་རྣམ་ལྔ་ཡི། །མེ་འཕྲོས་བསྲེགས་པས་རིགས་ལྔའི་ངོ་བོར་བསྒྱུར། །ཡུམ་བཞིའི་སྐུ་ལས་འཕྲོས་པའི་མེ་དཔུང་གིས། །ཤ་ཁྲག་དྲོད་དབུགས་ཁམས་ཀྱི་བག་ཆགས་སྲེག །སེམས་དཔའ་རྣམས་ལས་འཕྲོས་པའི་མེ་དཔུང་གིས། །མིག་སོགས་དབང་པོ་དྲུག་གི་བག་ཆགས་སྲེག །སྒེག་སོགས་ལྷ་མོ་ལས་འཕྲོས་མེ་དཔུང་གིས། །གཟུགས་སྒྲ་དྲི་སོགས་ཡུལ་ལྔའི་བག་ཆགས་སྲེག །ལྷ་ཚོགས་ཀུན་གྱི་དཔྲལ་མགྲིན་ཐུགས་ཀ་ནས། །འོད་སྤྱི་ཟེར་མེ་དཔུང་དཀར་དམར་མཐིང་འཕྲོས་པས། །ལུས་ངག་ཡིད་ཀྱི་སྒྲིབ་གསུམ་བག་ཆགས་སྲེག །ཚེ་འདས་ལུས་ཀྱི་རྣམ་པ་བསྲེགས་ཏེ་སྦྱངས། །སེམས་ནི་ཨ་ཡིག་དཀར་པོ་དྲི་
མེད་གྱུར། །རྩ་བརྒྱུད་བླ་མའི་ཐུགས་ཀྱི་རྟོགས་པ་དང་། །དཀྱིལ་འཁོར་ལྷ་ཚོགས་ཐུགས་ཀྱི་ཡེ་ཤེས་དང་། །རྣལ་འབྱོར་རང་གི་ཉམས་ལེན་རྟོགས་པ་དང་། །ཚེ་འདས་སེམས་རྒྱུད་དབྱེར་མེད་གཅིག་ཏུ་བསྲེ། །འབྲེལ་པ་ཐོགས་ཆོག་ཀརྨ་པ་མཁྱེན་སོགས། །ཉམས་ལེན་ལྟ་བའི་ངང་ནས་རྒྱང་འབོད་བྱ། །ཤེར་སྙིང་ནང་གི་གཟུགས་མེད་སྒྲ་མེད་ནི། །ཆོས་མེད་བར་གྱི་ཚིག་སྡུམ་དེ་བརྗོད་ནས། །ཀཾ་ཀ་ནི་དང་རྩ་རིག་བཟླས་ཤིང་བསྲེག །དེ་ནས་དཀོན་མཆོག་རིན་ཆེན་སོགས་བརྗོད་ཚེ། །ཤར་སྒོའི་འགྲམ་གྱི་རྣམ་ཤེས་ཨ་ཡིག་དེ། །ཡར་ཡར་བཀྱག་ནས་བདག་མདུན་གཉིས་ཀྱི་བར། །བར་སྣང་ཁམས་སུ་ཟླ་བའི་གདན་ལ་བཞག །དེ་ནས་ལམ་བསྟན་མཚམས་འདིར་དོགས་གཅོད་ནི། །དཀྱིལ་འཁོར་གཙོ་བོ་རྣམ་སྣང་ཡིན་པའི་ཕྱིར། །རྣམ་སྣང་ཞིང་ཁམས་སྟུག་པོ་བཀོད་པ་རུ། །ལམ་སྟོན་འོས་ཀྱང་མི་བྱེད་པ་ཡི་དོན། །དེ་རུ་ས་བརྒྱད་མ་ཐོབ་སྐྱེ་མི་སྲིད། །ལས་ལྷ་རྡོ་རྗེ་སེམས་དཔའ་ཡིན་པ་དང་། །ཚེ་འདས་རྡོ་རྗེ་སེམས་དཔར་བསྐྱེད་པའི་ཕྱིར།། །མངོན་དགའི་ཞིང་དུ་ལམ་སྟོན་འོས་ན་ཡང་། །ས་ཐོབ་སེམས་དཔའ་མ་གཏོགས་དེར་
