ལེའུ་ཉེར་གཉིས་པ། བར་དོ་རང་ངོ་འཕྲོད་ནས་གྲོལ་བའི་ཕྱིར། །བར་དོའི་ངོ་སྤྲོད་ཐོས་གྲོལ་བསྡུས་པ་ཡོད། །
༼ཟ༽ རི་ཆོས་མཚམས་ཀྱི་ཞལ་གདམས་ལས། བར་དོའི་ངོ་སྤྲོད་ཐོས་གྲོལ་བསྡུས་པ་བཞུགས་སོ། །ན་མོ་མ་ཧཱ་ཀ་རུ་ཎི་ཀ་ཡེ། འགྲོ་བ་འདྲེན་མཛད་སྤྱན་རས་གཟིགས་ལ་འདུད། །ཐུགས་དམ་མ་ཟིན་འཕོ་བ་མ་ཐེབས་སམ། །ཐེབས་ཤིང་ཟིན་ཀྱང་བརླིང་ཆ་ལྟ་བུ་ཡི། །བྱང་བུ་ཕྱིར་ལྡོག་ཞོར་ལ་ངོ་སྤྲོད་ནི། །གང་ཟག་ཐ་མལ་པ་ཡི་དབང་བྱས་ཏེ། །ཀྱེ་མ་ཀྱེ་ཧུད་སྐལ་ལྡན་རྒེ་མོ། །ཁྱོད་ནི་མི་རྟག་ཕ་རོལ་དུས་ལས་འདས། །ཤིའམ་མ་ཤི་ཁྱོད་རང་ཡིད་མི་ཆེས། །གདོས་བཅས་ཤ་ཁྲག་ལུས་མེད་ཡིད་ཀྱི་ལུས། །ལོ་བརྒྱད་ན་ཚོད་གར་སྐྱེས་རིགས་དྲུག་མདོག །ཉི་ཟླ་མེད་ཀྱང་རང་ལུས་འོད་ཀྱིས་གསལ། །ཡིད་ལ་དྲན་ཚེ་རྫུ་འཕྲུལ་སྟོན་པར་ནུས། །གནས་ལ་ངེས་མེད་རི་རྩེ་རྒྱ་མཚོའི་འགྲམ། །གྲོགས་ལ་ངེས་མེད་ཤི་གསོན་སུ་དང་འགྲོག །ཟས་ལ་ངེས་མེད་དྲི་དང་གསུར་གྱིས་ཚིམ། །མ་བསྔོས་བར་དུ་ཟས་ཀྱང་ཐོབ་པ་མེད། །རེས་འགའ་ཟག་བཅས་མངོན་ཤེས་གསལ་བ་ན། །སྐྱེ་བ་སྔ་ཕྱི་བར་གསུམ་དྲན་ན་ཡང་། །དེ་མ་ཐག་ཏུ་བརྗེད་དེ་འཁྲུལ་ནས་འགྲོ། །སྟོང་གསུམ་འཇིག་རྟེན་སྐད་
ཅིག་ཡུད་ལ་འཁོར། །ཆུ་དང་མེ་ལོང་གཟུགས་མེད་གྲིབ་མ་མེད། །བྱེ་མ་ས་འབོལ་ནང་དུ་རྗེས་མི་དོད། །དེ་ཚེ་ཁྱོད་རང་བར་དོར་འཁྱམས་རྟགས་ཡིན། ང་ཉིད་ཤི་བར་ཤེས་ཏེ་སེམས་སྡུག་ཆེ། །ཅི་དྲག་གང་དྲག་སྙིང་ནི་གས་ལ་ཐུག །ད་རེས་དམ་ཆོས་མ་འགྲུབ་འགྱོད་པ་ཆེ། །སྡིག་ལྟུང་གང་བྱས་དྲན་པས་ཡིད་མི་བདེ། །གཤིན་རྗེའི་ཕོ་ཉ་སླེབ་དོགས་སྐྱག་པ་ཆེ། །ཉེ་དུ་རྣམས་ལ་ཡུས་ཆེ་རེ་མཁང་ཆེ། །ཚུར་སྨྲས་གོ་ཞིང་ཕར་སྨྲས་མི་གོ་སྡུག །མ་ངུ་ང་ནི་འདི་ན་ཡོད་ཅེས་འབོད། །དྲུང་དུ་འོང་ནས་འཁྱུད་ཅིང་ཁ་གཏུགས་ཀྱང་། །མ་མཐོང་ངུས་པས་རང་ཉིད་ཤི་བར་ཤེས། །རེ་སའི་སྐྱབས་གནས་བླ་མཆོད་དྲུང་དུ་འགྲོ། །དམ་ཚིག་མི་གཙང་ཆོ་ག་མ་དག་དང་། །ཏིང་འཛིན་མི་གསལ་ཉོན་མོངས་གང་སྐྱེས་མཐོང་། །འདི་ཚོས་ང་བསླུས་སྙམ་དུ་ཞེ་སྡང་སྐྱེ། །མྱུར་དུ་ལུས་གཅིག་ཨེ་ཐོབ་ཀུན་ཏུ་ཚོལ། །དེ་འདྲའི་སྣང་བ་ཁྱོད་ལ་འཆར་བ་དེ། །སྒྱུ་སུ་ཡང་མ་ལེན་ཁྱོད་རང་འཁྲུལ་སྣང་ཡིན། །ཞག་བཞི་ཕན་ཆད་ཁྱོད་ཀྱི་སྣང་བ་ལ། །ཕྱོགས་མཚམས་སྟེང་འོག་འཇའ་འོད་ཐིག་ལེས་གང་། །ཞི་བའི་ལྷ་ཚོགས་མང་པོས་ནམ་
མཁའ་གང་། །གསལ་འཚེར་ལྷུན་སྡུག་གཟི་བརྗིད་འོད་དུ་འབར། །དེ་དག་ཐུགས་ལས་ཡེ་ཤེས་ལྔ་ཡི་ལམ། །འོད་ཟེར་བཀྲག་ལ་འཚེར་བ་སྙིང་གར་ཟུགས། །དེ་དང་མཉམ་དུ་རིགས་དྲུག་འཁོར་བའི་ལམ། །བཀྲག་མདངས་མེད་པ་དྲུག་ཀྱང་གཤིབས་ནས་འཆར། །དེ་ཚེ་རིགས་དྲུག་ལམ་དུ་མ་འགྲོ་བར། །ཡེ་ཤེས་ལྔ་ཡི་འོད་ལམ་རྒྱུད་དུ་སོང་། །རིགས་ལྔའི་ལྷ་ལ་གུས་པས་གསོལ་བ་ཐོབ། །དེ་རྗེས་ཡི་དམ་མཁའ་འགྲོ་ཆོས་སྐྱོང་རྣམས། །དུར་ཁྲོད་ཆས་བརྒྱད་གར་གྱི་ཉམས་དགུར་ལྡན། །རོལ་མོའི་སྒྲ་དང་ཧཱུྃ་ཕཊ་འབྲུག་སྟོང་ལྡིར། །འཇིག་རྟེན་ཁམས་ཀུན་ཤིག་ཤིག་ཡོམ་ཡོམ་འགུལ། །ཁྱོད་ཉིད་བར་དོའི་ལམ་ནས་བསུ་ཕྱིར་འབྱོན། །མ་འཇིགས་མ་སྐག་ཡི་དམ་ངོས་བཟུང་གིས། །དག་པ་མཁའ་སྤྱོད་གནས་སུ་འཁྲིད་པར་འགྱུར། །དེ་རྗེས་ཁྲག་འཐུང་ཁྲོ་བོའི་ལྷ་ཚོགས་རྣམས། །ཁྱོད་ཉིད་བར་དོའི་ལམ་ནས་བསུ་ཕྱིར་འབྱོན། །འཇིགས་སུ་རུང་ཞིང་བལྟ་བར་མི་བཟོད་པ། །ཧཱུྃ་ཕཊ་ཐུག་ཆོམ་འབྲུག་སྟོང་དུས་གཅིག་སྒྲ། །གནམ་ས་བར་སྣང་ཐམས་ཅད་ཁྲོ་བོས་གང་། །སོད་སོད་རྒྱོབ་རྒྱོབ་འོད་ཟེར་མཚོན་ཆའི་ཆར། །དཔེར་ན་ཉེས་ཆེན་
བཙོན་དུ་བཟུང་བ་བཞིན། །ཁྲོས་པས་མི་ཐར་གར་སོང་དེ་འདྲས་གང་། །དེ་དག་གཞན་ནས་འོང་བ་མ་ཡིན་ཏེ། །ཁྱེད་རང་ལུས་ལྷ་ཞི་ཁྲོའི་ལྷ་ཚོགས་ཡིན།་དཔེར་ན་དགྲ་འཇིགས་ཆེ་བའི་ས་ཕྱོགས་སུ། །བསུ་མིའི་དམག་དང་དགྲ་བོ་ནོར་བ་བཞིན། །མ་སྐྲག་མ་སྔངས་མ་འབྲོས་དད་གུས་གྱིས། །བདུན་གཉིས་ཕན་ཆད་རེ་ཞིག་འཇིགས་སྐྲག་ཡལ། །བདུན་ཕྲག་རེ་རེའི་བར་ན་འཇིགས་སྐྲག་རེ། །ཁ་ཆར་མུན་ནག་དམག་གིས་དེད་པ་དང་། །ཁྲོ་བོ་གཤིན་རྗེ་གཅན་གཟན་ཚོགས་ཀྱིས་དེད། །མདུན་དུ་གཡང་ས་དཀར་དམར་ནག་པོས་ཆོད། །རི་བོ་སྟོང་ཉིལ་རྒྱ་མཚོ་སྟོང་འཁྲུགས་སྒྲ། །ནགས་ཆེན་མེ་མཆེད་སྒྲ་དང་རླུང་ཆེན་སྒྲ། །འཇིགས་པའི་སྒྲ་བཞི་ཡ་ངའི་འཕྲང་བརྒྱད་འཆར། །དེ་ཚོ་ཁྱོད་རང་སེམས་ཀྱི་འཁྲུལ་སྣང་ཡིན། །ཁྱོད་ལ་འདུས་བྱས་ཤ་ཁྲག་ལུས་མེད་པས། །མཚོན་ཆ་གཡང་ས་མེ་ཆུས་འཆི་རྒྱུ་མེད། །དེ་དོན་ཡིད་ལ་ཟུངས་ལ་་འཇིགས་སྐྲག་སྤོངས། །ཀུན་རིག་སྒོ་ནས་འགྲོ་དོན་བྱེད་མཁན་རྣམས། །སངས་རྒྱས་སྤྲུལ་པ་ཡིན་པར་ཐུབ་པས་གསུངས། །བླ་མཆོད་མ་དག་མི་གཙང་བསམ་པ་རྣམས། །
ཁྱོད་རང་སྣང་བ་མ་དག་འཁྲུལ་པ་ཡིན། །དད་གུས་བསྐྱེད་དང་མི་བསླུ་ཁྱོད་ལ་ཕན། །ཁྱོད་ཀྱི་མི་ལུས་ཐོབ་འདོད་ལུས་ཚོལ་བ། །ཁྱོད་རང་འཁོར་བར་འཁྱམ་འདོད་བློ་ནོར་ཡིན། །སྐྱེ་རྒས་ན་འཆི་གྲངས་མེད་མི་འཚེར་རམ། །མི་ལུས་ལྷ་ལུས་ལེན་འདོད་བསམ་པ་སྤོངས། །ཁྱེད་ལ་ཕན་ཕྱིར་སངས་རྒྱས་ཕྲིན་ལས་ཀྱི། ཤིང་རྟ་འདྲེན་མཛད་ངེད་ཅག་རྣམས་ཡིན་པས། །དད་གུས་སྐྱེད་ལ་མ་ཡེངས་ཚིག་དོན་ཉོན། །གསང་སྔགས་ཟབ་མོའི་ཕྱིར་ལྡོག་དབང་བསྐུར་གྱིས། །སྒྲིབ་པ་སྦྱང་རྗེས་མ་ཆགས་མ་ཞེན་པར། །གཏན་དུ་བདེ་ཞིང་ཕྱིར་མི་ལྡོག་པའི་གནས། །ནུབ་ཕྱོགས་བདེ་བ་ཅན་གྱི་ཞིང་དུ་སོང་། །སངས་རྒྱས་འོད་དཔག་མེད་པའི་ཞལ་བལྟ་ཞིང་། །དམ་ཆོས་ཉན་པའི་བསམ་པ་མ་བརྗེད་ཅིག །ཅེས་བརྗོད་དེ་ནས་ཕྱིར་ལྡོག་དབང་བསྐུར་དང་། །ཆགས་ཞེན་སྤངས་ཕྱིར་ཟས་བསྔོས་ལམ་བསྟན་ནས། །རྣམ་ཤེས་སྤར་ཞིང་བསྔོ་སྨོན་རྒྱ་ཡིས་གདབ། །བླ་མ་བཱརྨ་སཱ་ག་རས་བསྐུལ་ནས། །རྟ་ལོ་ཐ་སྐར་ཟླ་བའི་ཚེས་བཞིའི་ཉིན། །དཀོར་སྐྱེ་རཱ་ག་ཨ་སྱས་སྨྲས་པ་དེ། །དཀོར་འདོད་བརྩོན་འགྲུས་རྒྱ་མཚོས་ཡི་གེར་བྲིས། །ལེའུ་ཉེར་གཉིས་པའོ་མངྒ་ལཾ།། །།