མི་སྐྱེ། །སྦྱོང་རྒྱུད་གླེང་གཞིར་ལྷ་བུ་དྲི་མེད་དེ། །མནར་མེད་གནས་ནས་ལྷ་ཡུལ་དྲངས་པའི་ཕྱིར། །དགའ་ལྡན་གནས་སུ་ལམ་བསྟན་འོས་ན་ཡང་། །དེ་རུ་སྐྱེས་ཀྱང་ཕྱིར་ལ་ལྟུང་བ་སྲིད། །མཚམས་མེད་བྱས་དང་དམ་ཆོས་སྤངས་མ་གཏོགས། །སྨོན་ལམ་བཏབ་ན་སྐྱེ་བར་ནུས་པ་དང་། །དེ་རུ་སྐྱེས་ནས་ཕྱིར་མི་ལྡོག་པ་ནི། །འོད་དཔག་མེད་ཀྱི་སྨོན་ལམ་སྟོབས་ཡིན་པར། །འོད་མདོ་ཞིང་བཀོད་མདོ་སྡེ་གཉིས་ལས་གསུངས། །དཀྱིལ་འཁོར་འདི་དང་ཞིང་དེ་འབྲེལ་བའི་དོན། །བཅོམ་ལྡན་རྣམ་པར་སྣང་མཛད་ཆེན་པོ་འདི། །སྤྱན་རས་གཟིགས་ཀྱི་སྤྲུལ་པ་ཡིན་པར་གསུངས། །དོན་ལ་སྤྱན་རས་གཟིགས་ཀྱི་དཀྱིལ་འཁོར་ཡིན། །སྤྱན་རས་གཟིགས་ལ་འབྲེལ་པ་ཆེར་བཞག་རྣམས་། །བདེ་བ་ཅན་དུ་ཁྲིད་ནས་འོང་ངོ་ཞེས། །འོད་དཔག་མེད་ཀྱི་དྲུང་དུ་དམ་བཅའ་མཛད། །སྤྱན་རས་གཟིགས་ཀྱི་སྤྲུལ་པ་གྲངས་མེད་ཀྱང་། །དངོས་ཉིད་བདེ་བ་ཅན་དུ་སྒྱུ་རྟག་ཏུ་བཞུགས། །དེ་དོན་མདོ་སྡེ་རྣམས་ལས་རྒྱ་ཆེར་གསུངས། །བསྡུས་དོན་བཀའ་ཆེན་བཀའ་འབུམ་རྣམས་ན་གསལ། །དཀྱིལ་འཁོར་འདི་དང་འབྲེལ་ཕྱིར་དེར་ལམ་
སྟོན། །དེ་ཡང་རྔ་སྒྲའི་རྒྱལ་པོའི་གཟུངས་ཀྱི་ཚིག །འདི་ནས་ནུབ་ཀྱི་ཕྱོགས་རོལ་ན། །འོད་དཔག་མེད་ཀྱི་ཞིང་ཁམས་ཡོད། །སུ་ཞིག་དེ་ཡི་མཚན་འཛིན་པ། །ཞིང་མཆོག་དེ་རུ་སྐྱེ་བར་གསུངས། །ཚེ་འདས་རིགས་ཀྱི་བུ་ཁྱོད་ཀྱང་། །འོད་དཔག་མེད་པའི་མཚན་བཟུང་ནས། །ཞིང་མཆོག་དེ་རུ་འགྲོ་བར་གྱིས། །ཞེས་པའི་ཚིག་གིས་ལམ་སྟོན་ཏེ། །ནམ་མཁའི་ཟླ་སྟེང་ཨ་ཡིག་དེ། །ཚེ་འདས་རྣམ་པར་ཤེས་པ་དངོས། །དབང་བསྐུར་ཡེ་ཤེས་སེམས་དཔའ་དང་། །དབྱེར་མེད་གཅིག་ཏུ་གྱུར་པར་དམིགས། །རང་ཉིད་ཀུན་རིག་བདག་བསྐྱེད་ནི། །སྐུ་ཆེ་རི་རབ་ཙམ་བསམ་ལ། །ཤངས་ནས་རླུང་ཞིག་བུས་པ་ནི། །ཤུགས་དྲག་བསྐལ་པའི་འཐོར་རླུང་བཞིན། །ཟླ་བ་ཨ་ཡིག་བཅས་པར་ཕོག །སྤྲིན་མེད་དྭངས་པའི་སྐར་མདའ་བཞིན། །བདེ་བ་ཅན་དུ་ཏ་ལེར་སོང་། །འོད་དཔག་མེད་པའི་མདུན་དྲུང་དུ། །།མེ་ཏོག་པདྨའི་སྦུབས་སུ་བསྟིམ། །པདྨ་འདམ་སོགས་ངག་གིས་གྱེར། །སྔགས་དེ་རྫོགས་ཚེ་ཡུད་ཙམ་ཞིག །མི་དམིགས་ལྟ་བའི་ངང་ལ་བཞག །དེ་མ་ཐག་ཏུ་བརྫུས་སྐྱེས་སུ། །གསེར་མདོག་མཚན་དཔེས་བརྒྱན་པའི་
ལུས། །དགེ་སློང་ཆ་ལུགས་ཅན་དུ་གྱུར། །སྔོན་གནས་རྗེས་དྲན་མངོན་ཤེས་ཀྱིས། །སློབ་དཔོན་བཀའ་དྲིན་རྗེས་སུ་དྲན། །སྐད་ཅིག་གློག་འགྱུ་ཇི་བཞིན་དུ། མདུན་གྱི་ནམ་མཁར་འོངས་ནས་ཀྱང་། །ཨེ་མའོ་སོགས་ཆེད་དུ་བརྗོད། །གཏང་རག་མཆོད་པ་བྱས་ནས་ཀྱང་། །སླར་ཡང་བདེ་ཆེན་ཞིང་གཤེགས་བསམ། །དེ་དག་ཡིད་ལ་བསྒོམ་བཞིན་དུ། །གཞུང་ཚིག་གཙྪན་བར་བརྗོད། །དེ་ནས་བསྔོ་བས་རྒྱས་འདེབས་བྱ། །བྱང་ཐལ་རྩ་རིག་བརྗོད་བཞིན་དུ། །སཱཙྪ་འདེབས་སམ་གདབ་ཏུ་བཅུག །ཆུས་མི་འཇིག་པའི་གནས་སུ་བསྐྱལ། །རྗེས་ཆོག་མན་ཆད་གཞུང་ལྟར་རོ། །བླ་མ་བརྩོན་འགྲུས་རྒྱ་མཚོ་ཡིས། །བསྐུལ་ནས་ཡི་གེ་པ་བྱས་ཏེ། །ཤིང་སྦྲུལ་སྨིན་དྲུག་གནམ་གང་དང་། །མགོ་ཟླའི་ཚེས་གཅིག་དགོང་ཐུན་མཚམས། །རཱ་ག་ཨ་སྱས་སྨྲས་པ་ཡིན། །ལུང་འདྲེན་མང་པོ་མ་མཆིས་ཀྱང་། །སློབ་དཔོན་རྣམས་ཀྱི་གསུང་རྒྱུན་དང་། །སྒྱུ་གཞུང་ཚིག་མཚུངས་ཕྱིར་ཐེ་ཚོམ་མེད། །ཕྱི་རབོས་དགེ་བཤེས་གསར་བུ་རྣམས། །འདི་ལ་བརྟེན་ནས་འགྲོ་བའི་དོན། །རྒྱ་ཆེ་རྒྱུན་མི་འཆད་པར་ཤོག །ལེའུ་ཉེར་གཅིག་པའོ་མངྒ་ལཾ།། །།